ဆေးယဉ်ပါးဘေးကြုံရနိုင်သော စပ်ဆေးရောင်းခြင်းကို တိုင်ကြားနိုင်

မြန်မာနိုင်ငံရှိ ဆေးဆိုင်များအနေဖြင့် ဆေးယဉ်ပါးဘေးကြုံရနိုင်သော စပ်ဆေးနှင့် သက်တမ်းကုန်ဆေးများရောင်းချနေသည်ကိုတွေ့ရှိပါကနီးစပ်ရာမြို့နယ် အစားအသောက်နှင့်ဆေးဝါးကွပ်ကဲရေးဦးဌာန (FDA) ရုံးသို့ဖြစ်စေ၊ FDA/Facebook Page နှင့် Website သို့ ဖြစ်စေ တိုင်ကြားရန် အစားအသောက်နှင့် ဆေးဝါးကွပ်ကဲရေးဦးဌာန (FDA) တာဝန်ရှိသူတစ်ဦးက NP News သို့ ပြောသည်။

ပြည်သူများအနေဖြင့် စပ်ဆေးမသုံးစွဲရန် သက်ဆိုင်ရာမှ သတိပေးထားသော်လည်း ငွေကြေးသက်သာခြင်း၊ ဝေဒနာ ယာယီပျောက်ကင်းခြင်း စသည့်အချက်များကြောင့် စပ်ဆေးဝယ်ယူ သုံးစွဲမှုမှာ ပပျောက်ခြင်းမရှိသေးကြောင်း သိရသည်။ စပ်ဆေးနှင့် သက်တမ်းလွန်ဆေး ရောင်းချခြင်းကို တိုင်ကြားမည်ဆိုပါက ရောင်းချနေသည့် ဆေးဆိုင်၏ ငွေဖြတ်ပိုင်း ပြေစာကဲ့သို့သော တိကျသည့် အထောက်အထား အချက်အလက်များဖြင့်တိုင်ကြားရန်လိုအပ်ပြီး FDA က စစ်ဆေးအရေးယူမှုများ လုပ်ဆောင် သွားမည်ဖြစ်ကြောင်း အဆိုပါတာဝန်ရှိသူကဆိုသည်။

“ပြည်သူတွေအနေဖြင့် တကယ့်အချက်အလက်တိတိကျကျဖြင့် တိုင်ကြားလာရန်လိုပါသည်။ ဒါမှ လွတ်မသွားမှာပေါ့။ ဒီလိုမဟုတ်ဘဲ ဒီဆေးကတ်ကို ဒီဆိုင်ကဝယ်လာသည့်အကြောင်း သက်သေပြဆိုသည့် အချိန်မှာဘာမှမပြနိုင်ရင်လျှင် လုပ်ရကိုင်ရခက်ပါသည်။ အချက်အလက် ပြည့်ပြည့်စုံစုံဖြင့် တိုင်ကြားလာခဲ့လျှင် မိမိတို့အနေဖြင့် မလုပ်ပေးတာမရှိပါ” ဟု ၎င်းက ရှင်းပြသည်။

လက်ရှိတွင် FDA အနေဖြင့် လစဉ်စစ်ဆေးမှုများကို လုပ်ဆောင်နေသော်လည်း ဆေးဆိုင်အားလုံးကို စစ်ဆေးရန်အလို့ငှာ မစွမ်းနိုင်ကြောင်း၊ ပြည်သူများအား စပ်ဆေး၏ဆိုးကျိုးများကြောင့် မသုံးစွဲကြရန် အသိပညာပေးမှုများကို လုပ်ဆောင်နေသော်လည်း ပြည်သူများဘက်မှ ပူးပေါင်းပါဝင်မှု အားနည်းနေသေးကြောင်းနှင့် ပြည်သူများ ပူးပေါင်းပါဝင်လာမှသာ ယခုကဲ့သို့ စပ်ဆေးရောင်းချနေမှုများကို ဖြေရှင်းနိုင်မည်ဖြစ်ကြောင်း အဆိုပါတာဝန်ရှိသူက ပြောသည်။

“ငါတို့ကို အစိုးရဝန်ထမ်းတွေက လာပြောနေတယ် ဆိုတာထက် ငါတို့ ကောင်းဖို့ ငါတို့ကိုပြောနေတာပါလား” ဆိုသည့်အမြင်ဖြင့် ပြည်သူတွေဘက်က မြင်ကြရန်လိုအပ်နေပါသည် ဟု ၎င်းက ရှင်းပြသည်။ မြန်မာနိုင်ငံတွင် (၁) အကိုက်အခဲပျောက်ဆေး (သို့) အဖျားကျဆေး၊ (၂) အစာအိမ်ဆေး (သို့) လေဆေး၊ (၃) ပိုးသတ်ဆေး၊ (၄) အားဆေးနှင့် (၅) steroid ခေါ် အပြင်းစားအရောင်ကျဆေးဟူ၍ စပ်ဆေးအုပ်စု ငါးမျိုးကို အဓိကတွေ့ရလေ့ရှိကြောင်း ဆရာဝန်များ၏ သုံးသပ်ချက်များအရ သိရသည်။

ကိုးကား- NP News