မြန်မာအပါအဝင် တစ်ကမ္ဘာလုံးတွင် ရေပန်းစားနေသည့် လူမှုကွန်ရက် Tiktok ကို တရုတ်နိုင်ငံအခြေစိုက် မိခင် လုပ်ငန်းကြီးက ရောင်းချရန်နှင့် မရောင်းလျှင် အမေရိကန် နိုင်ငံတွင် ပိတ်ပင်ရန် ပြဋ္ဌာန်းလိုက်သည့် ဥပဒေကို အယူခံတရားရုံးတွင် Tiktok က အယူခံဝင်ရာ ရှူံးခဲ့သဖြင့်  လာမည့် ဇန်နဝါရီလတွင် အမေရိကန်တွင် အပိတ်ခံ ရနိုင်ကြောင်း စီးပွားရေးပညာရှင်၏ ခန့်မှန်း ပြောကြား ချက်အရ သိရှိရသည်။

Tiktok၏ မိခင်လုပ်ငန်းသည် တရုတ်အစိုးရနှင့်နီးစပ်ပြီး Tiktok သုံးစွဲသူ အမေရိကန် သန်း ၁၇၀ ၏ အချက် အလက်များမှတစ်ဆင့် အမေရိကန်လုံခြုံရေးကျိုးပေါက် နိုင်သည်ဟု ပါတီကြီးနှစ်ပါတီ၏ လွှတ်တော်ကိုယ်စား လှယ်များက စိုးရိမ်ကြရာမှ ယခု ဥပဒေထွက်လာခြင်း ဖြစ်ကြောင်း၊ လာမည့် ဇန်နဝါရီ ၁၉ ရက် အထိ Tiktok ကို မရောင်းလျှင် ဥပဒေ အရ Apple နှင့် Google ကဲ့သို့ Application Store လုပ်ငန်းများက Tiktok ကို ပိတ်ရမည်ဖြစ်ကြောင်း၊ Tiktok သည် နောက်ဆုံး အယူခံအဖြစ် အမေရိကန်တရားရုံးချုပ်တွင် အယူခံ ဝင်မည်ဖြစ်ပါသည်။

လာမည့်  ၂၀၂၅ ခုနှစ်၊ ဇန်နဝါရီ တွင် ရာထူးရယူမည့် အမေရိကန်​သမ္မတသစ် ထရမ့်သည် Tiktok ကို ပိတ်၊ မပိတ် တိတိကျကျ ပြောမထားသေးကြောင်း အမေရိကန် သတင်းများအရ သိရသည်။

ကိုးကား - ဒေသတွင်းမီဒီယာ

Photo- BBC

အမေရိကန်နိုင်ငံရှိ Computer Firewalls လုံခြုံရေးစနစ်အတွင်း ကျူးကျော်ဝင်ရောက်ခဲ့သည့် တရုတ် အမျိုးသားတစ်ဦးနှင့် အပေါင်းအပါတို့အား ဖမ်းဆီးရန် အလိုရှိကြောင်းနှင့် ၎င်းတို့နှင့်ပတ်သက်၍ သတင်းပေး နိုင်ပါက ဆုကြေးငွေအဖြစ် အမေရိကန်ဒေါ်လာ ၁၀ သန်း ပေးအပ်မည်ဖြစ်ကြောင်း အမေရိကန်နိုင်ငံက ပြောကြား ထားပါသည်။

တရုတ်ဟက်ကာတစ်ဦးဖြစ်သည့်အသက် ၃၀ အရွယ်တရုတ်အမျိုးသား Guan Tianfeng သည်တရုတ်နိုင်ငံ၊ စီချွမ်ပြည်နယ်တွင်နေထိုင်ကြောင်း အမေရိကန် နိုင်ငံခြားရေးဌာန၏ ပြောကြားချက်အရ သိရှိရပါသည်။

Guan ကို ဆက်သွယ်ရေးကွန်ပျူတာစနစ်အတွင်း ကျူးကျော်ဝင်ရောက်မှုနှင့် လုံခြုံရေးဆိုင်ရာ ချိုးဖောက်မှုတို့ဖြင့် စွဲချက်တင်ထားကြောင်း ဒီဇင်ဘာ ၁၀ ရက်နေ့သတင်းတွင် ထုတ်ဖော်ပြောကြားထားပါသည်။

ယခုအခါ Guan အလုပ်လုပ်ကိုင်လျက်ရှိသည့် စီချွမ်ပြည်နယ်ရှိ သတင်းအချက်အလက်နည်းပညာ ကုမ္ပဏီတစ်ခုဖြစ်သည့် (Sichuan Silence Information Technology) ကိုလည်း အရေးယူပိတ်ဆို့မှုများ ပြုလုပ်ထားကြောင်း အမေရိကန်ဘဏ္ဍာရေးဌာနက ပြောကြားထားပါသည်။

ကိုးကား - CNA

နယ်ပယ်ကဏ္ဍအားလုံးတွင် AI ဟု ခေါ်ဆိုသော ဉာဏ်ရည်တုနည်းပညာအသုံးပြုမှုအတွက်  ရုရှားသည် ကမ္ဘာ့ဦးဆောင်နိုင်ငံဖြစ်သင့်ကြောင်း AI Journey အမည်ရှိ နိုင်ငံတကာညီလာခံတစ်ခုတွင် ရုရှားသမ္မတ ဗလာဒီမာပူတင်က ပြောကြားလိုက်သည်။ 

နိုင်ငံတော်ဖွံ့ဖြိုးတိုးတက်ရေး ရည်မှန်းချက်များ အောင်မြင်စေရန်၊ နိုင်ငံ၏ကာကွယ်ရေးစွမ်းရည်ကို အားကောင်းလာစေရန်၊ စီးပွားရေးနှင့် လူမှုရေးကဏ္ဍ များ၏အရည်အသွေး ဖွံ့ဖြိုးတိုးတက်လာစေရန်၊ ပြည်သူ့ရေးရာစီမံခန့်ခွဲရန်၊ တီထွင်ဆန်းသစ်မှုများ တိုးပွားလာစေရန်အတွက် ဉာဏ်ရည်တုနည်းပညာကို အရေးအကြီးဆုံး အရင်းအမြစ်အဖြစ် ရည်ရွယ်ထားပါကြောင်း၊ အဆိုပါရည်မှန်းချက်များအောင်မြင်စေရန် AI  နည်းပညာဖန်တီးမှုကိုသာမက မိမိတို့ဘဝ၏ နယ်ပယ်ကဏ္ဍအားလုံးတွင်  ထိုဉာဏ်ရည်တုနည်းပညာကို ခြွင်းချက်မရှိ ယုံကြည်စိတ်ချစွာ ပေါင်းစပ်အသုံးပြုခြင်းဖြင့် ရုရှားသည်  AI ၏ ကမ္ဘာ့ဦးဆောင်နိုင်ငံဖြစ်သင့်ကြောင်း  ပူတင်က မိန့်ခွန်းတွင် ထည့်သွင်းပြောကြားသွားပါသည်။ 

ကိုးကား - TASS

Photo- RT

Time မဂ္ဂဇင်းက အမေရိကန် ရွေးကောက်ခံသမ္မတ Donal Trump ကို တစ်နှစ်တာအတွက် ဩဇာလွှမ်းမိုးမှုအရှိဆုံး ပုဂ္ဂိုလ်အဖြစ် သတ်မှတ်ခဲ့ပါသည်။

ကိုးကား - Time Magazine

ဥရောပနိုင်ငံများက ဆီးရီးယားဒုက္ခသည်များ တင်သွင်းသည့် ခိုလှုံခွင့်လျှောက်ထားမှု လုပ်ငန်းစဉ်များကို ရပ်ဆိုင်းလိုက်သည်။ ဆီးရီးယားတွင် သမ္မတ Bashar al-Assad အစိုးရပြုတ်ကျပြီးနောက် ယခုကဲ့သို့ ထွက်ပေါ် လာခြင်းဖြစ်သည်။

ဆီးရီးယားဒုက္ခသည်များနှင့်ပတ်သက်သည့် ခိုလှုံခွင့်ဆိုင်ရာလုပ်ငန်းစဉ်များကို ရပ်ဆိုင်းလိုက်ပြီဟု ဂျာမနီနိုင်ငံက ဒီဇင်ဘာ ၉ ရက်နေ့က ကြေညာခဲ့သည်။ ဂျာမနီသည် ဆီးရီးယား နိုင်ငံပြင်ပရှိ ဆီးရီးယားမှလာသူဦးရေ အများဆုံးနေထိုင်သောနိုင်ငံဖြစ်သည်။

ဂျာမနီပြည်ထဲရေးဝန်ကြီး Nancy Faeser က ကြေညာချက် တစ်စောင်ထုတ်ပြန်ခဲ့ရာတွင် "ဂျာမနီတွင် ကာကွယ်စောင့်ရှောက်မှုကို ရှာဖွေခဲ့သည့် ဒုက္ခသည်များအနေဖြင့် နောက်ဆုံးတွင် ၎င်းတို့၏ မွေးရပ်မြေ ဆီးရီးယားသို့ပြန်ရန် မျှော်လင့်ချက်များရှိလာပါပြီ" ဟု ၎င်းက ပြောကြားခဲ့ သည်။ သို့သော် လတ်တလောဆီးရီးယား၏ အခြေအနေသည် ရှင်းရှင်းလင်းလင်းမဖြစ်သေးသဖြင့် ဂျာမနီအာဏာပိုင်များက “အခြေအနေ ပိုပြီးရှင်းလင်းသည်အထိ ဆက်လက်လုပ်ဆောင်ဆဲ ခိုလှုံခွင့်ဆိုင်ရာလုပ်ငန်းစဉ်များကိုရပ်ဆိုင်းထားရန် ဆုံးဖြတ်ချက်ချမှတ်ခဲ့သည်"ဟု ဝန်ကြီး Faeser က ပြောသည်။

ဗြိတိန်နှင့် ဘယ်လ်ဂျီယံတို့ကလည်း ဆီးရီးယားနိုင်ငံသားများ တင်သွင်းသည့် ခိုလှုံခွင့်လျှောက်ထားမှုလုပ်ငန်းစဉ်အား ရပ်ဆိုင်းရန် ဆုံးဖြတ်ခဲ့ကြသည်။

ဆွီဒင်နှင့် ပြင်သစ်တို့သည်လည်း လာမည့်ရက်များအတွင်း အလားတူလုပ်ဆောင်မည်ဟု ခန့်မှန်းရသည် ဟု ဖော်ပြထားရှိပါသည်။

ကိုးကား- NHK World

ယနေ့ခေတ်တွင် မိုဘိုင်းဖုန်းမှ လွယ်ကူစွာ ငွေပေးချေနိုင်သော နည်းပညာများထွက်ပေါ်လျက်ရှိသော်လည်း တရုတ်နည်းပညာရှင်များ၏ တီထွင်မှုက ပိုမိုဆန်းသစ်လာပြီဖြစ်သည်။ တရုတ်နိုင်ငံတွင် ဖုန်းအသုံးမပြုဘဲ လက်ဖဝါးအသုံးပြု၍ ငွေပေးချေ၍ရသော စနစ်ကို နည်းပညာကုမ္ပဏီကြီး Tencent က ဖန်တီးပေးလိုက်ပါသည်။ Weixin Palm Payment ဟု နာမည်ပေးထားပြီး ၎င်းနည်းပညာတွင် လက်ဖဝါး၏ လက်ဗွေရာနှင့် သွေးကြော Patterns များကို အနီအောက်ရောင်ခြည် ကင်မရာကို အသုံးပြုကာ Scan ဖတ်ခြင်းဖြစ်ပြီး စက္ကန့်ပိုင်းအတွင်း ငွေပေးချေနိုင်မည်ဖြစ်သည်။ ၎င်းစနစ်သည် Facial Recognition ထက်ပိုမို ကောင်းမွန်ပြီး အမွှာညီအစ်ကိုမောင်နှမများတွင်ပင် လက္ခဏာမတူညီသောကြောင့် လိမ်လည်၍ မရနိုင်ပေ။ ဘေကျင်း၏ ရထားပို့ဆောင်ရေးလုပ်ငန်းများတွင် ၎င်းလက်ဖဝါးဖြင့်ငွေပေးချေသော စနစ်ကို စတင်အသုံးပြုနေပြီဖြစ်ပြီး ရထားစီးခအတွက် ငွေပေးချေသည့်ကဒ်နှင့် စမတ်ဖုန်းများ မလိုအပ်တော့ပေ။ အနာဂတ်တွင် လက်ဖဝါးအသုံးပြု၍ ငွေပေးချေသော နည်းပညာကို ကမ္ဘာအဝန်း၌ တွင်တွင်ကျယ်ကျယ်အသုံးပြုလာကြမည်ဟု တွေးထင်ရပါသည်။ 

ကိုးကား -  The Verge

လက်ရှိအမေရိကန်ရွေးကောက်ခံသမ္မတ ဒေါ်နယ်ထရန့်သည် ယခင်က အင်တာဗျူးတစ်ခုတွင် “အမေရိကန်နိုင်ငံတွင်မွေးဖွေးသူဖြစ်လျှင် နိုင်ငံသားချက်ချင်း ဖြစ်ခွင့် ရှိသည်ဆိုသည့်ဥပဒေကို ဖျက်သိမ်းရန် စီစဉ်ထားကြောင်း” ပြောကြားခဲ့ပါသည်။ 

အမေရိကန်တွင် ယင်းဥပဒေကို နှစ်ပေါင်း ၁၅၀ ကျော်ကြာ ကျင့်သုံးလာခဲ့သောကြောင့် ဒေါ်နယ်ထရန့်အနေဖြင့် တရားဝင်သမ္မတဖြစ်လာချိန်တွင်  မည်ကဲ့သို့ ဆောင်ရွက်မည်ကို စိတ်ဝင်စားမှုမြှင့်တက်နေပါသည်။ 

လက်ရှိတွင် အမေရိကန်ရှိ ရွှေ့ပြောင်းအလုပ်သမားများမှ မွေးဖွားသည့်သားသမီးများ၊ အလည်အပတ်ခရီးသွားများနှင့် ကျောင်းသားကျောင်းသူများသည် ထိုဥပဒေအရ အမေရိကန်နိုင်ငံသားအဖြစ် ခံယူခွင့်ရနေကြပါသည်။ 

၎င်းအနေဖြင့် မိသားစုများ တကွဲတပြားဖြစ်မည်ကို မလိုလားသောကြောင့် လက်ရှိတရားဝင်အမေရိကန် နိုင်ငံသားဖြစ်နေသည့်နိုင်ငံသားများကိုပါ ပြန်လည် စိစစ်ပြီး ၎င်းတို့၏သက်ဆိုင်ရာနိုင်ငံများသို့ ပြန်လည်ပို့ဆောင်မည့်အစီအစဉ်ရှိကြောင်း ထရန့်က ထပ်မံပြောကြားခဲ့ပါသည်။ 

ကိုးကား - Aljazeera

ရုရှားဖက်ဒရေးရှင်းသည် လစဉ် လေကာစနစ်များ ကြားဖြတ်မဟန့်တားနိုင်သည့် Oreshnik ပဲ့ထိန်းဒုံးကျည် ၂၅ စင်း ထုတ်လုပ်နိုင်ကြောင်း Military Watch Magazine သတင်းကဖော်ပြသည်။

အဆိုပါ ဒုံးကျည်များသည် ၁၉၈၀ ခုနှစ်နောက်ပိုင်း ရုရှားဖက်ဒရေးရှင်းတွင် ပထမဆုံးသော တီထွင်မှုများဖြစ်ပြီး ခန့်မှန်းခြေအားဖြင့် ကီလိုမီတာ ၄,၀၀၀ ပျံသန်းနိုင်ပြီး သီးခြားပြန်လည်ပစ်မှတ်ထားသော ထိပ်ဖူးများစွာကို သယ်ဆောင်နိုင်စွမ်းရှိကြောင်း ထုတ်ပြန်ချက်တွင် ဖော်ပြထားသည်။

ကိုးကား - Military Watch Magazine

ဆော်ပိုလို   ဒီဇင်ဘာ ၉

ဘရာဇီးနိုင်ငံတောင်ပိုင်း ရီယိုဂရန်ဒီ ဒိုဆူပြည်နယ်၌ လွန်ခဲ့သည့် ရက်သတ္တပတ်ကျော်က မိုးသည်းထန်စွာရွာသွန်းပြီး ရေကြီးမှုကြောင့် လူ ၁၀၀ ကျော် သေဆုံးပြီး နေအိမ်တစ်သိန်းနီးပါး ပျက်စီးခဲ့ကြောင်း ဒေသဆိုင်ရာအာဏာပိုင်များက ဆိုသည်။ ပြည်နယ်အတွင်း မြစ်ရေလျှံမှုနှင့် ရေကြီးမှုတို့ကြောင့် လူပေါင်း ၁ ဒသမ ၄၅ သန်းခန့် ထိခိုက်ခံစားရပြီး ဒေသခံနှစ်သိန်းခန့်မှာ ဘေးလွတ်ရာပြောင်းရွေ့ခဲ့ရ‌ကြောင်း သိရသည်။

ထို့ပြင် ဘရာဇီးနိုင်ငံတောင်ပိုင်း ဆန်တာကတ်တာရီနာ ပြည်နယ်ရှိ မြို့ပေါင်း ၂၂ မြို့တွင် ရေကြီးခြင်း၊ မြေပြိုခြင်းနှင့် ဘေးလွတ်ရာသို့ပြောင်းရွှေ့ခြင်းတို့ဖြစ်ပေါ်ခဲ့သည့်အတွက် ပြင်းထန် သည့် မုန်တိုင်းသတိပေးချက်ထုတ်ပြန်ထားဆဲဖြစ်ကြောင်း နိုင်ငံ၏ အရပ်ဘက်ကာကွယ်ရေး အာဏာပိုင်အဖွဲ့က ပြောသည်။

ဆန်တာကတ်တာရီနာ ပြည်နယ်၏ အကြီးဆုံးမြို့ဖြစ်သည့် ဂျိုအင်ဗဲလ်သည် ဒီဇင်ဘာ ၃ ရက်မှ စတင်ကာ ရေကြီးမှုဒဏ်ကိုခံစားခဲ့ရပြီး ဒီဇင်ဘာ ၁၀ ရက်နံနက်ပိုင်းအထိ မိုးဆက်လက် ရွာသွန်းနိုင်ကြောင်း မိုးလေဝသဌာနက ခန့်မှန်းထားသည်။ ဒီယိုနီရှိုဆာခီရာမြို့သည် လွန်ခဲ့သည့် ၄၈ နာရီအတွင်း မိုးရေချိန် ၁၈၆ ဒသမ ၄ မီလီမီတာစံချိန်တင်ခဲ့ပြီး ဆိုးရွားသည့် မြေပြိုမှု အန္တရာယ်ဖြစ်ပေါ်နိုင်ခြေများလာကြောင်း အဆိုပါဌာနက ပြောသည်။

ဘရာဇီးနိုင်ငံ၌ မေလမှ ဇွန်လအတွင်း မုန်တိုင်းဝင်ရောက်တိုက်ခတ်မှုကြောင့် အိမ်နီးချင်း ရီယိုဂရန်ဒီဒိုဆူပြည်နယ်၌ ရေကြီးမှုဖြစ်ပွားသဖြင့် လူ ၁၈၃ ဦးသေဆုံးခဲ့ပြီး ယင်းဒေသ၏ ၉၀ ရာခိုင်နှုန်းကျော် ထိခိုက်ခဲ့ကြောင်း သိရသည်။

ဆင်ဟွာ

Sorce- မြန်မာ့အလင်းသတင်းစာ

မြန်မာလူမျိုးတို့၏ နှစ်စဉ်အစဉ်အလာမပျက် ကျင်းပလေ့ရှိသည့် မြန်မာ့ရိုးရာမဟာသင်္ကြန်ပွဲတော်ကို ယူနက်စကို ၏လူသားမျိုးနွယ်နှင့်သက်ဆိုင်ရာ ဒြပ်မဲ့ယဉ်ကျေးမှု အမွေအနှစ်စာရင်းအဖြစ် အတည်ပြုသတ်မှတ်လိုက် ကြောင်း နိုင်ငံတော်စီမံအုပ်ချုပ်ရေးကောင်စီ သတင်း ထုတ်ပြန်ရေးအဖွဲ့က  ထုတ်ပြန်လိုက်ပါသည်။ 

အဆိုပါဆုံးဖြတ်ချက်ကို ပါရာဂွေးနိုင်ငံတွင် ဒီဇင်ဘာ ၂ ရက်မှ ၇ ရက်အထိ ကျင်းပနေသည့် ၁၉ ကြိမ်မြောက် ယူနက်စကို၏ ဒြပ်မဲ့ယဉ်ကျေးမှုအမွေအနှစ် ထိန်းသိမ်း ရေး အတွက် အစိုးရများဆိုင်ရာကော်မတီက ချမှတ်လိုက်ခြင်း ဖြစ်ပါသည်။

မြန်မာနိုင်ငံအနေဖြင့် မိမိတို့၏နှစ်သစ်ကူး အတာသင်္ကြန် ပွဲတော်ကို ယူနက်စကို၏ လူသားမျိုးနွယ်ဆိုင်ရာ ဒြပ်မဲ့ယဉ်ကျေးမှုအမွေအနှစ်စာရင်းတွင် ပါဝင်နိုင်ရေးအတွက်အတာသင်္ကြန်ပွဲတော်နှင့်ပတ်သက်သည့် အဆိုပြုစာတမ်းကို ယူနက်စကို၏ ဒြပ်မဲ့ယဉ်ကျေးမှုအမွေအနှစ် ကော်မတီသို့  ၂၀၂၃ ခုနှစ် မတ်လ ၂၄ ရက်တွင် ပေးပို့ တင်သွင်းခဲ့ခြင်းဖြစ်ပါသည်။

ကိုးကား - ဆင်ဟွာ