နိုင်ငံခြားကုမ္ပဏီများထံမှ ရင်းနှီးမြှုပ်နှံမှုများဖြင့် ပြင်သစ်တွင် ကြီးမားသော ဉာဏ်ရည်တုဒေတာစင်တာကြီးတစ်ခုကို တည်ဆောက်မည် ဖြစ်ကြောင်း ပြင်သစ်သမ္မတ Macron က ပြောကြားခဲ့ပြီး ဖေဖော်ဝါရီ ၁၀ ရက်နေ့တွင် ပါရီ၌ ကျင်းပသည့် AI Action Summit တွင် ထိုသို့ ပြောကြားခဲ့ခြင်းဖြစ်သည်။

အဆိုပါထိပ်သီးအစည်းအဝေးတွင် အိန္ဒိယ ဝန်ကြီးချုပ် Narendra Modi၊ အမေရိကန် ဒုတိယသမ္မတ JD Vance နှင့် တရုတ် ဒုဝန်ကြီးချုပ် Zhang Guoqing တို့အပါအဝင် ကမ္ဘာတစ်ဝှမ်းရှိ အစိုးရအဖွဲ့အစည်းများနှင့် ကုမ္ပဏီများမှ ဝန်ထမ်း ၁,၀၀၀ ကျော် တက်ရောက်ခဲ့ကြသည်။

လာမည့်နှစ်များအတွင်း အဆိုပါဒေတာစင်တာပရောဂျက်အတွက် ယူရို ၁၀၉ ဘီလီယံ သို့မဟုတ် ဒေါ်လာ ၁၁၂ ဘီလီယံခန့် ရင်းနှီးမြှုပ်နှံမည် ဖြစ်ကြောင်း Macron က ထုတ်ပြန်ကြေညာခဲ့သည်။

အမေရိကန်၏ ဧရာမ နည်းပညာကုမ္ပဏီကြီး Amazon နှင့် ကနေဒါ၊ ဗြိတိန်နှင့် ဂျပန်နိုင်ငံတို့မှ ကုမ္ပဏီများက အဆိုပါပရောဂျက်တွင် ရင်းနှီးမြှုပ်နှံကြမည်ဖြစ်ကြောင်း ပြင်သစ်သမ္မတရုံးက ပြောကြားခဲ့သည်။

ပြင်သစ်တွင် AI ဒေတာစင်တာတစ်ခုလည်ပတ်ရန် လိုအပ်သော လျှပ်စစ်ဓာတ်အားပမာဏ အမြောက်အမြားဖြန့်ဖြူးပေးနိုင်သည့် နျူကလီးယား ဓာတ်အားပေးစက်ရုံများရှိကြောင်း Macron က ပြောကြားခဲ့သည်။

ရုပ်ကြွင်းလောင်စာတူးဖော်ထုတ်လုပ်မှုအား တိုးမြှင့်လုပ်ကိုင်သွားမည့် အစီအစဉ်နှင့်ပတ်သက်၍ အမေရိကန်သမ္မတ ဒေါ်နယ်ထရမ့် မကြာခဏ ပြောလေ့ရှိသည့် “drill, baby, drill” ဆောင်ပုဒ်ကို ရည်ညွှန်း၍ Macron က ပြင်သစ်တွင် ရုပ်ကြွင်းလောင်စာတူးဖော်ရန် မလိုအပ်ကြောင်း ပြောကြား ခဲ့သည်။

လက်ရှိ အမေရိကန်နှင့် တရုတ်နိုင်ငံတို့က ဦးဆောင်နေသည့် AI နည်းပညာ ဖွံ့ဖြိုးတိုးတက်ရေးနှင့်ပတ်သက်၍ ပြင်သစ်သမ္မတသည် လက်ရှိအနေအထားကို ပြောင်းလဲရန် အဆိုပါ AI ဒေတာစင်တာအား တည်ဆောက်လိုပုံရသည်။

ကိုးကား-NHK News

Photo- France 24

တောင်အဖရိကကိုလိုနီအုပ်ချုပ်မှုမှ လွတ်လပ်ရေးရရှိအောင် ဦးဆောင် တိုက်ပွဲဝင်ခဲ့သူ၊ နမီးဘီးယားနိုင်ငံ၏ ပထမဆုံးသမ္မတအဖြစ် ၁၅ နှစ်တိုင် ထမ်းဆောင်ခဲ့သူ ဆမ်နျုဂျိုမာသည် ဖေဖော်ဝါရီ ၈ ရက် (စနေနေ့) ည အချိန်တွင် ကွယ်လွန်သွားပြီဖြစ်ကြောင်း လက်ရှိသမ္မတ Nangolo Mbumba က ဖေဖော်ဝါရီ ၉ ရက် (တနင်္ဂနွေနေ့)တွင် ကြေညာလိုက်ပါသည်။ ဆမ်နျုဂျိုမာ ကွယ်လွန်ချိန်တွင် အသက် ၉၅ နှစ်အရွယ်ရှိပြီ ဖြစ်ပါသည်။ 

ဗြိတိန်ချားလ်စ်ဘုရင်က ဆမ်နျုဂျိုမာ ကွယ်လွန်မှုမှာ လွန်စွာဝမ်းနည်း ကြေကွဲရပါကြောင်း၊ နျုဂျိုမာ၏ ဘဝတစ်လျှောက်လုံး လွတ်လပ်ရေးနှင့် ဒီမိုကရေစီအတွက် စွမ်းစွမ်းတမံကြိုးပမ်းဆောင်ရွက်ခဲ့မှုမှာ သမိုင်းတင်ရစ် ခဲ့ပါကြောင်း ပြောကြားလိုက်ပါသည်။ 

၁၉၉၀ ပြည့်နှစ်တွင် တောင်အဖရိကကိုလိုနီအုပ်ချုပ်ရေးမှ လွတ်လပ်ရေး တိုက်ပွဲဦးဆောင်ခဲ့သူနှင့် နိုင်ငံကို ဒီမိုကရေစီနှင့် တည်ငြိမ်အေးချမ်းစေရန် ထူထောင်ပေးခဲ့သူ နျုဂျိုမာသည် ၂၀ ရာစု တောင်အာဖရိက ကိုလိုနီနိုင်ငံများအဖြစ်မှ လွတ်မြောက်စေရန် ဦးဆောင်ခဲ့သော အာဖရိကခေါင်းဆောင်ကြီးများအနက် နောက်ဆုံးမျိုးဆက်လည်းဖြစ်ပါသည်။ 

ကိုးကား -The Guardian

အမေရိကန်အစိုးရ၏ ဝါဒဖြန့်ချိရေး ယန္တရားများဖြစ်သည့် VOA (အမေရိက အသံ) ၊ RFE (ဥရောပအခမဲ့ ရေဒီယို) တို့ကို ဖျက်သိမ်းရန်အတွက် အမေရိကန်အစိုးရ စွမ်းဆောင်ရည်ဌာန (DOGE)၏ အကြီးအကဲ ဖြစ်သူ အီလွန်မက်စ်က ဖေဖော်ဝါရီ ၉ ရက်နေ့က တောင်းဆိုလိုက်ကြောင်း သိရပါသည်။ မက်စ်က ၎င်းဌာနများသည် အမေရိကန် ပြည်သူများ၏ အခွန်ဘဏ္ဍာငွေများကို ဖြုန်းတီးနေကြသည့် ဌာနများ ဖြစ်သည်ဟု ဆိုသည်။ 

RFE/ RL ဌာနကို ဥရောပတွင် အမေရိကန်လိုလားသောအုပ်စုများ တည်ထောင်ရန်နှင့် ဆိုဗီယက်ဆန့်ကျင်ရေးဝါဒဖြန့်ရန် ၁၉၅၀ ခုနှစ်တွင် တည်ထောင်ခဲ့ပြီး CIA ကဦးစီးကာ စတင်လုပ်ဆောင်ခဲ့ခြင်းဖြစ်သည်။ Voice of America (VOA) အား နာဇီဝါဒကို တန်ပြန်ရန် ၁၉၄၀ ခုနှစ်တွင် စတင်တည်ထောင်ခဲ့ပြီး ၁၉၄၇ ခုနှစ်တွင် ဆိုဗီယက်ယူနီယံကို တန်ပြန်ရန်အတွက် ရည်ရွယ်ချက်ပြောင်းခဲ့ပါသည်။ ၎င်းကို အမေရိကန် ကွန်ဂရက်၏ ရန်ပုံငွေအောက်တွင် ဆက်လက်ရရှိထားပြီး စီမံခန့်ခွဲမှုကို အမေရိကန်အစိုးရမှ တိုက်ရိုက်ထိန်းချုပ်ထားပါသည်။ VOA နှင့် RFE/RL နှစ်ခုလုံးကို ကြီးကြပ်သည့် ကမ္ဘာလုံးဆိုင်ရာ အမေရိကန်မီဒီယာ (USAGM) သည် အမေရိကတွင် ပြည်ထောင်စုအဆင့်ရှိသည့် အေဂျင်စီတစ်ခုဖြစ်ပါသည်။   

ကိုးကား-Myanmar National Post

ကိုလံဘို၊ ပြည်တွင်းရေး

      သီရိလင်္ကာနိုင်ငံတွင် ဖေဖော်ဝါရီလ ၉ ရက်က လျှပ်စစ်ဓာတ်အားခွဲ စက်ရုံတစ်ခုအတွင်းသို့ မျောက်တစ်ကောင် ကျုးကျော်ဝင်ရောက်လာမှုကြောင့် နိုင်ငံတစ်ဝန်းတွင် လျှပ်စစ်မီးများပြတ်တောက်သွားခဲ့ရကြောင်း အစိုးရအဖွဲ့မှ တာဝန်ရှိသူများကပြောသည်။

အဆိုပါမျောက်သည် မြို့တော်ကိုလံဘိုတောင်ပိုင်း ဆင်ခြေဖုံးဒေသရှိ  စက်ရုံအတွင်းသို့ဝင်ရောက်လာပြီးနောက်   ဓာတ်အားပေးကွန်ရက်စနစ်ရှိ ထရန်စဖော်မာတစ်လုံးအား ထိတွေ့ကိုင်တွယ်ခဲ့ရာမှ ဓာတ်အားပေးစနစ်တွင် တစ်ဖက်စောင်းနင်းဖြစ်ပြီး ဒေသစံတော်ချိန် ၁၁ နာရီ ၃၀ မိနစ်ခန့်တွင် လျှပ်စစ်ဓာတ်အား ပြတ်တောက်သွားခြင်းဖြစ်ကြောင်း လျှပ်စစ်ဝန်ကြီး ကုမာရ ဂျာယာကိုဒီက    သတင်းထောက်များကို ပြောသည်။

ယင်းနောက်   လျှပ်စစ်အင်ဂျင်နီယာများက လျှပ်စစ်ဓာတ်အားပေးစနစ်ပြန်လည် ကောင်းမွန်လာစေရန် ကြိုးပမ်းခဲ့ပြီးနောက် တစ်နာရီခန့်အကြာတွင် ဆေးရုံနှင့် အခြားအရေးကြီး အဆောက်အအုံများသို့ လျှပ်စစ်ဓာတ်အား ပြန်လည်ပေးနိုင်ခဲ့ပြီး သုံးနာရီအကြာတွင် အပြည့်အဝ ပြန်လည်ပေးနိုင်ခဲ့ကြောင်း သိရသည်။

လက်ရှိတွင် လျှပ်စစ်မီးကို နိုင်ငံအတွင်းရှိ အချို့ဒေသများသို့ ပြန်လည်ပေးနိုင်ခဲ့သော်လည်း အချို့နေရာများတွင် လျှပ်စစ်ဓာတ်အားသည်  အချိန်မည်မျှကြာ ပြတ်တောက်လျက်ရှိသည်ကို အတိအကျ မသိရသေးပေ။

Source: Myawady Webportal

အမေရိကန်အစိုးရ စွမ်းဆောင်ရည်မြှင့်တင်ရေးဌာန (DOGE) ၏ ခေါင်းဆောင်စီးပွားရေးလုပ်ငန်းရှင် Elon Musk က အမေရိကန် ဘဏ္ဍာရေး ဝန်ကြီးဌာန (US Department of the Treasury) သည် မည်သူမည်ဝါ အတိအကျ မသိရှိရသည့် လူပုဂ္ဂိုလ်များထံသို့ နှစ်စဉ် ၁၀၀ ဘီလီယံ ဒေါ်လာအား ပေးချေနေသည်ဟု ပြောကြားခဲ့သည်။

တစ်နှစ်လျှင် အမေရိကန်‌ဒေါ်လာ ၁၀၀ ဘီလီယံကျော်သော အစိုးရ ထောက်ပံ့‌ငွေများ (entitlement payments) ကို လူမှုလုံခြုံမှုနံပါတ် (SSN) သို့မဟုတ် မည်သူမည်ဝါဖြစ်ကြောင်း သက်သေခံသည့် ယာယီ ID တစ်ခုမျှ မရှိသောသူများထံသို့ ပေးချေထားကြောင်း၊ အလွန်အမင်း သံသယဖြစ်စရာကောင်းကြောင်း ဖေဖော်ဝါရီ ၈ ရက်တွင် ၎င်း၏ X စာမျက်နှာတွင် ရေးသားထားသည်။

ထို့နောက် DOGE အဖွဲ့နှင့် ဘဏ္ဍာရေးဝန်ကြီးဌာနတို့သည် အစိုးရ၏ ငွေပေးချေမှုတိုင်းတွင် ငွေပေးချေမှု အမျိုးအစားကုဒ် (payment categorization code) ထည့်သွင်းရန် သဘောတူခဲ့ကြပြီး ဘဏ္ဍာ‌ရေး ဆိုင်ရာ စာရင်းစစ်ဆေးမှုများ (financial audits) ခံယူရန် ဆုံးဖြတ်ခဲ့ ကြ‌ကြောင်း ၎င်း၏ X စာမျက်နှာတွင် ထည့်သွင်း‌ ပြောကြားထားသည်။ 

ထို့အပြင် ငွေပေးချေမှုတိုင်းတွင် အကြောင်းပြချက်၊ လိမ်လည်မှု ကျူးလွန် ထားသူ ဟုတ်၊ မဟုတ်၊ ကွယ်လွန်ပြီးသူ ဟုတ်၊ မဟုတ်၊ အကြမ်းဖက်အဖွဲ့အစည်းများနှင့် ဆက်နွှယ်နေကြောင်း သံသယဖြစ်ဖွယ် ရှိ၊ မရှိ၊ ကွန်ဂရက်၏ သတ်မှတ်ချက်များနှင့် ကိုက်ညီမှု ရှိ၊ မရှိ စသည့် အချက်များ ထည့်သွင်းဖော်ပြရန် ဆုံးဖြတ်ခဲ့ကြသည်။

ကိုးကား- TASS 

ဆိုးလ်   ဖေဖော်ဝါရီ ၉

တောင်ကိုရီးယားနိုင်ငံ ဂျယ်ဂျူလေကြောင်းလိုင်းမှ ခရီးသည်တင် လေယာဉ်တစ်စင်း ယမန်နှစ်က မတော်မဆမှုဖြစ်ပွားပြီးနောက် တောင်ကိုရီးယားနိုင်ငံရှိ လေဆိပ်အားလုံးတွင် မီးလောင်မှုကြိုတင်စောင့်ကြည့်ရေး ကင်မရာနှင့် ငှက်စောင့်ကြည့်ရေး ရေဒါများတပ်ဆင်ရန် တောင်ကိုရီးယားတာဝန်ရှိသူများက ညွှန်ကြားခဲ့ကြောင်း ယနေ့ ဗွီအင်န်အိတ်ပရက်သတင်းဌာနမှ သိရသည်။

ယမန်နှစ် ဒီဇင်ဘာ ၂၉ ရက်တွင် ထိုင်းနိုင်ငံမှ တောင်ကိုရီးယားနိုင်ငံ အနောက်မြောက်ပိုင်းရှိ မူအမ်လေဆိပ်သို့ ပျံသန်းလာသည့် ခရီးသည် ၁၈၁ ဦး လိုက်ပါလာသည့် ခရီးသည်တင်လေယာဉ်သည် မူအမ်လေဆိပ်သို့ အရေးပေါ်ဆင်းသက်ရန် ကြိုးပမ်းစဉ် အရှိန်ထိန်း ကွန်ကရစ်တုံးနှင့် တိုက်မိပြီး မီးလောင်ပေါက်ကွဲခဲ့ရာ ခရီးသည် ၁၇၉ ဦးသေဆုံးခဲ့သည်။

၎င်းလေယာဉ်အား လေယာဉ်မှူးက အရေးပေါ်ဆင်းသက်ရန် နှစ်ကြိမ်ကြိုးပမ်းခဲ့ရာတွင် ပထမအကြိမ်တွင် ငှက်အုပ်များလေယာဉ်အင်ဂျင်အတွင်း ဝင်ရောက်တိုက်မိခဲ့ကြောင်း လေယာဉ်မှူးက လေကြောင်းထိန်းမျှော်စင်သို့ အကြောင်းကြားခဲ့ပြီး ဒုတိယအကြိမ် ထပ်မံဆင်းသက်ရန် ကြိုးပမ်းစဉ်တွင် လေယာဉ်ဘီးချ၍မရဘဲ မတော်တဆမှုဖြစ်ပွားကာ မီးလောင်ပေါက်ကွဲခြင်းဖြစ်သည်။

လေကြောင်းမတော်တဆမှုများကို ကာကွယ်ရေးအတွက် လာမည့်နှစ်မှစတင်၍ နိုင်ငံအတွင်းရှိ လေဆိပ်တိုင်းတွင် မီးလောင်မှုကြိုတင်စောင့်ကြည့်ရေးကင်မရာတစ်ခုစီနှင့် ငှက်စောင့်ကြည့်ရေးရေဒါများကို တပ်ဆင်မည်ဟု မြေယာဝန်ကြီးဌာနက ပြောကြားသည်။

ယခုအသုံးပြုမည့် ရေဒါသည် ငှက်၏ အရွယ်အစားနှင့် ၎င်း၏ ရွေ့လျားမှုလမ်းကြောင်းများကို သိရှိနိုင်မည်ဖြစ်ပြီး အဆိုပါ အချက်အလက်များကို လေကြောင်းထိန်းမျှော်စင်မှတစ်ဆင့် လေယာဉ်မှူးထံ ပေးပို့မည်ဖြစ်သည်။

ပျက်ကျခဲ့သည့် ဂျယ်ဂျူလေကြောင်းလိုင်းလေယာဉ်၏ အင်ဂျင်များတွင် ငှက်အမွေးများ တွေ့ရှိခဲ့ကြောင်း တောင်ကိုရီးယားမီဒီယာများက ပြောကြားသည်။

Source: ကြေးမုံသတင်းစာ

ပြင်သစ်နိုင်ငံ၌ ဖေဖော်ဝါရီလ၊ ၁၀ ရက်နေ့တွင် ဉာဏ်ရည်တုနည်းပညာဆိုင်ရာ ပထဝီနိုင်ငံရေး ထိပ်သီးအစည်းအဝေး ကျင်းပပြုလုပ်မည် ဖြစ်ပြီး ကမ္ဘာ့နိုင်ငံအသီးသီးမှ ခေါင်းဆောင်များ၊ အစိုးရအရာရှိကြီးများနှင့် ကျွမ်းကျင်ပညာရှင်များ တက်ရောက်ဆွေးနွေးမည် ဖြစ်ပါသည်။ 

တရုတ်နိုင်ငံထုတ် Deepseek AI Chatbot နည်းပညာ လောကတွင် နေရာယူလာပြီးနောက် ကမ္ဘာ့‌ခေါင်းဆောင်များ အကြား AI နည်းပညာအုပ်ချုပ်ရေးအကြောင်း ဆွေးနွေးကြမည့် အစည်းအဝေးဖြစ်ပါသည်။ 

ထိုအစည်းအဝေးသို့ အမေရိကန်ဒုတိယသမ္မတ JD Vance နှင့် တရုတ်သမ္မတ ရှီကျင့်ဖျင်၏ အထူးသံတမန်တို့ တက်ရောက်မည်ဖြစ်ကြောင်း သိရှိရပါသည်။

ကိုးကား -AP news

မီဒီယာကန်ထရိုက်များအားလုံးကို ဖျက်သိမ်းရန် အမေရိကန် အစိုးရ၏ အထွေထွေဝန်ဆောင်မှုစီမံခန့်ခွဲရေး အေဂျင်စီဖြစ်သည့် General Services Administration (GSA) ကို သမ္မတဒေါ်နယ်ထရမ့်က အမိန့်ထုတ်ပြန်ခဲ့ကြောင်း New York Post သတင်းတွင် ဖော်ပြထားသည်။

အမေရိကန်အစိုးရအေဂျင်စီများအနေဖြင့် မီဒီယာများကို အခငွေကြေးများပေးနေရကြောင်း ထရမ့်က ပြောကြားခဲ့ပြီးနောက် အမိန့်ထုတ်ပြန်ခြင်း ဖြစ်သည်။ GSA ထံ ညွှန်ကြားချက်အရ Politico၊ BBC၊ E&E (Politico sub)၊ Bloomberg တို့နှင့် ချုပ်ဆိုထားသည့်ကန်ထရိုက်များ ဖျက်သိမ်းပေးရန် ဖော်ပြထားပါသည်။

အမေရိကန်အစိုးရအေဂျင်စီများသည် Politico Pro မီဒီယာ၏သတင်းများကို အခကြေးငွေပေးပြီး ဖတ်ရှုရန် ဒေါ်လာသန်းချီ အသုံးပြုခဲ့ရကြောင်း အီလွန်မက် ဦးဆောင်သည့် အစိုးရလုပ်ငန်းစဉ်များ ထိန်းချုပ်ရေးဌာနတို့က ပြောကြားခဲ့ပြီးနောက် အိမ်ဖြူတော်၏ ညွှန်ကြားချက် ထွက်ပေါ်ခဲ့ခြင်းဖြစ်သည်။

အမေရိကန်အစိုးရသည် သတင်းများကို အခကြေးငွေပေးပြီး ဖတ်ရှုမှုကို ရပ်တန့်သွားရန် ဆောင်ရွက်လိုက်ခြင်းဖြစ်ကြောင်း အိမ်ဖြူတော်သတင်းပြန်ကြားရေး အရာရှိ ကယ်ရိုလိုင်းလက်ဗစ်က ပြောကြားထားပါသည်။

ကိုးကား (New York Post)

တရုတ်နိုင်ငံတောင်ပိုင်း စီချွမ်ပြည်နယ်တွင် ဖေဖော်ဝါရီလ ၈ ရက်က မြေပြိုမှုဖြစ်ပွားခဲ့ပြီးနောက် လူ (၃၀) ဦးကျော် ပျောက်ဆုံးနေကြောင်း နိုင်ငံပိုင်ရုပ်သံလိုင်း CCTV က ရေးသားဖော်ပြခဲ့ပါသည်။ ဖေဖော်ဝါရီလ ၈ ရက် နံနက် ၁၁ နာရီ ၅၀ မိနစ် အချိန်၌ ယီဘင်းမြို့ ဂျင်းပင်ရွာတွင် မြေပြိုကျမှုဖြစ်ပွားခဲ့ခြင်းဖြစ်သည်ဟု သိရပါသည်။

CCTV က မြေပြိုကျမှုနှင့်အတူ နေအိမ် (၁၀) လုံး မြေအောက်မြုပ်သွားပြီး လူ(၃၀)ကျော် ပျောက်ဆုံးနေကြောင်းနှင့် တရုတ်သမ္မတ ရှီကျင့်ဖျင်က ပျောက်ဆုံး နေသူများကို ရှာဖွေကယ်ဆယ်ရန်၊ အသေအပျောက် နည်းစေရန်နှင့် နောက်ဆက်တွဲ အကျိုးဆက်များကို စနစ်တကျ ကိုင်တွယ်ဖြေရှင်းနိုင်ရေး ဖြစ်နိုင်သမျှအရာအားလုံးကို လုပ်ဆောင်ရန် အာဏာပိုင်များကို အမိန့်ပေးထားကြောင်း ရေးသားဖော်ပြခဲ့ပါသည်။ မြေပြိုကျမှုဖြစ်ပွားပြီးနောက် လူ (၂) ဦးကို အောင်မြင်စွာကယ်ဆယ်နိုင်ခဲ့သည်ဟု တရုတ်အရေးပေါ် စီမံခန့်ခွဲရေးဝန်ကြီးဌာနက သတင်းထုတ်ပြန်ထားပြီး အရေးပေါ် တုံ့ပြန်ရေးအဖွဲ့များသည် အသက်ရှင်ကျန်ရစ်သူများကို ရှာဖွေရန်နှင့် ကယ်ဆယ်မှုများ လုပ်ဆောင်ရန် အခင်းဖြစ်ပွားရာနေရာသို့ ရောက်ရှိနေပြီဖြစ်ကြောင်း သိရှိရပါ သည်။

ကိုးကား-NP News

အမေရိကန်သမ္မတ Donald Trump သည် ပြန်လည် နေရာချထားရေးအစီအစဉ်များအပါအဝင် လူဖြူ တောင်အာဖရိကဒုက္ခသည်များအတွက် ဦးစားပေးအကူအညီပေးရန် အစိုးရအေဂျင်စီများအား ညွှန်ကြားသည့် အမှုဆောင် အမိန့်ကိုထုတ်ပြန်ခဲ့သည်။

အာဖရိကနိုင်ငံသည် မြေယာပိုင်ဆိုင်ခွင့်တွင် လူမျိုးရေးမတူညီမှုများကို ကိုင်တွယ်ဖြေရှင်းရန် မြေယာသိမ်းယူခြင်းဥပဒေကို အတည်ပြုပြီးနောက် ယခုကဲ့သို့ လုပ်ဆောင်ခဲ့ ခြင်းဖြစ်သည်။

ဖေဖော်ဝါရီ ၇ ရက်နေ့က ထုတ်ပြန်သည့် ၎င်း၏ အမိန့်တွင် Trump သည် ပရီတိုးရီးယားတွင် “နိုင်ငံသား များ၏ အခွင့်အရေးများကို တုန်လှုပ်စရာဖြစ်စေရန် လျစ်လျူရှုမှု” ဖြစ်သည်ဟု စွပ်စွဲကာ အသစ်ပြဋ္ဌာန်း လိုက်သော ဥပဒေတွင် အစိုးရကလျော်ကြေးမပေးဘဲ လူနည်းစုအာဖရိကန်များ၏ လယ်ယာမြေပိုင်ဆိုင်မှုများကို သိမ်းယူနိုင်သည်ဟု အခိုင်အမာဆိုခဲ့သည်။

အာဖရိကန်များသည် ၁၇ ရာစုတွင် ခေတ်သစ် တောင်အာဖရိကနယ်မြေသို့ ရောက်ရှိခဲ့သော နယ်သာလန်မှ အများစုဖြစ်ပြီး ဥရောပကိုလိုနီလက်အောက်ခံများ၏ မျိုးဆက်များဖြစ်သည်။ အသားရောင်ခွဲခြားဆက်ဆံမှုကိုကျင့်သုံးပြီး ၁၉၉၀ ပြည့်လွန် နှစ်များတွင် အာဖရိက၏ အတိုးတက်ဆုံးသော စီးပွားရေးကို ဖျက်သိမ်းကာ ဆယ်စုနှစ်များစွာ ကြာပြီး သည်အထိ လူဖြူလယ်သမားများက တိုင်းပြည်၏ လယ်ယာမြေအများစုကို ပိုင်ဆိုင်ထားခဲ့သည်။

ပရီတိုးရီးယားသည် ဤမညီမျှမှုကို ဖြေရှင်းရန်အတွက် လယ်မြေများ၏ ၃၀% ကို ၂၀၃၀ ခုနှစ်တွင် လူမည်း လယ်သမားများထံ လွှဲပြောင်းရန် ရည်မှန်းထားသည်။ 

တောင်အာဖရိကတွင် တရားမမျှတမှုများနှင့် အကျင့်ပျက်ခြစားမှုများ ရှိနေသမျှကာလပတ်လုံး အစိုးရအား ကူညီထောက်ပံ့မှုများရပ်ဆိုင်းထားရန်နှင့် နိုင်ငံခြားရေးဝန်ကြီး နှင့် ပြည်ထဲရေးဝန်ကြီးဌာန အတွင်းရေးမှူးတို့သည် ခွဲခြားခံရသူများအား လူသားချင်းစာနာထောက်ထားမှုဆိုင်ရာ

အကူအညီများကို ဦးစားပေးလုပ်ဆောင်ကြရမည်ဟု သမ္မတ Trump ၏ ညွှန်ကြားချက်တွင် ပါရှိကြောင်း သိရှိရသည်။

အမေရိကန်နိုင်ငံခြားရေးဝန်ကြီး Marco Bubio သည် ယခုလနှောင်းပိုင်းတွင် တောင်အာဖရိက၌ကျင်းပမည့် G-20 အစည်းအဝေးသို့ အမေရိကန်မှ တက်ရောက်ခြင်းမပြုဟု ပြောကြားထားပြီး တောင်အာဖရိကနွယ်ဖွား Elon Musk ကလည်းအဆိုပါဥပဒေကို လူမျိုးရေးခွဲခြားမှု ဟု ပြောဆိုထားသည်။

ကိုးကား-RT