ဂါဇာ၌ အစ္စရေး၏ ပိတ်ဆို့တိုက်ခိုက်မှုများအတွက် အစ္စတန်ဘူလ်တွင် လူထောင်ချီကာ ချီတက်ဆန္ဒပြ

ဂါဇာတွင်အစ္စရေး၏တိုက်ခိုက်မှုများနှင့် ပိတ်ဆို့မှုများကြောင့် ထောင်နှင့် ချီသောတူကီယဲနိုင်ငံသားများက မြို့တော် အစ္စတန်ဘူလ်တွင် ချီတက် ဆန္ဒပြမှုများ၊ ရှုတ်ချမှုများနှင့်ကြွေးကြော်မှုများကို သြဂုတ် ၉ ရက်က ပြုလုပ်ခဲ့ကြသည်။Support for Palestine Platform မှ Be Hope for Gaza ဟူသော ခေါင်းစဉ်များဖြင့် အရပ်ဘက် အဖွဲ့အစည်း ၁၅ ဖွဲ့ ပူးပေါင်းကာ ညနေခင်းဆုတောင်းမှုပြီးနောက် ဘီယာဇစ်ရင်ပြင်တွင် စုရုံး ခဲ့ကြကာ အထင်ကရဗလီကြီးတစ်ခုဖြစ်သော ဟာဂီယာဆိုဖီယာဗလီသို့ ဦးတည်ကာ ချီတက်ဆန္ဒပြခဲ့ကြခြင်း ဖြစ်သည်။

ဆန္ဒပြသူများက “လူသတ်သမားအစ္စရေး ပါလက်စတိုင်းမြေက ထွက်သွား” အစရှိသည့် ကြွေးကြော်သံများကို ဟစ်ကြွေးကာ ပါလက်စတိုင်းအလံ များ၊ ဂါဇာအငတ်ဘေးဆိုက်စေသည့် အစ္စရေး၊ တာဝန်ယူမှု ရှိစေရမည် ဟူသော စာတမ်းများကို ကိုင်ဆောင်ကာ ချီတက်ခဲ့ကြခြင်းဖြစ်သည်။

တူကီယဲသမ္မတအာဒိုဂန်ကလည်း ပါလက်စတိုင်းသမ္မတ မာမွတ် အဘက်စ် ထံသို့ ဖုန်းခေါ်ဆိုပြီးနောက် အစ္စရေးက ဂါဇာကို စစ်ရေးအရ အလုံးစုံ ထိန်းချုပ်ရန်ဆုံးဖြတ်ခဲ့ခြင်းအား လုံး၀လက်မခံနိုင်ကြောင်း ပြောကြား ခဲ့သည်။

တူကီယဲသမ္မတရုံးမှ ထုတ်ပြန်ချက်တွင်လည်း အစ္စရေးအနေဖြင့် အပစ်အခတ်ရပ်စဲကာ သံတမန်နည်းဖြင့် ဆက်လက်ဖြေရှင်းသွားရန် တူကီယဲသမ္မတအာဒိုဂန်က ထပ်လောင်းတိုက်တွန်းကြောင်း၊ ပါလက်စတိုင်း ကို တူကီယဲက ဆက်လက်ထောက်ခံကြောင်း၊ ဥရောပနိုင်ငံများက ပါလက်စတိုင်းကို အချုပ်အခြာ အာဏာပိုင်နိုင်ငံအဖြစ် ထောက်ခံမှု တိုးပွား လာကြောင်း၊ အနောက်နိုင်ငံများ၏အစ္စရေးအပေါ် ဝေဖန်မှု မြင့်တက် လာခြင်းများကိုလည်း ကြိုဆိုကြောင်း ဖော်ပြထားသည်။

မတ် ၁၈ ရက်မှ စတင်၍ အစ္စရေးက အပြင်းအထန် တိုက်ခိုက်မှုများ တစ်ဖန်ပြုလုပ်ခဲ့ပြီးနောက် ဂါဇာတွင် ပါလက်စတိုင်း ၄၀,၈၀၉ ဦး ဒဏ်ရာ ရရှိကာ အနည်းဆုံး ၉,၈၆၂ ဦး သေဆုံးခဲ့ကြောင်း၊ ၂၀၂၃ ခုနှစ် အောက်တိုဘာလက တိုက်ပွဲများစတင်ပြီးနောက် ပါလက်စတိုင်းများ သေဆုံးမှုအရေအတွက်မှာ စုစုပေါင်း ၆၁,၃၆၉ ဦး ရှိလာခဲ့ပြီး ဒဏ်ရာ ရသူလည်း ၁၅၂,၈၅၀ ဦးရှိလာပြီဖြစ်ကြောင်း ဂါဇာအခြေစိုက် ကျန်းမာရေး အာဏာပိုင်များက သြဂုတ် ၉ ရက်၌ ထုတ်ပြန်ပြောကြားခဲ့သည်။

ဂါဇာကျန်းမာရေးအာဏာပိုင်များ၏ထုတ်ပြန်ချက်အရ လွန်ခဲ့သည့် ၂၄ နာရီအတွင်း၌ပင် စားနပ်ရိက္ခာပြတ်လပ်မှုနှင့် အာဟာရချို့တဲ့ခြင်း များကြောင့် ထပ်မံသေဆုံးရသူ ၁၁ ဦး ရှိခဲ့ကြောင်း၊ အဆိုပါ ပုံစံမျိုးဖြင့် သေဆုံးခဲ့ရသူပေါင်းမှာ ၂၀၂၃ ခုနှစ်၊ အောက်တိုဘာနောက်ပိုင်းမှစ၍ လက်ရှိ အချိန်အထိ ကလေးငယ် ၉၈ ဦးအပါအဝင် သေဆုံးသူ ၂၁၂ ဦး အထိ ရှိလာကြောင်း ဖော်ပြထားသည်။

အစ္စရေးက အစိုးရလုံခြုံရေး ကက်ဘိနက်၏အတည်ပြုချက်ဖြင့် ဂါဇာ ကမ်းမြောင်ဒေသတစ်ခုလုံးကို အလုံးစုံထိန်းချုပ်တော့မည်ဟု သြဂုတ် ၈ ရက်က ကြေညာခဲ့ရာ ပြည်တွင်း၌သာမက နိုင်ငံတကာတွင်လည်းရှုတ်ချခြင်းများ ချက်ချင်းထွက်ပေါ်လာခဲ့သည်။ အစ္စရေး၏ အဆိုပါ ဆုံးဖြတ်ချက်သည် နိုင်ငံတကာဥပဒေကို ချိုးဖောက်ကြောင်း၊ ဂါဇာတွင် လူသားချင်းစာနာမှုဆိုင်ရာအကျပ်အတည်းများကို ပိုမိုဖြစ်ပေါ်စေကြောင်း၊ အပစ်အခတ်ရပ်စဲရေး ကြိုးပမ်းနေမှုများကို ပျက်ပြားစေကြောင်းလည်း ဝေဖန်မှုများထွက်ပေါ်လာခဲ့သည်။ 

ကိုးကား- Xinhua