ဝါရှင်တန် ဒီဇင်ဘာ ၄

အမေရိကန်သမ္မတ ဂျိုးဘိုင်ဒင်၏ သားဖြစ်သူ ဟန်းတားဘိုင်ဒင်ကို လွတ်ငြိမ်းချမ်းသာခွင့်ပေးလိုက်ခြင်းက အမေရိကန်သမ္မတ၏ သားဖြစ်သူသည် ဥပဒေအထက်တွင် ရှိနေသည်ဆိုသည့် အချက်မှာ ထင်ရှားကြောင်း အိက်စ်လူမှုကွန်ရက်တည်ထောင်သူ အီလွန်မတ်စ်က ၎င်း၏ အိက်စ်လူမှုမီဒီယာစာမျက်နှာတွင် ပြောကြားခဲ့သည်။

ဒီဇင်ဘာ ၁ ရက်နေ့တွင် အိမ်ဖြူတော်က ထုတ်ပြန်သည့် ကြေညာချက်အရ ဟန်းတားဘိုင်ဒင်အား သီးခြားတရားစွဲဆိုထားသည့် ရာဇဝတ်မှုနှစ်ခုအတွက် သမ္မတဂျိုးဘိုင်ဒင်က လွတ်ငြိမ်းချမ်းသာ ခွင့်ပြုကြောင်း ကြေညာခဲ့သည်။

ဟန်းတားဘိုင်ဒင်အား ခွင့်ပြုခဲ့သည့် လွတ်ငြိမ်းချမ်းသာခွင့်သည် ခြွင်းချက်မရှိ လွတ်ငြိမ်းချမ်းသာခွင့်ဖြစ်၍ ရွေးကောက်ခံသမ္မတ ဒေါ်နယ်ထရမ့်အနေဖြင့် ပြန်လည်ရုပ်သိမ်းခြင်း မပြုနိုင်ကြောင်း သိရသည်။

ဟန်းတားဘိုင်ဒင်အား တရားစွဲဆိုထားခြင်းမှ ကင်းလွတ်ခွင့်ပြုရန် သမ္မတဘိုင်ဒင်၏ ဆုံးဖြတ်ချက်သည် ဒီမိုကရေစီစနစ်ကို ပြက်ရယ်ပြုခြင်းဖြစ်ကြောင်း ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာဇာကာရိုဗာက ပြောကြားသည်။

ကိုးကား- တက်စ်သတင်းဌာန၊ ဘာသာပြန်- စိုးသူရ

Source- ကြေးမုံသတင်းစာ

ရုရှားသမ္မတဗလာဒီမာပူတင်သည် ရုရှားဖက်ဒရေးရှင်း၏ ၂၀၂၅ ခုနှစ်ဘတ်ဂျက်နှင့် ၂၀၂၆-၂၀၂၇ ခုနှစ် စီမံကိန်းကာလအတွက် ဘတ်ဂျက်တို့နှင့်စပ်လျဉ်းသည့် ဥပဒေကို လက်မှတ်ရေးထိုး ထုတ်ပြန်လိုက်ပါသည်။ 

အဆိုပါဥပဒေအရ  ရုရှားဖက်ဒရေးရှင်း၏ ပြည်ထောင်စု ဘတ်ဂျက်(ရငွေ)များမှာ ၂၀၂၅ ခုနှစ်တွင် ရူဘယ် ၄၀.၂၉၆ ထရီလီယံ(ဒေါ်လာ ၃၇၈.၅ ဘီလီယံ)၊ ၂၀၂၆ ခုနှစ်တွင် ရူဘယ် ၄၁.၈၄ ထရီလီယံ ( ဒေါ်လာ ၃၉၃ ဘီလီယံ)၊ ၂၀၂၇ ခုနှစ်တွင် ရူဘယ် ၄၃.၁၅၄ ထရီလီယံ (ဒေါ်လာ ၄၀၅.၃၄ ဘီလီယံ) မျှော်မှန်းထားပါသည်။

ထို့ပြင် ပြည်ထောင်စုဘတ်ဂျက်(သုံးငွေ) များမှာ ၂၀၂၅ ခုနှစ်တွင် ရူဘယ် ၄၁.၄၆၉ ထရီလီယံ(ဒေါ်လာ ၃၈၉.၅၂ ဘီလီယံ)၊ ၂၀၂၆ ခုနှစ်တွင် ရူဘယ် ၄၄.၀၂၂ ထရီလီယံ (ဒေါ်လာ ၄၁၃.၅ ဘီလီယံ)၊ ၂၀၂၇ ခုနှစ်တွင်  ရူဘယ် ၄၅.၉၁၅ ထရီလီယံ (ဒေါ်လာ ၄၃၁.၃ ဘီလီယံ) ဖြစ်လာ မည်ဟု မျှော်မှန်းထားပါသည်။

သို့ပါ၍ ပြည်ထောင်စုဘတ်ဂျက်(လိုငွေပြမှု)သည် ၂၀၂၅ ခုနှစ်တွင် ရူဘယ် ၁.၁၇၃ ထရီလီယံ( ဒေါ်လာ ၁၁.၀၂ ဘီလီယံ)၊ ၂၀၂၆ ခုနှစ်တွင် ရူဘယ် ၂.၁၈၁ ထရီလီယံ (ဒေါ်လာ ၂၀.၅ ဘီလီယံ)၊ ၂၀၂၇ ခုနှစ်တွင် ရူဘယ် ၂.၇၆၁ ထရီလီယံ ( ဒေါ်လာ ၂၅.၉ ဘီလီယံ) မျှော်မှန်း ထားပါသည်။

အဆိုပါထုတ်ပြန်ချက်တွင် မျှော်မှန်းထားသည့် GDP ကိန်းဂဏန်းများကိုလည်း ဖော်ပြထားရာ ၂၀၂၅ ခုနှစ်တွင် ရူဘယ် ၂၁၄.၅၇၅ ထရီလီယံ (ဒေါ်လာ ၂.၀၁ ထရီလီယံ) + ၂.၅ ရာခိုင်နှုန်းဖြစ်ပါသည်။ ၂၀၂၆ ခုနှစ်တွင် ရူဘယ် ၂၃၀.၅၆၈  ထရီလီယံ (ဒေါ်လာ ၂.၁၆  ထရီလီယံ) ဖြစ်ပြီး + ၂.၆ ရာခိုင်နှုန်းဖြစ်ပါသည်။ ၂၀၂၇ ခုနှစ်တွင် ရူဘယ် ၂၄၈.၃၁၃ ထရီလီယံ (ဒေါ်လာ ၂.၃၃ ထရီလီယံ) ဖြစ်ပြီး + ၂.၈ ရာခိုင်နှုန်းဖြစ်ပါသည်။

ရုရှားဖက်ဒရေးရှင်း၏ ငွေကြေးဖောင်းပွနှုန်းမှာ ၂၀၂၅ ခုနှစ်တွင် ၄.၅ ရာခိုင်နှုန်းဖြစ်ပြီး ၂၀၂၆ ခုနှစ်နှင့် ၂၀၂၇ ခုနှစ် တို့တွင် ၄ ရာခိုင်နှုန်းရှိမည်ဟု ခန့်မှန်းထားသည်။ 

ကိုးကား - TASS 

တောင်ကိုရီးယားနိုင်ငံတောင်ပိုင်းရှိ ဂျယ်ဂျူ အပန်းဖြေကျွန်းတွင် ဗီယက်နမ်ခရီးသွား ၃၈ ဦး ပျောက်ဆုံးနေကြောင်း ယွန်ဟပ်သတင်းဌာနက အဆိုပါကျွန်း၏ ခရီးသွားလုပ်ငန်းအဖွဲ့၏ ထုတ်ပြန်ချက်ကို ကိုးကား၍ ပြောကြားခဲ့သည်။

ဗီယက်နမ်ခရီးသည်အယောက် ၉၀ ခန့်သည် စင်းလုံးငှား Viet Jet Air လေယာဉ်ဖြင့် နိုဝင်ဘာ ၁၄ ရက်က ကျွန်းပေါ်သို့ရောက်ရှိခဲ့ကြောင်း သိရှိရသည်။

၎င်းတို့အနက်မှ ခရီးသွား ၃၈ ဦးသည် အဆက်အသွယ် ပြတ်တောက်နေပြီး ခရီးစဉ်နောက်ဆုံး‌ ရပ်နားရာနေရာ တွင် ပျောက်ဆုံးသွားကာ အပြန်လေယာဉ်ပေါ်တက်ရန် ရောက်မလာကြခြင်းဖြစ်သည်။

နိုင်ငံခြားသားများကို ဗီဇာမလိုဘဲ အဆိုပါကျွန်းပေါ်တွင် ရက် ၃၀ အထိ နေထိုင်ခွင့်ပြုထားသဖြင့် အဆိုပါ ဗီယက်နမ် ဧည့်သည်များသည် ဒီဇင်ဘာ ၁၄ ရက် နောက်ပိုင်းတွင် တရားမဝင်ရွှေ့ပြောင်းနေထိုင်သူများ အဖြစ်သို့ရောက်ရှိ သွားမည်ဖြစ်ကြောင်း သိရှိရသည်။

ဂျယ်ဂျူကျွန်း၏ လူဝင်မှုကြီးကြပ်ရေးရုံးသည် ၎င်းတို့၏ တည်နေရာကိုသိရှိရန် စီစီတီဗွီကင်မရာများကို စစ်ဆေးခဲ့ကြကြောင်း သိရှိရသည်။

ကိုးကား : ရှင်းဟွာ

သားဖြစ်သူ ဟန်တာဘိုင်ဒန် တရားစွဲဆိုခံနေရသည့် ရာဇဝတ်မှု ၂ ခုကို အမေရိကန်သမ္မတ ဂျိုးဘိုင်ဒန်က လွတ်ငြိမ်းချမ်းသာခွင့်ပြုလိုက်ပါသည်။  ဘိုင်ဒန်အနေဖြင့် သားဖြစ်သူ သေနတ်ဝယ်ယူမှုနှင့် အခွန်တိမ်းရှောင်မှုစသည့် ရာဇဝတ်မှုနှစ်ခုဖြင့် တရားစွဲဆိုခံထားသည့်အပေါ်  လွတ်ငြိမ်းချမ်းသာခွင့်ပြုမည့် အစီအစဉ် မရှိဟု ယခင်က အကြိမ်ကြိမ်ပြောဆိုခဲ့ဖူးသည်။

၎င်းသည် သမ္မတတာဝန်ယူချိန်ကတည်းက တရားရေး ဌာန၏ ဆုံးဖြတ်ချက်အပေါ် ဝင်ရောက်စွက်ဖက်ခဲ့ခြင်း မရှိခဲ့ကြောင်း၊ သားဖြစ်သူ မတရားသဖြင့် တရားစွဲဆိုခံ ရသည့်တိုင်အောင် မိမိအနေဖြင့် နှုတ်ဆိတ်စောင့်ကြည့် နေခဲ့ကြောင်း တနင်္ဂနွေနေ့တွင် အိမ်ဖြူတော်က ထုတ်ပြန်လိုက်သည့် သားဖြစ်သူ ဟန်တာကို လွတ်ငြိမ်းချမ်းသာ ခွင့်ပြုလိုက်သော ကြေညာချက်တွင်  ဖော်ပြထားသည်။

သမ္မတဂျိုးဘိုင်ဒန်၏ သားဖြစ်သူ ဟန်တာဘိုင်ဒန်သည် ဒဲလာဝဲပြည်နယ်၌ သေနတ်ဝယ်ယူမှုနှင့် ကယ်လီဖိုးနီးယားပြည်နယ်၌ အခွန်ရှောင်တိမ်းနေမှုစသည့် ရာဇဝတ်မှု နှစ်ခုဖြင့်  တရားစွဲဆိုခံရခြင်းဖြစ်ပါသည်။

ကိုးကား - TASS

တောင်တရုတ်ပင်လယ်ရှိ ဖိလစ်ပိုင်နိုင်ငံ သီးသန့် စီးပွားရေးဇုန်(EEZ)တွင် ရုရှားတိုက်ခိုက်ရေး ရေငုပ်သင်္ဘောတစ်စင်း ရောက်ရှိနေခြင်းသည် လွန်စွာစိုးရိမ်  ဖွယ်ရာဖြစ်ကြောင်း ဖိလစ်ပိုင်သမ္မတ ဖာဒီနန်မားကို့စ် ဂျူနီယာက ဒီဇင်ဘာ ၂ ရက်တွင် ပြောကြားလိုက် ပါသည်။

ရုရှားရေတပ်၏ Kilo-class ရေငုပ်သင်္ဘောတစ်စင်းကို ဖိလစ်ပိုင်နိုင်ငံ Occidental Mindoro ပြည်နယ်၏ ရေမိုင် ၈၀ အကွာတွင် တွေ့မြင်ခဲ့ပါကြောင်း ရေတပ် ပြောရေးဆိုခွင့်ရှိသူ Roy Vincent Trinidad က တနင်္လာနေ့တွင် ပြောကြားထားမှုကို  ဖိလစ်ပိုင် Daily Inquirer သတင်းစာက ဖော်ပြထားသည်။

ဖိလစ်ပိုင်ရေတပ် ဖရီးဂိတ်သင်္ဘော Jose Rizal က ထိုရုရှားရေငုပ်သင်္ဘောကို ရေဒီယိုဖြင့်ဆက်သွယ်ခဲ့ရာ ဗလာဒီဗော့စတော့ကို ထွက်ခွာရန် ရာသီဥတုအခြေအနေစောင့်ဆိုင်းနေကြောင်း၊ ဖိလစ်ပိုင်ရေတပ်အနေဖြင့် ရေကြောင်းဆိုင်ရာစည်းမျဉ်းများနှင့်အညီ ရေငုပ်သင်္ဘောကို လုံခြုံရေးယူထားကြောင်း Trinidad က ပြောကြားခဲ့ပြီး ရေငုပ်သင်္ဘောသည် ထိုဧရိယာထဲ မည်သို့ ရောက်ရှိနေသည်ကို အသေးစိတ်ပြောပြထားခြင်းမရှိချေ။

ထိုကိစ္စကို မနီလာမြို့ရှိ ရုရှားသံရုံးသို့ မေးမြန်းရာ ချက်ချင်းတုံ့ပြန်ဖြေကြားခြင်း မရှိချေ။ ရုရှား ကီလို အတန်းအစား ရေငုပ်သင်္ဘောမှာ အငြိမ်သက်ဆုံး ရေငုပ်သင်္ဘောအမျိုးအစားဖြစ်ပြီး ၁၉၈၀ ပြည့်နှစ်များကတည်းကပင် အဆက်မပြတ်ပြင်ဆင်မွမ်းမံလာခြင်း ဖြစ်ပါသည်။

ယူကရိန်းစစ်ပွဲ မဆင်နွှဲမီ ရုရှားသမ္မတပူတင်သည် ၂၀၂၂ ခုနှစ်တွင် ဘေဂျင်းသို့ ရောက်ရှိစဉ်က  ရုရှား-တရုတ် အကန့်အသတ်မဲ့မိတ်ဖက် အဖြစ်ကြေညာခဲ့ပါသည်။ 

ကိုးကား - Reuters

ကွာလာလမ်ပူ ဒီဇင်ဘာ ၂

မလေးရှားနိုင်ငံ၌ ရေကြီးရေလျှံမှုကြောင့် ဒီဇင်ဘာ ၂ ရက်အထိ သေဆုံးသူ ခြောက်ဦးရှိလာကြောင်းနှင့် ကီလန်တန်ပြည်နယ်၌ သက်ကြီးရွယ်အိုနှစ်ဦး ရေနစ်သေဆုံးမှုသည် ‌နောက်ဆုံးသေဆုံးမှုဖြစ်ကြောင်း အာဏာပိုင်များက ပြောသည်။

ရေဘေးသင့်ပြည်သူ ၁၃၄၅၂၄ ဦးသည် ဒေသစံတော်ချိန် နံနက် ၁၁ နာရီအထိ ရေဘေးကယ်ဆယ်ရေးစခန်း ၆၁၃ ခု၌ ခိုလှုံလျက်ရှိကြောင်း မလေးရှားလူမှုဝန်ထမ်းဦးစီးဌာန၏ ထုတ်ပြန်ချက်အရ သိရသည်။ ရေကြီးရေလျှံမှုဒဏ် အဆိုးရွားဆုံးခံရသည့် ပြည်နယ်များမှာ နိုင်ငံ၏ အရှေ့ဘက်ကမ်းရိုးတန်းတွင်ရှိသော ကီလန်တန်နှင့် တယ်ရင်ဂါနူပြည်နယ်တို့ဖြစ်သည်ဟု ဆိုသည်။

ရေကြီးရေလျှံ ဖြစ်ပွားပြီးနောက် ယခုလလယ်တွင် စတင်ဖွယ်ရှိသော ပြန်လည်ထူ‌ထောင်ရေးလုပ်ငန်းများအတွက် အစိုးရက နောက်ထပ်ရန်ပုံငွေများ ခွဲဝေချထားပေးထားပြီးဖြစ်ကြောင်း ဝန်ကြီးချုပ် အန်ဝါအီဗရာဟင်က ပြောကြားလိုက်သည်။

ဆင်ဟွာ

Source- မြန်မာ့အလင်းသတင်းစာ

အမေရိကန်၏လက်ရှိ FBI အကြီးအကဲရာထူးဖြစ်သည့် ဒါရိုက်တာဖြစ်သူ  Christopher Wray နေရာတွင် ထရန့်၏ သစ္စာရှိလူယုံတော်  Kashyap ‘Kash’ Patel ကို အစားထိုးခန့်အပ်ရန် ရည်ရွယ်ထားကြောင်း အမေရိကန် ရွေးကောက်ခံသမ္မတ ဒေါ်နယ်ထရန့်က  စနေနေ့ ညနေပိုင်းတွင်  ကြေညာလိုက်ပါသည်။ 

“Kash က ထူးချွန်ထက်မြက်သည့် ဥပဒေအရာရှိ တစ်ဦးဖြစ်သကဲ့သို့ စစ်ဆေးရေးမှူးတစ်ဦးလည်း ဖြစ်ကြောင်း၊ ၎င်းက အဂတိလိုက်စားမှု တိုက်ဖျက်ရေး ကိစ္စများတွင် တရားမျှတမှုအတွက် ခုခံကာကွယ်ပေး သည့် ကိစ္စများနှင့် အတွေ့အကြုံများ ရှိပြီးသားဖြစ်ကြောင်း၊ ယခုလည်း အမေရိကန်ပြည်သူများအတွက်  ခုခံကာကွယ် ပေးနေသည့် သူတစ်ဦးဖြစ်ကြောင်း” ထရန့်က ပြောကြားလိုက်ပါသည်။ 

ကိုးကား -  CNN

အသက် ၁၁၂ နှစ်အရွယ်  ကမ္ဘာပေါ်တွင် အသက် အရှည်ဆုံးအမျိုးသားဖြစ်သူ John Tinniswood သည် အင်္ဂလန် southport ရှိ ဘိုးဘွားရိပ်သာတစ်ခု၌ တနင်္လာနေ့က ကွယ်လွန်သွားကြောင်း ဂရန်းနစ် မှတ်တမ်းက ကြေညာလိုက်ပါသည်။ 

၁၉၁၂ ခုနှစ် ဩဂုတ်လ ၂၆ ရက်တွင် မွေးဖွားခဲ့သူ John Tinniswood သည် ကမ္ဘာပေါ်တွင် သက်တမ်း အရှည်ဆုံး အမျိုးသားတစ်ဦး ဖြစ်ပါသည်။ 

၎င်းသည် ၂၀၂၄ ဧပြီတွင် ကွယ်လွန်သွားသော ကမ္ဘာ့အသက်အကြီးဆုံး အသက် ၁၁၄ နှစ်အရွယ် ဗင်နီဇွဲလားနိုင်ငံ အမျိုးသား Juan Vicente Pérez  နောက်တွင် အသက်အကြီးဆုံးအမျိုးသားအဖြစ် မှတ်တမ်း တင်ခံရသူဖြစ်ပါသည်။ 

“၎င်း၏ နောက်ဆုံးနေ့ရက်များသည်  တေးဂီတ၊  အချစ် များဖြင့် ဝန်းရံနေကြောင်း” ၎င်း၏ မိသားစု ပြောကြားချက်ကို အဆိုပါကြေညာချက်တွင် ထုတ်ပြန် ထားသည်။ 

မှတ်တမ်းပေါ်ပေါက်ရာ အချိန်မှစ၍ ယနေ့အချိန်အထိ ကမ္ဘာပေါ်တွင် သက်တမ်းအကြာဆုံးနေထိုင်ခဲ့သူ လူသားမှာ Jeanne Louise Calment ဆိုသည့် အမျိုးသမီးဖြစ်ပြီး အသက် ၁၂၂ နှစ် ၁၆၄ ရက်ကြာ နေထိုင်ခဲ့ကြောင်း  ဂရန်းနစ်မှတ်တမ်းအရ သိရပါသည်။ 

ကိုးကား - CNN 

Novaya Zemlya ကျွန်းစုရှိ ရုရှားနိုင်ငံ၏ စမ်းသပ်မှုများ ပြုလုပ်သည့်နေရာသည် နျူကလီးယားစမ်းသပ်မှုများကို ပြန်လည်စတင်ရန် အဆင်သင့်ဖြစ်နေပြီဖြစ်ကြောင်း ရုရှား ကာကွယ်ရေးဝန်ကြီးဌာန၏ အမှတ် ၁၂  အဓိက ညွှန်ကြားရေးမှူးရုံး အကြီးအကဲဟောင်း  ဗိုလ်မှူးကြီး ဗလာဒီမာ ဗာခို့ဗ်က TASS သတင်းဌာနသို့ ပြောကြားခဲ့ကြောင်း သိရှိရသည်။

ကိုးကား - TASS သတင်းဌာန

အမေရိကန်ရွေးကောက်ခံသမ္မတ Donald Trump က  ကနေဒါမှ တင်သွင်းလာမည့်  ကုန်စည်များအပေါ် အကောက်ခွန် ၂၅ ရာခိုင်နှုန်း တိုးမြှင့်မည်ဟု ခြိမ်းခြောက်လိုက်သောကြောင့် ကနေဒါနိုင်ငံ၏ ရေနံ အဓိကထွက်သည့်ဒေသတစ်ခုဖြစ်သည့်  Alberta မှ မကျေနပ်သံများ ထွက်ပေါ်လာခဲ့ပါသည်။ 

အကောက်ခွန်နှုန်းတိုးမြှင့်လိုက်ခြင်းက အမေရိကန် နိုင်ငံ၏ မြောက်ပိုင်းအိမ်နီးချင်း ကနေဒါနိုင်ငံ၏ စီးပွားရေး အပေါ် အကျိုးသက်ရောက်မှုရှိစေနိုင်ပြီး အမေရိကန် နိုင်ငံတွင်လည်း ရေနံသုံးစွဲသူများအကြား ရေနံဈေးနှုန်း ပိုတက်လာမည်ဖြစ်ကြောင်း ကနေဒါ နိုင်ငံရေးသမား များနှင့် စွမ်းအင်ပညာရှင်များက သတိပေးပြောကြား လိုက်သည်။ 

ကနေဒါနိုင်ငံသည် Trump နှင့် အဆိုပါကိစ္စရပ်အပေါ် ညှိနှိုင်းရန်လိုအပ်ကြောင်း စွမ်းအင်ပညာရှင် Dennis McConaghy က ပြောကြားခဲ့ပါသည်။

Trump သည် ယခင်က အလားတူ ခြိမ်းခြောက်မှုမျိုးကို ဗျူဟာအဖြစ် သုံးခဲ့ဖူးသည့်အတွက်ကြောင့် ယခု ခြိမ်းခြောက်မှုသည် လက်တွေ့တွင် အသက်ဝင်မည် လောကို အတိအကျ မသိရှိရပါ။ 

အဆိုပါ ခြိမ်းခြောက်မှုသည် Canada နှင့် Mexico တို့နှင့် ထိစပ်နေသည့် အမေရိကန်နယ်စပ်မှတစ်ဆင့်  နိုင်ငံအတွင်းသို့  ဒုက္ခသည်များနှင့် မူးယစ်ဆေးများ တရားမဝင် ဝင်လာနေသရွေ့ အတည်ဖြစ်မည့်သဘောမျိုး Trump က အရိပ်အမြွက်ပြောကြားထားပါသည်။ 

Canada နိုင်ငံ၏ ကုန်သွယ်မှု ၈၀% မှာ အမေရိကန် နိုင်ငံနှင့်ဖြစ်ပြီး အများစုသည် ဟိုက်ဒရိုကာဗွန် ဓာတ်ငွေ့များ ဖြစ်ပါသည်။ သို့ပါ၍ အမေရိကန်နိုင်ငံ ကလည်း ကနေဒါမှ တင်သွင်းသည့် ရေနံအပေါ် မှီခို နေရသဖြင့် တိုးမြှင့်ကောက်ခံမည့် အကောက်ခွန်နှုန်း များထဲတွင် ရေနံနှင့် သဘာဝဓာတ်ငွေ့ မပါဝင်သင့် ကြောင်း အမေရိကန် ရေနံစီးပွားရေးသမားများက သမ္မတထံ တောင်းဆိုနေကြပါသည်။

သို့သော် Trump သည် အခြားနိုင်ငံများ၏ ရေနံတင်သွင်းမှုအပေါ် အမေရိကန်နိုင်ငံက မှီခိုနေရခြင်းကို မနှစ်မြို့သူဖြစ်သောကြောင့် အဆိုပါကိစ္စရပ်အပေါ် မည်ကဲ့သို့ ဆုံးဖြတ်မည်ကို ဆက်လက် စောင့်ကြည့်ရမည်ဖြစ်ပါသည်။ 

ကိုးကား - BBC