ရုရှားကာကွယ်ရေးဝန်ကြီးဌာနက Sudzha မြို့မှ ကျန်ရှိနေသော ယူကရိန်း တပ်ဖွဲ့များကို တိုက်ထုတ်လိုက်ပြီဖြစ်ကြောင်း ကြေညာလိုက်သည်။ Sudzha မြို့သည် ယူကရိန်းတပ်ဖွဲ့များ ရုရှား၏ Kursk ဒေသတွင်းသို့ ဝင်ရောက်တိုက်ခိုက်စဉ်က သိမ်းပိုက်ထားသော အကြီးဆုံးမြို့ဖြစ်သည်။

ထို့အပြင် အနီးရှိ Melovoy နှင့် Podol ကျေးရွာများကိုလည်း ပြန်လည် သိမ်းပိုက်လိုက်ပြီဖြစ်ကြောင်း ဝန်ကြီးဌာနက မတ်လ ၁၃ ရက်နေ့တွင် ထုတ်ပြန်ခဲ့သည်။

Kursk ဒေသတွင် တိုက်ခိုက်နေသော ယူကရိန်းတပ်ဖွဲ့များသည် လွန်ခဲ့သည့် ၂၄ နာရီအတွင်း စစ်သည်ပေါင်း ၃၄၀ ကျော်၊ ခြေလျင်တိုက်ယာဉ် ၂ စီး၊ သံချပ်ကာယာဉ် ၃ စီးနှင့် အခြားစစ်ပစ္စည်းများစွာကို ဆုံးရှုံးခဲ့ရကြောင်း ဝန်ကြီးဌာနက ပြောကြားခဲ့သည်။

ယူကရိန်းသည် ၂၀၂၂ ခုနှစ်၊ ဖေဖော်ဝါရီလတွင် ရုရှားနှင့် စစ်ရေး ပြင်းထန်လာပြီးနောက် နိုင်ငံတကာမှ အသိအမှတ်ပြုထားသော ရုရှား နယ်မြေကို အကြီးမားဆုံးတိုက်ခိုက်မှုအဖြစ် ၂၀၂၃ ခုနှစ်၊ ဩဂုတ်လ ၆ ရက်နေ့တွင် Kursk ဒေသတွင်းသို့ ဝင်ရောက်တိုက်ခိုက်ခဲ့သည်။ ရုရှား၏ ခန့်မှန်းချက်အရ စစ်သည် ၃၅,၀၀၀ ခန့်ပါဝင်သော ယူကရိန်း၏ တိုက်ခိုက်မှုကို မြန်ဆန်စွာတားဆီးနိုင်ခဲ့ပြီး ထိုအချိန်မှစ၍ ယူကရိန်း၏ ထိန်းချုပ်မှုအောက်ရှိ နယ်မြေများ တဖြည်းဖြည်းကျဉ်းမြောင်းလာခဲ့သည်။

လွန်ခဲ့သည့် တစ်ပတ်အတွင်း ရုရှားစစ်တပ်သည် ယူကရိန်းနယ်စပ်မှ ၉ ကီလိုမီတာအကွာတွင် တည်ရှိပြီး ယခင်က လူဦးရေ ၅,၀၀၀ ခန့် နေထိုင် ခဲ့သော Sudzha မြို့အနီးနယ်မြေများကို မြန်ဆန်စွာ ပြန်လည် တိုက်ခိုက် သိမ်းပိုက်နိုင်ခဲ့သည်။ မတ်လ ၁၁ ရက်နေ့တွင် ရုရှား ကာကွယ်ရေး ဝန်ကြီး ဌာနက Sudzha မြို့၏ မြောက်ဘက်၊ အရှေ့ဘက်နှင့် အရှေ့တောင်ဘက် ရှိ Kursk ဒေသအတွင်းမှ ကျေးရွာ ၁၂ ရွာကို ပြန်လည် သိမ်းပိုက်လိုက်ပြီဖြစ်ကြောင်း ကြေညာခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တောင်ကိုရီးယား စစ်တပ်မှ စုံစမ်းစစ်ဆေးရေးအရာရှိများသည် Nogok-ri ကျေးရွာကို မတော်တဆ ဗုံးကြဲခဲ့မှုကြောင့် လူနည်းဆုံး ၂၉ ဦး ဒဏ်ရာ ရရှိခဲ့ပြီးပစ္စည်းဥစ္စာ ပျက်စီးဆုံးရှုံးမှုများ ဖြစ်ပေါ်ခဲ့သည့်အတွက် လေတပ် မှ လေယာဉ်မှူး ၂ ဦးအား အရေးယူနိုင်ရန် ဆောင်ရွက်လျက်ရှိသည်။

အဆိုပါဖြစ်ရပ်သည် မတ်လ ၆ ရက်နေ့တွင် မြောက်ကိုရီးယား နယ်စပ် အနီး Pocheon ရှိ Nogok-ri အပေါ်တွင် KF-16 တိုက်လေယာဉ် ၂ စီးမှ MK-82 ဗုံး ၈ လုံးကို မှားယွင်းစွာ ဗုံးကြဲခဲ့ခြင်းကြောင့် ဖြစ်ပွားခဲ့ခြင်းဖြစ်သည်။

“စစ်ဌာနချုပ်မှ စုံစမ်းစစ်ဆေးမှုတွင် လေယာဉ်မှူးများ၏ ပစ်မှတ် ကိုဩဒိနိတ်များကို မှားယွင်းစွာ ထည့်သွင်းခဲ့ခြင်းသည် မတော်တဆမှု၏ အဓိကအကြောင်းရင်းဖြစ်ကြောင်း အတည်ပြုနိုင်ခဲ့သည်” ဟု ကာကွယ်ရေးဝန်ကြီးဌာနက Yonhap သတင်းဌာနကို မတ်လ ၁၃ ရက်နေ့တွင် ပြောကြားခဲ့သည်။ စစ်ဆေးခံနေရသည့် လေယာဉ်မှူးများအား တာဝန်မှ ယာယီရပ်စဲထားပြီး ၎င်းတို့၏ လေယာဉ်မောင်းလိုင်စင်များကို ပြန်လည် သုံးသပ်နေသည်။

မှားယွင်းဗုံးကြဲမှုကြောင့် ပြည်သူ ၁၅ ဦးအပါအဝင် အနည်းဆုံး ၂၉ ဦး ဒဏ်ရာရရှိခဲ့ပြီး ၂ ဦးမှာ ပြင်းထန်စွာ ဒဏ်ရာရရှိခဲ့သည်။ သတ်မှတ်ထားသည့် လေ့ကျင့်ရေးပစ်ခတ်မှု နယ်မြေအပြင်ဘက်တွင် ဖြစ်ပွားခဲ့သည့် အဆိုပါ ပေါက်ကွဲမှုများကြောင့် အိမ် ၅ လုံး၊ ဘုရားကျောင်း ၁ ခု၊ ဂိုဒေါင် ၁ ခုနှင့် ဖန်လုံအိမ် ၁ ခုအပါအဝင် ပြည်သူ့အဆောက်အဦများ ပျက်စီးဆုံးရှုံးမှုများ ဖြစ်ပေါ်ခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

လက်ရှိဆီးရီးယား ကြားဖြတ်အစိုးရ သမ္မတအာမက်အယ်လ်ရှာရာနှင့် ဆီးရီးယား ဒီမိုက်ရက်တစ် တပ်ဖွဲ့မှူး မက်ဇ်လိုရမ်အဘာဒီတို့အကြား သဘောတူညီမှုတစ်ရပ်ကို လက်မှတ်ထိုးနိုင်ခဲ့ခြင်းကြောင့် ပြည်တွင်းစစ်ပြီးကာစ ဆီးရီးယားနိုင်ငံ၌ ကွဲပြားနေသည့် လက်နက်ကိုင်အဖွဲ့များ ပေါင်းစည်းရေးလုပ်ငန်း စတင်အသက်ဝင်လာပြီဖြစ်ကြောင်း ဆီးရီးယား ကြားဖြတ်အစိုးရက ပြောကြားခဲ့ပြီး သဘောတူညီချက်မိတ္တူကို ဆီးရီးယား အစိုးရ၏ တယ်လီဂရမ် အကောင့်တွင် ဖော်ပြခဲ့ပါသည်။ “ကာ့ဒ် အသိုင်း အဝိုင်းသည် ဆီးရီးယားနိုင်ငံတော်၏ အရေးပါသော အစိတ်အပိုင်း တစ်ခု ဖြစ်သည်” ဟုကြွေးကြော်ကာ “နိုင်ငံရေးလုပ်ငန်းစဉ်တွင် ဆီးရီးယား နိုင်ငံသားအားလုံး၏ နိုင်ငံရေးဖြစ်စဉ်တွင် ကိုယ်စားပြုပါဝင်မှုနှင့် ပါဝင်ခွင့် ကို အာမခံရန် သဘောတူညီခဲ့ကြောင်း၊ ဆီးရီးယားနိုင်ငံသည် ၎င်း၏ နိုင်ငံသားဖြစ်ခွင့်နှင့် ဖွဲ့စည်းပုံအခြေခံဥပဒေဆိုင်ရာ အခွင့်အရေး အားလုံးကို အာမခံပါသည်”ဟုပါရှိပါသည်။

နိုင်ငံလုံးဆိုင်ရာ အပစ်အခတ်ရပ်စဲရေးသဘောတူညီရန်၊ အရပ်ဘက်နှင့် စစ်ဘက်ဆိုင်ရာ အဖွဲ့အစည်းများအားလုံးကို ပေါင်းစည်းရန်၊ ယခင် အာဏာရှင်ဟောင်းအစိုးရ၏ အကြွင်းအကျန်များကို တိုက်ဖျက်ခြင်းကို ပံ့ပိုးကူညီရန် တို့လည်းပါဝင်ပါသည်။

အခြားသဘောတူညီချက်များကြားတွင် အိုးမဲ့အိမ်မဲ့ ဆီးရီးယား နိုင်ငံသားများအားလုံးပြန်လာရေး အာမခံချက်တို့ကိုလည်း သဘောတူညီထားကြောင်း ၎င်းကဆိုသည်။ 

ကာဒ့်လက်နက်ကိုင်အဖွဲ့ခေါင်းဆောင် အဘာဒီက အဆိုပါသဘောတူညီချက်သည် ကွဲပြားမှုအားလုံးပါဝင်သည့် ဆီးရီးယားနိုင်ငံသစ်ကို တည်ဆောက်ရန် အမှန်တကယ်အခွင့်အရေးဖြစ်သည်ဟု ဖော်ပြခဲ့ပါသည်။ 

“တရားမျှတမှုနှင့် တည်ငြိမ်ရေးတို့အတွက် ပြည်သူများ၏ဆန္ဒကို ထင်ဟပ်စေမည့် အသွင်ကူးပြောင်းရေးအဆင့်ကိုသေချာစေရန် ၎င်းတို့ အတူတကွလုပ်ဆောင်နေသည်” ဟု ကြေညာချက်တွင် ဖော်ပြထားပါသည်။ “ဆီးရီးယားနိုင်ငံသားအားလုံး၏ အခွင့်အရေးများကို အာမခံပြီး ငြိမ်းချမ်းရေးနှင့်ဂုဏ်သိက္ခာအတွက် ၎င်းတို့၏ ဆန္ဒများကို ဖြည့်ဆည်းပေးမည့် ပိုမိုကောင်းမွန်သော အနာဂတ်ကိုတည်ဆောက်ရန် ၎င်းတို့ ကတိပြုထားပါသည်” ဟု ဆိုပါသည်။ 

ကိုးကား-Myanmar National Post

ပါကစ္စတန်စစ်တပ်က မတ်လ ၁၂ ရက်နေ့က “ဘလိုချီစတန်ပြည်နယ်တွင် လက်နက်ကိုင်သူပုန်များ သိမ်းပိုက်ထားသည့် ခရီးသည်တင်ရထားမှ ပြန်ပေးဆွဲခံထားရသူ ၃၀၀ ကျော်ကို လွတ်မြောက်အောင် ကယ်တင် နိုင်ခဲ့ပြီ” ဟု ဆိုပါသည်။

စစ်တပ်ပြောရေးဆိုခွင့်ရှိသူက ယင်းစစ်ဆင်ရေးအတွင်း သူပုန် ၃၃ ယောက် သေဆုံးခဲ့ကြောင်းနှင့်စစ်ဆင်ရေးမစတင်မီ Baloch Liberation Army (BLA) က အရပ်သား ၂၁ ယောက်နှင့် စစ်သား ၄ ယောက်ကို သတ်ဖြတ် ခဲ့သည်ဟု ၎င်းကဆိုသော်လည်း အဆိုပါအရေအတွက်ကို BBC က အတည်မပြုနိုင်သေးကြောင်းဖော်ပြထားသည်။

သူပုန်များသည် ခရီးသည်အချို့ကိုခေါ်ဆောင်ကာ ရထားမှ ထွက်ခွာ သွားနိုင်ကြောင်း ပြောကြားခဲ့သည်။

စစ်တပ်ပြောရေးဆိုခွင့်ရှိသူ၏ အဆိုအရ ရထားတိုက်ခိုက်ခံရချိန်တွင် ခရီးသည် ၄၄၀ ခန့်ရှိခဲ့ပြီး ကျန်ရှိသူများကို ကယ်တင်နိုင်ရန် စစ်ဆင်ရေး ဆက်လက်ဆောင်ရွက်နေကြောင်းနှင့် ခရီးသည်မည်မျှ ပျောက်ဆုံးနေ သည်ကို မသိရသေးဟု ဆိုသည်။

ပါကစ္စတန်အာဏာပိုင်များနှင့် ဗြိတိန်နှင့် အမေရိကန်အပါအဝင် အနောက် နိုင်ငံများစွာက BLA ကို အကြမ်းဖက်အဖွဲ့အစည်းအဖြစ် သတ်မှတ်ထားသည်။

BLA သည် ပါကစ္စတန်၏ အကြီးဆုံးပြည်နယ်ဖြစ်သော ဘလိုချီစတန် အတွက် ကိုယ်ပိုင်အုပ်ချုပ်ခွင့် သို့မဟုတ် လွတ်လပ်ရေးကို တောင်းဆိုနေသော သူပုန်အုပ်စုများထဲမှ တစ်ခုဖြစ်သည်။

အရာရှိများက ရထားပေါ်ရှိ လူများအနက် အနည်းဆုံး ၁၀၀ သည် လုံခြုံရေး တပ်ဖွဲ့ဝင်များ ဖြစ်ကြောင်း ပြောကြားခဲ့သည်။

ဒေသခံသတင်းများအရ သူပုန်များသည် အာဏာပိုင်များက ဘလိုချီနိုင်ငံရေး အကျဉ်းသားများကို ၄၈ နာရီအတွင်း လွှတ်ပေးရန်ငြင်းဆန်ပါက ပြန်ပေး ဆွဲထားသူများကို သတ်ဖြတ်မည်ဟု ခြိမ်းခြောက်ခဲ့သည်။

ကိုးကား-BBC

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

မတ်လ ၁၂ ရက်နေ့က စစ်ယူဖောင်းဝတ်ဆင်ထားသည့် ရုရှားနိုင်ငံ၏ သမ္မတ၊ တပ်မတော်ကာကွယ်ရေးဦးစီးချုပ် မစ္စတာ ပူတင်သည် ယူကရိန်း စစ်ပွဲနှင့် အနီးဆုံးဖြစ်သော ယူကရိန်းတပ်များ ထိုးဖောက် ဝင်ရောက်ခဲ့သည့် Kursk ဒေသရှိ စစ်ဖက်ဆိုင်ရာ ကွပ်ကဲမှုဌာနချုပ်သို့ သွားရောက်ခဲ့ပါသည်။

ရုရှားသမ္မတ ဗလာဒီမာပူတင်သည် Kursk ဒေသသို့ သွားရောက်ခဲ့ပြီး ကျူးကျော်ဝင်ရောက်လာသော ယူကရိန်းတပ်များကို အမြန်ဆုံး တိုက်ထုတ် သွားရမည်ဟု ပြောကြားခဲ့သည်။ ထိုဒေသတွင် ကျန်ရှိနေသေးသော ယူကရိန်းတပ်များကို ရုရှားတပ်များက အပြင်းအထန် ပြန်လည် တိုက်ခိုက်နေစဉ် ၎င်းသည် ထိုဒေသရှိ Command Post သို့ သွားရောက် လည်ပတ်ခဲ့ခြင်းဖြစ်သည်။

သမ္မတသည် ၎င်း၏ခရီးစဉ်အတွင်း စစ်ဘက်ဆိုင်ရာ အကြီးအကဲများနှင့် အစည်းအဝေးတစ်ခုပြုလုပ်ခဲ့ပြီး ဗိုလ်ချုပ်ကြီး Valery Gerasimov က စစ်ဆင်ရေးအခြေအနေများကို အစီရင်ခံတင်ပြခဲ့သည်။ ပူတင်က ထိုဒေသတွင် တိုက်ပွဲဝင်နေသော တပ်မှူးများနှင့်တပ်ဖွဲ့ဝင်များအား ၎င်းတို့၏ ကြိုးပမ်းအားထုတ်မှုများအတွက် ကျေးဇူးတင်ဂုဏ်ယူကြောင်း ပြောကြားခဲ့သည်။

“မိမိတို့၏ ရည်မှန်းချက်မှာ Kursk ဒေသ၏ နယ်မြေတွင် ခြေကုပ်ယူ ထားသောရန်သူကို အမြန်ဆုံး တိုက်ထုတ်သွားရန်ဖြစ်သည်” ဟု သမ္မတ က ပြောကြားခဲ့ပြီး မော်စကိုသည် ယူကရိန်းနှင့် နယ်စပ်တလျှောက်တွင် “လုံခြုံရေးဇုန်” တစ်ခုဖန်တီးရန်လည်း စဉ်းစားနေကြောင်း ထည့်သွင်းပြောကြားခဲ့သည်။ ထိုဒေသကို ကျူးကျော်ဝင်ရောက်လာသော ယူကရိန်း တပ်ဖွဲ့များကို “အကြမ်းဖက်သမားများ” အဖြစ် သဘောထားတိုက်ခိုက်ရန်နှင့် ဖမ်းဆီးရမိသော သုံ့ပန်းမှန်သမျှကိုလည်း ထိုသို့မှတ်ယူရမည် ဖြစ်ကြောင်း ၎င်းကဆိုသည်။

Gerasimov ၏ အဆိုအရ ရုရှားစစ်တပ်သည် လွန်ခဲ့သော ငါးရက်အတွင်း မြို့နှင့်ရွာပေါင်း ၂၄ ခု ပါဝင်သော ဧရိယာစုစုပေါင်း ၂၅၉ စတုရန်း ကီလိုမီတာကို သိမ်းပိုက်နိုင်ခဲ့ပြီး ယူကရိန်းတပ်များကို ဝိုင်းပတ်ပိတ်ဆို့ တိုက်ခိုက်ထားနိုင်ခဲ့သည်ဟု ၎င်းကအစီရင်ခံခဲ့သည်။

ယူကရိန်းစစ်တပ်သည် ၎င်းတို့၏ ကျူးကျော်ဝင်ရောက်မှုကြိုးပမ်းမှုတွင် စစ်သည် ၆၇,၀၀၀ ကျော် ဆုံးရှုံးခဲ့ရသည် ဟု Gerasimov က ပြောကြားခဲ့ပြီး ရုရှားတပ်များသည် စတုရန်းကီလိုမီတာ ၁,၁၀၀ ကျော် (ယခင်နှစ် က ပြန်လည်တိုက်ခိုက်မှုစတင်သည့်အချိန်မှစ၍ ကိယက်ဗ်မှ ကနဦး သိမ်းပိုက်ထားသော ဧရိယာ၏ ၈၆%) ကို သိမ်းပိုက်နိုင်ခဲ့ကြောင်း ထပ်လောင်းပြောကြားခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဘယ်လာရုစ်သည် လက်ရှိတွင် “အိုရက်ရှ်နစ်” အတွက် ဒုံးပစ်စင်များ ထုတ်လုပ်လျက်ရှိပြီး ရုရှားဖက်ဒရေးရှင်းထံမှ ဒုံးကျည်များ စောင့်မျှော်နေကြောင်း ဘယ်လာရုစ်သမ္မတ အလက်ဇ်ဇန်းဒါ လူကာရှန်ကို က ကြေညာခဲ့ပါသည်။ 

“မိမိသည် ထိုကိစ္စကို (ရုရှားသမ္မတ) ဗလာဒီမာ ဗလာဒီမီရိုဗစ် ပူတင်က စတင်ဖော်ပြချိန်တွင် နက်နက်ရှိုင်းရှိုင်း လေ့လာခဲ့ရာမှ ဒုံးကျည်အပြင် အခြားပစ္စည်းကိရိယာများ ထုတ်လုပ်ရန် လိုအပ်ကြောင်း သိရှိခဲ့ရပြီး ဘယ်လာရုစ်နိုင်ငံက ၎င်းတို့ကို ထုတ်လုပ်လျက်ရှိပါသည်။ “အိုရက်ရှ်နစ်” အတွက် အသုံးပြုမည့် ဒုံးပစ်စင် အမြောက်အမြားကို ယခုအခါတွင် လက်တွေ့ပြီးစီးနေပြီ ဖြစ်ပါသည်” ဟု ဘယ်လာရုစ်သမ္မတလူကာရှန်ကို က ပြောကြားခဲ့ပါသည်။ 

“အစ်ကိုကြီး (ရုရှား) ထံမှ ဒုံးကျည်များ လိုအပ်လိမ့်မည်” ဟု ဘယ်လာရုစ် သမ္မတက ကောက်ချက်ချခဲ့ပါသည်။ 

ကိုးကား - RIA Novosti

Photo: www.pravda.com.ua

အမေရိကန်က တင်သွင်းသည့်ကုန်ပစ္စည်းများအပေါ် ကနေဒါကစည်းကြပ်နေသည့် အခွန်များကို ပြန်လည်မရုတ်သိမ်းလျှင် ကနေဒါမော်တော်ကား လုပ်ငန်းပျက်စီးစေရမည် ဟု ဒေါ်နယ်ထရမ့်က ကြုံးဝါးလိုက်ပါသည်။

ဒေါ်နယ်ထရမ့်သည် ဖေဖော်ဝါရီ ၁ ရက်တွင် ကနေဒါ၊ တရုတ်နှင့် မက္ကဆီကို တို့မှ ကုန်ပစ္စည်းများအပေါ် အခွန်တိုးမြင့်စည်းကြပ်ရန် အမိန့် ထုတ်ပြန် လိုက်ပြီးနောက် ဖေဖော်ဝါရီ ၄ ရက်တွင် တရုတ်သွင်းကုန်များအပေါ် ၁၀ ရာခိုင်နှုန်း တိုးမြင့်လိုက်ပြီး ကနေဒါနှင့်မက္ကဆီကို သွင်းကုန်များအပေါ် တစ်လအချိန်ဆိုင်းငံ့ပေးခဲ့ပါသည်။

တစ်လပြီးနောက် မတ်လ ၄ ရက်တွင် ထရမ့်က ကနေဒါနှင့်မက္ကဆီကို သွင်းကုန်များကို အခွန် ၂၅ ရာခိုင်နှုန်းတိုးမြင့် စည်းကြပ်လိုက်ပြီး အမေရိကန်-မက္ကဆီကို- ကနေဒါ သဘောတူညီချက် (USMCA) တွင် ပါဝင်သည့်ကုန်စည်များကို အဆိုပါစည်းကြပ်မှုမှ ကင်းလွတ်ပေးခဲ့ပါသည်။

တစ်ဖက်တွင်လည်း ကနေဒါသည် အမေရိကန်မှ တင်သွင်းလာသည့် မော်တော်ကား၊ နို့ထွက်ပစ္စည်းများ၊ ဘီယာ၊ ဝိုင်၊ အရက်၊ စိုက်ပျိုးထွက်ကုန်နှင့် သစ်တောထွက်ပစ္စည်းများကို ကာလကြာရှည်စွာ အခွန် စည်းကြပ်မှုနေမှုအပေါ်   ကစားလာသည်ဟု ဒေါ်နယ်ထရမ့်က ယုံကြည်နေပြီး အမေရိကန် စီးပွားရေးအတွက် အခက်အခဲဖြစ်စေသည်ဟု ယူဆနေပါသည်။

အကယ်၍ အမေရိကန်တင်သွင်းကုန်များအတွက် အခွန်စည်းကြပ်နေမှု အပေါ် ကနေဒါက မရုတ်သိမ်းပေးနိုင်ပါက ကနေဒါနိုင်ငံ၏ မော်တော်ကား တင်သွင်းခွန်ကိုဧပြီ ၂ ရက်တွင် မဖြစ်မနေ မြှင့်တင်သွားမည်ဖြစ်ကြောင်း၊ ထိုစည်းကြပ်မှုကို ထပ်မံဖြေလျော့ပေးမည် မဟုတ်တော့ကြောင်း၊ အမေရိကန်တွင် မော်တော်ကား လွယ်လွယ်ကူကူ ထုတ်လုပ်နိုင်သဖြင့် ကနေဒါမော်တော်ကားများကို အလိုမရှိပါကြောင်း၊ ကနေဒါ မော်တော်ကားလုပ်ငန်းပျက်စီးစေရမည်ဖြစ်ကြောင်း ဒေါ်နယ်ထရမ့်က ခြိမ်းခြောက်လိုက်ခြင်းဖြစ်ပါသည်။ 

ကိုးကား-TASS

Photo: RNZ

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ရုရှားအနောက်ပိုင်း Kursk ဒေသတွင် ယူကရိန်းစစ်တပ်၏ တိုက်ခိုက်မှုကြောင့် လူပုဂ္ဂိုလ်လေးဦး သေဆုံးပြီး အခြားနှစ်ဦးဒဏ်ရာရရှိခဲ့ကြောင်း ဒေသဆိုင်ရာအုပ်ချုပ်ရေးမှူး Aleksandr Khinstein က ပြောကြား ခဲ့သည်။

မတ်လ ၁၂ ရက် နံနက်ပိုင်းက Kozyrevka ကျေးရွာရှိ စက်ရုံတစ်ခုကို ပစ်မှတ်ထား တိုက်ခိုက်ခဲ့ခြင်းဖြစ်ကြောင်း Khinstein က Telegram တွင် ရေးသားခဲ့သည်။

ပထမဆုံးသတင်းများအရ စက်ရုံဝန်ထမ်း လေးဦးသေဆုံးခဲ့ပြီး ၎င်းတို့ အထဲတွင် ယောက်ျား သုံးဦးနှင့် မိန်းမတစ်ဦး ပါဝင်ကြောင်း ၎င်းက ပြောကြားခဲ့သည်။

အခြားလုပ်သားတစ်ဦးမှာ ပြင်းထန်စွာ ဒဏ်ရာရရှိပြီး ဆေးရုံသို့ အမြန်ပို့ဆောင်ခဲ့ရကာ အနည်းငယ်မျှသာ ဒဏ်ရာရရှိသူ လုပ်ဖော်ကိုင်ဖက်ကို စက်ရုံ၌ပင် ကုသပေးခဲ့ကြောင်း အုပ်ချုပ်ရေးမှူးက ဖြည့်စွက် ပြောကြား ခဲ့သည်။

Khinstein က ပြည်သူများကိုတိုက်ခိုက်ခြင်းသည် ကိယက်ဗ် အာဏာပိုင်များ၏ စိတ်ဝေဒနာခံစားနေရခြင်း လက္ခဏာဖြစ်ကြောင်း ပြောကြားခဲ့သည်။

အုပ်ချုပ်ရေးမှူးက သေဆုံးသူများ၏ မိသားစုများထံ ဝမ်းနည်းကြောင်း သဝဏ်လွှာပေးပို့ခဲ့ပြီး Kursk ဒေသအုပ်ချုပ်ရေးအဖွဲ့မှ ၎င်းတို့အား လိုအပ်သောအကူအညီနှင့် ပံ့ပိုးမှုများ ပေးသွားမည်ဟု ကတိပြုခဲ့သည်။

စက်ရုံရှိ အဆောက်အဦတစ်ခုမှာ တိုက်ခိုက်မှုကြောင့် လုံးဝပျက်စီးသွားပြီး အခြားပစ္စည်းများလည်း ပျက်စီးမှုများရှိခဲ့ကြောင်း ၎င်းက ပြောကြား ခဲ့သည်။

မတ်လ ၁၀ ရက်နေ့တွင် ယူကရိန်းတပ်ဖွဲ့များက Belovsky ခရိုင် Belaya ကျေးရွာရှိ ဈေးဝယ်စင်တာတစ်ခုကို ပစ်မှတ်ထားတိုက်ခိုက်မှုကြောင့် လူပုဂ္ဂိုလ်လေးဦးသေဆုံးခဲ့ပြီး အခြားများစွာ ဒဏ်ရာရရှိခဲ့သည်။

နောက်တစ်နေ့တွင် ရုရှားသည် နိုင်ငံနှစ်နိုင်ငံအကြား ပဋိပက္ခ စတင်ခဲ့သည့် ၂၀၂၂ ခုနှစ်၊ ဖေဖော်ဝါရီလမှစ၍ လက်ရှိအချိန်အတွင်း ဒရုန်း ၃၃၇ စီး ပါဝင်သော ယူကရိန်း၏အကြီးမားဆုံး ဒရုန်းတိုက်ခိုက်မှုကို ကာကွယ်နိုင်ခဲ့သည်။ ယခုကဲ့သို့ တိုက်ခိုက်မှုများ မြင့်တက်လာခြင်းမှာ ဩဂုတ်လ အစောပိုင်း ၂၀၂၄ ခုနှစ်မှစတင်၍ ယူကရိန်းတပ်ဖွဲ့များ ကျူးကျော် ဝင်ရောက်မှုများ ပြုလုပ်နေသည့် Kursk ဒေသ၌ ယူကရိန်းတပ်ဖွဲ့များ ရှုံးနိမ့်မှုများ ကြုံတွေ့နေရချိန်တွင် ဖြစ်ပွားခဲ့ခြင်းဖြစ်သည်။

မတ်လ ၁၁ ရက်နေ့တွင် ရုရှားကာကွယ်ရေးဝန်ကြီးဌာနက Sudzha မြို့ အနီးရှိ ကျေးရွာ ၁၂ ရွာကို ပြန်လည်သိမ်းပိုက်နိုင်ခဲ့ကြောင်းကြေညာခဲ့ပြီး Sudzha မြို့သည် ယင်းဒေသ၌ ယူကရိန်းတို့ ထိန်းချုပ်ထားသည့် အကြီးဆုံးမြို့ဖြစ်သည်။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အမေရိကန်သမ္မတ Donald Trump က ၎င်းသည် ယခု သီတင်းပတ်အတွင်း ရုရှားသမ္မတ Vladimir Putin နှင့် ဖုန်းဖြင့် ဆွေးနွေးမှုများ ပြုလုပ်ရန်ဖြစ်နိုင်ကြောင်း မတ်လ ၁၁ ရက်နေ့တွင်ပြောကြားခဲ့ပြီး မော်စကိုဘက်မှ ယူကရိန်းနှင့် ၃၀ ရက်ကြာ စစ်ပြေငြိမ်းရေးဆိုင်ရာ အဆိုပြုချက်ကို သဘောတူညီလိမ့်မည်ဟု မျှော်လင့်ကြောင်း ဖော်ပြခဲ့သည်။

Trump က ယူကရိန်းနှင့် အမေရိကန်ကိုယ်စားလှယ်အဖွဲ့များ ဆော်ဒီအာရေဗျနိုင်ငံ ဂျီဒါတွင် ဆွေးနွေးပွဲပြုလုပ်ပြီးနောက် သတင်းထောက်များအား ထိုကဲ့သို့ပြောကြားခဲ့ခြင်းဖြစ်သည်။ ထိုဆွေးနွေးပွဲတွင် ကိယက်ဗ် ဘက်မှ မော်စကိုနှင့် စစ်ပြေငြိမ်းရေးဆိုင်ရာ အမေရိကန်၏ အဆိုပြုချက်ကို သဘောတူညီခဲ့သည်။ အမေရိကန်သမ္မတက ထိုကဲ့သို့သော သဘောတူညီချက်တစ်ရပ်ကို ချုပ်ဆိုနိုင်ပါက ပဋိပက္ခကိုအဆုံးသတ်ရန် နောက်ဆုံး သဘောတူညီချက်ရရှိရေးအတွက် အထောက်အကူဖြစ်စေမည်ဟု ပြောကြားခဲ့သည်။

ပူတင်ကလည်း သဘောတူလိမ့်မည်ဟု ထင်မြင်ကြောင်းနှင့် မြေနေရာ ပိုင်ဆိုင်မှုနှင့် ကျန်အချက်အလက်များကို ထပ်မံညှိနှိုင်း ဆောင်ရွက်သွားမည် ဟု Trump က ပြောကြားခဲ့သည်။

“ရုရှားဘက်မှ စစ်ပြေငြိမ်းရေးကို သဘောမတူပါကလည်း ၎င်းတို့အနေဖြင့် ဆက်လက်ညှိနှိုင်း လုပ်ဆောင်သွားမည်ဖြစ်သည်” ဟု အမေရိကန် သမ္မတ က ပြောကြားခဲ့ပြီး ညှိနှိုင်းမှုအဆင်မပြေပါက “လူများစွာ” သေဆုံးနိုင်ကြောင်း သတိပေးခဲ့သည်။ ရုရှားနှင့် အမေရိကန်အရာရှိများသည်ဆွေးနွေးမှုများ အမြန်ဆုံးပြုလုပ်နိုင်ရန် မျှော်လင့်ထားကြောင်း ၎င်းက ပြောကြားခဲ့သည်။

Trump က ၎င်း၏ပြောကြားချက်များကိုဖော်ပြခဲ့ပြီးနောက် မကြာမီတွင် ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Maria Zakharova က မော်စကိုနှင့် ဝါရှင်တန်တို့အကြား လာမည့်ရက်များအတွင်း ဆက်သွယ်မှုများဖြစ်နိုင်ကြောင်းနှင့် မဖြစ်မနေလုပ်ဆောင်ရမည့်အရာ ဖြစ်သည်ဟု ပြောကြားခဲ့သည်။ ကရင်မလင် သတင်းထောက် Dmitry Smirnov အဆို အရ အမေရိကန်နှင့် ရုရှားသမ္မတနှစ်ဦးအကြား ဖုန်းဖြင့်ဆွေးနွေးမှုကို မတ်လ ၁၅ ရက်(သောကြာ)နေ့တွင် ပြုလုပ်မည်ဖြစ်သည်။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အမေရိကန်ပြည်ထောင်စုသည် ယူကရိန်းသို့ စစ်ရေးနှင့် ထောက်လှမ်းရေး အကူအညီများကို ပြန်လည်ဖြည်လျော့ပေးခဲ့ပြီး ယူကရိန်းဘက်မှလည်း ရုရှားနှင့် “ချက်ချင်း ယာယီ ၃၀ ရက်ကြာ စစ်ပြေငြိမ်းရေး” ဆိုင်ရာ အဆိုပြုချက်ကို သဘောတူညီခဲ့ကြောင်း မတ်လ ၁၁ ရက်နေ့တွင် ဆော်ဒီ အာရေဗျ၌ ကျင်းပခဲ့သောဆွေးနွေးပွဲအပြီးတွင် နှစ်နိုင်ငံက ကြေညာခဲ့သည်။ ထို့အပြင် ကိယက်ဗ်သည် အမေရိကန်နှင့် ယူကရိန်း၏ အရေးပါသောအရင်းအမြစ်များဆိုင်ရာ သဘောတူညီချက်တစ်ရပ်ကို အမြန်ဆုံး ချုပ်ဆိုရန်သဘောတူညီခဲ့သည်။

“ယူကရိန်းဘက်မှ အမေရိကန်၏အဆိုပြုချက်ကို လက်ခံရန် အဆင်သင့်ဖြစ်နေပြီဖြစ်ကြောင်း ချက်ချင်း ယာယီ ၃၀ ရက်ကြာ စစ်ပြေငြိမ်းရေးကို အကောင်အထည်ဖော်ရန်နှင့် နှစ်ဖက်သဘောတူညီချက်ဖြင့် ကာလ ထပ်မံတိုးမြှင့်နိုင်ကာ ရုရှားဘက်မှ လက်ခံပြီး တစ်ပြိုင်နက်တည်း အကောင် အထည်ဖော်ဆောင်ရန်လိုအပ်ကြောင်း” ပူးတွဲကြေညာချက်တွင် ဖော်ပြထားသည်။ အမေရိကန်ဘက်မှလည်း မကြာမီအတွင်း ယင်းအဆိုပြုချက်ကို ရုရှားသို့ ဆက်သွယ်ဆောင်ရွက်သွားမည်ဟု ပြောကြားခဲ့သည်။

အမေရိကန်သည် ယခုအခါ ထောက်လှမ်းရေး သတင်းအချက်အလက်များ မျှဝေခြင်းကို ရပ်ဆိုင်းထားမှုကို ရုပ်သိမ်းပြီး ယူကရိန်းသို့ လုံခြုံရေး အကူအညီများ ပြန်လည်ပေးအပ်မည်ဖြစ်သည်။ ဝါရှင်တန်နှင့် ကိယက်ဗ် တို့သည် လူသားချင်းစာနာထောက်ထားမှု ကူညီကယ်ဆယ်ရေးလုပ်ငန်းများကိုလည်း ဆွေးနွေးခဲ့ကြပြီး ယင်းတွင် စစ်သုံ့ပန်းများ လဲလှယ်ခြင်း၊ အရပ်သား၊ အကျဉ်းသားများ လွှတ်ပေးခြင်းနှင့် အခြားလုပ်ဆောင်ချက်များ ပါဝင်သည်။

အစည်းအဝေးအတွင်း ကိုယ်စားလှယ်အဖွဲ့များသည် ယူကရိန်းအတွက် ရေရှည်လုံခြုံရေးအာမခံချက်များကို ဆွေးနွေးခဲ့ကြောင်း အမေရိကန် အမျိုးသားလုံခြုံရေးအကြံပေးဖြစ်သူ Mike Waltz က ပြောကြားခဲ့သော်လည်း နောက်ထပ်အသေးစိတ်အချက်အလက်များကို မဖော်ပြခဲ့ပါ။ ဂျီဒါတွင် ကျင်းပခဲ့သော အမေရိကန်-ယူကရိန်း ဆွေးနွေးပွဲအပြီးတွင် ထုတ်ပြန်ခဲ့သည့် ကြေညာချက်များနှင့်ပတ်သက်၍ မော်စကိုဘက်မှ တရားဝင် တုံ့ပြန်ချက်များ ဖော်ပြခဲ့ခြင်းမရှိပေ။ ရုရှားခေါင်းဆောင်များက ယာယီ စစ်ပြေငြိမ်းရေးသဘောတူညီချက်များကို လက်မခံနိုင်ဘဲ၊ ယာယီသဘောတူညီချက်များသည် ကိယက်ဗ်နှင့် ၎င်း၏အနောက်နိုင်ငံများမှ ပံ့ပိုးသူများအတွက်သာ အကျိုးရှိမည်ဟု ယခင်ကတည်းကအသိပေးခဲ့သည်။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂