ဩစတြေးလျ နိုင်ငံသားများအား ဓားမြှောင်/ ရှည်များ ကိုင်ဆောင်ခြင်း မပြုရန်နှင့် လိုက်နာခြင်းမရှိပါက ထောင်ဒဏ်ကျခံရမည်ဟု အမိန့် ထုတ်ပြန်

ဗစ်တိုးရီးယားပြည်နယ်တွင် လက်နက်ပိတ်ပင်မှုဥပဒေသစ်အရ ဩစတြေးလျနိုင်ငံသားများအား ဓားမြှောင်/ ရှည် များအပ်နှံရန် အမိန့် ထုတ်ပြန်ထားပြီး မလိုက်နာပါက ထောင်ဒဏ် နှစ်နှစ်အထိနှင့် ဒေါ်လာ ၃၀,၀၀၀ ကျော် ဒဏ်ငွေချမှတ်နိုင်ကြောင်း သိရသည်။ အကြမ်းဖက်မှုများ မြင့်တက်လာမှုကို ထိန်းချုပ်ရန် ပြည်နယ်အစိုးရက အဆိုပါ ကြိုးပမ်းမှု ကို အကောင်အထည်ဖော်ခဲ့ခြင်းဖြစ်သည်။ 

ဗစ်တိုးရီးယားပြည်နယ်က ဓားမြှောင်/ ရှည်များ လက်ဝယ်ပိုင်ဆိုင်ခြင်း၊ ရောင်းဝယ်ခြင်းနှင့် အသုံးပြုခြင်းကို စက်တင်ဘာ ၁ ရက်မှစ၍ အပြည့်အဝ တားမြစ်ကြောင်း ကြေညာခဲ့သည်။ နိုင်ငံသားများအနေဖြင့် ထိုစည်းမျဉ်း ကို လိုက်နာရန် သုံးလကြာ ကင်းလွတ်ချိန်ပေးထားပြီး နိုဝင်ဘာ ၃၀ နောက်ပိုင်းတွင် ဓားမြှောင်/ ရှည်များ လက်ဝယ်ထားရှိပါက ခြွင်းချက်မရှိ ရာဇဝတ်မှုမြောက်ကြောင်း အရာရှိများက သတိပေးထားသည်။

ကြာသပတေးနေ့ (ဩဂုတ် ၈) ထုတ်ပြန်ချက်တွင် ဝန်ကြီးချုပ် Jacinta Allan နှင့် ရဲဌာနဝန်ကြီး Anthony Carbines တို့က ဗစ်တိုးရီးယား တစ်ဝှမ်းရှိ ရဲစခန်းများအပါအဝင် အကြမ်းဖက်မှုမြင့်မားသော ဒေသများ တွင် ဓားမြှောင်/ရှည်များ စွန့်ပစ်ရန် အမှိုက်ပုံး ၄၀ ကျော် ချပေး ထားကြောင်း ပြောကြားခဲ့သည်။

လယ်ယာလုပ်သားများနှင့် ရိုးရာယဉ်ကျေးမှုဆိုင်ရာ အသုံးပြုမှုအတွက် ဓားများကို လက်ဝယ်ကိုင်ဆောင်ထားရှိသူများသည် ဆက်လက် သိမ်းဆည်း ခွင့် ရှိသော်လည်း လိုအပ်ပါက ရဲအဖွဲ့အား အထောက်အထား ပြရမည် ဖြစ်သည်။

အဆိုပါကန့်သတ်ချက်သစ်များသည် ဂိုဏ်းဂဏများနှင့်ဆက်စပ်နေသော လူငယ်မှုခင်းများ တိုးပွားလာမှုကြောင့် ထွက်ပေါ်လာခြင်းဖြစ်သည်။ ဗစ်တိုးရီးယားရဲတပ်ဖွဲ့၏ ထုတ်ပြန်ချက်အရ ၂၀၂၅ ခုနှစ်အတွင်း တစ်နေ့ လျှင် ဓားမြှောင်စသည့် တရားမဝင်လက်နက်ပေါင်း ပျမ်းမျှ ၄၄ ခုကို သိမ်းဆည်းခဲ့ရသည်။ အစိုးရ၏ စာရင်းများအရ ဈေးဝယ်စင်တာများတွင် တိုက်ခိုက်မှုများသည် ၂၀၁၄ ခုနှစ်နှင့် နှိုင်းယှဉ်လျှင် ၁၆၁% အထိ တိုးမြင့် လာခဲ့ကြောင်း သိရသည်။ အသက် ၁၀ နှစ်မှ ၁၇ နှစ်အတွင်း လူငယ် များသည် စုစုပေါင်း မှုခင်းကျူးလွန်သူများ၏ ၁၃% ရှိနေပြီး၊ လုယက်မှု များ၏ ၆၃%၊ ဖောက်ထွင်းမှုများ၏ ၄၆% နှင့် ကားခိုးမှုအားလုံး၏ လေးပုံ တစ်ပုံကျော်တွင် ပါဝင်နေကြောင်း သိရသည်။

အဆိုပါမူဝါဒသစ်သည် အချို့သောသူများ၏ လှောင်ပြောင်မှုနှင့် ဝေဖန်မှု များကို ရင်ဆိုင်နေရပြီး ဓားများကို အမှိုက်ပုံးများအတွင်း စွန့်ပစ်ရုံမျှဖြင့် အမိန့်၏ထိရောက်မှုကို သံသယရှိကြနေသည်။ လူမှုမီဒီယာ အသုံးပြုသူများ က အစိုးရသည် ရာဇဝတ်မှုတိုးပွားရခြင်း၏ အခြေခံအကြောင်းရင်းများ ဖြစ်သည့် လူဝင်မှုထိန်းချုပ်ရေး ပြဿနာနှင့် မဲလ်ဘုန်းမြို့တွင် လက်နက် ကိုင်အာဖရိကန်လူငယ်ဂိုဏ်းများ၏ လှုပ်ရှားမှုကဲ့သို့သော အမှုများကို ရှောင်ရှားနေသည်ဟု ဝေဖန်ခဲ့ကြသည်။ ဗစ်တိုးရီးယား ဝန်ကြီးချုပ် Allan မှ ပြည်နယ်၏ လူမျိုးစုံလင်ကွဲပြားမှုနှင့် ယဉ်ကျေးမှု ပေါင်းစုံတည်ရှိနေမှု အား ထပ်လောင်းချီးကျူးခဲ့သည်။

အလားတူပင် နင်ဂျာဓားရှည်များကို ယူကေတွင် မကြာသေးမီက တားမြစ်ခဲ့ပြီး ထိန်းချုပ်နိုင်ခြင်းမရှိသော လူဝင်မှုပြဿနာကဲ့သို့ ဓားကိုင် အကြမ်းဖက်မှု တိုးပွားရသည့် အရင်းခံအကြောင်းရင်းများကို မကိုင်တွယ် နိုင်မှုအတွက် ဝေဖန်မှုများ ရင်ဆိုင်ခဲ့ရသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂