အစ္စရေးဆိပ်ကမ်းများနှင့် ဆက်စပ်သော ကုန်သွယ်ရေး သင်္ဘောအားလုံးကို တိုက်ခိုက်မည်ဟု ယီမင်ဟူသီသူပုန်များက ခြိမ်းခြောက်

ဂါဇာရှိ ပါလက်စတိုင်းလူမျိုးများနှင့် တစ်သားတည်းရပ်တည်မှုအဖြစ် အစ္စရေးနှင့်ဆက်စပ်မှုရှိသည့် သင်္ဘောများကို တိုက်ခိုက်မှုများ ဆောင်ရွက်နေသည်ဟု ဆိုသော ဟူသီလက်နက်ကိုင်အဖွဲ့သည် အိန္ဒိယသမုဒ္ဒရာနှင့် ပင်လယ်နီကို ဆက်သွယ်ထားသည့် အရေးပါသော လမ်းကြောင်း "ဘာ ဘဲလ်မန်ဒက်ရေလက်ကြား" (Bab el Mandeb) တွင် သင်္ဘောများကို ပစ်မှတ်ထား တိုက်ခိုက်လျက်ရှိသည်။

အဆိုပါအဖွဲ့၏ စစ်ရေးဆိုင်ရာပြောရေးဆိုခွင့်ရှိသူ အာမင်ဟယ်ယန်း (Ameen Hayyan) က ရုပ်သံ ထုတ်လွှင့်မှုတစ်ခုတွင် အဆိုပါ လုပ်ရပ်သည် ၎င်းတို့၏ စည်းလုံးညီညွတ်မှုကို ပြသသော လုပ်ဆောင်မှု ဖြစ်ကြောင်း ကြေညာခဲ့သည်။

"မိမိတို့၏ လက်နက်ကိုင်တပ်ဖွဲ့များ ရောက်ရှိနိုင်သည့် နေရာမရွေး၊ မည်သည့်နိုင်ငံမှ ဖြစ်စေ၊ အစ္စရေးရန်သူ၏ ဆိပ်ကမ်းများနှင့် ကုန်သွယ်မှု ဆက်ဆံသော ကုမ္ပဏီများ၏ သင်္ဘောအားလုံးကို ပစ်မှတ်ထား တိုက်ခိုက်မည်" ဟု ၎င်းက ပြောကြားခဲ့သည်။ ထို့အပြင် ဟယ်ယန်းက ဂါဇာကို ပိတ်ဆို့ ထားမှု ရုပ်သိမ်းရန် အစ္စရေးအပေါ် ဖိအားပေးရန်နှင့် ၎င်းနှင့် ဆက်ဆံရေး ဖြတ်တောက်ရန် နိုင်ငံများကို တိုက်တွန်းခဲ့သည်။

၂၀၂၃ ခုနှစ် နိုဝင်ဘာမှစတင်၍ ဟူသီသူပုန်များသည် ပင်လယ်နီတွင် သင်္ဘောအစီး ၁၀၀ ကျော်ကို တိုက်ခိုက်ခဲ့ပြီး သင်္ဘော ၄ စီး နစ်မြှုပ်ခဲ့ကာ ၁ စီးကို သိမ်းပိုက်ခဲ့သည့်အပြင် သင်္ဘောသား ၈ ဦး သေဆုံးစေခဲ့သည်ဟု Reuters ကဖော်ပြခဲ့သည်။ ယခုလအစောပိုင်းတွင် ၎င်းတို့က Liberia အလံလွှင့်တင်ထားသော ဂရိပိုင် Eternity C နှင့် Magic Seas ကုန်တင် သင်္ဘောများကို သိမ်းပိုက်ပြီး နစ်မြှုပ်ပစ်ခဲ့သည်။

ဟူသီသူပုန်များသည် အစ္စရေးနိုင်ငံရှိ မြို့ကြီးများသို့ ဒုံးပျံအလုံးအရင်းဖြင့် တိုက်ခိုက်မှုများ ပြုလုပ်ခဲ့သော်လည်း အများစုကို အစ္စရေး၏ လေကြောင်းရန်ကာကွယ်ရေးစနစ်များက ချေမှုန်းနိုင်ခဲ့သည်။ အဆိုပါတိုက်ခိုက်မှု များကို တုံ့ပြန်သည့်အနေဖြင့် အစ္စရေးသည် ယီမင်နိုင်ငံအတွင်း လေကြောင်း တိုက်ခိုက်မှုများကို အရှိန်မြှင့်လိုက်ပြီး ဟူသီသူပုန်များနှင့် ဆက်စပ် နေသောပစ်မှတ်များအပြင် ဆိပ်ကမ်းအခြေခံအဆောက်အအုံများကို ပစ်မှတ်ထား တိုက်ခိုက်ခဲ့ကာ တနင်္လာနေ့ (ဇူလိုင် ၂၈) က ပြင်းထန်သော လေကြောင်းတိုက်ခိုက်မှုများ ပြုလုပ်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂