ဂျပန်၊ အမေရိကန်၊ သြစတြေးလျနှင့်အိန္ဒိယတို့မှ နိုင်ငံခြားရေးဝန်ကြီးများသည် Quad မူဝါဒဆိုင်ရာ အစည်းအဝေးကို ဝါရှင်တန်၌ ပြုလုပ်ခဲ့ကြသည်။

ဇန်နဝါရီ ၂၁ ရက်နေ့တွင် အမေရိကန် နိုင်ငံခြားရေးဝန်ကြီးဌာန၌ အဆိုပါအစည်းအဝေးကျင်းပခဲ့ပြီး ဒေါ်နယ်ထရမ့်ဦးဆောင်သော အစိုးရအဖွဲ့မှ နိုင်ငံခြားရေးဝန်ကြီး Marco Rubio က အဓိကပါဝင်ဆွေးနွေးခဲ့သည်။

အစည်းအဝေးတွင် ပါဝင်သော အခြား နိုင်ငံခြားရေး ဝန်ကြီး ၃ ဦးမှာ ဂျပန်နိုင်ငံခြားရေးဝန်ကြီး Iwaya Takeshi၊ သြစတြေးလျ နိုင်ငံခြားရေးဝန်ကြီး Penny Wong နှင့် အိန္ဒိယနိုင်ငံခြားရေးဝန်ကြီး Subrahmanyam Jaishankar တို့ဖြစ်ပါသည်။

ဇန်နဝါရီ ၂၀ ရက်နေ့တွင် အမေရိကန်သမ္မတအဖြစ် Donald Trump စတင်တာဝန်ထမ်းဆောင်ပြီးနောက် Quad နိုင်ငံ ၄ နိုင်ငံ သဘောတူထားသည့် လွတ်လပ်ပွင့်လင်းသော အင်ဒို-ပစိဖိတ်ဒေသကို အားကောင်းစေမည့်ကတိကဝတ်ကို ၎င်းတို့က ထပ်လောင်း အတည်ပြုခဲ့ကြပါသည်။

ဝန်ကြီးများသည် ဒေသဆိုင်ရာကိစ္စရပ်များအပေါ် အမြင်ချင်းဖလှယ်ခဲ့ကြပြီး လက်ရှိအနေအထားကို ပြောင်းလဲရန်ကြိုးပမ်းနေသည့် တစ်ဖက်သတ် ဖိအားပေးလုပ်ဆောင်မှုမှန်သမျှကို ပြင်းပြင်းထန်ထန် ကန့်ကွက်ခြင်းကို သဘောတူခဲ့ကြပါသည်။ ဆိုလိုသည်မှာ အရှေ့တရုတ်ပင်လယ်နှင့် တောင်တရုတ်ပင်လယ်တို့တွင် တရုတ်၏ တိုးမြှင့်လုပ်ဆောင်လာနေသော လှုပ်ရှားမှုများကို ရည်ညွှန်းခြင်းဖြစ်သည်ဟု သုံးသပ်ကြပါသည်။

ဆွေးနွေးပွဲအပြီး၌ ထုတ်ပြန်သည့် ပူးတွဲကြေညာချက်တွင် Quad နိုင်ငံ ၄ နိုင်ငံသည် ယခုနှစ်အတွင်း အိန္ဒိယနိုင်ငံတွင် ကျင်းပမည့် Quad ခေါင်းဆောင်များ၏ ထိပ်သီးအစည်းအဝေးအတွက် ကြိုတင်ပြင်ဆင်ရန် နိုင်ငံခြားရေးဝန်ကြီးများ ပုံမှန်တွေ့ဆုံဆွေးနွေးကြမည်ဖြစ်ကြောင်း ဖော်ပြထားပါသည်။

ကိုးကား-NKK World

အန်ကာရာ   ဇန်နဝါရီ ၂၂

တူကီယဲနိုင်ငံ အနောက်မြောက်ပိုင်း ဘိုလုပြည်နယ်ရှိ နှင်းလျှောစီးအပန်းဖြေစခန်းတစ်ခု၌ ဟိုတယ်တစ်လုံး မီးလောင်ခဲ့ရာ ၇၆ ဦးအနည်းဆုံး သေဆုံးပြီး ၅၀ ကျော် ထိခိုက်ဒဏ်ရာရရှိခဲ့ကြောင်း တူကီယဲအစိုးရအရာရှိများ၏ ပြောကြားချက်ကို ကိုးကား၍ ဒေသတွင်းမီဒီယာများက ယနေ့ သတင်းဖော်ပြသည်။

ဟိုတယ်သည် အထပ်ပေါင်း ၁၂ ထပ်ရှိပြီး သစ်သားဖြင့် ပြုလုပ်ထားသည့် အဆောက်အအုံတစ်ခုဖြစ်သည်။

အခင်းဖြစ်ပုံမှာ ဇန်နဝါရီ ၂၁ ရက် ဒေသစီတော်ချိန်နံနက် ၃ နာရီ ၂၇ မိနစ်တွင် အထပ် ၁၂ ထပ်တွင်ရှိသည့် စားသောက်ခန်းမှ မီးစတင်လောင်ကျွမ်းခဲ့ပြီး အခြားအထပ်များသို့ ကူးစက်‌လောင်ကျွမ်းခဲ့ခြင်းဖြစ်ကြောင်း သိရသည်။

မီးသတ်သမားများသည် ၁၂ နာရီကျော်ကြာမီးငြှိမ်းသတ်ခဲ့ရကြောင်း သိရသည်။ မီးလောင်ကျွမ်းမှုဖြစ်ပွားစဉ်အတွင်း အဆိုပါ ဟိုတယ်၌တည်းခိုသည့် ဧည့်သည် ၂၃၀ ‌ကျော် ရှိသည်။ မြို့တော် အန်ကာရာနှင့် အစ္စတန်ဘူလ်တို့မှ မိသားစုအများအပြား နှင်းလျှောစီးရန်လာရောက်ချိန်ဖြစ်ကြောင်းလည်း သိရသည်။

မီးလောင်ကျွမ်းမှုမှ လွတ်မြောက်ရန်အတွက် တည်းခိုသည့် ဧည့်သည်အချို့သည် ပြတင်းပေါက်မှ ခုန်ချခဲ့ကြောင်းနှင့် အဆိုပါဟိုတယ်သည် ချောက်ကမ်းပါးတွင် တည်ရှိသည့်အတွက် မီးငြှိမ်းသတ်ရန် ခက်ခဲကြောင်း တာဝန်ရှိသူများက ဆိုသည်။

ဟိုတယ်ပိုင်ရှင်အပါအဝင် ကိုးဦးကို ဖမ်းဆီးထားပြီး မီးလောင်မှုနှင့်ပတ်သက်ပြီး စုံစမ်းစစ်ဆေးမှုများ ဆောင်ရွက်လျက်ရှိကြောင်း ဒေသတွင်းမီဒီယာများက ဖော်ပြသည်။

Source: ကြေးမုံသတင်းစာ

လာမည့်ဖေဖော်ဝါရီ ၁ ရက်တွင် စတင်၍ တရုတ်ကုန်ပစ္စည်းများကို အခွန် ၁၀ ရာခိုင်နှုန်း တိုးမြှင့်ကောက်ခံမည်ဟု အမေရိကန်သမ္မတဒေါ်နယ်ထရမ့်က ဇန်နဝါရီ ၂၂ ရက်(ဗုဒ္ဓဟူးနေ့)တွင် ပြောကြားလိုက်မှုအပေါ် အကောက်ခွန်နှင့်ကုန်သွယ်ရေးစစ်ပွဲတွင် အောင်နိုင်သူမရှိကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မစ္စမောနင်းက ထပ်လောင်း ပြောကြားလိုက်ပါသည်။

 “မိမိတို့၏ ရပ်တည်ချက်ကို အကြိမ်ကြိမ် ရှင်းပြပြီးပါကြောင်း၊ အကောက်ခွန်နှင့် ကုန်သွယ်ရေးစစ်ပွဲတွင် အောင်နိုင်သူမရှိကြောင်း ၊ တရုတ်နိုင်ငံက မိမိတို့၏ အမျိုးသားအကျိုးစီးပွားကို အမြဲတစေ အခိုင်အမာကာကွယ်သွားမည်ဖြစ်ကြောင်း” သူမက ပေကျင်းတွင် ပြုလုပ်သည့် ပုံမှန်သတင်းစာရှင်းလင်းပွဲတွင် ပြောကြားလိုက်ခြင်းဖြစ်ပါသည်။

ကိုးကား-China Daily

ရုရှား-ယူကရိန်းစစ်ပွဲ စတင်ဖြစ်ပွားရာ ၂၀၂၂ ခုနှစ် ဖေဖော်ဝါရီလမှစ၍ ဒေါ်လာ ၁ သန်း လာဘ်စားမှုဖြင့် ယူကရိန်းစစ်တပ်၏ စိတ်ရောဂါအထူးကုဆရာဝန် အကြီးအကဲကို ဖမ်းဆီးထိန်းသိမ်းလိုက်ကြောင်း သိရသည်။ အဆိုပါဆရာဝန်ကြီးမှာ စစ်ပွဲတွင် စစ်မှုထမ်းရန် သင့်၊ မသင့် ဆုံးဖြတ်ပေးရသည့် ကော်မရှင် တစ်ခု၏ အကြီးအကဲဖြစ်ကြောင်း ယူကရိန်း လုံခြုံရေးဝန်ဆောင်မှုဌာနထုတ်ပြန်ချက်အရ သိရပါသည်။

ကိုးကား -BBC

အမေရိကန်အမျိုးသား လုံခြုံရေးအေဂျင်စီ (NCA)၏ ကွန်ပျူတာလုံခြုံရေးအကြံပေး၊ CIA ဝန်ထမ်းဟောင်း Eward Snowden ၏ ဇနီးဖြစ်သူ Lindsay Mills သည် ရုရှားနိုင်ငံသားဖြစ်ခွင့်လျှောက်ထားခဲ့ကြောင်း ရှေ့နေ Anatoly Kucherena ကပြောကြားခဲ့သည်။

Mills သည် ရုရှားနိုင်ငံတွင် ငါးနှစ်ကျော်နေထိုင်ခဲ့ပြီး ရုရှား၏နိုင်ငံသားဖြစ်ခွင့်ဆိုင်ရာ သတ်မှတ်ချက်ဥပဒေစံနှုန်းများနှင့်အညီ ဆောင်ရွက်နေကြောင်း Kucherena ကပြောသည်။

အမေရိကန်နိုင်ငံသူဖြစ်သည့် Mills သည် ယခင်က ဂျွမ်းဘားမယ်နှင့် ဘလော့ဂါတစ်ဦးဖြစ်ခဲ့ပြီး ၂၀၁၃ ခုနှစ်တွင် စနိုးဒန်း၏ လက်တွဲဖော်အဖြစ် နိုင်ငံတကာ၏ အာရုံစိုက်ခြင်းခံခဲ့ရသူဖြစ်ခဲ့သည်။

၂၀၁၃ ခုနှစ်တွင် အမေရိကန်နှင့်ဗြိတိန်တို့၏ ထောက်လှမ်းရေးအေဂျင်စီများ၏ စောင့်ကြည့်ထောက်လှမ်းခဲ့သည့် ထောင်နှင့်ချီသောအရေးကြီးအချက် အလက်များစွာကို ဂျာနယ်လစ်များထံသို့ ပေးအပ်ခဲ့ပြီး The Guardian ၊ Newyork Time နှင့် The Washington Post တို့မှ ထုတ်ဖော်ခဲ့ပြီးနောက် စနိုးဒန်း သည် အမေရိကန်မှ ထွက်ပြေးခဲ့ရသည်။

ခိုလှုံခွင့်ပေးရန် နိုင်ငံများစွာ၏ ငြင်းပယ်မှုကိုခံခဲ့ရပြီး နောက်ဆုံးတွင် ရုရှားနိုင်ငံသို့ရောက်ရှိလာကာ လေဆိပ်တစ်ခုတွင် တစ်လကြာသောင်တင်နေပြီးနောက် ခိုလှုံခွင့် ရရှိခဲ့သည်။

၂၀၁၄ ခုနှစ်၊ အောက်တိုဘာလတွင် Mills သည် အမေရိကန်နိုင်ငံမှထွက်ခွာခဲ့ပြီး မော်စကိုတွင် စနိုးဒန်းနှင့်ပေါင်းစည်းနိုင်ခဲ့သည်။ ၎င်းတို့နှစ်ဦးသည် ၂၀၁၇ ခုနှစ် တွင် လက်ထပ်ခဲ့ကြပြီး သားသမီးနှစ်ဦး မွေးဖွားခဲ့ကာ ကလေးနှစ်ဦးအား ရုရှားနိုင်ငံသားများအဖြစ် အသိအမှတ်ပြုခံခဲ့ရသည်။

စနိုးဒန်းအား ၂၀၂၂ ခုနှစ်၊ စက်တင်ဘာလတွင် သမ္မတအမိန့်ဖြင့် ရုရှားနိုင်ငံသားဖြစ်ခွင့်ပေးခဲ့သည်။

ကိုးကား-RT

ဇီဝလောင်စာစွမ်းအင်ထုတ်လုပ်မှုနှင့်စပ်လျဉ်း၍ သစ်တောပြုန်းတီးမှုအပေါ် ပြည်တွင်းနှင့် နိုင်ငံတကာမှ ဝေဖန်မှုများမြင့်တက်လာပြီးနောက် တောင်ကိုရီးယားအစိုးရသည် ဇီဝလောင်စာစွမ်းအင်ဆိုင်ရာ အထောက်အပံ့ပေးအပ်မှုကို လျှော့ချသွားမည်ဖြစ်သည်။ ယေဘုယျအားဖြင့် သဘာဝပတ်ဝန်းကျင်ဆိုင်ရာ တက်ကြွ လှုပ်ရှားသူများက ပြုပြင်ပြောင်းလဲမှုများကို ကြိုဆိုထောက်ခံခဲ့သော်လည်း တောင်ကိုရီးယားနိုင်ငံ၏ ဇီဝလောင်စာစွမ်းအင်ဆိုင်ရာ အထောက်အပံ့ပေးအပ်မှုကို ရပ်ဆိုင်းရန် ကြန့်ကြာနေမှုများနှင့် လိုအပ်ချက်များ အပေါ် ဝေဖန်ခဲ့ကြသည်။

သိပ္ပံပညာရှင်များနှင့် သဘာဝပတ်ဝန်းကျင်ထိန်းသိမ်းရေး ပညာရှင် အများအပြားက ဇီဝလောင်စာစွမ်းအင် ထုတ်လုပ်မှုကို ပြဿနာတစ်ရပ်အဖြစ် ထင်မြင်ကြသော်လည်း ကမ္ဘာ့နိုင်ငံများအနေဖြင့် သန့်စင်သောစွမ်းအင်ကို ပြောင်းလဲအသုံးပြုမည့်လုပ်ငန်းကို အရှိန်မြှင့်လိုက်ခြင်းကြောင့် အဓိကအားဖြင့် သစ်သား အတိုအစများအား မီးရှို့ဖျက်ဆီးခြင်းဖြင့် ထုတ်လုပ်ရရှိသည့် ဇီဝလောင်စာစွမ်းအင်ကို ကမ္ဘာတစ်ဝှမ်းတွင် အများအပြား ထုတ်လုပ်လျက်ရှိသည်။ တောင်ကိုရီးယားနိုင်ငံတွင် ဇီဝလောင်စာစွမ်းအင်သည် ဒုတိယအကြီးဆုံး ပြန်လည်ပြည့်ဖြိုးမြဲ စွမ်းအင်အရင်းအမြစ်ဖြစ်သည်။

တောင်ကိုရီးယားအစိုးရသည် ပြန်လည်ပြည့်ဖြိုးမြဲ စွမ်းအင်ဆိုင်ရာ အသိအမှတ်ပြုလက်မှတ် ပေးအပ်သည့် အစီအစဉ်များ ပြုလုပ်၍ ဇီဝလောင်စာစွမ်းအင် ထုတ်လုပ်မှုကို ဆယ်စုနှစ်တစ်ခုကျော်ကြာ ဒေါ်လာသန်းနှင့်ချီ၍ ထောက်ပံ့ပေးထားသည်။ မကြာသေးမီက ဇီဝလောင်စာသုံး ဓာတ်အားပေးစက်ရုံများကို ထောက်ပံ့ပေးရန် တောင်ကိုရီးယားအစိုးရက ဒေါ်လာ ၆၈၈ သန်း ပေးအပ်ခဲ့ကြောင်း တောင်ကိုရီးယားနိုင်ငံ ကုန်သွယ်ရေး၊ စက်မှုနှင့် စွမ်းအင်ဝန်ကြီးဌာန၏ ထုတ်ပြန်ချက်အရ သိရှိရပါသည်။

တောင်ကိုရီးယားနိုင်ငံတွင် ပြည်တွင်းသစ်တော အရင်းအမြစ်များ အကန့်အသတ်ဖြင့် ရှိနေသည့်အတွက် ၎င်း၏ဇီဝလောင်စာစွမ်းအင်လုပ်ငန်း လည်ပတ်ရန် သစ်တောပေါကြွယ်ဝသောနိုင်ငံများမှ သစ်တိုသစ်စ အများအပြားကို စျေးနှုန်းချိုသာစွာဖြင့် တင်သွင်းနေရသည်။ ၂၀၂၃ ခုနှစ်တွင် တောင်ကိုရီးယားနိုင်ငံ၏ သွင်းကုန်များတွင် နိုင်ငံ၏ သစ်တိုသစ်စ ဝယ်လိုအား၏ ၈၂ % ပါဝင်နေပြီး တောင်ကိုရီးယားသည် ဗြိတိန်နှင့် ဂျပန်နိုင်ငံပြီးလျှင် ကမ္ဘာ့တတိယအကြီးဆုံး ဇီဝလောင်စာ တင်သွင်းသူ ဖြစ်လာခဲ့သည်။

ကိုးကား-AP News

သမ္မတ ထရမ့်သည် အထင်ကရ နည်းပညာ အမှုဆောင်များဖြစ်သည့် ဆမ်အောလ်မန်နှင့် လာရီအယ်လီဆန်၊ ဂျပန်နိုင်ငံသား နည်းပညာကုမ္ပဏီ ပိုင်ရှင်သူဌေးကြီး Masayoshi Son တို့၏ ရှေ့တွင် အမေရိကန်အခြေစိုက် AI နည်းပညာကုမ္ပဏီ Stargate ကို မတည်ရင်းနှီးငွေ အမေရိကန်ဒေါ်လာ ဘီလီယံ ၅၀၀ (ယူရိုဘီလီယံ ၄၀၄) ဖြင့် လည်ပတ်သွားမည် ဖြစ်ကြောင်း၊ ခန့်မှန်းခြေ အလုပ်အကိုင် အခွင့်အလမ်းပေါင်း ၁ သိန်းကျော် ဖန်တီးပေးနိုင်မည်ဖြစ်ကြောင်း ပြောကြားခဲ့ပါသည်။

အမေရိကန် Oracle ဆော့ဝဲလ်နည်းပညာကုမ္ပဏီ တည်ထောင်သူ လာရီအယ်လီဆန်က တက္ကဆက် ပြည်နယ်တွင် data center ကို အဆောက်အအုံ ၁၀ ခု ဖြင့် တည်ဆောက်လျက်ရှိပြီး အဆောက်အအုံ ၂၀ အထိ တိုးချဲ့တည်ဆောက်မည်ဟု ပြောကြားခဲ့ပါသည်။

Open AI မှ နည်းပညာပညာရှင် Altman က “အမေရိကန် ယခုရွှေခေတ်ရောက်တော့မည်ဖြစ်ကြောင်း” ဒေါ်နယ်ထရမ့်၏ ပြောစကားနှင့်အညီ အခု စီမံကိန်းများသည်လည်း ထရမ့်၏ စွမ်းဆောင်မှုများကြောင့် အောင်မြင်မည်ဖြစ်ကြောင်း” ပြောကြားခဲ့ပါသည်။

ကိုးကား -BBC

Photo: AP News

ကမ္ဘာ့ကျန်းမာရေးအဖွဲ့မှ  အမေရိကန်ပြည်ထောင်စုနုတ်ထွက်မည်ဟု သမ္မတ ဒေါ်နယ်ထရမ့်ကကြေညာခဲ့ခြင်းအပေါ် စိတ်မကောင်းဖြစ်မိကြောင်း အဆိုပါအဖွဲ့ကြီးက ဇန်နဝါရီလ၂၁ ရက်တွင်ပြောကြားခဲ့ကြောင်း သိရသည်။

အမေရိကန်သမ္မတ ထရမ့်အနေဖြင့် ၎င်း၏ဆုံးဖြတ်ချက်ကို ပြန်လည်စဉ်းစားမည်ဟုမျှော်လင့်မိကြောင်း၊   ကမ္ဘာ့ကျန်းမာရေးအဖွဲ့အနေဖြင့် အပြုသဘောဆောင်သည့် တွေ့ဆုံဆွေးနွေးခြင်းမှတစ်ဆင့် အမေရိကန်နှင့်မိတ်ဖက်ပူးပေါင်းခြင်းကို ဆက်လက်ထိန်းသိမ်းရန်  မျှော်လင့်ထားကြောင်း ၎င်းအဖွဲ့က ထုတ်ပြန်သည့်ကြေညာချက်တွင်ဖော်ပြသည်။

ထို့ပြင် ကမ္ဘာ့ကျန်းမာရေးအဖွဲ့သည် အမေရိကန်ပြည်သူများ၏ ချမ်းသာသုခအပါအဝင် တစ်ကမ္ဘာလုံး၏ ကျန်းမာရေးနှင့်ဘေးကင်းရေးကို စောင့်ရှောက်ရာတွင် အရေးပါသည့်အခန်းကဏ္ဍမှပါဝင်လျက်ရှိကြောင်း ယင်းအဖွဲ့ကြီးကအလေးပေးပြောကြားသည်။

အမေရိကန်ပြည်ထောင်စုသည် ကမ္ဘာ့ကျန်းမာရေးအဖွဲ့အားတည်ထောင်ခဲ့သည့် အဖွဲ့ဝင်နိုင်ငံ အဖြစ် ၁၉၄၈ ခုနှစ်မှစ၍ အဖွဲ့ဝင် ၁၉၃ နိုင်ငံနှင့်အတူ အဖွဲ့ကြီး၏အုပ်ချုပ်မှုနှင့် အဖွဲ့ကြီးအား ပုံဖော်ရာတွင် အရေးပါသည့်အခန်းကဏ္ဍမှ ပါဝင်ခဲ့သည့်နိုင်ငံတစ်နိုင်ငံဖြစ်ကြောင်းသိရသည်။

ကမ္ဘာ့ကျန်းမာရေးအဖွဲ့မှ အမေရိကန်ပြည်ထောင်စုနုတ်ထွက်သည့် အမိန့်ကြေညာချက်အား ထရမ့်က ဇန်နဝါရီလ ၂၀ ရက်တွင် လက်မှတ်ရေးထိုးခဲ့ခြင်းဖြစ်သည်။

Source: Myawady Web Portal

ရုရှားနိုင်ငံ၏ ကမ္ဘာပေါ်တွင် တစ်ခုတည်းသောလည်ပတ်နေသည့် ရေပေါ်လျှပ်စစ်ဓာတ်အားထုတ်လုပ်ရေးစက်ရုံသည် တစ်နာရီလျှင် လျှပ်စစ်ဓာတ်အား ကီလိုဝပ်တစ်ဘီလီယံကို ထုတ်လုပ်ပေးနိုင်ခဲ့ကြောင်း ရုရှားနိုင်ငံပိုင် Rosatom  နျူကလီးယားကော်ပိုရေးရှင်းကထုတ်ပြန်သည်။

Akademik Lomonosov ဟုအမည်ပေးထားသည့် အဆိုပါရေပေါ် ဓာတ်အားထုတ်လုပ်ရေးစက်ရုံသည် ရုရှားအရှေ့ဖျားဒေသရှိ ချူကော့တာကိုယ်ပိုင်အုပ်ချုပ်ခွင့်ရဒေသ၌တည်ရှိပြီး လက်ရှိတွင် အပူနှင့်လျှပ်စစ်စွမ်းအားကို ထုတ်လုပ်ပေးနေသည့် ကမ္ဘာကြီး၏မြောက်ဘက်အကျဆုံးသောစက်ရုံအဖြစ် ရပ်တည်လျက်ရှိသည်။

၎င်းစက်ရုံမှထုတ်လုပ်သည့် လျှပ်စစ်ဓာတ်အားပမာဏ၏ ၆၀ ရာခိုင်နှုန်းကျော်ကို အရှေ့ဖျားဒေသ၏ စွမ်းအင်လိုအပ်ချက်များကို ဖြည့်ဆည်းပေးလျက်ရှိသည်။

Akademik Lomonosov ဓာတ်အားထုတ်လုပ်ရေးစက်ရုံသည် ရုရှားနျူကလီးယားစွမ်းအင်သုံး ရေခဲခွဲသင်္ဘောများတွင် အသုံးပြုသည့် နည်းပညာကိုအသုံးပြုထားပြီး လောင်စာအဖြစ် အဆင့်နိမ့်သန့်စင်ထားသည့် ယူရေနီယံကိုအသုံးပြုထားခြင်းဖြစ်သည်။ ၎င်းစက်ရုံသည် အလျား ၁၄၄ မီတာ၊ အကျယ် ၃၀ မီတာရှိသည်။

အဆိုပါဓာတ်အားထုတ်လုပ်ရေးစက်ရုံကို  ရုရှားနိုင်ငံက  အာတိတ်ဒေသနှင့် အရှေ့ဖျားဒေသများရှိ ဝေးလံသီခေါင်သော ဆိပ်ကမ်းမြို့ကြီးများရှိ   စက်မှုဇုန်ကြီးများသို့ ဓာတ်အားပေးနိုင်ရန် ဒီဇိုင်းထုတ်လုပ်ထားခြင်းဖြစ်သည်။ 

Source: Myawady Web Portal

သမ္မတ ဒေါ်နယ်ထရမ့်၏ ကျမ်းသစ္စာကျိန်ဆိုပွဲ အခမ်းအနားအတွင်း အီလွန်မတ်စ်သည် ဖက်ဆစ်ပုံစံ အလေးပြုခြင်းအမူအရာပြုလုပ်ခဲ့သည်ဟုဆိုကာ ဝေဖန်မှုများမြင့်တက်နေလျှက်ရှိသည်။

“သမ္မတအဖြစ်ကို ဖြစ်မြောက်အောင်လုပ်ပေးတဲ့အတွက် ကျေးဇူးတင်တယ်လို့ပဲ ပြောချင်ပါတယ်” ဟု ကမ္ဘာပေါ်ရှိ အချမ်းသာဆုံးပုဂ္ဂိုလ်လည်းဖြစ်ပြီး၊ SpaceX ကုမ္ပဏီ၊ X လူမှုကွန်ရက် နှင့် Tesla ကားကုမ္ပဏီတို့၏ပိုင်ရှင်လည်းဖြစ်ကာ၊ ထရမ့်မဲဆွယ်ကာလ အဓိကအလှူရှင်နှင့် လက်ရှိတွင်လည်း ထရမ့်အကြံပေးပုဂ္ဂိုလ်ဖြစ်သူ အီလွန်မတ်စ် ဝါရှင်တန်ရှိ Capital One Arena တွင် ပြောကြားခဲ့သည်။

ထို့သို့ပြောကြားပြီးနောက် မတ်စ်သည် ၎င်း၏ သူ၏ ညာလက်ဖဝါးကို ဘက်ဖက်ရင်ဘတ်သို့ ထိရိုက်လိုက်ကာ လက်ချောင်းများဆန့်လျက် ညာလက်မောင်းကို အပေါ်ထောင့်ဖြတ်၊ တန်းတန်းသို့ ပြန်လည်ဆန့်တန်းလိုက်ခြင်းဖြစ်သည်။

ပရိသတ်က ဩဘာပေးကြရာတွင် မတ်စ်က နောက်တစ်ကြိမ် ထိုပုံစံအတိုင်းပင် ထပ်မံလုပ်ပြခဲ့သေးသည်။

ထိုသို့ပြုလုပ်ခြင်းကို ဖက်ဆစ်နာဇီတို့၏ အလေးပြုနည်းအဖြစ် နှိုင်းယှဉ်ဝေဖန်လာကြသော်လည်း အီလွန်မတ်စ်ကမူ မည်သို့ပြန်လည်ဖြေရှင်း မှတ်ချက်ပြုခြင်းမရှိချေ။

Source: Popular Myanmar

ဆက်စပ်သတင်းများ- https://sacministry.gov.mm/my/news/1852