ရုရှားက အမေရိကန်နှင့်ချုပ်ဆိုထားသည့် နျူကလီးယားထိန်းချုပ်ရေး စာချုပ်မှ နှုတ်ထွက်မည်ဟု ဆို

ရုရှားနိုင်ငံခြားရေးဝန်ကြီးဌာနက ၁၉၈၇ ခုနှစ်က အမေရိကန်နှင့် ချုပ်ဆို ခဲ့သော Intermediate-Range Nuclear Forces (INF) ကို ထိန်းသိမ်းရန် အခြေအနေများသည် ပျောက်ဆုံးသွားပြီဖြစ်ကာ မော်စကိုသည် ယခု အခါ ၎င်းစာချုပ်နှင့် သက်ဆိုင်ခြင်းမရှိတော့ကြောင်း ယုံကြည်သည်ဟု ထုတ်ပြန်ခဲ့သည်။

INF စာချုပ်သည် ကမ္ဘာမြေမှ လွှတ်တင်သည့် ကီလိုမီတာ ငါးရာမှ ငါးထောင့်ငါးရာ အကွာအဝေးအထိ ဒုံးကျည်များကို တားမြစ်ထားသော်လည်း၊ ၂၀၁၉ ခုနှစ်တွင် အမေရိကန်က ရုရှား၏ စာချုပ်ဖောက်ဖျက်မှုများကို ညွှန်းဆိုကာ စာချုပ်မှနုတ်ထွက်ခဲ့ပြီးနောက် ပျက်ပြယ်ခဲ့သည်။ ရုရှား ဘက်မှ အဆိုပါအချက်ကိုငြင်းဆိုခဲ့ပြီး အမေရိကန်ကိုယ်တိုင် တားမြစ် ထားသော ဒုံးကျည်များ ထုတ်လုပ်နေသည်ဟု စွပ်စွဲခဲ့သည်။ ရုရှားသမ္မတ ဗလာဒီမာ ပူတင်က INF စာချုပ်ပျက်ပြယ်ခြင်းသည် ကမ္ဘာ့လုံခြုံရေး အခြေခံ အုတ်မြစ်ကို ကြီးမားစွာ ထိခိုက်စေမည်ဟု သတိပေးခဲ့သည်။

"ရုရှားနိုင်ငံခြားရေးဝန်ကြီးဌာနသည် အလားတူလက်နက်များ တပ်ဆင်ခြင်း အား တစ်ဖက်သတ်ဆိုင်းငံ့ထားမှုကို ဆက်လက်ထိန်းသိမ်းရန် အခြေအနေ များ မရှိတော့ကြောင်း သတိပြုမိပြီး၊ ရုရှားသည် ယခင်က မိမိဘာသာ ချမှတ်ထားသော ကန့်သတ်ချက်များနှင့် ပတ်သက်၍ လိုက်နာရန် တာဝန် မရှိတော့ကြောင်း တရားဝင်ထုတ်ပြန်နိုင်သည်ဟု" ထုတ်ပြန်ချက်တွင် ဖော်ပြထားသည်။

"အနောက်နိုင်ငံများ၏ လုပ်ရပ်များသည် ရုရှား၏လုံခြုံရေးအတွက် တိုက်ရိုက်ခြိမ်းခြောက်မှု တစ်ရပ်ကို ဖန်တီးနေသည်" ဟု ဝန်ကြီးဌာနက ပြောကြားခဲ့သည်။ ထို့အပြင် ယခုနှစ်အတွင်း အမေရိကန်က Typhon ဒုံးလွှတ်တင်ရေးစနစ် ကို ဖိလစ်ပိုင်နိုင်ငံတွင် တပ်ဆင်ခဲ့ကြောင်း၊ဩစတြေးလျနိုင်ငံရှိ "Talisman Sabre" စစ်ရေးလေ့ကျင့်မှုတွင် အမေရိကန် တပ်မတော်က Typhon စနစ်ဖြင့် ဒုံးကျည်များ စမ်းသပ် ပစ်လွှတ် ခဲ့ကြောင်း ထုတ်ပြန်ချက်တွင် ဖော်ပြထားသည်။

Typhon စနစ်သည် အကွာအဝေး ၁,၈၀၀ ကီလိုမီတာအထိ ပစ်လွှတ် တိုက်ခိုက်နိုင်သောTomahawk ခရူးဇ်ဒုံးကျည်နှင့် အကွာအဝေး ၅၀၀ ကီလိုမီတာအထိ ပစ်လွှတ်တိုက်ခိုက်နိုင်သော SM-6 ဘက်စုံသုံး ဒုံးကျည် တို့ကို မြေပြင်မှ ပစ်လွှတ်နိုင်သော စနစ်ဖြစ်သည်။

ထို့အပြင် ဩစတြေးလျတပ်မတော်သည် ၂၀၂၃ ခုနှစ် ဇူလိုင်လတွင် အမေရိကန်ထုတ် Precision Strike Missile (PrSM) ကို ပထမဆုံး အကြိမ် စမ်းသပ်ပစ်လွှတ်ခဲ့ကြောင်း ရုရှားနိုင်ငံခြားရေးဝန်ကြီးဌာနက သတိပြုမိခဲ့သည်။ PrSM ဒုံးကျည်၏ အများဆုံးထိရောက်နိုင်သည့် အကွာအဝေးသည် ၅၀၀ ကီလိုမီတာထက် ကျော်လွန်ပြီး၊ ဩစတြေးလျ ကာကွယ်ရေးဝန်ကြီးဌာနက ၎င်းသည် "ဩစတြေးလျ၏ ကုန်းတွင်းပိုင်း နှင့်ပင်လယ်ပြင်တိုက်ခိုက်ရေးစွမ်းရည်ကို မြှင့်တင်ရာတွင် အဓိက အရေးပါသော လက်နက်" ဖြစ်သည်ဟု ဆိုသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂