မလေးရှားနိုင်ငံတွင် မိုးသည်းထန်စွာ ရွာသွန်းမှုကြောင့် ပြင်းထန်သော ရေကြီးမှုများဖြစ်ပေါပြီး လူပေါင်း ၁၀၀,၀၀၀ ခန့်ကို ဘေးလွတ်ရာသို့ ရွှေ့ပြောင်းပေး ခဲ့ရကြောင်း Sputnik သတင်းဌာနမှ ဖော်ပြထားသည်။

၁၉၉၇ ခုနှစ်နောက်ပိုင်း အဆိုးရွားဆုံး ရေလွှမ်းမိုးမှု ဒဏ်ကို ကိုင်တွယ်ဖြေရှင်းရန် အရေးပေါ်ဝန်ထမ်း ၈၂,၀၀၀ ကျော်ကို စေလွှတ်ထားကြောင်း ဖော်ပြထား သည်။ 

ရွှေ့ပြောင်းနေထိုင်သူများအတွက် ယာယီခိုလှုံရာ စင်တာ ၃၀၀ ကျော်ရှိကြောင်း ၀န်ကြီးချုပ် အန်ဝါအီ ဘရာဟင်က ပြောကြားခဲ့ကြောင်း ရေးသားဖော်ပြထားသည်။

ကိုးကား - Sputnik

၁၆ နှစ်အောက် အရွယ်မရောက်သေးသူများ Social Media (လူမှုကွန်ရက်)သုံးစွဲခွင့်ကို တားမြစ်ပိတ်ပင်လိုက်သည့် ကမ္ဘာ့ပထမဆုံး ဥပဒေတစ်ရပ်ကို ဩစတြေးလျ ပါလီမန်က အတည်ပြုလိုက်ပြီဖြစ်ပါသည်။ အဆိုပါ ဥပဒေ စတင် ထုတ်ပြန်မည့်ရက်မတိုင်ခင်  နည်းပညာကုမ္ပဏီများအနေဖြင့် တင်းကျပ် သည့်လုံခြုံရေးစနစ်များ  ပြုလုပ်ဆောင်ရွက်ထားကြ ရန် သတိပေးထားပါသည်။ 

လအတန်ကြာ ပြည်သူလူထုများအတွင်း အခြေအတင် ဆွေးနွေးမှု၊ ဝေဖန်မှုများရှိခဲ့သော ကမ္ဘာ့ပထမဆုံး Social Media (လူမှုကွန်ရက်)သုံးစွဲခွင့်ကို တားမြစ်သည့် ဥပဒေအား ပြီးခဲ့သည့် ကြာသပတေးနေ့တွင် ပြုလုပ် သည့်  ဩစတြေးလျနိုင်ငံ ပါလီမန်က အတည်ပြုလိုက် ခြင်းဖြစ်သည်။

ထိုဥပဒေသစ်အရ  နည်းပညာကုမ္ပဏီများအနေဖြင့် နိုင်ငံအတွင်းရှိ ၁၆ နှစ် မပြည့်သေးသူများက လူမှု ကွန်ရက်ဝန်ဆောင်မှုများကို ရယူသုံးစွဲခြင်း မပြုနိုင် စေရန်  သင့်လျော်သည့် အစီအမံများ ကြိုတင်ဆောင် ရွက်ထားကြရန်နှင့် လိုက်နာခြင်းမရှိပါက  ဥပဒေအရ ဩစတြေးလျဒေါ်လာ သန်း ၅၀ (အမေရိကန်ဒေါ်လာ ၃၂ သန်း) နီးပါး ဒဏ်ရိုက်ခံရမည်ဖြစ်ကြောင်း ထုတ်ပြန်ထားပါသည်။ 

ကိုးကား - CNN

၂၀၂၄ ခုနှစ် ကမ္ဘာပေါ်တွင် အငြိမ်းချမ်းဆုံး နိုင်ငံများ အကြောင်းကို နာမည်ကျော် Global Finance မဂ္ဂဇင်း က ထုတ်ပြန်လိုက်ပါသည်။ 

အဆင့်(၁)နေရာတွင် ရှိသည့် အိုက်စလန်နိုင်ငံသည် ကမ္ဘာ့အငြိမ်းချမ်းဆုံးနိုင်ငံနေရာတွင် ၂၀၀၈ ခုနှစ် ကတည်းကပင်(၁၇)နှစ်တိုင်အောင်  ရပ်တည်နေသည့် နိုင်ငံဖြစ်ပါသည်။ အိုက်စလန်နိုင်ငံရှိ ပြည်သူများသည် ညဖက်၌ အေးချမ်းလုံခြုံစွာ အိပ်စက်အနားယူနိုင်ကြပြီး မည်သည့် ကြည်းတပ်၊ ရေတပ်၊ လေတပ်တို့မျှ မရှိသော ထူးခြားသည့် နေတိုးအဖွဲ့ဝင်နိုင်ငံ တစ်နိုင်ငံလည်းဖြစ် ပါသည်။ အိုက်စလန်နိုင်ငံတွင် လူဦးရေ ၃၉၀,၀၀၀ ဦး ခန့်နေထိုင်ပါသည်။ 

အဆင့်(၂)နေရာတွင် ရှိသည့် အိုင်ယာလန်နိုင်ငံသည် ကမ္ဘာပေါ်တွင် အချမ်းသာဆုံးနိုင်ငံ  တစ်နိုင်ငံလည်းဖြစ် ပါသည်။ အလုံခြုံဆုံးနိုင်ငံဖြစ်သကဲ့သို့ ငြိမ်းချမ်းရေးကို မြတ်နိုးသော နိုင်ငံလည်းဖြစ်ပါသည်။ လွတ်လပ်သော အနေအထားနှင့် ကြားနေစစ်တပ်တို့ဖြင့် ဖွဲ့စည်းထား ပါသည်။ အိုင်ယာလန်နိုင်ငံတွင် ၂၀၂၄ ခုနှစ် စစ်တမ်း အရ လူဦးရေ ၅.၂ သန်း ကျော်နေထိုင်ပါသည်။

အဆင့်(၃)နေရာတွင် ရှိသည့် ဩစတြီးယားနိုင်ငံသည် နိုင်ငံသားများအတွက် ဝင်ငွေ၊ အလုပ်အကိုင်၊ အိမ်ရာ စသည့် သုခချမ်းသာများ အမြင့်ဆုံး ရရှိပိုင်ဆိုင်နိုင်သော နိုင်ငံဖြစ်ပါသည်။ ဩစတြီးယားနိုင်ငံ၏ ကြားနေမူဝါဒ အရ EU နှင့် NATO တို့၏ အဖွဲ့ဝင်နိုင်ငံမဟုတ်ဘဲ မိတ်ဖက်နိုင်ငံအဖြစ်သာ ရပ်တည်နေပါသည်။ 

၂၀၂၄ ခုနှစ် ကမ္ဘာ့အငြိမ်းချမ်းဆုံးနိုင်ငံ(၁၀)နိုင်ငံကို  ဖော်ပြလိုက်ပါသည်-

(၁)     အိုက်စလန်

(၂)      အိုင်ယာလန်

(၃)     ဩစတြီးယား

(၄)     နယူးဇီလန်

(၅)     စင်ကာပူ

(၆)     ဆွစ်ဇာလန်

(၇)     ပေါ်တူဂီ

(၈)     ဒိန်းမတ်

(၉)     ဆလိုဗီးနီးယား

(၁၀)   မလေးရှား။

ကိုးကား(Global Finance)

နေရောင်အောက်တွင် ပြိုးပြိုးပြက်ပြက်တောက်ပနေသော သန္တာကျောက်တန်းများ၊ ဖြူဖွေးကျယ်ပြောလှသော သဲသောင်ပြင်များ ပိုင်ဆိုင်ထားသည့် မော်လဒိုက်သည် ကမ္ဘာလှည့်ခရီးသွားများအတွက် အားလပ်ရက်များ အတွင်း သွားရောက်လည်ပတ်ရန်ကောင်းသည့် ကမ္ဘာ့ ဈေးအကြီးဆုံး နေရာတစ်ခုဖြစ်လာပြီဖြစ်သည်။ 

အိန္ဒိယသမုဒ္ဒရာထဲက ကျွန်းစုနိုင်ငံလေးဖြစ်သည့် မော်လဒိုက်သို့ လာရောက်လည်ပတ်ပါက ကုန်ကျမည့် စရိတ်ကို တိုးမြှင့်လိုက်ပြီဖြစ်ကြောင်း၊ ဒီဇင်ဘာလ ၁ ရက်နေ့မှစ၍ မော်လဒိုက်မှ ထွက်ခွာမည့် လေယာဉ် စရိတ်များကို ယခင်ကထက်  အများဆုံး လေးဆအထိ  တိုးမြင့်ကောက်ခံသွားမည်ဖြစ်ပြီး ရိုးရိုးတန်းကို ဒေါ်လာ ၃၀ မှ ဒေါ်လာ ၅၀ အထိလည်းကောင်း၊ အထူးတန်းကို ဒေါ်လာ ၆၀ မှ ဒေါ်လာ ၁၂၀ အထိလည်းကောင်း၊ ပထမတန်းကို ဒေါ်လာ ၉၀ မှ ဒေါ်လာ ၂၄၀ အထိ လည်းကောင်း၊ ကိုယ်ပိုင်ဂျက်လေယာဉ်ဖြင့် ထွက်ခွာမည် ဆိုပါက လိုက်ပါလာသူတစ်ဦးချင်းစီကို ဒေါ်လာ ၁၂၀ မှ ဒေါ်လာ ၄၈၀ အထိလည်းကောင်း တိုးမြှင့်ကောက်ခံ သွားမည်ဖြစ်ကြောင်း၊ ထိုဈေးနှုန်းသည် အသက်အရွယ် မရွေး၊ လာရောက်မည့် ခရီးအကွာအဝေးမရွေး၊ မော်လဒိုက် နိုင်ငံသားမဟုတ်သည့် နိုင်ငံကူးလက်မှတ်ကိုင်ဆောင် ထားသူအားလုံးထံမှ ကောက်ခံသွားမည် ဖြစ်ကြောင်း၊ အဆိုပါတိုးမြှင့်ကောက်ခံရရှိသည့် အခွန်အခများကို ကမ္ဘာလှည့်ခရီးသွားများ တထောက်နားနေရာ မော်လဒိုက် နိုင်ငံ၏ ပင်မလေဆိပ်ဖြစ်သည့် Velana International Airport(MLE)၏ ပြင်ဆင်ထိန်းသိမ်းစရိတ်အဖြစ် လွှဲပြောင်း အသုံးပြုမည်ဖြစ်ကြောင်း မော်လဒိုက်ဘဏ္ဍာရေး အာဏာပိုင်က ကြေညာခဲ့ပါသည်။ 

မော်လဒိုက်သို့သွားရောက်မည့် အဆင့်မြင့်လေကြောင်း လိုင်းတစ်ခုဖြစ်သည့် Beond ကလည်း မော်လဒိုက်သို့ သွားရောက်လိုသူ ကမ္ဘာလှည့်ခရီးသည်များအနေဖြင့် အဆိုပါတိုးမြှင့်လိုက်သည့် အခွန်အခကို ရှောင်ရှားနိုင်ရန် နိုဝင်ဘာလ ၃၀ ရက်မတိုင်မီ ဝယ်ယူကြရန် ကြေညာ ထားပါသည်။

အိန္ဒိယသမုဒ္ဒရာရှိ ကျွန်းငယ်ပေါင်း ၁,၀၀၀ ကျော်ဖြင့် ဖွဲ့စည်းထားသော မော်လဒိုက်တွင် လူဦးရေ ၅၂၅,၀၀၀ ဦး ခန့်ရှိပါသည်။ နိုင်ငံသားအများစုသည် မြို့တော် Malé တွင်နေထိုင်ကြပါသည်။ မော်လဒိုက်နိုင်ငံတွင် ကမ္ဘာ လှည့် ခရီးသွားလုပ်ငန်းမှာ ဝင်ငွေအများဆုံး ရရှိသည့် လုပ်ငန်း ဖြစ်သည်။ 

မော်လဒိုက်တွင် နိုင်ငံတကာဟိုတယ်လုပ်ငန်းစုများ ရှိပြီး Ritz Carlton၊ Six Senses ဟိုတယ် ၊ St Regis ဟိုတယ်တို့သည် နာမည်ကြီးဇိမ်ခံဟိုတယ်များဖြစ်ကာ အခန်း၊ ဗီလာများစွာရှိပြီး တစ်ညလျှင် ဒေါ်လာထောင်ပေါင်း များစွာ ကုန်ကျပါသည်။ အမေရိကန် နိုင်ငံခြားရေးဌာန အဆိုအရ မော်လဒိုက်ရှိ ဒေသခံပြည်သူတစ်ဦးလျှင် ဒေါ်လာ ၁၂,၀၀၀ ဝင်ငွေ ရရှိနေကြပါသည်။

ကိုးကား(CNN)

ယခုနှစ်အတွင်း ဥရောပဓာတ်ငွေ့ဈေးနှုန်းသည် ကုဗမီတာ ၁၀၀၀ လျှင် ဒေါ်လာ ၅၄၀ ကျော်အထိ စံချိန်တင် အမြင့်ဆုံးရောက်ရှိခဲ့ကြောင်း၊ နောက်ပိုင်းတွင် ဒေါ်လာ ၅၁၂ သို့ ကျဆင်းသွားသော်လည်း ယခုအပတ်မှစ၍ အဆိုပါဓာတ်ငွေ့ဈေးနှုန်းသည် ကုဗမီတာ ၁၀၀၀ လျှင် ဒေါ်လာ ၅၀၀ အထက်တွင် တည်ငြိမ်နေကြောင်း၊ ယင်း ဈေးနှုန်းမှ ဆက်လက်လျော့ကျနိုင်ဖွယ်မရှိဟု အချက်အလက်များအရ သိရှိရကြောင်း၊ ရုရှားဓာတ်ငွေ့ တင်ပို့မှုအပေါ် အမေရိကန်၏ ပိတ်ဆို့အရေးယူမှုများ ထပ်မံပြုလုပ်ခြင်းကြောင့် ဓာတ်ငွေ့ဈေးနှုန်း မြင့်တက် လာရခြင်းလည်းဖြစ်ကြောင်း၊ အခုအခါ ရုရှားပိုက်လိုင်း ဓာတ်ငွေ့အတွက် ငွေပေးချေမှုကိစ္စအဝဝကို ကိုင်တွယ် ဆောင်ရွက်နေသည့် Gazprombank ကို ပိတ်ဆို့ အရေးယူမှုများ ချမှတ်ထားကြောင်း၊ ရုရှားသမ္မတအမိန့် အရ မိတ်ဖက်နိုင်ငံမဟုတ်သည့် နိုင်ငံများအနေဖြင့် ၂၀၂၂ ခုနှစ် ဧပြီ ၁ ရက်မှစ၍ ဓာတ်ငွေ့ပေးချေငွေကို   ရူဘယ်ဖြင့်ပေးဆောင်ရမည့်အစီအစဉ်တစ်ရပ်ကို စတင် ခဲ့ကြောင်း၊ ယခင်က အမေရိကန်သည် Gazprombank ကို စွမ်းအင်ထုတ်ကုန်များနှင့်စပ်လျဉ်းသည့် ငွေပေးချေ မှုများကို ပိတ်ဆို့အရေးယူမှုစာရင်းမှ အကြိမ်ကြိမ် ကင်းလွတ်ခွင့်ပြုခဲ့သော်လည်း ယခုအခါ ဖိအားပေး နည်းဗျူဟာအဖြစ် အသုံးပြုရန် ဆုံးဖြတ်လိုက်ခြင်း ဖြစ်သည်ဟု ထင်မြင်မိကြောင်း၊ ရုရှားက တင်ပို့နေသည့် တစ်ခုတည်းသော ဓာတ်ငွေ့ပိုက်လိုင်း Gazprom အနေဖြင့်  ရူဘယ်ဖြင့် ငွေပေးချေမှုမရှိသူများကို ၂၀၂၂ ခုနှစ်က ဘူဂေရီးယားနိုင်ငံက ရင်ဆိုင်ခဲ့ရသကဲ့သို့  ဓာတ်ငွေ့ ပေးလွှတ်မှု အလိုလိုရပ်ဆိုင်းသွားလိမ့်မည် ဖြစ်ကြောင်း၊

အမျိုးသားစွမ်းအင်အင်စတီကျူမှ ဒုတိယညွှန်ကြားရေး မှူးချုပ်နှင့် InfoTEK Analytical Center မှ ကျွမ်းကျင်သူ Alexander Frolov  က ရုရှားဓာတ်ငွေ့ ကုန်သွယ်မှုမှာ ဆက်လက်ရှိနေမည်ဟု ယုံကြည်ကြောင်း၊  စွမ်းအင် ထုတ်ကုန်များနှင့်ပတ်သက်၍ လုပ်ကိုင်သူများအနေဖြင့်  ရုရှားဘဏ်များနှင့် ချိတ်ဆက်လုပ်ကိုင်နိုင်သည့် လိုင်စင် များ ဆက်လက်ကိုင်ဆောင်ထားရန်ဖြစ်ကြောင်း၊ ရုရှား ဓာတ်ငွေ့ဝယ်ယူသူများအနေဖြင့် ယင်းအခြေအနေနှင့် ပတ်သက်၍ သဘောထားတောင်းခံရန် အမေရိကန် ဘဏ္ဍာရေးဝန်ကြီးဌာနသို့ ဆက်သွယ်၍  နည်းလမ်းများ ရှာဖွေဆောင်ရွက်နိုင်ဖွယ်ရှိကြောင်း၊ သို့ရာတွင် ဥရောပ ဈေးကွက်ကစားသူများအတွက်  အခြေအနေသည် စိုးရိမ်စရာရှိသည်ဟု သတိပေးပြောကြားထားကြောင်း  ရုရှားနိုင်ငံပိုင်သတင်းစာ  Rossiyskaya Gazeta က ဖော်ပြထားသည်။ 

ကိုးကား - TASS

နိုဝင်ဘာ ၁၉

တရုတ်အမျိုးသား ရေနံကော်ပိုရေးရှင်း (CNPC)၏ ဥက္ကဋ္ဌဟောင်းဖြစ်သူ Wang Yilin အား များပြား လှသော လာဘ်ငွေများကို လက်ခံခဲ့သည် ဟူသော သံသယဖြင့် လူသိရှင်ကြား တရားစွဲဆိုမှု စတင် လိုက်ပြီ ဖြစ်ကြောင်း သိရှိရသည်။

Wang ၏အမှုကို အမျိုးသားကြီးကြပ်ရေးကော်မရှင်မှ စုံစမ်းစစ်ဆေးမှုအပြီးတွင် Inner Mongolia ကိုယ်ပိုင်အုပ်ချုပ်ခွင့်ရဒေသရှိ မြူနီစပယ်ပြည်သူ့ရှေ့နေချုပ်ရုံးက တရားစွဲဆိုခဲ့ခြင်းဖြစ်သည်။

CNPC ထိပ်တန်းပါတီဝင်များအဖွဲ့၏ အတွင်းရေးမှူးလည်းဖြစ်ခဲ့ဖူးသည့် Wangသည် ရေနံကဏ္ဍတွင် ရာထူးအမျိုးမျိုးဖြင့် အာဏာအလွဲသုံးစားလုပ်ကာ ငွေကြေးနှင့် အဖိုးတန်ပစ္စည်းများ အကျိုးအမြတ် ရယူခဲ့မှုဖြင့် ဩဂုတ်လနှောင်းပိုင်းက ဖမ်းဆီးခံခဲ့ရခြင်းဖြစ်သည်။

 Source: chinadaily.com.cn

လာအိုနိုင်ငံသို့ ကမ္ဘာလှည့်ခရီးသည်အဖြစ် ရောက်ရှိစဉ် မက်သနောဓာတ်ငွေ့ရည် ပါဝင်သည်ဟု ယူဆရသော အဖျော်ယမကာ သောက်မိရာက အဆိပ်သင့်ခဲ့သူ နယူးဇီလန်နိုင်ငံသားသည် ယခုအခါ မိမိနေရပ်သို့ ပြန်လည် ရောက်ရှိလာပြီဖြစ်ကြောင်း အာဏာပိုင် အရာရှိများက အတည်ပြုပြောကြားလိုက်သည်။ 

အဆိုပါနယူးဇီလန်နိုင်ငံသား ခရီးသွားသည် မကြာသေးမီ က လာအိုနိုင်ငံတွင် မက်သနောပါဝင်သော အဖျော် ယမကာများ သောက်သုံးမိရာမှ  အဆိပ်သင့်ခဲ့ကြသည့် သူများအနက် တစ်ဦးအပါအဝင်ဖြစ်သည်။ လာအိုနိုင်ငံ တွင် မက်သနောအဆိပ်သင့်၍  ဒိန်းမတ်နိုင်ငံသား ၂ ဦး၊ ဩစတေးလျနိုင်ငံသား ၂ ဦးနှင့် အမေရိကန်နိုင်ငံသား  ၁ ဦးတို့ သေဆုံးသွားပြီး ကမ္ဘာလှည့်ခရီးသည် အများ အပြား အဆိပ်သင့်ခဲ့ကြသည်။ 

အဆိုပါအဆိပ်သင့်မှုသေဆုံးမှုများနှင့်စပ်လျဉ်း၍ လာအို နိုင်ငံအာဏာပိုင်များက အကြောင်းအရင်းများကို  စစ်ဆေး ဖော်ထုတ်သွားမည်ဖြစ်ကြောင်း  အသိပေးထားပါသည်။ 

ကိုးကား - BBC

မော်စကို နိုဝင်ဘာ ၂၆

လူမှုမီဒီယာတစ်ခုဖြစ်သည့် တယ်လီဂရမ်သည် ရုရှားနိုင်ငံတွင် တားမြစ်ထားသည့် သတင်းအချက်အလက်များကို ၎င်း၏ စာမျက်နှာမှဖယ်ရှားရန် ငြင်းဆန်ခဲ့သည့်အတွက် ရုရှားတရားရုံးတစ်ရုံးက တယ်လီဂရမ်အား ဒဏ်ငွေ ရူဘယ် ခုနစ်သန်းဒဏ်ရိုက်ခဲ့ကြောင်း အဆိုပါ တရားရုံးသတင်းထုတ်ပြန်ရေးအဖွဲ့က နိုဝင်ဘာ ၂၅ ရက်တွင် ပြောကြားသည်။

တားမြစ်ရန်ပျက်ကွက်

ရုရှားနိုင်ငံ၏ ဥပဒေအရ တားမြစ်ရန်လိုအပ်သည့် သတင်းအချက်အလက်များကို တားမြစ်ရန် ပျက်ကွက်သည့်အတွက် လူမှုမီဒီယာဖြစ်သည့် တယ်လီဂရမ်တွင် အပြစ်ရှိကြောင်း တရားရုံး၏ ထုတ်ပြန်ချက်တွင် ဖော်ပြထားသည်။

မည်သည့်သတင်းများ ဖော်ပြခဲ့ခြင်းဖြစ်ကြောင်း တရားရုံးက ပြောကြားခြင်းမရှိချေ။ ပြီးခဲ့သည့် လအတွင်းကလည်း တယ်လီဂရမ်အား အလားတူအမှုဖြင့် ဒဏ်ငွေ ရူဘယ် ‌လေးသန်း ဒဏ်ရိုက်ခဲ့သည်။

ကမ္ဘာတစ်ဝန်း၌ လက်ရှိအချိန်တွင် တယ်လီဂရမ် သုံးစွဲသူ သန်း ၉၀၀ နီးပါးရှိသည်။

ကိုးကား- ဆင်ဟွာ

Source- မြန်မာ့အလင်းသတင်းစာ

ရုရှားအနေဖြင့် ယူကရိန်းက မိမိနိုင်ငံအတွင်းကို အမေရိကန်နိုင်ငံထုတ်လက်နက်များ၊ ဗြိတိန်နိုင်ငံထုတ် လက်နက်များနှင့် ပစ်ခတ်တိုက်ခိုက်မှုကို တုံ့ပြန်သည့် အနေဖြင့် ယူကရိန်းရှိ Dnipro မြို့ကို Oreshnik အမည်ရှိ တာလတ်ပစ် ပဲ့ထိန်းဒုံးကျည်သစ်တစ်မျိုးဖြင့် ပစ်လွှတ်လိုက်ပါသည်။ ထိုလက်နက်မျိုး ရုရှားဖက်က ထွက်ပေါ်လာခြင်းသည် ကမ္ဘာတစ်ဝှမ်းကို တုန်လှုပ်ချောက်ခြားစေပါသည်။ ရုရှားက အမေရိကန်နှင့် အနောက်နိုင်ငံများကို သတိပေးလိုက်ခြင်းလည်း ဖြစ်ပါသည်။ 

ရုရှားက ယင်းဒုံးကျည်ကို Oreshnik ဟု အမည်ပေး ထားပါသည်။ စမ်းသပ်ဆဲ တာလတ်ပစ်ပဲ့ထိန်းဒုံးကျည် တစ်မျိုးဖြစ်ပါသည်။ Oreshnik ဆိုသည်မှာ ရုရှားနိုင်ငံတွင် ပေါက်ရောက်သော သစ်အယ်ပင်၏ နာမည်ဖြစ်ပါသည်။ ရုရှားအနေဖြင့် ယင်းလက်နက်ကို တစ်ခါမျှ ချပြဖူးခြင်းမရှိသေးကြောင်း သိရှိရသည်။ 

ပင်တဂွန်ဖက်ကမူ Oreshnik သည် RS-26 Rubezh ဟုခေါ်သည့် တိုက်ချင်းပစ်ပဲ့ထိန်းဒုံးကျည် (intercontinental ballistic missile – ICBM )ကို အခြေခံထားခြင်း ဖြစ်ကြောင်း ပြောထားပါသည်။ ၎င်းဟိုက်ပါဆိုးနစ် ဒုံးကျည်သည် အသံထက် အနည်းဆုံး ၅ ဆမြန်ကြောင်း၊ စနစ်တကျ ပျံသန်းတိုက်ခိုက်ခြင်းကို ကြားဖြတ်ပစ်ချဖို့ တော်တော်ခက်ခဲကြောင်း၊  ယင်းဒုံးကျည်တွင် ဒုံးကျည် ထိပ်ဖူး ၃ ခု (သို့မဟုတ်) ၆ ခု ပါရှိနိုင်ကြောင်း အမေရိကန် စစ်ဖက်ဆိုင်ရာကျွမ်းကျင်ပညာရှင် Viktor Baranets က ရေးသားထားပါသည်။

မော်စကိုအခြေစိုက် အမျိုးသားကာကွယ်ရေးဂျာနယ်က လွှတ်တင်သည့် ဗီဒီယိုများအရ Oreshnik တွင် ဒုံးကျည်ထိပ်ဖူး မြောက်မြားစွာ ပါရှိသည်ဟု ရေးသား ဖော်ပြထားပါသည်။

ရုရှားသမ္မတ ဗလာဒီမာပူတင်က ကြာသပတေးနေ့က တီဗီအစီအစဉ်တစ်ခုမှာ ရုတ်တရက်ပေါ်ပေါက်လာပြီး “Dnipro မြို့ကို Oreshnik တာလတ်ပစ်ပဲ့ထိန်းဒုံးကျည် အသစ်ဖြင့် ပစ်လွှတ်ခြင်းသည် ရုရှားလူမျိုးများ တီထွင်ထားသည့် တာလတ်ပစ်ဒုံးကျည်စနစ်အသစ်များထဲက တစ်ခုဖြစ်ပြီး  ယခုကဲ့သို့ စစ်ရေးတင်းမာလာချိန်တွင် စမ်းသပ်ပစ်လွှတ်လိုက်ခြင်းဖြစ်ကြောင်း၊ နျူကလီးယားထိပ်ဖူး တပ်ဆင်မထားသည့် ဟိုက်ပါ ဆိုးနစ် ဖွဲ့စည်းပုံစနစ်တစ်ခုဖြင့် တည်ဆောက်ထားကြောင်း၊ မည်သည့် ခေတ်မီလေကြောင်းကာကွယ်ရေး လက်နက်ကိရိယာများကမျှ ယင်းကို ကြားဖြတ်ပစ်ချနိုင်ခြင်းမရှိကြောင်း၊ ယနေ့အထိ ယင်းလက်နက်မျိုးကို တိုက်ဖျက်နိုင်သည့် နည်းလမ်းလည်း ကမ္ဘာမှာမပေါ် သေးကြောင်း” ၎င်းက ပြောကြားပါသည်။ 

ယူကရိန်းနိုင်ငံအနေဖြင့် Oreshnik သည် ရုရှားတွေ၏ စတုတ္တမြောက် ဒုံးကျည်စမ်းသပ် ပစ်လွှတ်မှုတစ်ခုဖြစ်ကြောင်း  ပြောကြားထားပါသည်။  ရုရှား၏ Astrakhan ဒေသကနေ Oreshnik ကို မတိုက်မီ ၁၅ မိနစ်ကြာ ပျံသန်းခဲ့ကြောင်း၊ ဒုံးကျည်ထိပ်ဖူး ၆ ခုပါရှိပြီး ထိပ်ဖူး တစ်ခုစီမှာ လက်နက် ၆ တွဲစီ သယ်ဆောင်လာခြင်း ဖြစ်ကြောင်း၊ ယင်း၏ အမြင့်ဆုံးအမြန်နှုန်းက  အသံထက် ၁၁ ဆ မြန်ဆန်ကြောင်း ပြောကြားပါသည်။ 

နေတိုးကတော့ ရုရှား၏ Oreshnik ဒုံးကျည် စမ်းသပ်အသုံးပြုလိုက်မှုကြောင့် လာမည့်အင်္ဂါနေ့တွင် နေတိုး ဌာနချုပ်ရှိရာ ဘရပ်ဆဲလ်မြို့တွင် အရေးပေါ်အစည်း အဝေးတစ်ခုခေါ်ယူထားကြောင်း၊ မည်သည့်အကြောင်း အရာ ဆွေးနွေးကြမည်အား မသိရသေးကြောင်း နေတိုး ဖက်က ပြောထားပါသည်။ မည်သို့ပင်ဆိုစေကာမူ  ရုရှား ၏ နောက်ဆုံးပေါ်  ဟိုက်ပါဆိုးနစ်တာလတ်ပဲ့ထိန်း ဒုံးကျည် Oreshnik ကို စမ်းသပ်ပစ်လွှတ်ပြလိုက်ခြင်း ကြောင့် ယခုအခါတွင် ရုရှား-ယူကရိန်းစစ်ပွဲသည် တစ်ကမ္ဘာလုံးက အထူးအာရုံစိုက် စောင့်ကြည့်ရမည့် အခြေအနေတစ်ခုဖြစ်လာခဲ့ကြောင်း ပြောရမည်ဖြစ်ပါသည်။ 

ကိုးကား - ALJAZEERA

လိင်ပိုင်းဆိုင်ရာအကြမ်းဖက်သည်ဟု သံသယဖြင့် တနင်္လာနေ့တွင် အဖမ်းခံရသည့် နော်ဝေးနိုင်ငံအိမ်ရှေ့မင်းသမီး၏ သားတော် Marius Borg Hoiby သည် ဒုတိယကြိမ်မြောက် အလားတူ လိင်ပိုင်းဆိုင်ရာ အကြမ်းဖက်မှုဖြင့် ထပ်မံအဖမ်းခံလိုက်ရကြောင်း နော်ဝေးရဲတပ်ဖွဲ့က ထုတ်ပြန်လိုက်ပါသည်။ 

ပထမအကြိမ် လိင်ပိုင်းဆိုင်ရာအကြမ်းဖက်သည်ဟု သံသယဖြင့် အဖမ်းခံရသည့် မင်းသားကို Oslo ခရိုင် တရားရုံး၏ကြားနာချက်အရ Oslo ခရိုင်ရဲတပ်ဖွဲ့အနေဖြင့် မင်းသားအား နေအိမ်အကျယ်ချုပ် ရက်သတ္တပတ် ၂ ပတ်ထားရှိရန် တင်ပြထားကြချိန်တွင် ကြာသပတေးနေ့တွင် ယခုကဲ့သို့ ဒုတိယအကြိမ်မြောက် ကျူးလွန်ခဲ့ခြင်းဖြစ်ကြောင်း သိရှိရပါသည်။

နော်ဝေးနိုင်ငံတွင်  လိင်ပိုင်းဆိုင်ရာအကြမ်းဖက်မှု ကျူးလွန်ပါက  နော်ဝေးတည်ဆဲဥပဒေအရထောင်ဒဏ် ၁၀ နှစ် ကျခံရပါမည်။

ကိုးကား - CNN