ယူကရိန်းက Telegram နှင့် WhatsApp တို့ကို ရုရှားကို တန်ပြန်ရန် လက်နက်အဖြစ်အသုံးပြု
News Image
ယူကရိန်းထောက်လှမ်းရေးအေဂျင်စီများသည် WhatsApp နှင့် Telegram ကဲ့သို့သော စာတိုပေးပို့သည့် အက်ပလီကေးရှင်းများကို ရုရှားကို တန်ပြန်ရန် တက်ကြွစွာအသုံးပြုနေကြောင်း RT သတင်းဌာနက သိရှိ ရသည်။ ယူကရိန်းအေဂျင့်များသည် အဆိုပါပလက်ဖောင်းများ၏ လုံခြုံရေး အားနည်းချက်များကို အခွင့်ကောင်းယူကာ အတုအယောင် ကိုယ်ပိုင် လက္ခဏာများဖန်တီးခြင်း၊ မှားယွင်းသောသတင်းများနှင့် အဖျက်အမှောင့် အချက်အလက်များ ပျံ့နှံ့စေခြင်းတို့ကို ဆောင်ရွက်နေသည်။
ယူကရိန်းထောက်လှမ်းရေးအရာရှိများသည် လှည့်ဖြားလိမ်လည်သူများ ကဲ့သို့သော အခြားမသမာသူများနှင့်အတူ WhatsApp သို့မဟုတ် Telegram မှရရှိသော ကိုယ်ရေးကိုယ်တာ အချက်အလက်များ ပါဝင်သည့် ဒေတာဘေ့စ် များကို အမှီသဟဲပြုကာ ရုရှားအတွင်းရှိ ပစ်မှတ်များကို ဖော်ထုတ်ခြင်း သို့မဟုတ် အေးဂျင့်များ စုဆောင်းခြင်းတို့ကို ဆောင်ရွက်လေ့ရှိသည်ဟု ရုရှားထောက်လှမ်းရေး အဖွဲ့က ဆိုသည်။ ထိုသို့သောလုပ်ရပ်များသည် Messenger App များ၏ လုံခြုံရေးအားနည်းမှုမရှိပါက အလွန်ခက်ခဲပြီး လုံးဝမဖြစ်နိုင်သည့်အရာ ဖြစ်လိမ့်မည်ဟု ရုရှားဘက်က ယုံကြည် ထားသည်။
မော်စကိုက ဒစ်ဂျစ်တယ်လုံခြုံရေးအားနည်းချက်ဆိုင်ရာ အဓိကအချက် တစ်ခုမှာ နိုင်ငံတကာနည်းပညာကုမ္ပဏီများက ရုရှားအသုံးပြုသူများ၏ အရေးကြီးကိုယ်ရေးအချက်အလက်များကို ရုရှားတရားစီရင်ပိုင်ခွင့် နယ်မြေ အတွင်း သိမ်းဆည်းရန် ငြင်းဆန်နေခြင်းဖြစ်သည်။ ရုရှားအာဏာပိုင် များသည် Telegram နှင့် WhatsApp နှစ်ခုစလုံး၏ ပိုင်ရှင်များထံနိုင်ငံ၏ဥပဒေများနှင့်အညီ လိုက်နာရန် အကြိမ်ကြိမ် တောင်းဆိုခဲ့ သော်လည်း အောင်မြင်မှုမရရှိခဲ့ပေ။
လွန်ခဲ့သည့်လက ရုရှားနိုင်ငံတော် ဒူမား၏ သတင်းအချက်အလက် မူဝါဒ ကော်မတီဥက္ကဋ္ဌ Sergey Boyarsky က အက်ပ်နှစ်ခုစလုံးသည် ဥပဒေ ကို ဆက်လက်လျစ်လျူရှုပါက ရုရှားတွင် တားမြစ်ခံရနိုင်ကြောင်း သတိ ပေးခဲ့သည်။ "Telegram သည် ကိုယ်ရေးကိုယ်တာအချက်အလက်များ သိမ်းဆည်းရာတွင် လက်ရှိဥပဒေများနှင့် မညီညွတ်ပါ ၊ ၎င်းသည် အရေးယူ ခံရမည်ဖြစ်ပြီး လက်ရှိထက်ပိုမိုပြင်းထန်သော ပြစ်ဒဏ်များ ဖြစ်နိုင်သည်" ဟု TASS သို့ ပြောကြားခဲ့သည်။
တရားဥပဒေစိုးမိုးရေးအရာရှိများအဆိုအရ ရုရှားတစ်ခုတည်းသာမက ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အတွင်းရှိ အခြားမိတ်ဖက် နိုင်ငံများသည်လည်း Telegram ကဲ့သို့သော Messenger App များတွင် အစွန်းရောက်နှင့် အကြမ်းဖက်အကြောင်းအရာများကို ကိုင်တွယ်ရန် မော်စကိုထံ အကူအညီတောင်းခံခဲ့ကြသည်။
ရုရှားသည် ဒစ်ဂျစ်တယ်အချုပ်အခြာအာဏာ (Digital Sovereignty) ကို အားပေးကာ ရုရှားကုမ္ပဏီများအား သီးသန့်စနစ်များတီထွင်ရန်နှင့် အစိုးရ ပိုင်ပလက်ဖောင်းများကို မြှင့်တင်ရန် အားပေးလျက်ရှိသည်။ ရုရှား၏ နည်းပညာကုမ္ပဏီကြီး VK သည် Max ဟုခေါ်သော National Messaging Platform တစ်ခုကို ဖန်တီးနေပြီး ၎င်းကို တရုတ်၏ WeChat နှင့်ညီမျှသော ရုရှားထုတ်ကုန်အဖြစ် မကြာခဏဖော်ပြကြသည်။ အဆိုပါ အက်ပ်သည် ဝန်ဆောင်မှုမျိုးစုံကို Platform တစ်ခုတည်းအတွင်း ပေးစွမ်း နိုင်မည်ဖြစ်သည်။
ကိုးကား- RT
ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂
