သက်ဆင်သည် နိုင်ငံတော်အသရေဖျက်မှုဖြင့် တရားစွဲဆိုခံထားရမှု၏ သက်သေခံချက်များကို နားထောင်ရန် တရားရုံးသို့ လာရောက်

ထိုင်းဝန်ကြီးချုပ်ဟောင်း သက်ဆင်ရှင်နာဝပ်ထရာသည် ၂၀၁၅ ခုနှစ်က တောင်ကိုရီးယားနိုင်ငံတွင် မီဒီယာနှင့်ပြုလုပ်ခဲ့သော တွေ့ဆုံမေးမြန်းခန်း တွင် ဖြေကြားခဲ့မှုများကြောင့် တော်ဝင်မိသားစုအား အသရေဖျက်မှုစွဲချက်အတွက် အစိုးရကိုယ်စားလှယ်များ၏ ပထမဆုံးသက်သေခံချက်များကို နားထောင်ရန် ဇူလိုင် ၁ ရက်နေ့၊ နံနက်ပိုင်းတွင် ရာဇဝတ်တရားရုံးသို့ ရောက်ရှိလာခဲ့ သည်။

သက်ဆင်သည် ဘန်ကောက်မြို့ရှိ Ratchadaphisek လမ်းပေါ်မှ တရားရုံးသို့ ရောက်ရှိလာပြီး အရှေ့ဘက်ဝင်ပေါက်တံခါးကိုင်မသုံးဘဲ ဘေးဘက်ဓာတ်လှေကားကို အသုံးပြုကာ သတင်းထောက်များကို ရှောင်ရှား ခဲ့သည်။

၎င်း၏ ယောက်ဖ ဝန်ကြီးချုပ်ဟောင်း ဆောင်ချိုင်ဝမ်းဆာဝတ် သည်လည်း သက်ဆင်အား စိတ်ဓာတ်ခွန်အားတိုးမြင့်စေရေးအတွက် အားပေးရန် တရားရုံးတွင် ရှိနေခဲ့သည်။ ၎င်းအား ခုခံသက်သေအဖြစ် ခေါ်ယူမည် လားဟု မေးမြန်းမှုအပေါ် “သက်ဆင်၏ တရားရေးအဖွဲ့က မိမိ၏အမည်ကို သက်သေအဖြစ် တင်သွင်းထားခြင်းမရှိပါ” ဟု ဆိုခဲ့သည်။ တရားရုံးက အများပြည်သူနှင့် မီဒီယာများကို တားမြစ်ထားသည့်အနေဖြင့် တံခါးများကို ပိတ်ထားရန် အမိန့်ချမှတ်ခဲ့သည်။

အဆိုပါအမှုသည် ၂၀၁၅ ခုနှစ်က တောင်ကိုရီးယား Chosun Ilbo သတင်းစာနှင့် ပြုလုပ်ခဲ့သော တွေ့ဆုံမေးမြန်းခန်းတွင် သက်ဆင် ပြောဆိုခဲ့သည့် မှတ်ချက်များကြောင့် စတင်ခဲ့ခြင်းဖြစ်သည်။ ထိုအချိန်က ၎င်း၏ ညီမဖြစ်သူ ဝန်ကြီးချုပ်ဟောင်း ယင်လက် ရှင်နာဝပ်ထရာကို အာဏာမှ ဖယ်ရှားခဲ့သည့် အာဏာသိမ်းမှုအား သီးသန့်ကောင်စီဝင်များက ထောက်ခံ ခဲ့သည်ဟု စွပ်စွဲပြောဆိုခဲ့ပြီး ၊ ထိုစကားများကို အွန်လိုင်းတွင် တင်ခဲ့သည့် အတွက် ရာဇ၀တ်ကျင့်ထုံးဥပဒေပုဒ်မ ၁၁၂ အရ အသရေဖျက်မှုအပြင် ဆက်သွယ်ရေးဆိုင်ရာ ရာဇဝတ်မှုနှင့်လည်း တရားစွဲဆိုခံခဲ့ရပါသည်။ အသက် ၇၅ နှစ်အရွယ် သက်ဆင်က စွဲချက်များကို ငြင်းဆိုခဲ့ပြီး အာမခံနှင့် လွတ်မြောက် ခဲ့ပါသည်။

သက်ဆင်၏ ရှေ့နေ Winyat Chartmontree said က အမှုတွင် အစိုးရ ကိုယ်စားလှယ်များ၏ သက်သေ ၁၀ ဦးအနက် ၃ ဦးကို သုံးရက်ကြာ ကြားနာမှုအတွင်း စစ်ဆေးမည်ဟု ပြောကြားခဲ့သည်။ ခုခံဘက်မှ ရှေ့နေ အဖွဲ့အနေဖြင့် သက်သေတစ်ဦးချင်းစီကို မေးမြန်းသွားမည်ဖြစ်ကြောင်း ၎င်းက ဖြည့်စွက်ပြောကြားခဲ့သည်။

သက်ဆင်အနေဖြင့် တရားရုံးတက်ရန် လိုအပ်မှုနှင့်ပတ်သက်၍ မေးမြန်းမှု ကို ရှေ့နေက “၎င်းသည် အာမခံဖြင့် လွှတ်ပေးထားသူဖြစ်သောကြောင့် တရားရုံးတက်ရန် လိုအပ်သည်” ဟု ဖြေကြားခဲ့ပြီး ရာဇဝတ်တရားရုံးက လုပ်ထုံးလုပ်နည်းဆိုင်ရာ ညွှန်ကြားချက်များ ထုတ်ပြန်နိုင်သည်ဟု ဖြည့်စွက်ပြောကြားခဲ့သည်။

ထို့အပြင် မတက်ရောက်ဘဲ အမှုစစ်ဆေးပေးရန် တောင်းဆိုချက် (trial in absentia) ကို လိုအပ်ပါက စဉ်းစားနိုင်သော်လည်း သက်ဆင်က လက်ရှိ တွင် တရားရုံးတက်ရောက်ရန် ရည်ရွယ်ထားကြောင်း ရှေ့နေက ပြောကြား ခဲ့သည်။ သို့သော် မတက်ရောက်ဘဲ အမှုစစ်ဆေးပေးရန် တောင်းဆိုချက် သည် အများအားဖြင့် အမြင့်ဆုံးပြစ်ဒဏ် ၁၀ နှစ်ထက် မပိုသော အမှု များတွင်သာ သက်ရောက်နိုင်သည့်အတွက် ယခုအမှုတွင် ပိုမို မြင့်မားသော ပြစ်ဒဏ်ချမှတ်နိုင်သည့် စွဲချက်များပါရှိသဖြင့် တက်ရောက်ရန် လိုအပ် သည်ဟု ရှင်းပြခဲ့သည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂