မတ်လ ၁၇ ရက်တွင် ဘယ်ဂျီယံနိုင်ငံမြို့တော် ဘရပ်ဆဲလ်၌ ကျင်းပလျက်ရှိသည့် ဥရောပသမဂ္ဂအစည်းအဝေးတွင် ဥရောပသမဂ္ဂကောင်စီသည် (Macro-Financial Assistance- MFA) အစီအစဉ်အရ ယူကရိန်းကို ယူရို ၃.၅ ဘီလီယံ ပေးချေရန် အတည်ပြုလိုက်ပါသည်။

ယခုတတိယအကြိမ်ငွေပေးချေမှုအပါအဝင်   ဥရောပသမဂ္ဂသည် ယူကရိန်းကို Ukraine Facility ခေါင်းစဉ်အောက်မှ ယူရို ၂၀ ဘီလီယံနီးပါး ပေးဆောင်မည်ဟု ကြေညာချက်တွင် ဖော်ပြထားပါသည်။ 

Ukraine Facility ဆိုသည်မှာ ယူကရိန်းနိုင်ငံ၏ စီးပွားရေးနှင့် ဘဏ္ဍာရေး တည်ငြိမ်မှုရှိစေရန်နှင့် ပြန်လည်တည်ဆောက်ရေး လုပ်ငန်းများအတွက် အထောက်အကူပြုစေရန် ဥရောပသမဂ္ဂ၏ ထောက်ပံ့သည့် အကူအညီအစီအစဉ်တစ်ခု ဖြစ်ပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ယူကရိန်းအနေဖြင့် ရုရှားနှင့် ငြိမ်းချမ်းရေးရယူနိုင်ရေး ဆွေးနွေးရာတွင် ပိုင်နက်နယ်မြေအချို့ကို စွန့်လွှတ်နိုင်ရေး ပြင်ဆင်ထားရမည်ဟု အမေရိကန်သမ္မတ ဒေါ်နယ်ထရမ့်၏ လုံခြုံရေးအကြံပေး မိုက်ဝေါ့က ထုတ်ဖော်ပြောဆိုလိုက်ပါသည်။

အမေရိကန်အစိုးရသည် လက်ရှိအချိန်တွင် ရုရှားနှင့်ယူကရိန်းနိုင်ငံကြား ရက် ၃ဝ ကြာ အပစ်ခတ်ရပ်စဲရေးရယူနိုင်ရန် ရုရှားကိုဖိအားပေးမှု ဆက်လက် လုပ်ဆောင်ရန် အဆင်သင့်ရှိနေသည်ဟု ၎င်းကပြောသည်။ ယူကရိန်းက ခရိုင်းမီးယားဒေသအပြင် ဒွန်းညက်စ်၊ လူဟန့်၊ ခါဆွန်၊ ဇာပိုရိုဟီ ဒေသ များသည် ၎င်းတို့ပိုင်နက်များဖြစ်ကြောင်း ပြောဆိုထားပြီး လက်ရှိအချိန်တွင် အဆိုပါဒေသများသည် ရုရှားထိန်းချုပ်မှုအောက်သို့ ရောက်ရှိနေသည်။ ခရိုင်းမီးယားဒေသသည် ၂၀၁၄ ခုနှစ် စစ်ပွဲဖြစ်လာခဲ့ပြီးနောက် ရုရှား ပိုင်နက်ဖြစ်ခဲ့ကာ ဒွန်းညက်စ်၊ လူဟန့်၊ ခါဆွန်၊ ဇာပိုရိုဟီ ဒေသများသည်လည်း ၂၀၂၂ ခုနှစ် စစ်ပွဲများအတွင်း ရုရှားထိန်းချုပ်မှုအောက် ထပ်မံ ရောက်ရှိခဲ့ခြင်းဖြစ်သည်။

အမေရိကန် အမျိုးသားလုံခြုံရေး အကြံပေးဖြစ်သူက “ယူကရိန်းစစ်ပွဲ ငြိမ်းချမ်းရေးရယူနိုင်မည့် အလားလာများတွင် ယူကရိန်းအတွက် လုံခြုံရေး အာမခံချက်ပေးရမည့်အချက်များလည်းပါဝင်မည်ဖြစ်ပြီး ယူကရိန်း အနေဖြင့် နေတိုးအဖွဲ့ဝင်နိုင်ငံအဖြစ် ပါဝင်နိုင်ရေးအစီအစဉ်ကို လက်လျှော့ရမည် ဖြစ်ကြောင်း၊ ခရိုင်းမီးယားအပါအဝင် ယူကရိန်းပိုင်နက်များကို ပြန်ပေးရန် ကြိုးပမ်းမှုများသည် လက်တွေ့မဆန်ကြောင်းနှင့် အမေရိကန်အစိုးရသည် ယူကရိန်းစစ်ပွဲအဆုံးသတ်နိုင်ရန် မြေပြင်အခြေနေမှန်ကို အဓိကထားကာ ကြိုးပမ်းမည်” ဟု ပြောဆိုခဲ့သည်။

ကိုးကား-NP News

အမေရိကန်သမ္မတ Donald Trump ၏ အစိုးရအဖွဲ့သည် ယူကရိန်း ပဋိပက္ခနှင့် ဆက်စပ်နေသော ရုရှားရာဇဝတ်မှုများကို စုံစမ်းစစ်ဆေးရန်နှင့် တရားစွဲဆိုရန် ရည်ရွယ်၍ဖွဲ့စည်းထားခဲ့သော ICPA မှ နုတ်ထွက်ရန် စီစဉ်နေကြောင်း New York Times က မတ်လ ၁၇ ရက်(တနင်္လာ)နေ့တွင်ဖော်ပြခဲ့သည်။

အမေရိကန်တရားမျှတရေးဌာန (DOJ) သည် ရုရှား၊ ဘယ်လာရုစ်၊ မြောက်ကိုရီးယားနှင့် အီရန်တို့ကို စွပ်စွဲထားသော ရာဇဝတ်မှုများအတွက် စုံစမ်းစစ်ဆေးရန် ဖွဲ့စည်းထားသော EU ကြီးမှူးသည့် (ICPA) မှ နုတ်ထွက်မည်ဟု ဆိုသည်။

အမေရိကန်သည် ၂၀၂၃ ခုနှစ်တွင် ICPA ၌ ဥရောပမဟုတ်သော တစ်ခုတည်းသော အဖွဲ့ဝင်ဖြစ်လာခဲ့သည်။ NYT ၏ သတင်းရင်းမြစ်များအရ ဝါရှင်တန်သည် တရားဝင်ကြေညာချက်မထုတ်ပြန်မီ ဥရောပ မိတ်ဖက်များအား ၎င်း၏နုတ်ထွက်မည့်အစီအစဉ်ကို အသိပေးထားကြောင်း ဆိုသည်။

Trump ၏ အစိုးရအဖွဲ့ဝင်များက အစိုးရအသုံးစရိတ်များ ပိုမို လျှော့ချခြင်း အစီအစဉ်ကို ကိုးကား၍ နုတ်ထွက်ခြင်းကို မှန်ကန်ကြောင်း ပြောကြားခဲ့သည်။ DOJ သည် အမေရိကန်ပါဝင်မှုကို ကနဦးကြေညာစဉ်က ICPA ကို ဒေါ်လာ ၁ သန်း ထောက်ပံ့မည်ဟု ကတိပြုခဲ့သည်။

ထို့အပြင် NYT သတင်းရင်းမြစ်များအရ ဝါရှင်တန်သည် စစ်ရာဇဝတ်မှုများအတွက် ရုရှားကိုတရားစွဲဆိုမှုများနှင့်ပတ်သက်၍ လေ့ကျင့်ပေးရန် ၂၀၂၂ ခုနှစ်တွင်ဖွဲ့စည်းထားသော WarCAT အဖွဲ့၏ လုပ်ငန်းတာဝန်များကို လျှော့ချနေသည်ဟုဆိုသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ဝါရှင်တန်၊ နိုင်ငံရေး

အမေရိကန်နှင့် ရုရှားနိုင်ငံတို့ကြား ဆက်ဆံရေးပြန်လည်တည်ထောင်ရန်အတွက်နောက်တစ်ဆင့်ထပ်မံတက်လှမ်းရေးနှင့်စပ်လျဉ်း၍ အမေရိကန်နိုင်ငံခြားရေးဝန်ကြီး မားကို့ရူဘီယိုက ရုရှားနိုင်ငံခြားရေးဝန်ကြီး ဆာဂျီလက်ရော့နှင့် ဖုန်းမှတစ်ဆင့်ပြောဆိုဆွေးနွေးခဲ့သည်ဟု အမေရိကန်နိုင်ငံခြားရေးဝန်ကြီးဌာနက ထုတ်ပြန်သည်။

ရူဘီယိုသည် ရုရှားနိုင်ငံခြားရေးဝန်ကြီး လက်ရော့နှင့် မတ်လ ၁၅  ရက်တွင် ဖုန်းမှတစ်ဆင့် ဆက်သွယ်၍   နှစ်နိုင်ငံကြားတိုက်ရိုက်ဆက်သွယ်ရေး    ပြန်လည်တည်ဆောက်ရန် ဆွေးနွေးခြင်းဖြစ်ပြီးအဆိုပါဆွေးနွေးမှုအတွင်း နှစ်နိုင်ငံကြားဆက်ဆံရေးပြန်လည်တည်ထောင်ရန်နှစ်ဖက်စလုံးက သဘောတူညီခဲ့ကြောင်း  ထုတ်ပြန်ချက်တွင် ဆက်လက်ဖော်ပြသည်။

နှစ်နိုင်ငံစလုံးမှ   နိုင်ငံခြားရေးဝန်ကြီးများ၏ဆွေးနွေးမှုသည်   အမေရိကန်နှင့် ရုရှားနိုင်ငံတို့က နှစ်နိုင်ငံကြားဆက်ဆံရေးကိုပြန်လည်တည်ထောင်ရေးနှင့် ယူကရိန်းနိုင်ငံတွင် အပစ်အခတ်ရပ်စဲရေးသဘောတူညီချက်တစ်ရပ်ချမှတ်နိုင်ရေး ကြိုးပမ်းနေစဉ် ထွက်ပေါ်လာခြင်းဖြစ်ကြောင်း သိရသည်။

ရူဘီယိုနှင့်လက်ရော့တို့ကြား ဆွေးနွေးမှုအတွင်းပြောကြားခဲ့သည့် အခြားအသေးစိတ်အချက်အလက်များကိုမူ ထုတ်ပြန်ထားခြင်းမရှိပေ။

သို့သော် အဆိုပါဆွေးနွေးမှုအတွင်း ယီမင်နိုင်ငံအတွင်းရှိ    ဟူသီသူပုန်များအပေါ် အမေရိကန်က လုပ်ဆောင်ခဲ့သည့် လေကြောင်းတိုက်ခိုက်မှုများနှင့် အဆိုပါသူပုန်အဖွဲ့အား ပင်လယ်နီအတွင်းအမေရိကန်က ဆက်လက်တိုက်ခိုက်မည့်အစီအစဉ်များကိုလည်း ရူဘီယိုက လက်ရော့အား အကျဉ်းချုပ်ပြောကြားခဲ့ကြောင်းသိရသည်။                                   

Ref:RT

Source: https://myawady.net.mm/

ရုရှားနိုင်ငံအနေဖြင့်  အမေရိကန်က အဆိုပြုသည့်   အပစ်အခတ်ရပ်စဲရေး အဆိုပြုချက်ကို သဘောတူညီခြင်းမရှိပါက ပိတ်ဆို့မှုသစ်များ ထပ်မံချမှတ်မည်ဟု စက်မှုအင်အားကြီးနိုင်ငံ(G7) က ခြိမ်းခြောက်ပြောဆိုလိုက်ကြောင်း သိရသည်။

အပစ်အခတ်ရပ်စဲရေးနှင့် စပ်လျဉ်း၍ G7 အဖွဲ့ဝင်နိုင်ငံများကြား ကွဲပြားမှုများကို ကျော်လွှားနိုင်ခဲ့ပြီး  သဘောတူညီချက် တစ်ရပ်ချမှတ်နိုင်ခဲ့ကြောင်း၊   ထို့ကြောင့် ရုရှားနိုင်ငံက ယူကရိန်းနိုင်ငံကဲ့သို့ အပစ်အခတ်ရပ်စဲရန် သဘောတူညီခြင်း မရှိပါက ပိတ်ဆို့မှုသစ်များနှင့် ရင်ဆိုင်ရမည် ဖြစ်သည်ဟု G7 အဖွဲ့မှ သံတမန်များ၏ ပြောကြားချက်ကို ကိုးကား၍   မီဒီယာများက  မတ်လ ၁၄ ရက်တွင်   ဖော်ပြသည်။

ထို့ပြင် အပစ်အခတ်ရပ်စဲရေးကို သဘောတူညီရန်အတွက်   ရုရှားနိုင်ငံအား  G7 အဖွဲ့ဝင်နိုင်ငံများက  ထောက်ခံကြောင်း ၎င်းအဖွဲ့ကထုတ်ပြန်သည့် ကြေညာချက်တွင် ဖော်ပြထားကြောင်း သိရသည်။

အကယ်၍ ရုရှားနိုင်ငံက အပစ်အခတ် ရပ်စဲရေးကို သဘောတူညီခြင်းမရှိပါက G7 အဖွဲ့ဝင်နိုင်ငံများအနေဖြင့် ရုရှားနိုင်ငံ၏ ရေနံဈေးနှုန်းများကို ထိန်းချုပ်ကန့်သတ်ခြင်းအားဖြင့်   စွမ်းအင်ကဏ္ဍအပေါ် ပိတ်ဆို့မှုအသစ်များ ချမှတ်၍  ယူကရိန်းနိုင်ငံသို့ အကူအညီများ ဆက်လက်ပေးအပ်ရန် ဆွေးနွေးခဲ့ကြကြောင်း သိရသည်။

Source: https://myawady.net.mm/

ဘရပ်ဆဲလ်တွင် ကျင်းပမည့် တရုတ်-ဥရောပသမဂ္ဂ သံတမန် ထူထောင်ခြင်း နှစ် ၅၀ ပြည့်အခမ်းအနား တက်ရောက်ရန် ဥရောပသမဂ္ဂ၏ ဖိတ်ကြား ချက်ကို တရုတ်သမ္မတ ရှီကျင့်ဖျင်က ငြင်းပယ်လိုက်ပါသည်။

ထိုအခမ်းအနားသို့ ၎င်းအစား တရုတ်ဝန်ကြီးချုပ် Li Qiang တက်ရောက် သွားမည် ဖြစ်ပါသည်။ ပုံမှန်အားဖြင့် ထိုအခမ်းအနားမျိုးကို ဝန်ကြီးချုပ် အဆင့်သာ တက်ရောက်လေ့ရှိသော်လည်း နှစ် ၅၀ (ရွှေရတု) ပြည့် ဖြစ်သည့်အတွက် သမ္မတကိုယ်တိုင် လာရောက်တက်စေလိုသဖြင့် ဥရောပသမဂ္ဂက ဖိတ်ကြားခဲ့ခြင်းဖြစ်ပါသည်။

၂၀၂၂ ခုနှစ် ရုရှား-ယူကရိန်းစစ်ပွဲစတင်ကတည်းက ဥရောပက တရုတ် အပေါ် ရုရှားဘက်ကို ထောက်ခံသည်ဟု စွပ်စွဲလာခဲ့ပြီး တရုတ်ထုတ် လျှပ်စစ်ကားများအတွက် အခွန်များတိုးမြှင့်ခဲ့သော်လည်း ယခုအခါ ဥရောပ က အမေရိကန် အစားထိုးရေး ပြင်ဆင်နေချိန်တွင် တရုတ်- ဥရောပ ဆက်ဆံရေး ရှုပ်ထွေးနေမှုကို ထင်ရှားစွာ ပြသနေပါသည်။

ကိုးကား- Reuters

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

အမေရိကန်သမ္မတ ဒေါ်နယ်ထရမ့်သည် ၎င်း၏အထူးကိုယ်စားလှယ် Steve Witkoff သည် မကြာသေးမီက မော်စကိုတွင် ရုရှားသမ္မတ ဗလာဒီမာပူတင်နှင့်တွေ့ဆုံမှုမတိုင်မီ ကြာမြင့်စွာ စောင့်ဆိုင်းခဲ့ရသည်ဟု ဖော်ပြခဲ့ကြသည့် မီဒီယာသတင်းများကို ပြင်းပြင်းထန်ထန် ရှုတ်ချခဲ့ပြီး ထိုသတင်းများကို “အဆင့်အတန်းမရှိသော သတင်းမှားများ” ဟု ပယ်ချ ခဲ့သည်။

မီဒီယာကျင့်ဝတ် စောင့်ထိန်းမှုမရှိသော သတင်းဌာနများသည် ၎င်းတို့၏ အလေ့အထများအတိုင်း သတင်းမှားများဖြန့်ကာ အထင်အမြင်မှားစေရန် လုပ်ဆောင်နေကြသည်ဟု ထရမ့်က ၎င်း၏ Social Platform ၌ ရေးသားခဲ့သည်။ ထရမ့်က Witkoff သည် ပူတင်နှင့်တွေ့ဆုံရန် စောင့်ဆိုင်း ခဲ့ရခြင်းမရှိဟု အတိအလင်းပြောကြားခဲ့သည်။

Sky News ၏ သတင်းတစ်ရပ်တွင် Witkoff သည် “ကရင်မလင်တွင် ပူတင်နှင့်တွေ့ဆုံရန် အနည်းဆုံးရှစ်နာရီကြာစောင့်ဆိုင်းခဲ့ရသည်” ဟု ဖော်ပြခဲ့ပြီး ထိုသတင်းကို မီဒီယာများစွာက ထပ်ဆင့်ဖော်ပြခဲ့ကြသည်။

ထရမ့်၏ ကိုယ်စားလှယ်အဖွဲ့နှင့် ပူတင်အပါအဝင် ရုရှားအစိုးရ တာဝန်ရှိ ပုဂ္ဂိုလ်များသည် အခြားဆက်စပ်အစည်းအဝေးများကိုလည်း ကျင်းပ ဆွေးနွေးခဲ့ကြပြီး အချိန်ကြာမြင့်မှုရှိခဲ့သော်လည်း ထိုဆွေးနွေးမှုများသည် လွန်စွာအကျိုးရှိခဲ့သည်ဟုဆိုသည်။

မီဒီယာများသည် သံတမန်၏ စောင့်ဆိုင်းမှုဆိုင်ရာသတင်းကို ဂုဏ်သိက္ခာ ကျစေရန် လုပ်ကြံဖန်တီးခဲ့ခြင်းဖြစ်ကာ ၎င်းတို့သည် သတင်းမှန်များကို ဖော်ပြရန်စိတ်မဝင်စားဘဲ လုပ်ကြံသတင်းများကိုသာ ဖော်ပြနေကြပြီး “စိတ်ဓာတ်ရေးရာ ယိုယွင်းပျက်စီးနေသူများဖြစ်သည်” ဟု ထရမ့်က ဆိုသည်။

ထရမ့်၏ ရေရှည်လုပ်ဖော်ကိုင်ဖက်ဖြစ်သူ အိမ်ခြံမြေလုပ်ငန်းရှင် Witkoff သည် ယူကရိန်းပဋိပက္ခတွင် ငြိမ်းချမ်းရေးညှိနှိုင်းဆွေးနွေးရန် ကြိုးပမ်းမှု များအပါအဝင် အရေးပါသည့် သံတမန်ရေးရာတာဝန်များကို ထမ်းဆောင် လျက်ရှိသည်။

အမေရိကန်နှင့် ရုရှား နှစ်ဘက်ကိုယ်စားလှယ်များသည် စစ်ရေး ရပ်စဲရေး ၏ အလားအလာကို ကောင်းမွန်သော ခြေလှမ်းများဖြင့် အစပြုနိုင်ရေး ကြိုးပမ်းလျက်ရှိပြီး အမေရိကန်နိုင်ငံခြားရေးဝန်ကြီး Marco Rubio က စိန်ခေါ်မှုများ ရှိနေသေးသော်လည်း ဆွေးနွေးပွဲများသည် ပဋိပက္ခကို အဆုံးသတ်ရန် လှေကားထစ်တစ်ခုဖြစ်သည်ဟု မှတ်ချက်ပြုခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ရုရှားဒုတိယနိုင်ငံခြားရေး ဝန်ကြီး အန်ဒရေရူဒင်ကို ဦးဆောင်သည့် ရုရှားကိုယ်စားလှယ်အဖွဲ့သည် မြောက်ကိုရီးယားနိုင်ငံသို့ ရောက်ရှိလာခဲ့ကြောင်း KCNA  သတင်းအေဂျင်စီက မတ်လ ၁၅ ရက်တွင်ဖော်ပြသည်။

ရူဒင်ကိုသည် ရုရှားအစိုးရက ယူကရိန်းနိုင်ငံအတွင်း  အထူးစစ်ဆင်ရေးစတင် ဆင်နွှဲပြီးနောက်ပိုင်းမှစ၍ မြောက်ကိုရီးယားနိုင်ငံနှင့် ဆက်ဆံရေးဖော်ဆောင်ရာတွင် ပါဝင်ခဲ့သူဖြစ်ပြီး ၎င်း၏ယခုခရီးစဉ်သည် ယူကရိန်းတွင် အပစ်အခတ်ရပ်စဲရေး သဘောတူညီချက်ချမှတ်ရန် အမေရိကန်က အဆိုပြုပြီးနောက် ထွက်ပေါ်လာခြင်းဖြစ်ကြောင်း သိရသည်။

ထို့ပြင် ရူဒင်ကိုသည် ယူကရိန်းလက်နက်ကိုင် ပဋိပက္ခစတင်ဖြစ်ပွားသည့် အစောပိုင်းကာလတွင်လည်း ငြိမ်းချမ်းရေး ဆွေးနွေးသည့် ရုရှားကိုယ်စားလှယ် အဖွဲ့ဝင်တစ်ဦးအဖြစ် တာဝန်ယူခဲ့သူဖြစ်သည်။ သို့သော် ၎င်း၏  မြောက်ကိုရီးယားခရီးစဉ်နှင့် စပ်လျဉ်း၍  အသေးစိတ်ဖော်ပြထားခြင်း မရှိပေ။

မြောက်ကိုရီးယားနိုင်ငံသည် လက်ရှိတွင် ရုရှားနိုင်ငံနှင့် ကာကွယ်ရေးအရ ပူးပေါင်း ဆောင်ရွက်လျက်ရှိပြီး နှစ်နိုင်ငံဆက်ဆံရေးမှာ တိုးတက် ကောင်းမွန်လျက်ရှိသည်။             

Source: https://myawady.net.mm/

ရုရှားသမ္မတ ဗလာဒီမာ ပူတင်နှင့် အမေရိကန် သမ္မတ ဒေါ်နယ်ထရမ့် တို့သည် လာမည့်အပတ်တွင် တွေ့ဆုံဆွေးနွေးနိုင်ဖွယ်ရှိကြောင်း အမေရိကန် သမ္မတ အထူးကိုယ်စားလှယ် စတီဗင်ဝှစ်ကော့က CNN ကို ပြောကြားလိုက် ပါသည်။

ခေါင်းဆောင်နှစ်ဦး တွေ့ဆုံမှုက အမှန်တကယ်ကောင်းမွန်ပြီး အနာဂတ်အတွက် အကျိုးအမြတ် ရရှိနိုင်မည် ဟု ထင်မြင်ကြောင်း အမေရိကန် အနေဖြင့်လည်း ယူကရိန်းတာဝန်ရှိသူများကို လိုအပ်သည့် အကြံပြုချက်များ ပံ့ပိုးပေးလျက်ရှိကြောင်း ၎င်းက ပြောကြားထားပါသည်။

အထူးကိုယ်စားလှယ် စတီဗင်ဝှစ်ကော့သည် ရုရှားသမ္မတ ပူတင်နှင့် ပြီးခဲ့သည့် မတ်လ ၁၃ ရက် (ကြာသပတေးနေ့) ညနှောင်းပိုင်းတွင် ၃ နာရီမှ ၄ နာရီ အထိ တွေ့ဆုံဆွေးနွေးခဲ့ကြကြောင်း သိရှိရပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ဗလာဒီမာဇီလန်စကီးက ဆော်ဒီအာရေဗျတွင် လွန်ခဲ့သည့် သီတင်းပတ်အတွင်းက အမေရိကန်နှင့် ပြုလုပ်ခဲ့သည့်ဆွေးနွေးပွဲများ၌ ကိယက်ဗ်၏ သံတမန်ရေးရာ ကျွမ်းကျင်မှုများကို ၎င်းအားထောက်ခံသူ အနောက် ဥရောပနိုင်ငံများက လှိုက်လှဲစွာချီးကျူးဂုဏ်ပြုခဲ့ကြကြောင်း ပြောကြား ခဲ့သည်။ ၎င်းက ကိယက်ဗ်၏ သံတမန်ရေးရာအောင်ပွဲသည် ရုရှားကို ခက်ခဲသောအခြေအနေတစ်ရပ်သို့ ရောက်ရှိစေပြီး ရုရှားအနေဖြင့် ထို အခြေအနေမှလွတ်မြောက်ရန်ခက်ခဲနိုင်ကြောင်း ပြောကြားခဲ့သည်။

မတ်လ ၁၃ ရက်နေ့က ဂျီဒါမြို့တွင် ကျင်းပခဲ့သည့် အစည်းအဝေးတစ်ခုတွင် ယူကရိန်းကိုယ်စားလှယ်အဖွဲ့သည် အမေရိကန်မှ အဆိုပြုထားသည့် ၃၀ ရက်ကြာ စစ်ရပ်စဲရေးကို သဘောတူညီခဲ့သည်။

အစည်းအဝေးမစတင်မီ ရက်ပိုင်းအတွင်း ယူကရိန်းတို့ ကျူးကျော် သိမ်းပိုက် ထားသော Kursk ဒေသတွင် ရုရှားက တန်ပြန်ထိုးစစ် ပြင်းထန်စွာ ဆင်နွှဲ ခဲ့ကာ ၎င်း၏နယ်မြေ စတုရန်းကီလိုမီတာရာနှင့်ချီကာ ပြန်လည် သိမ်းပိုက် နိုင်ခဲ့ပြီး ယူကရိန်းတပ်များ ယခင်က သိမ်းပိုက်ထားခဲ့သည့် Sudzha မြို့ ကို ပြန်လည်သိမ်းပိုက်နိုင်ခဲ့သည်။

ရုရှားစစ်ဦးစီးချုပ် General Valery Gerasimov က ထိုဒေသတွင်ရှိသော ယူကရိန်းတပ်များသည် ရုရှားတပ်ဖွဲ့များ၏ ဝိုင်းပတ်ပိတ်ဆို့မှုကို ခံနေ ရကြောင်းပြောကြားခဲ့သည်။ အမေရိကန်သမ္မတ ဒေါ်နယ်ထရမ့်က ထိုဒေသ တွင်ပိတ်မိနေသည့် ထောင်ချီသောယူကရိန်းစစ်သားများကို မသတ်ဖြတ် ရန် မော်စကိုကို တောင်းဆိုခဲ့ပြီး ရုရှားသမ္မတ ဗလာဒီမာပူတင်က ပိတ်ဆို့ ခံထားရသည့် ယူကရိန်းစစ်သားများ လက်နက်ချပါက ကျင့်ထုံးများနှင့် အညီ ဆောင်ရွက်မည်ဟု အာမခံခဲ့သည်။

ယူကရိန်းစစ်ဦးစီးချုပ်နှင့် ဇီလန်စကီးတို့က သတင်းထောက်များနှင့် တွေ့ဆုံစဉ် ယူကရိန်းတပ်များ Kursk ဒေသတွင် ဝိုင်းပတ် ပိတ်ဆို့ ခံထားရသည်ဟူသော အချက်ကိုငြင်းဆိုခဲ့သည်။

ယူကရိန်းခေါင်းဆောင်က အမေရိကန်မှ အဆိုပြုထားသည့် စစ်ရပ်စဲရေး အစီစဉ်ကို မော်စကိုမှ “ကန့်သတ်ချက်မရှိ” သဘောတူညီရန် တောင်းဆို ခဲ့သည်။ ပူတင်က အမေရိကန်၏ စစ်ရပ်စဲရေးအဆိုပြုချက်ကို အကြမ်းဖျင်း အားဖြင့် လက်ခံနိုင်ကြောင်း၊ ထပ်မံဆွေးနွေးရမည့် အသေးစိတ်အချက်များ ကျန်ရှိနေသေးကြောင်းနှင့် Kursk ဒေသတွင်ရှိသော ယူကရိန်း တပ်များ ၏ ကံကြမ္မာအပါအဝင် စစ်ရပ်စဲရေးကို စောင့်ကြည့်ဖြေရှင်းရန် အစီအမံ များ လိုအပ်ကြောင်း ဆိုခဲ့သည်။

ပြင်သစ်နှင့် ဗြိတိန်တို့ကလည်း ရုရှားအား ကန့်သတ်ချက်မရှိသော ယာယီ အပစ်အခတ်ရပ်စဲရေးကို သဘောတူရန်တောင်းဆိုခဲ့ပြီး ရုရှားသမ္မတ ဟောင်း Dmitry Medvedev က ဗြိတိန်သည် ထိုကဲ့သို့သော အကြံဉာဏ် များကို မည်သည့်နေရာမှ ရရှိခဲ့သည်ကို ပြန်လည်စဉ်းစားသင့်ကြောင်း ပြင်းပြင်းထန်ထန် ပြန်လည်ဝေဖန်ခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂