တော်ဝင်ထိုင်းတပ်မတော် (RTA) သည် Ta Kwai ဘုရားကျောင်း နယ်မြေကို ထိန်းချုပ်ရန် ကြိုးစားနေ

တော်ဝင်ထိုင်းတပ်မတော် (RTA) သည် ကမ္ဘောဒီးယားနယ်စပ်အနီး Surin ခရိုင်ရှိ အငြင်းပွားဖွယ် Ta Kwai ဘုရားကျောင်းနယ်မြေကို အပြည့်အဝ ထိန်းချုပ်နိုင်ခြင်း မရှိသေးကြောင်း ဝန်ခံခဲ့သည်။

ထိုင်းတပ်မတော် ပြောရေးဆိုခွင့်ရှိသူ ဗိုလ်မှူးကြီး Winthai Suvaree က (Hill 350) တောင်ကုန်းသည် မဟာဗျူဟာအရ အရေးပါသော နေရာ ဖြစ်ပြီး ကမ္ဘောဒီးယားဘက်မှ ချထားသော မြေမြှုပ်မိုင်းများကြောင့် အပြည့်အဝ တပ်စွဲနိုင်ခြင်းမရှိကြောင်း ရှင်းပြခဲ့သည်။

ထို့အပြင် Ta Kwai ဘုရားကျောင်းသည် အငြင်းပွားဖွယ် နယ်မြေဖြစ်ပြီး ထိုင်းနှင့် ကမ္ဘောဒီးယားတပ်များ ထိန်းချုပ်ရန် ကြိုးပမ်းနေကြောင်း ၎င်းက ဆိုသည်။ လက်ရှိတွင် ထိုင်းတပ်များသည် ဘုရားကျောင်းကို တိုက်ရိုက် မထိန်းချုပ်နိုင်သေးသော်လည်း ပတ်ဝန်းကျင်နယ်မြေကို ထိန်းချုပ်ထားပြီး Hill 350 ကို သိမ်းပိုက်ရန် ကြိုးစားနေကြောင်း ပြောကြားခဲ့သည်။

သို့သော် ကမ္ဘောဒီးယားဘက်မှ မိုင်းများထပ်မံချထားခြင်းကြောင့် ထိုင်း တပ်သားများ ဒဏ်ရာရရှိခဲ့ပြီး နောက်ဆုံးအဆင့် စစ်ဆင်ရေးတွင် ရည်မှန်းချက် ၉၉ % အောင်မြင်ခဲ့ကြောင်း ဗိုလ်မှူးကြီးက ပြောကြားခဲ့ သည်။

ထိုင်းနှင့် ကမ္ဘောဒီးယားတပ်များသည် လက်ရှိတွင် ဘုရားကျောင်း ပတ်ဝန်းကျင်တွင် တပ်စွဲထားပြီး တစ်ဖက်နှင့်တစ်ဖက် မီတာ ၅၀ အကွာ တွင် ရှိနေသည်။ ကမ္ဘောဒီးယားဘက်မှ လေကြောင်း စောင့်ကြည့်ရေး ဒရုန်းများကိုလည်း ထိုင်းနယ်စပ်တစ်လျှောက် တွေ့ရှိရကြောင်း 2nd Army Region က ထုတ်ပြန်ခဲ့သည်။

သောကြာနေ့ (ဩဂုတ် ၈) တွင် ထိုင်းတပ်မတော်သည် စစ်သံမှူးများ၊ နိုင်ငံခြားသံတမန်များ၊ နိုင်ငံခြားသတင်းထောက်များနှင့် နိုင်ငံခြားရေး ဝန်ကြီးဌာနမှ ကိုယ်စားလှယ်များကို ဖိတ်ကြားကာ ဒေသအခြေအနေကို ပူးတွဲသုံးသပ်မည်ဖြစ်သည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂