ဆီးရီးယားတပ်ဖွဲ့များနှင့် Assad သစ္စာခံများအကြား တိုက်ပွဲများဖြစ်ပွားပြီး လူပေါင်းများစွာ သေဆုံးခဲ့

ဆီးရီးယားနိုင်ငံ၏ ကမ်းရိုးတန်းဒေသတွင် လက်ရှိအုပ်ချုပ်သူများနှင့် ဆက်စပ်နေသော တပ်ဖွဲ့များနှင့် သမ္မတဟောင်း Bashar al-Assad ၏ သစ္စာခံ တပ်ဖွဲ့များအကြား တိုက်ပွဲများပြင်းထန်စွာ ဖြစ်ပွားနေကြသည်။

၂၀၂၄ ခုနှစ်၊ ဒီဇင်ဘာလတွင် သူပုန်များက Assad ကို ဖြုတ်ချပြီး အစ္စလာမ်မစ် အကူးအပြောင်းအစိုးရကို တည်ထောင်ခဲ့သည့်အချိန်မှစ၍ ဆီးရီးယားတွင် အဆိုးရွားဆုံး အကြမ်းဖက်မှုများ ဖြစ်ပွားခဲ့ခြင်း ဖြစ်သည်။

စစ်ပွဲစောင့်ကြည့်ရေးအဖွဲ့ဖြစ်သော ဗြိတိန်အခြေစိုက် Syrian Observatory for Human Rights က လူပေါင်း ၇၀ ကျော် သေဆုံးခဲ့သည်ဟု ပြောကြား ခဲ့သည်။

တိုက်ပွဲများ ဖြစ်ပွားခဲ့သော ဆိပ်ကမ်းမြို့များဖြစ်သည့် Latakia နှင့် Tartous တို့တွင် ညပိုင်းအချိန်တားမြစ်ချက် ထုတ်ပြန်ခဲ့သည်။

Latakia တွင် စစ်ဆင်ရေးတစ်ခု ပြုလုပ်နေစဉ် အစိုးရတပ်ဖွဲ့များကို ချုံခိုတိုက်ခိုက်မှုခံခဲ့ရပြီးနောက် တိုက်ပွဲများ ပြင်းထန်ခဲ့သည်။

မတ်လ ၆ ရက်(ကြာသပတေး)နေ့ ညနက်ပိုင်းတွင် ဆီးရီးယားအခြေစိုက် Step သတင်းဌာနက လက်ရှိအစိုးရတပ်ဖွဲ့များသည် ယခင်က အာဏာရှင် စနစ် တပ်ဖွဲ့ဝင် "၇၀ ခန့်" ကို သတ်ဖြတ်ခဲ့ပြီး အခြား ၂၅ ဦးကျော်ကို Jableh နှင့် ပတ်ဝန်းကျင်တွင် ဖမ်းဆီးခဲ့ကြောင်း သတင်း ထုတ်ပြန်ခဲ့သည်။

Homs နှင့် Aleppo မြို့များတွင်လည်း တိုက်ပွဲများ ဖြစ်ပွားခဲ့ကြောင်း သတင်းများရှိသည်။

ဆီးရီးယား ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူ ဗိုလ်မှူးကြီး Hassan Abdul Ghani က Latakia တွင် တိုက်ခိုက်နေသော Assad ၏ သစ္စာခံများအား နိုင်ငံပိုင်မီဒီယာမှတစ်ဆင့် လက်နက်ချရန် သတိပေးချက် ထုတ်ပြန်ခဲ့သည်။

ယခုအပတ်အစောပိုင်းတွင် ဆီးရီးယားနိုင်ငံခြားရေးဝန်ကြီးက အစိုးရအသစ်သည် Assad လက်ထက်တွင် ထုတ်လုပ်ခဲ့သော ကျန်ရှိနေသည့် ဓာတုလက်နက်များကို ဖျက်ဆီးရန် ကတိပြုထားကြောင်း ကမ္ဘာ့ဓာတု လက်နက်များ စောင့်ကြည့်ရေးအဖွဲ့အား ပြောကြားခဲ့သည်။

Assad အစိုးရသည် ပြည်တွင်းစစ် ၁၄ နှစ်အတွင်း ဓာတုလက်နက်များ အသုံးပြုခဲ့သည်ဟူသော စွပ်စွဲချက်ကို ငြင်းဆိုခဲ့သော်လည်း လှုပ်ရှားသူများက ဓာတုလက်နက်များဖြင့် ဒါဇင်နှင့်ချီ၍ တိုက်ခိုက်မှုများ ပြုလုပ်ခဲ့သည်ဟု စွပ်စွဲခဲ့ကြသည်။

ကိုးကား-BBC

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂