အငြင်းပွားဖွယ်ကက်ရှ်မီးယားဒေသတွင် ခရီးသွားများအပေါ် တိုက်ခိုက်မှုဖြစ်ပွားခဲ့ပြီးနောက် နျူကလီးယား လက်နက်ပိုင်ဆိုင်သည့် အိမ်နီးချင်းနှစ်နိုင်ငံအကြား တင်းမာမှုများ ပိုမိုမြင့်တက်ခဲ့သည်။ ယင်းနောက် အိန္ဒိယနှင့် ပါကစ္စတန်တို့သည် ဒုံးကျည်များနှင့် လက်နက်ကြီးများဖြင့် အပြန်အလှန်ပစ်ခတ်မှုများ ဖြစ်ပွား ခဲ့သည်။ ယင်းတိုက်ခိုက်မှုသည် နှစ်ပေါင်းများစွာကြာပြီးနောက် နှစ်နိုင်ငံကြား အဆိုးရွားဆုံး တိုက်ခိုက်မှု ဖြစ်လာခဲ့သည်။

လွန်ခဲ့သည့်သီတင်းနှစ်ပတ်ခန့်က အိန္ဒိယဘက်ခြမ်းရှိ ကက်ရှ်မီးယားဒေသတွင် စစ်သွေးကြွများ၏ တိုက်ခိုက်မှုကြောင့် အရပ်သား ၂၆ ဦး သေဆုံးခဲ့သည်။ ယင်းတိုက်ခိုက်မှုအတွက် အိန္ဒိယအစိုးရက ပါကစ္စတန် အစိုးရကို အပြစ်တင်ထားသည်။

ယင်းနောက်ပိုင်းတွင် နှစ်နိုင်ငံလုံးသည် တစ်ဖက်နှင့်တစ်ဖက် ငြင်းခုံမှုများနှင့် သတိပေးမှုများ လုပ်ဆောင်လာခဲ့သည်။ အိန္ဒိယက မေ ၇ ရက်အစောပိုင်းတွင် ပါကစ္စတန်ကို ဒုံးကျည်ဖြင့် ပစ်ခတ်တိုက်ခိုက်ခဲ့သည်။

နှစ်နိုင်ငံကြား အကျပ်အတည်းအခြေအနေနှင့် ယင်းနောက်ကွယ်မှ အကြောင်းအရင်းများကို ဆက်လက် ဖော်ပြသွားပါမည်။

နောက်ဆုံးရအခြေအနေ

အိန္ဒိယက ပါကစ္စတန်ဘက်ခြမ်း ကက်ရှ်မီးယားဒေသရှိ အကြမ်းဖက်သမားများ၏ စခန်းများကို တိတိကျကျ ပစ်မှတ်ထား၍တိုက်ခိုက်ခဲ့ကြောင်း ထုတ်ပြန်ထားသည်။

အိန္ဒိယက နေရာခြောက်နေရာထက်မနည်းတွင် လေကြောင်းတိုက်ခိုက်မှုနှင့်နယ်စပ်တစ်လျှောက် ပစ်ခတ်မှုများကြောင့် အရပ်သား ၂၆ ဦး သေဆုံးခဲ့ကြောင်း ပါကစ္စတန်က ထုတ်ပြန်ထားသည်။

အိန္ဒိယက ပစ်မှတ်ထားတိုက်ခိုက်ခဲ့သည့် နေရာများတွင် ပါကစ္စတန်ဘက်ခြမ်းမှ ကက်ရှ်မီးယားဒေသအပြင် ဟာဝယ်ပူရနှင့်မူရစ်ခီ မြို့များလည်းပါဝင်သည်။ ယင်းမြို့များသည် အိန္ဒိယနယ်စပ်နှင့်ထိစပ် နေသော ပါကစ္စတန်၏ လူဦးရေအထူထပ်ဆုံး ပန်ဂျပ်ပြည်နယ်၏မြို့များဖြစ်သည်။

ပါကစ္စတန်စစ်တပ်က ၎င်း၏အချုပ်အခြာနှင့် နယ်မြေပိုင်ဆိုင်မှုကို ထိပါးလာလျှင် အချိန်မရွေး လက်တုံ့ပြန် သွားမည်ဟု အစောပိုင်းကပြောကြားခဲ့သည်။ ယခုအိန္ဒိယ၏တိုက်ခိုက်မှုကိုလည်း လက်တုံ့ပြန်တိုက်ခိုက် ခဲ့ကြောင်း ပါကစ္စတန်ကာကွယ်ရေးဝန်ကြီး ခါဝါဂျာမူဟာမတ်အဆစ်က ဆိုသည်။

အိန္ဒိယက ပါကစ္စတန်သည် ကက်ရှ်မီးယားနယ်စပ်ရှိ ထိန်းချုပ်ရေးမျဉ်းတွင် လက်နက်ကြီးဖြင့် ပစ်ခတ်ခဲ့သည့်အတွက် အရပ်သားသုံးဦးသေဆုံးခဲ့ကြောင်း စွပ်စွဲထားသည်။

ပြဿနာဖြစ်လာစေသောအကြောင်းအရင်း

ဧပြီ ၂၂ ရက်က အိန္ဒိယဘက်ခြမ်း ကက်ရှ်မီးယားဒေသရှိ ခရီးသွားများလာရောက်လည်ပတ်လေ့ရှိသော ပါဟယ်ဂမ်မြို့တွင် စစ်သွေးကြွများ၏ တိုက်ခိုက်မှုကြောင့် ဟိန္ဒူအများစုအပါအဝင် လူ ၂၆ ဦးသေဆုံး ခဲ့သည်။ ယင်းတိုက်ခိုက်မှုကြောင့် အိန္ဒိယသည် အလွန်အမျက်ထွက်ခဲ့သည်။

ယင်းတိုက်ခိုက်မှုကို ပြုလုပ်ခဲ့ကြောင်း မည်သည့်အဖွဲ့မှ ထုတ်ပြန်ထားခြင်းမရှိပေ။ သို့သော် အိန္ဒိယအစိုးရ ကမူ ပါကစ္စတန်အခြေစိုက် စစ်သွေးကြွအဖွဲ့ဖြစ်သည့် လက်ရှ်ကာအီးတိုင်ဘာအဖွဲ့မှ သေနတ်သမားများ ဖြစ်ကြောင်း ထုတ်ပြန်ထားသည်။ လက်ရှ်ကာအီးတိုင်ဘာအဖွဲ့သည် အိန္ဒိယမြေပေါ်တွင် တိုက်ခိုက်မှုများ လုပ်ဆောင်ခဲ့သည့် သမိုင်းကြောင်းရှိခြင်းနှင့်အတူ ကုလသမဂ္ဂက အကြမ်းဖက်အဖွဲ့အစည်းအဖြစ် သတ်မှတ် ထားသည်။

ယင်းအဖွဲ့ကို ပါကစ္စတန်အစိုးရကဖွဲ့စည်းထားခြင်းဖြစ်ကြောင်း ကာလကြာရှည် ကောလာဟလများ ထွက်ပေါ်လျက်ရှိသည်။ သို့သော် ပါကစ္စတန်အစိုးရက ငြင်းဆိုထားသည်။

အိန္ဒိယဝန်ကြီးချုပ်နာရန်ဒရာမိုဒီက ပါကစ္စတန်သည် နယ်စပ်ဖြတ်ကျော်အကြမ်းဖက်မှုကို အားပေးထောက်ပံ့ နေကြောင်း စွပ်စွဲထားသည်။ ထို့ပြင် မိုဒီက ယင်းကိုတုံ့ပြန်ရန် ၎င်း၏စစ်တပ်အား အပြည့်အဝ လွတ်လပ်ခွင့် ပေးထားကြောင်း ပြောကြားခဲ့သည်။

နှစ်ဖက်လုံးက သံတမန်များကို နှင်ထုတ်ခဲ့ကြသည်။ ပါကစ္စတန်ကမူ လွန်ခဲ့သည့် သီတင်းပတ်က အိန္ဒိယသည် စစ်ရေးအရတိုက်ခိုက်ရန် ပြင်ဆင်နေကြောင်းခိုင်လုံသည့် ထောက်လှမ်းမှုများအရသိရသည်ဟု ထုတ်ပြန် ခဲ့သည်။

ကက်ရှ်မီးယားကို မည်သူထိန်းချုပ်ထားသနည်း

ဗြိတိသျှအုပ်ချုပ်မှု အဆုံးသတ်ပြီးနောက် ၁၉၄၇ ခုနှစ်တွင် နှစ်နိုင်ငံပေါ်ပေါက်ခဲ့ပြီးနောက်ပိုင်း သာယာ လှပသောကက်ရှ်မီးယားဒေသသည် အိန္ဒိယနှင့် ပါကစ္စတန်ကြား အဓိကပြဿနာဖြစ်စေသည့် အကြောင်း အရင်းကြီးဖြစ်လာသည်။

ကြိုတင်ပြင်ဆင်မှုအားနည်းသော နှစ်ပိုင်းကွဲပြားမှုသည် သွေးကြောင်းစီးမှုကိုဖြစ်စေကာ ပျမ်းမျှလူတစ်သန်း ကျော် သေဆုံးခဲ့ပြီး လူ ၁၅ သန်းခန့် ဘေးလွတ်ရာရွှေ့ပြောင်းခဲ့ကြသည်။ နှစ်နိုင်ငံကြားတွင် တည်ရှိပြီး ဟိမဝန္တာတောင်တန်းများအောက်တွင် တည်ရှိသော မွတ်စလင်အများစုနေထိုင်ရာ ကက်ရှ်မီးယား၏ ဘုရင်သည် အိန္ဒိယ သို့မဟုတ် ပါကစ္စတန်၏ အုပ်စိုးမှုကိုလက်ခံသင့်၊ မသင့် ဝေခွဲမရဖြစ်လျက်ရှိသည်။

ဘုရင်စနစ်၏ အုပ်စိုးမှုကို ဆန့်ကျင်သည့် လူထုအုံကြွမှုကို နှိမ်နင်းရန်အတွက် အိန္ဒိယ၏အကူအညီကို ရယူမှုသည်နှစ်နိုင်ငံကြား စစ်ပွဲတစ်ရပ်ကို အလျင်အမြန်ဖြစ်ပေါ်စေခဲ့ပြီး ပါကစ္စတန်ကျောထောက် နောက်ခံပြု စစ်သွေးကြွများက ကက်ရှ်မီးယားကို တိုက်ခိုက်ခဲ့သည်။

၁၉၄၉ ခုနှစ်တွင် ကုလသမဂ္ဂ ကျောထောက်နောက်ခံပြုသည့် ၄၇၈ မိုင်အကွာရှိ အပစ်အခတ် ရပ်စဲရေး မျဉ်းသည် ကက်ရှ်မီးယားကို ပိုင်းခြားထားသည့် ထိန်းချုပ်ရေးမျဉ်းဟု လူသိများကာ လက်ရှိအချိန်အထိ နှစ်ဖက်စလုံးက စစ်အင်အားကြီးမားစွာချထားဆဲဖြစ်သည်။

နှစ်ဖက်စလုံးက ကက်ရှ်မီးယား၏အစိတ်အပိုင်းကို ထိန်းချုပ်ထားသော်လည်း ၎င်းတို့ကမူ ကက်ရှ်မီးယား နယ်မြေကို အပြည့်အဝပိုင်ဆိုင်ကြောင်း အခိုင်အမာဆိုထားသည်။ ထို့ပြင် ထိန်းချုပ်ရေးမျဉ်းတွင်လည်း စောင့်ကြည့်ရန် စစ်တပ်များကို ချထားသည်။

၂၀၀၉ ခုနှစ်တွင် အသေခံဗုံးခွဲတိုက်ခိုက်မှုကြောင့် အိန္ဒိယအရန်တပ်ဖွဲ့ဝင်စစ်သား ၄၁ ဦး သေဆုံးခဲ့ ပြီးနောက် အိန္ဒိယနှင့်ပါကစ္စတန်ကြား စစ်ပွဲဖြစ်ပွားလုနီးပါး တွေ့ကြုံခဲ့သည်။ အိန္ဒိယက ယင်းတိုက်ခိုက်မှုအတွက် ပါကစ္စတန်အခြေစိုက်စစ်သွေးကြွအဖွဲ့ကို အပြစ်တင်ထားသည်။

ကမ္ဘာ့နိုင်ငံများ၏တုံ့ပြန်မှု

အိန္ဒိယနှင့် ပါကစ္စတန်တို့သည်နျူကလီးယားလက်နက်များကို ပိုင်ဆိုင်ထားသည်။ ကက်ရှ်မီးယားသည် နျူကလီးယားစစ်ပွဲဖြစ်လာနိုင်ခြေရှိသည့် ကမ္ဘာ့အန္တရာယ်အများဆုံးနေရာများတွင် တစ်ခုအပါအဝင် အဖြစ် ကာလကြာရှည် ရှုမြင်ခံထားရသည်။

ရလဒ်အဖြစ် ဧပြီ ၂၂ ရက် တိုက်ခိုက်မှုဖြစ်ပွားခြင်းနှင့်အတူ နောက်ဆုံးအကြိမ်တင်းမာမှုများ ဖြစ်ပေါ် ခဲ့ပြီးနောက်ပိုင်း ကမ္ဘာ့နိုင်ငံများက တည်တည်ငြိမ်ငြိမ် ဖြေရှင်းကြရန်တိုက်တွန်းခဲ့ကြသည်။

ကုလသမဂ္ဂအတွင်းရေးမှူးချုပ်အန်တိုနီယိုဂူတာရက်စ်က စစ်ပွဲမဖြစ်ပွားစေရန်အတွက် ထိန်းထိန်းသိမ်းသိမ်း လုပ်ဆောင်ကြရန် တိုက်တွန်းထားသည်ဟု ၎င်း၏ပြောရေးဆိုခွင့်ရှိသူ စတီဗင်ဒူဂျာရတ်က ထုတ်ပြန် ထားသည်။

အမေရိကန်နိုင်ငံခြားရေးဝန်ကြီး မာကိုရူဘီယိုကလည်း အိန္ဒိယနှင့် ပါကစ္စတန်နိုင်ငံခြားရေး ဝန်ကြီးများကို တွေ့ဆုံပြီး ဆွေးနွေးမှုဖြင့် အဖြေရှာကြရန် တိုက်တွန်းထားသည်။

နှစ်နိုင်ငံလုံးနှင့် အိမ်နီးချင်းဖြစ်သည့်အပြင် ပါကစ္စတန်၏ ရင်းနှီးသောမဟာမိတ်ဖြစ်သည့် တရုတ်ကလည်း မေ ၇ ရက်နံနက်ပိုင်းက အိန္ဒိယ၏ စစ်ရေးဆောင်ရွက်ချက်အပေါ် စိတ်မကောင်းဖြစ်မိကြောင်း ထုတ်ပြန် ထားသည်။

တရုတ်နိုင်ငံအနေဖြင့် လက်ရှိထိပ်တိုက်တွေ့မှုဖြစ်စဉ်အပေါ် စိုးရိမ်မိကြောင်း နိုင်ငံခြားရေးဝန်ကြီးဌာနက ထုတ်ပြန်ထားသည်။

အီရန်နိုင်ငံခြားရေးဝန်ကြီး အက်ဘက်အရာချီက ကြားဝင်ဖျန်ဖြေပေးရန် ကြိုးပမ်းမှုအနေဖြင့် ပါကစ္စတန်ကို သွားရောက်ခဲ့ပြီးနောက် နှစ်ရက်အကြာ မေ ၇ ရက်တွင်အိန္ဒိယသို့ ရောက်ရှိခဲ့သည်။

ကိုးကား- Eleven Media Group

တရုတ်အစိုးရက ကာကွယ်ရေးအသုံးစရိတ်ကို ယခင် ၂၀၂၄ ခုနှစ်ကထက် ၇.၂ ရာခိုင်နှုန်း တိုးမြှင့်သုံးစွဲ သွားမည် ဖြစ်ကြောင်း မတ်လ ၅ ရက် ယနေ့တွင်ကျင်းပသည့် တရုတ်အမျိုးသားညီလာခံတွင် အဖွင့်မိန့်ခွန်းပြောကြားစဉ် ထည့်သွင်းပြောကြားခဲ့ပါသည်။ အဆိုပါကာကွယ်ရေးအသုံးစရိတ်မှာ ယွမ် ၁.၇၈ ထရီလီယံ (အမေရိကန်ဒေါ်လာ ၂၄၅ ဘီလီယံ)ခန့် ဖြစ်သည်။

တစ်နှစ်ထက်တစ်နှစ် ကာကွယ်ရေးအသုံးစရိတ် တိုးမြင့်လာမှုနှုန်းသည် ၂၀၂၃ ခုနှစ်နှင့် ၂၀၂၄ ခုနှစ်များတွင်လည်း တစ်ပြေးညီဖြစ်ခဲ့သည်။ ဤသည်မှာ တရုတ်နိုင်ငံ၏ စီးပွားရေးတိုးတက်မှုနှုန်း‌ နှေးကွေးလာသော်လည်း စစ်အင်အား ဆက်လက်တိုးမြှင့်လုပ်ဆောင်မှုကို ပြသခြင်းဖြစ်သည်။

တရုတ်နိုင်ငံအနေဖြင့် အရှေ့နှင့် တောင်တရုတ်ပင်လယ်တို့အတွင်း ၎င်း၏ ရေကြောင်းအလေးသာမှုကို တိုးမြှင့် လုပ်ဆောင်လာခဲ့ပြီး ကမ္ဘာပေါ်တွင် စစ်သင်္ဘောအပါအဝင် အခြားသော သင်္ဘောအရေအတွက် အများဆုံးဖြစ်သည်။

ထို့အပြင် တရုတ်နိုင်ငံက ယခုနှစ်အစောပိုင်းအတွင်း ၎င်း၏ တတိယမြောက် လေယာဉ်တင်သင်္ဘော Fujian ကို တပ်တော်ဝင်နိုင်ရန် မျှော်မှန်းထားသည်။ အချို့သောလေ့လာသူများကမူ တရုတ်အနေဖြင့် နျူကလီးယား လေယာဉ်တင်သင်္ဘောတည်ဆောက်ရန် စီစဉ်ဆောင်ရွက်နေနိုင်ကြောင်း သုံးသပ်ကြသည်။

တရုတ်နိုင်ငံ၌ သိုလှောင်သိမ်းဆည်းထားသည့် တိုက်ပွဲဝင်နျူကလီးယားထိပ်ဖူး ၆၀၀ ကျော်ရှိမည်ဟု ခန့်မှန်းရပြီး ဆက်လက်၍လည်း တိုးမြှင့်ထုတ်လုပ်ထားရှိနိုင်သည်။ ဤသည်မှာ အဆင့်မြင့်အရပ်ဘက်နည်းပညာများကို အသုံးပြု ခြင်းဖြင့် ဆိုက်ဘာ၊ အာကာသနှင့် ဉာဏ်ရည်တုနည်းပညာဆိုင်ရာ သုတေသနနှင့် ဖွံ့ဖြိုးတိုးတက်မှုကို အားကောင်းအောင် လုပ်ဆောင်ခြင်းဖြစ်ပေမည်။

တရုတ်ကာကွယ်ရေးဝန်ကြီးဌာနက တပ်မတော်အား ကမ္ဘာ့အဆင့်မီဖြစ်ရေး မြှင့်တင်ဆောင်ရွက်သွားမည်ဖြစ်ကြောင်း ထုတ်ဖော်ပြောကြားခဲ့သော်လည်း လေ့လာသူအချို့ကမူ တရုတ်တပ်မတော်အနေဖြင့် စစ်လက်နက်ပစ္စည်းများ ပြည်ပမှမှာယူစရိတ်များနှင့် သုတေသနနှင့်ဖွံ့ဖြိုးတိုးတက်မှုဆိုင်ရာအသုံးစရိတ်များကို ထည့်သွင်းတွက်ချက်မှုမရှိသည့် အတွက် တရုတ်နိုင်ငံ၏ ကာကွယ်ရေးအသုံးစရိတ် သုံးစွဲမှုသည် ပကတိမြေပြင်အခြေအနေနှင့် ကွဲလွဲမှုရှိကြောင်း ထောက်ပြပြောဆိုကြကြောင်း NHK သတင်းစာမျက်နှာတွင် ရေးသားဖော်ပြထားပါသည်။

ကိုးကား-NHK World

အလွတ်သဘောဘာသာပြန်ဆိုသူ-ဦးထက်ထက်အောင် (နစက-၄)

တောင်ကိုရီးယားနိုင်ငံ ဘူဆန်ဆိပ်ကမ်းသို့ အမေရိကန် လေယာဉ်တင်သင်္ဘော အလည်အပတ် ခရီးစဉ်အဖြစ် လာရောက်ဆိုက်ကပ်ခဲ့မှုအပေါ် “နိုင်ငံရေးနှင့်စစ်ရေးအရကျူးကျော်ရန်စမှု” အဖြစ် အမေရိကန်ကို မြောက်ကိုရီးယား က ပြင်းထန်စွာရှုတ်ချကြောင်း မြောက်ကိုရီးယားခေါင်းဆောင် ကင်ဂျုံအန်၏ ညီမဖြစ်သူ ကင်ယူဂျောင်း၏ ထုတ်ပြန်ချက်ပြောကြားချက်ကို နိုင်ငံပိုင်ရုပ်သံဖြစ်သည့် KCNA ရုပ်သံတွင် မတ်လ ၄ ရက်နေ့က ထုတ်လွှင့်ဖော်ပြ ခဲ့ပါသည်။

အမေရိကန်အစိုးရသစ်အနေဖြင့် ယခုနှစ်အတွင်း စတင်တာဝန်ယူသည့်အချိန်ကစ၍ ယခင်အစိုးရ၏ ရန်လိုသည့် မူဝါဒအား ဆက်လက်ဖော်ဆောင်သည့်အနေဖြင့် မြောက်ကိုရီးယားအပေါ် နိုင်ငံရေးနှင့် စစ်ရေးအရ ကျူးကျော် ရန်စမှုများ တိုးမြှင့်လုပ်ဆောင်လာခြင်းဖြစ်ကြောင်း ကင်ယူဂျောင်းက ၎င်း၏ ထုတ်ပြန်ချက်တွင် ထည့်သွင်း ပြောကြားခဲ့ပါသည်။

အမေရိကန်တိုက်ခိုက်ရေးလေယာဉ်တင်သင်္ဘောအုပ်၏ စွမ်းဆောင်ရည်မြင့်လေယာဉ်တင်သင်္ဘော USS Carl Vinson သည် အလည်အပတ်ခရီးစဉ်အဖြစ် မတ်လ ၂ ရက်က ဘူဆန်ဆိပ်ကမ်းသို့ ရောက်ရှိခဲ့ကြောင်း၊ ဘူဆန် ခရီးစဉ်သည် တောင်ကိုရီးယားခေါင်းဆောင်များအပါအဝင် ဒေသတွင်းနိုင်ငံများနှင့် ဆက်ဆံရေးတိုးမြှင့် လုပ်ဆောင်သွားမည့် အမေရိကန်၏ကတိကဝတ်ကို ပြသရာ ရောက်ကြောင်း အမေရိကန်ရေတပ်၏ ထုတ်ပြန်ချက်တွင် ရေးသားဖော်ပြထားပါသည်။

မြောက်ကိုရီးယားအနေဖြင့် အမေရိကန်နှင့် တောင်ကိုရီးယားနိုင်ငံတို့အကြား ပုံမှန်လုပ်ဆောင်သည့် စစ်ဘက်ဆိုင်ရာ ပူးပေါင်းဆောင်ရွက်မှုများအပေါ် ကျူးကျော်ရန်စမှုအတွက် ကြိုတင်ပြင်ဆင်မှုတစ်ရပ်အနေဖြင့်ရှုမြင်ပြီး ပြစ်တင်ရှုတ်ချခြင်းများ လုပ်ဆောင်ခဲ့သည့်နည်းတူ ဒုံးကျည် စမ်းသပ်ပစ်ခတ်ခြင်းများကိုလည်း မကြာခဏ လုပ်ဆောင်လေ့ရှိကြောင်း CNA သတင်းစာမျက်နှာတွင် ရေးသားဖော်ပြထားပါသည်။

ကိုးကား- CNA

ဘာသာပြန်ဆိုသူ-ဦးထက်ထက်အောင်၊နစက-၄

အစ္စရေးတပ်ဖွဲ့များအား ဂါဇာကမ်းမြောင်ဒေသမှ ဆုပ်ခွာပေးရန်နှင့် အဆိုပါဒေသ၏ အုပ်ချုပ်ရေးလုပ်ငန်းများအား ပါလက်စတိုင်းအစိုးရကို ပုံမှန်အတိုင်းပြန်လည်လုပ်ဆောင်ခွင့်ပြုရန် မတ်လ ၃ ရက်နေ့က ထုတ်ပြန်သည့် ပါလက်စတိုင်း နိုင်ငံခြားရေးဝန်ကြီးဌာန၏ သတင်းထုတ်ပြန်ချက်တွင် တိုက်တွန်းတောင်းဆိုခဲ့သည်။

အဆိုပါသတင်းထုတ်ပြန်ချက်တွင် ငြိမ်းချမ်းရေးသဘောတူညီချက်မှတစ်ဆင့် ပါလက်စတိုင်းပြည်သူများနှင့် ၎င်းတို့၏ အခွင့်အရေးများအပေါ် ပိတ်ဆို့ဟန့်တားမှုများကို ထိန်းသိမ်းပေးရေး၊ ပါလက်စတိုင်းအစိုးရ၏ လုပ်ပိုင်ခွင့်များအား အမြန်ပြန်လည်လွှဲပြောင်းပေးရေး၊ နိုင်ငံတကာအသိအမှတ်ပြု တရားဝင် ပါလက်စတိုင်းအစိုးရအဖွဲ့အစည်းများအနေဖြင့် ၎င်းတို့၏လုပ်ငန်းတာဝန်များအား လုပ်ဆောင်ခွင့်ရရှိရေး၊ ဂါဇာကမ်းမြောင်ဒေသအပါအဝင် ၁၉၆၇ခုနှစ်ကတည်းက ပိုင်ဆိုင်ခဲ့သည့် ပါလက်စတိုင်းနယ်မြေအားလုံးအား အချုပ်အခြာအာဏာပိုင်ဆိုင်ခွင့် ချက်ချင်း ရရှိရေးတို့အတွက် ကမ္ဘာ့နိုင်ငံများမှ စစ်မှန်သည့် ရပ်တည်မှုဖြင့် ပံ့ပိုးဆောင်ရွက်ပေးရေး စသည့်အချက်များ ဖော်ပြပါရှိပါသည်။

ဟားမက်နှင့် အစ္စရေးတို့အကြား အဆင့်(၃)ဆင့်ပါဝင်သည့် အပစ်အခတ်ရပ်စဲရေးသဘောတူညီချက်၏ ပထမအဆင့်ဖြစ်သည့် (၄၂)ရက်တာကာလသည် မတ်လ (၁)ရက်နေ့အစောပိုင်းတွင် သက်တမ်းကုန်ဆုံးခဲ့ပြီးဖြစ်သော်လည်း ဒုတိယအဆင့်အတွက် မည်သည့်ကြေညာချက်မျှ ထုတ်ပြန်ခြင်းမရှိခဲ့ပေ။ 

အစ္စရေးတို့အနေဖြင့် ဂါဇာအပစ်အခတ်ရပ်စဲရေးသဘောတူညီချက် ပထမအဆင့်ကို ဆက်လက်သက်တမ်းတိုး ဆောင်ရွက်လိုသော်လည်း ဟားမက်အနေဖြင့် အစ္စရေး၏ အဆိုပြုချက်ကို ပယ်ချကာ ဒုတိယအဆင့်အတွက် ဆွေးနွေးညှိနှိုင်းမှုများကို ဆက်လက်လုပ်ဆောင်လိုခဲ့သည်။ 

အပစ်အခတ်ရပ်စဲရေး၏ ဒုတိယအဆင့်တွင် ကျန်ရှိနေသေးသည် အစ္စရေးဓားစာခံများအား ပြန်လည်လွှတ်ပေးရေး၊ ဂါဇာရှိ အစ္စရေးတပ်ဖွဲ့ဝင်များအားလုံး ပြန်လည်ဆုတ်ခွာပေးရေးနှင့် ထာဝရအပစ်အခတ်ရပ်စဲမှု ဖော်ဆောင်ရေး စသည့်အချက်များကို အကောင်အထည်ဖော် ဆောင်ရွက်ရမည်ဖြစ်ကြောင်း Xhinua သတင်းစာမျက်နှာတွင် ရေးသား ဖော်ပြထားပါသည်။

ကိုးကား-ဆင်ဟွာ

ဘာသာပြန်ဆိုသူ-ဦးထက်ထက်အောင်၊နစက-၄

နိုင်ငံတော်အစိုးရအနေဖြင့် နယ်စပ်ဒေသများတွင် ဖြစ်ပေါ်လျက်ရှိသည့် တရားမဝင် အွန်လိုင်း လောင်းကစားမှုများ၊ အွန်လိုင်းလိမ်လည်မှုများအပါအဝင် ဒုစရိုက်မှုများကို ထိထိရောက်ရောက် နှိမ်နင်းဆောင် ရွက်လျက်ရှိသည်။
ထိုသို့ ဆောင်ရွက်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၁၆ ရက်တွင် မြဝတီမြို့ - ရွှေကုက္ကိုလ်နှင့် KK Park နယ်မြေများသို့ တရားမဝင် လမ်းကြောင်းများမှတစ်ဆင့် ဝင်ရောက်နေကြသည့် ပြည်ပနိုင်ငံသား ၂၃၁ ဦးကို ထပ်မံစစ်ဆေးဖော်ထုတ် ထိန်းသိမ်းနိုင်ခဲ့ပြီး သက်ဆိုင်ရာနိုင်ငံများသို့ အမြန်ဆုံး ပြန်လည်လွှဲပြောင်း ပေးအပ်နိုင်ရေး လိုအပ်သည့် ကိုယ်ရေးအချက်အလက်များနှင့် မှတ်တမ်းများ စာရင်းကောက်ယူခြင်း လုပ်ငန်းများကို ဌာနဆိုင်ရာ ပူးပေါင်းအဖွဲ့များဖြင့် နေ့ချင်းပြီး ဆောင်ရွက်လျက်ရှိသည်။
 ၂၀၂၅ ခုနှစ်၊ ဇန်နဝါရီ ၃၀ ရက်မှ ဖေဖော်ဝါရီ ၁၆ ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာသည့်  ပြည်ပနိုင်ငံသား စုစုပေါင်းဦးရေ ၁၀၃၀ ဦးကို စစ်ဆေးဖော်ထုတ်ထိန်းသိမ်း နိုင်ခဲ့ကာ ၎င်းတို့အနက်မှ ၆၁ ဦးကို ထိုင်းနိုင်ငံသို့ ဥပဒေလုပ်ထုံးလုပ်နည်းများနှင့်အညီ စနစ်တကျ လွှဲပြောင်းပေးအပ်ခဲ့ပြီး ကျန်ရှိသည့် ပြည်ပနိုင်ငံသား ၉၆၉ ဦးကို သက်ဆိုင်ရာနိုင်ငံများသို့ လွှဲပြောင်းပေးရန် အသင့်ဖြစ်နေပြီဖြစ်ကြောင်းနှင့် ၎င်းတို့ကို ကောင်းမွန်စွာ ထိန်းသိမ်းထားရှိကြောင်း  သတင်း ရရှိသည်။
 အဆိုပါထိန်းသိမ်းထားရှိသည့် ပြည်ပနိုင်ငံသားများ၏ စကားသံများကို ယခုကဲ့သို့ ကြားသိရသည်-
Mr. Qian Le Ping (တရုတ်နိုင်ငံသား)
 မိုင်းလားမြို့မှာ အလုပ်ကောင်းကောင်းရမယ်။ လစာများများရမယ်ဆိုတဲ့ အလုပ်ခေါ်စာ တွေ့လို့ ၂၀၁၈ ခုနှစ်၊ မတ်လ ၁၂ ရက်မှာ တရုတ်နိုင်ငံကတစ်ဆင့် မိုင်းလားမြို့ကို တရားမဝင် လမ်းကြောင်းကနေ ဝင်ရောက်ခဲ့ပါတယ်။ မိုင်းလားမြို့ကို ရောက်တဲ့အခါမှာ တရုတ်လူမျိုး  Xiao Mu ရဲ့ Yong Le Gong  အွန်လိုင်းဂိမ်းကုမ္ပဏီမှာ ၅ နှစ် အလုပ်လုပ်ခဲ့ပါတယ်။ မိုင်းလားကတစ်ဆင့် ၂၀၂၃ ခုနှစ်၊ ဒီဇင်ဘာ ၃ ရက်မှာ ရွှေကုက္ကိုလ်ကို ရောက်ရှိပြီး တရုတ်လူမျိုး Xiao Duo Duo ရဲ့ Hong Tu Guo Ji ကုမ္ပဏီမှာ အွန်လိုင်းကတစ်ဆင့် ကွန်ပျူတာနဲ့ ဂိမ်းကြော်ငြာပေးရတဲ့ အလုပ်ကို နေ့တိုင်း မွန်းတည့် ၁၂  နာရီကနေ ည ၁၂ နာရီအထိ လုပ်ပေးရပါတယ်။ တစ်လကို ဘတ် ၇ ထောင်နဲ့ ၃ လစာပဲ ရရှိပြီး ကျန်လတွေမှာ လစာ မရခဲ့ပါဘူး။
Mr. Zhuo Li ( တရုတ်နိုင်ငံသား)
ကျွန်တော်လုပ်ရတဲ့အလုပ်က တရုတ်လူမျိုးပိုင်တဲ့ Jin Man Tang ကုမ္ပဏီမှာ အွန်လိုင်းက တစ်ဆင့် လိမ်လည်ပြီး မက်ဆေ့ပို့ရတဲ့အလုပ်ကို တစ်ရက် ၁၆ နာရီခန့် အလုပ်လုပ်ရပြီး အဲဒီမှာ ၉ လခန့် ကြာခဲ့ပါတယ်။ ပထမလမှာ ဘတ် ၅ ထောင်ရပါတယ်။ ကျန်လတွေမှာတော့ လစာမရပါဘူး။ ရွှေကုက္ကိုလ်ကို ဝင်ရောက်ခဲ့တဲ့ လမ်းကြောင်းကတော့ တရုတ်နိုင်ငံကနေ လာအိုနိုင်ငံကို အရင်သွားခဲ့ပါတယ်။ လာအို နိုင်ငံကနေ ထိုင်းနိုင်ငံ ဘန်ကောက်မြို့ကို ကားနဲ့ထွက်ခွာခဲ့ပါတယ်။ ဘန်ကောက်မြို့ကတစ်ဆင့် ထိုင်းလူမျိုး ယာဉ်မောင်းတစ်ဦးရဲ့ အကူအညီနဲ့ မဲဆောက်မြို့ကို ဆက်ထွက်ခဲ့ပါတယ်။ မဲဆောက်မြို့ ရောက်တော့  ထိုင်းလူမျိုးတစ်ဦးရဲ့ စီစဉ်ပေးမှုနဲ့ မြစ်တစ်ခုကို စက်လှေနဲ့ဖြတ်ပြီး ရွှေကုက္ကိုလ်ကို ရောက်ရှိ ခဲ့တာ ဖြစ်ပါတယ်။ ထိုင်းနိုင်ငံမှာ တစ်လကိုယွမ် ၁ သောင်း ရမယ်ဆိုပြီး အွန်လိုင်းကနေခင်တဲ့ တရုတ် နိုင်ငံသား တစ်ဦးရဲ့ ဆက်သွယ်ပေးမှုကြောင့် အခုလို ထွက်လာခဲ့တာဖြစ်ပါတယ်။ ဖေဖော်ဝါရီ ၁၅ ရက် မှာတော့ ထိန်းသိမ်းခံခဲ့ရပါတယ်။
Mr. Xu Yuan Shun ( တရုတ်နိုင်ငံသား)
 ထိုင်းနိုင်ငံမှာ တစ်လကို ယွမ် ၁၂၀၀၀ ရတဲ့ အလုပ်လုပ်ရမယ်ဆိုပြီး အွန်လိုင်းကနေခင်တဲ့ တရုတ်နိုင်ငံသား တစ်ဦးက ဆက်သွယ်ပေးတဲ့အတွက် ၂၀၂၄ ခုနှစ်၊ မေလ ၃ ရက်မှာ လေယာဉ်နဲ့ တရုတ်နိုင်ငံကနေ ထိုင်းနိုင်ငံ၊ ဘန်ကောက်မြို့ကို ရောက်ရှိခဲ့ပါတယ်။ ဘန်ကောက်မြို့ကို ရောက်တော့ တရုတ်လူမျိုး ယာဉ်မောင်း တစ်ဦးက မဲဆောက်မြို့ကို ပို့ဆောင်ပေးခဲ့ပါတယ်။ မဲဆောက်မြို့ကို မေလ ၄ ရက်မှာ ရောက်ရှိခဲ့ပါတယ်။ မဲဆောက်မြို့ကနေတစ်ဆင့် ထိုင်းလူမျိုးတစ်ဦးရဲ့ စီစဉ်ပေးမှုနဲ့ ရွှေကုက္ကိုလ်ကို ရောက်ရှိခဲ့တာဖြစ်ပါတယ်။ ရွှေကုက္ကိုလ်ကို မရောက်ခင် စက်လှေနဲ့ မြစ်တစ်မြစ်ကို ဖြတ်ခဲ့ရပါတယ်။ ရွှေကုက္ကိုလ်ကိုရောက်တော့ တရုတ်လူမျိုးပိုင်တဲ့ ကုမ္ပဏီတစ်ခုမှာ အလုပ်ရပြီး အွန်လိုင်းကနေ လိမ်လည်ပြီး လူရှာဖွေပေးရတဲ့ အလုပ်ကို တစ်နေ့ ၁၆ နာရီ လုပ်ပေးရပါတယ်။ တစ်လကို ဘတ် ၂၀၀၀ ရရှိပါတယ်။ ၉ လခန့် လုပ်ကိုင်ခဲ့ရပါတယ်။
Mrs. Karungi Deborah Nich Adrona ( ယူဂန္ဓာနိုင်ငံသူ)
သူငယ်ချင်း Joel Kagoro က ထိုင်းနိုင်ငံ၊ ဘန်ကောက်မြို့မှာရှိတဲ့ Customer Service  ကုမ္ပဏီတစ်ခုမှာ စကားပြန်အလုပ် လုပ်ရမယ်။ လစာကလည်း ဘတ် ၂၅၀၀၀ ရမယ်ဆိုလို့ ဒီအလုပ်ကို လုပ်မယ်လို့ အကြောင်းပြန်ခဲ့ပါတယ်။ ကုမ္ပဏီနဲ့ ချိတ်ဆက်ပြီး ၂၀၂၄ ခုနှစ်၊ ဇွန်လ ၁၅ ရက်မှာ ယူဂန္ဓာနိုင်ငံကနေ လေယာဉ်နဲ့ ထွက်ခွာခဲ့ပြီး ဇွန်လ ၁၆ ရက်မှာ ထိုင်းနိုင်ငံ၊ ဘန်ကောက်မြို့ လေဆိပ်ကို  ရောက်ရှိခဲ့ပါတယ်။ လေဆိပ်မှာ ချိတ်ဆက်ထား အမျိုးသား တစ်ဦးက မဲဆောက်မြို့ကို ကားနဲ့ ပို့ပေး ခဲ့ပါတယ်။ ကားနဲ့လာတဲ့ လမ်းတစ်လျှောက်မှာ စစ်ဆေးရေးဂိတ် နှစ်ခုကို ဖြတ်သန်းသွားခဲ့ရတယ်။ အဲဒီဂိတ်က ကျွန်မကို ဓာတ်ပုံမှတ်တမ်းပဲယူပြီး စစ်ဆေးမေးမြန်းခြင်းတော့ မရှိခဲ့ပါဘူး။ ၈ နာရီခန့် ကားစီးခဲ့ရပြီး မဲဆောက်မြို့ကို ရောက်တဲ့အခါ ဟိုတယ်တစ်ခုမှာ တစ်ည တည်းခိုခဲ့ပါတယ်။ နောက်နေ့ မှာတော့ ချောင်းတစ်ချောင်း(သောင်ရင်းမြစ်)ကို စက်လှေနဲ့ဖြတ်ကူးပြီး တစ်ဖက်ကမ်းကို ရောက်တဲ့ အခါမှာ အမျိုးသား တစ်ဦးက ကားနဲ့လာခေါ်ပြီး အလုပ်ဆိုဒ်(ရွှေကုက္ကိုလ်)ကို ပို့ဆောင်ပေးခဲ့ပါတယ်။ အဲဒီက Hong Tu Yuan Gu ကုမ္ပဏီမှာ သင်တန်းနှစ်ပတ်တက်ခဲ့ရပြီး ကွန်ပျူတာနဲ့ စည်းရုံးဆက်သွယ် ပြောဆိုပေးရတဲ့ အလုပ်ကို တစ်လခန့် လုပ်ကိုင်ခဲ့ရတယ်။ နောက်တော့ ရထိုက် ကုမ္ပဏီကို ပြောင်းရွှေ့ အလုပ်လုပ်ခဲ့ပြီး လစာအနေနဲ့ ပထမအပတ်မှာ ဘတ် ၆၀၀၀ ရရှိခဲ့ပါတယ်။
Mr. Phimsanduk (ထိုင်းနိုင်ငံသား)
 ကျွန်တော်က (Electronic) အထူးပြုဘာသာရပ်နဲ့ ကျောင်းပြီးပါပြီ။ ကျောင်းပြီးတော့ ဇာတိမြို့ ဖြစ်တဲ့ Lam Phun မြို့မှာပဲ အလုပ်လုပ်ခဲ့ပါတယ်။ အလုပ်လုပ်နေရင်း ရွှေကုက္ကိုလ်မှာ လစာကောင်းတဲ့ အလုပ်လုပ်ရမယ်ဆိုပြီး အွန်လိုင်းကနေ အဆက်အသွယ်ရခဲ့ပါတယ်။ အွန်လိုင်းကနေ လူရှာပေးရတဲ့ အလုပ်လုပ်ရမယ်။ လစာ တစ်လ ဘတ် ၃၀၀၀၀ ရမယ်လို့ Facebook ပေါ်မှာတွေ့တဲ့ အမျိုးသမီး တစ်ဦးက ဆက်သွယ်ပြောဆိုလာခဲ့တဲ့အတွက် အလုပ်လုပ်ဖို့ ထိုင်းနိုင်ငံ၊ Lam Phun မြို့ကနေ ခရီးသည်တင်ယာဉ်နဲ့ ၂၀၂၅ ခုနှစ်၊ ဇန်နဝါရီ ၅ ရက်မှာ ထွက်လာခဲ့ပါတယ်။  မဲဆောက်မြို့ကို ရောက်တဲ့ အခါမှာ ထိုင်းလူမျိုး အမျိုးသား တစ်ဦးက ကားနဲ့လာခေါ်ပြီး သောင်ရင်းမြစ်ကမ်းစပ်ကို ပို့ဆောင် ပေးခဲ့ပါတယ်။ မြစ်ကို စက်လှေနဲ့ ဖြတ်ကူးပြီး တစ်ဖက်ကမ်းကို ရောက်တဲ့အခါမှာ တရုတ်လူမျိုး အမျိုးသား တစ်ဦးက ကားနဲ့လာခေါ်ပြီး ရွှေကုက္ကိုလ်မှာရှိတဲ့ Hong Chu ကုမ္ပဏီကို ပို့ပေးခဲ့ပါတယ်။ အဲဒီမှာ အွန်လိုင်းဂိမ်းအလုပ်ကို လုပ်ကိုင်ဖို့ ကွန်ပျူတာပညာကို သင်ယူနေတုန်းဖြစ်ပါတယ်။ သင်ယူနေတုန်း ထိန်းသိမ်းခံလိုက်ရတာဖြစ်ပါတယ်။

Source: www.moha.gov.mm 

ဖေဖော်ဝါရီလ ၁၆ ရက်က အမေရိကန်နိုင်ငံခြားရေးဝန်ကြီး မာကိုရူဘီယိုနှင့် ပြုလုပ်သည့်ပူးတွဲ သတင်းစာရှင်းလင်းပွဲတွင် အစ္စရေးဝန်ကြီးချုပ် ဘန်ဂျမင်နေတန်ယာဟုက “အီရန်နှင့်စစ်ပွဲကို အမေရိကန်သမ္မတ ဒေါ်နယ်ထရမ့်၏ ပံ့ပိုးကူညီမှုဖြင့် အဆုံးသတ်သွားမည်”ဟု ကတိပြုခဲ့သည်။ မာကိုရူဘီယို၏ အစ္စရေးခရီးစဉ်သည် နိုင်ငံခြားရေးဝန်ကြီးအဖြစ်တာဝန်ထမ်းဆောင်ချိန်မှစ၍ ၎င်း၏ ပထမဆုံးခရီးစဉ်လည်း ဖြစ်သည်။

လွန်ခဲ့သော ၁၆ လကျော်က အစ္စရေးသည် အီရန်၏ အကြမ်းဖက်ဝန်ရိုးတန်းအဖွဲ့ကို ပြင်းပြင်း ထန်ထန် တိုက်ခိုက်နိုင်ခဲ့ကြောင်း၊ ယခုသမ္မတထရမ့်၏ ခိုင်မာသည့် ခေါင်းဆောင်မှုအောက်တွင် အီရန်နှင့် စစ်ပွဲကို အဆုံးသတ်နိုင်မည်မှာ သံသယဖြစ်ဖွယ်မရှိကြောင်း နေတန်ယာဟုက ပြောကြား ခဲ့သည်။

ထို့ပြင် အီရန်အနေဖြင့် မည်သည့်အခါမျှ နျူကလီးယားပိုင်သည့်နိုင်ငံ မဖြစ်နိုင်တော့ကြောင်း၊ မိမိတို့အနေဖြင့် ဟားမက်စ်အရေးကိစ္စဖြစ်စေ၊ ဟစ်ဘိုလာအရေးကိစ္စဖြစ်စေ၊ ဂျော်ဒန်မြစ်အနောက်ဖက် ကမ်းရှိ အကြမ်းဖက်မှုအရေးကိစ္စဖြစ်စေ၊ ဆီးရီးယားအရေးကိစ္စကိုဖြစ်စေ၊ အီရတ်အရေးကိစ္စဖြစ်စေ ဆွေးနွေးကြသည့်အခါ ကိစ္စအားလုံး၏ အရင်းခံမှာ အီရန်ပင် ဖြစ်ကြောင်း၊ ဤအရေးကိစ္စကို မိမိတို့ အနေဖြင့် ဖြေရှင်းဆောင်ရွက်ရမည်ဖြစ်ကြောင်း ရူဘီယိုက ပြောကြားခဲ့သည်။

အစ္စရေးသည် ဤနှစ်အတွင်း အီရန်၏ နျူကလီးယားအစီအစဉ်အတွက် အဓိကအရေးပါသော စက်ရုံများကို တိုက်ခိုက်ရန် လုပ်ဆောင်လာနိုင်ဖွယ်ရှိကြောင်း လေ့လာအကဲဖြတ်မှုများနှင့် နီးစပ်သည့် အရင်းအမြစ်များ၏အဆိုကို ကိုးကား၍ အမေရိကန်ထောက်လှမ်းရေးအေဂျင်စီများက ဘိုင်ဒင်နှင့် ထရမ့်အစိုးရများကို မကြာသေးမီက သတိပေးခဲ့သည်။

ထို့အပြင် အစ္စရေး၏ စစ်အားအသုံးပြုလိုသည့် ဆန္ဒထက်သန်နေမှုသည် သမ္မတ ဒေါ်နယ်ထရမ့်၏ လက်ရှိ တီဟီရန်နှင့် ငြိမ်းချမ်းရေးသဘောတူညီချက်ရရှိလိုမှုနှင့် ဆန့်ကျင်နေပြီး အီရန်၏ နျူကလီးယား နေရာများကို အကြီးစားတိုက်ခိုက်မှုများသည် အရှေ့အလယ်ပိုင်းတွင် ကြီးမားကျယ်ပြန့်သည့်စစ်ပွဲကြီး တစ်ရပ် ပေါ်ပေါက်လာနိုင်ခြေ ပိုမိုမြင့်မားလာစေနိုင်ကြောင်းကိုလည်း အမေရိကန်ထောက်လှမ်းရေး အေဂျင်စီများက သတိပေးခဲ့သည်။

ခြုံငုံ၍ကြည့်မည်ဆိုလျှင် အစ္စရေးသည် အီရန်တွင် အာဏာအပြောင်းအလဲဖြစ်စေလိုသည့် ၎င်း၏ ကြီးမားသည့်ရည်မှန်းချက်ကို ပုံဖော်နေဆဲပင်ဖြစ်ကြောင်း အမေရိကန်ထောက်လှမ်းရေး အစီရင်ခံစာတစ်စောင်တွင် မကြာသေးမီက ဖော်ပြခဲ့သည်။

ဂါဇာအရေးကိစ္စနှင့်ပတ်သက်၍ အမေရိကန်နှင့် အစ္စရေးတို့သည် တူညီသည့်မဟာဗျူဟာ တစ်ခုရှိကြောင်းနှင့် ဟားမက်စ်တို့အနေဖြင့် ဖမ်းဆီးထားသည့်ဓါးစာခံများအားလုံးကို လွှတ်မပေး ခဲ့ပါက ၎င်းတို့အတွက် ငရဲတံခါးများအား ဖွင့်ပေးသွားမည်ဖြစ်ကြောင်း နေတန်ယာဟုက ပြောကြားခဲ့ ပါသည်။

ထရမ့်ကလည်း အမေရိကန်အနေဖြင့် ဂါဇာကိုသိမ်းပိုက်ပြီး ပါလက်စတိုင်းများအား ပျက်စီးသွားသည့် ထိုဒေသမှ ဖယ်ရှားပစ်မည် ဖြစ်ကြောင်း၊ ဤသည်မှာ ကြီးမားသည့် မုန်တိုင်းတစ်ခုကဲ့သို့ ဖြစ်လာလိမ့်မည်ဖြစ်ကြောင်း ယခုလအတွင်း ထုတ်ဖော်ပြောကြားခဲ့သည်။

ထရမ့်၏ အဆိုပါပြောစကားသည် လူများကို တုန်လှုပ်ခြောက်ခြားစေနိုင်ကြောင်း၊ သို့သော် ထိုသို့ မလုပ်ဆောင်ပါက အဖန်ဖန်တလဲလဲဖြစ်နေသည့် အကြမ်းဖက်မှုသံသရာမှာ အဆုံးသတ်လိမ့်မည် မဟုတ်ကြောင်း ရူဘီယိုက ပြောကြားခဲ့ပါသည်။

အမေရိကန်ဂျူးအဖွဲ့အစည်းများ(American Jewish organizations)၏ ခေါင်းဆောင်များနှင့် ပြောဆိုရာတွင် နက်တန်ယာဟူက “ထိုအစီအစဉ်သည် ဂါဇာလူမျိုးများ၊ အစ္စရေးနှင့် ဤဒေသ အတွက် အနာဂတ်သစ်ကို ဖော်ဆောင်နိုင်မည့် တစ်ခုတည်းသောအစီအစဉ်တစ်ရပ်” ပင်ဖြစ်ကြောင်း ပြောကြားခဲ့သည်။

ကိုးကား - CNN

တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီ၏ ကြီးကြပ်ကွပ်ကဲမှုဖြင့် တရားမဝင်ကုန်သွယ်မှုများကို ဥပဒေနှင့်အညီ ထိရောက်စွာ တားဆီးအရေးယူနိုင်ရေး ဆောင်ရွက်လျက်ရှိသည်။ ဖေဖော်ဝါရီ ၁၄ ရက်တွင် မကွေးတိုင်းဒေသကြီး တရားမဝင် ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ တောင်တွင်းကြီးမြို့နယ်၊ အိုးပေါက်ကျေးရွာ၌ တရားမဝင် ကျွန်းသစ် ၁၁ ဒသမ ၁၇ တန်၊ အခြားသစ် ၁၄ ဒသမ ၄၃၁ တန်နှင့် ဆက်စပ်ပစ္စည်း ခြောက်မျိုး စုစုပေါင်း ခန့်မှန်းတန်ဖိုးငွေကျပ် ၄,၄၀၇,၅၉၆ ကို ဖမ်းဆီးရမိခဲ့ပြီး သစ်တော ဥပဒေနှင့်အညီ အရေးယူဆောင်ရွက်လျက်ရှိသည်။

ထို့အတူ မန္တလေးတိုင်းဒေသကြီး တရားမဝင် ကုန်သွယ်မှုတိုက်ဖျက်ရေး အထူး အဖွဲ့၏ စီမံခန့်ခွဲမှုဖြင့် တာဝန်ကျ ပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ မဟာအောင်မြေမြို့နယ်၊ ကျောက်ဆည်မြို့နယ်၊ ပျော်ဘွယ်မြို့နယ်၊ ပုသိမ်ကြီးမြို့နယ်နှင့် ရမည်းသင်းမြို့နယ်တို့၌ တရားမဝင်ကျွန်းသစ် ၁၁ ဒသမ ၂၄၅ တန်၊ သစ်မာ ၀ ဒသမ ၆၀၂ တန်၊ အခြားသစ် ၁၆၇ ဒသမ ၀၅၀ တန် (ခန့်မှန်းတန်ဖိုးငွေကျပ် ၁၆,၈၀၃,၆၁၀) နှင့် အဆိုပါသစ်များ တင်ဆောင်ထားသည့် မော်တော်ယာဉ်သုံးစီး (ခန့်မှန်းတန်ဖိုးငွေကျပ် ၁၇၇,၀၀၀,၀၀၀) စုစုပေါင်း ခန့်မှန်းတန်ဖိုးငွေကျပ် ၁၉၃,၈၀၃,၆၁၀ ကို ဖမ်းဆီးရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိသည်။

ထို့အပြင် ဖေဖော်ဝါရီ ၁၆ ရက်တွင် စစ်ကိုင်းတိုင်းဒေသကြီး တရားမဝင် ကုန်သွယ်မှု  တိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျ ပူးပေါင်းအဖွဲ့များက စစ်ဆေးမှုများဆောင်ရွက်ခဲ့ရာ စစ်ကိုင်းမြို့၊ ကံတလူ ပူးပေါင်းစစ်ဆေးရေးဂိတ်နှင့် ရတနာပုံ တံတားပူးပေါင်းစစ်ဆေးရေးဂိတ်တို့၌ လိုင်စင်မဲ့ Honda Fit မော်တော်ယာဉ် တစ်စီးနှင့် Toyota Kluger မော်တော်ယာဉ်တစ်စီး စုစုပေါင်းခန့်မှန်းတန်ဖိုး ငွေကျပ် ၄၅,၀၀၀,၀၀၀ ကို ဖမ်းဆီးရမိခဲ့ပြီး ပို့ကုန်သွင်းကုန်ဥပဒေနှင့်အညီ အရေးယူဆောင်ရွက် လျက် ရှိသည်။

ယင်းအပြင် တနင်္သာရီတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအထူး အဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများဆောင်ရွက်ခဲ့ရာ ကော့သောင်းမြို့နယ်၊ ရွှေဇင်ယော်ရပ်ကွက် တံတားတိုပဲ့ချိပ်ဆိပ်၌ စုပုံထားသော အကောက်ခွန်မဲ့ လူသုံးကုန်ပစ္စည်းတစ်မျိုး (ခန့်မှန်းတန်ဖိုးငွေကျပ် ၄၉,၅၀၀,၀၀၀) ကို လည်းကောင်း၊ ကော့သောင်းမြို့ သီရိမြိုင်ရပ်ကွက် (၃) မိုင် ကားကြီးကွင်း၌ စုပုံထားသော အကောက်ခွန်မဲ့လူသုံးကုန်ပစ္စည်းတစ်မျိုး (ခန့်မှန်းတန်ဖိုးငွေကျပ် ၆၀,၀၀၀,၀၀၀) ကို လည်းကောင်း စုစုပေါင်းခန့်မှန်းတန်ဖိုးငွေကျပ် ၁၀၉,၅၀၀,၀၀၀ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ထို့အတူ အကောက်ခွန်ဦးစီးဌာန၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ မရမ်းချောင်အမြဲတမ်းစစ်ဆေးရေးစခန်း၌ မော်လမြိုင်မြို့မှ နေပြည်တော်သို့ သွားရောက်မည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်း အထောက်အထား တင်ပြနိုင်ခြင်းမရှိသည့် စားသောက်ကုန်ပစ္စည်းတစ်မျိုး (ခန့်မှန်း တန်ဖိုးငွေကျပ် ၆,၀၄၈,၀၀၀) နှင့် အဆိုပါပစ္စည်းများ တင်ဆောင်လာသည့် Mitsubishi Fuso Truck တစ်စီး (ခန့်မှန်းတန်ဖိုးငွေကျပ် ၄၀,၀၀၀,၀၀၀) စုစုပေါင်း ခန့်မှန်း တန်ဖိုးငွေ ကျပ် ၄၆,၀၄၈,၀၀၀ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

 ထို့အပြင် ဖေဖော်ဝါရီ ၁၇ ရက်တွင် မွန်ပြည်နယ် တရားမဝင်ကုန်သွယ်မှု တိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ ကျိုက်မရော ပူးပေါင်းစစ်ဆေးရေးဂိတ်၌ မော်တော်ယာဉ်တစ်စီးပေါ်မှ တရားဝင် စာရွက်စာတမ်းအထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်း နှစ်မျိုး (ခန့်မှန်းတန်ဖိုးငွေကျပ် ၃,၇၀၀,၀၀၀) နှင့် အဆိုပါပစ္စည်းများ တင်ဆောင်လာသည့်Nissan Caravan မော်တော်ယာဉ်တစ်စီး (ခန့်မှန်းတန်ဖိုးငွေကျပ် ၁၂,၀၀၀,၀၀၀) စုစုပေါင်း ခန့်မှန်းတန်ဖိုးငွေကျပ် ၁၅,၇၀၀,၀၀၀ ကို ဖမ်းဆီးရမိခဲ့ပြီး အကောက်ခွန် လုပ်ထုံးလုပ်နည်း များနှင့်အညီ အရေးယူဆောင်ရွက်လျက်ရှိသည်။

ယင်းအပြင် ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများဆောင်ရွက်ခဲ့ရာ တောင်ငူ ခရိုင်၊ ညောင်လေးပင်ခရိုင်နှင့် ပြည်ခရိုင်တို့အတွင်း၌ တရားမဝင်ကျွန်းသစ် ၁ ဒသမ ၀၈၆ တန်၊ သစ်မာ ၂ ဒသမ ၇၁၉ တန်၊ အခြားသစ် ၁ ဒသမ ၅၉၁ တန် (ခန့်မှန်းတန်ဖိုးငွေကျပ် ၂,၄၂၁,၉၈၃) ကို သစ်တောဥပဒေအရလည်းကောင်း၊ ဒိုက်ဦးမြို့နယ်အတွင်း၌ လိုင်စင်မဲ့ Honda Insight မော်တော်ယာဉ်တစ်စီး (ခန့်မှန်းတန်ဖိုးငွေကျပ် ၅,၀၀၀,၀၀၀) ကို ပို့ကုန် သွင်းကုန်ဥပဒေအရ လည်းကောင်း စုစုပေါင်းခန့်မှန်းတန်ဖိုးငွေကျပ် ၇,၄၂၁,၉၈၃ ကို ဖမ်းဆီးအရေးယူဆောင်ရွက်လျက်ရှိသည်။

ဖေဖော်ဝါရီ ၁၄ ရက်၊ ၁၆ ရက်နှင့် ၁၇ ရက်တို့တွင် ဖမ်းဆီးရမိမှု စုစုပေါင်းမှာ အမှုတွဲ ၁၉ မှု၊ (ခန့်မှန်းတန်ဖိုးငွေကျပ် ၄၂၁,၈၈၁,၁၈၉) ကို ဖမ်းဆီးရမိခဲ့သည်။ တရားမဝင် ကုန်သွယ်မှုများကြောင့် အသေးစား၊ အငယ်စားနှင့် အလတ်စား ပြည်တွင်းစီးပွားရေး လုပ်ငန်းများမှ ထုတ်လုပ်သည့် ကုန်ပစ္စည်းများ စျေးကွက်အတွင်း မျှတစွာ ယှဉ်ပြိုင်နိုင်မှု မရှိခြင်းနှင့် စျေးကွက်ပျောက်ဆုံးခြင်းတို့ဖြစ်ပေါ်စေပြီး ပြည်တွင်းကုန်ထုတ်လုပ်ငန်းများ ရေရှည်ရပ်တည်နိုင်ရေးအတွက် ကြီးမားသည့် ခြိမ်းခြောက်မှုများကို ဖြစ်ပေါ်စေသည်။ 

သို့ဖြစ်ပါ၍ သက်ဆိုင်ရာ တာဝန်ရှိသူများက ယခုထက်ပိုမို၍ တားဆီးစစ်ဆေး ကြပ်မတ်ဆောင်ရွက်သွားမည် ဖြစ်ကြောင်း တရားမဝင် ကုန်သွယ်မှု တိုက်ဖျက်ရေး ဦးဆောင်ကော်မတီမှ သတင်းရရှိသည်။

ကိုးကား- www.moi.gov.mm
ဆက်လက်ဖတ်ရှုရန် - https://myanmar.gov.mm/

ထိုင်းနိုင်ငံအပါအဝင် အိမ်နီးချင်းနိုင်ငံများမှတစ်ဆင့် နယ်စပ်လမ်းကြောင်းများ အသုံးပြုပြီး မြန်မာနိုင်ငံအတွင်းသို့ တရားမဝင် ဝင်ရောက်လာကာ မြဝတီ၊ ရွှေကုက္ကိုနှင့် KK Park နယ်မြေ များတွင် တရားမဝင်အွန်လိုင်းလောင်းကစားမှုများ၊ အွန်လိုင်းလိမ်လည်မှုများနှင့် အခြားသော ရာဇဝတ်မှုများကို ကျူးလွန်ခဲ့ကြသူများကို အာဏာပိုင်များက ရှာဖွေဖော်ထုတ် ဖမ်းဆီးလျက်ရှိရာ ၂၀၂၅ ခုနှစ်၊ ဇန်နဝါရီလ ၃၀ ရက်မှ ဖေဖော်ဝါရီလ ၁၆ ရက်အတွင်း နိုင်ငံခြားသား ၁၀၃၀ ဦးကို ဖော်ထုတ်ဖမ်းဆီးနိုင်ခဲ့ပါသည်။ အာဏာပိုင်များအနေဖြင့် အဆိုပါ တရားမဝင်အလုပ်သမားများအား သက်ဆိုင်ရာနိုင်ငံများသို့ ဥပဒေနှင့်အညီ ပြန်လည်လွှဲပြောင်းပေးနိုင်ရေး ဆောင်ရွက်လျက်ရှိပါသည်။

ထိုလုပ်ငန်းစဉ်၏ တစ်စိတ်တစ်ပိုင်းအဖြစ် ၂၀၂၅ ခုနှစ်၊ ဖေဖော်ဝါရီလ ၁၇ ရက်နေ့ နံနက်ပိုင်းတွင်ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ် အောင်ကျော်ကျော် ခေါင်းဆောင်သော “မြန်မာနိုင်ငံ အတွင်း တရားမဝင်ဝင်ရောက်မှုကြောင့် ဖမ်းဆီးရမိသည့် နိုင်ငံခြားသားများအား ဥပဒေနှင့်အညီ အမြန်ဆုံးအရေးယူ ပြည်နှင်လွှဲပြောင်းမှု ကြီးကြပ်ရေးဗဟိုကော်မတီ”မှ တာဝန်ရှိသူများသည် တရုတ်ပြည်သူ့သမ္မတနိုင်ငံ ပြည်သူ့လုံခြုံရေးဝန်ကြီးဌာနမှ လက်ထောက်ဝန်ကြီး Liu Zhong Yi အပါအဝင် ထိုင်းနိုင်ငံ အမျိုးသားကာကွယ်ရေးဝန်ကြီးဌာနမှ ကိုယ်စားလှယ်များနှင့် မြဝတီမြို့၌ တွေ့ဆုံခဲ့ပါသည်။

မြန်မာ-တရုတ်-ထိုင်း ၃ နိုင်ငံလုပ်ငန်းအဖွဲ့သည် မြဝတီ၊ ရွှေကုက္ကိုနှင့် KK Park တို့မှ သိမ်းဆည်းရမိသည့် ပစ္စည်းများအား စစ်ဆေးကြည့်ရှုခြင်း၊ ဖမ်းဆီးရမိသည့် နိုင်ငံခြားသားများ၏ အထောက်အထား၊ မှတ်တမ်းများအား စစ်ဆေးအတည်ပြုခြင်း၊ တရားခံများအား ထိန်းသိမ်းထားရှိမှုအခြေအနေတို့ကို ကြည့်ရှုစစ်ဆေးခြင်းများကို ဆောင်ရွက်ခဲ့ကြပြီး တရားခံများအား မြန်ဆန်စွာ ပြန်လည် လွှဲပြောင်းနိုင်ရေး ဆောင်ရွက်လျက်ရှိသည့် လုပ်ငန်းစဉ်များနှင့်ပတ်သက်၍ ဆွေးနွေးခဲ့ကြပါသည်။

မြန်မာအစိုးရအနေဖြင့် တရားမဝင်အွန်လိုင်းလိမ်လည်မှုများကို စုံစမ်းဖော်ထုတ်ခြင်းနှင့်နှိမ်နင်းခြင်း လုပ်ငန်းများကို ပြတ်ပြတ်သားသားလုပ်ဆောင်သွားမည်ဖြစ်ကြောင်း ကတိကဝတ်ပြုထားပြီး အာဏာပိုင်များအနေဖြင့် မြန်မာနိုင်ငံအတွင်းရှိ နယ်စပ်ဒေသများရှိ တရားမဝင် အွန်လိုင်းလောင်းကစားနှင့် ငွေကြေးလိမ်လည်မှုကွန်ရက်များကို ဟန့်တားဖျက်သိမ်းနိုင်ရေးအတွက် အိမ်နီးချင်းနိုင်ငံများနှင့်လည်းကောင်း၊ အပြည်ပြည်ဆိုင်ရာအဖွဲ့အစည်းများနှင့်လည်းကောင်း ဆက်လက်ပူးပေါင်း ဆောင်ရွက်လျက်ရှိပါသည်။

Source: https://www.nationthailand.com

အမေရိကန်အစိုးရက ပေါက်ကွဲအားပြင်းထန်သော MK-84 ဗုံးများ ပေးပို့မှုအား ယာယီပိတ်ပင်ထားခြင်းကို မကြာသေးမီက ပြန်လည်ရုပ်သိမ်းခဲ့ပြီးနောက် အစ္စရေးအနေဖြင့် အဆိုပါ ဗုံးအမျိုးအစားများ ပေးပို့မှုကို လက်ခံရရှိ ခဲ့ကြောင်း အစ္စရေး ကာကွယ်ရေးဝန်ကြီးဌာနက ဖေဖော်ဝါရီ ၁၆ ရက်၌ ပြောကြားခဲ့သည်။

MK-84 ဗုံးသည် အခိုင်အမာ အကာအကွယ်ပြုလုပ်ထားသော ပစ်မှတ်များကို ဖောက်ထွင်းနိုင်ကာ ပေါက်ကွဲအား ပြင်းထန်သဖြင့် ကျယ်ကျယ်ပြန့်ပြန့် ပျက်စီးမှုများ ဖြစ်ပေါ်စေနိုင်သော ၉၀၇ ကီလိုဂရမ် အလေးချိန်ရှိ ပဲ့ထိန်းစနစ် မပါဝင်သည့် ဗုံးအမျိုးအစားဖြစ်သည်။

သင်္ဘောဖြင့် ပေးပို့လိုက်သော ယင်းခဲယမ်းမီးကျောက်များမှာ ဖေဖော်ဝါရီ ၁၅ ရက် နှောင်းပိုင်းတွင် အစ္စရေး ဆိပ်ကမ်းမြို့ အက်ရှ်ဒေ့ါသို့ ဆိုက်ရောက်လာခဲ့ကြောင်း၊ ယင်းတို့အား ညတွင်းချင်း သင်္ဘောပေါ်မှချကာ လက်ခံရယူခဲ့ကြောင်း ကာကွယ်ရေးဝန်ကြီးဌာန ပြောခွင့်ရသူက ကြေညာချက်ထုတ်ပြန်ခဲ့သည်။

ဂါဇာကမ်းမြောင်ဒေသ၏ လူဦးရေသိပ်သည်းသောနေရာဒေသများတွင် MK-84 ဗုံးများကို အသုံးပြုနိုင်သည့် အလားအလာနှင့် သက်ရောက်မှုအပေါ် စိုးရိမ်မှုများကြောင့် ယခင် သမ္မတ ဂျိုးဘိုင်ဒင်၏ အမေရိကန်အစိုးရက အဆိုပါဗုံး အမျိုးအစားများ ပေးပို့ခြင်းကို ဆိုင်းငံ့ခဲ့ခြင်းဖြစ်သည်။ ၂၀၂၃ ခုနှစ်၊ အောက်တိုဘာလမှစ၍ အစ္စရေး၏ ဗုံးကြဲ တိုက်ခိုက်မှုများနှင့် မြေပြင်မှ ထိုးစစ်ဆင်တိုက်ခိုက်မှုများကြောင့် ဂါဇာ‌ဒေသတွင် လူသောင်းနှင့်ချီ သေဆုံးခဲ့ကြောင်း သိရသည်။ 

ကိုးကား-ဆင်ဟွာ

တရုတ်ပြည်သူလွတ်မြောက်ရေးတပ်မတော်သည် ဖေဖော်ဝါရီ ၁၇ ရက်တွင် ကနေဒါစစ်သင်္ဘော တစ်စီး၏ ထိုင်ဝမ်ရေလက်ကြားသို့ ဖြတ်သန်းခဲ့မှုဖြစ်စဉ်အပေါ် ပြင်းပြင်းထန်ထန် ရှုတ်ချခဲ့ပြီး ၎င်း၏ လေတပ်နှင့် ရေတပ်တို့က ထိုသင်္ဘောကို စောင့်ကြည့်သတိပေးမှု လုပ်ဆောင်ခဲ့ကြောင်း ပြောကြား ခဲ့သည်။ ယခုဖြစ်စဉ်သည် အမေရိကန်ရေတပ်သင်္ဘောများက အလားတူ လုပ်ဆောင်ခဲ့သည့်ဖြစ်စဉ် နောက်ပိုင်း ရက်အနည်းငယ်အတွင်း ထပ်မံဖြစ်ပွားခဲ့ခြင်းဖြစ်သည်။

အမေရိကန်ရေတပ်နှင့် မဟာမိတ်နိုင်ငံများဖြစ်သည့် ကနေဒါ၊ ဗြိတိန် နှင့် ပြင်သစ်တို့မှ သင်္ဘော များသည် ထိုင်ဝမ်ရေလက်ကြားကို တစ်လလျှင် တစ်ကြိမ်ခန့် ဖြတ်သန်းလေ့ရှိပြီး ထိုင်ဝမ်နှင့် ဤမဟာဗျူဟာကျသည့် ရေလမ်းကြောင်းသည် မိမိပိုင်နက်ဖြစ်ကြောင်းကို တရုတ်က ပြောဆိုထားသည်။

ကနေဒါ၏လုပ်ရပ်များသည် "တမင်တကာ ပြဿနာဖြစ်အောင် လှုံ့ဆော်ခြင်း" ဖြစ်ပြီး ရေလက်ကြား၏ ငြိမ်းချမ်းရေးနှင့် တည်ငြိမ်မှုကို ထိခိုက်စေကြောင်း၊ " မိမိတပ်ဖွဲ့ဝင်များအနေဖြင့် အမြဲတမ်း အမြင့်ဆုံး သတိထားပြီး ခြိမ်းခြောက်မှုနှင့် ကျူးကျော်မှုအားလုံးကို ခိုင်မာစွာ ခုခံတွန်းလှန်သွားမည်"ဖြစ်ကြောင်း တရုတ်ပြည်သူ့လွတ်မြောက်ရေးတပ် အရှေ့ပိုင်းစစ်ဌာနချုပ်က ထုတ်ပြန်ချက်တွင် ဖော်ပြခဲ့ပါသည်။

ထိုင်င်ဝမ်ရေလက်ကြားသို့ ကနေဒါသင်္ဘောဖြတ်သန်းမှုကို ကြိုဆိုကြောင်းနှင့် ကနေဒါသည် ထိုင်ဝမ် ရေလက်ကြား၏ လွတ်လပ်မှု၊ ငြိမ်းချမ်းမှုနှင့် ပွင့်လင်းမြင်သာမှုကို ကာကွယ်ရန်နှင့် ထိုင်ဝမ် ရေလက်ကြားသည် အပြည်ပြည်ဆိုင်ရာရေပိုင်နက်ဖြစ်ကြောင်း ၎င်း၏ခိုင်မာသည့်ရပ်တည်ချက်ကို ပြသခဲ့ခြင်းဖြစ်ကြောင်း ထိုင်ဝမ်နိုင်ငံခြားရေးဝန်ကြီးဌာနက ပြောကြားခဲ့သည်။

ထိုင်ဝမ်အစိုးရသည် ဒီမိုကရေစီနည်းကျ ရွေးကောက်တင်မြှောက်ခံထားရသည့်အစိုးရဖြစ်ပြီး တရုတ်၏ အချုပ်အခြာအာဏာပိုင်အဖြစ် တောင်းဆိုမှုအပေါ် ငြင်းဆိုကြောင်းနှင့် မိမိနိုင်ငံ၏ အနာဂတ်ကို မိမိတို့နိုင်ငံသားများကသာလျှင် ဆုံးဖြတ်နိုင်သည်ဟု ပြောကြားခဲ့ကြောင်း CNA သတင်းဌာနက ရေးသားဖော်ပြထားပါသည်။

Source: CNA            

Photo: DECK TV