ဖေဖော်ဝါရီ ၃ ရက်တွင် ကျရောက် ကမ္ဘာ့ကင်ဆာနေ့ကို ဂုဏ်ပြုသောအားဖြင့် ဗြိတိန် ဝေလမင်းသမီး ကတ်သရင်း က တောအုပ်တစ်နေရာရှိ သစ်ပင်များအကြား ပြုံးရွှင်နေသော မျက်နှာအမူအယာဖြင့် လက်ဆန့်တန်းကာ ရိုက်ကူးထားသည့် ဓာတ်ပုံကို နန်းတော်၏ X စာမျက်နှာတွင် မျှဝေခဲ့ပါသည်။ ထိုဓာတ်ပုံကို ၆ နှစ် သားအရွယ် မင်းသားက ရိုက်ကူးခဲ့ခြင်းဖြစ်ပါသည်။

မင်းသမီးကတ်သရင်းသည် ဖော်မပြနိုင်သည့် ကင်ဆာရောဂါအတွက် ကုသမှုခံယူရန် ယမန်နှစ်က ပြည်သူ့တာဝန်များမှ အနားယူခဲ့ပြီး ပြီးခဲ့သည့်ဇန်နဝါရီလက ကင်ဆာပျောက်ကင်းသွားပြီဖြစ်ကြောင်း ကြေညာခဲ့ပါသည်။

ကင်ဆာရောဂါကိုယ်တိုင် ခံစားဖူးရသူဖြစ်သဖြင့် ကင်ဆာရောဂါခံစားနေသူများအတွက် စိတ်ခွန်အားပေးစေမည့် ယခုလုပ်ဆောင်ချက်အပေါ် ဂုဏ်ယူမိကြောင်း မင်းသမီးက ပြောကြားထားပါသည်။

ကိုးကား-CNN

အမေရိကန်နိုင်ငံ လော့စ်အိန်ဂျလိစ်မြို့ အရှေ့ဘက်မှ ဧကပေါင်း (၁၄၀၀၀) ကျော်ကို လောင်ကျွမ်းစေခဲ့သည့် Eaton မီးကို (၁၀၀) ရာခိုင်နှုန်း ထိန်းချုပ်နိုင်ခဲ့ပြီ ဖြစ်သည်ဟု မီးသတ်အရာရှိများက ပြောကြားခဲ့ပါသည်။ အဆိုပါထိန်းချုပ်နိုင်မှုသည် လော့စ်အိန်ဂျလိစ်မြို့ တစ်ဖက်စီ၌ ကြီးမားသောတောမီးလောင်ကျွမ်းမှုနှစ်ကြိမ် ဖြစ်ပွားခဲ့ပြီးနောက် သီတင်းပတ် (၃) ပတ်ကျော်ကြာအတွင်း ထင်ရှားသည့်မှတ်တိုင် တစ်ခုဖြစ်သည် ဟုလည်း သိရပါသည်။

လော့စ်အိန်ဂျလိစ်မြို့ အနောက်ဘက်က ဧကပေါင်း (၂၃,၄၄၈) ဧကကို လောင်ကျွမ်းစေခဲ့သည့် Palisades မီးကိုလည်း လက်ရှိအချိန်တွင် (၁၀၀) ရာခိုင်နှုန်း ထိန်းချုပ်နိုင်ခဲ့ပြီဖြစ်သည်ဟုလည်း ကယ်လီဖိုးနီးယား သစ်တောနှင့် မီးဘေးကာကွယ်ရေးဌာနက ပြောကြား ခဲ့ပါသည်။ ကြီးမားသောမီးလောင်ကျွမ်းမှုကြီး နှစ်ခုနှင့် သေးငယ်သော မီးလောင်ကျွမ်းမှုအများအပြားသည် လော့စ်အိန်ဂျလိစ်မြို့သမိုင်း၌ အဆိုးရွားဆုံး သဘာဝ ဘေးအန္တရာယ်ကို ဖန်တီးခဲ့ပြီး လူ (၂၈) ဦး သေဆုံးကာ အဆောက်အဦပေါင်း (၁၆,၀၀၀) ကျော် ထိခိုက်/ ပျက်စီး ခဲ့သည်ဟုလည်း သိရပါသည်။

တစ်ချိန်တည်းမှာပင် လူပေါင်း (၁၈၀,၀၀၀) ကျော်ကို ဘေးကင်းရာသို့ ရွှေ့ပြောင်းရန် အမိန့်ပေးထားသည်ဟုလည်း လော့စ်အိန်ဂျလိစ်မြို့ တာဝန်ရှိသူများက ပြောကြားခဲ့ပါသည်။ အဆိုပါမီးလောင်ကျွမ်းမှုများကြောင့် Private forecaster AccuWeather စီမံကိန်းများသည် ပျက်စီးဆုံးရှုံးမှုနှင့် စီးပွားရေးဆုံးရှုံးမှု အမေရိကန် ဒေါ်လာ (၂၅၀) ဘီလီယံကျော် ရှိခဲ့ကြောင်းလည်း သိရပါသည်။ ထို့အပြင် လွန်ခဲ့သော သီတင်းပတ်အတွင်း ကယ်လီဖိုးနီးယားပြည်နယ် တောင်ပိုင်း၌ ရက်ရှည် မိုးရွာသွန်းခဲ့မှုနှင့်အတူ ရေကြီးမှုများနှင့် မြေပြိုမှုများကြောင့် ဘေးအန္တရာယ်များ ပိုမိုတိုးမြင့်လာခဲ့ကြောင်းလည်း အာဏာပိုင်များက ပြောကြားခဲ့ပါသည်။

ကိုးကား-NP News

အေသင်    ဖေဖော်ဝါရီ ၃

ဂရိနိုင်ငံ ဆန်တိုရီနီကျွန်းတွင် ဖေဖော်ဝါရီ ၂ ရက်တစ်ရက်တည်း အသေးစားငလျင် အကြိမ်ရေ ၂၀၀ ကျော်ထိ လှုပ်ခတ်မှုဖြစ်ပွားခဲ့ကြောင်း ယနေ့သတင်းများတွင် ဖော်ပြထားသည်။

ဆန်တိုရီနီကျွန်းသည် ကမ္ဘာလှည့်ခရီးသည်များ နှစ်စဉ်သန်းနှင့်ချီ၍ လာရောက်လည်ပတ်သည့် ကျွန်းဖြစ်ပြီး ဆိပ်ကမ်းမြို့များတည်ရှိသဖြင့် ရေကြောင်းကုန်သွယ်မှုအတွက် အရေးပါသည့် ကျွန်းဖြစ်ကြောင်း၊ အသေးစားငလျင်အကြိမ်ရေ ၂၀၀ ကျော်ထိ လှုပ်ခတ်မှုဖြစ်ပွားခဲ့ခြင်းကြောင့် ဆိပ်ကမ်းလေးခုကို ယာယီပိတ်ထားကြောင်း၊ စာသင်ကျောင်းများကို ယနေ့မှစ၍ ယာယီပိတ်ထားမည်ဖြစ်ဖြစ်ကြောင်း၊ ငလျင်များနှင့်ပတ်သက်ပြီး ဆူနာမီလှိုင်းအန္တရာယ်သတိပေးချက်ထုတ်ပြန်ထားခြင်းမရှိသော်လည်း အမ်မော်ဒီဆိပ်ကမ်း၊ အာမန်နီဆိပ်ကမ်း၊ ကော်ဖို့စ်ဆိပ်ကမ်းနှင့် ဖီရာဆိပ်ကမ်းအနီးတို့တွင်နေထိုင်သည့် ဒေသခံများအနေဖြင့် အထူးသတိပြုရမည်ဖြစ်ကြောင်း Civil Protection Ministry ကထုတ်ပြန်ခဲ့သည်။

ငလျင်လှုပ်ခတ်မှုများဖြစ်ပွားခဲ့ပြီး‌နောက် ဂရိဝန်ကြီးချုပ် ကိုင်ရီယာကို့စ်က ဖေဖော်ဝါရီ ၂ ရက်တွင် အေသင်မြို့၌ အရေးပေါ်အစည်းအဝေးတစ်ရပ်ပြုလုပ်ကာ ငလျင်လှုပ်ခတ်လှိုင်းဒဏ်သင့် ဧရိယာအတွင်းနေထိုင်သောဒေသခံများကို အရေးပေါ် ဘေးလွတ်ရာရွှေ့ပြောင်းပေးနိုင်ရေး အစီအမံများအတွက် ဆွေးနွေးမှုပြုလုပ်ခဲ့ကြောင်း သိရသည်။

Ref: Russia Today၊ Trs: Sai Sat

Source: ရတနာပုံသတင်းစာ

ဂျပန်နိုင်ငံ၌ ကားလမ်းပေါ်တွင် ရုတ်တရက် ဖြစ်ပေါ်လာသည့် မီတာ ၄၀ အနက်ရှိ တွင်းနက်ကြီးထဲသို့ လူတစ်ဦးပြုတ်ကျသွားခဲ့သည်မှာ ၄ ရက်ကြာရှိပြီဖြစ်ပြီး ယခုအထိ အပေါ်သို့ ပြန်မတက်နိုင်သေးကြောင်း သိရပါသည်။

ကယ်ဆယ်ရေးသမားများသည် ဖေဖော်ဝါရီ ၁ ရက်တွင် ကုန်းစောင်းတစ်ခု တည်ဆောက်၍ ကယ်ဆယ်ရန် ထပ်မံကြိုးစားခဲ့ပါသည်။ ဖြစ်စဉ်သည် တိုကျိုမြို့ အပြင်ဘက်ရှိ ယာရှိုးမြို့၌ ဇန်နဝါရီ ၂၈ ရက်က ဖြစ်ပွားခဲ့ခြင်းဖြစ်ပြီး တွင်းအနက်သည် အိုလံပစ်ရေကူးကန် တစ်ခုစာ အရှည်ရှိကာ တွင်းဝလည်း ပိုကျယ်လာခြင်းကြောင့် ကယ်ဆယ်ရေးသမားများသည် ကယ်ဆယ်ရေးလုပ်ငန်းများဆောင်ရွက်ရန် ရုန်းကန်နေရသည်။ လက်ရှိတွင် ကုန်းစောင်းတစ်ခု ဖန်တီးနေပြီး အမြန်ဆုံး ကယ်ဆယ်သွားမည်ဟု ကယ်ဆယ်ရေး ဝန်ထမ်းတစ်ဦး က ပြောပါသည်။

တွင်းထဲပြုတ်ကျသွားသူသည် အသက် ၇၄ နှစ်အရွယ် အမျိုးသားဖြစ်ပြီး အဆိုပါတွင်းပေါက်သည် ပထမတွင် အချင်း ၅ မီတာဝန်းကျင်သာ ရှိနေရာမှ ပိုမိုကြီးထွား လာခြင်းကြောင့် ကယ်ဆယ်ရေးသမားများနှင့် စက်ယန္တရားကြီးများ တွင်းစပ်အနားထိ အရောက်သွားရန် ခက်ခဲနေပါသည်။ တွင်းပေါက်သည် ရေမြောင်းပေါက်များကြောင့် ဖြစ်လာသည်ဟု ယူဆရပြီး အဆိုပါ ဧရိယာ၌ နေထိုင်သော နေထိုင်သူ ၁.၂ သန်းကိုလည်း ကယ်ဆယ်ရေးလုပ်ငန်းများအား အဟန့်အတား မဖြစ်စေရန်နှင့် အညစ်အကြေးများ ယိုစိမ့်ခြင်းမှ ကာကွယ်ရန်၊ ရေချိုးခန်းသုံးခြင်း၊ အ၀တ်လျှော်ခြင်းများ လျှော့ချရန်အတွက် ကယ်ဆယ်ရေးသမားများက တောင်းဆိုထားပါသည်။

ကိုးကား-NP News

ယနေ့ခေတ်ကမ္ဘာပေါ်တွင် လူသားတို့၏ နေ့စဉ် လုပ်ဆောင်မှုများ၌ AI (ဉာဏ်ရည်တု)အပြင် အိုင်တီ နည်းပညာကဏ္ဍသည် လျင်မြန်စွာဖွံ့ဖြိုးတိုးတက်လာသည့်အတွက် စွမ်းအင်သုံးစွဲမှုသည်လည်း တဖြည်းဖြည်းမြင့်မားလာလျက်ရှိပါသည်။ ယင်းလိုအပ်ချက်ကိုဖြည့်ဆည်းရန်အတွက် သဘာဝမှ ထုတ်ယူသည့် စွမ်းအင်များနှင့် လုံလောက်ခြင်း မရှိတော့ဘဲ နျူးကလီးယားကဏ္ဍသည် စွမ်းအင် ထုတ်လုပ်ရေးအတွက် အရေးကြီးသော အခန်းကဏ္ဍမှ ပါဝင်လာပါသည်။ 

ထိုင်းနိုင်ငံ၏ အကြီးဆုံးလုပ်ငန်းစုဖြစ်သည့် ချာရီအွန် ပိုကာပန်အုပ်စု၏ အကြီးတန်းဥက္ကဋ္ဌ ဒါနင်ချီရာဗန်နွန် က ဘန်ကောက်မြို့ရှိ ချူလာလောင်ကွန်တက္ကသိုလ်၌ ဖေဖော်ဝါရီ ၃ ရက်နေ့တွင် ကျင်းပသည့် “Chula Thailand Presidents Summit 2025” တွင် “အေအိုင် နှင့်နည်းပညာဖြင့် မောင်းနှင်သော နေ့စဉ်လူနေမှုဘဝသည် လျှပ်စစ်ဓာတ်အားလိုအပ်သောကြောင့် သန့်ရှင်းသော စွမ်းအင်လုပ်ငန်းကို ခေတ်မီစေရန် လုပ်ဆောင်သင့်သည်” ဟု ၎င်းက အလေးအနက် ပြောကြားခဲ့ ပါသည်။ 

နေရောင်ခြည်၊ လေနှင့်ရေအားလျှပ်စစ်တို့၏ ထုတ်လုပ်မှုမှာ မလုံလောက်ကြောင်းသတိပြုမိပြီး ကမ္ဘာ့လူ့အဖွဲ့အစည်းသည် နျူကလီးယားစွမ်းအင်ကို အာရုံစိုက်နေကြောင်းနှင့် အင်ဒိုနီးရှားနှင့် မလေးရှားတို့ကလည်း နျူကလီးယားစွမ်းအင်ထုတ်လုပ်မှုကို ကြီးကြပ်ရန် ဥပဒေများချမှတ်ထားပြီးဖြစ်သော်လည်း ထိုင်းကမူ မပေးနိုင်သေးကြောင်း ၎င်းကထောက်ပြသွားပါသည်။ 

ပထဝီဝင်နိုင်ငံရေး၊ ရာသီဥတုပြောင်းလဲမှုနှင့် ဒစ်ဂျစ်တယ် အသွင်ကူးပြောင်းမှုတို့ကဲ့သို့ ကမ္ဘာလုံးဆိုင်ရာ စိန်ခေါ်မှုများကြားမှ ထိုင်းစီးပွားရေးသည် ကြီးထွားလာရန် အလားအလာရှိနေဆဲဖြစ်ကြောင်း၊ ထိုင်းနိုင်ငံသည် ခရီးသွားလာရေး၊ စားနပ်ရိက္ခာထုတ်လုပ်ရေးနှင့် သွားလာရေးအဆင်ပြေစေရန်အတွက် အချက်အချာကျသောနေရာဖြစ်ခြင်းကြောင့် အကျပ်အတည်းများကြားတွင် အခွင့် အလမ်းများရှိကြောင်း ၎င်းကဆိုသွားပါသည်။

သို့ဖြစ်ရာ ထိုင်းအစိုးရအနေဖြင့် နျူကလီးယားစွမ်းအင် ထုတ်လုပ်မှုဆိုင်ရာလုပ်ငန်းများကို အာရုံစိုက်ပြီး လုပ်ဆောင် ရန်လိုအပ်လာကြောင်း တိုက်တွန်းခဲ့သည့်အပြင် အစိုးရအတွက် ၎င်း၏ လုပ်ငန်းစုမှ လိုအပ်သည့်အရာများကို ပံ့ပိုးကူညီပေးသွားမည်ဟု ပြောကြားသွားပါသည်။

ကိုးကား-Myanmar National Post

တိုကျို   ဖေဖော်ဝါရီ ၃

ဂျပန်အာကာသအေဂျင်စီသည် ၎င်း၏ ၂၀၂၅ ခုနှစ်အတွက် ပထမဆုံး အာကာသမစ်ရှင်ကို ဖေဖော်ဝါရီ ၂ ရက်တွင် လွှတ်တင်ခဲ့ကြောင်း သိရသည်။

ဂျပန် အာကာသအေဂျင်စီသည် ဖေဖော်ဝါရီ ၂ ရက်တွင် မီချီဘီကီ-၆ အမည်ရှိ တည်နေရာနှင့် လမ်းကြောင်းပြစနစ် ဂြိုဟ်တုကို အိတ်ချ်- ၃ ဒုံးပျံဖြင့် တာနီဂါရှီးမားအာကာသစခန်းမှတစ်ဆင့် လွှတ်တင်ခဲ့သည်။

လွှတ်တင်ပြီး ၂၉ မိနစ်အကြာတွင် အိတ်ချ်-၃ ဒုံးပျံသည် အလေးချိန် ကီလိုဂရမ် ၄၉၀၀ ရှိသော မီချီဘီကီ-၆ ဂြိုဟ်တုကို သတ်မှတ်ပတ်လမ်းပေါ်သို့ ပို့ဆောင်ပေးနိုင်ခဲ့ကြောင်း သိရသည်။

မီချီဘီကီ-၆ ဂြိုဟ်တုသည် ဂျပန်အာကာအေဂျင်စီ၏ QZSS အမည်ရှိ တည်နေရာနှင့် လမ်းကြောင်းပြ ဂြိုဟ်တုကွန်ရက်၏ ပဉ္စမမြောက်ဂြိုဟ်တုဖြစ်သည်။

မီချီဘီကီ-၆ ဂြိုဟ်တုမစ်ရှင်သည် အိတ်ချ်-၃ ဒုံးပျံများ၏ ပဉ္စမမောက် မစ်ရှင်ဖြစ်ပြီး ဂျပန်အာကာသအေဂျင်စီအတွက် ယခုနှစ်၏ ပထမဆုံးမစ်ရှင်ဖြစ်ကြောင်း သိရသည်။

ဂျပန်အာကာသအေဂျင်စီသည် အိတ်ချ်-၃ ဒုံးပျံများကို ၂၀၂၃ ခုနှစ်တွင် စတင်အသုံးပြုခဲ့ကြောင်း သိရသည်။

Ref: Russia Today၊ Trs: KKO

Source: ရတနာပုံသတင်းစာ

ဆက်စပ်သတင်းများ- https://sacministry.gov.mm/my/news/2273

ဘာမာကို   ဖေဖော်ဝါရီ ၂

မာလီနိုင်ငံ အနောက်တောင်ပိုင်းရှိ ‌ရွှေတွင်းတစ်တွင်း၌ ရေလွှမ်းမိုးမှုဖြစ်ပွားခဲ့ရာ အမျိုးသမီးများနှင့် ကလေးများအပါအဝင် တစ်ပိုင်တစ်နိုင် ရွှေတူးသမား ၁၃ ဦး သေဆုံးခဲ့ရကြောင်း မာလီရွှေတူးဖော်သူများသမဂ္ဂက ဖေ‌ဖော်ဝါရီ ၁ ရက်တွင် သတင်းထုတ်ပြန်ထားသည်။

ရေလွှမ်းမိုးမှု ဖြစ်ပွားခဲ့သော ရွှေတွင်းသည် မာလီအနောက်တောင်ပိုင်း ကိုလီကိုရိုဒေသကျေးရွာတစ်ခုအနီး တည်ရှိကြောင်း သိရသည်။

ရွှေတွင်း‌ရေလွှမ်းမိုးမှုဖြစ်စဉ်သည် ဇန်နဝါရီ ၂၉ ရက်တွင် ဖြစ်ပွားခဲ့ခြင်းဖြစ်ကြောင်း မာလီတာဝန်ရှိသူများက ပြောကြားခဲ့သည်။

ရွှံ့နစ်ရေများ လှောင်ထားသည့် ရွှံ့ကန်တစ်ကန် ကျိုးပေါက်ခဲ့ပြီးနောက် ရွှေတွင်းရေလွှမ်းမိုးမှုဖြစ်ပွားခဲ့ရခြင်းဖြစ်သည်။

ပြီးခဲ့သည့် နှစ်များအတွင်း ကမ္ဘာ့ဈေးကွက်၌ ရွှေဝယ်လိုအားနှင့် ရွှေဈေးတက်လာမှုတို့ကြောင့် မာလီနိုင်ငံအပါအဝင် အနောက်အာဖရိကနိုင်ငံများ၌ တစ်နိုင်တစ်ပိုင် ရွှေတူးဖော်မှုလုပ်ငန်းများ အားကောင်းလာခဲ့သည်။

သို့ရာတွင် စည်းမဲ့ကမ်းမဲ့ရွှေရှာဖွေ တူးဖော်မှုများကြောင့်လည်း ရွှေတွင်းမတော်တဆမှုများလည်း မကြာခဏဖြစ်ပွားခဲ့ကြောင်း သိရသည်။ 

Source: ရတနာပုံသတင်းစာ

အမေရိကန် နိုင်ငံတကာဖွံ့ဖြိုးရေးအေဂျင်စီ (USAID) ၏ website မှာ ဖေဖော်ဝါရီ ၁ ရက်(စနေနေ့)မှစ၍ အွန်လိုင်းပေါ်တွင် ပိတ်သွားခဲ့ပြီဖြစ်ပါသည်။ အမေရိကန် သမ္မတဒေါ်နယ်ထရမ့်က နိုင်ငံတကာအကူအညီပေးရေးအစီအစဉ်များကို ဆိုင်းငံ့လိုက်ပြီးနောက် USAID ဝန်ထမ်းများ အလုပ်ရပ်ဆိုင်းခြင်းနှင့် ကမ္ဘာတစ်ဝှမ်းလုံးရှိ စီမံကိန်း ထောင်နှင့်ချီဆိုင်းငံ့ခြင်းများ ဖြစ်ပေါ်ခဲ့သည်။ ယခု website ပိတ်သိမ်းသွားမှုမှာ ထိုအခြေအနေများနှင့် ဆက်စပ်နေသည်ဟု ယူဆရပါသည်။

အတိုက်အခံ ဒီမိုကရက်လွှတ်တော်အမတ်များက သမ္မတ ထရမ့်အစိုးရသည် USAID  ၏ လွတ်လပ်သောလုပ်ငန်းများကို အဆုံးသတ်စေပြီး နိုင်ငံခြားရေးဝန်ကြီး ဌာနလက်အောက်ခံ လွှမ်းမိုးခြယ်လှယ်ရန် လုပ်ဆောင်နေသည်ဟု စိုးရိမ်ကြောင်း ပြောကြားနေကြပါသည်။ USAID သည် အမေရိကန်ကွန်ဂရက်လွှတ်တော်က အတည်ပြုထားသော ရန်ပုံငွေဖြင့် သီးခြားရပ်တည်နေသည့် အဖွဲ့အစည်းတစ်ရပ်ဖြစ်သဖြင့် ဒေါ်နယ်ထရမ့် က ဖျက်သိမ်းရန် အခွင့်အာဏာမရှိကြောင်း၊ USAID ၏ လုပ်ငန်းများသည် အမေရိကန်ပြည်ထောင်စု အမျိုးသားလုံခြုံရေးအတွက် အရေးကြီးကြောင်းကိုလည်း ဒီမိုကရက်တစ်များက သတိပေးထားကြသည်။ 

ဒေါ်နယ်ထရမ့်နှင့် ရီပတ်ဘလစ်ကန် လွှတ်တော်အမတ်များကမူ နိုင်ငံတကာအကူအညီနှင့်ဖွံ့ဖြိုးရေးအထောက်အပံ့အများစုမှာ ဖြုန်းတီးနေခြင်းသာ ဖြစ်သည် ဟု ပြောကြားခဲ့ပါသည်။ ဒေါ်နယ်ထရမ့် သမ္မတ ရာထူးစတင်တာဝန်ယူချိန်တွင် အမေရိကန်က နိုင်ငံတကာကို ထောက်ပံ့ပေးနေသည့် အကူအညီများအား ရပ်ဆိုင်းလိုက်ပြီး သီတင်း ၂ ပတ်အကြာတွင် USAID ကို ချုပ်ကိုင်မည်ဆိုသည့် စိုးရိမ်မှုများ ရှိနေကြသည်။

ကိုးကား-AP

ပိုမို ဖတ်ရှုရန်
https://sacministry.gov.mm/my/news/2292
 

လေထုညစ်ညမ်းမှုကို လျှော့ချနိုင်ရန်အတွက် ထိုင်းအစိုးရအနေဖြင့် တစ်နိုင်ငံလုံးတွင် ဖုန်မှုန့်များကို  ကာကွယ်ပေးနိုင်သည့်     ဖုန်ကာစားသောက်ဆိုင် အရေအတွက်ကို သုံးလအတွင်း ၂၀,၀၀၀ အထိ တိုးမြှင့်မည်ဖြစ်သည်ဟု  ကျန်းမာရေးဝန်ကြီးဌာနမှ အရာရှိကြီးတစ်ဦးက ဖေဖော်ဝါရီလ ၂ ရက်တွင် ပြောသည်။

လက်ရှိတွင် ထိုင်းနိုင်ငံအတွင်း၌ ဖုန်ကာစားသောက်ဆိုင်အရေအတွက်မှာ ပြည်နယ်ကိုးခုအတွင်း ၂၃၄ ဆိုင်သာ ရှိနေသေးသောကြောင့် ပြည်သူများ၏ ကျန်းမာရေးအတွက် အဆိုပါ စားသောက်ဆိုင်အရေအတွက်ကို တိုးမြှင့်ရန်စီစဉ်ရခြင်းဖြစ်ကြောင်း ကျန်းမာရေးဝန်ကြီးဌာနမှ လက်ထောက်ညွှန်ကြားရေးမှူးချုပ် ဒေါက်တာသီတီဆာဝေသန်းက   ပြောသည်။

ကနဦးအစီအစဉ်အဖြစ်     အစိုးရက ဘန်ကောက်မြို့နှင့် အနီးအနားရှိ ပြည်နယ်များမှ   စားသောက်ဆိုင်များအား စားသုံးသူဖောက်သည်များအတွက် ဖုန်ကာစားသောက်ဆိုင် ဖွင့်လှစ်၍ ဝန်ဆောင်မှုပေးနိုင်မည့် နည်းလမ်းများကို သင်ကြားပေးမည်ဖြစ်သည်။ ယင်းနောက်တွင် ဖူးခက်၊ ချင်းမိုင်ကဲ့သို့သော မြို့များတွင်လည်း လေ့ကျင့်သင်ကြားမှုများကို ဆက်လက်လုပ်ဆောင်မည်ဖြစ်သည်။

အစိုးရ၏ယခုအစီအစဉ်သည် နိုင်ငံအတွင်းရှိ   ပြည်နယ်အများအပြားတွင် လေထုညစ်ညမ်းမှုများဖြစ်ပွားပြီးနောက် အများပြည်သူများနှင့်  သက်ဆိုင်သည့် နေရာများတွင် ဖုန်ကာအဆောက်အအုံများ တည်ဆောက်မည့်အစီအစဉ်၏    တစ်စိတ်တစ်ဒေသဖြစ်သည်။

ထို့ပြင် ထိုင်းအစိုးရအနေဖြင့် နိုင်ငံအတွင်းရှိ မူကြိုကျောင်းများနှင့် စာသင်ကျောင်းများတွင်လည်း ဖုန်ကာကွယ်ပေးနိုင်သည့် အဆောက်အအုံများ အသုံးပြုကြရန် တိုက်တွန်းထားသည်။  

Source: Myawady Web Portal

ကမ္ဘာလုံးဆိုင်ရာ တည်နေရာအချက်အလက်များကို ပိုမိုတိကျစွာဖော်ပြနိုင်ရန် ဂျပန်နိုင်ငံက H3 ဒုံးပျံကို အာကာသထဲသို့ ဖေဖော်ဝါရီ ၂ ရက်နေ့တွင် လွှင့်တင် ခဲ့ကြောင်း ဂျပန်နိုင်ငံတိုကျိုသတင်းဌာနက ဖော်ပြထားပါသည်။

Michibiki 6 ဂြိုလ်တုကို တင်ဆောင်ထားသည့် H3 ဒုံးပျံကို ဂျပန်နိုင်ငံအနောက်တောင်ပိုင်းကျွန်းစုရှိ Tanegashima အာကာသစခန်း မှ လွှင့်တင်ခဲ့ခြင်း ဖြစ်ပြီး   ယခုအကြိမ်လွှင့်တင်မှုသည် H3 အမျိုးအစားဒုံးပျံအား စတုတ္ထအကြိမ်မြောက် အောင်မြင်စွာ လွှင့်တင်နိုင်ခြင်း ဖြစ်ပါသည်။ 

လက်ရှိတွင် ဂျပန်နိုင်ငံ၌ ဒေသတွင်း ခြေရာခံစနစ်အတွက် QZSS ဂြိုလ်တုစနစ်ကို အသုံးပြုလျက်ရှိပြီး Michibiki 6 သည် ပဉ္စမမြောက်သုံးစွဲမည့်  ဂြိုလ်တုစနစ် ဖြစ်လာမည်ဖြစ်ပါသည်။

Michibiki သည် ကား၊ ဖုန်း၊ ရေကြောင်းသွားလာမှုနှင့် ဒရုန်းတို့၏ တည်နေရာကို ပိုမိုကောင်းမွန်စွာ ခြေရာခံနိုင်ကြောင်း သိရှိရပါသည်။

ကိုးကား -Asia - Pacific