ရုရှားကာကွယ်ရေးဝန်ကြီးဌာနသည် ကာ့ခ် (Kursk) ဒေသရှိ ယူကရိန်း တပ်များကို ရုရှားတပ်ဖွဲ့များက တိုက်ခိုက်နေသည့် ဗီဒီယိုဖိုင်များကို တရားဝင် မျှဝေခဲ့ပါသည်။

ပြီးခဲ့သည့်နှစ် ဩဂုတ်လမှစ၍ ရုရှားပိုင် ကာ့ခ်ဒေသတွင် အမာခံတပ်စွဲထားသော ယူကရိန်းတပ်များကို ရုရှားတပ်ဖွဲ့က ယခုအပတ်အတွင်း   သိသာထင်ရှားစွာ တိုက်ခိုက်နိုင်ခဲ့ကြောင်း၊ ကာ့ခ်ဒေသ ၈၆ ရာခိုင်နှုန်းကို ပြန်လည်ရရှိထားပြီဖြစ်သည်ဟု ခန့်မှန်းထားကြောင်း၊ အဆိုပါဒေသ၏ မြို့တော် Sudzha မှ ယူကရိန်းတပ်ဖွဲ့များမှာ ယခုအခါ ဆုတ်ခွာနေကြပြီ ဖြစ်ကြောင်း ဝန်ကြီးဌာနက ကြေညာထားပါသည်။

ယခုဗီဒီယိုမှာ ကာ့ခ်ဒေသမှ နောက်ပြန်ဆုတ်နေသည့် ယူကရိန်းစစ်ဘက် ယာဉ်တစ်စီးကို ရုရှားက ဒရုန်းဖြင့် လိုက်လံပစ်ချလိုက်ခြင်း ဖြစ်ပါသည်။

https://www.rt.com/russia/614126-kursk-region-drone-attacks/

ကိုးကား- RT

ဘာသာပြန်ဆိုသူ-ဦးကျော်ဇေယျ၊ဒုတိယညွှန်ကြားရေးမှူး၊နစက-၃

မတ်လ ၁၄ ရက်နေ့တွင် အာဂျင်တီးနား လွှတ်တော်ရှေ့၌ ဆန္ဒပြနေသည့် အငြိမ်းစားပင်စင်စားများကို ရဲများက ရာဘာကျည်ဆံများနှင့် ပစ်ခတ်ပြီး ဆန္ဒပြမှုကို ဖြိုခွင်းခဲ့ကြောင်း သိရပါသည်။ 

ပင်စင်လစာနှင့် လူနေထိုင်မှုစရိတ်မမျှမတဖြစ်နေခြင်းကြောင့် ပင်စင်စား သက်ကြီးပိုင်းများက အပတ်စဉ် လွှတ်တော်ရှေ့၌ ဆန္ဒပြခဲ့ကြသည်။ သက်ကြီးရွယ်အိုများအား မျက်ရည်ယိုဗုံးများ အသုံးပြုခြင်းအပါအဝင် ယခင်ဆန္ဒပြပွဲများတွင် ထိပ်တိုက်တွေ့ဆုံမှုများ ဖြစ်ပွားခဲ့သော်လည်း မတ်လ ၁၃ ရက်နေ့ ဆန္ဒပြမှုသည် အကြီးမားဆုံးနှင့် အပြင်းထန်ဆုံး ဖြစ်ကြောင်း ဆိုသည်။

မြို့တော် ဗျူနိုအေရီ လွှတ်တော်အပြင်ဖက်၌ သက်ကြီးပိုင်းများ ဆန္ဒပြနေစဉ် အကြမ်းဖက်ဆန္ဒပြသမားများ ထပ်မံရောက်ရှိလာပြီး ရဲတပ်ဖွဲ့များကို ကျောက်ခဲဖြင့်ပစ်ခတ်ခြင်း၊ တွေ့သမျှအရာများကို ရိုက်ချိုးဖျက်ဆီးခြင်းများ ပြုလုပ်နေခြင်းကြောင့် ရဲတပ်ဖွဲ့ဝင်များက ရာဘာကျည်များကို အသုံးပြုကာ ပစ်ခတ်ခဲ့ကြသည်။

ဆန္ဒပြပွဲအစ၌ ငြိမ်းချမ်းစွာ စတင်ခဲ့သော်လည်း ရဲတပ်ဖွဲ့ဝင်များက ဆန္ဒပြသူများကို မီးသတ်ပိုက်များ၊ မျက်ရည်ယိုဗုံးများနှင့်ဖြိုခွင်းခဲ့သဖြင့် အကြမ်းဖက်လိုသူများက ကျောက်ခဲများနှင့် တုန့်ပြန်ပစ်ခတ်မှုများ လုပ်ဆောင်လာခြင်းကြောင့် ရဲများက ရော်ဘာကျည်ဆန်များဖြင့် ပစ်ခတ် နှိမ်နင်းမှုများလုပ်ဆောင်ခဲ့ကြပါသည်။ ပြင်းထန်သည့်  ရုန်းရင်းဆန်ခတ် ဆန္ဒပြမှုများဖြစ်ပွားခဲ့ပြီးနောက်  ကွန်ဂရက်လွှတ်တော် နန်းတော်တစ်ဝိုက် ၌ မျက်ရည်ယိုဗုံးများမှ အငွေ့များ ထူထပ်စွာဖုံးလွှမ်းသွားခဲ့ပြီး အဆိုပါ ဖြစ်ရပ်များအကြား ရဲကားတစ်စီး မီးလောင်ပျက်စီးခဲ့ကာ မြို့အနှံ့ အမှိုက်ပုံးများ မီးလောင်မှုဖြစ်ပွားခဲ့သည်။ 

အချို့သော အကြမ်းဖက်ဆန္ဒပြသမားများက အရာရှိများကို တုတ်များ၊ သံဘူးများဖြင့် ပစ်ပေါက်ခဲ့ပြီး ရဲတပ်ဖွဲ့ဝင် ၈၀၀ ခန့် ဖြန့်ကြက်ချထားကာ ဆန္ဒပြပွဲအားနှိမ်နှင်းရန် ရဲတပ်ဖွဲ့ဝင်များက အင်အားသုံး ဆောင်ရွက်ခဲ့ရသည်။ အဆိုပါ ရုန်းရင်းဆန်ခတ်မှုများအတွင်း အနည်းဆုံး ဆန္ဒပြသူ ၂၀၀ ခန့် ဒဏ်ရာရကာ ၂၀ ဦး ဆေးရုံတင်ထားရပြီး ၁၀၀ ကျော် ထိန်းသိမ်းထားကြောင်း ဗျူနိုအေရီသံတော်ဆင့် သတင်းအရ သိရှိရပါသည်။

ကိုးကား-RT

Photo: www.aa.com.tr

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ရုရှားသမ္မတဗလာဒီမာပူတင်သည် ယူကရိန်းက စစ်ရေးလှုံ့ဆော်မှု၊ စစ်သားများလေ့ကျင့်ရေးနှင့် လက်နက်ပေးပို့မှုများကို ရပ်တန့်ရန် အာမခံချက်များ လိုလားကြောင်း ဖော်ပြခဲ့ပါသည်။

ရုရှားသမ္မတ ဗလာဒီမာ ပူတင်သည် ယူကရိန်းပဋိပက္ခတွင် ရက် ၃၀ ကြာ အပစ်အခတ်ရပ်စဲရေးကို ထောက်ခံသော်လည်း ထိုသို့သော အပစ်အခတ် ရပ်စဲမှုကို မည်သို့အကောင်အထည်ဖော်မည်နည်းဆိုသည့် အချက်နှင့် ပတ်သက်၍ စိုးရိမ်မှုများ ရှိကြောင်း ဖော်ပြခဲ့ပါသည်။   

မတ်လ ၁၃ ရက်၊ ကြာသပတေးနေ့တွင် အဆိုပါကိစ္စအား ပြောကြားရာတွင် သမ္မတ ဗလာဒီမာပူတင်က ဖြစ်နိုင်ခြေရှိသော လိုက်လျောမှုများနှင့် နည်းဗျူဟာမြောက် အခက်အခဲများကို သတိပေးခဲ့ပါသည်။ 

“ရက် ၃၀ ကြာ အပစ်အခတ်ရပ်စဲချိန်အတွင်း ယူကရိန်းက စစ်ရေးလှုံ့ဆော်မှုများ မပြုလုပ်ရန်၊ စစ်သားများကို လေ့ကျင့်မှုများ မပြုလုပ်ရန်နှင့်လက်နက်များ မရယူရန် အာမခံချက်များကိုလည်း မိမိတို့လိုချင်ပါကြောင်း”သမ္မတဗလာဒီမာပူတင်က မော်စကိုတွင် ဘယ်လာရုဇ်သမ္မတ အလက်ဇန္ဒား လူကာရှန်ကိုနှင့် ပြုလုပ်သည့် သတင်းစာရှင်းလင်းပွဲတစ်ခုတွင် ပြောကြား ခဲ့ပါသည်။   

သမ္မတက ရုရှားတပ်များသည် ရှေ့တန်းစစ်မျက်နှာ ကီလိုမီတာ ၂၀၀၀ နီးပါးအထိ တိုးတက်နေပြီး စစ်ရေးလုပ်ဆောင်မှုများကို ရပ်တန့်ခြင်းသည် လက်ရှိလုပ်ဆောင်နေသည့် လုပ်ငန်းစဉ်များကို နှောင့်ယှက်နိုင်ကြောင်း ထောက်ပြခဲ့ပါသည်။ ယူကရိန်းတပ်များသည် အပစ်အခတ်ရပ်စဲချိန်ကို အသုံးချ၍ ပြန်လည်စုစည်းခြင်း၊ လက်နက်များ ပိုမိုရယူခြင်းနှင့် အသစ် စုဆောင်းထားသော တပ်ဖွဲ့ဝင်များကို လေ့ကျင့်ပေးခြင်းများ ပြုလုပ် နိုင်ကြောင်း သတိပေးခဲ့ပါသည်။ 

“အဆိုပါ ရက်ပေါင်း ၃၀ ကို ဘယ်လိုအသုံးချမလဲ။ ယူကရိန်းတွင် အတင်းအကြပ် စစ်ရေးလှုံ့ဆော်မှုကို ဆက်လုပ်ရန်လား။ လက်နက်တပ်ဆင်မှုတွေ ပိုမိုရယူရန်လား။ အသစ်စုဆောင်းထားသည့် တပ်ဖွဲ့များကို လေ့ကျင့်ရန်လား။ သို့မဟုတ် ထိုအချက်အားလုံး မဖြစ်ဘဲနေမည်လား” ဟု သမ္မတ ဗလာဒီမာပူတင် က မေးခွန်းထုတ်ခဲ့ပါသည်။   

ထိုကဲ့သို့သော ကျယ်ပြန့်သည့် စစ်မြေပြင်ပေါ်တွင် အပစ်အခတ်ရပ်စဲမှုကို အတည်ပြုရန် ခက်ခဲမည်ဖြစ်ပြီး ချိုးဖောက်မှုများကို အလွယ်တကူအငြင်းပွားနိုင်ကာ နှစ်ဖက်စလုံးအကြား အပြစ်တင်မှုများ ဖြစ်ပေါ်လာနိုင်ကြောင်း သမ္မတ ဗလာဒီမာပူတင်က ဖြည့်စွက်ပြောကြားခဲ့ပါသည်။ အပစ်အခတ်ရပ်စဲမှုကို စောင့်ကြည့်ရန် “ထိန်းချုပ်မှုနှင့် အတည်ပြုမှု” စနစ်များကို သဘောတူညီသင့်ကြောင်း သမ္မတပူတင်က ပြောကြားခဲ့ပါ သည်။ သမ္မတပူတင်သည် ၂၀၂၄ ခုနှစ်၊ ဩဂုတ်လတွင် ရုရှား၏ Kursk ဒေသသို့ ဝင်ရောက်ခဲ့သည့် ယူကရိန်းတပ်များသည် ယခုအခါ တစ်သီး တခြားဖြစ်နေကြောင်းလည်း ဖော်ပြခဲ့ပါသည်။ အပစ်အခတ်ရပ်စဲမှု ဖြစ်ပေါ် ပါက ၎င်းတို့ကို မည်သို့ဆောင်ရွက်မည်နည်းဆိုသည်မှာ မရှင်းလင်းကြောင်း  သမ္မတဗလာဒီမာပူတင်က မှတ်ချက်ပြုခဲ့ပါသည်။  

“၎င်းတို့က ပြည်သူများကို စစ်ရာဇဝတ်မှုများ ကျူးလွန်ပြီးနောက် ၎င်းတို့ကို လွှတ်ပေးရမည်လား။ ယူကရိန်းခေါင်းဆောင်များက ၎င်းတို့ကို လက်နက်ချရန် အမိန့်ပေးမည်လား။ သို့မဟုတ် လက်နက်ချပြီး အကျဉ်းချ ခံမည်လား” ဟု သမ္မတဗလာဒီမာပူတင်က မေးခွန်းထုတ်ခဲ့ပါသည်။   

ရုရှားစစ်ဦးစီးချုပ် ဗာလာရီ ဂျီရာဆီမော့ဗ်၏ အဆိုအရ မတ်လ ၁၂ ရက် (ဗုဒ္ဓဟူးနေ့) ညနေပိုင်းအထိ ရုရှား၏ တပ်များသည် ၂၀၂၄ ခုနှစ် ၊ ဩဂုတ်လတွင် ယူကရိန်းတပ်များက သိမ်းပိုက်ထားသည့် နယ်မြေ၏ ၈၆% ကို ပြန်လည်ထိန်းချုပ်နိုင်ခဲ့သည်။ ထိုဒေသတွင် ကျန်ရှိနေသော ယူကရိန်း၏ တပ်ဖွဲ့များကို အဓိကအားဖြင့် “ဝိုင်းရံထား” ပြီး “သီးသန့် ဖြစ်နေ” ကြောင်း ၎င်းက ပြောကြားခဲ့ပါသည်။   

ရုရှားသမ္မတဗလာဒီမာ ပူတင်က အမေရိကန်သမ္မတ ဒေါ်နယ်ထရမ့်နှင့် ဆွေးနွေးမှုများ ပြုလုပ်ရန် လိုအပ်ကြောင်း အကြံပြုပြောကြားခဲ့ပါသည်။ 

“ငြိမ်းချမ်းသော နည်းလမ်းများဖြင့် ပဋိပက္ခကို အဆုံးသတ်ရန် အယူအဆသည် မိမိတို့ ထောက်ခံသည့် အရာတစ်ခုဖြစ်သည်” ဟု သမ္မတ ဗလာဒီမာပူတင်က အတိအလင်း ပြောကြားခဲ့ပါသည်။

ကိုးကား - RT

ထိုင်ဝမ်သမ္မတက ၎င်း၏အစိုးရအနေဖြင့် စစ်တရားရုံးစနစ်ကို ပြန်လည်အသက်သွင်းရန် ဆောင်ရွက်မည်ဖြစ်ကြောင်းပြောကြားခဲ့ပြီး ဤသည်မှာ ထိုင်ဝမ်စစ်တပ်ကို ပစ်မှတ်ထားသော ထိုးဖောက်ဝင်ရောက်မှုနှင့် သူလျှိုလုပ်ရှားမှုများကဲ့သို့ တရုတ်၏ ခြိမ်းခြောက်မှုများကို ကိုင်တွယ်ရန် ကြိုးပမ်းမှုများ၏ တစ်စိတ်တစ်ပိုင်းဖြစ်သည်ဟု ၎င်းက ပြောသည်။

တရုတ်နိုင်ငံအတွက် သူလျှိုလုပ်ခဲ့သည်ဟူသော သံသယဖြင့် လူ ၆၄ ဦး အား လွန်ခဲ့သောနှစ်အတွင်း စွဲချက်တင်ခဲ့ရကြောင်း မတ်လ ၁၃ ရက် (ကြာသပတေး)နေ့၌ ပြုလုပ်ခဲ့သည့် အထူးသတင်းစာရှင်းလင်းပွဲတွင် သမ္မတ Lai Ching-te က ပြောကြားခဲ့ပါသည်။ အဆိုပါဖြစ်စဉ်များ၌ ၆၆ ရာခိုင်နှုန်းသည် တာဝန်ထမ်းဆောင်နေဆဲ သို့မဟုတ် စစ်တပ်မှ အငြိမ်းစားတပ်ဖွဲ့ဝင်များဖြစ်သည်ဟု ၎င်းက ဆိုပါသည်။

မစ္စတာ Lai က တရုတ်နိုင်ငံအား “ရန်လိုသည့်နိုင်ငံ” အဖြစ်ခေါ်ဆိုခဲ့ပြီး ထိုင်ဝမ်သည် “သင့်လျော်သော ကြိုတင်ကာကွယ်မှု အစီအမံများ ချမှတ်ရန်၊ ဒီမိုကရေစီဆိုင်ရာ ခံနိုင်ရည်စွမ်းအားနှင့် အမျိုးသား လုံခြုံရေးကိုမြှင့်တင်ရန်နှင့် တန်ဖိုးထားရမည့် လွတ်လပ်ပြီး ဒီမိုကရေစီဆန်သော လူနေမှုဘဝကို ကာကွယ်ရန်အချိန်တန်ပြီ” ဟု ၎င်းက ဆိုပါသည်။

၎င်း၏အစိုးရသည် စစ်တရားရုံးစနစ်ကို ပြန်လည်အသက်သွင်းပြီး စစ်ဘက်ဆိုင်ရာ တရားသူကြီးများကို စစ်ဘက်ဆိုင်ရာ ရာဇ၀တ်မှုကျူးလွန်ကြောင်း သံသယရှိသည့် တာဝန်ထမ်းဆောင်ဆဲ တပ်ဖွဲ့ဝင်များ ပါဝင်ပတ်သက်နေသော ရာဇဝတ်မှုများကို ကိုင်တွယ်ခွင့်ပြုရန် ကြိုးပမ်းမည် ဖြစ်သည်ဟု မစ္စတာ Lai က ပြောသည်။ ရာဇဝတ်မှုများတွင် နိုင်ငံတော် အကြည်ညိုပျက်စေရန်လုပ်ဆောင်ခြင်းနှင့် လျှို့ဝှက်အချက်အလက်များ ပေါက်ကြားစေခြင်းတို့ ပါဝင်သည်ဟုဆိုသည်။

ထိုင်ဝမ်အနေဖြင့် ငြိမ်းချမ်းရေးကာလအတွင်း အဆိုပါ တရားစီရင်မှုများ ဆောင်ရွက်ခွင့်ပြုရန်အတွက် စစ်တရားရုံးဆိုင်ရာ ဥပဒေကို ပြန်လည် အသက်သွင်းရန် လိုအပ်လျက်ရှိသည်။ လွှတ်တော်၌ အတိုက်အခံပါတီဝင်များက နေရာအများစုကို ရယူထားခြင်းကြောင့် ထိုကဲ့သို့ ပြင်ဆင် ဆောင်ရွက်နိုင်ရန်အတွက် မစ္စတာ Lai ၏ အစိုးရသည် အခက်အခဲများနှင့် ရင်ဆိုင်နေရသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယူကရိန်းအတွက် အကြီးမားဆုံးပြဿနာမှာ ရှေ့တန်းတပ်များအတွက် စစ်သားအင်အား အခက်အခဲဖြစ်နေကြောင်း Financial Times သတင်းစာက ဖော်ပြထားပါသည်။

ယူကရိန်းစစ်တပ်အတွက် လက်နက်များ သို့မဟုတ် မိုင်းများ ပြတ်လပ် ခြင်းမှာ စစ်သား အင်အား မလုံလောက်ခြင်းလောက် ဆိုးရွားမှုမရှိဟု ဥရောပအရာရှိများ ပြောကြားချက်ကို ကိုးကား၍ အဆိုပါသတင်းစာက ပြောကြားထားပါသည်။ 

တစ်လလျှင် စစ်သား ၃၀,၀၀၀ ခေါ်ရန် ရည်မှန်းထားသော်လည်း ၎င်းကို ပြည့်မီရန် လွန်စွာ အခက်အခဲရင်ဆိုင်နေရကြောင်း၊ မည်သူမျှ နောက်ဆုံး အလုပ်ခေါ်ခန့်ခြင်း သို့မဟုတ် တိုက်ပွဲတွင် သေဆုံးလိုခြင်း မရှိကြောင်း ဥရောပအရာရှိတစ်ဦးက ပြောကြားထားပါသည်။

လွန်စွာစိတ်မကောင်းစရာကောင်းသည်မှာ မိခင်များအနေဖြင့် အသက် ၁၆ နှစ်အရွယ်သားများကို တပ်မတော်ထဲ မဝင်စေလိုသဖြင့် ပြည်ပသို့ ထွက်ခွာစေကြရကြောင်း၊ ပြည်သူများအနေဖြင့် လုံခြုံရေး၊ စစ်ရေး သင်တန်း မတက်ရဘဲ လက်နက်မပါဘဲ စစ်မြေပြင်သို့ စေလွှတ်ခြင်းခံရမည် ကို ကြောက်ရွှံ့နေကြကြောင်း ဖော်ပြထားပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားကာကွယ်ရေးဝန်ကြီးဌာနက Sudzha မြို့မှ ကျန်ရှိနေသော ယူကရိန်း တပ်ဖွဲ့များကို တိုက်ထုတ်လိုက်ပြီဖြစ်ကြောင်း ကြေညာလိုက်သည်။ Sudzha မြို့သည် ယူကရိန်းတပ်ဖွဲ့များ ရုရှား၏ Kursk ဒေသတွင်းသို့ ဝင်ရောက်တိုက်ခိုက်စဉ်က သိမ်းပိုက်ထားသော အကြီးဆုံးမြို့ဖြစ်သည်။

ထို့အပြင် အနီးရှိ Melovoy နှင့် Podol ကျေးရွာများကိုလည်း ပြန်လည် သိမ်းပိုက်လိုက်ပြီဖြစ်ကြောင်း ဝန်ကြီးဌာနက မတ်လ ၁၃ ရက်နေ့တွင် ထုတ်ပြန်ခဲ့သည်။

Kursk ဒေသတွင် တိုက်ခိုက်နေသော ယူကရိန်းတပ်ဖွဲ့များသည် လွန်ခဲ့သည့် ၂၄ နာရီအတွင်း စစ်သည်ပေါင်း ၃၄၀ ကျော်၊ ခြေလျင်တိုက်ယာဉ် ၂ စီး၊ သံချပ်ကာယာဉ် ၃ စီးနှင့် အခြားစစ်ပစ္စည်းများစွာကို ဆုံးရှုံးခဲ့ရကြောင်း ဝန်ကြီးဌာနက ပြောကြားခဲ့သည်။

ယူကရိန်းသည် ၂၀၂၂ ခုနှစ်၊ ဖေဖော်ဝါရီလတွင် ရုရှားနှင့် စစ်ရေး ပြင်းထန်လာပြီးနောက် နိုင်ငံတကာမှ အသိအမှတ်ပြုထားသော ရုရှား နယ်မြေကို အကြီးမားဆုံးတိုက်ခိုက်မှုအဖြစ် ၂၀၂၃ ခုနှစ်၊ ဩဂုတ်လ ၆ ရက်နေ့တွင် Kursk ဒေသတွင်းသို့ ဝင်ရောက်တိုက်ခိုက်ခဲ့သည်။ ရုရှား၏ ခန့်မှန်းချက်အရ စစ်သည် ၃၅,၀၀၀ ခန့်ပါဝင်သော ယူကရိန်း၏ တိုက်ခိုက်မှုကို မြန်ဆန်စွာတားဆီးနိုင်ခဲ့ပြီး ထိုအချိန်မှစ၍ ယူကရိန်း၏ ထိန်းချုပ်မှုအောက်ရှိ နယ်မြေများ တဖြည်းဖြည်းကျဉ်းမြောင်းလာခဲ့သည်။

လွန်ခဲ့သည့် တစ်ပတ်အတွင်း ရုရှားစစ်တပ်သည် ယူကရိန်းနယ်စပ်မှ ၉ ကီလိုမီတာအကွာတွင် တည်ရှိပြီး ယခင်က လူဦးရေ ၅,၀၀၀ ခန့် နေထိုင် ခဲ့သော Sudzha မြို့အနီးနယ်မြေများကို မြန်ဆန်စွာ ပြန်လည် တိုက်ခိုက် သိမ်းပိုက်နိုင်ခဲ့သည်။ မတ်လ ၁၁ ရက်နေ့တွင် ရုရှား ကာကွယ်ရေး ဝန်ကြီး ဌာနက Sudzha မြို့၏ မြောက်ဘက်၊ အရှေ့ဘက်နှင့် အရှေ့တောင်ဘက် ရှိ Kursk ဒေသအတွင်းမှ ကျေးရွာ ၁၂ ရွာကို ပြန်လည် သိမ်းပိုက်လိုက်ပြီဖြစ်ကြောင်း ကြေညာခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

လက်ရှိဆီးရီးယား ကြားဖြတ်အစိုးရ သမ္မတအာမက်အယ်လ်ရှာရာနှင့် ဆီးရီးယား ဒီမိုက်ရက်တစ် တပ်ဖွဲ့မှူး မက်ဇ်လိုရမ်အဘာဒီတို့အကြား သဘောတူညီမှုတစ်ရပ်ကို လက်မှတ်ထိုးနိုင်ခဲ့ခြင်းကြောင့် ပြည်တွင်းစစ်ပြီးကာစ ဆီးရီးယားနိုင်ငံ၌ ကွဲပြားနေသည့် လက်နက်ကိုင်အဖွဲ့များ ပေါင်းစည်းရေးလုပ်ငန်း စတင်အသက်ဝင်လာပြီဖြစ်ကြောင်း ဆီးရီးယား ကြားဖြတ်အစိုးရက ပြောကြားခဲ့ပြီး သဘောတူညီချက်မိတ္တူကို ဆီးရီးယား အစိုးရ၏ တယ်လီဂရမ် အကောင့်တွင် ဖော်ပြခဲ့ပါသည်။ “ကာ့ဒ် အသိုင်း အဝိုင်းသည် ဆီးရီးယားနိုင်ငံတော်၏ အရေးပါသော အစိတ်အပိုင်း တစ်ခု ဖြစ်သည်” ဟုကြွေးကြော်ကာ “နိုင်ငံရေးလုပ်ငန်းစဉ်တွင် ဆီးရီးယား နိုင်ငံသားအားလုံး၏ နိုင်ငံရေးဖြစ်စဉ်တွင် ကိုယ်စားပြုပါဝင်မှုနှင့် ပါဝင်ခွင့် ကို အာမခံရန် သဘောတူညီခဲ့ကြောင်း၊ ဆီးရီးယားနိုင်ငံသည် ၎င်း၏ နိုင်ငံသားဖြစ်ခွင့်နှင့် ဖွဲ့စည်းပုံအခြေခံဥပဒေဆိုင်ရာ အခွင့်အရေး အားလုံးကို အာမခံပါသည်”ဟုပါရှိပါသည်။

နိုင်ငံလုံးဆိုင်ရာ အပစ်အခတ်ရပ်စဲရေးသဘောတူညီရန်၊ အရပ်ဘက်နှင့် စစ်ဘက်ဆိုင်ရာ အဖွဲ့အစည်းများအားလုံးကို ပေါင်းစည်းရန်၊ ယခင် အာဏာရှင်ဟောင်းအစိုးရ၏ အကြွင်းအကျန်များကို တိုက်ဖျက်ခြင်းကို ပံ့ပိုးကူညီရန် တို့လည်းပါဝင်ပါသည်။

အခြားသဘောတူညီချက်များကြားတွင် အိုးမဲ့အိမ်မဲ့ ဆီးရီးယား နိုင်ငံသားများအားလုံးပြန်လာရေး အာမခံချက်တို့ကိုလည်း သဘောတူညီထားကြောင်း ၎င်းကဆိုသည်။ 

ကာဒ့်လက်နက်ကိုင်အဖွဲ့ခေါင်းဆောင် အဘာဒီက အဆိုပါသဘောတူညီချက်သည် ကွဲပြားမှုအားလုံးပါဝင်သည့် ဆီးရီးယားနိုင်ငံသစ်ကို တည်ဆောက်ရန် အမှန်တကယ်အခွင့်အရေးဖြစ်သည်ဟု ဖော်ပြခဲ့ပါသည်။ 

“တရားမျှတမှုနှင့် တည်ငြိမ်ရေးတို့အတွက် ပြည်သူများ၏ဆန္ဒကို ထင်ဟပ်စေမည့် အသွင်ကူးပြောင်းရေးအဆင့်ကိုသေချာစေရန် ၎င်းတို့ အတူတကွလုပ်ဆောင်နေသည်” ဟု ကြေညာချက်တွင် ဖော်ပြထားပါသည်။ “ဆီးရီးယားနိုင်ငံသားအားလုံး၏ အခွင့်အရေးများကို အာမခံပြီး ငြိမ်းချမ်းရေးနှင့်ဂုဏ်သိက္ခာအတွက် ၎င်းတို့၏ ဆန္ဒများကို ဖြည့်ဆည်းပေးမည့် ပိုမိုကောင်းမွန်သော အနာဂတ်ကိုတည်ဆောက်ရန် ၎င်းတို့ ကတိပြုထားပါသည်” ဟု ဆိုပါသည်။ 

ကိုးကား-Myanmar National Post

မတ်လ ၁၂ ရက်နေ့က စစ်ယူဖောင်းဝတ်ဆင်ထားသည့် ရုရှားနိုင်ငံ၏ သမ္မတ၊ တပ်မတော်ကာကွယ်ရေးဦးစီးချုပ် မစ္စတာ ပူတင်သည် ယူကရိန်း စစ်ပွဲနှင့် အနီးဆုံးဖြစ်သော ယူကရိန်းတပ်များ ထိုးဖောက် ဝင်ရောက်ခဲ့သည့် Kursk ဒေသရှိ စစ်ဖက်ဆိုင်ရာ ကွပ်ကဲမှုဌာနချုပ်သို့ သွားရောက်ခဲ့ပါသည်။

ရုရှားသမ္မတ ဗလာဒီမာပူတင်သည် Kursk ဒေသသို့ သွားရောက်ခဲ့ပြီး ကျူးကျော်ဝင်ရောက်လာသော ယူကရိန်းတပ်များကို အမြန်ဆုံး တိုက်ထုတ် သွားရမည်ဟု ပြောကြားခဲ့သည်။ ထိုဒေသတွင် ကျန်ရှိနေသေးသော ယူကရိန်းတပ်များကို ရုရှားတပ်များက အပြင်းအထန် ပြန်လည် တိုက်ခိုက်နေစဉ် ၎င်းသည် ထိုဒေသရှိ Command Post သို့ သွားရောက် လည်ပတ်ခဲ့ခြင်းဖြစ်သည်။

သမ္မတသည် ၎င်း၏ခရီးစဉ်အတွင်း စစ်ဘက်ဆိုင်ရာ အကြီးအကဲများနှင့် အစည်းအဝေးတစ်ခုပြုလုပ်ခဲ့ပြီး ဗိုလ်ချုပ်ကြီး Valery Gerasimov က စစ်ဆင်ရေးအခြေအနေများကို အစီရင်ခံတင်ပြခဲ့သည်။ ပူတင်က ထိုဒေသတွင် တိုက်ပွဲဝင်နေသော တပ်မှူးများနှင့်တပ်ဖွဲ့ဝင်များအား ၎င်းတို့၏ ကြိုးပမ်းအားထုတ်မှုများအတွက် ကျေးဇူးတင်ဂုဏ်ယူကြောင်း ပြောကြားခဲ့သည်။

“မိမိတို့၏ ရည်မှန်းချက်မှာ Kursk ဒေသ၏ နယ်မြေတွင် ခြေကုပ်ယူ ထားသောရန်သူကို အမြန်ဆုံး တိုက်ထုတ်သွားရန်ဖြစ်သည်” ဟု သမ္မတ က ပြောကြားခဲ့ပြီး မော်စကိုသည် ယူကရိန်းနှင့် နယ်စပ်တလျှောက်တွင် “လုံခြုံရေးဇုန်” တစ်ခုဖန်တီးရန်လည်း စဉ်းစားနေကြောင်း ထည့်သွင်းပြောကြားခဲ့သည်။ ထိုဒေသကို ကျူးကျော်ဝင်ရောက်လာသော ယူကရိန်း တပ်ဖွဲ့များကို “အကြမ်းဖက်သမားများ” အဖြစ် သဘောထားတိုက်ခိုက်ရန်နှင့် ဖမ်းဆီးရမိသော သုံ့ပန်းမှန်သမျှကိုလည်း ထိုသို့မှတ်ယူရမည် ဖြစ်ကြောင်း ၎င်းကဆိုသည်။

Gerasimov ၏ အဆိုအရ ရုရှားစစ်တပ်သည် လွန်ခဲ့သော ငါးရက်အတွင်း မြို့နှင့်ရွာပေါင်း ၂၄ ခု ပါဝင်သော ဧရိယာစုစုပေါင်း ၂၅၉ စတုရန်း ကီလိုမီတာကို သိမ်းပိုက်နိုင်ခဲ့ပြီး ယူကရိန်းတပ်များကို ဝိုင်းပတ်ပိတ်ဆို့ တိုက်ခိုက်ထားနိုင်ခဲ့သည်ဟု ၎င်းကအစီရင်ခံခဲ့သည်။

ယူကရိန်းစစ်တပ်သည် ၎င်းတို့၏ ကျူးကျော်ဝင်ရောက်မှုကြိုးပမ်းမှုတွင် စစ်သည် ၆၇,၀၀၀ ကျော် ဆုံးရှုံးခဲ့ရသည် ဟု Gerasimov က ပြောကြားခဲ့ပြီး ရုရှားတပ်များသည် စတုရန်းကီလိုမီတာ ၁,၁၀၀ ကျော် (ယခင်နှစ် က ပြန်လည်တိုက်ခိုက်မှုစတင်သည့်အချိန်မှစ၍ ကိယက်ဗ်မှ ကနဦး သိမ်းပိုက်ထားသော ဧရိယာ၏ ၈၆%) ကို သိမ်းပိုက်နိုင်ခဲ့ကြောင်း ထပ်လောင်းပြောကြားခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အနောက်နိုင်ငံများက ယူကရိန်းနိုင်ငံသို့ ထောက်ပံ့ပေးသည့် အမေရိကန်လုပ် F-16  တိုက်လေယာဉ်များသည် လေကြောင်းတိုက်ပွဲတွင် ရုရှားလုပ် Su-35 ဘက်စုံသုံး တိုက်လေယာဉ်များနှင့် ယှဉ်ပြိုင်နိုင်ခြင်းမရှိဟု ယူကရိန်းလေတပ်မှ ပြောရေးဆိုခွင့်ရှိသူ တစ်ဦးက ပြောကြားသည်။

Su-35 ဘက်စုံသုံးတိုက်လေယာဉ်များသည် လေယာဉ်အသစ်များ ဖြစ်သောကြောင့် တိုက်လေယာဉ်နှစ်စင်းအကြား ဖြစ်ပွားသည့် လေကြောင်းတိုက်ပွဲတွင် ရုရှားလုပ် Su-35 တိုက်လေယာဉ်အား ယှဉ်ပြိုင်နိုင်ခြင်းမရှိကြောင်း၊ ယူကရိန်းလေတပ် အနေဖြင့် မြေပြင်အခြေပြု လေကြောင်းကာကွယ်ရေးစနစ်၊ အီလက်ထရွန်နစ်စစ်ဆင်ရေး စနစ်များနှင့် လေကြောင်းအချက်ပေး ရေဒါစနစ်များ လိုအပ်လျက်ရှိကြောင်း ယူကရိန်းလေတပ်မှ ပြောရေးဆိုခွင့်ရှိသူ ယူရီ အီဂနက်က ယူကရိန်းရုပ်သံလိုင်း တစ်ခုဖြစ်သည့် Novosti နှင့် မတ်လ၁၁ ရက်တွင်ပြုလုပ်သည့် တွေ့ဆုံမေးမြန်းခန်း တစ်ခုတွင် ပြောကြားသည်။

NATO အဖွဲ့ဝင်အနောက်နိုင်ငံများသည် အမေရိကန်၏ သဘောတူညီချက်အရ ၂၀၂၃ ခုနှစ် နှစ်လယ်ခန့်ကတည်းက ယူကရိန်းနိုင်ငံသို့ F-16  တိုက်လေယာဉ်များကိုပေးပို့ခဲ့ပြီး ယူကရိန်း လေယာဉ်မှူးများကိုလည်း လေ့ကျင့်သင်ကြား ပေးခဲ့ခြင်းဖြစ်သည်။ အဆိုပါနိုင်ငံများတွင် ဘယ်ဂျီယံ၊ ဒိန်းမတ်၊ နယ်သာလန်နှင့် နော်ဝေနိုင်ငံတို့ ပါဝင်ပြီး ယင်းနိုင်ငံများသည် ယူကရိန်းသို့ F-16 တိုက်လေယာဉ်အစင်းပေါင်း ၈၀ ခန့်ပေးပို့ခဲ့သည်။

ထို့ပြင် ယူကရိန်းနိုင်ငံသည် ၂၀၂၄ ခုနှစ်တွင် F-16 တိုက်လေယာဉ် ၁၈ စင်းခန့် လက်ခံရရှိခဲ့သော်လည်း ၎င်းတို့အနက် တစ်စင်းမှာ ပျက်ကျပြီးနောက် ပျက်စီးသွားခဲ့ကြောင်း သိရသည်။

အနောက်နိုင်ငံများက ထောက်ပံ့ပေးသည့် F-16 တိုက်လေယာဉ်များသည် စစ်ပွဲကို  အဆုံးအဖြတ်ပေးမည့်  တိုက်လေယာဉ်များအဖြစ် ယူကရိန်းအစိုးရက မျှော်လင့်ထားသော်လည်း  ၎င်းတိုက်လေယာဉ်တွင် တပ်ဆင်ထားသည့် ရေဒါစနစ်များမှာ   ခေတ်နောက်ကျနေပြီး နည်းဗျူဟာမြောက် ကွန်ရက်များနှင့်လည်း   ချိတ်ဆက်ထားခြင်းမရှိသောကြောင့် လေကြောင်းတိုက်ပွဲများတွင် တိုက်လေယာဉ်၏ ထိရောက်မှုမှာ ရုရှားလုပ် Su-35 တိုက်လေယာဉ်ကို ယှဉ်နိုင်စွမ်းမရှိဟု ယူကရိန်းက ပြောသည်။

Source: https://myawady.net.mm/

နိုင်ငံခြားသားတချို့သည် အိန္ဒိယနိုင်ငံ၊ မီဇိုရမ်ပြည်နယ်ကို ဖြတ်သန်းပြီး မြန်မာနိုင်ငံကိုဝင်ရောက်ကာ ချင်းတောင်တန်းပေါ်က သူပုန်များကို စစ်သင်တန်း လေ့ကျင့်သင်ကြားပေးနေကြောင်း မီဇိုရမ်ပြည်နယ် ဝန်ကြီးချုပ် လာဒူဟိုမာက မတ်လ ၁၀ ရက်နေ့က ပြောကြားလိုက်ကြောင်း အိန္ဒိယ NDTV သတင်းမှာ ဖော်ပြထားပါသည်။ 

လုံခြုံရေးဆိုင်ရာ စိုးရိမ်ပူပန်မှုများ ရှိနေသည့်ကြားက အိန္ဒိယ-မြန်မာ နယ်စပ်တစ်လျှောက် နိုင်ငံခြားသားများ ဖြတ်သန်းသွားလာမှုများကို ဗဟိုအစိုးရကချမှတ်ထားသည့် Protected Area Permit (PAP) လက်မှတ် ပါမှ ခွင့်ပြုမည့်စနစ် ပြန်လည်ကျင့်သုံးမှုကို ပြည်နယ်အစိုးရက ကန့်ကွက်မည် မဟုတ်ကြောင်း ၄င်းက ပြောကြားခဲ့ပါသည်။ 

မြန်မာနိုင်ငံကိုသွားရောက်သည့် နိုင်ငံခြားသားများသည် မီဇိုရမ်ပြည်နယ် ကို ကြားစခန်းလမ်းကြောင်းတစ်ခုအဖြစ် အသုံးပြုနေသည့်ကိစ္စသည် ဗဟို အစိုးရအတွက် စိုးရိမ်စရာကိစ္စကြီးတစ်ခုဖြစ်လာကြောင်း ၄င်းက ပြောကြား ခဲ့ပါသည်။ 

အဆိုပါ သင်တန်းများကို အမေရိကန်နှင့် ဗြိတိန်နိုင်ငံသားများက ပေးနေခြင်းဖြစ်ကြောင်း သိရသည်။ ပြီးခဲ့သည့်နှစ် ဇွန်လမှ ဒီဇင်ဘာလအတွင်း မီဇိုရမ်ပြည်နယ်သို့ ပြည်ပနိုင်ငံသား ၂၀၀၀ ခန့် ရောက်ရှိလာခဲ့သည်။

ပြီးခဲတဲ့နှစ် ဇွန်လနှင့် ဒီဇင်ဘာလအတွင်း နိုင်ငံခြားသား ၂၀၀၀ ဝန်းကျင် မီဇိုရမ်ပြည်နယ်ကို ရောက်ရှိလာပြီး အဆိုပါပုဂ္ဂိုလ်များအနက် အများအပြား သည် ကမ္ဘာလှည့်ခရီးသွားများအဖြစ် တရားဝင်မှတ်ပုံတင်ဖြင့် ရောက်ရှိလာခြင်းမဟုတ်ဘဲ ပုန်းလျှိုးကွယ်လျှိုးဖြင့် ပြည်နယ်ထဲက ထွက်ခွာ သွားကြောင်း ၄င်းက ပြောကြားခဲ့ပါသည်။

နယ်စပ်ကိုဖြတ်ပြီး မြန်မာနိုင်ငံ၊ ချင်းတောင်တန်းက တိုင်းရင်းသားသူပုန်များကို အဆိုပါနိုင်ငံခြားသားများက စစ်သင်တန်းများ လေ့ကျင့်သင်ကြား ပေးနေခြင်းဖြစ်ကြောင်း ၄င်းက ပြောကြားခဲ့ပါသည်။ 

“လက်ရှိ ပထဝီနိုင်ငံရေးအခြေအနေအရ မြန်မာနိုင်ငံထဲက အခြေအနေများကို တရုတ်နှင့် အမေရိကန်အပါအဝင် နိုင်ငံအများအပြားက အနီးကပ် စောင့်ကြည့်နေကြပါသည်။ မီဇိုရမ်ပြည်နယ်ကို နိုင်ငံခြားသားများက ကြားစခန်းတစ်ခုလို အသုံးပြုနေသည့်အတွက် အဆိုပါကိစ္စသည် ဗဟို အစိုးရအတွက် စိုးရိမ်စရာကိစ္စကြီးတစ်ခု ဖြစ်လာပါကြောင်း၊ ထို့အတွက် နိုင်ငံခြားသားများကို PAP လက်မှတ်ပါမှ ခွင့်ပြုမည့်စနစ်ကို ပြန်လည် ကျင့်သုံးခြင်းဖြစ်ပါကြောင်း” ပြည်နယ်ဝန်ကြီးချုပ် က လွှတ်တော်၌ ပြောကြားခဲ့ပါသည်။ 

မြန်မာနိုင်ငံသို့ သွားရောက်မည့် နိုင်ငံခြားသားများသည် ကြားစခန်း အဖြစ် အသုံးပြုလာနိုင်ဖွယ်ရှိသော တခြားပြည်နယ်များတွင်လည်း PAP လက်မှတ်ပါမှ ခွင့်ပြုမည့်စနစ်ကို ပြန်လည်ကျင့်သုံးရန် ပြဋ္ဌာန်းလိုက်ပြီ ဖြစ်ကြောင်း ၄င်းက ပြောကြားခဲ့ပါသည်။ 

PAP စနစ်ပြန်လည်ကျင့်သုံးမှုကို မီဇိုရမ်ပြည်နယ်အစိုးရက အစောပိုင်း က ဆန့်ကျင်ကန့်ကွက်ခဲ့သော်လည်း နောက်ပိုင်းတွင် ဗဟိုအစိုးရက ရှုမြင်သည့်အတိုင်း ထိုစနစ်၏လိုအပ်ချက်ကို နားလည်သွားခဲ့ကြောင်း ၄င်းက ပြောကြားခဲ့ပါသည်။ 

လက်ရှိအချိန်တွင် အာရူနာချယ်ပရာဒေ့ရှ်၊ ဆစ်ကင်မ်၊ မဏိပူရ၊ နာဂလန်း၊ မီဇိုရမ်၊ ဂျမူးနှင့် ကက်ရှ်မီးယား အစိတ်အပိုင်း တချို့၊ ဟီမာ ချယ်ပရာဒေ့ရှ်၊ ရာဂျက်စ်သန်နှင့် ဥတ္တရာခန်း ပြည်နယ်များတွင် PAP စနစ်ကျင့်သုံးမည့် ကာကွယ်ရေးနယ်မြေများအဖြစ် သတ်မှတ်ထားပါသည်။ 

၂၀၁၁ ခုနှစ်တုန်းက ကမ္ဘာလှည့်ခရီးသွားလုပ်ငန်း အားပေးမြှင့်တင်ရန်အတွက် မဏိပူရ၊ နာဂလန်းနှင့် မီဇိုရမ် ပြည်နယ်များတွင် အာဖဂန် နစ္စတန်၊ ပါကစ္စတန်နှင့် တရုတ် နိုင်ငံသားများကလွဲ၍ တခြားနိုင်ငံခြားသားများအတွက် PAP စနစ်ကျင့်သုံးမှု ကို ကင်းလွတ်ခွင့်ပေးထားခဲ့သော်လည်း ယခုလို ပထဝီနိုင်ငံရေးအခြေအနေ ရှုပ်ထွေးမှုတွေကြောင့် အဆိုပါစနစ်ကို ပြန်လည်ကျင့်သုံးလာခြင်းဖြစ်ပါသည်။ 

ကိုးကား- Some Foreigners Entered Myanmar Via Mizoram, Gave Military Training In Chin Hills': Chief Minister Lalduhoma