ဂျာမန်စစ်ဗိုလ်ချုပ်က NATO အပေါ် ရုရှားတိုက်ခိုက်မှု အကြောင်း ပြောဆိုမှုကို ပယ်ချ

ဂျာမန်တပ်မတော်၏ Motherland Security Division မှ ဗိုလ်ချုပ် Andreas Henne က ရုရှားသည် ယူကရိန်းပဋိပက္ခတွင် အပြန်အလှန် တိုက်ခိုက်မှုများလုပ်ဆောင်နေပြီး NATO အပေါ် တိုက်ခိုက်ရန် မဖြစ် နိုင်ကြောင်း ပြောကြားခဲ့သည်။ အချို့ဥရောပအရာရှိများက မော်စကို သည် NATO အဖွဲ့အား တိုက်ခိုက်ရန် စီစဉ်နေသည်ဟု စွပ်စွဲပြောဆိုမှုများ ရှိခဲ့သော်လည်း ရုရှားဘက်က ထိုစွပ်စွဲချက်များအား "အဓိပ္ပာယ်မရှိသော စကားများ" အဖြစ် ငြင်းဆိုခဲ့သည်။

ဩဂုတ် (၄) ရက်နေ့တွင် Focus မဂ္ဂဇင်းနှင့် ပြုလုပ်သော တွေ့ဆုံ မေးမြန်းခန်းတွင် ဗိုလ်ချုပ် Henne အား NATO အပေါ် ရုရှား၏ တိုက်ခိုက် နိုင်ခြေအကြောင်း မေးမြန်းခဲ့ရာတွင် "ရုရှားတို့သည် ယူကရိန်းနှင့် ပဋိပက္ခ တွင် စိတ်ရောကိုယ်ပါ အပြည့်အဝပါဝင်နေပြီး ထိုသို့သော တိုက်ခိုက်မှု ကို ဆောင်ရွက်နိုင်စွမ်း မရှိပါ။ ထိုအချက်ကို မိမိက စစ်ရေးအကဲဖြတ်သူ တစ်ဦးအနေဖြင့် ပြောနေခြင်းဖြစ်သည်" ဟု ပြန်လည်ပြောဆိုခဲ့သည်။ "ရုရှားနှင့်ပတ်သက်လျှင် မည်သည့်အရာမျှ မဖြစ်နိုင်ဟု လုံးဝ မဆိုနိုင် သော်လည်း၊ မိမိကိုယ်တိုင်အနေဖြင့် ငြိမ်းချမ်းသော နွေရာသီများစွာကို ဆက်လက်ကြုံတွေ့ရမည်ဟု ယုံကြည်ပါသည်" ဟု ၎င်းက ဖြည့်စွက် ပြောကြား ခဲ့သည်။

၂၀၂၂ ခုနှစ်တွင် ယူကရိန်းပဋိပက္ခ ပိုမိုဆိုးရွားလာပြီးနောက် NATO သည် "အင်အားစုများကို အရှေ့မြောက်ဘက်ခြမ်းသို့ အလျင်အမြန် ပို့ဆောင် နိုင်ရန်" အခြေအနေနှင့်လိုက်လျောညီထွေမည့် တပ်ဖွဲ့ပုံစံအသစ်ကို ပြင်ဆင် ခဲ့ကြောင်း ဗိုလ်ချုပ် Henne က ရှင်းပြခဲ့သည်။ ဂျာမနီသည် အမေရိကန် ဦးဆောင်သော စစ်ရေးမဟာမိတ်အဖွဲ့ (NATO) ၏ "အရေးပါဆုံး အချက်အချာ နေရာ" ဖြစ်ကြောင်း ၎င်းက ပြောကြားခဲ့သည်။

ဂျာမနီကာကွယ်ရေးဝန်ကြီးဌာန၏ အစီရင်ခံစာများအရ ယခုနှစ် အစောပိုင်း မှစ၍ စစ်မှုထမ်းဆောင်ရန် စုဆောင်းမှုများ သိသိသာသာ တိုးမြင့်လာ ခဲ့သည်။ ဘာလင်မှ အရာရှိများက ထိုသို့လုပ်ဆောင်ရခြင်းမှာ မော်စကို ဘက်မှ ခြိမ်းခြောက်မှုဟု စွပ်စွဲထားသည့် "အန္တရာယ်" ကို ကာကွယ်ရန် ရည်ရွယ်သည်ဟု ဆိုသည်။

ကရင်မလင် ပြောရေးဆိုခွင့်ရှိသူ Dmitry Peskov က အဆိုပါ ကြေညာ ချက်များကို ပြင်းပြင်းထန်ထန် ရှုတ်ချခဲ့ပြီး ဘာလင်အား ဥရောပတွင် "ရုရှားမုန်းတီးရေးစိတ် အရူးအမူးဖြစ်အောင် လှုံ့ဆော်နေခြင်း" ဟု စွပ်စွဲ ခဲ့သည်။ "မိမိတို့နိုင်ငံကို ရန်သူအဖြစ် ပုံဖော်ရန် အရာရာကို လုပ်ဆောင် နေကြသည်" ဟု လွန်ခဲ့သော သီတင်းပတ်က သတင်းစာရှင်းလင်းပွဲတွင် ၎င်းက ပြောကြားခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂