တရုတ်နိုင်ငံပိုင် သတင်းဌာနတစ်ခုဖြစ်တဲ့ CCTV က   တရုတ်တပ်မတော်က ပိုင်ဆိုင်ထားတဲ့ နျူကလီးယား ထိပ်ဖူးတပ် တိုက်ချင်းပစ်ဒုံးကျည် တစ်မျိုးရဲ့ အသေးစိတ် အချက်အလက်များကို ထုတ်ဖော်လိုက်ပါတယ်။ ဒီလိုမျိုးထုတ်ဖော်မှုဟာ တရုတ်နိုင်ငံအတွက် ပထမဆုံးလည်းဖြစ်ပါတယ်။ အခုအသေးစိတ် အချက်အလက်တွေထွက်ပေါ်လာတဲ့ဒုံးကျည်က DF-5 အမျိုးအစား ဒုံးကျည်ပါ။

DF-5 ဒုံးကျည်က တရုတ်နိုင်ငံရဲ့ ပထမမျိုးဆက် မဟာဗျူဟာမြောက် တိုက်ချင်းပစ်ဒုံးကျည်ဖြစ်ပါတယ်။ ၁၉၇၀ ပြည့်နှစ် အလွန်ကာလများမှာထုတ်လုပ်ပြီး ၁၉၈၁ ခုနှစ်မှာ စတင်အသုံးပြုခဲ့တာပါ။  သူက အဆင့်နှစ်ဆင့်ပါ ဒုံးကျည်ဖြစ်ပြီး နျူကလီးယားထိပ်ဖူး တစ်ခုတည်းကိုသာသယ်ဆောင်နိုင်ပါတယ်။ ဒါပေမဲ့ သူသယ်ဆောင်နိုင်တဲ့   နျူကလီးယားထိပ်ဖူးရဲ့ ပေါက်ကွဲအားက  တီအန်တီယမ်း  ၄ မဂ္ဂါတန် ပေါက်ကွဲအားနဲ့ညီမျှပါတယ်။ ဒီပမာဏက ဟီရိုရှီးမားမှာ ပေါက်ကွဲခဲ့တဲ့ အက်တမ်ဗုံးရဲ့ ပေါက်ကွဲအားထက် အဆ ၂၀၀ နီးပါးပိုများပါတယ်။

ဒါ့အပြင် သူ့ရဲ့ထိရောက် အကွာအဝေးက မိုင်ပေါင်း ၇၄၀၀ ကျော်ရှိတာကြောင့် တရုတ်နိုင်ငံကနေဆိုရင် အမေရိကန်က DF-5 ဒုံးကျည်ရဲ့ပစ်ကွင်း အတွင်း ရောက်ရှိနေပါတယ်။

MWD Web Portal

နည်းပညာသတင်း

နေပြည်တော် ဇွန် ၁၀

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ဇနီးဒေါ်ကြူကြူလှ၊ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ခရီးစဉ်တွင် လိုက်ပါလာသည့် အဖွဲ့ဝင်များ၊ မန္တလေးတိုင်းဒေသကြီး ဝန်ကြီးချုပ်၊ စစ်ကိုင်းတိုင်းဒေသကြီး ဝန်ကြီးချုပ်တို့လိုက်ပါ၍ ယနေ့တွင် စစ်ကိုင်းမြို့နှင့် မန္တလေးမြို့တို့အတွင်း ငလျင်ဘေးဒဏ်ကြောင့် ထိခိုက်ပျက်စီးဆုံးရှုံးမှုများအပေါ် ပြန်လည်ထူထောင်ရေးလုပ်ငန်းများ ဆောင်ရွက်ပေးနေမှုများအား သွားရောက်ကြည့်ရှုစစ်ဆေးပြီး လိုအပ်သည်များ ဖြည့်ဆည်းဆောင်ရွက်ပေးသည်။

စစ်ကိုင်းမြို့၊ အမှတ်(၁)အခြေခံပညာအထက်တန်းကျောင်း

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် စစ်ကိုင်းမြို့၊ အမှတ်(၁)အခြေခံပညာအထက်တန်းကျောင်းသို့ ရောက်ရှိကြရာ ကျောင်းအုပ်ဆရာမကြီးနှင့် တာဝန်ရှိသူများက ကြိုဆိုနှုတ်ဆက်ကြသည်။ ထိုသို့ကြိုဆို နှုတ်ဆက်စဉ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က နိုင်ငံတော်အနေဖြင့် ပညာရည်မြင့်မားရေးအတွက် KG + 9 အထိ အခမဲ့ပညာရေးစနစ်ဖြင့် သင်ကြားပေးလျက်ရှိကြောင်း၊ ပညာတတ်များဖြစ်မှသာလျင် အကောင်းအဆိုး၊ အကြောင်းအကျိုးကို ဝေဖန်ပိုင်းခြားနိုင်သည့် လူသားအရင်းအမြစ်ကောင်းများလည်း ရရှိနိုင်မည်ဖြစ်ပြီး ဒေသနှင့်နိုင်ငံ၏အကျိုးကိုလည်း ပိုမိုဖော်ဆောင်နိုင်မည်ဖြစ်ကြောင်း၊ ထို့ကြောင့် ပညာရေးဝန်ထမ်းများအနေဖြင့် မိမိတို့တာဝန်ယူထားရသည့် သင်ကြားရေးလုပ်ငန်းတာဝန်များကို ကျေပွန်စွာထမ်းဆောင်သွားကြရန်နှင့် စာပေပညာ၊ လူမှုဆက်ဆံရေး အသိပညာများရရှိစေရေး သင်ကြားပေးသွားရမည်ဖြစ်ကြောင်း၊ “အမျိုးသားစည်းကမ်းအစ စာသင်ကျောင်းက” ဟူသည့်အတိုင်း ကလေးငယ်များအနေဖြင့် ငယ်စဉ်ကလေးဘဝ ကတည်းကပင် စည်းကမ်းစနစ်တကျဖြင့် နေထိုင်သွားလာပြောဆိုတတ်စေရေး သင်ကြားပေးသွားရမည်ဖြစ်ကြောင်း၊ ကျောင်းနေအရွယ်ကလေးများအားလုံး ပညာသင်ကြားနိုင်ရေးအတွက်လည်း စည်းရုံးဆောင်ရွက်သွားကြရန် လိုကြောင်းဖြင့်မှာကြားပြီး လိုအပ်ချက်များကို မေးမြန်းဖြည့်ဆည်းဆောင်ရွက်ပေးသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် ပြန်လည်ပြုပြင်တည်ဆောက်ရန်လိုအပ်သည့် စာသင်ဆောင်များနှင့် ယာယီစာသင်ဆောင် ဆောက်လုပ်နေမှုတို့အား လှည့်လည်ကြည့်ရှု၍ တာဝန်ရှိသူများ၏ တင်ပြချက်များအပေါ် စာသင်ဆောင်များ ပြန်လည်ပြုပြင်တည်ဆောက်ရာတွင် ရေရှည်ခိုင်ခံ့ကောင်းမွန်ရေးအတွက် စနစ်တကျဆောင်ရွက်သွားရန်နှင့် အခြားလိုအပ်သည်များကို မှာကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် စာသင်ဆောင်များတွင် ကျောင်းသား၊ ကျောင်းသူများ ပညာသင်ယူနေမှုအခြေအနေများကို လိုက်လံကြည့်ရှုအားပေးခဲ့သည်။

ရာဇမဏိစူဠာ ကောင်းမှုတော်စေတီတော်မြတ်ကြီး

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် ရာဇမဏိစူဠာ ကောင်းမှုတော်စေတီတော်မြတ်ကြီးသို့ ရောက်ရှိကြရာ ဂေါပကအဖွဲ့ဥက္ကဋ္ဌ ဦးသန်းထွန်းအောင်နှင့် အဖွဲ့ဝင်များက ကြိုဆိုနှုတ်ဆက်ကြသည်။ ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီး၊ အဖွဲ့ဝင်များသည် စေတီတော်မြတ်ကြီးရှိ ဗုဒ္ဓရုပ်ပွားတော်မြတ်အား ဖူးမြော်ကြည်ညိုကာ ပန်း၊ ရေချမ်း၊ ဆီမီးနှင့် သစ်သီးဆွမ်းတို့ကို ကပ်လှူပူဇော်သည်။ ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် မန္တလေးငလျင်ကြီးလှုပ်ခတ်ခဲ့မှုကြောင့် ကောင်းမှုတော်စေတီတော်မြတ်ကြီးအတွင်းပိုင်း၊ အပြင်ပိုင်းနှင့် စောင်းတန်းများ၊ သာသနိကအဆောက်အဦများ၌ ထိခိုက်ပျက်စီးမှုများဖြစ်ပေါ်ခဲ့မှု၊ အပျက်အစီးများ ဖယ်ရှားရှင်းလင်းခြင်းလုပ်ငန်း ဆောင်ရွက်ထားရှိမှု၊ ပြန်လည်ထူထောင်ရေးလုပ်ငန်းများ ဆောင်ရွက်ထားရှိမှုတို့ကို လိုက်လံကြည့်ရှုစစ်ဆေးပြီး တာဝန်ရှိသူများ၏ တင်ပြချက်များအပေါ် လိုအပ်သည်များ လမ်းညွှန်မှာကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် စေတီတော်မြတ်ကြီး မြောက်ဘက်မျက်နှာစာရှိ မေတ္တာကန်၌ ငါးစာကျွေးခြင်း၊ ငါးလွှတ်ခြင်းတို့ဆောင်ရွက်၍ ကုသိုလ်ယူကြသည်။

ထို့နောက် စေတီတော်မြတ်ကြီးရှိ အောင်မြေဗောဓိဓမ္မာရုံအတွင်း၌ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်အား ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီးသက်ပုံနှင့် ဂေါပကအဖွဲ့ဝင်များက ရာဇမဏိစူဠာ ကောင်းမှုတော်စေတီတော်မြတ်ကြီးသမိုင်းကြောင်း မှတ်တမ်းဓာတ်ပုံများ၊ မန္တလေးငလျင်မလှုပ်ခတ်မီမှတ်တမ်းဓာတ်ပုံများနှင့် ငလျင်လှုပ်ခတ်ခဲ့မှုကြောင့် ထိခိုက်ပျက်စီးခဲ့ရမှုမှတ်တမ်းဓာတ်ပုံများဖြင့် ရှင်းလင်းတင်ပြကြရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က ထိခိုက်ပျက်စီးခဲ့ရမှုများကို မူလလက်ရာအတိုင်း ပြန်လည်ပြင်ဆင်ဆောင်ရွက်သွားရန်၊ မေတ္တာကန်ပတ်လည်၌ အရိပ်ရအပင်များကို အတန်းလိုက်၊ အကန့်လိုက်စိုက်ပျိုးသွားရန်၊ ဘုရားစေတီများရှိ စောင်းတန်းများတွင် ဘုရားဖူးလာရောက်သူများ စိတ်အေးချမ်းသာစွာဖြင့် နားနေနိုင်ရေးဆောင်ရွက်ပေးသွားရန်လိုကြောင်းနှင့် အခြားလိုအပ်သည်များကို လမ်းညွှန်မှာကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီးတို့က စေတီတော်မြတ်ကြီးအတွက် ဘက်စုံစုပေါင်းအလှူတော်ငွေများကို ပေးအပ်လှူဒါန်းရာ ဂေါပကအဖွဲ့ဝင်များက လက်ခံရယူကြသည်။

ဆွမ်းဦးပုညရှင်စေတီတော်

ဆက်လက်ပြီး နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်ဇနီး၊ အဖွဲ့ဝင်များသည် ငလျင်ဒဏ်ကြောင့်ထိခိုက်ပျက်စီးမှုများဖြစ်ပေါ်ခဲ့သည့် ဆွမ်းဦးပုညရှင်စေတီတော်သို့ ရောက်ရှိကြပြီး ထိခိုက်ပျက်စီးမှုများအား ရှင်းလင်းဆောင်ရွက်ထားရှိမှုများကို လိုက်လံကြည့်ရှုစစ်ဆေးသည်။

ယင်းနောက် ဓမ္မာရုံ၌ ဂေါပကအဖွဲ့မှတာဝန်ရှိသူတစ်ဦးက ဆွမ်းဦးပုညရှင် စေတီတော်မြတ်ကြီးသမိုင်းကြောင်း မှတ်တမ်းဓာတ်ပုံများ၊ မန္တလေးငလျင်မလှုပ်ခတ်မီ မှတ်တမ်းဓာတ်ပုံများနှင့် ငလျင်လှုပ်ခတ်ခဲ့မှုကြောင့် ထိခိုက်ပျက်စီးခဲ့ရမှုမှတ်တမ်းဓာတ်ပုံများ၊ စေတီတော်ကြီးအား ကျွမ်းကျင်ပညာရှင်များက တိုင်းတာစစ်ဆေးခြင်းများပြုလုပ်ခဲ့မှု အခြေအနေများ၊ စေတီတော်မြတ်ကြီး ရေရှည်တည်တံ့ခိုင်မြဲရေးအတွက် သံကူကွန်ကရိထုတ်များဖြင့် အားဖြည့်တည်ထားမည့်နမူနာပုံစံများ၊ စေတီတော်မြတ်ကြီးနှင့် သာသနိကအဆောက်အဦများနေရာချထားမည့် နမူနာပုံစံများအား ရှင်းလင်းတင်ပြသည်။

ရှင်းလင်းတင်ပြမှုများအပေါ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က စေတီတော်မြတ်ကြီးအား ရှေးမူမပျက်မူလပုံစံအတိုင်း ပြန်လည်ပြင်ဆင်ထိန်းသိမ်းဆောင်ရွက်သွားရန်၊ စေတီတော်မြတ်ကြီး၏ ယခင်မှတ်တမ်းဓာတ်ပုံများကို ပြန်လည်စုဆောင်း၍ သမိုင်းမှတ်တမ်းဓာတ်ပုံများ စနစ်တကျပြုစုထားရှိသွားရန်နှင့် စေတီတော်ကြီးနှင့် သာသနိကအဆောက်အဦများ ပြန်လည်တည်ဆောက်ရာတွင် ခိုင်ခံ့မှုရှိစေရေး စနစ်တကျတွက်ချက်တည်ဆောက်သွားရန်နှင့် အခြားလိုအပ်သည်များကိုလမ်းညွှန်မှာကြားသည်။ ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် ဓမ္မာရုံတော်အတွင်းရှိ ဗုဒ္ဓရုပ်ပွားတော်မြတ်အား ဖူးမြော်ကြည်ညိုသည်။

စစ်ကိုင်းတံတား(အင်းဝ) ဂုံးအမှတ်(၄)နှင့်(၅) ဖယ်ရှားရှင်းလင်း

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် ဧရာဝတီတံတား(ရတနာပုံ)သို့ရောက်ရှိကြရာ တာဝန်ရှိသူတစ်ဦးက စစ်ကိုင်းတံတား(အင်းဝ) ဂုံးအမှတ်(၄)နှင့်(၅) အပျက်အစီးများကို ဖယ်ရှားရှင်းလင်း၍ ရေလမ်းကြောင်း ဖွင့်လှစ်ခြင်းလုပ်ငန်းဆောင်ရွက်နေမှုနှင့် ဧရာဝတီတံတား(ရတနာပုံ)တွင် Lateral Bracing, Bearing နှင့် Pier တိုင်များ ပျက်စီးသည့်အခြေအနေများရှင်းလင်းတင်ပြမှုအပေါ် လိုအပ်သည်များ လမ်းညွှန်မှာကြားသည်။

မဟာမြတ်မုနိဘုရားကြီး

၎င်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် မဟာမြတ်မုနိဘုရားကြီးသို့ရောက်ရှိကြပြီး ပန်း၊ ရေချမ်းကပ်လှူပူဇော်ကာ ဖူးမြော်ကြည်ညိုသည်။ ထို့နောက် ငလျင်ဘေးဒဏ်ဖြစ်ပေါ်ချိန်တွင် ပြင်းထန်သောလှုပ်ခတ်မှုများကြောင့် မြေခခဲ့ရသည့် စိန်ဖူးတော်၊ ငှက်မြတ်နားတော်တို့၌ စေတနာရှင် အများပြည်သူများလှူဒါန်းထားရှိသည့် ရတနာရွှေငွေကျောက်သံပတ္တမြားနှင့် စိန်ဖူးတော်များ၊ ငလျင်လှုပ်ခတ်စဉ် ကွာကျခဲ့ရသည့် ရှေးဟောင်းလက်ရာ နံရံဆေးရေးပန်းချီများ ကြည့်ရှုစစ်ဆေးပြီး တာဝန်ရှိသူများကို လိုအပ်သည်များ လမ်းညွှန်မှာကြားသည်။

ဆက်လက်ပြီး နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် မဟာမြတ်မုနိဘုရားကြီးနှင့် သာသနိကအဆောက်အဦများ ငလျင်ဒဏ်ကြောင့် ထိခိုက်ပျက်စီးခဲ့ရမှုများနှင့် ပြန်လည်ပြုပြင်တည်ဆောက်လျက်ရှိသည့်အခြေအနေများကို လိုက်လံကြည့်ရှုစစ်ဆေးပြီး တာဝန်ရှိသူများ၏ တင်ပြချက်များအပေါ် လိုအပ်သည်များ လမ်းညွှန်မှာကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်အား ပြတိုက်တော်ကြီးအတွင်း၌ မန္တလေးမြို့တော်ဝန်နှင့် မဟာမြတ်မုနိဘုရားကြီး ဂေါပကအဖွဲ့ဥက္ကဋ္ဌတို့က ငလျင်ဖြစ်ပေါ်ခဲ့စဉ်ထိခိုက်ပျက်စီးခဲ့ရမှုအခြေအနေများနှင့် ပြန်လည်တည်ဆောက်ရေးလုပ်ငန်းများ ဆောင်ရွက်လျက်ရှိမှုအခြေအနေများကို ရှင်းလင်းတင်ပြရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က ထိခိုက်ပျက်စီးခဲ့ရမှုများအား မူလလက်ရာမပျတ် စနစ်တကျဖြင့် ပြန်လည်ပြုပြင်ခြင်း၊ ထိန်းသိမ်းခြင်းများကို ဆောင်ရွက်သွားရန်လိုအပ်ကြောင်း၊ အင်ဂျင်နီယာရှုထောင့်မှကြည့်၍ ပြုပြင်မှုများကို ရေရှည်တည်တံ့ခိုင်မြဲအောင်ဆောင်ရွက်သွားရန်နှင့် ပြုပြင်မှုများကို စနစ်တကျမှတ်တမ်း ထားရှိရန်လိုကြောင်းနှင့် အခြားလိုအပ်သည်များ လမ်းညွှန်မှာကြားသည်။

မဟာအတုလဝေယန်(အတုမရှိ)ကျောင်းတော်ကြီးနှင့် စူဠာမုနိရုပ်ရှင်တော်မြတ်

ဆက်လက်ပြီး နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် မဟာအတုလဝေယန်(အတုမရှိ)ကျောင်းတော်ကြီးသို့ ရောက်ရှိကြရာ ဂေါပကအဖွဲ့ဥက္ကဋ္ဌ ဦးမြဝင်းနှင့် တာဝန်ရှိသူများက ကြိုဆိုနှုတ်ဆက်ကြသည်။ ယင်းနောက် ကျောင်းတော်ကြီးအတွင်းရှိ စူဠာမုနိရုပ်ရှင်တော်မြတ်နှင့် ဗုဒ္ဓရုပ်ပွားတော်မြတ်များကို ဖူးမြော်ကြည်ညိုကာ ပန်း၊ ရေချမ်း ဆက်ကပ်လှူဒါန်းသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် စူဠာမုနိရုပ်ရှင်တော်မြတ်အား ပိုမိုကြည်ညိုသပ္ပါယ်ဖွယ်ဖြစ်စေရေးအတွက် ရွှေသင်္ကန်းတော်နှင့် ရွှေပလ္လင်တော်ကပ်လှူပူဇော်ထားရှိမှုအားကြည့်ရှုပြီး လိုအပ်သည်များကို မှာကြားသည်။

၎င်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်ဇနီးတို့က ဘက်စုံစုပေါင်းအလှူတော်ငွေများကို ပေးအပ်လှူဒါန်းရာ ဂေါပကအဖွဲ့ဝင်များက လက်ခံရယူကြသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည် မဟာအတုလဝေယန်(အတုမရှိ) ကျောင်းတော်ကြီး ဧည့်သည်တော်မှတ်တမ်းစာအုပ်တွင် လက်မှတ်ရေးထိုးပြီး ကျောင်းတော်ကြီးနှင့် ရုပ်ပွားတော်မြတ်များကို ပိုမိုကြည်ညိုသပ္ပါယ်ဖွယ်ဖြစ်စေရေး ထိန်းသိမ်းဆောင်ရွက်ထားရှိမှုများကို လိုက်လံကြည့်ရှုစစ်ဆေးခဲ့ကာ လိုအပ်သည်များကို လမ်းညွှန်မှာကြားခဲ့ကြောင်း သတင်းရရှိသည်။

Source: MOI

ကမ္ဘာပေါ်မှာ  လက်ရှိအသုံးပြုနေတဲ့ ရွှေများနဲ့ တခြားအဖိုးတန်သတ္တုပစ္စည်းများက ကမ္ဘာ့မြေမျက်နှာပြင်အောက် ကီလိုမီတာ ၃၀၀၀ ကျော်မှာ ပိတ်မိနေတာပါ။ ဒါကြောင့် ကမ္ဘာပေါ်ရှိမြေပြင်မှန်သမျှကို အမြင့် ၁ ပေခွဲကျော်အထိ အပြည့်ခင်းနိုင်စေမယ့်ရွှေများက ကမ္ဘာ့အူတိုင်မှာ တည်ရှိနေနိုင်ဖွယ်ရှိတယ်လို့ သုတေသနပညာရှင်များက ခန့်မှန်းထားပါတယ်။ ဒီလိုမျိုးအဖိုးတန်လှတဲ့ သတ္တုပစ္စည်းများက  လွန်ခဲ့တဲ့ နှစ်ပေါင်း ၄ ဒသမ ၅ ဘီလီယံခန့်တုန်းက ဒီကမ္ဘာဂြိုဟ်ကြီး စတင်ဖြစ်တည်လာစဉ်ကတည်းက ပိတ်မိနေခဲ့တာဖြစ်တယ်လို့လည်း ပညာရှင်များကပြောပါတယ်။

ဂေါ့တင်ဂျန်တက္ကသိုလ်မှ သုတေသနပညာရှင်များက ဟာဝိုင်ယီရှိမီးတောင်မှနေ ထွက်ပေါ်လာတဲ့ မီးသင့်ကျောက်များ ကိုခွဲခြမ်းစိတ်ဖြာ လေ့လာရာမှ ဒီအချက် ကိုခန့်မှန်းနိုင်ခဲ့ကြတာပါ။ ပညာရှင်များရဲ့ ယူဆချက်တစ်ခုကို ပြောရရင် ကမ္ဘာကြီးရဲ့ အလယ်အူတိုင်မှာ ရွှေတွေများစွာရှိနေပြီး အဲဒီရွှေတွေက မီးတောင်လှုပ်ရှားမှုနဲ့အတူ ကမ္ဘာ့အပေါ်ယံလွှာဆီ တက်လာတာဖြစ်တယ်လို့ ဆိုထားတာဖြစ်ပါတယ်။

သုတေသနပညာရှင်များက ဟာဝိုင်ယီ မီးတောင်ကနေထွက်ရှိတဲ့   ကျောက်မှာ ပါဝင်တဲ့ အိုင်ဆိုတုပ်များနဲ့ တခြားကျောက်များမှ အိုင်ဆိုတုပ်များကို ခွဲခြမ်းစိတ်ဖြာ လေ့လာခဲ့တာ ဖြစ်ပါတယ်။     

MWD Web Portal

မလေးရှားနိုင်ငံ၌ ကျောင်းသားများကို တင်ဆောင်လာသည့် ကျောင်းကားတစ်စီး နှင့်အခြားယာဉ်တစ်စီးတို့ တိုက်မိမှု ဖြစ်ပွားရာ အနည်းဆုံးလူ ၁၅ ဦး သေဆုံး ကြောင်း တာဝန်ရှိသူများကပြောသည်။
အဆိုပါယာဉ်တိုက်မှုသည် ပီရတ်ပြည် နယ်ရှိ အရှေ့-အနောက်အမြန်လမ်းမကြီး ၌ နံနက်အစောပိုင်းတွင်ဖြစ်ပွားခြင်းဖြစ်ကြောင်း အရပ်ဘက်ကာကွယ်ရေးတပ်ဖွဲ့ ကထုတ်ပြန်ထားသည်။

ယာဉ်တိုက်မှုသည် ဇွန်လ ၉ ရက် နံနက် ၁ နာရီ ၁၀ မိနစ်တွင်ဖြစ်ပွားခြင်းဖြစ်ပြီး အဆိုပါယာဉ်တိုက်မှု၌ လူ ၄၈ ဦးပါဝင် ကာ ၁၃ ဦးမှာ နေရာမှာပင် ပွဲချင်းပြီးသေ ဆုံးသွားကြောင်း၊ ဒဏ်ရာရရှိသူများထဲမှ နောက်ထပ်နှစ်ဦးမှာ ဆေးရုံတွင်သေဆုံးသွားကြောင်း ကာကွယ်ရေးတပ်ဖွဲ့၏ ထုတ်ပြန်ချက်ကိုကိုးကား၍ Bernama သတင်းဌာနကဖော်ပြထားသည်။

ထိုဖြစ်စဉ်နှင့်ပတ်သက်၍ အဆင့်မြင့် ပညာရေးဝန်ကြီးဌာနအနေဖြင့် သေဆုံး၊ ဒဏ်ရာရရှိသူများ၏ မိသားစုများကို သင့်လျော်သလိုကူညီပေးရန် ဝန်ကြီးချုပ် ကညွှန်ကြားထားသည်။ 

Ref: Xinhua

Photo- NDTV

နစ်ဆန်းကုမ္ပဏီက ထုတ်လုပ်ထားတဲ့ Leaf ဆိုတဲ့ လျှပ်စစ်ကားက တစ်ချိန်တုန်းက လျှပ်စစ်ကား လောကကို ဦးဆောင်နိုင်ခဲ့သူဖြစ်ပါတယ်။ အခုဆိုရင် နစ်ဆန်းက သူတို့ရဲ့တတိယမြောက်မျိုးဆက်ဖြစ်တဲ့ Leaf လျှပ်စစ်ကားတစ်မျိုးကို အမြည်းပြသလိုက်ပါပြီ။ သူနဲ့ပတ်သက်တဲ့အသေးစိတ်အချက်အလက်များကိုတော့ ဒီလကုန် ပိုင်းမှာထုတ်ဖော်ပြသသွားဖွယ်ရှိတယ်လို့ မျှော်လင့်ရပါတယ်။

Leaf ကို ၂၀၁၀ ပြည့်နှစ်မှာစတင်ထုတ်လုပ်ခဲ့တာဖြစ်ပြီး လက်ရှိကမ္ဘာတစ်ဝန်းမှာ ခုနစ်သိန်းနီးပါးနဲ့ သွားထားတဲ့ ကီလိုမီတာ ပေါင်း ၂၈ ဘီလီယံအထိရှိလာချိန်မှာ အခု တတိယမျိုးဆက် Leaf ကိုထုတ်လုပ်လာတဲ့အတွက် ဘယ်လိုခေတ်ရှေ့ပြေးမှုတွေများ ပါဝင်နေမလဲလို့ အများကလည်းစိတ် ဝင်စားနေကြပါတယ်။

အမြည်းသဘော ထုတ်ဖော်ပြသမှုမှာတော့ လေခွင်းအားကောင်းစေဖို့အတွက် ကားရဲ့ဒီဇိုင်းပိုင်းမှာ အပြောင်းအလဲများစွာ လုပ်ထားတာတွေ့ရပါတယ်။ ဘာကြောင့် လဲဆိုရင် လေခွင်းအားကောင်းတာနဲ့အမျှ စွမ်းအင်သုံးစွဲမှုလည်း  လျော့နည်းမည့်အတွက် ဖြစ်ပါတယ်။

ခေတ်ပေါ်ကား တော်တော်များများမှာ မပါသေးတဲ့ လုပ်ဆောင်ချက်တစ်ခုဖြစ်တဲ့ Electrochromic နည်းပညာကို ကားအမိုးပိုင်းမှာ သုံးထားတာတွေ့ရပါတယ်။ ဒီနည်းပညာကြောင့် ခလုတ်တစ်ချက်နှိပ်လိုက်ရုံနဲ့ အမိုးကိုဘယ်လောက်ရာခိုင်နှုန်းအထိ ဖောက်ထွင်းမြင်နိုင်မလဲဆိုတာ ရွေးချယ်နိုင်မှာပါ။  

MWD Web Portal

နည်းပညာသတင်း

Xpeng ဆိုတာ တရုတ်နိုင်ငံရဲ့ လျှပ်စစ် ကားဈေးကွက်မှာ လွှမ်းမိုးမှုရှိတဲ့နာမည် တစ်ခုပါ။ အခုသူတို့က နောက်ထုတ်လုပ်မယ့် လျှပ်စစ်ကားတွေမှာ ကားအတွင်း အချက်အလက်ပြသမှုစနစ်ကို ဟွားဝေရဲ့ နည်းပညာ အသုံးပြုသွားမယ်လို့ ကြေညာ လိုက်ပါပြီ။

Xpeng ကုမ္ပဏီက လူမှုကွန်ရက်တစ်ခုမှာ တင်ထားတဲ့ဓာတ်ပုံအရ ဆိုရင် သူတို့ရဲ့နောက်လာမယ့် လျှပ်စစ်ကားအမျိုးအစားတွေမှာ HUD လို့ခေါ်တဲ့ မျက်နှာတူရူတည့်တည့်မှာ ကားရဲ့အချက်အလက်များ ကိုဖော်ပြပေးနေမယ့်စနစ် ပါဝင်နေတာကို တွေ့ရပါတယ်။ ဒီစနစ်က ဟွားဝေကုမ္ပဏီ ရဲ့စနစ်ပါ။

ဒီစနစ်မှာ မောင်းနှင်နေတဲ့ မော်တော်ယာဉ်တစ်စီးအတွက် ဖော်ပြဖို့လိုအပ်တဲ့ အလိုအပ်ဆုံးသော အချက်အလက်တွေကို ယာဉ်မောင်းက   သာမန်လိုမျိုးခေါင်းကို ငုံ့ကြည့်စရာမလိုဘဲ ရှေ့လေကာမှန်မှာတင် မြင်ရအောင် ဖော်ပြပေးမယ့်စနစ် ပါဝင်နေ ပါတယ်။

Xpeng နဲ့ဟွားဝေတို့ဆိုတာ အဆင့်မြင့် နည်းပညာများကို ပိုင်ဆိုင်ထားတဲ့ ကုမ္ပဏီ များဖြစ်ပါတယ်။ ဟွားဝေကုမ္ပဏီဆိုရင် သူကိုယ်တိုင်လည်း လျှပ်စစ်ကားတွေကို ထုတ်လုပ်သလို သူ့ရဲ့နည်းပညာကိုအခြား ကားတွေမှာ အသုံးပြုနိုင်အောင် ပူးပေါင်း ဆောင်ရွက်မှုတွေနဲ့အတူ နည်းပညာကဏ္ဍ ကိုလွှမ်းမိုးနိုင်အောင် ကြိုးပမ်းလာနေတာ တွေ့ရပါတယ်။    

နည်းပညာသတင်း

MWD Web Portal

တရုတ်နိုင်ငံမှ မကြာသေးမီက စတင် အသုံးပြုလိုက်တဲ့ မန်းရှန်ဆိုတဲ့ရေယာဉ် တစ်မျိုးက သမုဒ္ဒရာရေပြင်အနက်ပိုင်းမှာ တူးဖော်မှုတွေ လုပ်ဆောင်မယ့် ရေယာဉ် ဖြစ်ပါတယ်။ အခုဆိုရင် မန်းရှန်ကအရင်တုန်းက လူသားတွေ တူးဖော်မှုမလုပ်ခဲ့ဖူးတဲ့နေရာတွေမှာ တူးဖော်လေ့လာမှုတွေကို စတင်လုပ်ဆောင်နေပြီဖြစ်ပါတယ်။

မန်းရှန်ရဲ့အဓိက ရည်ရွယ်ချက်က ကမ္ဘာ့အပေါ်ယံ ကျောက်ချပ်လွှာနဲ့ ကမ္ဘာ့အလယ်လွှာတို့ကြားကို တူးဖော်မှုတွေ လုပ်ဆောင်နိုင်ဖို့ဖြစ်ပါတယ်။ ဒီလိုမျိုးတူးဖော်မှုကနေ မှတစ်ဆင့် ကမ္ဘာ့အလယ်လွှာမှာရှိတဲ့ နမူနာတွေကို ရယူခြင်းအားဖြင့် သုတေသနပညာရှင်တွေအတွက် ကမ္ဘာကြီးရဲ့ဖွဲ့စည်းတည်ဆောက်ပုံနဲ့ ဆင့်ကဲပြောင်းလဲမှုတို့ ကို အသေးစိတ်လေ့လာနိုင်စေဖို့ ကူညီပေးနိုင်မှာဖြစ်ပါတယ်။

မန်းရှန်ရေယာဉ်ကိုတည်ဆောက်မှုက အမေရိကန်ဒေါ်လာသန်း ၄၇၀ ကုန်ကျခဲ့ပေမယ့်လည်း သူ့မှာပိုင်ဆိုင်ထားတဲ့ အရာတွေက တစ်ကမ္ဘာလုံးနဲ့ သက်ဆိုင်တဲ့ တူးဖော်မှု စွမ်းဆောင်ရည်ပိုင်းမှာတော့ ထိပ်တန်းအဆင့်ကို ရောက်ရှိစေပါတယ်။ သူ့ရဲ့တန်ချိန်က ၃၃၀၀၀ ရှိပြီး အကျယ်က ၃၂ ဒသမ ၈ မီတာရှိပါတယ်။ သူသွားလာနိုင်တဲ့ရေမိုင် ပမာဏက ၁၅၀၀၀ ရှိကာ ရက်ပေါင်း ၁၂၀ ကြာအောင် လုပ်ငန်းများကို အလိုအလျောက် လုပ်ဆောင်နိုင်စွမ်းရှိတဲ့အတွက် ဝေးလံခေါင်ဖျား သမုဒ္ဒရာအတွင်းမှာ သူ့ရဲ့ရည်မှန်းချက်များကို အောင်မြင်အောင် အကောင်အထည်ဖော်နိုင်စေမှာပါ။

မန်းရှန်ဆီမှာရှိတဲ့ အထင်ရှားဆုံးသော စွမ်းဆောင်ရည်တစ်ခုက အနက်ပေပေါင်း ၃၆၀၀၀ အထိကို တူးဖော်နိုင်စွမ်းရှိတာပါပဲ။ ဒီစွမ်းဆောင်ရည်က ယခင်ရှိဖူးသမျှ သောတူးဖော်ရေးယာဉ်များထက် ပိုမိုမြင့်မားတာကို တွေ့ရပါတယ်။ အရင်တုန်းက အနက်ဆုံး တူးနိုင်တာဆိုလို့ ပေ ၃၂၈၀၀ အထိပဲရှိပါတယ်။

အခုလိုမျိုး အဆင့်မြင့်မားတဲ့ တူးဖော်ရေးကိရိယာကိုရရှိစေဖို့အတွက် တီထွင်သူများက နည်းပညာပိုင်းဆိုင်ရာ စိန်ခေါ်မှုများကို ခေတ်မီနည်းပညာများ အသုံးပြုပြီးကျော်ဖြတ်နိုင်ခဲ့တာပါ။ သူ့မှာအသုံးပြုထားတဲ့ကိရိယာများအနက်  အထင်ရှားဆုံးကိုပြရရင် အထူးပြုလုပ်ထားတဲ့ တိုက်တေနီယံသတ္တုစပ် ပိုက်လုံးနဲ့ စိန်သွားတို့ပဲ ဖြစ်ပါတယ်။

MWD Web Portal

ထရမ့်က ၂၀၂၅ မှ ၂၀၂၉ အတွင်း အမေရိကန်တွင် မွေးဖွားသည့် ကလေး တိုင်းအား ဒေါ်လာ ၁,၀၀၀ တန်ရင်းနှီးမြုပ်နှံမှုအကောင့်ဖွင့်လှစ်ပေးရန် ရည်ရွယ်ထားပြီး ထိုသို့ဆောင်ရွက်ပေးခြင်းဖြင့် အလုပ်သမားများ၏ ဘဝ များပြောင်းလဲပေးရန် ရည်မှန်းထားသည်။

ဇွန် ၉ ရက်နေ့တွင် အမေရိကန်သမ္မတ ဒေါ်နယ်ထရမ့်သည် ဝါရှင်တန်ရှိ အိမ်ဖြူတော်၌ "Invest in America" အလှည့်ကျ ဆွေးနွေးပွဲကို ဦးဆောင်ကျင်းပခဲ့ပြီး ရီပတ်ပလီကန်ပါတီ၏ ရည်မှန်းချက်ကြီးမားသော အသုံးစရိတ်ဥပဒေကြမ်းတွင် အရေးပါသည့် အချက်တစ်ခုကို မိတ်ဆက် ခဲ့သည်။ ၎င်းမှာ အမေရိကန်တွင် မွေးဖွားသည့် ကလေးတိုင်းအား ဒေါ်လာ ၁,၀၀၀ တန်တန်ဖိုးရှိသော ရင်းနှီးမြုပ်နှံမှုအကောင့်ဖွင့်လှစ်ပေးရန် ဖြစ်သည်။

"Trump Accounts" ဟု အမည်ပေးထားသော အဆိုပါအကောင့်များကို ၂၀၂၅ ခုနှစ် ဇန်နဝါရီမှ ၂၀၂၉ ခုနှစ် ဇန်နဝါရီအတွင်း မွေးဖွားသည့် အမေရိကန်နိုင်ငံသား ကလေးအားလုံးအတွက် အောက်လွှတ်တော်မှအတည်ပြုပြီး ဆီးနိတ်လွှတ်တော်တွင် အတည်ပြုချက် စောင့်ဆိုင်း နေသော "One Big, Beautiful Act" ဥပဒေကြမ်းပါ စမ်းသပ် အစီအစဉ် အရ ဖန်တီးပေးမည်ဖြစ်သည်။

အစိုးရဘတ်ဂျက်မှ ဒေါ်လာ ၁,၀၀၀ ကို စတော့ဈေးနှုန်းနှင့် ချိတ်ဆက် ထားသော Index fund တွင် ရင်းနှီးမြုပ်နှံမည်ဖြစ်ပြီး ကလေး၏ တရားဝင် အုပ်ထိန်းသူက စီမံခန့်ခွဲမည်ဖြစ်သည်။ အုပ်ထိန်းသူ သို့မဟုတ် အခြားပုဂ္ဂလိကအဖွဲ့အစည်းများက ကလေး၏ ဘဝတစ်လျှောက်လုံး တစ်နှစ်လျှင် ဒေါ်လာ ၅,၀၀၀ အထိ အဆိုပါအကောင့်သို့ ထည့်ဝင် နိုင်မည်ဖြစ်သည်။

အိမ်ဖြူတော် ပြောရေးဆိုခွင့်ရှိသူ ကယ်ရိုလိုင်းလီဗစ်က "Big, Beautiful Act ဥပဒေကို အတည်ပြုခြင်းဖြင့် အမေရိကန်တစ်ဝှမ်းရှိ အလုပ်လုပ်ကိုင် နေသော အလယ်လတ်တန်းစားမိသားစုများ၏ ဘဝများကို အမှန်တကယ် ပြောင်းလဲပေးမည်ဖြစ်သည်။ သမိုင်းတစ်လျှောက် အကြီးမားဆုံး အခွန် လျှော့ပေးခြင်း၊ ကလေးရှိက အခွန်လျှော့ပေးမှု(child tax credit) ကို တိုးချဲ့ခြင်းနှင့် အမေရိကန်ကလေးများကို အသက်ငယ်စဉ်ကတည်းက မှန်ကန်သော ဘဏ္ဍာရေးလမ်းကြောင်းပေါ်သို့ ရောက်ရှိစေမည့် 'Trump Account' အစီအစဉ်ကို ဖန်တီးပေးခြင်းတို့ ပါဝင်သည်” ဟု ပြောကြားခဲ့သည်။

အောက်လွှတ်တော်ဥက္ကဋ္ဌ မိုက်ဂျွန်ဆင်က Trump Account သည် သာမန်မိသားစုများ၏ အိမ်ရာဝင်ငွေများ တိုးပွားစေခြင်း၊ လုပ်ငန်းငယ် များအတွက် ဗျူရိုကရေစီအခက်အခဲများ လျှော့ချပေးခြင်းစသည့်စီးပွားရေးအကျိုးကျေးဇူးများကို ဆောင်ကြဉ်းပေးမည်ဟု ပြောကြား ခဲ့သည်။

အဆိုပါအခမ်းအနားကို အိမ်ဖြူတော်တွင် ကျင်းပခဲ့ပြီး Dell၊ Uber၊ Altimeter Capital၊ ARM Corp၊ Salesforce၊ ServiceNow၊ Robinhood နှင့် Goldman Sachs အပါအဝင် လုပ်ငန်းကြီးများ၊ ဘဏ်များနှင့် ရင်းနှီး မြုပ်နှံမှုရန်ပုံငွေများ၏ အကြီးတန်းခေါင်းဆောင်များ တက်ရောက်ခဲ့ ကြသည်။ ကုမ္ပဏီအကြီးအကဲများသည် ၎င်းတို့၏ ဝန်ထမ်းများ၏ ကလေးများအတွက် "Trump Accounts" သို့ ဒေါ်လာ ဘီလီယံချီ ရင်းနှီး မြုပ်နှံရန် ကတိပြုထားကြသည်။

Dell Technologies ၏ CEO မိုက်ကယ်ဒယ်လ်က “ကလေးတစ်ဦးစီ အတွက် ရင်းနှီးမြုပ်နှံမှုအကောင့်ဖွင့်ပေးခြင်းဖြင့် နောင်တွင် ကောလိပ် တက်ရောက်ရန်၊ အိမ်ဝယ်ရန်နှင့် မိသားစုထူထောင်ရန်အတွက်ကြီးမားသော ငွေကြေးများ စုဆောင်းနိုင်မည်ဖြစ်သည်။ Dell Technologies အနေဖြင့် Dell ဝန်ထမ်းများ၏ ကလေးအားလုံးအတွက် အစိုးရ၏ အစပြု ရင်းနှီးမြုပ်နှံမှုကို အလားတူထည့်ဝင်ပေးရန် ဂုဏ်ယူပါသည်” ဟု ပြောကြား ခဲ့သည်။

Trump Account ပြဋ္ဌာန်းချက်ကို ဇူလိုင် ၄ ရက်မတိုင်မီ Big Beautiful Act ဥပဒေကြမ်းကို ဆီးနိတ်လွှတ်တော်မှ အတည်ပြုနိုင်ရန် အမေရိကန် သမ္မတက တွန်းအားပေးနေချိန်တွင် ဘီလီယံနာ အီလွန်မက် ကဲ့သို့သော ပုဂ္ဂိုလ်များက အမေရိကန်၏ အမျိုးသားကြွေးမြီကို ပိုမိုမြင့်တက်စေနိုင် သည်ဟု ဝေဖန်ခဲ့ကြသည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကချင်ပြည်နယ်တွင် ဒေသအတွင်းရှိ လက်နက်ကိုင်များကြောင့် သဘာဝ ဘေးဒဏ်ကို ပိုမိုကြုံလာနေရကြောင်း သဘာဝပတ်ဝန်းကျင် အရေး တက်ကြွလှုပ်ရှားသူများက NP News သို့ ပြောသည်။ ကချင်ဒေသတွင်းရှိ လက်နက်ကိုင်များ၏ ရွှေတူးဖော်မှု၊ မြေရှားသတ္တုတူးဖော်မှု၊ သစ်မှောင်ခို ခုတ်ထွင်မှုများကြောင့် ကချင်ပြည်နယ်ရှိ သစ်တောဧရိယာများ ပျောက်ကွယ် လာနေပြီး မိုးရွာသွန်းသည်နှင့် မိုးကြီးခြင်း၊ အပူချိန်များတိုးလာခြင်း စသော သဘာဝဘေးအန္တရာယ်များကို ပိုမိုကြုံတွေ့လာနေကြရကြောင်း သဘာဝ ပတ်ဝန်းကျင်အရေး တက်ကြွလှုပ်ရှားသူတစ်ဦးကဆိုသည်။

“အဓိကကတော့ သစ်ပင်တွေကို ခုတ်တယ်။ သစ်ပင်ခုတ်လို့ တောင်ကတုံး ဖြစ်သွားရင် မြေရှား သတ္တုထုတ်တယ်။ နောက်ပြီး ရွှေတွေတူးကြ တယ်။ အဲဒီလို လုပ်ကြတော့ မိုးရွာတာနဲ့ တောင်ပေါ်ကရေတွေက သစ်ပင်တွေ မရှိတော့ အရှိန်နဲ့ဆင်းလာမယ်။ တောင်ပေါ်မှာ ရေမစုထားနိုင်တော့ဘူး။ အဲဒီလို ဆင်းလာရင် ရွှေတူးထားတဲ့မြေစာတွေနဲ့ရောပြီး မြစ်ကြောင်းတွေ တိမ်ကောကုန်တယ်။ ဒီတော့ ရေတွေက ပုံမှန်ထက် ပိုတက်လာတယ်။ သေချာတာကတော့ ဒါတွေဟာ အဲဒီဒေသတွေမှာရှိတဲ့ လက်နက်ကိုင်တွေရဲ့ လုပ်ရပ်ကြောင့် ပြည်သူတွေခံနေရတာတွေပဲ” ဟု ၎င်းက ဆိုသည်။

ထိုသို့ သစ်ပင်များပျောက်လာသည်နှင့် အမျှ ယခင်က ယင်းဒေသတွင် တည်ရှိခဲ့သည့် ရာသီဥတုအခြေ အနေများပါ ပြောင်းလဲလာမည်ဖြစ်ပြီး ကချင်ဒေသတွင် ဧရာဝတီမြစ်ဖျားစတည်ရာ မေခနှင့် မလိခမြစ်တို့တည်ရှိနေသည့်အတွက် ရေရှည်တွင် ဧရာဝတီမြစ်ကိုပါ ထိခိုက်လာနိုင်ကြောင်း သဘာဝပတ်ဝန်းကျင် အရေးလေ့လာ စောင့်ကြည့်နေသူ တစ်ဦးက ဆိုသည်။

“ပထမက သစ်တော၊ သစ်ပင်တွေကို ခုတ်တယ်။ အဲဒီတော့ မိုးရာသီ ရောက်တာနဲ့ ရေတွေက အရှိန်ပြင်းပြင်းနဲ့ နုန်းတွေကို မြစ်ကြောင်း တစ်လျှောက်သယ်လာတယ်။ တကယ်လို့အပင်တွေသာ ရှိနေရင် နုန်း ပါဝင်မှုကို လျော့ကျစေနိုင်တယ်။ ဒီထက်ဆိုးတာက မြေရှားကိစ္စ။ မြေရှား သတ္တုထုတ်ဖို့ ဓာတုပစ္စည်းတွေ သုံးရတယ်။ အဲဒီကထွက်တဲ့ စွန့်ပစ်ရေ တွေက မြစ်ကြောင်းတစ်လျှောက်သာ ပါလာခဲ့ရင် အဲဒီမြစ်ရေက သောက်သုံး လို့မရတော့တဲ့အထိဖြစ်မှာပဲ” ဟု ၎င်းက ဆိုသည်။ 

အိန္ဒိယအရှေ့မြောက်ဘက်သို့ ဝင်ရောက်သွားသည့် မုန်တိုင်းငယ်၏ အကြွင်းအကျန် တိမ်တိုက်များမှာ မြန်မာနိုင်ငံဘက်သို့ရောက်ရှိလာခဲ့ သည့်အတွက် မေလ (၃၀) ရက်ခန့် မှစတင်ကာ ကချင်ပြည်နယ်ရှိ ချီဖွေ၊ မြစ်ကြီးနားနှင့် ဝိုင်းမော်ဒေသတို့တွင် ရေကြီးရေလျှံမှုများဖြစ်ပွားခဲ့ပြီး လူထောင်နှင့်ချီကာ ရေဘေးသင့်ခဲ့ကြရသည်။

ကိုးကား- NP News

အီရန်နိုင်ငံရှိ မြို့အချို့တွင် ခွေးများကို အများသုံးနေရာများတွင် လမ်းလျှောက်ခိုင်းခြင်းနှင့် ယာဉ်များဖြင့် သယ်ဆောင်ခြင်းကို တားမြစ် လိုက်ပြီဖြစ်သည်။ မွတ်စ်လင်မ်အများစုနေထိုင်သော အဆိုပါနိုင်ငံတွင် ခွေးမွေးမြူခြင်းသည် ငြင်းခုန်မှုများရှိနေသော အကြောင်းအရာ တစ်ခု ဖြစ်သည်။

ဇွန်လ ၈ ရက်နေ့တွင် အီရန်မီဒီယာများက နိုင်ငံအလယ်ပိုင်းရှိ အစ္စဖာ ဟန်မြို့၊ တောင်ပိုင်းကာမန်မြို့နှင့် အနောက်ပိုင်း အီလမ်မြို့ အပါအဝင် မြို့ပေါင်း ၁၇ မြို့ခန့်တွင် ခွေးများကို အများသုံးနေရာများတွင် လမ်းလျှောက် ခိုင်းခြင်း သို့မဟုတ် ယာဉ်များဖြင့် သယ်ဆောင်ခြင်းကို တားမြစ် လိုက်ကြောင်း ဖော်ပြခဲ့သည်။ အာဏာပိုင်များက ထိုတားမြစ်ချက်သည် လူမှုအခြေအနေနှင့် ပြည်သူ့ကျန်းမာရေးကို ကာကွယ်ရန် ရည်ရွယ်ကြောင်း ပြောကြားခဲ့သည်။

၂၀၁၉ ခုနှစ်က တီဟီရန်တွင် ထုတ်ပြန်ခဲ့သော တားမြစ်ချက်နှင့် ဆင်တူ သည့် ထိုမူဝါဒအစီအစဉ်တွင် အီလမ်ကဲ့သို့သော မြို့အချို့က ယင်း စည်းကမ်းကို ချိုးဖောက်သူများအား တရားဥပဒေအရ အရေးယူမည်ဟု ကြေညာထားသော်လည်း ပြစ်ဒဏ်နှင့်ပတ်သက်၍ အတိအကျ ဖော်ပြ ထားခြင်း မရှိသေးပါ။

ခွေးမွေးမြူခြင်းနှင့် ခွေးလမ်းလျှောက်ခိုင်းခြင်းသည် အဆိုပါမွတ်စ်လင်မ် နိုင်ငံတွင် ဆယ်စုနှစ်များစွာကတည်းက အငြင်းပွားဖွယ်ရာ အကြောင်း အရာတစ်ခုဖြစ်သော်လည်း ခွေးများကို လုံးဝတားမြစ်ထားခြင်း မရှိသေးပါ။

အီရန်နိုင်ငံရှိ ဘာသာရေးလိုက်စားသူများစွာက ခွေးများကို ပွေ့ဖက်ခြင်း သို့မဟုတ် ခွေးတံတွေးနှင့် ထိတွေ့ခြင်းကို မစင်ကြယ်သော အပြုအမူ အဖြစ် မှတ်ယူကြပြီး အဆိုပါအိမ်မွေးတိရစ္ဆာန်များ မွေးမြူခြင်းကို အနောက်တိုင်းယဉ်ကျေးမှု၏ လွှမ်းမိုးမှုအဖြစ် ရှုမြင်ကြသည်။

၂၀၂၁ ခုနှစ်တွင် အီရန်လွှတ်တော်အမတ် ၇၅ ဦးက ခွေးမွေးမြူခြင်းကို “အီရန်နှင့် မွတ်စ်လင်မ်တို့၏ နေထိုင်မှုပုံစံကို တဖြည်းဖြည်း ပြောင်းလဲ စေနိုင်သော ဘေးအန္တရာယ်ရှိသည့် လူမှုရေးပြဿနာ” အဖြစ် ရှုတ်ချ ခဲ့သည်။

၂၀၁၇ ခုနှစ်က အီရန်ခေါင်းဆောင် Ali Khamenei က “သိုးထိန်းခြင်း၊ အမဲလိုက်ခြင်း သို့မဟုတ် စောင့်ကြပ်ခြင်းကဲ့သို့သော အကြောင်းပြချက် များမှလွဲ၍ ခွေးမွေးခြင်းသည် မနှစ်မြို့ဖွယ်ဖြစ်သည်” ဟု ကြေညာ ခဲ့သည်။ ထို့ပြင် ၎င်းက “မွတ်စ်လင်မ်မဟုတ်သူများ၏ နေထိုင်မှုပုံစံကို အတုယူခြင်း၊ ၎င်းတို့၏ယဉ်ကျေးမှုကို မြှင့်တင်ပေးခြင်း သို့မဟုတ် ပတ်ဝန်းကျင်ရှိသူများအား အနှောင့်အယှက်ဖြစ်စေခြင်းဆိုပါက ခွေးမွေးခြင်း ကို တားမြစ်မည်” ဟု ဖြည့်စွက်ပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂