အမေရိကန်ပြည်ထောင်စု ကယ်လီဖိုးနီးယားပြည်နယ် လော့အိန်ဂျလိတွင် ဇန်နဝါရီလ ၇ ရက်က စတင်ပြီး ၁၁ ရက်ကြာ ဆက်လက်လောင်ကျွမ်းနေသည့် တောမီးများသည် အဖျက်စွမ်းအားကြီးမားလှကြောင်း လက်ရှိအချိန်အထိ သက်သေပြလျက်ရှိသည်။ တောမီးလောင်ကျွမ်းမှုများကြောင့် လူ ၂၇ ဦးခန့်   သေဆုံးခဲ့ရပြီး ပျက်စီးဆုံးရှုံးမှုများမှာ ဒေါ်လာဘီလီယံနှင့် ချီလာနိုင်ကြောင်း သုံးသပ်ပြောဆိုမှုများ ထွက်ပေါ်လျက်ရှိသည်။

အမေရိကန် မီးသတ်တပ်ဖွဲ့ဝင်များသည် တောမီးများအား ငြှိမ်းသတ်နိုင်ရေးအတွက် အားသွန်ခွန်စိုက် ကြိုးပမ်းလျက်ရှိသော်လည်း  မီးကိုအပြီးသတ်ငြှိမ်းသတ်နိုင်ရန် ရုန်းကန်နေရသည့်အခြေအနေတွင် ရှိနေသည်။ တောမီးလောင်ကျွမ်းမှုအတွင်း အဆောက်အအုံအနည်းဆုံး ၁၂၀၀၀ ခန့်ပျက်စီးခဲ့ရပြီး ထောင်ပေါင်းများစွာသော ဒေသခံများမှာ   အိုးမဲ့အိမ်မဲ့ဖြစ်ရသည်။ ထို့ပြင် အခြားထောင်ပေါင်းများစွာကိုလည်း အာဏာပိုင်များက ဘေးလွတ်ရာသို့ရွှေ့ပြောင်းကြရန် တိုက်တွန်းခဲ့ရသည်။

စိတ်ဝင်စားစရာကောင်းသည့်အချက်မှာ ယခုရက်သတ္တပတ်အတွင်းက  ရုရှားစီးပွားရေးမီဒီယာတစ်ခုက ထုတ်ဖော်ပြောကြားလိုက်သည့်အချက်ဖြစ်သည်။ ရုရှားနှင့် အမေရိကန်တို့သည် ၂၀၁၇ ခုနှစ်မှ ၂၀၁၉ ခုနှစ်အတွင်း ရုရှားနိုင်ငံလုပ် Beriev Be-200 မီးသတ်လေယာဉ် ၁၀ စင်းကို အမေရိကန်နိုင်ငံကဝယ်ယူရန်  စေ့စပ်ဆွေးနွေးခဲ့သည်ဟုဆိုသည်။

ရုရှားနိုင်ငံလုပ် Beriev Be-200 မီးသတ်လေယာဉ်များသည် မီးသတ်ရာတွင် အသုံးပြုမည့်ရေနှင့် မီးငြှိမ်းသတ်နိုင်သည့် ဓာတုပစ္စည်း တန်ချိန်ပေါင်း ၁၂ တန်ကိုသယ်ဆောင်နိုင်စွမ်းရှိသည်။ ထို့ပြင် ရေလှောင်တမံများ၊ ရေကန်များ သို့မဟုတ် သမုဒ္ဒရာများမှ ရေကိုလည်း အချိန်တိုအတွင်း ပြန်လည်ဖြည့်သွင်း ပေးနိုင်သည်။ တစ်နာရီလျှင် ၇၀၀ ကီလိုမီတာအရှိန်နှုန်းဖြင့် အကွာအဝေး ၂၁၀၀ ကီလိုမီတာအထိ မောင်းနှင်ပျံသန်းနိုင်သည်။ ထို့ကြောင့် လော့အိန်ဂျလိတောမီးလောင်ကျွမ်းမှုကို ငြှိမ်းသတ်ရာတွင် Beriev Be-200 မီးသတ်လေယာဉ်များကို   အသုံးပြုမည်ဆိုပါက အခေါက်ပေါင်းများစွာ ပျံသန်းမောင်းနှင်နိုင်မည်ဖြစ်ပြီး ရေတန်ချိန် ၅၀ ကျော်ကို ပက်ဖျန်းပေးနိုင်မည်ဖြစ်သည်။ သို့ရာတွင် ရုရှားမီးသတ်လေယာဉ်များအား   အမေရိကန်သို့ ပေးပို့ခါနီးမှ    အမေရိကန်ပြည်ထောင်စု လေယာဉ်ပျံသန်းရေးစီမံခန့်ခွဲမှုအဖွဲ့၏ ကဖျက်ယဖျက် လုပ်ဆောင်မှုကြောင့် လေယာဉ်ရောင်းချရေး သဘောတူညီချက်မှာ ၂၀၂၀ ပြည့်နှစ်တွင် ပျက်ပြားခဲ့ရသည်။

အဆိုပါ သဘောတူညီချက်ပျက်ပြားရခြင်းကို ကြည့်ခြင်းအားဖြင့် နိုင်ငံရေးသည် သာမန်အသိဖြင့် လုပ်ဆောင်သည့် ဆောင်ရွက်ချက်များအပေါ် ထိခိုက်စေခဲ့ခြင်းဖြစ်သည်ဟု Beriev ၏ မိခင်ကုမ္ပဏီဖြစ်သည့် Rostec က ထုတ်ပြန်သည့်ကြေညာချက်တွင် ဖော်ပြထားသည်။

အမေရိကန်တို့အနေဖြင့် မီးငြှိမ်းသတ်ရာတွင် အစွမ်းထက်သည့် Beriev Be-200 လေယာဉ်များကို ထိုအချိန်ကတည်းက ဝယ်ယူနိုင်ခဲ့မည်ဆိုပါက လက်ရှိဆက်လက်ဖြစ်ပွားနေသည့် လော့အိန်ဂျလိတောမီးကြောင့် ဖြစ်ပေါ်လာခဲ့သည့် အပျက်အစီးများကို သိသိသာသာလျှော့ချပေးနိုင်မည်ဖြစ်ကြောင်း၊ သို့သော် အမေရိကန်ပြည်သူ အများအပြားမှာ နိုင်ငံရေးကစားကွက်၏ သားကောင်များဖြစ်ခဲ့ရသည်ကို စာနာကြောင်း Rostec ကုမ္ပဏီက ဆက်လက်ပြောကြားထားသည်။

Beriev Be-200 မီးသတ်လေယာဉ်များသည် အီတလီ၊ ပေါ်တူဂီ၊ အင်ဒိုနီးရှား၊ ဂရိ၊ အစ္စရေးနှင့် တူကီယဲနိုင်ငံတို့တွင် ဖြစ်ပွားခဲ့သည့် တောမီးလောင်ကျွမ်းမှုများတွင် ထိရောက်စွာ မီးငြှိမ်းသတ်နိုင်ခဲ့သည့် ဂုဏ်သတင်းကြီး မီးသတ်လေယာဉ်တစ်စင်းဖြစ်သည်။                

Ref: Sputnik

Source: Myawady Web Portal

မှတ်တမ်းများအရ လေထုအတွင်းရှိ ကမ္ဘာကြီးပူနွေးစေသည့် ဓာတ်ငွေ့ပမာဏမှာ ယခင်နှစ်ထက် ပိုမို လျင်မြန်စွာ သိသိသာသာမြင့်တက်လာကြောင်း သိပ္ပံ ပညာရှင်များက ပြောကြားခဲ့သည်။ 

ယခုအခါ ကာဗွန်ဒိုင်အောက်ဆိုဒ်ထုတ်လုပ်မှုပမာဏသည် လူသားများအနေဖြင့် ရုပ်ကြွင်းလောင်စာအမြောက်အမြားကို စတင်အသုံးမပြုမီကထက် ၅၀ % ပိုများလာသည်။ 

ပြီးခဲ့သည့်နှစ်တွင် ရုပ်ကြွင်းလောင်စာထုတ်လုပ်မှုမှာ စံချိန်တင်မြင့်မားခဲ့ပြီး တောမီးလောင်ခြင်းနှင့် မိုးခေါင်ခြင်းစသည့် အကြောင်းရင်းများကြောင့် လေထုထဲတွင် ကာဗွန်ဒိုင်အောက်ဆိုဒ်ထုတ်လွှတ်မှု ပိုမိုမြင့်မားလာပြီး ကမ္ဘာကြီး ပိုမိုပူနွေးလာခြင်းဖြစ်သည်။

ကာဗွန်ဒိုင်အောက်ဆိုဒ် အလျင်အမြန် မြင့်တက်လာခြင်းသည် ကမ္ဘာကြီးပူနွေးလာမှုကို စက်မှုခေတ်မတိုင်မီက အပူချိန်ထက်မကျော်စေရန် ၁.၅ ဒီဂရီဆဲလ် စီးရပ်စ်အတွင်း ကန့်သတ်ထားနိုင်ရေးဟူသော နိုင်ငံတကာကတိကဝတ်များနှင့် ကိုက်ညီမှုမရှိဟု Met Office (UK's national meteorological service) က ပြောကြားခဲ့သည်။ 

အပူချိန်ကို ၁.၅ ဒီဂရီဆဲလ်စီးရပ်စ်တွင် ကန့်သတ်ရေးရည်မှန်းချက်မှာ ရာသီဥတုဖောက်ပြန်မှု၏ အဆိုးရွားဆုံးသက်ရောက်မှုများကို ရှောင်ရှားနိုင်ရန် ရည်ရွယ်၍ ၂၀၁၅ ခုနှစ်တွင် ပြင်သစ်နိုင်ငံ ပါရီမြို့၌ ကျင်းပခဲ့သော ကုလသမဂ္ဂအစည်းအဝေးတွင် နိုင်ငံပေါင်း ၂၀၀ နီးပါးက သဘောတူထားရှိခဲ့သည့် ရည်မှန်းချက်ပန်းတိုင်လည်း ဖြစ်သည်။

ပြီးခဲ့သည့် ရက်သတ္တပတ်က ထုတ်ပြန်ခဲ့သည့် မှတ်တမ်းအရ ၂၀၂၄ ခုနှစ်သည် စံချိန်တင်အပူဆုံးနှစ်ဖြစ်ခဲ့ပြီး နှစ်စဉ်ပျမ်းမျှအပူချိန်သည် စက်မှုခေတ်မတိုင်မီကအပူချိန်ထက် ၁.၅ ဒီဂရီဆဲလ်စီးရပ်စ် ပိုမို မြင့်တက်လာကြောင်း ဖော်ပြထားသည်။

ကမ္ဘာ့အပူချိန်ကို ၁.၅ ဒီဂရီဆဲလ်စီးရပ်စ်ထက်မကျော်စေရန်အတွက် ကာဗွန်ဒိုင်အောက်ဆိုဒ် မြင့်တက်မှုပမာဏ နှေးကွေးရန်လိုအပ်သော်လည်း လက်တွေ့တွင်မူ ဆန့်ကျင်ဘက်ဖြစ်နေကြောင်း Met Officeမှ Richard Bettsက ဆိုသည်။

ကိုးကား-BBC

ကမ္ဘာမြေကိုပတ်ကာ အိန္ဒိယသမုဒ္ဒရာအတွင်း ဆင်းသက်ရန် ရည်ရွယ်၍ SpaceX ကုမ္ပဏီက ၇ ကြိမ်မြောက် စမ်းသပ်လွှတ်တင်ခဲ့သော Starship အာကာသယာဉ်သည် တက္ကဆက်ပြည်နယ်တောင်ပိုင်းမှ ထွက်ခွာပြီးမကြာမီ ပေါက်ကွဲခဲ့ကြောင်း ဇန်နဝါရီ ၁၆ ရက်နေ့တွင် အဆိုပါကုမ္ပဏီက ပြောကြားခဲ့သည်။ 

အစိတ်စိတ်အမြွှာမြွှာဖြစ်သွားသည့် အာကာသယာဉ် အစိတ်အပိုင်းများကြောင့် ဖလော်ရီဒါရှိ လေကြောင်း ခရီးစဉ်အချို့အား ရွှေ့ဆိုင်းခဲ့ရသည်။

အာကာသယာဉ်ပေါက်ကွဲခဲ့သော်လည်း SpaceX သည် Super Heavy booster အား လွှတ်တင်သောနေရာသို့ ပြန်လည်ဆင်းသက်နိုင်ရန် အောင်မြင်စွာ ထိန်းကြောင်းနိုင်ခဲ့သည်။ အဆိုပါ Super Heavy boosterမြေပြင်သို့ ဆင်းသက်နိုင်ရန် Mechazilla မျှော်စင်မှ စက်လက်တံနှစ်ခုဖြန့်ကြက်၍  ဖမ်းယူနိုင်ခဲ့ခြင်းဖြစ်သည်။

အာကာသယာဉ်စမ်းသပ်မှု မအောင်မြင်သည့်အခါတွင် ပုံမှန်အားဖြင့် အမေရိကန်ဖက်ဒရယ်လေကြောင်း အုပ်ချုပ်ရေးအဖွဲ့ (Federal Aviation Administration) က စုံစမ်းစစ်ဆေးမှုပြုလုပ်လေ့ရှိသည့်အတွက် Elon Musk ပိုင် SpaceX ကုမ္ပဏီအနေဖြင့် နောက်တစ်ကြိမ် စမ်းသပ်မှုပြုလုပ်နိုင်ရန် အနည်းငယ် စောင့်ဆိုင်းရဖွယ်ရှိသည်။

SpaceX ကုမ္ပဏီသည် Starship ယာဉ်ကို အသုံးပြု၍ လူသားများကို အင်္ဂါဂြိုဟ်သို့ ခေါ်ဆောင်ရန် ရည်မှန်းထားပြီး ၂၀၂၇ ခုနှစ်တွင် အာကာသယာဉ်မှူးများဖြင့် လမျက်နှာပြင်ပေါ်သို့ ဆင်းသက်ရန် NASA က ရွေးချယ်ခဲ့သည့် ယာဉ်လည်းဖြစ်သည်။

ကိုးကား-CNN

ထိုင်းနိုင်ငံတောင်ပိုင်းရှိ ဖူးခက်တစ်ဝိုက်ရှိ ပင်လယ်ကြမ်းပြင်တွင် ပလပ်စတစ်ပုလင်းများ၊ ဘီယာဘူးခွံများလူးလိမ့်နေပြီး သာယာလှပသော ကမ်းခြေများနှင့် ရင်သပ်ရှုမောဖွယ် နေဝင်ချိန်များကြောင့် ကမ္ဘာလှည့်ခရီးသွားများအကြား ရေပန်းစားသောကျွန်းပေါ်တွင် အမှိုက်များ အလွန်အကျွံစုပုံလာခဲ့သည်။

ကျွန်း၏ တစ်ထောင့်တစ်နေရာတွင် ထရပ်ကားများနှင့် နောက်တွဲထွန်စက်များသည် ဖူးခက်တွင် နေ့စဉ်ထွက်ရှိနေသော အမှိုက်တန်ချိန် ၁,၀၀၀ ကျော်အတွက် နောက်ဆုံးစုပုံရာဖြစ်သော အမှိုက်ပုံရှိရာသို့ လူးလာခေါက်တုန့် အမှိုက်စွန့်ပစ်နေကြသည်။

ထိုင်းနိုင်ငံ၏ အကြီးဆုံးကျွန်းဖြစ်သော ဖူးခက်သည် နိုင်ငံစီးပွားရေးတစ်ခုလုံး၏ မောင်းနှင်အားဖြစ်သော ၎င်း၏ ခရီးသွားလုပ်ငန်းကဏ္ဍကြောင့် အရှိန်အဟုန်ဖြင့် ဖွံ့ဖြိုးတိုးတက်လာခဲ့သည်။ ၂၀၂၄ ခုနှစ်တွင် နိုင်ငံသို့လာရောက်ခဲ့သော နိုင်ငံခြားခရီးသွား ၃၅ ဒဿမ ၅ သန်းတွင် ၁၃ သန်းခန့်သည် ကျွန်းသို့ သွားရောက်ခဲ့ကြသည်။

“(ဖူးခက်) မြို့ရဲ့တိုးတက်မှုက ဖြစ်သင့်တာထက် အရမ်းမြန်ဆန်ပါတယ်” ဟု ဒုတိယမြို့တော်ဝန် မစ္စတာ Suppachoke Laongphet က ခရီးသွားလုပ်ငန်းနှင့် ဆောက်လုပ်ရေးလုပ်ငန်းများ အရှိန်မြင့်လာမှုသည် ကိုဗစ်မတိုင်မီကာလ အမှိုက်ပမာဏသို့ ရောက်ရှိခဲ့ပုံနှင့်ပတ်သက်ပြီး ရှင်းပြရာတွင် ပြောဆိုခဲ့သည်။

၂၀၂၅ နှစ်ကုန်တွင် ကျွန်းသည် တစ်ရက်လျှင် အမှိုက်တန် ၁၄၀၀ အထိ ထွက်ရှိနိုင်ပြီး ၎င်း၏ တစ်ခုတည်းသော အမှိုက်ပုံသည် လက်ခံနိုင်သည့်အတိုင်းအတာထက် ကျော်လွန်သွားနိုင်သည်။

အာဏာပိုင်များသည် ၆ လအတွင်း အမှိုက်ထွက်ရှိမှု ၁၅ ရာခိုင်နှုန်း လျှော့ချရန်၊ အမှိုက်ပုံဧရိယာတိုးချဲ့ရန်နှင့် အမှိုက်မီးရှို့ဖိုသစ်ကြီးတစ်ခု တည်ဆောက်သွားရန် အစီအစဉ်များချမှတ်၍ ကျွန်းကို ရေရှည်တည်တံ့သော ခရီးသွားနေရာတစ်ခုဖြစ်လာရန် ကြိုးပမ်းဆောင်ရွက်လျက်ရှိသည်။

သို့သော်လည်း အမှိုက်လက်ခံနိုင်စွမ်း တိုးချဲ့ခြင်းနှင့် မီးရှို့ဖျက်ဆီးခြင်းသည် ဖြေရှင်းချက်၏ တစ်စိတ်တစ်ပိုင်းသာဖြစ်သည်ဟု ကျွမ်းကျင်သူများက ထောက်ပြပြောဆိုခဲ့သည်။

Source: Popular Myanmar

ကမ္ဘောဒီးယားနိုင်ငံရှိကလေးငယ်နှစ်သန်းနီးပါးသည် ရာသီဉတုဆိုးရွားသောဒေသများ အဓိကအားဖြင့် ကျေးလက်ဒေသများတွင် နေထိုင်လျက်ရှိကြောင်း ယမန်နေ့က သတင်းထုတ်ပြန်ထားသည်။

ကလေးများ၏ရာသီဉတုအန္တရာယ်အညွှန်းကိန်းခေါင်းစဉ်တွင် နိုင်ငံအတွင်းရှိကလေးဦးရေ၏သုံးပုံတစ်ပုံခန့်သည် မိုးခေါင်ရေရှားမှုအခြေအနေများနှင့်ကြုံတွေ့နေရပြီး ကလေးထက်ဝက်ကျော်သည် ပူပြင်းမှု၊ လေပြင်းတိုက်မှုနှင့် အသက်ရှုလမ်းကြောင်းဆိုင်ရာရောဂါများခံစားနေရကြောင်း ဖော်ပြထားသည်။

နိုင်ငံအတွင်းရှိ ကလေးထက်ဝက်နီးပါးသည် မြစ်ရေကြီးမှုဒဏ်ခံရပြီး ကလေးဦးရေထက်ဝက်သည် ကမ္ဘာ့ကျန်းမာရေးအဖွဲ့၏လမ်းညွှန်ချက်ထက်ကျော်လွန်သော လေထုညစ်ညမ်းမှုအဆင့်လွန်ကဲစွာထိတွေ့နေရသည်ဟု ထပ်လောင်းဖော်ပြထားသည်။

ကမ္ဘောဒီးယားနိုင်ငံသည် ရာသီဉတုနှင့် သဘာဝပတ်ဝန်းကျင်အန္တရာယ်မြင့်မားမှုရှိသည့် ဒေသများတွင်နေထိုင်သော ကလေးများရှိသည့် ထိပ်တန်းနိုင်ငံများအနက် တတိယမြောက်နိုင်ငံဖြစ်သည်ဟု သိရသည်။

Source: Myanmar Digital News

ဂျပန်နိုင်ငံအတွင်းသို့ ပြီးခဲ့သည့် ၂၀၂၄ခုနှစ်အတွင်း လာရောက်လည်ပတ်သူ စံချိန်တင် မြင့်တက်လာခဲ့ကြောင်း ဇန်နဝါရီလ ၁၅ ရက်တွင် ထုတ်ပြန်သည့် အချက်အလက်များ၌ ဖော်ပြထားသည်။

ဂျပန်ယန်းငွေတန်ဖိုး ကျဆင်းမှုကြောင့် နိုင်ငံအတွင်းသို့ ခရီးသွားပြည်သူများ လာရောက်လည်ပတ်ရန် ဆွဲဆောင်နိုင်ခဲ့ရာ နိုင်ငံအတွင်းသို့ လာရောက်လည်ပတ်သည့် ခရီးသည်အရေအတွက်မှာ ၂၀၂၄  ခုနှစ်တွင် ၃၆ ဒသမ ၈ သန်းကျော်အထိ မြင့်တက်လာကြောင်း    ဂျပန်အမျိုးသား ခရီးသွားလုပ်ငန်းအဖွဲ့၏ ဖော်ပြချက်အရ သိရသည်။

ယင်းပမာဏသည်   ၂၀၁၉ ခုနှစ်က နိုင်ငံအတွင်းသို့ ဝင်ရောက်လာသည့် ခရီးသည်အရေအတွက်ထက်  ကျော်လွန်သွားခဲ့ကြောင်း သိရသည်။

နိုင်ငံအတွင်းသို့ ခရီးသည်များဝင်ရောက်မှု ပြန်လည်မြင့်တက်လာခြင်းသည် ထင်ရှားသည့်   ဖူဂျီတောင်၏ ဆွဲဆောင်မှုများကို တိုးမြှင့်ပေးသည့်  အစိုးရအဖွဲ့၏ မူဝါဒကြောင့်ဖြစ်ကြောင်း၊  ထို့ပြင် လွန်ခဲ့သည့် သုံးနှစ်တာကာလအတွင်း အခြားငွေကြေးများနှင့် လဲလှယ်ရာတွင် ယန်းငွေတန်ဖိုး ကျဆင်းခြင်းကြောင့် ပြည်ပခရီးသွားများအတွက် ဂျပန်နိုင်ငံအတွင်း ဈေးဝယ်ယူရာတွင် ငွေကြေးပိုမိုသုံးစွဲနိုင်စေခဲ့သည်။

ဂျပန်အစိုးရသည် လာမည့် ၂၀၃၀ ပြည့်နှစ်ခန့်တွင် နိုင်ငံအတွင်းသို့ ဝင်ရောက်လာသည့် ခရီးသည်အရေအတွက်ကို သန်း ၆၀ အထိမြင့်တက်လာစေရန်  မျှော်မှန်းလုပ်ဆောင်လျက် ရှိကြောင်း သိရသည်။

Source: Myawady Web Portal

ပေါ့သ်အူပရင့်စ်  ဇန်နဝါရီ ၁၅

ဟေတီနိုင်ငံ၌ ၂၀၂၄ ခုနှစ် ဒီဇင်ဘာလအထိ ပြည်တွင်းနေရပ်စွန့်ခွာသူပေါင်း ၁ ဒသမ ၀၄၁ သန်းကျော်ရှိကြောင်း‌ ရွှေ့ပြောင်းနေထိုင်ခြင်းဆိုင်ရာ နိုင်ငံတကာအဖွဲ့အစည်း (အိုင်အိုအမ်) ကပြောသည်။ အဆိုပါ ပမာဏမှာ နိုင်ငံ့လူဦးရေ စုစုပေါင်း၏ ၉ ရာခိုင်နှုန်းခန့် ရှိသည်ဟု ဆိုသည်။

ဇန်နဝါရီ ၁၄ ရက်တွင် အိုင်အိုအမ်၏ အစီရင်ခံဖော်ပြချက်အရ ၂၀၂၃ ခုနှစ် ဒီဇင်ဘာလတွင် ပြည်တွင်းနေရပ်စွန့်ခွာသူပေါင်း ၃၁၅၀၀ သာရှိသည့်အတွက် ယမန်နှစ်တွင် နေရပ်စွန့်ခွာလာသူပေါင်း သုံးဆကျော်မြင့်တက်ကြောင်း သိရသည်။

အကြမ်းဖက်မှုများ ဆက်တိုက်ဖြစ်ပေါ်နေမှုက ကျန်းမာရေးစောင့်ရှောက်မှုစနစ်ကဲ့သို့ မရှိမဖြစ်အရေးပါသော ဝန်ဆောင်မှုဌာနပြိုလဲမှုများကို ဖြစ်ပေါ်စေသည်။ ထို့ပြင် စားရေရိက္ခာမလုံလောက်မှုအခြေအနေ ပိုမိုဆိုးရွားလာခြင်းသည် ပြည်တွင်းနေရပ်စွန့်ခွာသူ အရေအတွက် ပိုမိုများပြားလာခြင်း၏ နောက်ကွယ်မှ အဓိကအကြောင်းရင်းတစ်ခုဖြစ်ကြောင်း သိရသည်။

အဆိုပါ အစီရင်ခံစာတွင် နိုင်ငံ၏မြို့တော် ပေါ့သ်အူပရင့်စ်၌ ပြည်တွင်းနေရပ်စွန့်ခွာသူအရေအတွက်မှာ ၈၇ ရာခိုင်နှုန်းရှိသောကြောင့် နှစ်ဆခန့်မြင့်တက်လာကြောင်း ဆိုးဆိုးရွားရွား ထိခိုက်ခံစားရလျက်ရှိပြီး အစားအစာ၊ ကျန်းမာရေးစောင့်ရှောက်မှု၊ အမိုးအကာနှင့်  သန့်ရှင်းသော သောက်သုံးရေအရေးပေါ် လိုအပ်လျက်ရှိကြောင်း သိရသည်။

ဆင်ဟွာ

Source: မြန်မာ့အလင်းသတင်းစာ

ဂျပန်အစိုးရ၏ ငလျင်ဆိုင်ရာသုတေသနကော်မတီတစ်ခုက လာမည့်နှစ် ၃၀ အတွင်း Nankai Trough မဟာ ငလျင်ကြီး လှုပ်နိုင်ခြေခန့်မှန်းချက်ကို ယခင်က ၇၀% မှ ၈၀% ဟု ခန့်မှန်းထားရာမှ ၈၀% အဖြစ် ပြောင်းလဲ သတ်မှတ်လိုက်ပါသည်။

ဂျပန်နိုင်ငံ အနောက်တောင်ပိုင်းမှ အလယ်ပိုင်းအထိ ပစိဖိတ်ကမ်းလွန်တွင်တည်ရှိသော Nankai Trough တွင် မဂ္ဂနီကျုဒ် ၈ မှ ၉ အထိရှိသော ငလျင်တစ်ခု လှုပ်နိုင်ခြေရှိနေပါသည်။

အဆိုပါကော်မတီသည် နှစ်စဉ် ဇန်နဝါရီ ၁ ရက်နေ့အထိ အနေအထားများအရ ဂျပန်နိုင်ငံပတ်ဝန်းကျင် ပင်လယ်ပြင်အောက်၌ ငလျင်လှုပ်နိုင်ခြေများကို တွက်ချက် ခန့်မှန်းပါသည်။

ဂျပန်နိုင်ငံ အနောက်တောင်ပိုင်း မီယာဇာကီခရိုင်၌ သြဂုတ်လတွင် လှုပ်ခဲ့သည့် အင်အားပြင်းငလျင်နှင့် ဇန်နဝါရီ ၁၃ ရက်နေ့တွင် ၎င်းဒေသ၌ လှုပ်ခဲ့သော အင်အားပြင်း ငလျင်များသည် ယခုပြင်ဆင်လိုက်သည့် Nankai Trough ငလျင်လှုပ်နိုင်ခြေအပေါ် သက်ရောက်မှုမရှိခဲ့ကြောင်း အဆိုပါကော်မတီကပြောကြားခဲ့ပါသည်။

ခန့်မှန်းထားသည့် မဟာငလျင်လှုပ်ခတ်မှုမဖြစ်မချင်း ၎င်းဖြစ်နိုင်ခြေသည် တိုးလာမည်ဖြစ်ကြောင်း အဆိုပါ ကော်မတီက ဆိုပါသည်။

Nankai Trough မဟာငလျင်ဆိုင်ရာ ကိန်းဂဏန်းများသည် ယခုကဲ့သို့ တွက်ချက်ခန့်မှန်းမှုများ စတင်ခဲ့သည့် ၂၀၁၃ ခုနှစ်တွင် ၆၀% မှ ၇၀% ရှိနေခဲ့ပြီး ဖြစ်နိုင်ခြေသည် ၂၀၁၄ ခုနှစ်တွင် ၇၀% ဝန်းကျင်၊ ၂၀၁၈ ခုနှစ်တွင် ၇၀% မှ ၈၀% သို့ မြှင့်တက်လာခဲ့ခြင်းဖြစ်သည်။

ကိုးကား-NHK World

တွစ်တာ စတော့ရှယ်ယာပိုင်ဆိုင်မှုကို ထုတ်ဖော်ရန် ပျက်ကွက်ခဲ့မှု၊ ကုမ္ပဏီရှယ်ယာများကို ဈေးနှိမ်ပြီး ဝယ်ယူပိုင်ဆိုင်ခဲ့မှုများကြောင့် အီလွန်မက်စ်အား အမေရိကန်ဘဏ္ဍာရေးပညာရှင်တစ်ဦးက တရားစွဲဆိုထားကြောင်း သိရှိရပါသည်။

ပြီးခဲသည့် ဇန်နဝါရီ ၁၄ ရက်နေ့တွင် အီလွန်မက်စ်အား မသမာသည့်နည်းလမ်းအသုံးပြု၍ ရှယ်ယာဝယ်ယူထားမှုဖြင့် အမေရိကန်၊ ရှယ်ယာနှင့် ငွေကြေးလဲလှယ်မှုကော်မရှင်က  အမေရိကန်ပြည်ထောင်စုတရားလွှတ်တော်ချုပ်တွင် အမှုဖွင့်ခဲ့ပါသည်။ အီလွန်မက်စ်သည် Twitter ကုမ္ပဏီအား မဝယ်ယူခင်က ကုမ္ပဏီ၏ ရှယ်ယာ ၅ % ကို ထုတ်ပြန်ကြေညာခြင်းမပြုဘဲ ဝယ်ယူခဲ့ခြင်းကို  ၎င်း၏ ရှယ်ယာပိုင်ဆိုင်မှုအစီရင်ခံစာ ထုတ်ပြန်ခဲ့ပြီးမှသာ သိရှိရကြောင်း၊ Twitter ရှယ်ယာများအတွက် အမေရိကန် ဒေါ်လာ သန်း ၁၅၀ လျော့နည်းပြီး ပေးချေထားကြောင်း စွဲချက်တင်ထားပါသည်။ 

အီလွန်မက်စ်သည် Twitter ကို ၂၀၂၂ ခုနှစ်တွင် ဒေါ်လာ ၄၄ ဘီလီယံနှင့် ဝယ်ယူခဲ့ပြီးနောက် X မီဒီယာပလက်ဖောင်းဟု အမည်ပြောင်းခဲ့ပါသည်။ Twitter ကို အပိုင်မဝယ်ယူခင်က ကုမ္ပဏီ၏ ရှယ်ယာ ၅ % ကို ထုတ်ပြန်ကြေညာခြင်းမပြုဘဲ ဝယ်ယူခဲ့သည့် အီလွန်မက်စ်၏ ရှယ်ယာပိုင်ဆိုင်မှု အစီရင်ခံစာ ထွက်လာပြီး ၁၁ ရက်‌ အကြာတွင် SEC က တရားစွဲဆိုလိုက်ခြင်းဖြစ်ပါသည်။ 

အီလွန်မက်စ်သည် ပြီးခဲ့သည့် အမေရိကန် ပြည်ထောင်စုရွေးကောက်ပွဲ၌ ဒေါ်နယ်ထရမ့်၏ မဲဆွယ်စည်းရုံးမှုအတွက် အမေရိကန်ဒေါ်လာသန်း ၂၅၀ ကျော် သုံးစွဲပေးထားပြီး ရွေးကောက်ခံသမ္မတဖြစ်လာသူ ထရမ့်ကလည်း ၎င်းအား အစိုးရအကြံပေးအဖွဲ့ ခေါင်းဆောင်အဖြစ် ခန့်အပ်ထားပါသည်။

ကိုးကား -The Guardian

Tik Tok ပိတ်သိမ်းမည့်ဥပဒေကို အမေရိကန်တွင် မပြဋ္ဌာန်းသေးမီအချိန်အတွင်း အမေရိကန်ပြည်သူများအကြား Xiaohongshu ဟု လူသိများသော တရုတ်နိုင်ငံထုတ် RedNote ပလက်ဖောင်းသုံးစွဲမှု မြင့်တက် လျက်ရှိနေပြီး ၂ ရက်တာအတွင်း သုံးစွဲသူ ၇ သိန်းကျော် အထိ တိုးများလာလျက်ရှိကြောင်း သိရပါသည်။ 

ပြီးခဲ့သည့် ဇန်နဝါရီ ၁၃ ရက်နေ့က RedNote ပလက်ဖောင်းတွင် Tik Tok ဒုက္ခသည်များ တိုက်ရိုက်စကားဝိုင်းကို အမေရိကန်ပြည်သူ ၅ သောင်းကျော်နှင့် တရုတ်ပြည်သူတို့ အတူတကွ အသုံးပြု၍ ဆွေးနွေးမှုများ ပြုလုပ်ခဲ့ကြသည်။ 

RedNoteမှာ လက်ရှိအချိန်တွင်မတည်ရင်းနှီးငွေ အမေရိကန်ဒေါ်လာ ၁၇ ဘီလီယံ ကျော်ဖြင့်လုပ်ငန်းလည်ပတ်လျက်ရှိပြီး ဓာတ်ပုံဖြင့်လည်းကောင်း၊ ဗီဒီယို ဖြင့်လည်းကောင်း၊ စာသားဖြင့်လည်းကောင်း သုံးစွဲသူများ၏ နေ့စဉ်ဘဝအကြောင်းများကို မှတ်တမ်းတင်ခြင်း လုပ်ဆောင်ပေးနိုင်ပါသည်။

RedNote နှင့်အပြိုင် ဒုတိယလူသုံးအများဆုံးမှာ ByteDance ကုမ္ပဏီပိုင် Lemon 8 အက်ပလီကေးရှင်းဖြစ်ပြီး ထိုအက်ပလီကေးရှင်းမှာလည်း ယခင်လအတွင်း က Google Playstore တွင် ဒေါင်းလော့ဒ်ပြုလုပ်မှု သိသိသာသာ မြင့်တက်လာလျက်ရှိပြီး  ဒီဇင်ဘာလတွင် ဒေါင်းလော့ဒ်ပြုလုပ်သူ ၃.၄ သန်းအထိ မြင့်တက်လာကြောင်း သိရှိရပါသည်။ 

ByteDance ကုမ္ပဏီပိုင် Tik Tok သည် တရုတ်နိုင်ငံတွင် Duoyin နှင့် အခြားနိုင်ငံများတွင် Tik Tok ဟူ၍ ဗားရှင်းနှစ်မျိုးအသုံးပြုရသော်လည်း ယခုကျော်ကြားလာသည့် RedNote အက်ပလီကေးရှင်းမှာ မည်သည့်နိုင်ငံတွင်မဆို တူညီသည့် ဗားရှင်းတစ်မျိုးဖြင့်သာ အသုံးပြုနိုင်မည်ဖြစ်ကြောင်း သိရှိရပါသည်။

ကိုးကား-The Guardian