နော့ထရီဒမ် ဘုရား‌ကျောင်းပြန်လည်ဖွင့်လှစ်သည့် အခမ်းအနား ကမ္ဘာ့ခေါင်းဆောင်များ တက်ရောက်

ပါရီ  ဒီဇင်ဘာ ၈

အမေရိကန်သမ္မတအဖြစ် ရွေးကောက်ခံထားရသည့် ‌ဒေါ်နယ်ထရမ့်အပါအဝင် ကမ္ဘာ့ခေါင်းဆောင်များသည် ပြင်သစ်နိုင်ငံရှိ နော့ထရီဒမ် ဘုရားကျောင်းပြန်လည်ဖွင့်လှစ်သည့် ဖွင့်ပွဲအခမ်းအနားကို တက်ရောက်ခဲ့ကြသည်။

အဆိုပါ ဘုရားကျောင်းသည် လွန်ခဲ့သည့် ငါးနှစ်က မီးဘေးသင့်ကာ ပျက်စီးခဲ့ရသည်။ ပြန်လည်ဖွင့်လှစ်သည့် အခမ်းအနားကို ဒီဇင်ဘာ ၇ ရက် ညနေပိုင်းက ကျင်းပခဲ့သည်။

ယင်းဘုရားကျောင်းမှာ ၂၀၁၉ ခုနှစ်က မီးဘေးကြောင့် ပျက်စီးခဲ့ရပြီးနောက် ပြန်လည် ထိန်းသိမ်းမှုလုပ်ငန်းများ လုပ်ဆောင်ခဲ့သည်။ ဖွင့်ပွဲအခမ်းအနားသို့ ကမ္ဘာတစ်ဝန်းမှ ထင်ရှား‌ကျော်ကြားသူများ တက်ရောက်ခဲ့ကြသည်။ အမေရိကန်သမ္မတအဖြစ် ရွေးကောက်ခံထားရသည့် ဒေါ်နယ်ထရမ့်အတွက် နိုဝင်ဘာလ ရွေး‌ကောက်ပွဲအပြီးတွင် ပထမဦးဆုံးအကြိမ်အဖြစ် နိုင်ငံခြားရေးခရီးစဉ် သွားရောက်ခြင်းလည်းဖြစ်သည်။

ရာသီဥတုဆိုးရွားမှုကြောင့် အခမ်းအနားကို ပြန်လည်ပြင်ဆင်ခဲ့ရပြီး ဘုရားကျောင်းအတွင်း ပွဲကျင်းပခဲ့ရသည်။ ပြင်သစ်သမ္မတ အီမန်နျူရယ် မက်ခရွန်က မိန့်ခွန်းပြောကြားပြီး နယ်ပယ် အသီးသီးမှ လက်မှုပညာဆရာများ အပါအဝင် လူပေါင်း ၂၀၀၀ ကျော် ပါဝင်ခဲ့သည့် ငါးနှစ်ကြာ ပြန်လည်ထူ‌ထောင်ရေးလုပ်ငန်းကို ကြည့်ရှုခဲ့ကြသည်။

အင်န်အိတ်ချ်ကေ

Source- မြန်မာ့အလင်းသတင်းစာ