ပူတင်နှင့် နေတန်ယာဟုတို့ တယ်လီဖုန်းဖြင့်ပြောဆိုဆွေးနွေးမှုကို ကရင်မလင် ထုတ်ပြန်

ရုရှားသမ္မတ ဗလာဒီမာပူတင်သည် အစ္စရေးဝန်ကြီးချုပ် ဘင်ဂျမင် နေတန်ယာဟု နှင့် ဇူလိုင် ၂၈ ရက်နေ့က တယ်လီဖုန်းဖြင့် ဆက်သွယ် ပြောဆိုခဲ့ကြောင်း ကရင်မလင်မှ ထုတ်ပြန်ခဲ့သည်။ အဆိုပါခေါင်းဆောင် နှစ်ဦးသည် ဆီးရီးယားအခြေအနေနှင့် အစ္စရေး-အီရန် မကြာသေးမီက ပဋိပက္ခအရှိန်မြင့်တက်လာမှုများနှင့်ပတ်သက်၍ အဓိကထား ဆွေးနွေး ခဲ့ကြသည်။

ကရင်မလင်၏ ထုတ်ပြန်ချက်အရ မော်စကိုမှ ဒေသတွင်းပဋိပက္ခများကို ငြိမ်းချမ်းစွာဖြေရှင်းရန် ကတိပြုထားကြောင်း ထပ်လောင်းအတည်ပြု ခဲ့သည်။ ပူတင်က ဆီးရီးယား၏ စည်းလုံးညီညွတ်မှု၊ အချုပ်အခြာ အာဏာနှင့် နယ်မြေပိုင်ဆိုင်မှုတို့အား ထိန်းသိမ်းရန်အရေးပါပုံကို အလေးထား ပြောကြားခဲ့သည်။ ထို့အပြင် အစ္စရေးနှင့် အီရန်တို့အကြား မကြာသေးမီ က ပဋိပက္ခအပြီး ညှိနှိုင်းဆွေးနွေးမှုများ စတင်ရာတွင် ရုရှား၏ အကူအညီ ကိုလည်း ပူတင်က ပြန်လည်ကမ်းလှမ်းခဲ့သည်။

မော်စကိုမှ အီရန်နျူကလီးယားအစီအစဉ်နှင့်ပတ်သက်သည့် တင်းမာမှုများ အတွက် ညှိနှိုင်းဖြေရှင်းမှုရရှိစေရန် နည်းလမ်းအားလုံးဖြင့် ပံ့ပိုးကူညီရန် အဆင်သင့်ရှိကြောင်း ကြေညာခဲ့သည်။ ပူတင်နှင့် နေတန်ယာဟု တို့သည် နှစ်နိုင်ငံဆက်ဆံရေးနှင့် အပြည်ပြည်ဆိုင်ရာ အရေးကြီးကိစ္စရပ်များ အပေါ် ဆွေးနွေးမှုများ ဆက်လက်လုပ်ဆောင်ရန် သဘောတူညီခဲ့ကြောင်း ကရင်မလင်က ထုတ်ပြန်ခဲ့သည်။

လွန်ခဲ့သည့်နှစ်ကုန်ပိုင်းတွင် ဘာရှာအာဆတ် အစိုးရ ပြုတ်ကျပြီးနောက် အစ္စရေးသည် ၎င်း၏နယ်စပ်အနီးတွင် ရန်သူများ အခြေစိုက်လာမှုကို တားဆီးရန် လိုအပ်ချက်ကိုအကြောင်းပြ၍ ဂိုလန်ကုန်းပြင်မြင့်ဒေသကို ကျော်လွန်ကာ ဆီးရီးယားတွင် ၎င်း၏ရပ်တည်မှုကို ချဲ့ထွင်ခဲ့သည်။ အစ္စရေးကာကွယ်ရေးတပ်မတော် (IDF) သည် ယခုလအစောပိုင်းတွင် ဒမတ်စကပ်မြို့ရှိ ဆီးရီးယားကာကွယ်ရေးဝန်ကြီးဌာနအား လေကြောင်း တိုက်ခိုက်မှုများ ဆင်နွှဲခဲ့ပြီး ယင်းတိုက်ခိုက်မှုများသည် ဆီးရီးယား တောင်ပိုင်းရှိ ဒရူဇ်လူနည်းစုအား ကာကွယ်ရန်အတွက်ဖြစ်ကြောင်း ဆိုခဲ့သည်။ နေတန်ယာဟုနှင့် ဆီးရီးယား၏ ယာယီခေါင်းဆောင် အစ္စလာမ်မစ် Hayat Tahrir al-Sham လူမျိုးစုတပ်ဖွဲ့၏ ကွန်မန်ဒါ Ahmed al-Sharaa တို့သည် အမေရိကန်အကြားဝင်စေ့စပ်မှုဖြင့် စစ်ပြေ ငြိမ်းရေး သဘောတူညီခဲ့ကြသည်။

ဇွန်လတွင် အစ္စရေးသည် အီရန်၏နျူကလီးယားနှင့်စစ်ရေး အခြေစိုက် စခန်းများကို အမေရိကန်ထောက်ခံမှုဖြင့် လေကြောင်းတိုက်ခိုက်မှုများ ပြုလုပ်ခဲ့ပြီး တီဟီရန်ကလည်း ပြန်လည်တုံ့ပြန်တိုက်ခိုက်မှုများ လုပ်ဆောင် ခဲ့သည်။ ပထမဆုံးတိုက်ခိုက်မှုများ စတင်ပြီးနောက် တင်းမာမှုများ လျှော့ချရန် ရုရှားက အစ္စရေးနှင့်အီရန်နှစ်နိုင်ငံစလုံးနှင့် ချက်ချင်း ဆက်သွယ် ခဲ့ပြီး ပူတင်က ရုရှားသည် အခြားသက်ဆိုင်သည့် အဖွဲ့အားလုံးထံသို့လည်းသဘောထားဖြေလျော့မှုဆိုင်ရာ အဆိုပြုချက်များစွာကို တင်ပြခဲ့သည် ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂