ဂျပန်နိုင်ငံ အရှေ့မြောက်ပိုင်း၊ Iwate ခရိုင်တွင်လောင်ကျွမ်းလျက်ရှိသော တောမီးလောင်ကျွမ်းမှုသည် မတ်လ ၄ ရက်(အင်္ဂါ)နေ့၌ ၆ ရက်မြောက် နေ့အဖြစ် ရောက်ရှိခဲ့ပြီး Ofunato မြို့၏ ၈ % ခန့် မီးလောင်ကျွမ်း ပျက်စီး ခဲ့ရသည်။

မတ်လ ၃ ရက်(တနင်္လာ)နေ့ နံနက်ပိုင်း၌ နောက်ထပ် ဟက်တာ ၅၀၀ မီးလောင်ကျွမ်းခဲ့ပြီး အင်္ဂါနေ့ နံနက် ၆ နာရီအထိ စုစုပေါင်း ဟက်တာ ၂,၆၀၀ ခန့် လောင်ကျွမ်းသွားခဲ့ကြောင်း တာဝန်ရှိသူများက ပြောပါသည်။

လူပေါင်း ၂,၀၀၀ ခန့်သည် မီးတောက်များကိုငြှိမ်းသတ်ရန် မြေပြင်နှင့် ဝေဟင်တို့မှ ကြိုးစားဆောင်ရွက်နေခဲ့ကြသည်ဟု ဒေသအာဏာပိုင်များက ပြောကြားခဲ့သည်။

Sanrikucho Ryori အပါအဝင် အခြားအရပ်များဆီသို့ မီးကူးစက်ခဲ့သည် ဟု ခရိုင်တာဝန်ရှိသူများက ပြောဆိုခဲ့ပြီး Ofunato ပင်လယ်ကွေ့၏ အရှေ့မြောက်ဘက် Akasakicho Nagasaki အနီးရှိ သစ်တောများတွင် မီးခိုးများတွေ့ရှိခြင်းကိုအတည်ပြုခဲ့ကြသည်။

Sanrikucho နှင့် Akasakicho ရှိ ပြည်သူများကို ဘေးလွတ်ရာသို့ ရွှေ့ပြောင်းရန် မြို့အုပ်ချုပ်ရေးအဖွဲ့က အမိန့်ထုတ်ထားပြီး မတ်လ ၄ ရက်(အင်္ဂါ)နေ့ နံနက် ၇ နာရီအထိ လူပေါင်း ၁,၂၁၅ ဦးသည် အဆောက်အအုံ ၁၂ ခု၌ ခိုလှုံနေကြရသည်။

မတ်လ ၄ ရက်(အင်္ဂါ) နေ့အထိ Ofunato မြို့တွင် မိုးနည်းသည့် အခြေအနေများ ဆက်ဖြစ်နိုင်ကာ ညသန်းခေါင်အချိန်မှ ဗုဒ္ဓဟူးနေ့ အစောပိုင်းအထိ နှင်းကျနိုင်ပြီး မွန်းတည့်ချိန်ခန့်တွင် မိုးအဖြစ် တဖြည်းဖြည်းချင်း ပြောင်းလဲသွားမည်ဟု ခန့်မှန်း တွက်ဆရကြောင်း ဖော်ပြထားသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရုတ်နိုင်ငံသည် ကမ္ဘာ့နိုင်ငံများနှင့် ပွင့်လင်းမြင်သာစွာ ဆက်ဆံနိုင်ရန် ရည်ရွယ်ပြီး ကျင့်သုံးလျက်ရှိသော ဗီဇာကင်းလွတ်ခွင့်မူဝါဒကို ကျယ်ကျယ် ပြန့်ပြန့်အကောင်အထည်ဖော် ဆောင်ရွက်လျက် ရှိပါသည်။ ထိုမူဝါဒကြောင့် “တရုတ်နိုင်ငံသို့ အလည်တစ်ခေါက်” ဆိုသော စာသားများဖြင့် ဆိုရှယ် မီဒီယာပေါ်တွင် hashtag တင်သူ ခရီးသွားပေါင်း သန်း ၁၀၀၀ ကျော် ရှိနေပြီဖြစ်ပါသည်။ သို့သော် အနောက်တိုင်းမီဒီယာအချို့က ယင်းမူဝါဒ အပေါ် ရှုတ်ချ ပြောဆိုနေကြပါသည်။ 

မကြာသေးမီက ယင်းမူဝါဒသည် တရုတ်အစိုးရအတွက် ကျရှုံးမှုများ ကိုသာ ဖြစ်စေမည်ဟု အမေရိကန်သတင်းဌာန Bloomberg က ဝေဖန် ရေးသားခဲ့ပါသည်။ ထိုဗီဇာကင်းလွတ်ခွင့်မူဝါဒကို ၂၀၂၃ ခုနှစ်၊ ဒီဇင်ဘာလ တွင် စတင်ကျင့်သုံးခဲ့ပြီး ပြင်သစ်၊ ဂျာမနီ၊ အီတလီ၊ နယ်သာလန်၊ စပိန် နှင့် မလေးရှားနိုင်ငံများအား ဗီဇာကင်းလွတ်ခွင့် စတင်ပေးခဲ့ပါသည်။ လက်ရှိတွင် နိုင်ငံပေါင်း ၃၈ နိုင်ငံအား ဗီဇာကင်းလွတ်ခွင့်ပေးထားပြီး နေထိုင်ခွင့်ပြုသည့် ဗီဇာကင်းလွတ်ခွင့်ကာလကို ရက်ပေါင်း ၃၀ အထိ တိုးမြှင့်ပေးထားပါသည်။  ထိုမူဝါဒကြောင့် တရုတ်နိုင်ငံသို့ လာရောက် လည်ပတ်သူများမှာ ပေကျင်း၊ ရှန်ဟိုင်းကဲ့သို့သော မြို့ကြီးများသာမက လူသူရောက်ပေါက်နည်းပါးသော မြို့များအထိ သွားရောက်လည်ပတ်လျက်ရှိကြောင်း သိရှိရပါသည်။ 

တရုတ်နိုင်ငံသို့ လာရောက်လည်ပတ်သူအရေအတွက် များပြားလာခြင်းသည် ကမ္ဘာ့စီးပွားရေး အခင်းအကျင်းတွင် တရုတ်နိုင်ငံက အရေးပါသည့် ကဏ္ဍတွင် လှုပ်ရှားလိုမှု ရည်ရွယ်ချက်ကို အကောင်အထည်ဖော်ရန် အထောက်အကူများစွာ ဖြစ်ပါသည်။ 

ကိုးကား-China Daily

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊နစက-၃

အမေရိကန်သမ္မတ Donald Trump ၏ အထူးကိုယ်စားလှယ် Richard Grenell သည် Nord Stream 2 ဓာတ်ငွေ့ပိုက်လိုင်းကို ပြန်လည် တည်ဆောက်ရန်နှင့် ပြန်လည်လည်ပတ်ရန် ညှိနှိုင်းဆွေးနွေးရန် ဆွစ်ဇာလန်သို့ အကြိမ်ကြိမ်သွားရောက်ခဲ့ကြောင်း Bild သတင်းစာက မတ်လ ၂ ရက်(တနင်္ဂနွေနေ့)တွင် ဖော်ပြခဲ့သည်။

Nord Stream 2 သည် လည်ပတ်နှင့်ပြီးဖြစ်သော Nord Stream 1 ကို ဖြည့်စွက်ရန် ရည်ရွယ်ခဲ့ပြီး ၂၀၂၁ ခုနှစ်တွင် ပြီးစီးခဲ့သော်လည်း လည်ပတ်ခြင်း မရှိခဲ့ပေ။ ၂၀၂၂ ခုနှစ်၊ စက်တင်ဘာလတွင် ပိုက်လိုင်းများကို ဖောက်ခွဲခံခဲ့ရပြီး ဓာတ်ငွေ့ယိုစိမ့်မှုအများအပြား ဖြစ်ပေါ်စေ ခဲ့သည်။ လွန်ခဲ့သည့်နှစ် ဩဂုတ်လတွင် Wall Street Journal က အဆိုပါဖောက်ခွဲမှုကို ယူကရိန်းအဖွဲ့တစ်ဖွဲ့က လုပ်ဆောင်ခဲ့သည်ဟု ဖော်ပြခဲ့သည်။

Trump ၏ ပထမသက်တမ်းအတွင်း ဘာလင်တွင် သံအမတ်အဖြစ် တာဝန်ထမ်းဆောင်ခဲ့သော Grenell သည် ယခုအခါ “အထူးတာဝန်များ” အတွက် Trump ၏ ကိုယ်စားလှယ်ဖြစ်ပြီး Bild ၏ အဆိုအရ ၎င်းသည် Nord Stream ၏ လုပ်ငန်းပြန်လည် လည်ပတ်နိုင်ရေးအတွက် ညှိနှိုင်းဆွေးနွေးရန် ဆွစ်ဇာလန်နိုင်ငံသို့ တရားဝင်မဟုတ်သော ခရီးစဉ်များစွာ သွားရောက်ခဲ့သည်ဟု ဆိုသည်။

Trump သည် ၎င်း၏ပထမသက်တမ်းအတွင်း Nord Stream 2 ကို ဝေဖန်ခဲ့ပြီး ဒဏ်ခတ်ပိတ်ဆို့မှုများ ပြုလုပ်ခဲ့ကာ ယခု ဒုတိယသက်တမ်း စတင်ပြီးနောက်ပိုင်းတွင် အမေရိကန်-ရုရှား ဆက်ဆံရေးကို ပိုမိုနီးကပ်စေရန် တွန်းအားပေးခဲ့ကာ ကုန်သွယ်ရေးကန့်သတ်ချက်များကို ဖြေလျှော့နိုင်ကြောင်း အရိပ်အမြွက်ပြခဲ့သည်။ 

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

ဂျပန်တရားသူကြီး ယူဂျီ အီဝါဆာဝါ (Yuji Iwasawa) ကို အပြည်ပြည်ဆိုင်ရာတရားရုံး (ICJ) ၏ ဥက္ကဋ္ဌအဖြစ် ရွေးချယ်လိုက်ကြောင်း ICJ တရားရုံး၏ သတင်းထုတ်ပြန်ချက်အရ သိရှိရပါသည်။

ယခင် ICJ ဥက္ကဋ္ဌဖြစ်သူ Nawaf Salam က လက်ဘနွန်နိုင်ငံ၏ ဝန်ကြီးချုပ် တာဝန်ထမ်းဆောင်ရန် ဇန်နဝါရီ ၁၄ ရက်၌ အဆိုပါရာထူးမှ နုတ်ထွက်သွားသည့်နေရာတွင် ယူဂျီ အီဝါဆာဝါကို ရွေးချယ်လိုက်ခြင်းဖြစ်ပါသည်။

 Nawaf Salam ၏ ဥက္ကဋ္ဌတာဝန်ယူသောအဖွဲ့မှာ ၂၀၂၇ ခုနှစ်၊ ဖေဖော်ဝါရီ ၅ ရက်တွင် သက်တမ်းကုန်မည်ဖြစ်သဖြင့် ယူဂျီ အီဝါဆာဝါ မှာ ထိုနေ့အထိ ICJ ဥက္ကဋ္ဌအဖြစ် တာဝန်ထမ်းဆောင်ရမည်ဖြစ်ပါသည်။

ယူဂျီ အီဝါဆာဝါသည် ၂၀၁၈ ခုနှစ်၊ ဇွန် ၂၂ ရက်မှစ၍ အပြည်ပြည် ဆိုင်ရာတရားရုံး၏ အဖွဲ့ဝင်အဖြစ် တာဝန်ထမ်းဆောင်ခဲ့သည်။ ယခင်က ၎င်းသည် တိုကျို တက္ကသိုလ်တွင် အပြည်ပြည်ဆိုင်ရာဥပဒေရေးရာ ပါမောက္ခအဖြစ် တာဝန်ထမ်းဆောင်ခဲ့ပြီး ကုလသမဂ္ဂ လူ့အခွင့်အရေးကော်မတီ၏ ဥက္ကဋ္ဌ အဖြစ် တာဝန်ထမ်းဆောင်ခဲ့ပါသည်။

ကိုးကား- TASS

Photo: armenpress.am

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ကမ္ဘာ့အထင်ရှားဆုံး သွေးလှူရှင်များထဲမှ တစ်ဦးဖြစ်သူ James Harrison သည် ၂၀၂၅ ခုနှစ်၊ ဖေဖော်ဝါရီလ ၁၇ ရက်နေ့တွင် ၎င်း၏ မိသားစုများနှင့်အတူ သြစတြေးလျနိုင်ငံ New South Wales ရှိ နေအိမ်တွင် အိပ်ပျော်နေစဉ်ကွယ်လွန်ခဲ့ပြီး ကွယ်လွန်ချိန်၌ အသက် ၈၈ နှစ်အရွယ် ရှိပြီဟု သိရှိရပါသည်။

သြစတြေးလျနိုင်ငံတွင် “ရွှေလက်မောင်းရှင်လူသား” အဖြစ် လူသိများခဲ့သော Harrison ၏ သွေးတွင် Anti-D ဟုခေါ်သော ရှားပါး ပဋိပစ္စည်း တစ်မျိုးပါဝင်ပြီး၊ ယင်းပဋိပစ္စည်းကို မိမိ၏ကိုယ်ဝန်ဆောင် ကလေးငယ်များကို ပြန်လည်တိုက်ခိုက်နိုင်သည့် သွေးရှိသော ကိုယ်ဝန်ဆောင်မိခင် များအား ထိုးနှံပေးသည့် ဆေးဝါးများပြုလုပ်ရာတွင် အသုံးပြုခဲ့သည်။

သြစတြေးလျ ကြက်ခြေနီသွေးဝန်ဆောင်မှုအဖွဲ့က Harrison သည် အသက် ၁၄ နှစ်အရွယ်တွင် ရင်ဘတ်၌ ခွဲစိတ်မှုအကြီးစားတစ်ခု ခံယူရစဉ်က သွေးသွင်းကုသမှုများ ခံယူခဲ့ရပြီးနောက် သွေးလှူရှင်ဖြစ်လာရန် ကတိပြုခဲ့ကြောင်း ပြောကြားခဲ့သည်။

Harrison သည် အသက် ၁၈ နှစ်အရွယ်တွင် သွေးလှူဒါန်းခြင်းကို စတင်ခဲ့ပြီး အသက် ၈၁ နှစ်အရွယ်အထိ နှစ်ပတ်တစ်ကြိမ် ဆက်လက်လှူဒါန်းခဲ့သည်။

၂၀၀၅ ခုနှစ်တွင် ၎င်းသည် အများဆုံးသွေးလှူဒါန်းသူအဖြစ် ကမ္ဘာ့စံချိန်တင်ခဲ့ပြီး၊ ၂၀၂၂ ခုနှစ်တွင် အမေရိကန်နိုင်ငံမှ ပုဂ္ဂိုလ်တစ်ဦးက ၎င်း၏ စံချိန်ထက်သာလွန်သွားချိန်အထိ ထိုဂုဏ်ပုဒ်ကို ပိုင်ဆိုင်ခဲ့သည်။

Harrison ၏သမီး Tracey Mellowship က သူမ၏ဖခင်သည် “မည်သည့် နာကျင်မှုမျှ မခံစားရဘဲ လူပေါင်းများစွာကို ကယ်တင်နိုင်ခဲ့သည်ကို ဂုဏ်ယူကြောင်း” ပြောကြားခဲ့သည်။

Mellowship နှင့် Harrison ၏မြေးနှစ်ဦးသည်လည်း Anti-D ကာကွယ် ဆေးထိုးနှံခံထားရသူများ ဖြစ်ကြသည်။

Anti-D ထိုးဆေးများသည် သန္ဓေသားနှင့် မွေးကင်းစကလေးငယ်များအား သွေးနီဥဆဲလ်များ ပျက်စီးခြင်းရောဂါ (HDFN) မှ ကာကွယ်ပေးပြီး ကိုယ်ဝန်ဆောင်စဉ်တွင် မိခင်နှင့်ကလေး၏ သွေးနီဥဆဲလ်များ မတည့် သည့်အခါ ထိုအခြေအနေဖြစ်ပေါ်လာသည်။

မိခင်၏ကိုယ်ခံအားစနစ်က ကလေး၏သွေးနီဥဆဲလ်များကို အန္တရာယ်တစ်ခုအဖြစ် မှတ်ယူပြီး ၎င်းတို့ကို တိုက်ခိုက်ရန် ပဋိပစ္စည်းများ ထုတ်လုပ်ခြင်းကြောင့် ကလေးငယ်အား ပြင်းထန်သော သွေးအားနည်းရောဂါ၊ နှလုံးပျက်စီးခြင်း သို့မဟုတ် သေဆုံးခြင်းအထိ ဖြစ်စေနိုင်သည် ဟု သိရှိရပါသည်။

ကိုးကား-BBC

နယူးယောက်၊ ယဉ်ကျေးမှု

အမေရိကန်ပြည်ထောင်စုတွင် အင်္ဂလိပ်ဘာသာအား နိုင်ငံ၏တရားဝင်ဘာသာစကားအဖြစ် သတ်မှတ်သည့်အမိန့်တစ်ရပ်ကို သမ္မတဒေါ်နယ်ထရမ့်က လက်မှတ်ရေးထိုးခဲ့ကြောင်းသိရသည်။

ထရမ့်သည် အဆိုပါအမိန့်ကို မတ်လ ၁ရက်တွင် လက်မှတ်ရေးထိုးခဲ့ခြင်းဖြစ်ပြီး အင်္ဂလိပ်ဘာသာစကားအား   နိုင်ငံ၏တရားဝင်ဘာသာစကားအဖြစ်သတ်မှတ်ခြင်းသည် အမေရိကန်နိုင်ငံ၏  သမိုင်းတစ်လျှောက် ပထမဆုံးအကြိမ်ဖြစ်လာခဲ့သည်။

ထရမ့်၏ အဆိုပါအမိန့်ကြေညာချက်သည် နိုင်ငံအတွင်း၌ စည်းလုံးညီညွတ်မှုကိုတိုးမြှင့်ရန်နှင့် လူမှုရေးလှုပ်ရှားမှုများတွင် ပါဝင်စေနိုင်ရေးအတွက် ရည်ရွယ်ခြင်းဖြစ်သည်။ ယခုလက်မှတ်ရေးထိုးလိုက်သည့် အမိန့်ကြေညာချက်သည် ယခင်သမ္မတဟောင်း   ဘီကလင်တန်၏    အင်္ဂလိပ်ဘာသာစကားကျွမ်းကျင်မှု နည်းပါးသူများအတွက် ဘာသာစကားဆိုင်ရာ အကူအညီပေးရန် အစိုးရအဖွဲ့အစည်းများအား ငွေကြေးထောက်ပံ့ပေးနေသည့် ကြေညာချက်ကို ပယ်ဖျက်သွားမည်ဖြစ်ကြောင်း သိရသည်။

အင်္ဂလိပ်ဘာသာစကားအား နိုင်ငံ၏တရားဝင်ဘာသာစကားအဖြစ် သတ်မှတ်ခြင်းသည် ဆက်သွယ်ရေးကို လွယ်ကူစေသည့်အပြင် အမေရိကန်၏မျှဝေထားသည့်တန်ဖိုးများကိုတိုးမြှင့်ပေးနိုင်ပြီး ပိုမိုစည်းလုံးညီညွတ်မှုရှိပြီး စွမ်းဆောင်ရည်ရှိသော လူ့အဖွဲ့အစည်းတစ်ရပ်ကို ဖန်တီးပေးနိုင်မည်ဖြစ်ကြောင်း ကြေညာချက်တွင်ဖော်ပြထားသည်။

အမေရိကန်တွင် ယခင်အစိုးရအဖွဲ့များသည် အင်္ဂလိပ်ဘာသာစကားအား နိုင်ငံ၏တရားဝင်ဘာသာစကားအဖြစ် သတ်မှတ်နိုင်ရန်ကြိုးပမ်းခဲ့ကြသော်လည်း အောင်မြင်ခဲ့ခြင်းမရှိပေ။ အစိုးရ၏ တရားဝင်ထုတ်ပြန်ချက်များအရ အမေရိကန်ပြည်ထောင်စုတွင် ဘာသာစကားပေါင်း ၃၅၀ ကျော်ကို ပြောဆိုလျက်ရှိကြောင်းသိရသည်။

Source: https://myawady.net.mm/

နိုင်ငံ၏စွမ်းအင်လိုအပ်ချက်ကို နှစ်ပေါင်း ၆ သောင်းကျော်ဖြည့်ဆည်းပေးနိုင်မည့် သုံး၍မကုန်နိုင်သည့် စွမ်းအင် အရင်းအမြစ်ကို ရှာဖွေတွေ့ရှိထားကြောင်း တရုတ်ဘူမိဗေဒပညာရှင်များ၏ ပြောကြားချက်အရ သိရှိရပါသည်။

တရုတ်နိုင်ငံ၏စွမ်းအင်လိုအပ်ချက်ကို ဖြည့်ဆည်းပေးနိုင်မည့် သုံး၍မကုန်နိုင်လောက်အောင် များပြားသည့် ရေဒီယိုသတ္တိကြွသတ္တုဒြပ်စင်တစ်မျိုးဖြစ်သည့် သိုရီယမ်သတ္တု (Thorium) ကို မွန်ဂိုလီးယားနိုင်ငံရှိ Bayan Obo သတ္တုတွင်း၌ ရှာဖွေတွေ့ရှိခဲ့ကြောင်း မကြာသေးမီက လေ့လာချက်တစ်ခုအရ သိရှိရပါသည်။

Molten salt အမျိုးအစား နျူကလီးယား ဓာတ်ပေါင်းဖိုများတွင် အနည်းငယ်မျှသာ ရေဒီယိုသတ္တိကြွမှုရှိသော သိုရီယမ်သတ္တုကို အသုံးပြု၍ လျှပ်စစ်ဓာတ်အားကို ထုတ်လုပ်နိုင်သည်။

အဆိုပါ Bayan Obo သတ္တုတွင်းမှ သိုရီယမ်သတ္တုတန်ချိန် ၁ သန်းခန့် ထုတ်လုပ်နိုင်မည် ဖြစ်ကြောင်း မကြာမီက တရားဝင်ထုတ်ပြန်ခဲ့သည့် လေ့လာချက်ကို ကိုးကား၍ South China Morning Post သတင်းဌာနက ရေးသား ဖော်ပြခဲ့ပါသည်။

လက်ရှိတွင် အဆိုပါ သိုရီယမ်များသည် သတ္တုတူးဖော်ခြင်းလုပ်ငန်း၏ စွန့်ပစ်ပစ္စည်းများနှင့် ရောထွေးလျက်ရှိပြီး ထုတ်ယူရခြင်းမရှိသေးကြောင်း၊ နည်းမှန်လမ်းမှန်ဖြင့် ထုတ်ယူသုံးစွဲမည်ဆိုပါက ကမ္ဘာကြီး၏ ရုပ်ကြွင်းလောင်စာ အပေါ် မှီခိုအားထားနေရမှုကို အဆုံးသတ်နိုင်လောက်သည်အထိ လုံလောက်မှု ရှိနိုင်သည်ဟု လေ့လာမှုက ဖော်ပြ ထားပါသည်။

ကိုးကား- Tagtik.co.uk          

ဘာသာပြန်ဆိုသူ-ဦးထက်ထက်အောင်၊နစက-၄

ရုရှားနှင့် အမေရိကန်ပြည်ထောင်စုတို့ကြား လေကြောင်းတိုက်ရိုက် ပျံသန်းရေးကို ပြန်လည်စတင်ရန် ရုရှားနိုင်ငံက အဆိုပြုခဲ့ကြောင်း သိရသည်။

နှစ်နိုင်ငံကြား လေကြောင်းတိုက်ရိုက်ပျံသန်းမှုကို ပြန်လည်စတင်ရန် ရုရှားနှင့် အမေရိကန်အရာရှိများကြား တူကီယဲနိုင်ငံ အစ္စတန်ဘူမြို့ရှိ အမေရိကန် ကောင်စစ်ဝန်ချုပ်ရုံး၌ ဖေဖော်ဝါရီလ ၂၇ ရက်က ကျင်းပသည့် တွေ့ဆုံဆွေးနွေးပွဲ၌ ရုရှားအရာရှိများက အဆိုပြုလိုက်ခြင်းဖြစ်သည်။

နှစ်နိုင်ငံကြား လေကြောင်းပျံသန်းမှုကို ပြန်လည်စတင်ရန် ရုရှားက အဆိုပြုခဲ့ခြင်းသည်  ရုရှားနှင့် အမေရိကန်တို့ကြား ဆက်ဆံရေး  ပုံမှန်ပြန်ဖြစ်ရေးအတွက် ကြိုးပမ်းနေစဉ် ထွက်ပေါ်လာခြင်းဖြစ်သည်။

အမေရိကန်အစိုးရသည် ၂၀၂၂ ခုနှစ်မှစ၍ ၎င်းတို့၏လေကြောင်းလိုင်းများအား ရုရှားနိုင်ငံသို့ပျံသန်းခြင်းကို   ရပ်ဆိုင်း၍ နိုင်ငံ၏ဝေဟင်ပိုင်နက်ကိုလည်း   ရုရှားလေကြောင်းလိုင်းများအား အသုံးပြုခွင့် ရပ်စဲခဲ့သည်။

အမေရိကန်အစိုးရ၏ လုပ်ဆောင်ချက်ကို တုံ့ပြန်သည့်အနေဖြင့် ရုရှားနိုင်ငံကလည်း   ဥရောပသမဂ္ဂနိုင်ငံများနှင့် ကနေဒါတို့အပါအဝင် မိတ်ဆွေမဟုတ်သည့် နိုင်ငံပေါင်း ၃၆ နိုင်ငံမှ လေကြောင်းလိုင်းများအပေါ် ပိတ်ဆို့ခဲ့ကြောင်း သိရသည်။

ရုရှားနိုင်ငံ၏ အဆိုပါတားမြစ်ပိတ်ပင်မှုကြောင့် ဥရောပရှိ အချို့နိုင်ငံများသည် ၎င်းတို့၏ လေကြောင်းလိုင်းများအား ပျံသန်းရာတွင် ရုရှား ဝေဟင်ပိုင်နက်ကို ရှောင်ရှား၍ သွားလာရခြင်းကြောင့် လောင်စာဆီပိုမိုသုံးစွဲရပြီး ကုန်ကျစရိတ်ကို ပိုမိုမြင့်မားစေခဲ့ကြောင်း သိရသည်။

Source: https://myawady.net.mm/

တရုတ်က ဟိုင်နန်ပြည်နယ်၊ Lingshui ၌ အဆင့်မြင့် ရေအောက် ကွန်ပျူတာစင်တာကို တည်ဆောက်ခဲ့ပြီး ၁၈ မီတာ ရှည်လျားသော ဒေတာစင်တာတွင် စွမ်းရည်မြင့် ဆာဗာ ၄၀၀ ကျော် ထည့်သွင်းထားကြောင်း သိရှိရသည်။ 

ရေအောက်ကြမ်းပြင်၌ တည်ဆောက်ထားပြီး အနီးအနားမှ ကမ်းရိုးတန်း Station များကို အသုံးပြုကာ Client Data Terminals များနှင့် ဆက်သွယ်ထားသည်ဟု သိရှိရပါသည်။ 

ကွန်ပျူတာတွက်ချက်မှု စွမ်းအားသည် အရည်အသွေးမြင့် Gaming PC အလုံးရေ ၃၀,၀၀၀ နှင့် ညီမျှပြီး တစ်စက္ကန့်တွင် AI Assistant Chats ပေါင်း ၇,၀၀၀ ကို စီမံခန့်ခွဲနိုင်သည်ဟု ဆိုသည်။ 

ယင်းကွန်ပျူတာစင်တာကို ပင်လယ်ရေအောက်၌ တည်ဆောက်ထားသည့်အတွက် သဘာဝအလျောက် အေးမြနေစေမည်ဖြစ်ပြီး လျှပ်စစ်စွမ်းအင် သုံးစွဲမှုကို လျှော့ချပေးနိုင်ကာ လုံခြုံရေးနှင့်တည်ငြိမ်ရေးကို တိုးတက်စေမည်ဖြစ်ကြောင်း သိရှိရပါသည်။

ကိုးကား- e-Gov Group

အာဖရိကဒေသရှိ နိုင်ငံတစ်နိုင်ငံဖြစ်သည့် ကင်ညာနိုင်ငံတွင် စားရေရိက္ခာဖူလုံမှု မရှိသူအရေအတွက်သည် ယခုအခါ ၂ ဒသမ ၁၅  သန်းအထိမြင့်တက်လာပြီဖြစ်ကြောင်း အမျိုးသားမိုးခေါင်ရေရှားမှု စီမံခန့်ခွဲရေးအဖွဲ့ (NDMA) က ထုတ်ပြန်ထားသည်။

နိုင်ငံအတွင်း၌ သာမန်ထက်မိုးရွာသွန်းမှု နည်းပါးခြင်း၊ ပြီးခဲ့သည့် စိုက်ပျိုးရာသီမှ ထိန်းသိမ်းထားသည့် သီးနှံမျိုးစေ့များ နည်းပါးခြင်းတို့ကြောင့် စားရေရိက္ခာဖူလုံမှုတွင်    ကွာဟချက်များဖြစ်ပွားခဲ့ရပြီး အာဟာရချို့တဲ့မှုများကို ဖြစ်ပေါ်လာစေကြောင်း NDMA က ဖေဖော်ဝါရီလ ၂၈ ရက်တွင် ပြောသည်။

စားရေရိက္ခာဖူလုံမှုမရှိသည့် အခြေအနေများသည် ယခုနှစ် မတ်လနှင့် မေလတို့တွင်   ပိုမိုဆိုးရွားလာနိုင်သည်ဟု ခန့်မှန်းရပြီး နိုင်ငံအတွင်းရှိ ခန့်မှန်းခြေအရ လူဦးရေ  ၂ ဒသမ ၈  သန်းခန့်သည်ဆိုးရွားသည့်  အစားအစာလိုအပ်မှုနှင့် ကြုံတွေ့လာနိုင်သည်ဟု NDMA က ထုတ်ပြန်သည့် အစီရင်ခံစာတစ်စောင်တွင် ဖော်ပြထားသည်။

ထို့ပြင် နိုင်ငံအတွင်း၌ မိုးရွာသွန်းမှုလျော့ကျခြင်းကြောင့်   တိရစ္ဆာန်များအတွက်   စားကျက်မြေရှားပါးခြင်းနှင့် စားကျက်မြေအတွက် ပိုမိုဝေးကွာသည့် ဒေသများသို့ တိရစ္ဆာန်များကိုခေါ်ဆောင် သွားရခြင်းတို့ကြောင့် အသားထုတ်လုပ်မှုကိုပါ လျော့ကျလာစေလျက်ရှိသည်။

အလားတူပင် ကင်ညာနိုင်ငံ၏ နွားနို့ထုတ်လုပ်မှုမှာ  ၂၅ ရာခိုင်နှုန်းမှ ၅၀ ရာခိုင်နှုန်းအထိ လျော့ကျလာခြင်းကြောင့် နိုင်ငံအနောက်မြောက်ပိုင်း ဒေသများတွင် နွားနို့ဈေးနှုန်းမှာ ပိုမိုမြင့်တက်လာလျက် ရှိသည်။ 

Source: Myawady Web Portal