နေတိုးအဖွဲ့ဝင်နိုင်ငံများအနေဖြင့် ကာကွယ်ရေး အသုံးစရိတ်ကို GDP ၏ ၅ ရာခိုင်နှုန်းအထိ မြှင့်တင်သင့်ကြောင်း ထရမ့် ပြောကြား
နေတိုးအဖွဲ့ဝင်နိုင်ငံများသည် ၎င်းတို့၏ ကာကွယ်ရေးအသုံးစရိတ်ကို နိုင်ငံအလိုက် GDP ၏ ၅ ရာခိုင်နှုန်းအထိတိုးမြှင့်သင့်ကြောင်း အမေရိကန် ရွေးကောက်ခံသမ္မတ ဒေါ်နယ်ထရမ့်က ပြောကြားခဲ့သည်။
ဇန်နဝါရီ ၇ ရက်နေ့က အမေရိကန်တောင်ပိုင်း ဖလော်ရီဒါပြည်နယ်တွင် ပြုလုပ်သည့် သတင်းစာရှင်းလင်းပွဲ၌ ထရမ့် က ယခုကဲ့သို့ မှတ်ချက်ပေးခဲ့ခြင်း ဖြစ်သည်။
နေတိုးအဖွဲ့ဝင်များ၏ ကာကွယ်ရေးအသုံးစရိတ်သည် GDP ၏ ၂ ရာခိုင်နှုန်းမဟုတ်ဘဲ ၅ ရာခိုင်နှုန်း ရှိသင့်ကြောင်း ၎င်းကဆိုသည်။
ထရမ့်သည် ၎င်း၏ America First မူဝါဒကို မြှင့်တင်နေပြီး နေတိုးအဖွဲ့ဝင်နိုင်ငံများသည် ကာကွယ်ရေးအသုံးစရိတ်အတွက် သင့်တင့်မျှတသော အစုရှယ်ယာကို ပေးဆောင်ခြင်းမရှိကြောင်း ထပ်ခါတလဲလဲ ပြောဆို ခဲ့သည်။
ဇန်န၀ါရီလ ၂၀ ရက်နေ့တွင် သမ္မတရာထူးတာဝန်မထမ်းဆောင်မီ ရွေးကောက်ခံသမ္မတက နေတိုးအဖွဲ့ဝင် နိုင်ငံများအား ပိုမိုကြီးလေးသော တာဝန်ကို ထမ်းရွက်ရန် တိုက်တွန်းခဲ့သည်။ အမေရိကန်၏ ကာကွယ်ရေး အသုံးစရိတ်သည် ၃ ရာခိုင်နှုန်း ရှိနေသည်။
ကိုးကား-NHK World