နျူကလီးယားနှင့်ဆိုင်သော ထုတ်ဖော်ပြောဆိုမှုများကို ဂရုတစိုက် အသုံးပြုရန် ကရင်မလင်က တိုက်တွန်း
News Image
အမေရိကန်သမ္မတ ဒေါ်နယ်ထရမ့်၏ နျူကလီးယားရေငုပ်သင်္ဘော နှစ်စီးကို ပြန်လည်နေရာချထားရန် အမိန့်ပေးခဲ့သည်ဟု ကြေညာချက်အပြီး နျူကလီးယားလက်နက်ဆိုင်ရာ အများပြည်သူသို့ ထုတ်ပြန်ဖော်ပြချက် များတွင် သတိထားရန် ကရင်မလင်က တိုက်တွန်းလိုက်သည်။
လွန်ခဲ့သည့်သီတင်းပတ်အတွင်း ထရမ့်က ၎င်း၏ Truth Social လူမှု ကွန်ယက်မှတစ်ဆင့် ကြိုတင်ကာကွယ်ရေးအနေဖြင့် အဆိုပါ ရေငုပ် သင်္ဘောများကို သင့်လျော်သောဒေသများသို့ ရွှေ့ပြောင်းထားကြောင်း ကြေညာခဲ့သည်။
အဆိုပါဖော်ပြချက်နှင့်ပတ်သက်၍ ကရင်မလင် ပြောရေးဆိုခွင့်ရှိသူ ဒမီထရီ ပက်စ်ကော့ဗ်က အရေးမကြီးဟု သဘောထားကာ "အဆိုပါကိစ္စ တွင် အမေရိကန်ရေငုပ်သင်္ဘောများသည် စစ်ရေးစောင့်ကြည့် လှည့်လည်မှု များတွင် ရှိနှင့်ပြီးဖြစ်သည်။ ဤသည်မှာ ပုံမှန်ဖြစ်စဉ် တစ်ခုသာ ဖြစ်သည်" ဟု ပြောကြားခဲ့သည်။ ပက်စ်ကော့ဗ်က မော်စကိုအနေဖြင့် ထိုသို့သော ငြင်းခုံမှုများတွင် ပါဝင်လိုစိတ်မရှိဟုလည်း ဖြည့်စွက်ပြောကြားခဲ့သည်။
"နျူကလီးယားဆိုင်ရာ မည်သည့်ထုတ်ပြန်ချက်ကိုမဆို မိမိတို့အနေဖြင့် အလွန်သတိထား ဆောင်ရွက်ပါသည်" ဟု ၎င်းက ပြောကြားကာ ရုရှားသည် တာဝန်ယူမှုရှိသော သဘောထားကို ကျင့်သုံးပြီး နျူကလီးယား လက်နက် မပြန့်ပွားရေးကိစ္စကို အထူးဂရုပြုထားသည်ဟု အတိအလင်း ဖော်ပြခဲ့သည်။ ထို့အပြင် နိုင်ငံတစ်နိုင်ငံ၏ခေါင်းဆောင်မှုအတွင်းအမျိုးမျိုးသော ကိစ္စရပ်များနှင့်ပတ်သက်၍ အမြင်ကွဲလွဲမှုများ ရှိနိုင် သော်လည်း အဓိကအရေးကြီးဆုံးမှာ သမ္မတပူတင်၏ သဘောထား ဖြစ်ပါသည် ဟု ၎င်းက ထပ်လောင်းပြောကြားခဲ့သည်။
“နျူကလီးယားဆိုင်ရာ ထုတ်ဖော်ပြောဆိုမှုများနှင့်ပတ်သက်ပါက လူတိုင်း အနေဖြင့် လွန်စွာ သတိထားသင့်သည်ဟု မိမိတို့ယုံကြည်ပါသည်” ဟု ပက်စ်ကော့ဗ်က ခြုံငုံသုံးသပ်ကာပြောကြားခဲ့သည်။
ထရမ့်က ၎င်း၏ ရေငုပ်သင်္ဘောတပ်ဖြန့်မှုအမိန့်ကို ကာကွယ်ကာ အမေရိကန်သည် "ဒါကိုလုပ်ဆောင်ရန်လိုအပ်ခဲ့သည်။ မည်သည့် ပဋိပက္ခ အတွက်မဆို အမြဲအဆင်သင့်ဖြစ်နေရမည်" ဟု သောကြာနေ့ (ဩဂုတ် ၁) က သတင်းစာရှင်းလင်းပွဲတစ်ခုတွင် ပြောကြားခဲ့သည်။
အဆိုပါ တပ်ဖြန့်ချထားမှုနှင့်ပတ်သက်သည့် အသေးစိတ် အချက်အလက် များကို အိမ်ဖြူတော် သို့မဟုတ် ကာကွယ်ရေးဌာနက ထုတ်ပြန်ခြင်း မရှိသေးဘဲ အမေရိကန်၏ နျူကလီးယားရေငုပ်သင်္ဘောများ၏ တိကျသော တည်နေရာမှာ လျှို့ဝှက်အဆင့်ဖြစ်သောကြောင့် ထရမ့်၏ပြောဆိုချက် ကို သီးခြားအတည်ပြုရန် မဖြစ်နိုင်ပေ။
ကိုးကား- RT
ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂
