မြန်မာဌာနေ ငါးရင်ဘောင်စာ မျိုးစိတ်သစ် (၂) မျိုးကို ကချင်နှင့် စစ်ကိုင်းတွင် တွေ့ရှိ

ကချင်ပြည်နယ်နှင့် စစ်ကိုင်းတိုင်းဒေသကြီးတို့တွင် မြန်မာဌာနေ ငါးရင်ဘောင်စာ မျိုးစိတ်သစ် (၂) မျိုး ထပ်မံတွေ့ရှိခဲ့ကြောင်း Native Species Conservation & Identification (NSCI) မှ ထုတ်ပြန်ထားသည်။

ယခုမျိုးစိတ်သစ်များသည် မြန်မာနိုင်ငံတွင်သာ တွေ့ရှိရသေးသည့် ဌာနေမျိုးရင်းမျိုးစိတ်များဖြစ်ပြီး ကချင်ပြည်နယ်၊ အင်းတော်ကြီးဒေသမှတွေ့ရှိခဲ့ရသည့် မျိုးစိတ်ကို အင်းတော်ကြီး ငါးရင်ဘောင်စာ (Laubuka indawgyiana) ဟုလည်းကောင်း၊ စစ်ကိုင်းတိုင်း၊ မြစ်သာမြို့နယ်၊ မြစ်သာမြစ်အတွင်းမှ တွေ့ရှိခဲ့သော ငါးရင်ဘောင်စာကိုမူ မြစ်သာ ငါးရင်ဘောင်စာ (Laubuka myitthaensis) ဟုလည်းကောင်း အမည်ပေးထားကြောင်း သိရသည်။

အင်းတော်ကြီး ငါးရင်ဘောင်စာကို သဲဆန်သည့် ချောင်းများနှင့် ရေကြည်ရေတိမ်ပိုင်းများတွင် ငါးခုံးမ၊ မှဲ့တပေါက်၊ ငါးခဲတံနှင့် ကျောက်ငါးသလဲထိုး ငါးတို့နှင့်အတူတွေ့ရှိခဲ့ပြီး မြစ်သာ ငါးရင်ဘောင်စာကိုမူ ရေငြိမ်ပိုင်းမြစ်ချောင်းများတွင် ငါးသလဲထိုး၊ ကျောက်ငါးသလဲထိုး၊ ကျောက်ငါးကြင်း၊ ငါးခုံးမနှင့် ငါးခဲတံတို့နှင့်အတူ ရှာဖွေတွေ့ရှိခဲ့ကြောင်း သိရသည်။

Source: Popular Myanmar