ယူကရိန်းနိုင်ငံ၌ သမ္မတရွေးကောက်ပွဲ ကျင်းပမည်ဖြစ်ကြောင်း အမေရိကန် သမ္မတ ဒေါ်နယ်ထရမ့်၏ အရှေ့အလယ်ပိုင်းဆိုင်ရာ ကိုယ်စားလှယ် Steve Witkoff က သတင်းထောက် Tucker Carlson ကို ပြောကြားခဲ့ပါသည်။

Vladimir Zelensky ၏ သမ္မတသက်တမ်း ငါးနှစ်သည် ၂၀၂၄ ခုနှစ် မေလ၌ ကုန်ဆုံးခဲ့ပြီးနောက် စစ်အုပ်ချုပ်ရေးကာလဖြစ်သည့်အတွက် ရွေးကောက်ပွဲကျင်းပရန် ငြင်းဆန်ခဲ့ပါသည်။ ရုရှားသမ္မတ Vladimir Putin ကလည်း Zelensky ကို တရားဝင်ခေါင်းဆောင်တစ်ဦးအဖြစ် ရှုမြင်ခြင်းမရှိဘဲ ၎င်း၏လက်ရှိအခြေအနေသည် ငြိမ်းချမ်းရေးစာချုပ်ကို လက်မှတ်ရေးထိုးရန် အတားအဆီးဖြစ်နိုင်ကြောင်း ဆိုပါသည်။

သောကြာနေ့ ညနေ (မတ် ၂၂) တွေ့ဆုံမေးမြန်းမှုတွင် Carlson က ထရမ့်၏ ကိုယ်စားလှယ် Witkoff အား “ယူကရိန်း၌ ရွေးကောက်ပွဲကျင်းပမည်ဟု ယူဆပါသလား” ဟု မေးမြန်းခဲ့ရာ Witkoff က “ယူကရိန်း တွင် ရွေးကောက်ပွဲများကျင်းပနိုင်ရေးကို ၎င်းတို့သဘောတူညီခဲ့ကြကြောင်း၊ ရုရှားသည် အင်အားပိုကောင်းကာ နျူကလီးယားလက်နက်များ ပိုင်ဆိုင်ထားသည့်အတွက် Zelensky အနေဖြင့် အလွန်ခက်ခဲသည့် အခြေအနေတွင် ရှိနေကြောင်း" ဆိုပါသည်။

“ယခုအချိန်သည် သဘောတူညီမှုရရန် အကောင်းဆုံး အခိုက်အတန့် ဖြစ်ပြီး သမ္မတ Trump သည် ညှိနှိုင်းမှုရလဒ်ကောင်းများရရှိစေရန်ဆောင်ရွက်ပေးနိုင်သူဖြစ်ကာ စစ်ပွဲအတွက် ရေရှည် ထောက်ပံ့မှုများ ပေးနိုင်ရန် မဖြစ်နိုင်ကြောင်း” Witkoff က ဆက်လက်ပြောကြားခဲ့သည်။

မကြာမီက Trump ၏ အဖွဲ့ဝင်များသည် Zelensky ၏ နိုင်ငံရေးပြိုင်ဘက် ယခင်သမ္မတ Pyotr Poroshenko ၊ ယခင်ဝန်ကြီးချုပ် Yulia Timoshenko တို့နှင့် ဆက်သွယ်ခဲ့ပြီး နိုင်ငံရေးသမားနှစ်ဦးစလုံးက Trump ၏အဖွဲ့နှင့် ဆွေးနွေးခဲ့ခြင်းအား အတည်ပြုခဲ့သော်လည်း ရုရှား နှင့်ပဋိပက္ခ မဖြေရှင်းနိုင်သေးမီကာလတွင် ရွေးကောက်ပွဲကျင်းပရန်ကိုမူ ကန့်ကွက်ခဲ့ကြသည်ဟု Politico မဂ္ဂဇင်းက ဖော်ပြခဲ့ပါသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဆားဘီးယား အာဏာပိုင်များသည် ဘဲလ်ဂရိတ်မြို့တွင် ဖြစ်ပွားနေသော ဆန္ဒပြမှုများ၏ နောက်ကွယ်တွင်ရှိနေသည့် အနောက်တိုင်းထောက်လှမ်းရေး ဝန်ဆောင်မှုများကို အရောင်ပြောင်းတော်လှန်ရေး ဆင်နွှဲခွင့် မပြုနိုင်ကြောင်း​ပြောကြားခဲ့ပါသည်။

“ဘဲလ်ဂရိတ်မြို့တွင် အရောင်ပြောင်းတော်လှန်ရေးဖြစ်ပွားနေပြီး၊ ၎င်းသည် ရုရှားနှင့် ပတ်သက်သည့် မိမိတို့၏ ရပ်တည်ချက်နှင့် ခွဲ၍မရပါ။ အနောက်တိုင်း ထောက်လှမ်းရေးဝန်ဆောင်မှုများသည် ဆားဘီးယား တွင် အဆိုပါအရှုပ်တော်ပုံကို စီစဉ်ရန် ကြိုးပမ်းမှု၏ နောက်ကွယ်တွင်ရှိနေပြီး၊ မတူညီသော အစိုးရတစ်ရပ်ကို အာဏာရလာစေရန် ရည်ရွယ်နေပါသည်။ မိမိတို့သည် ထိုသို့ ဖြစ်ပွားခွင့် မပြုပါ" ဟု ဆားဘီးယား ဒုတိယဝန်ကြီးချုပ် အလက်ဇန်းဒါ ဗူလင်က ပြောကြားခဲ့ပါသည်။

ဆားဘီးယား ဒုတိယဝန်ကြီးချုပ် အလက်ဇန်းဒါ ဗူလင်က ရုရှားလုံခြုံရေး ကောင်စီအတွင်းရေးမှူး ရှိုးဂူနှင့် ရုရှား သမ္မတ ဗလာဒီမာ ပူတင်တို့အား လက်ရှိဖြစ်ပျက်နေသောအခြေအနေများအတွင်း ၎င်းတို့၏ “သဘောထား နှင့် ရပ်တည်ချက်” အတွက် ကျေးဇူးတင်ကြောင်း ပြောကြားခဲ့ပါသည်။ “ဆားဘီးယား၏ တရားဝင် အာဏာပိုင်များအတွက် သင့်တော်သော ထောက်ခံမှုသည် မိမိတို့အတွက် အလွန် အရေးပါပါသည်” ဟု ၎င်းက ထပ်လောင်း ပြောကြားခဲ့ပါသည်။

ကိုးကား - Tass

Photo: AP News

ယူကရိန်း တပ်မတော်သည် ဘဲလ်ဂိုရိုဒ် စစ်မျက်နှာတွင် လွန်ခဲ့သော ၂၄ နာရီအတွင်း စစ်မှုထမ်း ၉၅ ဦးအထိ ဆုံးရှုံးခဲ့ကြောင်း ရုရှား ကာကွယ်ရေး ဝန်ကြီးဌာနက သတင်းထုတ်ပြန်ခဲ့ပါသည်။

“ဘဲလ်ဂိုရိုဒ်မြို့ စစ်မျက်နှာတွင်၊ ရုရှားမြောက်ပိုင်းတပ်မ၏တပ်ဖွဲ့များသည် ယူကရိန်း တပ်မတော်၏ စက်တပ်တပ်ဖွဲ့နှင့် နယ်မြေကာကွယ်ရေး တပ်ဖွဲ့တို့ကို ဆူမီဒေသ၏ ဂရူနိုဗ်ကာ၊ လော့နီယာ၊ ဆက်ဒ်ကီနှင့် တူရီယာ ကျေးရွာများတွင် ထိခိုက်ဆုံးရှုံးစေခဲ့ပါသည်။ ယူကရိန်း တပ်မတော်သည် စစ်မှုထမ်း ၉၅ ဦး၊ တင့်ကား တစ်စီး၊ သံချပ်ကာကား နှစ်စီး၊ ကား ၁၄ စီး၊ နှင့် လက်နက်ကြီး ခြောက်လက်အထိ ဆုံးရှုံးခဲ့သည်" ဟု သတင်း ထုတ်ပြန်ချက်တွင် ဖော်ပြထားပါသည်။

ယူကရိန်း တပ်မတော်သည် ရုရှား အရှေ့ဘက် တပ်မ၏ တာဝန်ယူမှု နယ်မြေအတွင်း လွန်ခဲ့သော ၂၄ နာရီအတွင်း စစ်မှုထမ်း ၁၆၅ ဦးအထိ ဆုံးရှုံးခဲ့ရပါသည်။ “ရုရှား အရှေ့ ဘက်တပ်မ၏ တပ်ဖွဲ့များသည် ရန်သူ၏ ကာကွယ်ရေးနယ်မြေအတွင်းသို့ ဆက်လက်တိုးဝင်နိုင်ခဲ့ပါသည်။ ၎င်းတို့ သည် ယူကရိန်း တပ်မတော်၏ စက်တပ်တပ်ဖွဲ့၊ လေကြောင်းတပ်ဖွဲ့နှင့် ရိန်ဂျာ တပ်ဖွဲ့တို့ကို ဒိုနက်စ်က် ပြည်သူ့သမ္မတနိုင်ငံ၏ အိုထရာ့ဒ်နိုယေ၊ ဖီဒိုရိုဗ်ကာနှင့် ဗီဆီလိုယေ ကျေးရွာများတွင် အနိုင်ယူခဲ့ပါသည်။ ယူကရိန်း တပ်မတော်သည် စစ်မှုထမ်း ၁၆၅ ဦး၊ တင့်ကား တစ်စီး၊ ကား ခြောက်စီး နှင့် လယ်ကွင်းကျည်ကြီးသိုလှောင်ရုံ သုံးခုအထိ ဆုံးရှုံးခဲ့သည်" ဟု သတင်း ထုတ်ပြန်ချက်တွင် ဖော်ပြထားပါသည်။

ကိုးကား - Tass

ယူကရိန်းပဋိပက္ခအပြီးတွင် ဖြစ်နိုင်ခြေရှိသော “ငြိမ်းချမ်းရေး ထိန်းသိမ်းမှုအဖွဲ့” တွင် ပါဝင်ရန် တရုတ်သည် ဥရောပနိုင်ငံများနှင့် ဆွေးနွေးနေကြောင်း Welt am Sonntag သတင်းစာက ဥရောပသမဂ္ဂ၏ သံတမန်ရေးစက်ဝန်းရှိ သတင်းရင်းမြစ်များကို ကိုးကား၍ ဖော်ပြထား ပါသည်။

“တရုတ်နိုင်ငံသည် ယူကရိန်းတွင် ဖြစ်နိုင်ခြေရှိသော ငြိမ်းချမ်းရေး ထိန်းသိမ်းမှုတပ်ဖွဲ့များတွင် ပါဝင်ရန် စဉ်းစားနေပုံရသည်။ တရုတ် သံတမန်များသည် ဘရပ်ဆဲလ်တွင် ဥရောပသားများ၏အမြင်အရ ထိုသို့ လုပ်ဆောင်ခြင်းသည် ဖြစ်နိုင်သလား သို့မဟုတ် လိုလားအပ်သလား စုံစမ်းမေးမြန်းခဲ့သည်” ဟု သတင်းအေဂျင်စီ ကဖော်ပြထားပါသည်။ 

ရုရှားသမ္မတ၏ ပြောရေးဆိုခွင့်ရှိသူ ဒီမီထရီ ပက်စကော့ဖ်က ယူကရိန်းရှိ ပဋိပက္ခကို ဖြေရှင်းရာတွင် တရုတ်ငြိမ်းချမ်းရေးထိန်းသိမ်းသူများကို အသုံးပြုနိုင်ခြေနှင့်ပတ်သက်၍ ရုရှားက ဆွေးနွေးနေခြင်းမရှိကြောင်း ပြောကြားခဲ့သည်။

ရုရှားနိုင်ငံခြားရေးဝန်ကြီး ဆာဂေးလာ့ဗ်ရော့ဗ်က မတ်လ ၆ ရက်တွင် ယူကရိန်း၌ နိုင်ငံခြား“ငြိမ်းချမ်းရေးထိန်းသိမ်းရေးတပ်ဖွဲ့များ” ချထားရေး နှင့်ပတ်သက်၍ သဘောထားကွဲလွဲမှုအတွက် အခွင့်အလမ်းကို ရုရှား အနေဖြင့် မမြင်ကြောင်း ပြောကြားခဲ့ပါသည်။ ရုရှားနိုင်ငံခြားရေးဝန်ကြီး က ယူကရိန်းတွင် နိုင်ငံခြားတပ်ဖွဲ့ဝင်များ ချထားပါက ငြိမ်းချမ်းစွာ ညှိနှိုင်းဖြေရှင်းရေးဆိုင်ရာ စည်းကမ်းချက်များကို အနောက်နိုင်ငံများက သဘောတူညီမှု ရယူလိုမည်မဟုတ်ကြောင်း၊ အဘယ်ကြောင့်ဆိုသော် ထိုတပ်ဖွဲ့သည် “မြေပြင်အခြေအနေများ” ကို ဖန်တီးပေးလိမ့်မည် ဖြစ်ကြောင်း သတိပေးခဲ့ပါသည်။

ဗြိတိန်ဝန်ကြီးချုပ်၏ ကိုယ်စားလှယ် ကီရာ စတာမာကာ က ယူကရိန်း တွင် ငြိမ်းချမ်းရေးတပ်များချထားရန် နိုင်ငံ ၃၀ ကျော်ပါဝင်သည့် "လိုလားသောမဟာမိတ်အဖွဲ့" ဖွဲ့စည်းမည်ဟု မျှော်လင့်ထားကြောင်း ဖော်ပြခဲ့သည်။ 

ရုရှားနိုင်ငံခြားရေးထောက်လှမ်းရေးဌာန (SVR) က ယခင်နှစ်က အနောက်နိုင်ငံများသည် ယူကရိန်း၏ စစ်စွမ်းဆောင်ရည် ပြန်လည် တည်ဆောက်ရန် စစ်သား ၁ သိန်းခန့် ပါဝင်သော ငြိမ်းချမ်းရေးတပ်ဖွဲ့ကို ချထားမည်ဟု သတင်းထုတ်ပြန်ခဲ့ပါသည်။ SVR ၏ အဆိုအရ ထိုအရာသည် ယူကရိန်းကို သိမ်းပိုက်မှုတစ်ခုနှင့် အတူတူပင်ဖြစ်မည်ဟု ယူဆထားပါသည်။

ကိုးကား - RIA Novosti

 ရုရှားသမ္မတပူတင်နှင့် တွေ့ဆုံမှု

ရုရှားသမ္မတက ပေးအပ်ခဲ့သည့် ထိပ်တန်း ရုရှား ပန်းချီဆရာတစ်ဦး ရေးဆွဲထားသော အမေရိကန်ခေါင်းဆောင် ထရမ့်၏ ပုံတူကို ပန်းချီကားကို သမ္မတဒေါ်နယ်ထရမ့်ထံ ပို့ဆောင်ပြီးဖြစ်ပါကြောင်း အမေရိကန် သမ္မတ၏ အထူးကိုယ်စားလှယ် စတီဗင် ဝစ်ကို့ဖ် (Steven Witkoff) က ပြောကြားခဲ့ပါသည်။

မဲဆွယ်ကာလအတွင်း ထရမ့်အား လုပ်ကြံရန် ကြိုးပမ်းခံရမှုအပေါ် ရုရှား သမ္မတသည် ၎င်း၏ဘာသာရေးလှုပ်ရှားမှုအဖြစ် ဘုရားကျောင်းသို့ သွားကာ သမ္မတထရမ့်အတွက် ဆုတောင်းပေးခဲ့ကြောင်း အမေရိကန် သမ္မတ၏ အထူးကိုယ်စားလှယ် စတီဗင် ဝစ်ကို့ဖ် (Steven Witkoff) က ဖွင့်ဟပြောကြားခဲ့ပါသည်။ 

အမေရိကန်သမ္မတ၏ အထူးကိုယ်စားလှယ် စတီဗင် ဝစ်ကို့ဖ် (Steven Witkoff) က ရုရှား - အမေရိကန် ဆက်ဆံရေးကို ပြန်လည်ထူထောင်လိုကြောင်း အမေရိကန်သမ္မတဒေါ်နယ်ထရမ့်၏ သတင်းစကားကိုသမ္မတ ပူတင်ထံ ပေးပို့ခဲ့ပြီး ရုရှားသမ္မတက အဆိုပါကိစ္စတွင် အပြန်အလှန် သဘောတူညီမှုရှိကြောင်း ပြသခဲ့သည်ဟု ပြောကြားခဲ့ပါသည်။

အမေရိကန်သမ္မတ၏ အထူးကိုယ်စားလှယ် စတီဗင် ဝစ်ကို့ဖ် (Steven Witkoff) ၏ အမြင်တွင် သမ္မတပူတင်သည် "ကြင်နာဖော်ရွေပြီး" အမေရိကန် ကိုယ်စားလှယ်ကို ဧည့်ခံခြင်းဖြင့် အပြုသဘောဆောင်သော အထင်အမြင်ကိုရရှိခဲ့ပါသည်။ 

ရုရှားနှင့် အမေရိကန်သမ္မတများ ၏ ဖြစ်နိုင်ခြေရှိသော တွေ့ဆုံမှု

ရုရှားသမ္မတဗလာဒီမာပူတင်နှင့် အမေရိကန်သမ္မတ ဒေါ်နယ်ထရမ့် တို့သည် လာမည့်လအနည်းငယ်အတွင်း တွေ့ဆုံနိုင်သည်ဟု ခန့်မှန်း ပြောကြားခဲ့ပါသည်။ 

ယူကရိန်းပဋိပက္ခဖြေရှင်းရေး ညှိနှိုင်းမှုများ

ရုရှားနှင့်ဆွေးနွေးရာတွင် အမေရိကန်ပြည်ထောင်စုသည် “အလွန်ကြီးမားသော” တိုးတက်မှုကို ရရှိခဲ့သည်။

ရုရှားသိမ်းပိုက်ထားသောဒေသများ၏ အခြေအနေကို အမေရိကန် ပြည်ထောင်စု က "အဓိကအရေးပါသော ကိစ္စ" အဖြစ် သတ်မှတ်ထားပါသည်။ 

ရုရှားအနေဖြင့် အပြီးသတ်အပစ်အခတ်ရပ်စဲရေးအတွက် လိုအပ်မည့် အခြေအနေများရှိပြီး ၎င်းသည် “ရှုပ်ထွေးခက်ခဲသောကိစ္စ” တစ်ခု ဖြစ်ပါသည်။ 

ရုရှားနှင့် ယူကရိန်းဘက်မှ ပင်လယ်နက်ရှိ သင်္ဘောများကို တိုက်ခိုက်ခြင်းအား ယာယီဆိုင်းငံ့မှုကို လာမည့်သီတင်းပတ်တွင် စတင်နိုင်ပါသည်။ 

ယူကရိန်းအား ကူညီထောက်ပံ့မှုနှင့် နေတိုးအဖွဲ့ဝင်ဖြစ်ခြင်း

အမေရိကန်ပြည်ထောင်စုသည် ယူကရိန်းကို ထာဝရငွေကြေးထောက်ပံ့ပေးနိုင်မည်မဟုတ်ဘဲ ပဋိပက္ခကို နျူကလီးယားလက်နက်အသုံးပြုသည့် အချိန်အထိ ခေါ်ဆောင်သွားနိုင်မည်ကို စိုးရိမ်ပါကြောင်း ပြောကြားခဲ့ ပါသည်။

ယူကရိန်းသမ္မတ ဇီလန်စကီးသည် ယူကရိန်းသည် နေတိုးမဟာမိတ် အဖွဲ့ဝင်ဖြစ်လာမည်မဟုတ်ဟူသောအချက်ကို “အတော်အသင့် သဘောတူ” ခဲ့ပါကြောင်းပြောကြားခဲ့ပါသည်။

ဥရောပအပေါ် ခြိမ်းခြောက်မှု 

အမေရိကန်သမ္မတ၏ အထူးကိုယ်စားလှယ် စတီဗင် ဝစ်ကို့ဖ် (Steven Witkoff) က ရုရှားတွင် ဥရောပနိုင်ငံများကို တိုက်ခိုက်ရန် အစီအစဉ် မရှိကြောင်း ၁၀၀% သေချာသည်ဟု ပြောကြားခဲ့ပါသည်။

ယူကရိန်းတွင် ရွေးကောက်ပွဲများ

ယူကရိန်းတွင် ရွေးကောက်ပွဲများ ကျင်းပမည်ဟူသောအချက်ကို ယူကရိန်း အစိုးရက သဘောတူခဲ့ကြောင်း အမေရိကန်သမ္မတ၏ အထူးကိုယ်စား လှယ် စတီဗင် ဝစ်ကို့ဖ် (Steven Witkoff) က ပြောကြားခဲ့ပါသည်။ 

ကိုးကား- RIA Novosti

ရုရှားနိုင်ငံသည် ၂၀၃၀ ပြည့်နှစ်တွင် မောင်းသူမဲ့ လေယာဉ်နည်းပညာ၌ ကမ္ဘာ့ခေါင်းဆောင်နိုင်ငံအဖြစ် ရပ်တည်နိုင်ရမည်ဖြစ်ကြောင်း၊ ရည်မှန်းချက် အတွက် သတ်မှတ်ညွှန်ကိန်းများ ချမှတ်၍ လုပ်ဆောင်ရန် လိုအပ်ကြောင်းနှင့် လိုအပ်သည့် ဘဏ္ဍာငွေထုတ်ပေးမည်ဖြစ်ကြောင်း ရုရှားသမ္မတ ဗလာဒီမာ ပူတင်က မတ်လ ၂၁ ရက်တွင် ပြောကြားလိုက်ပါသည်။

ထိုရည်မှန်းချက်အကောင်အထည်ဖော်ရန် ပထမဆုံးအစီရင်ခံစာကို ဇွန်လ ၁ ရက်နေ့တွင် တင်ပြရမည်ဖြစ်ပြီး နောက်ပိုင်းတွင် ခြောက်လ တစ်ကြိမ် အစီရင်ခံစာများ ဆက်လက်တင်ပြရမည် ဖြစ်ပါသည်။

မောင်းသူမဲ့ လေယာဉ်ထုတ်လုပ်ခြင်းနှင့် လုပ်ငန်းလည်ပတ်ခြင်း လုပ်ငန်းစဉ်များ၌ AI နည်းပညာ အခြေခံသည့် ဖြေရှင်းနည်းများကို အသုံးပြုခြင်း အတွက် ညွှန်ကြားချက်များကို လိုက်နာဆောင်ရွက်ရမည်ဖြစ်ကြောင်း ၎င်းက မှာကြားထားပါသည်။ 

ဆက်လက်၍ လူမဲ့လေယာဉ်များ ထုတ်လုပ်ခြင်းနှင့် လည်ပတ်ခြင်းတွင် သဘာဝကျစေရန် စဉ်းစားမှု (AI) အခြေခံဖြေရှင်းနည်းများကို အသုံးချခြင်း အတွက် လိုက်နာဆောင်ရွက်ရန်လည်း ပူတင်က ညွှန်ကြားခဲ့ပါသည်။ ထိုတာဝန်ကို ရုရှား National Technological Initiative Platform နှင့် Sber တို့နှင့်ပူးပေါင်း၍ ဆောင်ရွက်ရန် တာဝန်ပေးထားကြောင်း သိရပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ဒုတိယညွှန်ကြားရေးမှူး၊နစက-၃

ဆူဒန်တပ်မတော်ခေါင်းဆောင်များက ခါတုမ်းမြို့ရှိ သမ္မတအိမ်တော်ကို ပြိုင်ဘက်တပ်ဖွဲ့ Rapid Support Forces (RSF) ထံမှ ပြန်လည်သိမ်းပိုက်လိုက်ကြောင်း ပြောကြားခဲ့သည်။

RSF ဟု လူသိများသောတပ်ဖွဲ့များက မြို့တော်ကိုသိမ်းပိုက်ထားခဲ့ပြီးနောက် ပြန်လည်ထိန်းချုပ်ရန် ဆူဒန်တပ်မတော်က စိတ်အားထက်သန်နေသည်။

တပ်မတော် ပြောရေးဆိုခွင့်ရှိသူ Nabil Abdallah က နိုင်ငံပိုင် ရုပ်မြင်သံကြားတွင် ခါတုမ်းမြို့အလယ်ပိုင်းရှိ သမ္မတအိမ်တော်နှင့် ဝန်ကြီးဌာန အဆောက်အအုံများကို ထိန်းချုပ်လိုက်ကြောင်းနှင့် အောင်ပွဲအပြည့်အဝရရှိသည်အထိ ဆက်လက်တိုက်ပွဲဝင်သွားမည်ဖြစ်ကြောင်း ၎င်းက ပြောကြားခဲ့သည်။

ခါတုမ်းသည် လွန်ခဲ့သောနှစ်နှစ်နီးပါးက နိုင်ငံ၏ပြင်းထန်သော ပြည်တွင်းစစ် စတင်ခဲ့သည့်နေရာဖြစ်ပြီး အကြီးမားဆုံးတိုက်ပွဲအချို့ ဖြစ်ပွားခဲ့သည့်နေရာလည်း ဖြစ်သည်။

စစ်ပွဲစတင်ကတည်းက RSF သည် မြို့တော်၏ အဓိကအပိုင်း အများအပြားနှင့် ဆူဒန်၏ အနောက်ပိုင်းကို ထိန်းချုပ်ထားခဲ့သည်။

ခါတုမ်းကို ပြန်လည်သိမ်းပိုက်ခြင်းသည် ဆူဒန်လက်နက်ကိုင် တပ်ဖွဲ့များ အတွက် ကြီးမားသော အောင်ပွဲတစ်ရပ်ဖြစ်ပြီး ပဋိပက္ခတွင် အရေးပါသော အချိန်ကာလတစ်ခုဖြစ်သည်။ မကြာသေးမီသီတင်းပတ်များအတွင်းဆူဒန်တပ်မတော်သည် ဆူဒန်အလယ်ပိုင်းဒေသများတွင်လည်း အောင်မြင်မှုများ ရရှိခဲ့သည်။

RSF ကွပ်ကဲရေးမှူး Mohamed Hamdan Dagalo က သမ္မတ အိမ်တော်နှင့် ၎င်းတပ်ဖွဲ့၏ ထိန်းချုပ်မှုအောက်ရှိ အနီးအနားဒေသများကို ကာကွယ်မည်ဖြစ်ကြောင်းနှင့် မြောက်ပိုင်းမြို့ အချို့ကို ထပ်မံ တိုက်ခိုက်မည်ဟု ခြိမ်းခြောက်ခဲ့သော်လည်း မြို့တော်ကို လက်လွှတ်ခဲ့ရခြင်း ဖြစ်သည်။

ကုလသမဂ္ဂက စစ်ပွဲသည် ကမ္ဘာ့အကြီးမားဆုံး လူသားချင်းစာနာထောက်ထားမှု အကျပ်အတည်းကို ဖြစ်ပေါ်စေခဲ့ပြီး RSF နှင့် တပ်မတော် နှစ်ဖွဲ့စလုံးကို လူ့အခွင့်အရေးချိုးဖောက်မှုများဖြင့် စွပ်စွဲထားသည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနိုင်ငံ၊ ကူဘင်ဒေသရှိ ဓာတ်အားပေးစက်ရုံကို ယူကရိန်းစစ်တပ်က မတ်လ ၁၉ ရက် (ဗုဒ္ဓဟူးနေ့)တွင် တိုက်ခိုက်မှုမှာ ရုရှားသမ္မတ ဗလာဒီမာ ပူတင်နှင့် အမေရိကန်သမ္မတဒေါ်နယ်ထရမ့်တို့အကြား ရရှိထားသော သဘောတူညီချက်ကို ပြောင်ပြောင်တင်းတင်း ချိုးဖောက်သည့်လုပ်ရပ် ဖြစ်သည်ဟု ရှုမြင်ကြောင်း ကရင်မလင် ပြောခွင့်ရပုဂ္ဂိုလ် Dmitry Peskov က ပြောကြားလိုက်ပါသည်။

“ရုရှားသမ္မတဗလာဒီမာပူတင်၊ ရုရှားစစ်ဦးစီးချုပ်၏ ညွှန်ကြားမှုဖြစ်သည့် ရက်ပေါင်း ၃၀ အတွင်း ယူကရိန်းဓာတ်အားပေးစက်ရုံများကို တိုက်ခိုက်မှု မပြုလုပ်ရန် အားလုံးကို ညွှန်ကြားထားပြီးဖြစ်သော်လည်း ယခု ယူကရိန်း အစိုးရသည် အဆိုပါဘုံသဘောတူညီချက်များကို ဖောက်ဖျက်ရာ ရောက်သည့် လုပ်ရပ်တစ်ခုဆိုသည်မှာ သေချာနေပါသည်” ဟု ၎င်းက အလေးအနက် ပြောကြားထားပါသည်။ 

ကိုးကား- ကရင်မလင်

ဘာသာပြန်ဆိုသူ-ဦးကျော်ဇေယျ၊ဒုတိယညွှန်ကြားရေးမှူး၊နစက-၃

အမေရိကန်ဗဟိုဘဏ်ဥက္ကဌ Jerome Powell က ၂၀၂၅ ခုနှစ်၊ မတ်လ ၁၉ ရက် (ဗုဒ္ဓဟူးနေ့) တွင် သမ္မတထရမ့်၏ အမေရိကန်သို့ သွင်းကုန်များအပေါ် အကောက်ခွန်နှုန်းထား တိုးမြှင့်သတ်မှတ်မှုသည် အမေရိကန် နိုင်ငံ၏ စီးပွားရေးဖွံ့ဖြိုးတိုးတက်မှုကို နှေးစေပြီး နိုင်ငံတွင်း ငွေကြေးဖောင်းပွမှု ယာယီဖြစ်ပေါ်လျက်ရှိကြောင်း ပြောကြားထားပါသည်။

Powell က ဗဟိုဘဏ်အတိုးနှုန်းများကို ၄.၂၅ % မှ ၄.၅၀% အတွင်း တည်ငြိမ်အောင် ထိန်းထားနိုင်သည်ဟု ကြေညာပြီးနောက်တွင် သမ္မတ ထရမ့်သည် အမေရိကန်၏ စီးပွားရေးမိတ်ဖက်နိုင်ငံများမှ သွင်းကုန်များကို အကောက်ခွန်နှုန်းထား တိုးမြှင့်ကောက်ခံလျက်ရှိသည့်အတွက် ဈေးကွက်အတွင်း ဈေးနှုန်းမြင့်တက်မှုမြန်ဆန်နေကြောင်း ပြောကြားထားပါသည်။ သို့သော် တစ်ဖက်တွင် Powell ၏ မူဝါဒဆိုင်ရာ အကြံပေးများက ၂၀၂၅ ခုနှစ်၊ ဒုတိယ သုံးလပတ်တွင် အတိုးနှုန်းများကို လျှော့ချရန် မျှော်လင့်နေကြောင်း သတင်းရရှိပါသည်။ 

Powell က နိုင်ငံ၏ စီးပွားရေးဆိုင်ရာ အချက်အလက်များသည် ခိုင်မာလျက်ရှိသည်ကို နိုင်ငံ၏ လက်ရှိ အလုပ်လက်မဲ့နှုန်းသည် ၄.၁  ရာခိုင်နှုန်း ဖြစ်နေခြင်း၊  အလုပ်အကိုင်ဈေးကွက်သည် အကြမ်းဖျင်းအားဖြင့် မျှတလျက်ရှိနေခြင်းတို့ကို ကြည့်ပါက သိရှိနိုင်ပါကြောင်း ပြောကြားထားပါသည်။  သို့သော် ငွေကြေးဖောင်းပွမှုကြောင့် အလုပ်လက်မဲ့နှုန်းများ တိုးမြင့်လာခြင်း ရှိ၊ မရှိကို ဆက်လက်စောင့်ကြည့်သွားမည်ဟုလည်း  Powell က ဆက်လက်ပြောကြားထားပါသည်။ 

အဆိုပါကိစ္စရပ်များနှင့် စပ်လျဉ်း၍ သမ္မတထရမ့်က အမေရိကန်၏ အကောက်ခွန်မူဝါဒအသစ်ကို အထောက်အပံ့ဖြစ်စေရန် Powell အနေဖြင့် အတိုးနှုန်းများကို ပြင်ဆင်သတ်မှတ်သင့်ကြောင်း ၎င်း၏ Truth ဆိုရှယ်မီဒီယာပလက်ဖောင်းတွင် ရေးသားထားကြောင်း သိရှိရပါသည်။ 

ကိုးကား - CNA 

Photo: The Jakarta Post

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊ နစက-၃

အမေရိကန်ဖွဲ့စည်းပုံအခြေခံဥပဒေတွင် သမ္မတတစ်ဦးသည် နှစ်ကြိမ်ထက်ပို၍ ရွေးကောက်တင်မြှောက်ခံခွင့်မရှိကြောင်း ပြဋ္ဌာန်းထားသော်လည်း ၂၀၂၈ ခုနှစ်တွင် ဒေါ်နယ်ထရမ့်အနေဖြင့် ထိုသတ်မှတ်ချက်ကို ကျော်လွှားကာ ထပ်မံ၍ ဝင်ရောက်ယှဉ်ပြိုင်လိမ့်မည်ဟု ယခင်က ထရမ့်၏ အကြံပေးနှင့် မဟာဗျူဟာကျွမ်းကျင်သူ စတိဗ်ဘန်နန်က ပြောကြား လိုက်သည်။

အမေရိကန်ဖွဲ့စည်းပုံအခြေခံဥပဒေ၏ ၂၂ ကြိမ်မြောက်ပြင်ဆင်ချက်အရ "မည်သူတစ်ဦးတစ်ယောက်မျှ သမ္မတရာထူးအတွက် နှစ်ကြိမ်ထက်ပို၍ ရွေးကောက်တင်မြှောက်ခံခွင့် မရှိစေရ" ဟု ပြဋ္ဌာန်းထားသည်။ သို့သော် ၂၀၁၆ ခုနှစ်က ထရမ့်၏ ရွေးကောက်ပွဲကမ်ပိန်းကို ဦးဆောင်ခဲ့သူ ဘန်နန် ကမူ ထရမ့်အနေဖြင့် တတိယသက်တမ်းအတွက် ဝင်ရောက် ယှဉ်ပြိုင် နိုင်မည်ဟု ဆိုသည်။

"သမ္မတထရမ့်သည် ၂၀၂၈ တွင် ထပ်မံဝင်ရောက်ယှဉ်ပြိုင်မည်ကို ကောင်းစွာ ယုံကြည်ကြောင်းနှင့် ၎င်းကိုယ်တိုင်ကလည်း ဝင်ရောက် ယှဉ်ပြိုင်ခွင့် ရရှိရေး ကြိုးပမ်းသွားမည်" ဟု ဘန်နန်က မတ်လ ၁၉ ရက်နေ့တွင် News Nation သို့ ပြောကြားခဲ့သည်။

"ထရမ့်ကဲ့သို့သောပုဂ္ဂိုလ်သည် ကံကောင်းလွန်းမှသာ ရာစုနှစ် တစ်ခုအတွင်း တစ်ခါခန့်သာ ပေါ်လာတတ်ကာ လက်ရှိတွင်လည်း ထရမ့်၏ စွမ်းဆောင်မှုများသည် ရလဒ်ကောင်းများရရှိလျက်ရှိပြီး ၂၀၂၈ တွင် ထပ်မံရွေးကောက်ခံစေလိုသည်" ဟု ၎င်းက ဆက်လက် ပြောကြား ခဲ့သည်။

ဖွဲ့စည်းပုံအခြေခံဥပဒေအရ ကန့်သတ်ထားရှိမှုများကို နည်းလမ်းတကျ ကျော်လွှားနိုင်ရေးကိုလည်း ဆောင်ရွက်သွားမည်ဖြစ်သည်ဟု ဘန်နန်က ပြောဆိုခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂