ရွှေဈေးနှုန်းများသည် ကမ္ဘာလုံးဆိုင်ရာ ကုန်သွယ်ရေးစစ်ပွဲနှင့်ပတ်သက်သည့် စိုးရိမ်မှုများ တိုးပွားလာမှုကြောင့် ရင်းနှီးမြှုပ်နှံသူများက လုံခြုံစိတ်ချ ရသည့်ရင်းနှီးမြှုပ်နှံမှုများကို ရှာဖွေစဉ် မတ်လ ၁၃ရက် (ကြာသပတေး) နေ့တွင် စံချိန်တင်မြင့်တက်လာခဲ့သည်။ ယခုနောက်ဆုံး ရွှေဈေး မြင့်တက်မှု သည် အမေရိကန်မှ ကြားဖြတ်ကောက်ခံမည့် အကောက်ခွန်များနှင့် ပတ်သက်သည့် ကြေညာချက်များကြောင့် ဖြစ်ပေါ်လာခြင်းဖြစ်သည်။

ရွှေဈေးနှုန်းများသည် ချီကာဂိုကုန်သွယ်ရေးစင်တာ (CME) တွင် ဧပြီလ အတွက် ရွှေဈေးသည် မတ်လ ၁၃ ရက်နေ့ညတွင် ၁ အောင်စလျှင် အမေရိကန်ဒေါ်လာ ၃,၀၀၃.၉၀ အထိ ခဏတာ ရောက်ရှိခဲ့ပြီး နောက်ပိုင်း တွင် ၂,၉၈၉.၅၀ ဒေါ်လာသို့ ပြန်လည်ကျဆင်းသွားခဲ့သည်။ ယင်းသည် ရွှေဈေး ၁ အောင်စလျှင် ဒေါ်လာ ၃,၀၀၀ စံချိန်ကို ပထမဆုံးအကြိမ် ကျော်လွန်သွားခြင်း ဖြစ်သည်။ ရွှေဈေးနှုန်းများသည် ၂၀၂၄ ခုနှစ်တွင် ၂၇% တက်လာပြီးနောက် ၂၀၂၅ နှစ်တွင် ယနေ့အထိ ၁၄% နီးပါး တက်လာခဲ့သည်။

“ကုန်သွယ်ရေးတင်းမာမှုများကြောင့် အခြားရင်းနှီးမြှုပ်နှံမှုများတွင် စွန့်စားမှုများကို ရှောင်ရှားလိုသည့် ရင်းနှီးမြှုပ်နှံသူများသည် တင်းမာမှုများ ပိုမို ဆိုးရွားလာနိုင်သည့် အခြေအနေတွင် လုံခြုံစိတ်ချရသည့် ရွှေဈေးကွက်သို့ တစ်ဖန်ပြန်လည်လှည့်နေကြသည်” ဟု IG စျေးကွက်ဗျူဟာပညာရှင် Yeap Jun Rong က Reuters သို့ ပြောကြားခဲ့သည်။

ကမ္ဘာလုံးဆိုင်ရာ ကုန်သွယ်ရေးတင်းမာမှုများနှင့်ပတ်သက်သည့် စိုးရိမ်မှုများအပြင် လေ့လာသုံးသပ်သူများသည် ပထဝီနိုင်ငံရေးနှင့် စီးပွားရေး မတည်ငြိမ်မှုများကြားတွင် ရင်းနှီးမြှုပ်နှံသူများ နှစ်သက်သော ပိုင်ဆိုင်မှုဖြစ်သည့် ရွှေစျေးနှုန်းများ တက်လာခြင်းကို အမေရိကန်ဗဟိုဘဏ်က ငွေကြေးပေါ်လစီဖြေလျှော့မှုအပေါ် ဈေးကစားခြင်းဟု သုံးသပ်ကြသည်။

ကမ္ဘာ့ရွှေကောင်စီ၏ စစ်တမ်းအရ ၂၀၂၄ ခုနှစ်တွင် အရှေ့အလယ်ပိုင်းနှင့် အရှေ့ဥရောပတို့၏ ပထဝီနိုင်ငံရေးတင်းမာမှုများတိုးလာခြင်း၊ အမေရိကန် သမ္မတရွေးကောက်ပွဲ ရလဒ်နှင့်ပတ်သက်၍ မရေရာမှုများ၊ အတိုးနှုန်းများ လျှော့ချခြင်းနှင့် အဓိကဗဟိုဘဏ်များ၏ ရွှေဝယ်ယူမှုများ မြင့်တက် လာခြင်း တို့ကြောင့် ရွှေဈေးနှုန်းများ စံချိန်တင်မြင့်တက်ခဲ့သည်။

စျေးကွက်များအတွင် ဈေးနှုန်းများမတည်ငြိမ်မှုများနှင့်ပတ်သက်၍ သုံးသပ်ချက်တွင် TD Securities ၏ ကုန်စည်ဗျူဟာဌာနမှူး Bart Melek က ဗဟိုဘဏ်များသည် ဒေါ်လာ၏ ရေရှည်တည်တံ့ခိုင်မာမှုနှင့် စီးပွားရေး အင်အားကြီးနိုင်ငံများအကြား ပထဝီနိုင်ငံရေး တင်းမာမှုများနှင့် ပတ်သက်၍ စိုးရိမ်ပူပန်မှုများကြောင့် မကြာသေးမီနှစ်များအတွင်း ရွှေဝယ်ယူမှု စံချိန်တင် မြင့်တက်လာခဲ့ကြောင်း ပြောကြားခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားကာကွယ်ရေးဝန်ကြီးဌာနသည် ကာ့ခ် (Kursk) ဒေသရှိ ယူကရိန်း တပ်များကို ရုရှားတပ်ဖွဲ့များက တိုက်ခိုက်နေသည့် ဗီဒီယိုဖိုင်များကို တရားဝင် မျှဝေခဲ့ပါသည်။

ပြီးခဲ့သည့်နှစ် ဩဂုတ်လမှစ၍ ရုရှားပိုင် ကာ့ခ်ဒေသတွင် အမာခံတပ်စွဲထားသော ယူကရိန်းတပ်များကို ရုရှားတပ်ဖွဲ့က ယခုအပတ်အတွင်း   သိသာထင်ရှားစွာ တိုက်ခိုက်နိုင်ခဲ့ကြောင်း၊ ကာ့ခ်ဒေသ ၈၆ ရာခိုင်နှုန်းကို ပြန်လည်ရရှိထားပြီဖြစ်သည်ဟု ခန့်မှန်းထားကြောင်း၊ အဆိုပါဒေသ၏ မြို့တော် Sudzha မှ ယူကရိန်းတပ်ဖွဲ့များမှာ ယခုအခါ ဆုတ်ခွာနေကြပြီ ဖြစ်ကြောင်း ဝန်ကြီးဌာနက ကြေညာထားပါသည်။

ယခုဗီဒီယိုမှာ ကာ့ခ်ဒေသမှ နောက်ပြန်ဆုတ်နေသည့် ယူကရိန်းစစ်ဘက် ယာဉ်တစ်စီးကို ရုရှားက ဒရုန်းဖြင့် လိုက်လံပစ်ချလိုက်ခြင်း ဖြစ်ပါသည်။

https://www.rt.com/russia/614126-kursk-region-drone-attacks/

ကိုးကား- RT

ဘာသာပြန်ဆိုသူ-ဦးကျော်ဇေယျ၊ဒုတိယညွှန်ကြားရေးမှူး၊နစက-၃

အမေရိကန်လေကြောင်းလိုင်းလေယာဉ်တစ်စင်း၏ အင်ဂျင်မီးလောင်မှု ဖြစ်ပွားပြီးနောက် ဒင်ဗာအပြည်ပြည်ဆိုင်ရာလေဆိပ်တွင် ခရီးသည်များကို လေယာဉ်အတောင်ပံပေါ်မှ ဆင်းသက်စေခဲ့ကြောင်း အရာရှိများက ပြောကြားခဲ့သည်။ ထိုဖြစ်စဉ်သည် မတ်လ ၁၃ ရက်နေ့ ညနေပိုင်းတွင် ဖြစ်ပွားခဲ့ပြီး လေယာဉ်ပေါ်တွင်မီးခိုးများ ဝေနေစဉ် ခရီးသည်များကို လေယာဉ်အတောင်ပံပေါ်မှဆင်းသက်စေခဲ့သည်။

ဖြစ်စဉ်နှင့်ပတ်သက်၍ အစိုးရအရာရှိတစ်ဦးက American Airlines လေယာဉ်နံပါတ် 1006 တွင် ပါဝင်နေသည့်ခရီးသည်များကို လေဆိပ်အတွင်းသို့ အမြန်ဝင်ရောက်စေခဲ့ကြောင်း ပြောကြားခဲ့သည်။ ထိုလေယာဉ်သည် Colorado Springs မှ Dallas-Fort Worth သို့သွားရောက်နေစဉ် ဒင်ဗာလေဆိပ်သို့ ဒေသစံတော်ချိန် ညနေ ၅ နာရီခန့်တွင် ဆင်းသက်ခဲ့ကြောင်း FlightAware.com ၏အချက်အလက်များအရသိရသည်။

American Airlines ပြောရေးဆိုခွင့်ရှိသူတစ်ဦးက CNN သို့ ပေးပို့သည့် ထုတ်ပြန်ချက်တွင် ဒင်ဗာလေဆိပ်တွင် လေယာဉ်၏ အင်ဂျင်မီးလောင်မှု ဖြစ်ပွားပြီးနောက် Boeing 737-800 လေယာဉ်ပေါ်မှ ခရီးသည် ၁၇၂ ဦး နှင့် လေယာဉ်အဖွဲ့ဝင် ၆ ဦးကို ဆင်းသက်စေခဲ့ကြောင်းဖော်ပြခဲ့သည်။

လေယာဉ်ပေါ်ပါရှိသူများနှင့် မြေပြင်ပေါ်ရှိလူများ၏ဘေးကင်းရေးကို အဓိကထားပြီး အမြန်ဆုံးနှင့် ဆုံးဖြတ်ချက်ချမှတ်ဆောင်ရွက်ပေးခဲ့သည့် လေယာဉ်အဖွဲ့ဝင်များ၊ DEN အဖွဲ့နှင့် ပထမဆုံး တုံ့ပြန်ဆောင်ရွက်သူများကို ကျေးဇူးတင်ရှိပါသည် ဟု လေကြောင်းလိုင်းက ပြောကြားခဲ့သည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ရုရှားသည် ယူကရိန်းပဋိပက္ခတွင် ပစ်အခတ်ရပ်စဲရန် အဆင်သင့်ဖြစ်နေပြီဖြစ်ကြောင်း သမ္မတ ဗလာဒီမာ ပူတင်က ပြောကြားခဲ့ပြီး ထိုသို့သော သဘောတူညီချက်သည် “ရေရှည်ငြိမ်းချမ်းရေးကို ဦးတည်သင့်သည်” ဟု အတိအလင်း ပြောကြားခဲ့ပါသည်။ 

ရုရှားသည် အပစ်အခတ်ရပ်စဲရေးအယူအဆသည် “မှန်ကန်သော အယူအဆ” ဖြစ်သင့်သည်ဟု ယုံကြည်ကြောင်း သမ္မတ ပူတင်က မတ် လ ၁၃ ရက် (ကြာသပတေးနေ့)တွင် မော်စကို၌ ပြုလုပ်သည့် ဘယ်လာရုဇ်သမ္မတ အလက်ဇန္ဒား လူကာရှန်ကိုနှင့် ပူးတွဲသတင်းစာရှင်းလင်းပွဲတစ်ခုတွင် သတင်းထောက်များကို ပြောကြားခဲ့ပါသည်။ 

"မိမိတို့က လုံးဝထောက်ခံပါတယ်" ဟု ၎င်းက ဖြည့်စွက် ပြောကြားခဲ့ပါသည်။   

“ငြိမ်းချမ်းသောနည်းလမ်းများဖြင့် ပဋိပက္ခကို ဖြေရှင်းရန် အယူအဆကို မိမိတို့က ထောက်ခံပါတယ်” ဟု သမ္မတက ပြောကြားခဲ့ပါသည်။   

အပစ်အခတ်ရပ်စဲရန် သဘောတူညီချက်ရရှိရန် ဆွေးနွေးဖြေရှင်းရမည့် အချို့သော ကိစ္စရပ်များ ရှိနေသေးကြောင်း သမ္မတပူတင်က ပြောကြားခဲ့ပြီး မော်စကိုသည် အထူးသဖြင့် အမေရိကန်နှင့် ဆွေးနွေးရန် လိုအပ်ကြောင်း ဖြည့်စွက်ပြောကြားခဲ့ပါသည်။ ထိုဆွေးနွေးမှုတွင် အမေရိကန် သမ္မတ ဒေါ်နယ်ထရမ့်နှင့် ကိုယ်တိုင်တွေ့ဆုံဆွေးနွေးရန် လိုအပ်နိုင်ကြောင်း ရုရှားသမ္မတက ပြောကြားခဲ့ပါသည်။   

သမ္မတပူတင်၏ စိုးရိမ်မှုများတွင် အပစ်အခတ်ရပ်စဲမှုကို စောင့်ကြည့်ရန် “ထိန်းချုပ်မှုနှင့် အတည်ပြုမှု” စနစ်များနှင့် ယူကရိန်း၏ အပစ်အခတ် ရပ်စဲချိန်ကို အသုံးချ၍ လက်နက်ပြန်လည်တပ်ဆင်ခြင်းနှင့် ရှေ့တန်းရှိ တပ်ဖွဲ့များကို ပြန်လည်အားဖြည့်ခြင်းတို့ ပါဝင်ပါသည်။ 

“ရက် ၃၀ ကို ယူကရိန်းတွင် အတင်းအကြပ် စစ်ရေးလှုံ့ဆော်မှုကို ဆက်လုပ်ဖို့၊ လက်နက်တပ်ဆင်မှုတွေ ပိုမိုရယူဖို့နှင့် အသစ်ဖွဲ့စည်း ထားသော တပ်ဖွဲ့များကို လေ့ကျင့်ဖို့ အသုံးပြုမှာလား” ဟု သမ္မတက မေးခွန်းထုတ်ခဲ့ပါသည်။ “ထိုသို့သောအရာများ မဖြစ်ပေါ်စေရန် အာမခံချက်များ ရှိပါသလား။” ဟု သမ္မတက ပြောကြားခဲ့ပါသည်။

ရုရှားနယ်စပ်ရှိ Kursk ဒေသ၏ အခြေအနေသည်လည်း အဓိက အငြင်းပွားဖွယ်ရာ အချက်တစ်ခု ဖြစ်နိုင်ကြောင်း ရုရှားသမ္မတက ဆိုခဲ့ပါသည်။ သမ္မတပူတင်က အပစ်အခတ်ရပ်စဲမှုသည် ၂၀၂၄ ခုနှစ်၊ ဩဂုတ်လတွင် ထိုဒေသသို့ ဝင်ရောက်ခဲ့သည့် ယူကရိန်းတပ်များအားလုံးကိုရုရှားက ထွက်ခွာခွင့်ပြုရမည်လားဟု စဉ်းစားခဲ့ပါသည်။ “၎င်းတို့က ပြည်သူတွေကို များပြားလှသည့် ရာဇဝတ်မှုတွေ ကျူးလွန်ပြီးနောက် ၎င်းတို့ကို လွှတ်ပေးရမှာလား။ ဒါမှမဟုတ် ယူကရိန်းက ၎င်းတို့ကို လက်နက်ချဖို့ အမိန့်ပေးမှာလား” ဟု သမ္မတက မေးခွန်းထုတ်ခဲ့ပါသည်။ 

အမေရိကန်နှင့် ယူကရိန်းတို့သည် မတ်လ ၁၁ ရက်၊ အင်္ဂါနေ့တွင် ဆော်ဒီ အာရေဗျနိုင်ငံတွင် ကျင်းပသည့် နှစ်နိုင်ငံကိုယ်စားလှယ်အဖွဲ့များ၏ တွေ့ဆုံဆွေးနွေးပွဲအပြီး ရက်ပေါင်း ၃၀ ကြာ ယာယီအပစ်အခတ် ရပ်စဲရေးကို ထောက်ခံခဲ့ပါသည်။ အမေရိကန်အထူးကိုယ်စားလှယ် စတီဗ် ဝစ်ကော့ဖ် သည် မတ်လ ၁၄ ရက်နေ့ ညနောက်ပိုင်းတွင် မော်စကိုသို့ လာရောက်စဉ် ထိုဆွေးနွေးပွဲ၏ ရလဒ်များကို တင်ပြမည်ဟု မျှော်လင့်ရပါသည်။   

ရုရှားသည် ယခင်က ယူကရိန်းပဋိပက္ခတွင် မည်သည့်ယာယီ အပစ်အခတ်ရပ်စဲမှုကိုမဆို ကန့်ကွက်ခဲ့ပြီး ယူကရိန်းသည် ထိုအချိန်ကို အသုံးချ၍ လက်နက်ပြန်လည်တပ်ဆင်ကာ စစ်ပွဲကို ဆက်လက်ဆင်နွှဲမည်ဟု ပြောဆို ခဲ့ပါသည်။ သမ္မတပူတင်က ပဋိပက္ခကို ဖြေရှင်းရန် မည်သည့်နည်းလမ်း ကိုမဆို ရေရှည်တည်တံ့သော ငြိမ်းချမ်းရေးကို တည်ဆောက်ရန်အတွက် အကြောင်းရင်းများကို ဖြေရှင်းရမည်ဟု ပြောကြားခဲ့ပါသည်။

ကိုးကား - RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ရုရှားသမ္မတဗလာဒီမာပူတင်သည် ယူကရိန်းက စစ်ရေးလှုံ့ဆော်မှု၊ စစ်သားများလေ့ကျင့်ရေးနှင့် လက်နက်ပေးပို့မှုများကို ရပ်တန့်ရန် အာမခံချက်များ လိုလားကြောင်း ဖော်ပြခဲ့ပါသည်။

ရုရှားသမ္မတ ဗလာဒီမာ ပူတင်သည် ယူကရိန်းပဋိပက္ခတွင် ရက် ၃၀ ကြာ အပစ်အခတ်ရပ်စဲရေးကို ထောက်ခံသော်လည်း ထိုသို့သော အပစ်အခတ် ရပ်စဲမှုကို မည်သို့အကောင်အထည်ဖော်မည်နည်းဆိုသည့် အချက်နှင့် ပတ်သက်၍ စိုးရိမ်မှုများ ရှိကြောင်း ဖော်ပြခဲ့ပါသည်။   

မတ်လ ၁၃ ရက်၊ ကြာသပတေးနေ့တွင် အဆိုပါကိစ္စအား ပြောကြားရာတွင် သမ္မတ ဗလာဒီမာပူတင်က ဖြစ်နိုင်ခြေရှိသော လိုက်လျောမှုများနှင့် နည်းဗျူဟာမြောက် အခက်အခဲများကို သတိပေးခဲ့ပါသည်။ 

“ရက် ၃၀ ကြာ အပစ်အခတ်ရပ်စဲချိန်အတွင်း ယူကရိန်းက စစ်ရေးလှုံ့ဆော်မှုများ မပြုလုပ်ရန်၊ စစ်သားများကို လေ့ကျင့်မှုများ မပြုလုပ်ရန်နှင့်လက်နက်များ မရယူရန် အာမခံချက်များကိုလည်း မိမိတို့လိုချင်ပါကြောင်း”သမ္မတဗလာဒီမာပူတင်က မော်စကိုတွင် ဘယ်လာရုဇ်သမ္မတ အလက်ဇန္ဒား လူကာရှန်ကိုနှင့် ပြုလုပ်သည့် သတင်းစာရှင်းလင်းပွဲတစ်ခုတွင် ပြောကြား ခဲ့ပါသည်။   

သမ္မတက ရုရှားတပ်များသည် ရှေ့တန်းစစ်မျက်နှာ ကီလိုမီတာ ၂၀၀၀ နီးပါးအထိ တိုးတက်နေပြီး စစ်ရေးလုပ်ဆောင်မှုများကို ရပ်တန့်ခြင်းသည် လက်ရှိလုပ်ဆောင်နေသည့် လုပ်ငန်းစဉ်များကို နှောင့်ယှက်နိုင်ကြောင်း ထောက်ပြခဲ့ပါသည်။ ယူကရိန်းတပ်များသည် အပစ်အခတ်ရပ်စဲချိန်ကို အသုံးချ၍ ပြန်လည်စုစည်းခြင်း၊ လက်နက်များ ပိုမိုရယူခြင်းနှင့် အသစ် စုဆောင်းထားသော တပ်ဖွဲ့ဝင်များကို လေ့ကျင့်ပေးခြင်းများ ပြုလုပ် နိုင်ကြောင်း သတိပေးခဲ့ပါသည်။ 

“အဆိုပါ ရက်ပေါင်း ၃၀ ကို ဘယ်လိုအသုံးချမလဲ။ ယူကရိန်းတွင် အတင်းအကြပ် စစ်ရေးလှုံ့ဆော်မှုကို ဆက်လုပ်ရန်လား။ လက်နက်တပ်ဆင်မှုတွေ ပိုမိုရယူရန်လား။ အသစ်စုဆောင်းထားသည့် တပ်ဖွဲ့များကို လေ့ကျင့်ရန်လား။ သို့မဟုတ် ထိုအချက်အားလုံး မဖြစ်ဘဲနေမည်လား” ဟု သမ္မတ ဗလာဒီမာပူတင် က မေးခွန်းထုတ်ခဲ့ပါသည်။   

ထိုကဲ့သို့သော ကျယ်ပြန့်သည့် စစ်မြေပြင်ပေါ်တွင် အပစ်အခတ်ရပ်စဲမှုကို အတည်ပြုရန် ခက်ခဲမည်ဖြစ်ပြီး ချိုးဖောက်မှုများကို အလွယ်တကူအငြင်းပွားနိုင်ကာ နှစ်ဖက်စလုံးအကြား အပြစ်တင်မှုများ ဖြစ်ပေါ်လာနိုင်ကြောင်း သမ္မတ ဗလာဒီမာပူတင်က ဖြည့်စွက်ပြောကြားခဲ့ပါသည်။ အပစ်အခတ်ရပ်စဲမှုကို စောင့်ကြည့်ရန် “ထိန်းချုပ်မှုနှင့် အတည်ပြုမှု” စနစ်များကို သဘောတူညီသင့်ကြောင်း သမ္မတပူတင်က ပြောကြားခဲ့ပါ သည်။ သမ္မတပူတင်သည် ၂၀၂၄ ခုနှစ်၊ ဩဂုတ်လတွင် ရုရှား၏ Kursk ဒေသသို့ ဝင်ရောက်ခဲ့သည့် ယူကရိန်းတပ်များသည် ယခုအခါ တစ်သီး တခြားဖြစ်နေကြောင်းလည်း ဖော်ပြခဲ့ပါသည်။ အပစ်အခတ်ရပ်စဲမှု ဖြစ်ပေါ် ပါက ၎င်းတို့ကို မည်သို့ဆောင်ရွက်မည်နည်းဆိုသည်မှာ မရှင်းလင်းကြောင်း  သမ္မတဗလာဒီမာပူတင်က မှတ်ချက်ပြုခဲ့ပါသည်။  

“၎င်းတို့က ပြည်သူများကို စစ်ရာဇဝတ်မှုများ ကျူးလွန်ပြီးနောက် ၎င်းတို့ကို လွှတ်ပေးရမည်လား။ ယူကရိန်းခေါင်းဆောင်များက ၎င်းတို့ကို လက်နက်ချရန် အမိန့်ပေးမည်လား။ သို့မဟုတ် လက်နက်ချပြီး အကျဉ်းချ ခံမည်လား” ဟု သမ္မတဗလာဒီမာပူတင်က မေးခွန်းထုတ်ခဲ့ပါသည်။   

ရုရှားစစ်ဦးစီးချုပ် ဗာလာရီ ဂျီရာဆီမော့ဗ်၏ အဆိုအရ မတ်လ ၁၂ ရက် (ဗုဒ္ဓဟူးနေ့) ညနေပိုင်းအထိ ရုရှား၏ တပ်များသည် ၂၀၂၄ ခုနှစ် ၊ ဩဂုတ်လတွင် ယူကရိန်းတပ်များက သိမ်းပိုက်ထားသည့် နယ်မြေ၏ ၈၆% ကို ပြန်လည်ထိန်းချုပ်နိုင်ခဲ့သည်။ ထိုဒေသတွင် ကျန်ရှိနေသော ယူကရိန်း၏ တပ်ဖွဲ့များကို အဓိကအားဖြင့် “ဝိုင်းရံထား” ပြီး “သီးသန့် ဖြစ်နေ” ကြောင်း ၎င်းက ပြောကြားခဲ့ပါသည်။   

ရုရှားသမ္မတဗလာဒီမာ ပူတင်က အမေရိကန်သမ္မတ ဒေါ်နယ်ထရမ့်နှင့် ဆွေးနွေးမှုများ ပြုလုပ်ရန် လိုအပ်ကြောင်း အကြံပြုပြောကြားခဲ့ပါသည်။ 

“ငြိမ်းချမ်းသော နည်းလမ်းများဖြင့် ပဋိပက္ခကို အဆုံးသတ်ရန် အယူအဆသည် မိမိတို့ ထောက်ခံသည့် အရာတစ်ခုဖြစ်သည်” ဟု သမ္မတ ဗလာဒီမာပူတင်က အတိအလင်း ပြောကြားခဲ့ပါသည်။

ကိုးကား - RT

ရုရှားသမ္မတဗလာဒီမာပူတင်နှင့် ဘယ်လာရုစ် သမ္မတ အလက်ဇန္ဒား လူကာရှန်ကိုတို့သည် မော်စကို ကရင်မလင်တွင် ကျင်းပသည့် တွေ့ဆုံ ဆွေးနွေးပွဲအပြီး စာရွက်စာတမ်းများကို လက်မှတ်ရေးထိုးခဲ့ကြပါသည်။

နိုင်ငံနှစ်နိုင်ငံသည် ယုံကြည်စိတ်ချရသော မဟာမိတ်များ၊ နည်းဗျူဟာ မြောက်မိတ်ဖက်များနှင့် အစစ်အမှန် မိတ်ဆွေများဖြစ်ကြောင်း၊  ကမ္ဘာနှင့်ဒေသဆိုင်ရာ ပြဿနာအများစုတွင် နှစ်နိုင်ငံ၏ ရပ်တည်ချက်များ ကိုက်ညီကြောင်း၊  နိုင်ငံတကာနှင့် ဒေသဆိုင်ရာ လက်ရှိအရေးကိစ္စများ နှင့်ပတ်သက်၍ ထင်မြင်ချက်များကို ဖလှယ်နိုင်ခဲ့ကြကြောင်း၊ နှစ်နိုင်ငံသည် ပြည်ထောင်စုနိုင်ငံ( Union State) တည်ဆောက်ရေးနှင့်ပေါင်းစည်းမှုကို နက်ရှိုင်းစွာ ဆက်လက်လုပ်ဆောင်သွားမည် ဖြစ်ကြောင်း၊  မော်စကိုသည် သမ္မတလူကာရှန်ကို ပြန်လည်ရွေးကောက်တင်မြှောက် ခံရပြီးနောက် ပထမဆုံးခရီးစဉ်အဖြစ် ရုရှားသို့ လာရောက်ခဲ့ခြင်းကို အသိအမှတ်ပြုခဲ့ပြီး ၎င်းသည် ဆက်ဆံရေး၏ အထူးသဘောသဘာဝကို မီးမောင်းထိုးပြပါကြောင်း၊  ၎င်းတို့အနေဖြင့် စီးပွားရေး၊ လုံခြုံရေးနှင့် ကာကွယ်ရေးဆိုင်ရာကိစ္စရပ်များကို အသေးစိတ်ဆွေးနွေးခဲ့ကြကြောင်း၊  ပြည်ထောင်စုနိုင်ငံ( Union State)၏ အနောက်ဘက်နယ်စပ်များကို စိတ်ချရသော အကာအကွယ်ပေးမည်ဖြစ်ကြောင်း၊  ဘယ်လာရုဇ်တွင် နေထိုင်သော ရုရှားနိုင်ငံသားများနှင့် ရုရှားတွင် နေထိုင်သော ဘယ်လာရုဇ် နိုင်ငံသားများသည် ရွေးကောက်ပွဲများတွင် မဲဆန္ဒရှင်များနှင့် ကိုယ်စားလှယ်လောင်းများအဖြစ် ပါဝင်နိုင်မည်ဖြစ်ကြောင်း၊ ဘယ်လာရုဇ်မှ အနုပညာရှင်များ မော်စကိုရှိ “အင်တာဗစ်ရှင်း” ပြိုင်ပွဲတွင် ပါဝင်မည်ဟု မျှော်လင့်ထားကြောင်း ရုရှား သမ္မတ ဗလာဒီမာ ပူတင်က ပြောကြားခဲ့ပါသည်။ 

မေ ၉ ရက်နေ့တွင် ကျင်းပမည့်အထိမ်းအမှတ်အောင်ပွဲနှင့်ပတ်သက်၍ ဘယ်လာရုဇ်၏ လက်နက်ကိုင်တပ်ဖွဲ့များသည် မော်စကိုရှိ အောင်ပွဲခံ အခမ်းအနားတွင် ပါဝင်မည်ဖြစ်ကြောင်း၊ ထို့နောက် သမ္မတလူကာရှန်ကို သည် အောင်ပွဲအခမ်းအနားတွင် ပါဝင်မည်ဟု အတည်ပြုခဲ့ပါသည်။

ပူးပေါင်းဆောင်ရွက်မှုများနှင့်ပတ်သက်၍ သမ္မတဗလာဒီမာ ပူတင်က ရုရှားကို ဘယ်လာရုဇ်၏ အဓိက စီးပွားရေးမိတ်ဖက်အဖြစ် သတ်မှတ်ခဲ့ပါသည်။ နည်းဗျူဟာမြောက် ကဏ္ဍအချို့တွင် ပူးပေါင်းဆောင်ရွက်မှု၏ ကောင်းမွန်သော အလားအလာများရှိကြောင်း၊ ဥရောပ- အာရှ စီးပွားရေး အဖွဲ့ (EAEU) အတွင်း ပူးပေါင်းဆောင်ရွက်မှုသည် ကောင်းမွန်သော အရှိန်အဟုန်ဖြင့် တိုးတက်နေပါကြောင်း၊ အပြန်အလှန်ကုန်သွယ်မှုနှင့် ရင်းနှီးမြှုပ်နှံမှုများသည် တတိယနိုင်ငံများ၏ လွှမ်းမိုးမှုနှင့် ကမ္ဘာ့စျေးကွက် ၏ ဆိုးရွားသော အလားအလာများမှ ကာကွယ်ပေးထားပါကြောင်း၊ ၉၀% ကျော်သော ငွေပေးချေမှုများသည် နိုင်ငံခြားငွေများဖြစ်ပါကြောင်း၊ ရုရှားသည် ဘယ်လာရုဇ်နှင့် နည်းပညာမြင့်ကဏ္ဍများတွင် ပူးပေါင်းဆောင်ရွက်မှုကို နက်ရှိုင်းစွာ ဆောင်ရွက်ရန် အလားအလာများရှိသည်ဟု မြင်မိပါကြောင်း သမ္မတ ဗလာဒီမာ ပူတင်က ပြောကြားခဲ့ပါသည်။   

တွေ့ဆုံဆွေးနွေးပွဲသည် ပြည့်စုံပြီး ထိရောက်မှုရှိခဲ့ပါကြောင်း၊  သမ္မတ လူကာရှန်ကိုသည် ရုရှားသမ္မတ ဗလာဒီမာပူတင်အား ၎င်းအတွက် အဆင်ပြေသောအချိန်တွင် ဘယ်လာရုဇ်သို့ လာရောက်ရန် ဖိတ်ကြားခဲ့ပါကြောင်း၊ ၎င်းသည် ရုရှားသမ္မတနှင့် ယူကရိန်းပဋိပက္ခဖြေရှင်းရေးကို ဆွေးနွေးခဲ့ကြောင်း၊ ကုန်စည်လမ်းကြောင်းများကို ပြန်လည်ချိန်ညှိရာတွင် ကူညီထောက်ပံ့ပေးမှုကို ကျေးဇူးတင်ရှိပါကြောင်း ဘယ်လာရုစ် သမ္မတ က ပြောကြားခဲ့ပါသည်။   

နှစ်နိုင်ငံခေါင်းဆောင်များသည် နိုင်ငံခြားနိုင်ငံများနှင့် တရားစီရင်ရေးအဖွဲ့ များ၏ မတရားသော နှိပ်ကွပ်မှုမှ နိုင်ငံသားများကို အပြန်အလှန် ကာကွယ်ရန် ပူးတွဲကြေညာချက်၊ ခေါင်းဆောင်များသည် ပြည်ထောင်စု နိုင်ငံ (Union State) ၏ လုံခြုံရေးအာမခံချက်ဆိုင်ရာ စာချုပ်ကို အတည် ပြုခဲ့သည်။ 

စားသုံးသူများ၏ တန်းတူညီမျှသော အခွင့်အရေးများကို အာမခံချက်ပေးသည့် သဘောတူညီချက် စသည့် သဘောတူညီချက်များစွာကို လက်မှတ် ရေးထိုးခဲ့ကြပါသည်။ 

ကြေညာချက်၏ အဓိက အချက်များတွင် “ခေါင်းဆောင်များသည် ကဏ္ဍအားလုံးတွင် မိတ်ဖက်ပြုမှုကို ချဲ့ထွင်ရန် လမ်းစဉ်ကို မပြောင်းလဲကြောင်း” အတည်ပြုခဲ့ကြပါသည်။ 

နိုင်ငံများသည် ခေတ်မီစိန်ခေါ်မှုများနှင့် ခြိမ်းခြောက်မှုများကို ထိရောက်စွာ တုံ့ပြန်ရန် ပူးပေါင်းအားထုတ်မှုများကို ဆက်လက်တိုးမြှင့်သွားမည် ဖြစ်ပါသည်။

ရုရှားနှင့် ဘယ်လာရုဇ်တို့သည် နေတိုး၏ လုပ်ဆောင်ချက်များကို တုံ့ပြန်ရန် နိုင်ငံရေး-သံတမန်ဆိုင်ရာ၊ စစ်ရေးနှင့် စစ်နည်းဗျူဟာဆိုင်ရာ ထိန်းချုပ်မှု များကို ပြင်ဆင်ခဲ့ကြသည်။   

နိုင်ငံများသည် ဘက်ပေါင်းစုံဆက်ဆံရေးစနစ်ကို ဖွဲ့စည်းရာတွင် နောက်ထပ် ပံ့ပိုးကူညီသွားမည်ဖြစ်ပါသည်။ နိုင်ငံသမ္မတများသည် ဥရောပသမဂ္ဂ၏ ရန်လိုသော ဆန့်ကျင်မှုဆိုင်ရာ မူဝါဒကို ရှုတ်ချခဲ့ကြသည်။ 

စစ်ရေးနှင့် နိုင်ငံရေးဆိုင်ရာ အခြေအနေများသည် ဥရောပ- အာရှ လုံခြုံရေး စနစ်ကို ဖွဲ့စည်းရန် လိုအပ်ကြောင်း ဖော်ပြခဲ့ကြသည်။ 

သမ္မတ ပူတင်နှင့် လူကာရှန်ကိုတို့သည် အာရှ-ပစိဖိတ် လုံခြုံရေးအဖွဲ့ (CSTO) ၏ စုပေါင်းအင်အားကို ဖွံ့ဖြိုးတိုးတက်စေရန် ပြင်ဆင်ထားကြောင်း အတည်ပြုခဲ့ကြပါသည်။ နျူကလီးယားနိုင်ငံများအကြား တိုက်ရိုက်ပဋိပက္ခဖြစ်နိုင်သည့် ရန်လိုသော လှုပ်ရှားမှုများကို သတိပြုမိကြောင်း ဖော်ပြခဲ့ကြပါသည်။  ဓနသဟာယနိုင်ငံများ (CIS) အတွင်း ပေါင်းစည်းမှုကို နက်ရှိုင်းစွာ ဆောင်ရွက်သွားမည်ဖြစ်ကြောင်း ပြောကြားခဲ့ကြပါသည်။

နိုင်ငံများသည် ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) အတွင်း နိုင်ငံရေး၊ စီးပွားရေးနှင့် လူသားချင်းစာနာမှုဆိုင်ရာ ပူးပေါင်းဆောင်ရွက်မှုများကို ဖွံ့ဖြိုးတိုးတက်စေမည်ဖြစ်ကြောင်း ထပ်လောင်းပြောကြားခဲ့ ပါသည်။   

ခေါင်းဆောင်များ၏ တစ်ဦးချင်းတွေ့ဆုံမှုသည် တစ်နာရီနှင့် သုံးမိနစ် ကြာမြင့်ခဲ့ပြီး ထို့နောက် ညစာစားပွဲပုံစံဖြင့် ကိုယ်စားလှယ်အဖွဲ့များနှင့် ဆွေးနွေးပွဲများ ဆက်လက်ကျင်းပခဲ့ပါသည်။

ကိုးကား - RIA Novosti

Photo: President of Russia

နိုင်ငံခြားသားတချို့သည် အိန္ဒိယနိုင်ငံ၊ မီဇိုရမ်ပြည်နယ်ကို ဖြတ်သန်းပြီး မြန်မာနိုင်ငံကိုဝင်ရောက်ကာ ချင်းတောင်တန်းပေါ်က သူပုန်များကို စစ်သင်တန်း လေ့ကျင့်သင်ကြားပေးနေကြောင်း မီဇိုရမ်ပြည်နယ် ဝန်ကြီးချုပ် လာဒူဟိုမာက မတ်လ ၁၀ ရက်နေ့က ပြောကြားလိုက်ကြောင်း အိန္ဒိယ NDTV သတင်းမှာ ဖော်ပြထားပါသည်။ 

လုံခြုံရေးဆိုင်ရာ စိုးရိမ်ပူပန်မှုများ ရှိနေသည့်ကြားက အိန္ဒိယ-မြန်မာ နယ်စပ်တစ်လျှောက် နိုင်ငံခြားသားများ ဖြတ်သန်းသွားလာမှုများကို ဗဟိုအစိုးရကချမှတ်ထားသည့် Protected Area Permit (PAP) လက်မှတ် ပါမှ ခွင့်ပြုမည့်စနစ် ပြန်လည်ကျင့်သုံးမှုကို ပြည်နယ်အစိုးရက ကန့်ကွက်မည် မဟုတ်ကြောင်း ၄င်းက ပြောကြားခဲ့ပါသည်။ 

မြန်မာနိုင်ငံကိုသွားရောက်သည့် နိုင်ငံခြားသားများသည် မီဇိုရမ်ပြည်နယ် ကို ကြားစခန်းလမ်းကြောင်းတစ်ခုအဖြစ် အသုံးပြုနေသည့်ကိစ္စသည် ဗဟို အစိုးရအတွက် စိုးရိမ်စရာကိစ္စကြီးတစ်ခုဖြစ်လာကြောင်း ၄င်းက ပြောကြား ခဲ့ပါသည်။ 

အဆိုပါ သင်တန်းများကို အမေရိကန်နှင့် ဗြိတိန်နိုင်ငံသားများက ပေးနေခြင်းဖြစ်ကြောင်း သိရသည်။ ပြီးခဲ့သည့်နှစ် ဇွန်လမှ ဒီဇင်ဘာလအတွင်း မီဇိုရမ်ပြည်နယ်သို့ ပြည်ပနိုင်ငံသား ၂၀၀၀ ခန့် ရောက်ရှိလာခဲ့သည်။

ပြီးခဲတဲ့နှစ် ဇွန်လနှင့် ဒီဇင်ဘာလအတွင်း နိုင်ငံခြားသား ၂၀၀၀ ဝန်းကျင် မီဇိုရမ်ပြည်နယ်ကို ရောက်ရှိလာပြီး အဆိုပါပုဂ္ဂိုလ်များအနက် အများအပြား သည် ကမ္ဘာလှည့်ခရီးသွားများအဖြစ် တရားဝင်မှတ်ပုံတင်ဖြင့် ရောက်ရှိလာခြင်းမဟုတ်ဘဲ ပုန်းလျှိုးကွယ်လျှိုးဖြင့် ပြည်နယ်ထဲက ထွက်ခွာ သွားကြောင်း ၄င်းက ပြောကြားခဲ့ပါသည်။

နယ်စပ်ကိုဖြတ်ပြီး မြန်မာနိုင်ငံ၊ ချင်းတောင်တန်းက တိုင်းရင်းသားသူပုန်များကို အဆိုပါနိုင်ငံခြားသားများက စစ်သင်တန်းများ လေ့ကျင့်သင်ကြား ပေးနေခြင်းဖြစ်ကြောင်း ၄င်းက ပြောကြားခဲ့ပါသည်။ 

“လက်ရှိ ပထဝီနိုင်ငံရေးအခြေအနေအရ မြန်မာနိုင်ငံထဲက အခြေအနေများကို တရုတ်နှင့် အမေရိကန်အပါအဝင် နိုင်ငံအများအပြားက အနီးကပ် စောင့်ကြည့်နေကြပါသည်။ မီဇိုရမ်ပြည်နယ်ကို နိုင်ငံခြားသားများက ကြားစခန်းတစ်ခုလို အသုံးပြုနေသည့်အတွက် အဆိုပါကိစ္စသည် ဗဟို အစိုးရအတွက် စိုးရိမ်စရာကိစ္စကြီးတစ်ခု ဖြစ်လာပါကြောင်း၊ ထို့အတွက် နိုင်ငံခြားသားများကို PAP လက်မှတ်ပါမှ ခွင့်ပြုမည့်စနစ်ကို ပြန်လည် ကျင့်သုံးခြင်းဖြစ်ပါကြောင်း” ပြည်နယ်ဝန်ကြီးချုပ် က လွှတ်တော်၌ ပြောကြားခဲ့ပါသည်။ 

မြန်မာနိုင်ငံသို့ သွားရောက်မည့် နိုင်ငံခြားသားများသည် ကြားစခန်း အဖြစ် အသုံးပြုလာနိုင်ဖွယ်ရှိသော တခြားပြည်နယ်များတွင်လည်း PAP လက်မှတ်ပါမှ ခွင့်ပြုမည့်စနစ်ကို ပြန်လည်ကျင့်သုံးရန် ပြဋ္ဌာန်းလိုက်ပြီ ဖြစ်ကြောင်း ၄င်းက ပြောကြားခဲ့ပါသည်။ 

PAP စနစ်ပြန်လည်ကျင့်သုံးမှုကို မီဇိုရမ်ပြည်နယ်အစိုးရက အစောပိုင်း က ဆန့်ကျင်ကန့်ကွက်ခဲ့သော်လည်း နောက်ပိုင်းတွင် ဗဟိုအစိုးရက ရှုမြင်သည့်အတိုင်း ထိုစနစ်၏လိုအပ်ချက်ကို နားလည်သွားခဲ့ကြောင်း ၄င်းက ပြောကြားခဲ့ပါသည်။ 

လက်ရှိအချိန်တွင် အာရူနာချယ်ပရာဒေ့ရှ်၊ ဆစ်ကင်မ်၊ မဏိပူရ၊ နာဂလန်း၊ မီဇိုရမ်၊ ဂျမူးနှင့် ကက်ရှ်မီးယား အစိတ်အပိုင်း တချို့၊ ဟီမာ ချယ်ပရာဒေ့ရှ်၊ ရာဂျက်စ်သန်နှင့် ဥတ္တရာခန်း ပြည်နယ်များတွင် PAP စနစ်ကျင့်သုံးမည့် ကာကွယ်ရေးနယ်မြေများအဖြစ် သတ်မှတ်ထားပါသည်။ 

၂၀၁၁ ခုနှစ်တုန်းက ကမ္ဘာလှည့်ခရီးသွားလုပ်ငန်း အားပေးမြှင့်တင်ရန်အတွက် မဏိပူရ၊ နာဂလန်းနှင့် မီဇိုရမ် ပြည်နယ်များတွင် အာဖဂန် နစ္စတန်၊ ပါကစ္စတန်နှင့် တရုတ် နိုင်ငံသားများကလွဲ၍ တခြားနိုင်ငံခြားသားများအတွက် PAP စနစ်ကျင့်သုံးမှု ကို ကင်းလွတ်ခွင့်ပေးထားခဲ့သော်လည်း ယခုလို ပထဝီနိုင်ငံရေးအခြေအနေ ရှုပ်ထွေးမှုတွေကြောင့် အဆိုပါစနစ်ကို ပြန်လည်ကျင့်သုံးလာခြင်းဖြစ်ပါသည်။ 

ကိုးကား- Some Foreigners Entered Myanmar Via Mizoram, Gave Military Training In Chin Hills': Chief Minister Lalduhoma

ယူကရိန်းအတွက် အကြီးမားဆုံးပြဿနာမှာ ရှေ့တန်းတပ်များအတွက် စစ်သားအင်အား အခက်အခဲဖြစ်နေကြောင်း Financial Times သတင်းစာက ဖော်ပြထားပါသည်။

ယူကရိန်းစစ်တပ်အတွက် လက်နက်များ သို့မဟုတ် မိုင်းများ ပြတ်လပ် ခြင်းမှာ စစ်သား အင်အား မလုံလောက်ခြင်းလောက် ဆိုးရွားမှုမရှိဟု ဥရောပအရာရှိများ ပြောကြားချက်ကို ကိုးကား၍ အဆိုပါသတင်းစာက ပြောကြားထားပါသည်။ 

တစ်လလျှင် စစ်သား ၃၀,၀၀၀ ခေါ်ရန် ရည်မှန်းထားသော်လည်း ၎င်းကို ပြည့်မီရန် လွန်စွာ အခက်အခဲရင်ဆိုင်နေရကြောင်း၊ မည်သူမျှ နောက်ဆုံး အလုပ်ခေါ်ခန့်ခြင်း သို့မဟုတ် တိုက်ပွဲတွင် သေဆုံးလိုခြင်း မရှိကြောင်း ဥရောပအရာရှိတစ်ဦးက ပြောကြားထားပါသည်။

လွန်စွာစိတ်မကောင်းစရာကောင်းသည်မှာ မိခင်များအနေဖြင့် အသက် ၁၆ နှစ်အရွယ်သားများကို တပ်မတော်ထဲ မဝင်စေလိုသဖြင့် ပြည်ပသို့ ထွက်ခွာစေကြရကြောင်း၊ ပြည်သူများအနေဖြင့် လုံခြုံရေး၊ စစ်ရေး သင်တန်း မတက်ရဘဲ လက်နက်မပါဘဲ စစ်မြေပြင်သို့ စေလွှတ်ခြင်းခံရမည် ကို ကြောက်ရွှံ့နေကြကြောင်း ဖော်ပြထားပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဘယ်လာရုစ်သမ္မတလူကာရှန်ကိုက ရုရှားသည် ယူကရိန်းနှင့်ပတ်သက်၍ လက်ရှိအခြေအနေတွင် အားသာချက် (strong cards) ကို ကိုင်ဆောင်ထားနေပြီး ၎င်းတို့အနေဖြင့် အဆိုပါအချက်ကို မည်သည့်အချိန်တွင် အသုံးချမည်ဆိုသည့်အပေါ် မူတည်ပြီးမှသာ သဘောတူညီချက်တစ်ရပ် ရရှိနိုင်မည်ဖြစ်ကြောင်း ပြောကြားလိုက်သည်။

မတ်လ ၁၁ ရက်က အမေရိကန်၏ ယူကရိန်းကိုယ်စားလှယ်များနှင့် တွေ့ဆုံဆွေးနွေးပြီးနောက် ရရှိလာသည့် ရက် ၃၀ အပစ်အခတ်ရပ်စဲရေး သဘော တူညီချက်အဆိုနှင့်ပတ်သက်၍ ယခုအချိန်မှာ ရုရှားအနေဖြင့် လက်ခံရန် မသင့်လျော်သေးကြောင်း၊ အဘယ်ကြောင့်ဆိုသော် ရုရှားတပ်ဖွဲ့ များသည် တိုက်ပွဲတွင် အောင်မြင်မှုရရှိနေသဖြင့် ခေတ္တရပ်ဆိုင်းရန် သဘောတူညီလိုက်ခြင်းက ၎င်း(ရုရှား)တို့အတွက် အားနည်းချက်ဖြစ်သွားနိုင်ကြောင်း လူကာရှန်ကိုက ခန့်မှန်းသုံးသပ်ထားပါသည်။ 

ရုရှားသည် ၎င်းတို့ရရှိထားသော အားသာချက်များကို ကိုင်ထားပြီး သင့်တင့်လျှောက်ပတ်သည့် အချိန်တွင် မှန်မှန်ကန်ကန် အသုံးချမည့် အချိန်ကျမှသာ သဘောတူညီချက်တစ်ရပ် ရရှိလာလိမ့်မည်ဟု ယုံကြည်ကြောင်း ၎င်းက ထပ်မံ သုံးသပ်ထားပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားသမ္မတဗလာဒီမာပူတင်သည် ရုရှားနိုင်ငံသို့ တရားဝင် အလည်အပတ် လာရောက်မည့် ဘယ်လာရုစ်သမ္မတ လူကာရှန်ကိုနှင့် မတ်လ ၁၃ (ကြာသပတေးနေ့)တွင် တွေ့ဆုံမည် ဖြစ်ပါသည်။ ထိုခရီးစဉ်သည်လူကာရှန်ကို၏ ပြန်လည်ရွေးကောက်ခံရပြီးနောက် ပထမဆုံးပြည်ပ ခရီးစဉ် ဖြစ်ပါသည်။

ထိုတွေ့ဆုံပွဲတွင် ရုရှား-ဘယ်လာရုစ်တို့ ပါဝင်သော ပြည်ထောင်စုနိုင်ငံအတွင်း ပိုမိုပေါင်းစည်းရေးဆောင်ရွက်နိုင်မှုနှင့် နိုင်ငံတကာအရေးပေါ် ကိစ္စရပ်များကို ဆွေးနွေးမည်ဖြစ်ပါသည်။ တွေ့ဆုံပွဲအပြီးတွင် ခေါင်းဆောင်များသည် ပူးတွဲစာချုပ်အချို့ကို လက်မှတ်ရေးထိုးမည်ဖြစ်ပြီး သတင်းစာ ရှင်းလင်းပွဲ ပြုလုပ်ရန် စီစဉ်ထားပါသည်။

သတင်းစာရှင်းလင်းပွဲ၌ ယူကရိန်းအကြောင်း ပြောလာနိုင်သည် ဟု ကရင်မလင်ပြောရေးဆိုခွင့်ရှိသူ ဒင်မီထရီပက်စကိုဗ်က ပြောကြားလိုက်ပါသည်။

ထိုသတင်းစာရှင်းလင်းပွဲတွင် ရုရှားသမ္မတနှင့်ဘယ်လာရုစ်သမ္မတတို့က ပူးတွဲပြီး သတင်းထောက်များ၏ မေးမြန်းမှုများကို ဖြေကြားသွားမည် ဖြစ်ကြောင်း၊ အကြောင်းအရာအားလုံးမှာ သတင်းထောက်များ မေးမြန်းလာမည့်မေးခွန်းများအပေါ်တွင် မူတည်နေကြောင်း ကရင်မလင် ပြောခွင့်ရက ပြောကြားထားပါသည်။

မတ်လ ၁၁ ရက်က အမေရိကန်နှင့် ယူကရိန်းကိုယ်စားလှယ်အဖွဲ့သည် ဆော်ဒီအာရေဗျရှိ ဂျက်ဒါ၌ တွေ့ဆုံဆွေးနွေးခဲ့ကြပြီး ထုတ်ပြန်လိုက်သည့် ပူးတွဲကြေညာချက်တွင် ယူကရိန်းအစိုးရသည် ရက် ၃၀ ကြာမြင့်မည့် အပစ်အခတ်ရပ်စဲရေး တည်ဆောက်ရန်နှင့် အမေရိကန်နှင့် မြေရှားသတ္တု အရင်းအမြစ်ဆိုင်ရာ သဘောတူညီမှု လက်မှတ်ရေးထိုးရန်အသင့် ဖြစ်နေ ကြောင်း ဖော်ပြထားပါသည်။

အပြန်အလှန်အနေဖြင့် အမေရိကန်က ယူကရိန်းကို စစ်ဘက်ဆိုင်ရာ အကူအညီနှင့် ထောက်လှမ်းရေးသတင်းများ ချက်ချင်း ပြန်လည်ပေးမည်ဟု ကတိကဝတ် ပြုထားပါသည်။ ရုရှားသည် အဆိုပါ ဆွေးနွေးပွဲ ရလဒ်များအရ အမေရိကန်ဘက်က တရားဝင် ကမ်းလှမ်းလာမှုကိုမျှော်လင့်နေပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃