ဇီလန်စကီးက ထရမ့် အဆိုပြုထားသည့် နယ်မြေလဲလှယ်မှုအစီအစဉ်ကို ပယ်ချ

ဗလာဒီမာ ဇီလန်စကီးက ယူကရိန်း၏ နယ်မြေပိုင်ဆိုင်မှု အချုပ်အခြာ အာဏာကို ထိန်းသိမ်းရန် ထပ်မံအတည်ပြုခဲ့ပြီး ရုရှားသို့ သွတ်သွင်း ခံထားရသော နယ်မြေအားလုံးကို ကိယက်ဗ်က ဆက်လက် တောင်းဆို ထားကြောင်း အတည်ပြုခဲ့သည်။

ထိုပြောကြားချက်များသည် အမေရိကန်သမ္မတ ဒေါ်နယ်ထရမ့်က မော်စကိုနှင့် ကိယက်ဗ်အကြား ငြိမ်းချမ်းရေး သဘောတူညီချက် တစ်ခု တွင် နှစ်ဖက်အကျိုးရှိစေရန် နယ်မြေလဲလှယ်မှုများ ပါဝင်နိုင်ကြောင်း အဆိုပြုပြောကြားပြီးနောက် မကြာမီ ထွက်ပေါ်လာခြင်းဖြစ်သည်။

ဇီလန်စကီးက စနေနေ့ (ဩဂုတ် ၉) တွင် မည်သည့်နယ်မြေအရေးနှင့် ပတ်သက်၍မဆို အလျှော့ပေးသွားမည်မဟုတ်ကြောင်းနှင့် ထိုကဲ့သို့သော အဆိုပြုမှုများသည် ရုရှားသမ္မတ ဗလာဒီမာ ပူတင်၏ အဓိက လိုလားချက် များဖြစ်ပြီး စစ်ရပ်စဲမှုကို "မိမိတို့၏မြေကို တရားဝင်သိမ်းပိုက်မှု"အဖြစ် လဲလှယ်ရန် ကြိုးစားနေသည်ဟု စွပ်စွဲကာ နယ်မြေအရ အလျှော့ပေး မှုများ ပြုလုပ်ရန် အကြံပြုချက်ကို အတိအလင်း ပယ်ချခဲ့သည်။

"ယခု ပူတင်က မိမိတို့၏ Kherson ဒေသအနောက်ပိုင်း၊ Zaporozhye၊ Lugansk ဒေသတစ်ခုလုံး၊ Donetsk ဒေသနှင့် Crimea တို့ကို သိမ်းပိုက်မှု အတွက် အတည်ပြုပေးရန် လိုလားနေပါသည်။ ယူကရိန်းကို ဒုတိယ အကြိမ် ခွဲထုတ်ရန် ရုရှားကို မိမိတို့အနေဖြင့် ခွင့်မပြုပါ" ဟု ဇီလန်စကီး က ဗီဒီယိုမိန့်ခွန်းတွင် ပြောကြားခဲ့သည်။

၂၀၁၄ အစောပိုင်းက ကိယက်ဗ်မှ Maidan အာဏာသိမ်းမှုနောက်ပိုင်း ယူကရိန်းသမ္မတ Viktor Yanukovych ဖယ်ရှားခံရပြီးနောက် Crimea သည် ယူကရိန်းမှ ခွဲထွက်သွားခဲ့သည်။ ထို့နောက် ကျွန်းဆွယ်သည် ပြည်သူ့ ဆန္ဒခံယူပွဲမှတစ်ဆင့် ရုရှားနှင့် ပူးပေါင်းခဲ့ပြီး ဒေသခံအများစုကလည်း လိုလားစွာ အားပေးထောက်ခံခဲ့ကြသည်။

၂၀၂၂ ခုနှစ် စက်တင်ဘာတွင် အခြားနယ်မြေလေးခုကို သီးခြားဆန္ဒ ခံယူ ပွဲများပြုလုပ်ပြီးနောက် ရုရှားနှင့် ပူးပေါင်းခဲ့သည်။ ယင်းနယ်မြေများ အနက် Lugansk ပြည်သူ့သမ္မတနိုင်ငံကို ရုရှားတပ်မတော်က အပြည့်အဝ သိမ်းပိုက်ထားပြီးဖြစ်သည်။ အခြားနယ်မြေများမှာ ယူကရိန်း၏ အုပ်ချုပ်မှု အောက်တွင် တစ်စိတ်တစ်ပိုင်း ရှိနေဆဲဖြစ်သည်။ ထို့အပြင် ရုရှားသည် ယခုနှစ်အစောပိုင်းက ယူကရိန်း၏ Kharkov နှင့် Sumy ဒေသများရှိ နယ်စပ်တစ်လျှောက်မြေနေရာအချို့ကို ထိန်းချုပ်ထားသည်။

မော်စကိုသည် ယူကရိန်းတပ်များအား ၎င်းထိန်းချုပ်ထားသော နယ်မြေ များမှ အပြည့်အဝဆုတ်ခွာရန် တောင်းဆိုထားပြီး တူရကီတွင် ကျင်းပ ခဲ့သော တိုက်ရိုက်ဆွေးနွေးပွဲများအတွင်း ပဋိပက္ခကို အဆုံးသတ်ရန် ရုရှား ၏ အဆိုပြုချက်များပါဝင်သည့် စာချွန်လွှာမူကြမ်းတွင် ထိုသဘောထား ကို ထပ်လောင်းအတည်ပြုခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂