အထောက်အထားမဲ့ ရွှေ့ပြောင်းနေထိုင်သူများ ဖမ်းဆီးခံရမှုများကြောင့် လော့စ်အိန်ဂျလိစ်တွင် စတင်ဖြစ်ပွားခဲ့သော အဓိကရုဏ်းများကို ထိန်းသိမ်းရန် အမေရိကန်ကာကွယ်ရေးဌာန (ပင်တဂွန်) မှ မရိန်း တပ်ဖွဲ့ ဝင်များကို စေလွှတ်မည်ဖြစ်သည်။

US Northern Command တနင်္လာနေ့ (ဇွန် ၉) တွင် ပြောကြားချက်အရ 1st Marine Division မှ မရိန်းတပ်ဖွဲ့ဝင် ၇၀၀ ခန့်သည် လော့စ်အိန်ဂျလိစ် နှင့် ပတ်ဝန်းကျင်ရှိ ဖက်ဒရယ်ဝန်ထမ်းများနှင့် ဖက်ဒရယ် ပိုင်ဆိုင်မှုများကို ကာကွယ်ရန် ကူညီပံ့ပိုးပေးမည်ဖြစ်သည်။

Reuters ၏ သတင်းအရ မရိန်းတပ်ဖွဲ့များသည် National Guard တပ်ဖွဲ့ များကို အထောက်အပံ့ပေးမည်ဖြစ်ပြီး ဗုဒ္ဓဟူးနေ့ (ဇွန် ၁၁) တွင် National Guard တပ်သားဦးရေ ၂,၀၀၀ အထိ တိုးလာဖွယ်ရှိကြောင်း သိရှိရသည်။

ကာကွယ်ရေးဝန်ကြီး Pete Hegseth က X (Twitter) တွင် “Gavin Newsom မလုပ်ဆောင်လျှင်ပင် ဖက်ဒရယ်ဥပဒေစိုးမိုးရေးအရာရှိများကို ကာကွယ်ရန် မိမိတို့တွင်တာဝန်ရှိသည်” ဟု ရေးသားခဲ့သည်။ ပင်တဂွန်မှ တနင်္လာနေ့ညနေပိုင်းတွင် လူဝင်မှုကြီးကြပ်ရေးအရာရှိများနှင့် ရဲတပ်ဖွဲ့ များကို ကူညီရန် National Guard တပ်ဖွဲ့ဝင် ၂၀၀၀ ကို ထပ်မံ ခေါ်ယူမည်ဟု ကြေညာခဲ့သည်။

ကယ်လီဖိုးနီးယားပြည်နယ်အုပ်ချုပ်ရေးမှူး Gavin Newsom က သမ္မတ Donald Trump ၏ ဆန္ဒပြသူများကို ရင်ဆိုင်ရန် မရိန်းတပ်ဖွဲ့များ စေလွှတ်သည့် ဆုံးဖြတ်ချက်ကို “အမေရိကန်ဆန့်ကျင်သော အပြုအမူ” ဟု ပြင်းပြင်းထန်ထန် ဝေဖန်ခဲ့သည်။

Newsom က X တွင် “အာဏာရှင်သမ္မတ၏ စိတ်ကူးယဉ်ဆန်သော အိပ်မက်ကို အကောင်အထည်ဖော်ရန် အမေရိကန်မြေပေါ်တွင် မိမိ တိုင်းသူပြည်သားများကို ရင်ဆိုင်ရန် ၎င်းတို့ကို မစေလွှတ်သင့်” ဟု ရေးသားခဲ့သည်။ ၎င်းက Trump အား National Guard တပ်ဖွဲ့များကို ပြန်ခေါ်ရန် တိုက်တွန်းခဲ့ပြီး ၎င်းတို့ကို တရားမဝင်စေလွှတ်ခြင်းသည် အခြေအနေကို ပိုမိုဆိုးရွားစေကာ ကယ်လီဖိုးနီးယား၏ အခွင့်အရေး များကို ချိုးဖောက်သည်ဟု စွပ်စွဲခဲ့သည်။

ရွှေ့ပြောင်းနေထိုင်သူများအား စစ်ဆေးရေးအရာရှိများက “တရားမဝင် အလုပ်သမားစာရွက်စာတမ်းများ” အသုံးပြုမှုဖြင့် Home Depot ကားပါကင်နှင့် Ambiance Apparel အထည်စက်ရုံမှ လူ ၄၀ ကျော်ကို ဖမ်းဆီးပြီးနောက် သောကြာနေ့ (ဇွန် ၆) က ဆန္ဒပြမှုများ စတင်ခဲ့သည်။ Trump ၏ တင်းကျပ်သော ရွှေ့ပြောင်းနေထိုင်မှုမူဝါဒကို ရှုတ်ချသည့် ဆန္ဒပြမှုများသည် လုယက်မှုများနှင့် ရဲတပ်ဖွဲ့ဝင်များကို အကြမ်းဖက် တိုက်ခိုက်မှုများအထိ ပြင်းထန်လာခဲ့သည်။

ဆန္ဒပြသူများသည် မော်တော်ယာဉ်များကို မီးရှို့ကာ လုပ်ငန်းခွင်များ ထဲသို့ အင်အားအလုံးအရင်းဖြင့်ဝင်ရောက်ခဲ့ကြပြီး ရဲများက လူစုခွဲရန် ငရုတ်ကောင်းဘောလုံးများနှင့် ရာဘာကျည်များ အသုံးပြုခဲ့သည်။ သတင်းဌာနများ၏ ဖော်ပြချက်အရ ပြီးခဲ့သည့် သီတင်းပတ်ကုန်တွင် အနည်းဆုံး လူ ၅၆ ဦး ဖမ်းဆီးခံခဲ့ရကြောင်း သိရှိရပါသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အီရန်က အစ္စရေး၏ မြေအောက်နျူကလီးယားစက်ရုံများနှင့် ပတ်သက်သည့် အချက်အလက်များ ရရှိထားပြီး တယ်လ်အဗစ်မှ တီဟီရန်ကို တိုက်ခိုက် ပါက အဆိုပါစက်ရုံများကို ပြန်လည်တုံ့ပြန်တိုက်ခိုက်မည်ဟု ထုတ်ဖော် ပြောဆိုလိုက်သည်။

အီရန်၏ အမျိုးသားလုံခြုံရေးကောင်စီက ဇွန်လ ၉ ရက်နေ့တွင် နိုင်ငံ၏ ထောက်လှမ်းရေးအဖွဲ့အစည်းများသည် အစ္စရေး၏ နျူကလီးယား စက်ရုံ များနှင့်ပတ်သက်သည့် “အထိခိုက်လွယ်ပြီး နိုင်ငံရေးအရ အရေးပါသော စာရွက်စာတမ်းနှင့် အချက်အလက်များကို စုဆောင်းရရှိထားပြီ ဖြစ်ကြောင်း” ကြေညာခဲ့သည်။

“ထိုအချက်အလက်များက အီရန်လက်နက်ကိုင်တပ်ဖွဲ့များအား တယ်လ် အဗစ်မှ တီဟီရန်၏ နျူကလီးယားစက်ရုံများကို တိုက်ခိုက်ပါက အစ္စရေး ၏ လျှို့ဝှက်နျူကလီးယားစက်ရုံများကို ချက်ချင်းပစ်မှတ်ထား တိုက်ခိုက် နိုင်စေမည်” ဟု အဆိုပါကောင်စီက ဆိုသည်။

ဇွန်လ ၇ ရက်နေ့က အီရန်မီဒီယာများက အစ္စရေးနှင့်ပတ်သက်သည့် စာရွက်စာတမ်းများစွာကို ရရှိထားကြောင်း ဖော်ပြခဲ့ပြီး ၎င်းတွင် ယခင်က ဖော်မပြခဲ့သော နျူကလီးယားစက်ရုံများနှင့် တယ်လ်အဗစ်၏ ကာကွယ်ရေး အစီအစဉ်များ ပါဝင်သည်။ အီရန်ထောက်လှမ်းရေးဝန်ကြီး အဲစ်မေးလ် ခါတစ်ဘ်က အဆိုပါစာရွက်စာတမ်းများတွင် အမေရိကန်အပါအဝင် အနောက်နိုင်ငံများနှင့်သက်ဆိုင်သည့် အချက်အလက်များပါဝင်ကြောင်း ပြောကြားခဲ့သည်။ ၎င်းက ဤသည်ကို “အဖိုးမဖြတ်နိုင်သောအရာ” အဖြစ် ဖော်ပြခဲ့ပြီး တီဟီရန်မှ မကြာမီ စာရွက်စာတမ်းများ၏ အကြောင်း အရာများကို ထုတ်ပြန်မည်ဟု ဆိုသည်။

အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) ၏ အမှုဆောင် ဒါရိုက်တာ ရာဖေးလ် ဂရိုစီက အီရန်မှ စုဆောင်းထားသည်ဟုဆိုသော ထောက်လှမ်းရေးအချက်အလက်များနှင့် ပတ်သက်၍ IAEA သို့ တရားဝင်အကြောင်းကြားချက်မရှိသေးကြောင်း ပြောကြားခဲ့သည်။ ၎င်းက အီရန်သည် IAEA ၏ ကြီးကြပ်မှုအောက်ရှိ အစ္စရေး၏ ရီအက်တာနှင့် သုတေသန ဌာနဖြစ်သော ဆိုရက်ခ် (Soreq) ကို ရည်ညွှန်းနေဟန် တူကြောင်း ဖော်ပြခဲ့သည်။

အစ္စရေးအရာရှိများက အဆိုပါသတင်းများနှင့်ပတ်သက်၍ မှတ်ချက်မပြုသေးပေ။ အစ္စရေးနိုင်ငံသည် ၎င်း၏လက်နက်များနှင့် ပတ်သက်သည့် အချက်အလက်များကို တရားဝင်ဖော်ပြလေ့မရှိဘဲ လက်နက်စမ်းသပ်မှု များကိုလည်း အများမသိစေရန် လုပ်ဆောင်လေ့ရှိပါသည်။

ဂါဇာရှိ ဟားမက်အဖွဲ့ကို ထောက်ခံသည့် အီရန်နိုင်ငံအား ၎င်း၏ အဓိက ရန်သူအဖြစ် သတ်မှတ်ထားသော အစ္စရေးသည် အီရန်၏ နျူကလီးယား စက်ရုံများကို တိုက်ခိုက်ရန် ခြိမ်းခြောက်မှုများ အကြိမ်ကြိမ် ပြုလုပ် ခဲ့သည်။ တယ်လ်အဗစ်က တီဟီရန်သည် အဏုမြူ လက်နက် ထုတ်လုပ်ရန် ရည်ရွယ်နေသည်ဟု ယုံကြည်နေစဉ်၊ အီရန်ကမူ ၎င်း၏ နျူကလီးယား အစီအစဉ်သည် ငြိမ်းချမ်းရေးရည်ရွယ်ချက်များအတွက်သာ ဖြစ်ကြောင်း အခိုင်အမာ ဆိုထားသည်။

အမေရိကန်နှင့် အီရန်တို့ ဧပြီလတွင် နျူကလီးယားဆွေးနွေးပွဲများ ပြန်လည်စတင်ချိန်တွင် အစ္စရေး၏ သတိပေးချက်များ ပိုမိုမြင့်တက် လာခဲ့သည်။ အမေရိကန်သည် ၂၀၁၈ ခုနှစ်က ဒေါ်နယ်ထရမ့်၏ သမ္မတ သက်တမ်း ပထမအကြိမ်တွင် အီရန်နျူကလီးယားသဘောတူညီချက်မှ နုတ်ထွက်ခဲ့သည်။ အီရန်သည် ယင်းနောက်တစ်နှစ်အထိ သဘော တူညီချက်ကို လိုက်နာခဲ့ပြီး နောက်ပိုင်းတွင် ၎င်း၏ ကတိကဝတ်များကို တဖြည်းဖြည်း လျှော့ချခဲ့သည်။

ဝါရှင်တန်နှင့် တီဟီရန်တို့သည် မည်သည့်အကျိုးရလဒ်မှ မရှိဘဲ ဆွေးနွေးပွဲ ငါးကြိမ် ပြုလုပ်ခဲ့ကြပြီး နောက်တစ်ကြိမ်ဆွေးနွေးပွဲအတွက် ရက်စွဲကို နှစ်ဖက်လုံးက သဘောတူညီမှု မရရှိသေးပေ။ အမေရိကန် အရာရှိတစ်ဦးက ဆဋ္ဌမအကြိမ်မြောက် ဆွေးနွေးပွဲကို ဇွန်လ ၁၃ ရက် သို့မဟုတ် ၁၅ ရက်နေ့တွင် အိုမန် သို့မဟုတ် နော်ဝေနိုင်ငံ၌ ပြုလုပ် နိုင်ကြောင်း ပြောကြားခဲ့သည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနှင့် ယူကရိန်းတို့သည် အသက် ၂၅ နှစ်အောက် စစ်သုံ့ပန်းများကို နောက်ထပ် လဲလှယ်ခဲ့ကြောင်း ရုရှားကာကွယ်ရေးဝန်ကြီးဌာနက တနင်္လာနေ့ (ဇွန် ၉) တွင် ကြေညာခဲ့သည်။

တရားဝင် Telegram Channel တွင် ထုတ်ပြန်သည့် ဝန်ကြီးဌာန၏ ထုတ်ပြန်ချက်အရ ပထမအသုတ် စစ်သုံ့ပန်းများကို ကိယက်ဗ် ထိန်းချုပ် ထားသော နယ်မြေများမှ ပြန်လည်ရရှိခဲ့ကြောင်း ဖော်ပြထားသည်။

“အပြန်အလှန်အနေဖြင့် ယူကရိန်းတပ်မတော်၏ တန်းတူ အရေအတွက်ရှိ စစ်သုံ့ပန်းများကို လွှဲပြောင်းပေးခဲ့သည်” ဟု ဝန်ကြီးဌာနက ဆိုသည်။

ရုရှားစစ်သည်များအား လက်ရှိတွင် ဘယ်လာရုဇ်နိုင်ငံ၌ လိုအပ်သော စိတ်ပိုင်းဆိုင်ရာနှင့် ကျန်းမာရေး အကူအညီများပေးနေပြီး မကြာမီ ၎င်းတို့အား ကုသရန်နှင့် ပြန်လည်ထူထောင်ရန်အတွက် နိုင်ငံသို့ ပြန်ပို့မည် ဖြစ်ကြောင်း သိရသည်။

လွန်ခဲ့သည့်သီတင်းပတ်က အစ္စတန်ဘူလ်မြို့တွင် ပြုလုပ်ခဲ့သော တိုက်ရိုက် ညှိနှိုင်းမှုများအတွင်း မော်စကိုနှင့် ကိယက်ဗ်တို့သည် ပြင်းထန်စွာ ဒဏ်ရာ ရထားသူများ၊ နာမကျန်းဖြစ်နေသူများ နှင့် အသက် ၂၅ နှစ်အောက် စစ်သုံ့ပန်းများအပါအဝင် အချို့သော စစ်သုံ့ပန်းများကို လဲလှယ်ရန် သဘောတူညီခဲ့သည်။

ထို့အပြင် ရုရှားဘက်မှ လူသားချင်းစာနာထောက်ထားမှုအရ ယူကရိန်း စစ်သား ၆,၀၀၀ ကျော်၏ အလောင်းများကို ပြန်လည်ပေးအပ်မည်ဟု ကြေညာခဲ့သည်။ စနေနေ့ (ဇွန် ၇) တွင် မော်စကိုဘက်မှ ယူကရိန်း ဘက်သို့ အလောင်း ၁,၂၁၂ ခုကို လွှဲပြောင်းရန် ကြိုးစားခဲ့သော်လည်း ကိယက်ဗ်ကိုယ်စားလှယ်များ လဲလှယ်ရာနေရာသို့ မရောက်ရှိခဲ့ပေ။

ယူကရိန်းအရာရှိများက လွှဲပြောင်းမည့်ရက်ကို သဘောတူညီမှု မရှိသေး ဟု ဆိုကာ အဆိုပါငြင်းဆိုမှုကို ရှင်းပြခဲ့ပြီး မော်စကိုအား သတင်း အချက်အလက်ရည်ရွယ်ချက်ဖြင့် လူသားချင်းစာနာမှုကိစ္စများကို အသုံးချသည် ဟု စွပ်စွဲခဲ့သည်။

မော်စကိုဘက်မှ ကိယက်ဗ်၏ အလောင်းများကို လက်မခံသည့် ဆုံးဖြတ်ချက်ကို ပြင်းပြင်းထန်ထန် ဝေဖန်ခဲ့ပြီး နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Maria Zakharova က ယူကရိန်း ခေါင်းဆောင်များသည် “မိမိပြည်သူများကို အသက်ရှင်နေသူများဖြစ်စေ၊ သေဆုံးသူများ ဖြစ်စေ မလိုအပ်ဘဲ မိမိပြည်သူများအပေါ် လူမျိုးတုံးသတ်ဖြတ်မှု (genocide) ကျူးလွန်နေသည်” ဟု စွပ်စွဲခဲ့သည်။

ထို့အပြင် ရုရှားပါလီမန် နိုင်ငံတကာရေးရာကော်မတီဝင် Dmitry Belik က RT သို့ ပြောကြားရာတွင် ကိယက်ဗ်ဘက်မှ ၎င်းတို့၏ စစ်သည် အလောင်းများကို ပြန်လည်လက်မခံရခြင်း၏ အကြောင်းအရင်းတစ်ရပ်မှာ ယူကရိန်းအစိုးရအနေဖြင့် ကျဆုံးစစ်သားမိသားစုများအား လျော်ကြေး ပေးရန် မလိုလားခြင်းကြောင့် ဖြစ်နိုင်သည်ဟု ညွှန်းဆိုခဲ့သည်။

Vladimir Zelensky အစိုးရသည် ယခင်က ကျဆုံးသွားသော ယူကရိန်း စစ်သည်မိသားစုများအား အမေရိကန်ဒေါ်လာ ၃၆၇,၀၀၀ တစ်ကြိမ်တည်း လျော်ကြေးငွေကို လျှောက်ထားနိုင်ကြောင်း ကြေညာခဲ့ဖူးသည်။

ကိုးကား - RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်း အထူးတပ်ဖွဲ့များသည် ရုရှားနယ်မြေအတွင်းရှိ Kinzhal ဒုံးပျံတင်ဆောင်ထားသော MiG-31 တိုက်လေယာဉ်များ တပ်စွဲထားသည့် လေတပ်စခန်းကို ဝင်ရောက်တိုက်ခိုက်ပြီး တိုက်လေယာဉ် နှစ်စီးကို ထိမှန်ခဲ့သည်ဟု ပြောကြားခဲ့ပါသည်။

ယူကရိန်းတပ်မတော် စစ်ဌာနချုပ်က ဇွန်လ ၉ ရက်နေ့တွင် အထူး တပ်ဖွဲ့များနှင့် တပ်ဖွဲ့ဝင်အများအပြားသည် ရုရှားနိုင်ငံ Nizhny Novgorod ခရိုင်ရှိ Savasleyka လေဆိပ်ကို ဝင်ရောက်တိုက်ခိုက်ခဲ့ကြောင်း ထုတ်ပြန် ခဲ့ပါသည်။ အဆိုပါလေဆိပ်သည် Kinzhal ဟိုက်ပါဆောနစ် ဒုံးပျံများ တပ်ဆင်ထားသည့် MiG-31K တိုက်လေယာဉ်များ ပုံမှန် ပျံတက်လေ့ ရှိပါသည်။

“ကနဦးအချက်အလက်များအရ ရန်သူလေယာဉ် နှစ်စီးကို ထိမှန်ခဲ့ပြီး MiG-31 တိုက်လေယာဉ်နှင့် Su-30 (သို့) Su-34 တို့ဖြစ်နိုင်ပြီး အချက် အလက်များကို အတည်ပြုနေဆဲဖြစ်သည်” ဟု ယူကရိန်းတပ်မတော်က ပြောကြားခဲ့ပါသည်။ ယူကရိန်းဘက်က တိုက်ခိုက်မှုနည်းလမ်းနှင့် ပတ်သက်၍ ရှင်းလင်းချက်မပေးခဲ့ဘဲ သက်သေအထောက်အထားလည်း မဖော်ပြခဲ့ပေ။

Nizhny Novgorod ခရိုင်အုပ်ချုပ်ရေးမှူး Gleb Nikitin က ပျက်စီး သွားသည့် ဒရုန်းအပိုင်းအစအချို့ လူနေရပ်ကွက်အတွင်း ကျရောက်ခဲ့သော်လည်း လူသေဆုံးမှုမရှိကြောင်း ပြောကြားခဲ့ပါသည်။ ရုရှားတိုက် လေယာဉ်မှူးများ၏ လူမှုကွန်ရက်စာမျက်နှာ Fighter Bomber တွင် ယူကရိန်းတပ်ဖွဲ့များသည် Savasleyka လေဆိပ်ကို အသေခံဒရုန်း များဖြင့် တိုက်ခိုက်ခဲ့သော်လည်း “လေယာဉ်ပျက်စီးမှု (သို့) ထိခိုက်မှုမရှိ” ဟု ဆိုပါသည်။

ထိုနေ့တွင်ပင် ယူကရိန်းတပ်မတော်က ရုရှားနိုင်ငံ Chuvashia သမ္မတ နိုင်ငံ Cheboksary ဒေသရှိ ရုရှား၏ UAV နှင့် ဒုံးပျံများအတွက် လမ်းညွှန်စနစ်ပစ္စည်းများ ထုတ်လုပ်သည့် စက်ရုံတစ်ခုကို အနည်းဆုံး အသေခံ ဒရုန်း (၂) စီးဖြင့် တိုက်ခိုက်ခဲ့ပြီး မီးလောင်မှုဖြစ်ပွားကာ စက်ရုံ လည်ပတ်မှု ရပ်ဆိုင်းသွားရကြောင်း ကြေညာခဲ့သည်။

ရုရှားကာကွယ်ရေးဝန်ကြီးဌာနက ဇွန် ၉ ရက်နေ့တွင် ယူကရိန်း၏ အရွယ်အစားကြီးမားသော UAV (၄၉) စီးကို ပစ်ချဖျက်ဆီးနိုင်ခဲ့ကြောင်း ထုတ်ပြန်ခဲ့သည်။ ၎င်းတို့အနက် (၂) စီးကို Chuvashia သမ္မတနိုင်ငံတွင်၊ (၁၃) စီးကို Nizhny Novgorod ဒေသတွင် ပစ်ချခဲ့ပြီး ကျန်ဒရုန်းများကို Kursk၊ Voronezh၊ Oryol၊ Bryansk နှင့် Belgorod ဒေသများအပေါ် ပျံသန်းနေစဉ် ပစ်ချဖျက်ဆီးခဲ့ခြင်းဖြစ်သည်။

Chuvashia သမ္မတနိုင်ငံ၏ ခေါင်းဆောင် Oleg Nikolaev က Cheboksary ရှိ VNIIR စက်ရုံတွင် UAV (၂) စီး ပျက်ကျခဲ့ပြီး ဝန်ထမ်း များ၏ ဘေးကင်းရေးအတွက် စက်ရုံလည်ပတ်မှုကို ယာယီ ရပ်ဆိုင်းခဲ့ ရကြောင်း အတည်ပြုခဲ့သည်။ ဒရုန်းအကြွင်းအကျန်များသည် Cheboksary နှင့် Krasnoarmeysky ခရိုင်များရှိ လူသူမနီးသော နေရာများတွင် ကျရောက်ခဲ့ပြီး အရပ်သားများအတွက် အန္တရာယ်မရှိကြောင်း ၎င်းက ဖြည့်စွက်ပြောကြားခဲ့သည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနိုင်ငံခြားရေးဝန်ကြီး Sergey Lavrov က ဗြိတိန်သည် ရုရှား နိုင်ငံအတွင်း အကြမ်းဖက်တိုက်ခိုက်မှုများ ဆောင်ရွက်ရာတွင် ယူကရိန်းကို ၁၀၀% ကူညီပေးနေကြောင်း သံသယဖြစ်စရာ မရှိဟု ပြောကြားခဲ့သည်။

ယခုလအစပိုင်းမှစ၍ ရုရှားရထားလမ်းများတွင် ဖျက်ဆီးမှုအချို့ ဖြစ်ပွားခဲ့ပြီး အဆိုးရွားဆုံးဖြစ်ရပ်မှာ ဇွန်လ ၁ ရက်နေ့တွင် Bryansk ဒေသ၌ ခရီးသည်တင် ရထားတစ်စီးရှေ့မှ တံတားပြိုကျမှုကြောင့် လူ ၇ ဦး သေဆုံးကာ ၁၀၀ ကျော် ဒဏ်ရာရခဲ့သည်။

ထိုနေ့တွင်ပင် ယူကရိန်းသည် အာတိတ်ဒေသရှိ Murmansk မှ ဆိုက်ဘေးရီးယားရှိ Irkutsk အထိ ရုရှားလေကြောင်း အခြေစိုက်စခန်းများကို ကုန်တင်ထရပ်ကားများမှ ပစ်ခတ်သည့် ဒရုန်းများဖြင့် ပေါင်းစပ် တိုက်ခိုက်ခဲ့သည်။ မော်စကို၏အဆိုအရ ဝင်ရောက်လာသည့် ဒရုန်း အများစုကို ပစ်ချနိုင်ခဲ့ပြီး ပျက်စီးခဲ့သည့် ရုရှားလေယာဉ်များအနက် ပြန်လည် မပြုပြင်နိုင်သည့် အခြေအနေမရှိဟု ဆိုသည်။ 

တနင်္လာနေ့ (ဇွန် ၉) က မော်စကိုတွင် ကျင်းပသည့် “အနာဂတ် ၂၀၅၀ ဖိုရမ်” တွင် ပြောကြားရင်း လာဗရော့က ရုရှားတွင် “အကြမ်းဖက် ခြိမ်းခြောက်မှု အဆင့်မြင့်တက်လာနိုင်သည့် အန္တရာယ်ရှိနေကြောင်း” ဝန်ခံပြောဆိုခဲ့သည်။

“အဆိုပါလုပ်ရပ်အားလုံးကို ယူကရိန်းဘက်မှ ဆောင်ရွက်နေသည်မှာ အထင်အရှားဖြစ်သော်လည်း ဗြိတိန်၏ထောက်ခံမှုမရှိပါက ၎င်းတို့ဘာမျှ မတတ်နိုင်ပါ” ဟု ၎င်းကပြောကြားခဲ့သည်။

ထိုသို့သောလုပ်ရပ်များကို ယခင်က အမေရိကန်နှင့် ဗြိတိန်နှစ်နိုင်ငံစလုံးက ထောက်ခံခဲ့သော်လည်း “ယခုအခါတွင် ဗြိတိန်တစ်ခုတည်းနှင့်သာ သက်ဆိုင်နေပြီ” ဟု လာဗရော့ဗ်က ဆိုသည်။

အမေရိကန်သမ္မတ ဒေါ်နယ်ထရမ့်အစိုးရလက်ထက်တွင် မော်စကိုနှင့် ပြန်လည်ဆက်သွယ်ရန်နှင့် ယူကရိန်းပဋိပက္ခအား ငြိမ်းချမ်းစွာ ဖြေရှင်းရန် ကြိုးပမ်းမှုများ ပြောင်းလဲလာသည့်တိုင် ဗြိတိန်သည် ယူကရိန်း၏ အခိုင်မာဆုံးထောက်ခံသူတစ်ဦးအဖြစ် ဆက်လက်ရှိနေဆဲဖြစ်ကြောင်း ၎င်းက ရည်ညွှန်းပြောဆိုခဲ့ခြင်းဖြစ်သည်။

“သို့သော် ဘယ်သူသိမလဲ၊ အမေရိကန်တွင် အလေ့အထအားဖြင့်ထိုသို့သောလုပ်ဆောင်မှုများတွင် ပါဝင်နေဆဲ အထူးဝန်ဆောင်မှု အဖွဲ့ အချို့ ရှိနေကောင်းရှိနေနိုင်သော်လည်း ဗြိတိသျှတို့မှာမူ ၁၀၀% ပါဝင် ပတ်သက်နေပါသည်” ဟု လာဗရော့ဗ်က အလေးအနက်ထား ပြောကြားခဲ့သည်။

လွန်ခဲ့သည့်သီတင်းပတ်အတွင်း မော်စကို၏ လန်ဒန်သံအမတ်ကြီး Andrey Kelin ကလည်း ရုရှားလေကြောင်းအခြေစိုက်စခန်းများကို ယူကရိန်း ဒရုန်းတိုက်ခိုက်မှုများတွင် ဗြိတိန်ပါဝင်ပတ်သက်နေကြောင်း အလားတူ စွပ်စွဲခဲ့ဖူးသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဩစတြီးယားအာဏာပိုင်များက Graz မြို့ရှိ အထက်တန်းကျောင်းတွင် ပစ်ခတ်မှုဖြစ်ပွားခဲ့ပြီး ပစ်ခတ်သူအပါအဝင် လူ ၁၀ ဦး သေဆုံးကြောင်း ထုတ်ပြန်ခဲ့သည်။

ဒေသခံရဲတပ်ဖွဲ့က ဇွန်လ ၁၀ရက်နေ့ တွင် ဩစတြီးယားတောင်ပိုင်း Graz မြို့ရှိ Dreierschützengasse အထက်တန်းကျောင်းအတွင်း သေနတ် ပစ်ခတ်မှုဖြစ်ပွားခြင်းကြောင့် ဝင်ရောက်စစ်ဆေးမှုပြုလုပ်ခဲ့ကြောင်း ကြေညာခဲ့သည်။ ဩစတြီးယားသတင်းဌာန APA က ရဲဌာန သတင်း အရင်းအမြစ်ကို ကိုးကား၍ “လက်ရှိအခြေအနေမှာ ရှင်းလင်းမှု မရှိသေးပါ” ဟု ဖော်ပြခဲ့သည်။

Graz မြို့တော်ဝန် Elke Kahr က လူကြီး ၁ ဦးနှင့် ကျောင်းသားများ အပါအဝင် ၉ ဦး သေဆုံးခဲ့ကြောင်း ပြောကြားခဲ့သည်။ သေနတ်ကိုင်ဆောင်သူ သေဆုံးသွားပြီဖြစ်သော်လည်း ဩစတြီးယား အာဏာပိုင် များက ၎င်း၏လုပ်ဆောင်ခဲ့သည့် ရည်ရွယ်ချက်ကို ရှင်းလင်းစွာ ထုတ်ပြန်ခြင်း မရှိသေးပေ။

ဩစတြီးယားသတင်းစာ Salzburger Nachrichten ၏ ဖော်ပြချက်အရ ပစ်ခတ်သူသည် အသက် ၂၂ နှစ်အရွယ် ကျောင်းသားဟောင်း တစ်ဦး ဖြစ်ပြီး သေနတ်တစ်လက်နှင့် အမဲလိုက်ရိုင်ဖယ်တစ်လက် ကိုင်ဆောင်ထားကြောင်း သိရှိရသည်။ သံသယရှိသူ၏ ခန္ဓာကိုယ်ကို ကျောင်းအတွင်းရှိ ရေချိုးခန်းထဲတွင် တွေ့ရှိခဲ့သည်။

ဒေသခံရဲတပ်ဖွဲ့ ပြောရေးဆိုခွင့်ရှိသူက ပစ်ခတ်သူတစ်ဦးတည်းသာ ဖြစ်သည် ဟု ယုံကြည်ထားကြောင်း ပြောကြားခဲ့ပြီး ယခုအခါ ဒေသတွင်း လုံခြုံရေး အာမခံချက်ရရှိပြီဖြစ်ကြောင်းနှင့် ကျောင်းကို ရှင်းလင်းမှု ဆောင်ရွက်ပြီး ဖြစ်ကာ ဒဏ်ရာရရှိသူများအား ကုသမှုလုပ်ဆာင်ပေးနေကြောင်း ပြောကြားခဲ့သည်။ “ပြည်သူလူထုအတွက် နောက်ထပ်အန္တရာယ်မရှိတော့ပါ” ဟု ၎င်းက ဖြည့်စွက်ပြောကြားခဲ့သည်။

ဥရောပကော်မရှင် (EC) ဒုတိယဥက္ကဋ္ဌ Kaja Kallas က အဆိုပါ ပစ်ခတ်မှု အကြောင်းကြားသိရပြီးနောက် အလွန်တုန်လှုပ် ချောက်ခြား မိကြောင်း ပြောကြားခဲ့ပြီး “ကလေးအားလုံးသည် ကျောင်းတွင် လုံခြုံစွာရှိနေပြီး အကြမ်းဖက်မှုများနှင့် ကြောက်ရွံ့မှုမရှိဘဲ သင်ယူ နိုင်ရမည်” “အဆိုပါအဖြစ်ဆိုးအတွက် သေဆုံးသူများ၊ ၎င်းတို့၏ မိသားစု များနှင့် ဩစတြီးယားနိုင်ငံသားများနှင့်အတူ ထပ်တူဝမ်းနည်းရပါသည်” ဟု Ms. Kallas က ပြောကြားခဲ့သည်။ 

လူဦးရေ ၉.၂ သန်းနီးပါးရှိသော ဩစတြီးယားနိုင်ငံတွင် အများပြည်သူနေရာများ၌ တိုက်ခိုက်မှုများမှာ ရှားပါးသည်။ ဩစတြေးလျအခြေစိုက် Institute for Economics and Peace ၏ Global Peace Index အရ ဩစတြီးယားသည် ကမ္ဘာ့အန္တရာယ်အကင်းဆုံး နိုင်ငံ ၁၀ ခုအနက်မှ တစ်ခုဖြစ်သည်။

သို့သော် ဥရောပတွင် မကြာသေးမီနှစ်များအတွင်း ကျောင်းများနှင့် တက္ကသိုလ်များတွင် သေနတ်ပစ်ခတ်မှုနှင့် ဓားဖြင့်တိုက်ခိုက်မှုများဆက်တိုက်ဖြစ်ပွားခဲ့ပြီး ၎င်းတို့အနက်များစွာမှာ အကြမ်းဖက်လုပ်ရပ် များနှင့် မသက်ဆိုင်ကြောင်း သိရှိရသည်။

ဆွစ်ဇာလန်နိုင်ငံ၊ ဂျနီဗာမြို့ရှိ Institute of International and Development Studies ၏ လေ့လာမှုအရ ဩစတြီးယားသည်လက်နက်ကိုင်ဆောင်မှုအများဆုံး ဥရောပနိုင်ငံများအနက်မှ တစ်ခု ဖြစ်ကာ လူ ၁၀ ဦးလျှင် သေနတ် ၃ လက် ခန့်ရှိသည်ဟု ခန့်မှန်းရသည်။ ဩစတြီးယားသည် စက်သေနတ်များနှင့် pump-action ရိုင်ဖယ် သေနတ်များ ပိုင်ဆိုင်မှုကို တားမြစ်ထားပြီး သေနတ်များနှင့် semi-automatic လက်နက်များ ပိုင်ဆိုင်ရန် လိုင်စင်လိုအပ်သည်။ ရိုင်ဖယ်နှင့် သေနတ်များ ပိုင်ဆိုင်ရန် ဩစတြီးယားနိုင်ငံသားများသည် လိုင်စင်၊ အမဲလိုက်လိုင်စင် သို့မဟုတ် ရိုးရာ သေနတ်အသင်းဝင်အဖြစ် မှတ်ပုံတင် ထားရန် လိုအပ်သည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနှင့်ယူကရိန်းနိုင်ငံတို့သည် မကြာသေးမီက ရရှိခဲ့သည့် သဘောတူညီချက် ၏ တစ်စိတ်တစ်ပိုင်းအရ ဇွန်လ ၉ ရက် တွင် အသက် ၂၅ နှစ်အောက်ရှိ အကျဉ်းသားများကို  အပြန်အလှန် လဲလှယ်မှုလုပ်ကြောင်း သိရသည်။

ထိုလဲလှယ်မှုတွင် ယူကရိန်းဘက်က ထိန်းချုပ်ထားသော နယ်မြေများမှ ရုရှား စစ်သည် ပထမအသုတ်သည် ဘယ်လာရုစ်နိုင်ငံသို့ပြန်ရောက်လာပြီဖြစ်ပြီး အသက် ၂၅ နှစ်အောက်ရှိ ယူကရိန်း တပ်မတော်သားများကိုလည်း ပြန်လည်စေလွှတ်ပေးလိုက်ပြီ ဖြစ်ကြောင်း ရုရှားကာကွယ်ရေး ဝန်ကြီးဌာနက ထုတ်ပြန်ထားသည်။

ရုရှားနှင့်ယူကရိန်းတို့သည် ပြီးခဲ့သည့် သီတင်းပတ်တွင် အစ္စတန်ဘူမြို့၌ ဆောင်ရွက်သော မျက်နှာချင်းဆိုင် ဆွေးနွေးမှုတွင်  ဒဏ်ရာပြင်းထန်စွာ ရရှိထားသူများ၊ ကျန်းမာရေး မကောင်းသူများ၊ အသက်၂၅ နှစ်အောက် ရှိသူများကို  လဲလှယ်ရန် သဘောတူခဲ့ကြောင်း သိရသည်။

MWD Web Portal

အစ္စရေးရေတပ်က လူသားချင်းစာနာထောက်ထားမှုဆိုင်ရာ အကူအညီ များ သယ်ဆောင်လာသည့် ဂါဇာသို့ဦးတည်နေသော "Madleen" အရပ်ဘက်သင်္ဘောကို တားဆီးကာ သင်္ဘောသားများအား ဖမ်းဆီးလိုက် သည်။ တယ်လ်အဗစ်မှ အဆိုပါသင်္ဘောကို “Selfie yacht” ဟု သရော်၍ခေါ်ဝေါ်ခဲ့သည်။ ယင်းသင်္ဘောပေါ်တွင် ရာသီဥတု အရေး လှုပ်ရှားသူဂရီတာ သွန်းဘာ့ဂ် (Greta Thunberg) ၊ ပြင်သစ်လွှတ်တော်အမတ် ရီမာ ဟက်ဆန် (Rima Hassan) နှင့် အိုင်ယာလန်မင်းသား လီယမ် ကန်နင်ဂမ် (Liam Cunningham) တို့ အပါအဝင် အခြားသူများ ပါဝင်နေခဲ့သည်။

နိုင်ငံတကာရေပိုင်နက်တွင် တနင်္လာနေ့ (ဇွန် ၉) နံနက်စောစောက ဖမ်းဆီးခံခဲ့ရပြီး Freedom Flotilla Coalition (FFC) အဖွဲ့မှ ဆောင်ရွက် ခဲ့သည့် အဆိုပါသင်္ဘောကို အစ္စရေးနိုင်ငံ Ashdod ဆိပ်ကမ်းသို့ ဆွဲခေါ် သွားခဲ့သည်။ အစ္စရေးနိုင်ငံခြားရေးဝန်ကြီးဌာနက ဖမ်းဆီးမှု အတည် ပြုကာ ၎င်းအဖွဲ့ဝင်များအနေဖြင့် ၎င်းတို့၏ မိခင်နိုင်ငံများသို့ ပြန်ရန် မျှော်လင့်ထားကြောင်း ထုတ်ပြန်ကြေညာခဲ့သည်။

 “Selfie yacht” ပေါ်ရှိ ခရီးသည်အားလုံး ဘေးကင်းလုံခြုံစွာရှိနေပြီး ထိခိုက်ဒဏ်ရာရရှိမှုမရှိပါ။ ၎င်းတို့အား အစားအစာနှင့် ရေများ ထောက်ပံ့ ပေးထားပါသည်။ ဤဇာတ်လမ်း ပြီးဆုံးသွားပါပြီ ဟု အစ္စရေးနိုင်ငံခြားရေး ဝန်ကြီးဌာနက X တွင် ရေးသားဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျပန်နိုင်ငံတောင်ပိုင်း၊ အိုကီနာဝါခရိုင် ၊ ရိုမီတန်ကျေးရွာရှိ အမေရိကန်စစ်အခြေစိုက်စခန်းတွင် ဇွန်လ ၉ ရက် (တနင်္လာနေ့)က ပေါက်ကွဲမှုဖြစ်ပွားခဲ့ရာ ဂျပန်ကိုယ်ပိုင်ကာကွယ်ရေးတပ်ဖွဲ့ဝင် ၄ ဦး ဒဏ်ရာရရှိခဲ့ပါသည်။ 

အဆိုဖြစ်စဉ်သည် မ‌ပေါက်ကွဲသေးသည့်ဗုံးများ ယာယီထားရှိရာ သိုလှောင်ရုံ၌ ဖြစ်ပွားခဲ့ခြင်းဖြစ်ကြောင်း၊ အဆိုပါသိုလှောင်ရုံသည် ကဒဲနား ခဲယမ်းသိုလှောင်ရာ ဧရိယာအတွင်း တည်ရှိပြီး ခရိုင်အစိုးရအဖွဲ့၏ ကြီးကြပ်မှုအောက်တွင်ရှိကြောင်းနှင့် ပေါက်ကွဲမှုဖြစ်စဉ်ကြောင့် ထိခိုက်ဒဏ်ရာရရှိခဲ့သည့် ဂျပန် ကိုယ်ပိုင်ကာကွယ်ရေးတပ်ဖွဲ့ဝင် ၄ ဦးမှာ အသက်အန္တရာယ် စိုးရိမ်စရာမရှိကြောင်း အိုကီနာဝါခရိုင် တာဝန် ရှိသူများက ပြောကြားခဲ့မှုကို NHK သတင်းစာမျက်နှာတွင် ရေးသားဖော်ပြထားပါသည်။ 

ကိုးကား- NHK 

အလွတ်သဘောဘာသာပြန်ဆိုသူ- ဦးထက်ထက်အောင်၊ နစက (၄)

ယူကရိန်းသည် ရုရှား၏ နျူကလီးယား ဗုံးတင်ဆောင်နိုင်သော မဟာဗျူဟာမြောက် ဗုံးကြဲလေယာဉ်များရှိရာ လေတပ်စခန်းများကို တိုက်ခိုက် ခဲ့သည့်နည်းတူ အာရှ-ပစိဖိတ်ဒေသရှိ ရုရှားစစ်သင်္ဘောများကို ဒရုန်း များဖြင့် တိုက်ခိုက်ရန် အစီအစဉ်ရှိကြောင်း Washington Post သတင်းစာက ဖော်ပြခဲ့သည်။

ပြီးခဲ့သည့် တနင်္ဂနွေနေ့ (ဇွန် ၁) က ယူကရိန်းသည် အာတိတ်ဒေသရှိ Murmansk မှ ဆိုက်ဘီးရီးယားရှိ Irkutsk အထိ ရုရှားနိုင်ငံတစ်ဝှမ်းရှိ လေတပ်စခန်းများကို ပေါင်းစပ်တိုက်ခိုက်မှုတစ်ခု ပြုလုပ်ခဲ့ပြီး ယင်းတွင် ကွန်တိန်နာကားများအတွင်း ဒရုန်းများထည့်သွင်းကာ တိုက်ခိုက် ခဲ့သည်။ ကိယက်ဗ်က ၎င်း၏ “Operation Spiderweb” ဟုခေါ်သော စစ်ဆင်ရေးဖြင့် Tu-95 နှင့် Tu-22 အပါအဝင် နျူကလီးယား တင်ဆောင် နိုင်သည့် ရှည်လျားသော ဗုံးကြဲလေယာဉ်များအပါအဝင် ရုရှားစစ်လေယာဉ်များစွာကို ပျက်စီးစေခဲ့သည်ဟု ဆိုသည်။ မော်စကိုကမူ ဝင်ရောက် လာသည့် ဒရုန်းအများစုကို ပစ်ချခဲ့ပြီး ထိခိုက်ခံရသည့် ရုရှား လေယာဉ်များထဲမှ တစ်စီးမှ ပြန်လည်မပြုပြင်နိုင်အောင် ပျက်စီးခြင်းမရှိဟု ဆိုသည်။

Washington Post က ပြီးခဲ့သည့် ကြာသပတေးနေ့ (ဇွန် ၅) တွင် ထုတ်ဝေခဲ့သော ဆောင်းပါးတစ်ခုတွင် “ယူကရိန်းသည် လွန်ခဲ့သော တစ်ပတ်က ရုရှားစခန်းများကို အသုံးပြုခဲ့သည့် လျှို့ဝှက် တိုက်ခိုက်မှု နည်းဗျူဟာ၏ Naval Version ကို စဉ်းစားခဲ့သည်” ဟု ဖော်ပြခဲ့သည်။

သတင်းစာ၏ အရင်းအမြစ်များအရ ကိယက်ဗ်၏ ထောက်လှမ်းရေးအဖွဲ့များသည် “မြောက်ပစိဖိတ်ဒေသရှိ ရုရှားနှင့် ၎င်း၏မဟာမိတ်များ၏ သင်္ဘောများကို တိုက်ခိုက်ရန် ကုန်တင်ကွန်တိန်နာများတွင် ဝှက်ထားသော ရေအောက်ဒရုန်းများ ပို့ဆောင်ရန် စဉ်းစားခဲ့သည်” ဟု ဆိုသည်။

“သို့သော် ယခုအချိန်ထိ ၎င်းတို့သည် ထိုစစ်ဆင်ရေးများကို စတင်ခြင်း မရှိသေးဟု သိရသည်” ဟု WaPo က ဖြည့်စွက်ဖော်ပြခဲ့သည်။

ရုရှား၏ Pacific Fleet ရေတပ်စခန်းချုပ်၏ အချက်အခြာမြို့မှာ Vladivostok ဖြစ်ပြီး နိုင်ငံ၏ အရှေ့ဖျားဒေသတွင် တည်ရှိသည်။ ၎င်းမြို့ သည် တရုတ်နိုင်ငံနှင့် နယ်စပ်မှ ၄၅ ကီလိုမီတာခန့်နှင့် မြောက်ကိုရီးယား နယ်စပ်မှ ၁၃၄ ကီလိုမီတာ ခန့် ကွာဝေးသည်။

အမေရိကန်သမ္မတ Donald Trump က ဗုဒ္ဓဟူးနေ့ (ဇွန် ၄) တွင် ရုရှားသမ္မတ Vladimir Putin က ၎င်းအား ဖုန်းဖြင့်ပြောကြားချက်အရ ကိယက်ဗ်၏ မဟာဗျူဟာမြောက် လေတပ်အား ပစ်မှတ်ထားသည့် မည်သည့်လုပ်ဆောင်ချက်ကိုမဆို မော်စကိုက “တုံ့ပြန်မည်” ဟု ပြောကြားခဲ့ကြောင်း ဖော်ပြခဲ့သည်။

ယခုသီတင်းပတ်အတွင်း ရုရှားကာကွယ်ရေးဝန်ကြီးဌာနက ယူကရိန်းရှိ ကာကွယ်ရေးစက်မှုလုပ်ငန်းများ၊ စစ်လေယာဉ်ကွင်းများ၊ ဒရုန်း ထုတ်လုပ်ရေး၊ သိုလှောင်ရေးနှင့် လွှတ်တင်ရာနေရာများ၊ လက်နက်သိုလှောင်ရုံများ အပြင် ယူကရိန်းစစ်တပ်နှင့် နိုင်ငံခြားမှ ကြေးစားစစ်သားများ စုဝေးရာ နေရာများကို ဒရုန်းများနှင့် တာဝေးပစ်လက်နက်ကြီးများဖြင့် ပြင်းထန် သော တိုက်ခိုက်မှုများ ပြုလုပ်ခဲ့ကြောင်း သတင်းထုတ်ပြန်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂