အမေရိကန် ဒုသမ္မတကတော် အူရှာဗန့်စ်နှင့် အမေရိကန်အရာရှိများ လာရောက်မည့်သတင်းကြောင့် ဒိန်းမတ်နိုင်ငံ ဂရင်းလန်း ကိုယ်ပိုင်အုပ်ချုပ်ခွင့်ရကျွန်းတွင် ပြည်သူများ ဆန္ဒပြကန့်ကွက်နေကြောင်း သိရသည်။ ဒုတိယသမ္မတ ဂျေဒီဗန့်စ်၏ ဇနီးနှင့် အမေရိကန် အရာရှိများအနေဖြင့် ဂရင်းလန်းကျွန်းသို့ သွားရောက်လည်ပတ်မှုသည် အလွန်ရန်လိုသောလုပ်ရပ်ဖြစ်ကြောင်း ဂရင်းလန်းဝန်ကြီးချုပ်ကဆိုသည်။

အမေရိကန်သမ္မတ ဒေါ်နယ်ထရမ့်အား ဂရင်းလန်းကျွန်းအား အမေရိကန်လက်အောက်သို့ ပေါင်းစည်းရန် နည်းအမျိုးမျိုးဖြင့် လုပ်ဆောင်မည်ဖြစ်ကြောင်း ရွေးကောက်ပွဲကတိတွင် ထည့်သွင်းပြောကြားပြီးနောက် သမ္မတဖြစ်ပြီးချိန်တွင်လည်း အကြိမ်ကြိမ် ထုတ်ဖော်ပြောဆိုခဲ့သည်။ ဂရင်းလန်းဝန်ကြီးချုပ်က အမေရိကန်အနေဖြင့် ဂရင်းလန်းသို့ လာရောက်သည့် ရည်ရွယ်ချက်မှာ အာဏာပြရန် ဖြစ်ကြောင်းလည်း ထုတ်ဖော်ပြောဆိုခဲ့သည်။

အဆိုပါကျွန်းရှိ ဒေသခံများနှင့် ကျွန်း၏ မိခင်နိုင်ငံဖြစ်သော ဒိန်းမတ် နိုင်ငံတို့မှ အကြိမ်ကြိမ် ကန့်ကွက်ပြောဆိုနေသော်လည်း အမေရိကန် သမ္မတက ပြီးခဲ့သည့် ကွန်ဂရက်လွှတ်တော် အစည်းအဝေးတွင် ကျွန်းကို တစ်နည်းမဟုတ်တစ်နည်းဖြင့် ရနိုင်ကြောင်း ထည့်သွင်းပြောဆိုခဲ့သည်။

ဒေသခံများက ဂရင်းလန်းရှိ အမေရိကန်ကောင်စစ်ဝန်ရုံးရှေ့တွင် ဆန္ဒပြကန့်ကွက်မှုများ ပြုလုပ်နေချိန်တွင် ဒုတိယသမ္မတ ကတော်နှင့် ကိုယ်စားလှယ်အဖွဲ့သည် ဂရင်းလန်းရှိ အမွေအနှစ်များလေ့လာရန်နှင့် ဂရင်းလန်းရှိ နှစ်စဉ်ပြုလုပ်သည့် ခွေးအပြေးပြိုင်ပွဲသို့ သွားရောက်ကြည့်ရှုရန်သာဖြစ်ကြောင်း အိမ်ဖြူတော်က ထုတ်ပြန်ကြေညာထားကြောင်း သိရှိရပါသည်။

ကိုးကား- The White House

Photo: Newsweek

ရုရှားဖက်ဒရေးရှင်းနှင့် အမေရိကန်တို့သည် ယူကရိန်းဆိုင်ရာ ဆွေးနွေးမှုများတွင် နယ်မြေပိုင်ဆိုင်မှုကိစ္စကို ဆွေးနွေးကြမည်ဖြစ်ကြောင်း သိရှိရ ပါသည်။ 

ရုရှားနှင့် အမေရိကန်တို့သည် ယူကရိန်းဆိုင်ရာဆွေးနွေးပွဲများတွင် အပစ် အခတ်ရပ်စဲရေးအတည်ပြုခြင်း၊ ငြိမ်းချမ်းရေးတပ်ဖွဲ့များနှင့် နယ်မြေဆိုင်ရာ အချုပ်အခြာအာဏာကဲ့သို့သောကိစ္စရပ်များကို ဆွေးနွေးမည်ဟု အမေရိကန် အမျိုးသားလုံခြုံရေးအကြံပေး မိုက်ခ်ဝေါ့လ်ဇ် က CBS ရုပ်သံလိုင်းတွင် ပြောကြားခဲ့ပါသည်။ 

မတ်လ ၂၄ ရက်တွင် အီရိယာ့ဒ်မြို့၌ ရုရှား-အမေရိကန် ပူးပေါင်း ဆွေးနွေးပွဲကျင်းပမည်ဖြစ်ပြီး၊ ပင်လယ်နက်အတွင်း ပူးပေါင်းဆောင်ရွက်ရေးကို အဓိကထားမည်ဟု ၎င်းက ဖော်ပြခဲ့သည်။ "ထို့နောက် စစ်မျဉ်းထိန်းချုပ်ရေး လိုင်း (လက်ရှိစစ်မြေပြင်အခြေအနေ)၊ အပစ်အခတ်ရပ်စဲရေး အတည်ပြုရေး နည်းလမ်းများ၊ ငြိမ်းချမ်းရေးတပ်ဖွဲ့များ စခန်းချရေးနှင့် ရေရှည်ငြိမ်းချမ်းရေး ဆီသို့ ဦးတည်သည့် နယ်မြေလဲလှယ်မှုများကို ဆွေးနွေးမည်" ဟု မိုက်ခ် ဝေါ့လ်ဇ်က ရှင်းပြခဲ့သည်။ အသေးစိတ်အချက်များကို မဖော်ပြသော်လည်း၊ “ယူကရိန်းဘက်က အဆိုပါအချက်ကို လုံခြုံရေးအာမခံချက်အဖြစ် ရှုမြင်သည်” ဟု ၎င်းက ဖြည့်စွက်ပြောကြားခဲ့သည်။ 

မတ်လ ၂၄ ရက်တွင် ရုရှားကိုယ်စားလှယ်အဖွဲ့ကို ဖက်ဒရယ်လွှတ်တော် နိုင်ငံခြားရေးကော်မတီဥက္ကဋ္ဌ ဂရီဂေါ်ရီ ကာရာဆင် နှင့် FSB ညွှန်ကြား ရေးမှူး၏ အကြံပေး ဆာဂျီ ဘီဆီဒါတို့ ဦးဆောင်မည်ဖြစ်ပါသည်။ 

မတ်လ ၁၈ ရက်နေ့က ရုရှားသမ္မတဗလာဒီမာပူတင်နှင့် အမေရိကန် သမ္မတ ဒေါ်နယ်ထရမ့်တို့သည် ယူကရိန်းအခြေအနေ၊ စစ်ရေး အရှိန်မြင့် တက်မှုကို တားဆီးရန် အခြေအနေများနှင့် နိုင်ငံတကာကိစ္စများကို ဆွေးနွေးခဲ့ကြသည်။ ကရင်မလင်၏ သတင်းထုတ်ပြန်ချက်အရ၊ သမ္မတ ဗလာဒီမာပူတင်က ယူကရိန်းပဋိပက္ခဘက်မှ စွမ်းအင် အခြေခံ အဆောက် အအုံများကို ၃၀ ရက်ကြာ ပစ်ခတ်မှုရပ်စဲရန် အမေရိကန်သမ္မတ၏အဆိုကို သဘောတူခဲ့ကြသည်။ အိမ်ဖြူတော်၏ ထုတ်ပြန်ချက်အရ နှစ်ဖက်စလုံးသည် “ပင်လယ်နက်၌ အပစ်အခတ်ရပ်စဲရေး၊ အပစ်အခတ် အလုံးစုံရပ်စဲရေးနှင့် ရေရှည်ငြိမ်းချမ်းရေး” စနစ်ကို စတင်ရန် နည်းပညာ ဆိုင်ရာ ဆွေးနွေးမှုများ စတင်ရန် သဘောတူညီခဲ့ကြပါသည်။ ပဋိပက္ခကို ဖြေရှင်းရန်လုပ်ဆောင်ရာတွင် အဓိကအခြေအနေမှာ “နိုင်ငံခြားမှ စစ်ရေး အကူအညီနှင့် ယူကရိန်းသို့ ထောက်လှမ်းရေးဆိုင်ရာ အချက်အလက်များ ပေးအပ်ခြင်းကို အလုံးစုံရပ်တန့်ရန်” ဖြစ်သည်ဟု အလေးပေး ပြောကြားခဲ့ပါသည်။ 

ကိုးကား - TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ကုလသမဂ္ဂအထွေထွေညီလာခံ (United Nation General Assembly-UNGA) တွင် ရုရှားနိုင်ငံအပေါ် အနောက်နိုင်ငံများက ပိတ်ဆို့မှုချမှတ်ရန် ဆုံးဖြတ်ချက်အတွက် ဆားဘီးယားအနေဖြင့် မှားယွင်းစွာ မဲပေးခဲ့ မိကြောင်း ဆားဘီးယားနိုင်ငံ ဒုတိယဝန်ကြီးချုပ် အလက်ဆန်ဒါ ပူလင် က ရုရှားလုံခြုံရေးကောင်စီအတွင်းရေးမှူး ဆာဂေးရှိုးဂူးနှင့် တွေ့ဆုံချိန် ပြောကြားလိုက်ပါသည်။ 

“UNGA မှာ ရုရှားအပေါ် ပိတ်ဆို့မှုအတွက် မတော်တဆ မဲမှားယွင်း ပေးမိသွားပါကြောင်း၊ ထိုမှားယွင်းစွာ ပေးမိခဲ့သည့်မဲကို ယခု ရုတ်သိမ်း လိုက်ပြီဖြစ်ပါကြောင်း၊ မိမိတို့(ဆားဘီးယား)အနေဖြင့် အနောက်နိုင်ငံများ၏ ဒဏ်ခတ်ပိတ်ဆို့မှုတွင် ပါဝင်ခြင်းမရှိသေးကြောင်း၊ ထိုမူဝါဒကို ဆက်လက်လိုက်နာသွားမည် ဖြစ်ပါကြောင်း” ဟု ပူလင်က ပြောကြား ထားပါသည်။

ဆားဘီးယားနိုင်ငံ ဒုတိယဝန်ကြီးချုပ် အလက်ဆန်ဒါပူလင်နှင့် ရုရှား လုံခြုံရေးကောင်စီအတွင်းရေးမှူး ဆာဂေးရှိုးဂူးတို့သည် မတ်လ ၂၂ ရက်တွင် မော်စကို၌ တွေ့ဆုံခဲ့ကြပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ယူကရိန်းနိုင်ငံ Transcarpathia ဒေသရှိ ဟန်ဂေရီလူမျိုးစုများ၏ အခွင့်အရေးများအား ယူကရိန်းအစိုးရက ဖျက်သိမ်းထားမှုအပေါ် ပြန်လည် ရုတ်သိမ်းပေးမှသာ ယူကရိန်း၏ ဥရောပသမဂ္ဂအဖွဲ့သို့ ဝင်ရောက်လိုမှု ဆွေးနွေးမှုများအတွက် ဟန်ဂေရီနိုင်ငံက ဗီတိုပြန်လည် ရုတ်သိမ်းပေးမည်ဖြစ်ကြောင်း ဟန်ဂေရီနိုင်ငံခြားရေးဝန်ကြီး Peter Szijjarto က ဩစတြီးယား နိုင်ငံခြားရေးဝန်ကြီး Beate Meinl-Reisinger ကို ပြောကြားလိုက်ပါသည်။

ယူကရိန်းနိုင်ငံအနောက်ပိုင်းရှိ Transcarpathia ဒေသတွင် နေထိုင်နေသူ ဟန်ဂေရီ လူမျိုးစုများ၏ ဘာသာစကားအသုံးပြုခွင့်နှင့် ပညာရေးလေ့လာဆည်းပူးခွင့်တို့ကို ယူကရိန်းအစိုးရက ၂၀၁၅ ခုနှစ်တွင် ဖျက်သိမ်းခဲ့ကြောင်း၊ ထိုလူမျိုးစုများ၏ အခွင့်အရေးများနှင့်ပတ်သက်၍ ယူကရိန်းဘက်က ပြန်လည်ပေးအပ်မည်ဟု ကတိနှင့်စကားသံများ ထွက်ပေါ်ခဲ့မှုများရှိခဲ့သော်လည်း လက်ရှိအချိန်အထိ လျစ်လျူရှုထားပါကြောင်း၊ မိမိတို့ ဟန်ဂေရီလူမျိုးစု၏ အခွင့်အရေးများ ပြန်လည် မရရှိသေးချိန်အထိ  ယူကရိန်းက ဥရောပသမဂ္ဂအဖွဲ့ထဲ ဝင်ရောက်ရန်  ဖြစ်လာနိုင်မည်မဟုတ်ပါကြောင်း Szijjarto က Reisinger နှင့် ဖုန်းဖြင့် ဆက်သွယ်ပြောကြားချိန်တွင် ပြောကြားလိုက်ပါသည်။

ဩစတြီးယား နိုင်ငံခြားရေးဝန်ကြီး Beate Meinl-Reisinger သည် ပြီးခဲ့သည့်အပတ်က ယူကရိန်းနိုင်ငံသို့ သွားရောက်ကာ ယူကရိန်း အစိုးရအဖွဲ့ဝင်များနှင့် တွေ့ဆုံဆွေးနွေးခဲ့ပါသည်။

ကိုးကား- TASS           

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

Trump နှင့် ၎င်း၏ကိုယ်စားလှယ်အဖွဲ့သည် ယူကရိန်းစစ်ပွဲကို အဆုံးသတ်ရန် သဘောတူညီချက်တစ်ခုရရှိနိုင်ရေး ကြိုးပမ်းနေသည့် ဆောင်ရွက်မှုများသည် Kyiv ထက် Moscow အတွက် ပိုမို အကျိုးကျေးဇူးရှိစေနိုင်သည်ဟု ဥရောပနိုင်ငံများက လက်ခံယုံကြည်လျက် ရှိကြကာ ဆယ်စုနှစ်များအတွင်း ပထမဆုံးအကြိမ် ၎င်းတို့၏ ကိုယ်ပိုင် စစ်အင်အားကို ခိုင်မာစွာတည်ဆောက်နိုင်ရေး အာရုံစိုက်လာကြသည်။

ဂျာမနီသည် ကာကွယ်ရေးအသုံးစရိတ်မြှင့်တင်ရန် လိုအပ်နေမှုကို အမြန်ဆုံးဖြည့်တင်းနိုင်ရေးအတွက် ပြောင်းလဲမှုများကို အလျင်အမြန် ဆောင်ရွက်လာခဲ့သည်။ Bundeswehr ဟုလူသိများသော ၎င်း၏ လက်နက်ကိုင်တပ်ဖွဲ့များသည် နှစ်ပေါင်းများစွာ အသုံးစရိတ် လျှော့ချခဲ့မှုများအတွက် စစ်ရေးစွမ်းရည်အားနည်းမှု၏ သားကောင်ဖြစ်ခဲ့ရသည်။ သို့သော် ယခုအခါ ထိုအခြေအနေသည် ပြောင်းလဲတော့မည်ဖြစ်ပြီး ဂျာမနီဝန်ကြီးချုပ် Friedrich Merz က ဂျာမနီသည် စစ်အေးတိုက်ပွဲအပြီး နောက်ပိုင်း ၎င်း၏စစ်တပ်ကို ကြီးမားသော ရင်းနှီးမြှုပ်နှံမှုများပြုလုပ်ရန် အချိန်ကောင်းဖြစ်သည်ဟု ဆုံးဖြတ်ခဲ့သည်။

ဂျာမနီသည် ၎င်း၏ဖွဲ့စည်းပုံအခြေခံဥပဒေဆိုင်ရာ ကြွေးမြီကန့်သတ်ချက်ကို အဓိကပြုပြင်ပြောင်းလဲမှုတစ်ခုအဖြစ် ပြဋ္ဌာန်းခဲ့ပြီး ယူရို ဘီလီယံ ချီသော ရန်ပုံငွေများကို ဖြေလျှော့ပေးခဲ့သည်။ ဂျာမနီသည် ကာကွယ်ရေးအသုံးစရိတ်ကို GDP ၏ ၃.၅% ကို သုံးစွဲပါက ၁၀ နှစ်ကာလအတွင်း ယူရို ၆၀၀ ဘီလီယံ (ဒေါ်လာ ၆၅၂ ဘီလီယံ) အထိ ရှိနိုင်သည်ဟု CNN က ဖော်ပြခဲ့သည်။

NATO မဟာမိတ် ၅ နိုင်ငံက ဂျာမနီအလယ်ပိုင်းရှိ ဖော်ပြမထားသော နေရာတစ်ခုတွင် စစ်ရေးလေ့ကျင့်မှုများ လုပ်ဆောင်ခဲ့ပြီး အဆိုပါ လေ့ကျင့်မှုသည် မဟာမိတ်အဖွဲ့၏ အခြားအဖွဲ့ဝင်တစ်ဦးအား “ပြည်ပ ရန်သူ” တစ်ဦး၏ တိုက်ခိုက်မှုကို တုန့်ပြန်သော လေ့ကျင့်ရေးအစီအစဉ်များကို ဆောင်ရွက်ခဲ့ကြခြင်းဖြစ်သည်” ဟု CNN ကဆိုသည်။

စစ်ရေးလေ့ကျင့်မှု အစီအစဉ်အပြီး Hammerstein က CNN ကို “ဂျာမနီ သည် ဥရောပ၏ ဦးဆောင်နိုင်ငံတစ်ခုဖြစ်ပြီး မဟာမိတ်နိုင်ငံများအတွက် အပြည့်အဝရပ်တည်ပေးသွားမည်ဖြစ်သည်” ဟု ပြောကြားခဲ့သည်။

သက်တမ်းကုန်ဆုံးတော့မည့် ဝန်ကြီးချုပ် Olaf Scholz က နိုင်ငံအတွက်ကာကွယ်ရေးနှင့် လုံခြုံရေးမူဝါဒအသစ် လိုအပ်ကြောင်း Bundeswehr အတွက် အထူးဂရုစိုက်မှု လိုအပ်ကြောင်း ပြောကြားခဲ့ကာ Bundeswehr ၏ အသုံးစရိတ်ကို ယူရို ၁၀၀ ဘီလီယံသုံးစွဲရန် သတ်မှတ်ခဲ့ပြီး ထိုသို့ ပြုလုပ်ရန် Scholz က နိုင်ငံ၏ဖွဲ့စည်းပုံအခြေခံဥပဒေကို ပြင်ဆင်ရန် လိုအပ်ကြောင်းကိုလည်း ညွှန်ပြခဲ့သည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ပြည်ထောင်စုသည် ဧပြီလ ၂၀ ရက်နေ့တွင် ယူကရိန်းနိုင်ငံ၌ အပစ်အခတ်ရပ်စဲရေးသဘောတူညီချက်ကို ရယူရန် မျှော်လင့်ထားသော်လည်း နှစ်ဖက်စလုံး၏ ရပ်တည်ချက်များတွင် ကြီးမားသော ကွဲလွဲမှုများရှိသောကြောင့် အချိန်ကာလသည် ရွှေ့ဆိုင်းသွားနိုင်သည်ဟု Bloomberg သတင်းဌာနက သတင်းရင်းမြစ်များကိုကိုးကားပြီး ဖော်ပြ ထားပါသည်။ 

အဆိုပါသတင်းအရ မတ်လအစောပိုင်းတွင် ယူကရိန်းသို့ စစ်ရေးအကူအညီပေးပို့မှုကို ခေတ္တရပ်ဆိုင်းခဲ့သော အိမ်ဖြူတော်သည် ယခုအချိန်ထိ ထိုကိစ္စနှင့်ပတ်သက်၍ မည်သည့်ကန့်သတ်ချက်ကိုမျှ သဘောမတူသေးကြောင်း သိရှိရပါသည်။

သမ္မတ ဗလာဒီမာပူတင်က မတ်လ ၁၃ ရက်နေ့တွင် ဘယ်လာရုစ်နိုင်ငံ သမ္မတ အလက်ဇန္ဒားလူကာရှန်ကိုနှင့် တွေ့ဆုံဆွေးနွေးမှုအပြီး သတင်းစာရှင်းလင်းပွဲတွင် မော်စကိုသည် ယူကရိန်းတွင် တိုက်ပွဲများရပ်တန့်ရန် အဆိုပြုချက်များကို သဘောတူကြောင်း၊ သို့သော် ယင်းအဆိုပြုချက်များသည် ရေရှည်တည်တံ့သော ငြိမ်းချမ်းရေးကိုရရှိစေပြီး အကျပ်အတည်း၏ အကြောင်းရင်းခံများကို ဖယ်ရှားပေးရမည်ဖြစ်ကြောင်း ပြောကြားခဲ့ပါသည်။

ကိုးကား - Tass

Photo: Bloomberg

Erdogan ၏ အဓိကပြိုင်ဘက် Ekrem Imamoglu ဖမ်းဆီးခံရခြင်းကြောင့် ကြီးမားသော ဆန္ဒပြမှုများနှင့် တူရကီဈေးကွက်များတွင် ပြင်းထန်သော ကျဆင်းမှုများ ဖြစ်ပေါ်ခဲ့သည်။

(Anakra နှင့် Estambul ) အန်ကာရာ နှင့် အစ္စတန်ဘူးမြို့များတွင် လူထု ဆန္ဒပြပွဲကြီးများ ဖြစ်ပွားနေကြောင်း သိရှိရပါသည်။

ကိုးကား- ဒေသတွင်းမီဒီယာ

Photo: Snopes

အမေရိကန်သမ္မတဒေါ်နယ်ထရမ့်၏ အထူးကိုယ်စားလှယ် Steve Witkoff က ရုရှားသည် ဥရောပတစ်လွှားကို စစ်ဆင်နွှဲလာနိုင်သည့် အစီအစဉ် ရှိကြောင်း ပြောဆိုနေမှုသည် လုံးဝ မဖြစ်နိုင်သည့် ရာခိုင်နှုန်းသည်   ၁၀၀ ရာခိုင်နှုန်း သေချာကြောင်း အမေရိကန်သတင်းထောက် Tucker Carison ၏ မေးမြန်းချက်ကို ပြတ်ပြတ်သားသား ဖြေကြားသွားပါသည်။

“ထိုသို့ပြောနေကြခြင်းကို မိမိအနေဖြင့် လုံးဝမဖြစ်နိုင်ကြောင်း ပြောကြားလိုပါကြောင်း၊ ဒုတိယကမ္ဘာစစ်ကြီးမှာတုန်းက မရှိခဲ့သည့် နေတိုး (မြောက်အတ္တလန္တိတ်စာချုပ်အဖွဲ့)ကို မိမိတို့ ခိုင်ခိုင်မာမာ ဖွဲ့စည်း၍ အရှိန်အဟုန်ဖြင့် ဆောင်ရွက်ထားပြီးဖြစ်ပါကြောင်း” အထူးကိုယ်စားလှယ်က ဖြေကြားသွားပါသည်။ 

ကိုးကား- TASS  

Photo: Mehr News Agency

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ယူကရိန်းသမ္မတအကြံပေးများသည် အမေရိကန်သမ္မတဒေါ်နယ်ထရမ့်က Odessa ဒေသကို ရုရှားသို့ လွှဲပြောင်းပေးနိုင်သည်ဟု စိုးရိမ်နေကြကြောင်း၊ မကြာမီတွင် ဒေါ်နယ်ထရမ့်နှင့် ပူတင်တို့အကြား နယ်မြေကိစ္စကို ဆွေးနွေး ဖွယ်ရှိကြောင်း The New York Times သတင်းစာက ဖော်ပြထားပါသည်။

သမ္မတထရမ့်က မည်သည့်ဒေသဟု အတိအကျ ပြောကြားထားခြင်းမျိုး မရှိသေးပါကြောင်း၊ ရုရှားတပ်များ ထိန်းချုပ်ပြီးသား ဒေသများကို ရုရှားက ဆက်လက်ထိန်းချုပ်ရမည်ဟု အမေရိကန်အိမ်ဖြူတော်က ထုတ်ပြန်ကြေညာ ပြီးဖြစ်ကြောင်း သတင်းစာက ဖြည့်စွက်ဖော်ပြထားပါသည်။

ထို့ပြင် ယူကရိန်းပဋိပက္ခဖြေရှင်းရေး သဘောတူညီချက်အတွင်း ထရမ့်သည် နယ်မြေများ လွှဲပြောင်းပေးရေးအတွက် ပူတင်၏ ဆန္ဒကို လိုက်လျော နိုင်ဖွယ်ရှိကြောင်း၊ ထိုသို့ဖြစ်ပါက Odessa ဆိပ်ကမ်းမြို့မှာလည်း ပါဝင် နိုင်သည်မှာ သေချာသလောက် ရှိနေပါကြောင်း၊ ရုရှားသည် ခရိုင်းမီးယား ဒေသကို ဆက်လက်ထိန်းချုပ်သွားမည်မှာ မလွှဲမသွေဖြစ်ကြောင်း သတင်းစာ က ဆက်လက်ဖော်ပြထားပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ယူကရိန်းပဋိပက္ခ ဖြစ်ပွားရသည့်အဓိကအချက်မှာ ခရိုင်းမီးယား၊ Denetsk၊ Lugansk၊ Zaporozhye၊ Kherson ဒေသတို့၏ အခြေအနေများကြောင့် ဖြစ်သည်ဟု အမေရိကန် အထူးကိုယ်စားလှယ် Steve Witkoff က ပြောကြားလိုက်ပါသည်။

ထိုဒေသများမှာ ရုရှားဘာသာစကားသုံးစွဲသူများဖြစ်ကြောင်း၊ ရုရှား အုပ်ချုပ်ရေးအောက်တွင်နေချင်ကြောင်း ပြသသည့် ဆန္ဒခံယူပွဲများ ပြုလုပ်ခဲ့ကြကြောင်း၊ ယင်းအချက်က အဓိက ပြဿနာဖြစ်ပါကြောင်း၊ ယူကရိန်းဖွဲ့စည်းပုံအခြေခံဥပဒေအရ ပိုင်နက်လွှဲပြောင်းခြင်း ပြုလုပ်နိုင်မည်လားဆိုသည်မှာ မဖြေရှင်းရသေးပါကြောင်း၊ သို့ရာတွင်လည်း ထိုဒေသများကို ရုရှားက ထိန်းချုပ်ထားကြပြီးလည်းဖြစ်ပါကြောင်း၊ ကမ္ဘာကြီးက ထိုဒေသတွေကို ရုရှားပိုင် ဒေသဟု တရားဝင် အသိအမှတ်ပြုမည်လားဆိုသည်မှာ အဓိက မေးခွန်း ဖြစ်ပါကြောင်း ပြောကြားထားပါသည်။

လက်ရှိတွင် Denetsk ၊ Lugansk၊ Zaporozhye၊ Kherson ဒေသများကို ၂၀၂၂ ခုနှစ်၊ စက်တင်ဘာလ ၂၃ ရက်မှ ၂၇ အထိ ကျင်းပသောဆန္ဒခံယူပွဲ များအပြီးတွင် ရုရှား၏ အစိတ်အပိုင်းများအဖြစ် ထည့်သွင်းခဲ့ပါသည်။ ထို့ပြင် ခရိုင်းမီးယားနှင့် Sevastopol ကိုလည်း ၂၀၁၄ ခုနှစ်၊ မတ်လတွင် ပြုလုပ်သော ဆန္ဒခံယူပွဲများအပြီး ရုရှားအစိတ်အပိုင်းအဖြစ် သတ်မှတ်ထားပါသည်။

ယူကရိန်းဖွဲ့စည်းပုံအခြေခံဥပဒေအရ ယူကရိန်းသမ္မတဇီလန်စကီးက ထိုဒေသများကို ရုရှားပိုင်ဒေသများအဖြစ် အသိအမှတ် မပြုနိုင်သည့်အတွက် ပြဿနာဆက်လက်ရှိနေခြင်းဖြစ်ကြောင်း Witkoff က ထောက်ပြထားပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃