ယူကရိန်းနိုင်ငံတွင် ရက်ပေါင်း ၃၀ ကြာ အပစ်အခတ်ရပ်စဲရေး ဆွေးနွေးရန်အတွက် အမေရိကန်သမ္မတ     ဒေါ်နယ်ထရမ့်၏ အထူးသံတမန် စတိဝှစ်ကော့ ဦးဆောင်သော စေ့စပ်ဆွေးနွေးသူများသည် ရုရှားနိုင်ငံသို့ရောက်ရှိလာပြီဖြစ်ကြောင်း ရုရှားအစိုးရက မတ်လ ၁၃ ရက်တွင် အတည်ပြုသည်။

အမေရိကန်စေ့စပ်ဆွေးနွေးသူများကို တင်ဆောင်လာသည့်  Gulfstream G650 လေယာဉ်သည်   ကာတာနိုင်ငံ ဒိုဟာမြို့ရှိ ဟာမတ်အပြည်ပြည်ဆိုင်ရာ လေဆိပ်မှ ထွက်ခွာလာခြင်းဖြစ်ပြီး ရုရှားစံတော်ချိန် မွန်းလွဲ ၁၂ နာရီ ၁၀ မိနစ်ခန့်တွင် မော်စကိုမြို့တော်ရှိ   ဗနူကိုဗိုလေဆိပ်သို့ ရောက်ရှိလာခြင်းဖြစ်ကြောင်း သိရသည်။

အမေရိကန်အစိုးရအဖွဲ့မှ စေ့စပ်ဆွေးနွေးသူများသည်     ယခုအခါ ရုရှားနိုင်ငံသို့ ရောက်ရှိလာခဲ့ပြီး နှစ်နိုင်ငံကြားဆွေးနွေးမှုများကို စီစဉ်ထားသည့်အတိုင်း ဆက်လက် ကျင်းပမည်ဖြစ်ကြောင်း ရုရှားအစိုးရအဖွဲ့မှ ပြောရေးဆိုခွင့်ရှိသူ ဒီမီထရီပက်စကော့က ပြောသည်။ သို့သော် အမေရိကန်ကိုယ်စားလှယ်အဖွဲ့တွင် ပါဝင်သူများ၏ အသေးစိတ် အချက်အလက်များကိုမူ ထုတ်ပြန်ခဲ့ခြင်း မရှိပေ။

ယူကရိန်းအပစ်အခတ် ရပ်စဲရေးနှင့်စပ်လျဉ်း၍ ရုရှားနှင့်အမေရိကန်တို့ကြား စေ့စပ်ဆွေးနွေးမှုများသည် ယူကရိန်းသမ္မတ ဇီလန်စကီက အမေရိကန်အစိုးရ၏ ရက်ပေါင်း ၃၀ ကြာ အပစ်အခတ်ရပ်စဲရေး အဆိုပြုချက်ကိုလက်ခံမည်ဟု  ပြောကြားပြီးနောက် ထွက်ပေါ်လာခြင်းဖြစ်ကြောင်း သိရသည်။

ထို့ပြင် ရုရှားနှင့် ယူကရိန်းတို့ကြား အပစ်အခတ်ရပ်စဲရေး သဘောတူညီချက်ကို ရုရှားသမ္မတ ဗလာဒီမာပူတင်က သဘောတူညီမည်ဟု မျှော်လင့်ကြောင်း   အမေရိကန်သမ္မတ ဒေါ်နယ်ထရမ့်က မတ်လ ၁၂ ရက်တွင် ပြောကြားထားသည်။

Source: https://myawady.net.mm/

ရုရှားခေါင်းဆောင် ဗလာဒီမာပူတင်က ယူကရိန်းစစ်ဖြေရှင်းနိုင်ရေးနှင့်ပတ်သက်၍ မတ်လ ၁၃ ရက် (ကြာသပတေးနေ့)တွင် ထုတ်ပြန်လိုက်သည့် ကြေညာချက်သည် “အင်မတန် ကတိကဝတ် ကောင်းမွန်သော အလားအလာ ရှိသည်” ဟု အမေရိကန်သမ္မတ ဒေါ်နယ်ထရမ့်က ပြောကြားလိုက်ပါသည်။

ပူတင်၏ ကြေညာချက်သည် အလွန်ကောင်းမွန်ပြီး အလားအလာရှိသော်လည်း ပြီးပြည့်စုံပြီဟု ပြောမရသေးပါကြောင်း” ဒေါ်နယ်ထရမ့်က NATO အကြီးအကဲ Mark Rutte နှင့် အိမ်ဖြူတော်၌ တွေ့ဆုံစဉ်အတွင်း ပြောကြားလိုက်ခြင်း ဖြစ်ပါသည်။

ကိုးကား- TASS

Photo: Mint

ဘာသာပြန်ဆိုသူ-ဦးကျော်ဇေယျ၊ဒုတိယညွှန်ကြားရေးမှူး၊နစက-၃

အမေရိကန်သမ္မတ ဒေါ်နယ်ထရမ့်၏ ရုရှားနှင့်ယူကရိန်းပဋိပက္ခအတွက် အထူးကိုယ်စားလှယ် Keith Kellogg ကို မော်စကို၏တောင်းဆိုချက်အရ ငြိမ်းချမ်းရေးဆွေးနွေးပွဲများတွင် ပါဝင်ခွင့်မပေးတော့ကြောင်း NBC သတင်းဌာနက မတ်လ ၁၃ ရက်(ကြာသပတေး)နေ့တွင် သတင်းရင်းမြစ်များကိုကိုးကားပြီး ဖော်ပြခဲ့ပါသည်။ အဆိုပါသတင်း၌ ရုရှားတာဝန်ရှိ ပုဂ္ဂိုလ်များက Kellogg သည် စစ်ရေးအရ လွန်စွာတင်းမာသူဖြစ်ပြီး “ယူကရိန်းနှင့် နီးစပ်လွန်းသူ” ဟု ရှုမြင်ကြောင်း ဖော်ပြထားပါသည်။

အမေရိကန်စစ်တပ်မှ အငြိမ်းစားဗိုလ်ချုပ်ကြီး Kellogg သည် လွန်ခဲ့သော လက ဆော်ဒီအာရေဗျ၌ကျင်းပခဲ့သော ရုရှား-အမေရိကန် ဆွေးနွေးပွဲနှင့် ယခုသီတင်းပတ်အတွင်း ဂျီဒါမြို့၌ ကျင်းပခဲ့သော အမေရိကန်-ယူကရိန်း ဆွေးနွေးပွဲနှစ်ခုစလုံးတွင် ပါဝင်ခဲ့ခြင်းမရှိပေ။

အိမ်ဖြူတော်ကလည်း ထရမ့်၏ အရှေ့အလယ်ပိုင်းဆိုင်ရာ အထူးကိုယ်စားလှယ် Steve Witkoff သာ Kellogg အစား ရုရှားနှင့် နောက်ထပ် ညှိနှိုင်းဆွေးနွေးပွဲများတွင် တက်ရောက်မည်ဖြစ်ကြောင်း အတည်ပြုခဲ့ပြီ Witkoff သည် မတ်လ ၁၃ ရက်(ကြာသပတေး)နေ့ ညနေပိုင်းတွင် မော်စကို သို့ ရောက်ရှိခဲ့ပါသည်။

ထရမ့်အုပ်ချုပ်ရေးအဖွဲ့မှတာဝန်ရှိသူတစ်ဦးကလည်း မော်စကိုက Kellogg ကို ငြိမ်းချမ်းရေးလုပ်ငန်းစဉ်၌ မပါဝင်စေလိုကြောင်းအတည်ပြုခဲ့ပါသည်။ အခြားရင်းမြစ်တစ်ခုကလည်း Kellogg ကို ဖယ်ထုတ်လိုက်ခြင်းသည် ၎င်းကို “စိတ်ထိခိုက်စေသည်” ဟု ဆိုခဲ့ပြီး Kellogg ၏ ရုံးအဖွဲ့နှင့် မော်စကိုတို့က အဆိုပါသတင်းနှင့်ပတ်သက်၍ မှတ်ချက်မပြုသေးပေ။

Kellogg သည် ယူကရိန်းပဋိပက္ခကို အဆုံးသတ်ရန် ထရမ့်၏ တောင်းဆိုချက်ကို ထောက်ခံခဲ့သော်လည်း ငြိမ်းချမ်းရေးရရန် ၎င်း၏အမြင်များသည် မော်စကို၏ သဘောထားနှင့်ကိုက်ညီမှုမရှိဟု ဆိုသည်။ ၎င်းသည် အမေရိကန်က ယူကရိန်းကို ဆက်လက်ထောက်ပံ့ရေး အစီအစဉ်ကို ထောက်ခံခဲ့ပြီး ရုရှားက ထိုကဲ့သို့ဆောင်ရွက်ခြင်းသည် ပဋိပက္ခကို ပိုမို ရှည်ကြာစေမည်ဟု ဆိုပါသည်။ လက်ရှိစစ်မျက်နှာများတွင် ရက် ၃၀ ကြာ အပစ်အခတ်ရပ်စဲရေးကို ယူကရိန်းကထောက်ခံခဲ့သော်လည်း မော်စကို အနေဖြင့် ရေရှည်တည်တံ့သည့် ဖြေရှင်းချက်ကိုသာ ရလိုကြောင်း ဆိုပါသည်။ Kellogg သည် ရုရှား ထံမှသိမ်းယူထားသည့် နိုင်ငံခြားအရန် ငွေကြေးများကို ယူကရိန်းပြန်လည်တည်ဆောက်ရေးနှင့် လက်နက်ပြန်လည် တပ်ဆင်ရေးတို့တွင် အသုံးပြုရန် တွန်းအားပေးခဲ့သူဖြစ်သည်။ 

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ရုရှားသမ္မတဗလာဒီမာပူတင်နှင့် ဘယ်လာရုစ် သမ္မတ အလက်ဇန္ဒား လူကာရှန်ကိုတို့သည် မော်စကို ကရင်မလင်တွင် ကျင်းပသည့် တွေ့ဆုံ ဆွေးနွေးပွဲအပြီး စာရွက်စာတမ်းများကို လက်မှတ်ရေးထိုးခဲ့ကြပါသည်။

နိုင်ငံနှစ်နိုင်ငံသည် ယုံကြည်စိတ်ချရသော မဟာမိတ်များ၊ နည်းဗျူဟာ မြောက်မိတ်ဖက်များနှင့် အစစ်အမှန် မိတ်ဆွေများဖြစ်ကြောင်း၊  ကမ္ဘာနှင့်ဒေသဆိုင်ရာ ပြဿနာအများစုတွင် နှစ်နိုင်ငံ၏ ရပ်တည်ချက်များ ကိုက်ညီကြောင်း၊  နိုင်ငံတကာနှင့် ဒေသဆိုင်ရာ လက်ရှိအရေးကိစ္စများ နှင့်ပတ်သက်၍ ထင်မြင်ချက်များကို ဖလှယ်နိုင်ခဲ့ကြကြောင်း၊ နှစ်နိုင်ငံသည် ပြည်ထောင်စုနိုင်ငံ( Union State) တည်ဆောက်ရေးနှင့်ပေါင်းစည်းမှုကို နက်ရှိုင်းစွာ ဆက်လက်လုပ်ဆောင်သွားမည် ဖြစ်ကြောင်း၊  မော်စကိုသည် သမ္မတလူကာရှန်ကို ပြန်လည်ရွေးကောက်တင်မြှောက် ခံရပြီးနောက် ပထမဆုံးခရီးစဉ်အဖြစ် ရုရှားသို့ လာရောက်ခဲ့ခြင်းကို အသိအမှတ်ပြုခဲ့ပြီး ၎င်းသည် ဆက်ဆံရေး၏ အထူးသဘောသဘာဝကို မီးမောင်းထိုးပြပါကြောင်း၊  ၎င်းတို့အနေဖြင့် စီးပွားရေး၊ လုံခြုံရေးနှင့် ကာကွယ်ရေးဆိုင်ရာကိစ္စရပ်များကို အသေးစိတ်ဆွေးနွေးခဲ့ကြကြောင်း၊  ပြည်ထောင်စုနိုင်ငံ( Union State)၏ အနောက်ဘက်နယ်စပ်များကို စိတ်ချရသော အကာအကွယ်ပေးမည်ဖြစ်ကြောင်း၊  ဘယ်လာရုဇ်တွင် နေထိုင်သော ရုရှားနိုင်ငံသားများနှင့် ရုရှားတွင် နေထိုင်သော ဘယ်လာရုဇ် နိုင်ငံသားများသည် ရွေးကောက်ပွဲများတွင် မဲဆန္ဒရှင်များနှင့် ကိုယ်စားလှယ်လောင်းများအဖြစ် ပါဝင်နိုင်မည်ဖြစ်ကြောင်း၊ ဘယ်လာရုဇ်မှ အနုပညာရှင်များ မော်စကိုရှိ “အင်တာဗစ်ရှင်း” ပြိုင်ပွဲတွင် ပါဝင်မည်ဟု မျှော်လင့်ထားကြောင်း ရုရှား သမ္မတ ဗလာဒီမာ ပူတင်က ပြောကြားခဲ့ပါသည်။ 

မေ ၉ ရက်နေ့တွင် ကျင်းပမည့်အထိမ်းအမှတ်အောင်ပွဲနှင့်ပတ်သက်၍ ဘယ်လာရုဇ်၏ လက်နက်ကိုင်တပ်ဖွဲ့များသည် မော်စကိုရှိ အောင်ပွဲခံ အခမ်းအနားတွင် ပါဝင်မည်ဖြစ်ကြောင်း၊ ထို့နောက် သမ္မတလူကာရှန်ကို သည် အောင်ပွဲအခမ်းအနားတွင် ပါဝင်မည်ဟု အတည်ပြုခဲ့ပါသည်။

ပူးပေါင်းဆောင်ရွက်မှုများနှင့်ပတ်သက်၍ သမ္မတဗလာဒီမာ ပူတင်က ရုရှားကို ဘယ်လာရုဇ်၏ အဓိက စီးပွားရေးမိတ်ဖက်အဖြစ် သတ်မှတ်ခဲ့ပါသည်။ နည်းဗျူဟာမြောက် ကဏ္ဍအချို့တွင် ပူးပေါင်းဆောင်ရွက်မှု၏ ကောင်းမွန်သော အလားအလာများရှိကြောင်း၊ ဥရောပ- အာရှ စီးပွားရေး အဖွဲ့ (EAEU) အတွင်း ပူးပေါင်းဆောင်ရွက်မှုသည် ကောင်းမွန်သော အရှိန်အဟုန်ဖြင့် တိုးတက်နေပါကြောင်း၊ အပြန်အလှန်ကုန်သွယ်မှုနှင့် ရင်းနှီးမြှုပ်နှံမှုများသည် တတိယနိုင်ငံများ၏ လွှမ်းမိုးမှုနှင့် ကမ္ဘာ့စျေးကွက် ၏ ဆိုးရွားသော အလားအလာများမှ ကာကွယ်ပေးထားပါကြောင်း၊ ၉၀% ကျော်သော ငွေပေးချေမှုများသည် နိုင်ငံခြားငွေများဖြစ်ပါကြောင်း၊ ရုရှားသည် ဘယ်လာရုဇ်နှင့် နည်းပညာမြင့်ကဏ္ဍများတွင် ပူးပေါင်းဆောင်ရွက်မှုကို နက်ရှိုင်းစွာ ဆောင်ရွက်ရန် အလားအလာများရှိသည်ဟု မြင်မိပါကြောင်း သမ္မတ ဗလာဒီမာ ပူတင်က ပြောကြားခဲ့ပါသည်။   

တွေ့ဆုံဆွေးနွေးပွဲသည် ပြည့်စုံပြီး ထိရောက်မှုရှိခဲ့ပါကြောင်း၊  သမ္မတ လူကာရှန်ကိုသည် ရုရှားသမ္မတ ဗလာဒီမာပူတင်အား ၎င်းအတွက် အဆင်ပြေသောအချိန်တွင် ဘယ်လာရုဇ်သို့ လာရောက်ရန် ဖိတ်ကြားခဲ့ပါကြောင်း၊ ၎င်းသည် ရုရှားသမ္မတနှင့် ယူကရိန်းပဋိပက္ခဖြေရှင်းရေးကို ဆွေးနွေးခဲ့ကြောင်း၊ ကုန်စည်လမ်းကြောင်းများကို ပြန်လည်ချိန်ညှိရာတွင် ကူညီထောက်ပံ့ပေးမှုကို ကျေးဇူးတင်ရှိပါကြောင်း ဘယ်လာရုစ် သမ္မတ က ပြောကြားခဲ့ပါသည်။   

နှစ်နိုင်ငံခေါင်းဆောင်များသည် နိုင်ငံခြားနိုင်ငံများနှင့် တရားစီရင်ရေးအဖွဲ့ များ၏ မတရားသော နှိပ်ကွပ်မှုမှ နိုင်ငံသားများကို အပြန်အလှန် ကာကွယ်ရန် ပူးတွဲကြေညာချက်၊ ခေါင်းဆောင်များသည် ပြည်ထောင်စု နိုင်ငံ (Union State) ၏ လုံခြုံရေးအာမခံချက်ဆိုင်ရာ စာချုပ်ကို အတည် ပြုခဲ့သည်။ 

စားသုံးသူများ၏ တန်းတူညီမျှသော အခွင့်အရေးများကို အာမခံချက်ပေးသည့် သဘောတူညီချက် စသည့် သဘောတူညီချက်များစွာကို လက်မှတ် ရေးထိုးခဲ့ကြပါသည်။ 

ကြေညာချက်၏ အဓိက အချက်များတွင် “ခေါင်းဆောင်များသည် ကဏ္ဍအားလုံးတွင် မိတ်ဖက်ပြုမှုကို ချဲ့ထွင်ရန် လမ်းစဉ်ကို မပြောင်းလဲကြောင်း” အတည်ပြုခဲ့ကြပါသည်။ 

နိုင်ငံများသည် ခေတ်မီစိန်ခေါ်မှုများနှင့် ခြိမ်းခြောက်မှုများကို ထိရောက်စွာ တုံ့ပြန်ရန် ပူးပေါင်းအားထုတ်မှုများကို ဆက်လက်တိုးမြှင့်သွားမည် ဖြစ်ပါသည်။

ရုရှားနှင့် ဘယ်လာရုဇ်တို့သည် နေတိုး၏ လုပ်ဆောင်ချက်များကို တုံ့ပြန်ရန် နိုင်ငံရေး-သံတမန်ဆိုင်ရာ၊ စစ်ရေးနှင့် စစ်နည်းဗျူဟာဆိုင်ရာ ထိန်းချုပ်မှု များကို ပြင်ဆင်ခဲ့ကြသည်။   

နိုင်ငံများသည် ဘက်ပေါင်းစုံဆက်ဆံရေးစနစ်ကို ဖွဲ့စည်းရာတွင် နောက်ထပ် ပံ့ပိုးကူညီသွားမည်ဖြစ်ပါသည်။ နိုင်ငံသမ္မတများသည် ဥရောပသမဂ္ဂ၏ ရန်လိုသော ဆန့်ကျင်မှုဆိုင်ရာ မူဝါဒကို ရှုတ်ချခဲ့ကြသည်။ 

စစ်ရေးနှင့် နိုင်ငံရေးဆိုင်ရာ အခြေအနေများသည် ဥရောပ- အာရှ လုံခြုံရေး စနစ်ကို ဖွဲ့စည်းရန် လိုအပ်ကြောင်း ဖော်ပြခဲ့ကြသည်။ 

သမ္မတ ပူတင်နှင့် လူကာရှန်ကိုတို့သည် အာရှ-ပစိဖိတ် လုံခြုံရေးအဖွဲ့ (CSTO) ၏ စုပေါင်းအင်အားကို ဖွံ့ဖြိုးတိုးတက်စေရန် ပြင်ဆင်ထားကြောင်း အတည်ပြုခဲ့ကြပါသည်။ နျူကလီးယားနိုင်ငံများအကြား တိုက်ရိုက်ပဋိပက္ခဖြစ်နိုင်သည့် ရန်လိုသော လှုပ်ရှားမှုများကို သတိပြုမိကြောင်း ဖော်ပြခဲ့ကြပါသည်။  ဓနသဟာယနိုင်ငံများ (CIS) အတွင်း ပေါင်းစည်းမှုကို နက်ရှိုင်းစွာ ဆောင်ရွက်သွားမည်ဖြစ်ကြောင်း ပြောကြားခဲ့ကြပါသည်။

နိုင်ငံများသည် ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) အတွင်း နိုင်ငံရေး၊ စီးပွားရေးနှင့် လူသားချင်းစာနာမှုဆိုင်ရာ ပူးပေါင်းဆောင်ရွက်မှုများကို ဖွံ့ဖြိုးတိုးတက်စေမည်ဖြစ်ကြောင်း ထပ်လောင်းပြောကြားခဲ့ ပါသည်။   

ခေါင်းဆောင်များ၏ တစ်ဦးချင်းတွေ့ဆုံမှုသည် တစ်နာရီနှင့် သုံးမိနစ် ကြာမြင့်ခဲ့ပြီး ထို့နောက် ညစာစားပွဲပုံစံဖြင့် ကိုယ်စားလှယ်အဖွဲ့များနှင့် ဆွေးနွေးပွဲများ ဆက်လက်ကျင်းပခဲ့ပါသည်။

ကိုးကား - RIA Novosti

Photo: President of Russia

အမေရိကန်အစိုးရသည် ယခုအခါ ရုရှား၊ ယူကရိန်းတို့နှင့် အမြင်များ ဖလှယ်ဆွေးနွေးနေပြီး၊ အခြားသော ယူကရိန်းကိစ္စဖြေရှင်းနိုင်ရေး နည်းလမ်း များကို ဆွေးနွေးနေသည်ဟု အမေရိကန် အမျိုးသားလုံခြုံရေးအကြံပေး Mike Waltz က Fox News ကို အတည်ပြုပြောကြားလိုက်ပါသည်။

“မိမိတို့အနေဖြင့် ရုရှားဘက်က တာဝန်ရှိသူများနှင့် ဆွေးနွေးနေသလို ယူကရိန်းဘက်ရှိ တာဝန်ရှိသူများနှင့်လည်း ဆွေးနွေးနေပါသည်။ သမ္မတ ထရမ့်က စေ့စပ်ညှိနှိုင်းမှု အကျွမ်းကျင်ဆုံးတစ်ဦးဖြစ်ပြီး ယခုစစ်ပွဲကို ပြီးဆုံးစေရန် မျှော်မှန်းထားပါသည်” ဟု သူက ပြောကြားပါသည်။

Fox News မှ သတင်းထောက်တစ်ဦးက ယူကရိန်းသည် NATO ထဲသို့ ဝင်မည်မဟုတ်ကြောင်း၊ သဘောတူညီမှုဖြင့် Donbass နှင့် အခြားဒေသများကို ရုရှားထံ ပေးအပ်ရနိုင်ကြောင်း ခန့်မှန်းပြောဆိုထားပါသည်။ Mike Waltz က ထိုမှန်းဆချက်အပေါ် တုံ့ပြန်ဖြေကြားခဲ့ခြင်း မရှိချေ။ 

ကိုးကား- TASS

Photo: WSJ

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

တရုတ်နိုင်ငံသည် အီရန်နှင့် ရုရှားနိုင်ငံတို့မှ သံတမန်များကို မတ်လ ၁၄ ရက်နေ့တွင် တီဟီရန်၏ နျူကလီးယားအစီအစဉ်နှင့်ပတ်သက်၍ ဆွေးနွေးပွဲကို လက်ခံကျင်းပမည်ဖြစ်ပြီး ပေကျင်းသည် နိုင်ငံတကာ အရေးပေါ်လုံခြုံရေးကိစ္စတစ်ခုဖြစ်သည့်ကိစ္စတွင် ဩဇာအာဏာရှင်တစ်ဦးအဖြစ် မိမိကိုယ်ကိုတည်ဆောက်ရန် ရည်ရွယ်နေသည်။

တရုတ်နိုင်ငံ၏ နိုင်ငံခြားရေးဝန်ကြီးဌာနက ဒုဝန်ကြီး Ma Zhaoxu သည် အီရန်နှင့် ရုရှားနိုင်ငံတို့မှ သံတမန်များနှင့် “အီရန်နျူကလီးယားကိစ္စ” နှင့်ပတ်သက်၍ ပေကျင်းမြို့တွင် ဆွေးနွေးပွဲကို ဦးဆောင်ကျင်းပမည်ဟု ကြေညာခဲ့သည်။

ရုရှားနိုင်ငံ၏ ဒုဝန်ကြီး Sergei Ryabkov နှင့် အီရန်နိုင်ငံ၏ ဒုဝန်ကြီး Kazem Gharibabadi တို့ တက်ရောက်မည်ဟု မျှော်လင့်ရသည့် အဆိုပါ ဆွေးနွေးပွဲသည် ၂၀၂၅ ခုနှစ် အီရန်နျူကလီးယား သဘောတူညီချက်မှ သံတမန်နည်းလမ်းအရ ဖြေရှင်းရန် နောက်ဆုံးကာလအဖြစ် နိုင်ငံများ အနေဖြင့် ဖိအားများရင်ဆိုင်နေရချိန်တွင် ထွက်ပေါ်လာခြင်းဖြစ်သည်။

သမ္မတ Donald Trump သည် ၎င်း၏ ပထမသက်တမ်းအတွင်း အမေရိကန်အနေဖြင့် ထိုသဘောတူညီချက်မှ ရုပ်သိမ်းခဲ့ပြီးနောက် ၎င်းသည်လည်း သဘောတူညီချက်အသစ်တစ်ခုအတွက် တွန်းအားပေးလျက်ရှိကာ ဥရောပအင်အားကြီးနိုင်ငံများသည် မကြာသေးမီလများအတွင်း တီဟီရန်နှင့် အကြိမ်ကြိမ်ဆွေးနွေးခဲ့ကြသည်။

အီရန်၏နျူကလီးယားအစီအစဉ်ကို ထိန်းချုပ်ရန် သံတမန်ရေးရာ လမ်းကြောင်း ရှာဖွေရာတွင် အရှိန်အဟုန်မြင့်တက်လာနေစဉ် အရှေ့အလယ်ပိုင်းဒေသ ၌ ပဋိပက္ခများပြင်းထန်လျက်ရှိသည်။ ကုလသမဂ္ဂ၏ နျူကလီးယား စောင့်ကြည့်ရေးအဖွဲ့က အီရန်သည် နျူကလီးယားဗုံး ထုတ်လုပ်နိုင်သည့် ယူရေနီယံပမာဏကို အလျင်အမြန်တိုးချဲ့ခဲ့ကြောင်း သတိပေးခဲ့ပြီးအီရန်က နျူကလီးယားဗုံး ထုတ်လုပ်ရန်မဟုတ်ဟု ငြင်းဆိုပြီး ၎င်း၏ နျူကလီးယားစွမ်းအင်အစီအစဉ်သည် “ငြိမ်းချမ်းမှုအပြည့်ဖြင့်” လုပ်ဆောင် နေခြင်းဖြစ်သည်ဟု ပြောကြားခဲ့သည်။

တရုတ်သည် ၎င်း၏သံတမန်ရေးရာတွန်းအားဖြင့် ဤအဆင့်သို့ ရောက်ရှိလာပြီး လေ့လာသူများက ပေကျင်းသည် အမေရိကန်ပြည်ထောင်စုကို အစားထိုးနိုင်သည့် ကမ္ဘာ့ခေါင်းဆောင်တစ်ဦးအဖြစ် မိမိကိုယ်ကို တည်ဆောက်ရန် ရည်ရွယ်ချက်နှင့်ကိုက်ညီသည်ဟုဆိုသည်။ ထရမ့်၏ “အမေရိကန်ဦးစားပေး” မူဝါဒဖြင့် နိုင်ငံခြားရေးမူဝါဒကို ပြောင်းလဲနေစဉ်တွင် တရုတ်ခေါင်းဆောင်များသည် ပိုမိုအောင်မြင်ရန် အခွင့်အလမ်းများရှိသည်ဟု ရှုမြင်ကြသည်။

“တရုတ်သည် ၎င်း၏အကျိုးစီးပွားများကို ကာကွယ်ရန်၊ ဒေသဆိုင်ရာ ဩဇာလွှမ်းမိုးမှုကို တိုးချဲ့ရန်နှင့် တာဝန်ယူမှုရှိသော ကမ္ဘာ့အင်အားကြီး တစ်ခုအဖြစ် ၎င်း၏ပုံရိပ်ကို အားဖြည့်ရန် (အီရန်နျူကလီးယားကိစ္စတွင်) ပါဝင်ပတ်သက်မှုကို နက်ရှိုင်းစေရန် တိုးတက်လာသည့် လှုံ့ဆော်မှုများ ရှိသည်” ဟု ဝါရှင်တန်ရှိ Carnegie Endowment for International Peace အတွေးအခေါ်ရေးရာဌာနမှ အကြီးတန်းအဖွဲ့ဝင် Tong Zhao က ပြောကြားခဲ့သည်။

ရုရှားနှင့် အီရန်နှစ်နိုင်ငံလုံးကို စားပွဲဝိုင်းတွင်ထားရှိခြင်းဖြင့် တရုတ်သည် “အနောက်နိုင်ငံများ မပါဝင်သော ချဉ်းကပ်မှုများ၏အရေးပါမှုကို သိသာ ထင်ရှားစေရန်” ရည်ရွယ်နိုင်သည်ဟု ၎င်းကဆက်လက် ပြောကြားခဲ့သည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

မော်စကိုသည် ယူကရိန်းပဋိပက္ခတွင် စစ်ပြေငြိမ်းရေးကို ထောက်ခံသော်လည်း အမေရိကန်နှင့် နောက်ဆက်တွဲ သဘောတူညီချက်များအတွက် ဆွေးနွေးညှိနှိုင်းရန် လိုအပ်ကြောင်း ရုရှားသမ္မတ ဗလာဒီမာ ပူတင် ကပြောကြားခဲ့သည်။

အမေရိကန်သမ္မတ ဒေါ်နယ်ထရမ့်၏ အထူးကိုယ်စားလှယ် Steve Witkoff သည် မတ်လ ၁၃ ရက်(ကြာသပတေး)နေ့တွင် မော်စကိုသို့ ရောက်ရှိလာပြီး အဆင့်မြင့်ဆွေးနွေးပွဲများ ပြုလုပ်ခဲ့သည်။ ပူတင်၏ အကြီးတန်း နိုင်ငံခြားရေးမူဝါဒ အကြံပေး၏အဆိုအရ အမေရိကန်သံတမန်သည် ယင်းနေ့ညနေပိုင်းတွင် သမ္မတနှင့် တွေ့ဆုံဆွေးနွေးမည်ဖြစ်သည်။

Witkoff သည် အမေရိကန်နှင့် ယူကရိန်းကိုယ်စားလှယ်များ ဆော်ဒီအာရေဗျ၌ မတ်လ ၁၁ ရက်(အင်္ဂါ)နေ့က ဆွေးနွေးပွဲပြုလုပ်ပြီးနောက် ၎င်းတို့၏ ပူးတွဲကြေညာချက်တွင် အဆိုပြုထားသည့် မော်စကိုနှင့် ၃၀ ရက်ကြာ စစ်ပြေငြိမ်းရေးကို ဆွေးနွေးညှိနှိုင်းရန် ရုရှားမြို့တော်သို့ ရောက်ရှိလာခြင်းဖြစ်သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ရုရှားသည် ယူကရိန်းပဋိပက္ခတွင် ပစ်အခတ်ရပ်စဲရန် အဆင်သင့်ဖြစ်နေပြီဖြစ်ကြောင်း သမ္မတ ဗလာဒီမာ ပူတင်က ပြောကြားခဲ့ပြီး ထိုသို့သော သဘောတူညီချက်သည် “ရေရှည်ငြိမ်းချမ်းရေးကို ဦးတည်သင့်သည်” ဟု အတိအလင်း ပြောကြားခဲ့ပါသည်။ 

ရုရှားသည် အပစ်အခတ်ရပ်စဲရေးအယူအဆသည် “မှန်ကန်သော အယူအဆ” ဖြစ်သင့်သည်ဟု ယုံကြည်ကြောင်း သမ္မတ ပူတင်က မတ် လ ၁၃ ရက် (ကြာသပတေးနေ့)တွင် မော်စကို၌ ပြုလုပ်သည့် ဘယ်လာရုဇ်သမ္မတ အလက်ဇန္ဒား လူကာရှန်ကိုနှင့် ပူးတွဲသတင်းစာရှင်းလင်းပွဲတစ်ခုတွင် သတင်းထောက်များကို ပြောကြားခဲ့ပါသည်။ 

"မိမိတို့က လုံးဝထောက်ခံပါတယ်" ဟု ၎င်းက ဖြည့်စွက် ပြောကြားခဲ့ပါသည်။   

“ငြိမ်းချမ်းသောနည်းလမ်းများဖြင့် ပဋိပက္ခကို ဖြေရှင်းရန် အယူအဆကို မိမိတို့က ထောက်ခံပါတယ်” ဟု သမ္မတက ပြောကြားခဲ့ပါသည်။   

အပစ်အခတ်ရပ်စဲရန် သဘောတူညီချက်ရရှိရန် ဆွေးနွေးဖြေရှင်းရမည့် အချို့သော ကိစ္စရပ်များ ရှိနေသေးကြောင်း သမ္မတပူတင်က ပြောကြားခဲ့ပြီး မော်စကိုသည် အထူးသဖြင့် အမေရိကန်နှင့် ဆွေးနွေးရန် လိုအပ်ကြောင်း ဖြည့်စွက်ပြောကြားခဲ့ပါသည်။ ထိုဆွေးနွေးမှုတွင် အမေရိကန် သမ္မတ ဒေါ်နယ်ထရမ့်နှင့် ကိုယ်တိုင်တွေ့ဆုံဆွေးနွေးရန် လိုအပ်နိုင်ကြောင်း ရုရှားသမ္မတက ပြောကြားခဲ့ပါသည်။   

သမ္မတပူတင်၏ စိုးရိမ်မှုများတွင် အပစ်အခတ်ရပ်စဲမှုကို စောင့်ကြည့်ရန် “ထိန်းချုပ်မှုနှင့် အတည်ပြုမှု” စနစ်များနှင့် ယူကရိန်း၏ အပစ်အခတ် ရပ်စဲချိန်ကို အသုံးချ၍ လက်နက်ပြန်လည်တပ်ဆင်ခြင်းနှင့် ရှေ့တန်းရှိ တပ်ဖွဲ့များကို ပြန်လည်အားဖြည့်ခြင်းတို့ ပါဝင်ပါသည်။ 

“ရက် ၃၀ ကို ယူကရိန်းတွင် အတင်းအကြပ် စစ်ရေးလှုံ့ဆော်မှုကို ဆက်လုပ်ဖို့၊ လက်နက်တပ်ဆင်မှုတွေ ပိုမိုရယူဖို့နှင့် အသစ်ဖွဲ့စည်း ထားသော တပ်ဖွဲ့များကို လေ့ကျင့်ဖို့ အသုံးပြုမှာလား” ဟု သမ္မတက မေးခွန်းထုတ်ခဲ့ပါသည်။ “ထိုသို့သောအရာများ မဖြစ်ပေါ်စေရန် အာမခံချက်များ ရှိပါသလား။” ဟု သမ္မတက ပြောကြားခဲ့ပါသည်။

ရုရှားနယ်စပ်ရှိ Kursk ဒေသ၏ အခြေအနေသည်လည်း အဓိက အငြင်းပွားဖွယ်ရာ အချက်တစ်ခု ဖြစ်နိုင်ကြောင်း ရုရှားသမ္မတက ဆိုခဲ့ပါသည်။ သမ္မတပူတင်က အပစ်အခတ်ရပ်စဲမှုသည် ၂၀၂၄ ခုနှစ်၊ ဩဂုတ်လတွင် ထိုဒေသသို့ ဝင်ရောက်ခဲ့သည့် ယူကရိန်းတပ်များအားလုံးကိုရုရှားက ထွက်ခွာခွင့်ပြုရမည်လားဟု စဉ်းစားခဲ့ပါသည်။ “၎င်းတို့က ပြည်သူတွေကို များပြားလှသည့် ရာဇဝတ်မှုတွေ ကျူးလွန်ပြီးနောက် ၎င်းတို့ကို လွှတ်ပေးရမှာလား။ ဒါမှမဟုတ် ယူကရိန်းက ၎င်းတို့ကို လက်နက်ချဖို့ အမိန့်ပေးမှာလား” ဟု သမ္မတက မေးခွန်းထုတ်ခဲ့ပါသည်။ 

အမေရိကန်နှင့် ယူကရိန်းတို့သည် မတ်လ ၁၁ ရက်၊ အင်္ဂါနေ့တွင် ဆော်ဒီ အာရေဗျနိုင်ငံတွင် ကျင်းပသည့် နှစ်နိုင်ငံကိုယ်စားလှယ်အဖွဲ့များ၏ တွေ့ဆုံဆွေးနွေးပွဲအပြီး ရက်ပေါင်း ၃၀ ကြာ ယာယီအပစ်အခတ် ရပ်စဲရေးကို ထောက်ခံခဲ့ပါသည်။ အမေရိကန်အထူးကိုယ်စားလှယ် စတီဗ် ဝစ်ကော့ဖ် သည် မတ်လ ၁၄ ရက်နေ့ ညနောက်ပိုင်းတွင် မော်စကိုသို့ လာရောက်စဉ် ထိုဆွေးနွေးပွဲ၏ ရလဒ်များကို တင်ပြမည်ဟု မျှော်လင့်ရပါသည်။   

ရုရှားသည် ယခင်က ယူကရိန်းပဋိပက္ခတွင် မည်သည့်ယာယီ အပစ်အခတ်ရပ်စဲမှုကိုမဆို ကန့်ကွက်ခဲ့ပြီး ယူကရိန်းသည် ထိုအချိန်ကို အသုံးချ၍ လက်နက်ပြန်လည်တပ်ဆင်ကာ စစ်ပွဲကို ဆက်လက်ဆင်နွှဲမည်ဟု ပြောဆို ခဲ့ပါသည်။ သမ္မတပူတင်က ပဋိပက္ခကို ဖြေရှင်းရန် မည်သည့်နည်းလမ်း ကိုမဆို ရေရှည်တည်တံ့သော ငြိမ်းချမ်းရေးကို တည်ဆောက်ရန်အတွက် အကြောင်းရင်းများကို ဖြေရှင်းရမည်ဟု ပြောကြားခဲ့ပါသည်။

ကိုးကား - RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ရုရှားသမ္မတဗလာဒီမာပူတင်သည် ရုရှားနိုင်ငံသို့ တရားဝင် အလည်အပတ် လာရောက်မည့် ဘယ်လာရုစ်သမ္မတ လူကာရှန်ကိုနှင့် မတ်လ ၁၃ (ကြာသပတေးနေ့)တွင် တွေ့ဆုံမည် ဖြစ်ပါသည်။ ထိုခရီးစဉ်သည်လူကာရှန်ကို၏ ပြန်လည်ရွေးကောက်ခံရပြီးနောက် ပထမဆုံးပြည်ပ ခရီးစဉ် ဖြစ်ပါသည်။

ထိုတွေ့ဆုံပွဲတွင် ရုရှား-ဘယ်လာရုစ်တို့ ပါဝင်သော ပြည်ထောင်စုနိုင်ငံအတွင်း ပိုမိုပေါင်းစည်းရေးဆောင်ရွက်နိုင်မှုနှင့် နိုင်ငံတကာအရေးပေါ် ကိစ္စရပ်များကို ဆွေးနွေးမည်ဖြစ်ပါသည်။ တွေ့ဆုံပွဲအပြီးတွင် ခေါင်းဆောင်များသည် ပူးတွဲစာချုပ်အချို့ကို လက်မှတ်ရေးထိုးမည်ဖြစ်ပြီး သတင်းစာ ရှင်းလင်းပွဲ ပြုလုပ်ရန် စီစဉ်ထားပါသည်။

သတင်းစာရှင်းလင်းပွဲ၌ ယူကရိန်းအကြောင်း ပြောလာနိုင်သည် ဟု ကရင်မလင်ပြောရေးဆိုခွင့်ရှိသူ ဒင်မီထရီပက်စကိုဗ်က ပြောကြားလိုက်ပါသည်။

ထိုသတင်းစာရှင်းလင်းပွဲတွင် ရုရှားသမ္မတနှင့်ဘယ်လာရုစ်သမ္မတတို့က ပူးတွဲပြီး သတင်းထောက်များ၏ မေးမြန်းမှုများကို ဖြေကြားသွားမည် ဖြစ်ကြောင်း၊ အကြောင်းအရာအားလုံးမှာ သတင်းထောက်များ မေးမြန်းလာမည့်မေးခွန်းများအပေါ်တွင် မူတည်နေကြောင်း ကရင်မလင် ပြောခွင့်ရက ပြောကြားထားပါသည်။

မတ်လ ၁၁ ရက်က အမေရိကန်နှင့် ယူကရိန်းကိုယ်စားလှယ်အဖွဲ့သည် ဆော်ဒီအာရေဗျရှိ ဂျက်ဒါ၌ တွေ့ဆုံဆွေးနွေးခဲ့ကြပြီး ထုတ်ပြန်လိုက်သည့် ပူးတွဲကြေညာချက်တွင် ယူကရိန်းအစိုးရသည် ရက် ၃၀ ကြာမြင့်မည့် အပစ်အခတ်ရပ်စဲရေး တည်ဆောက်ရန်နှင့် အမေရိကန်နှင့် မြေရှားသတ္တု အရင်းအမြစ်ဆိုင်ရာ သဘောတူညီမှု လက်မှတ်ရေးထိုးရန်အသင့် ဖြစ်နေ ကြောင်း ဖော်ပြထားပါသည်။

အပြန်အလှန်အနေဖြင့် အမေရိကန်က ယူကရိန်းကို စစ်ဘက်ဆိုင်ရာ အကူအညီနှင့် ထောက်လှမ်းရေးသတင်းများ ချက်ချင်း ပြန်လည်ပေးမည်ဟု ကတိကဝတ် ပြုထားပါသည်။ ရုရှားသည် အဆိုပါ ဆွေးနွေးပွဲ ရလဒ်များအရ အမေရိကန်ဘက်က တရားဝင် ကမ်းလှမ်းလာမှုကိုမျှော်လင့်နေပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

DR Congo နှင့် M23 သူပုန်များအကြား ငြိမ်းချမ်းရေးဆွေးနွေးပွဲများကို မတ်လ ၁၈ ရက်နေ့တွင် စတင်မည်ဖြစ်ကြောင်း အန်ဂိုလာနိုင်ငံက မတ်လ ၁၂ ရက်နေ့တွင် ကြေညာခဲ့သည်။ အာဖရိကအလယ်ပိုင်းရှိ ပဋိပက္ခဒဏ်ခံနေရသောနိုင်ငံတွင် ရေရှည်အပစ်အခတ်ရပ်စဲရေး ဆွေးနွေးမှုများကို စေ့စပ်ပေးရန် အန်ဂိုလာက ကြိုးပမ်းနေခြင်းဖြစ်သည်။

ဆွေးနွေးပွဲများကို အန်ဂိုလာနိုင်ငံ၏မြို့တော် Luanda တွင် ကျင်းပမည်ဖြစ်ကြောင်း အန်ဂိုလာသမ္မတ Joao Goncalves Lourenco ၏ ရုံးမှ ထုတ်ပြန်ချက်တွင် ဖော်ပြထားသည်။

DR Congo သမ္မတ Felix Tshisekedi သည် အန်ဂိုလာသမ္မတနှင့် DR Congo အရှေ့ပိုင်းရှိ ပဋိပက္ခများကို ဆွေးနွေးရန် Luanda သို့ သွားရောက်ခဲ့ပြီးနောက် ယခုဆုံးဖြတ်ချက်ကို ချမှတ်ခဲ့ခြင်းဖြစ်သည်။ အန်ဂိုလာ သမ္မတ သည် လက်ရှိတွင် အာဖရိကသမဂ္ဂ၏ ဥက္ကဋ္ဌလည်းဖြစ်သည်။

သယံဇာတကြွယ်ဝသော DR Congo ၏ အရှေ့ပိုင်းပြည်နယ်များတွင် ဇန်နဝါရီလက ပဋိပက္ခများ ပိုမိုပြင်းထန်လာခဲ့ပြီး M23 သူပုန်များက North Kivu မြို့တော် Goma နှင့် South Kivu မြို့တော် Bukavu အပါအဝင် အဓိကမြို့ကြီးများစွာကို သိမ်းပိုက်ခဲ့သည်။ ပြီးခဲ့သည့် အပတ် က Kinshasa ကျန်းမာရေးဝန်ကြီးဌာနက ယခုနှစ်အတွင်း လူပေါင်း ၈,၅၀၀ ကျော် သေဆုံးခဲ့ကြောင်း ထုတ်ပြန်ခဲ့သည်။

DR Congo သည် အိမ်နီးချင်းနိုင်ငံဖြစ်သော ရဝန်ဒါကို M23 သူပုန်များကို ထောက်ခံသည်ဟု မကြာခဏပင် စွပ်စွဲခဲ့ပြီး ထိုစွပ်စွဲချက်ကို အနောက် နိုင်ငံအချို့ကလည်း ထောက်ခံခဲ့သည်။ ရဝန်ဒါကမူ ယင်းစွပ်စွဲချက်များ ကို မမှန်ကန်ကြောင်း အမြဲငြင်းဆိုခဲ့သည်။

DR Congo အာဏာပိုင်များသည် ယခင်က သူပုန်များနှင့် ဆွေးနွေးရန် ငြင်းဆိုခဲ့ပြီး ရဝန်ဒါက Kinshasa အား M23 နှင့် တိုက်ရိုက်ဆွေးနွေးရန် တောင်းဆိုခဲ့သည့်နောက် အန်ဂိုလာမှ စေ့စပ်ပေးသော ငြိမ်းချမ်းရေးကြိုးပမ်းမှုများကို ပြီးခဲ့သည့်နှစ် ဒီဇင်ဘာလတွင် ရပ်ဆိုင်းခဲ့သည်။ ယခုလ အစောပိုင်းတွင် DR Congo ဝန်ကြီးချုပ် Judith Suminwa Tuluka က BBC သို့ပြောကြားရာတွင် သူမ၏အစိုးရသည် ရဝန်ဒါနှင့်သာ ဆွေးနွေးမည်ဖြစ်ကြောင်း၊ ရဝန်ဒါသည် “DR Congo ၏ နယ်မြေပိုင်နက်နှင့် အချုပ်အခြာ အာဏာကို ကျူးကျော်သူ” ဖြစ်ကြောင်း ပြောကြားခဲ့သည်။

အန်ဂိုလာသမ္မတ Joao Lourenco ၏ ရုံးမှ မတ်လ ၁၂ ရက်နေ့ ထုတ်ပြန်ချက်တွင် နှစ်ဖက်အဖွဲ့များသည် မတ်လ ၁၈ ရက်နေ့တွင် အန်ဂိုလာမြို့တော် Luanda ၌ “တိုက်ရိုက်ငြိမ်းချမ်းရေးဆွေးနွေးပွဲများ” စတင်မည်ဖြစ်ကြောင်း ဖော်ပြထားသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂