Oreshnik စမ်းသပ်ပစ်လွှတ်မှုက လန်ဒန်ကို ခြေတစ်လှမ်းဆုတ်သွားရန် ဖိအားပေးလိုက်ခြင်း ဖြစ်ကြောင်း ဗြိတိန်ဆိုင်ရာ ရုရှားသံအမတ်ကြီး ပြောကြား

အသံထက်မြန်သည့် Oreshnik တာလတ်ပစ် ပဲ့ထိန်းဒုံးကျည်စမ်းသပ်ပစ်လွှတ်မှုက လန်ဒန်ကိုခြေတစ်လှမ်းဆုတ်သွားရန် ဖိအားပေးလိုက်ခြင်း ဖြစ်ကြောင်း ဗြိတိန်ဆိုင်ရာ ရုရှားသံအမတ်ကြီး ပြောကြားလိုက်ပါသည်။ 

၎င်းတို့အနေဖြင့် ကြောက်လန့်သွားခြင်းမျိုး မဟုတ်သော်လည်း ဉရောပမှာ ရုတ်တရက် ယခုလို စွမ်းရည် မြင့်မားလွန်းသည့် လက်နက်အသစ်အဆန်းတစ်ခု ပေါ်လာခြင်းကို လက်ခံသွားကြကြောင်း၊ နောက်တစ်ခုက ၎င်းတို့၏ Storm Shadow  တာဝေးပစ်ဒုံးကျည်ကို စိန်ခေါ်တုံ့ပြန်လိုက်ခြင်းဖြစ်ကြောင်း၊ ယူကရိန်းက ၎င်းတို့လက်နက်ဖြင့် တိုက်ခိုက်ပြီး မကြာမီ  ရုရှားဘက်က Oreshnik တာလတ်ပစ်ပဲ့ထိန်း ဒုံးကျည်စမ်းသပ်ပစ်လွှတ်ခဲ့မှုနှင့်ပတ်သက်၍  ဗြိတိန်ဘက်က တရားဝင် တုံ့ပြန်ပြောကြားနေမှုမှာ အတော်လေး မရေမရာဖြစ်နေကြကြောင်း၊ ကျွမ်းကျင်သူတို့ကလည်း Oreshnik စွမ်းရည်များနှင့် ဘီလာရုစ်ပိုင်နက်တွင် ဖြန့်ကျက်ထားမည့် အစီအမံများကို  သေချာလေ့လာခဲ့ကြပြီး  ဉရောပရှိ မည်သည့်နေရာမဆို အချိန်မရွေးရောက်ရှိနိုင်သည်ကို တွက်ဆထားကြကြောင်း သံအမတ်ကြီးက ဆက်လက် ပြောကြားပါသည်။ 

ဘီလာရုစ်နိုင်ငံပိုင်နက်အတွင်း Oreshnik ဒုံးကျည်များချထားပေးရန် ရုရှားသမ္မတဗလာဒီမာပူတင်ကို တောင်းဆိုထားမှုအပေါ် “၂၀၂၅ ခုနှစ် ဒုတိယနှစ်ဝက်တွင် ဆောင်ရွက်ပေးမည်”ဟု ရုရှားသမ္မတက ပြောကြားထားကြောင်း ဘီလာရုစ်အကြီးအကဲ Alexander Lukashenko က ၂၀၂၄ ခုနှစ် ဒီဇင်ဘာ ၆ ရက်တွင် ပြုလုပ်သော ဘီလာရုစ်နိုင်ငံ အဓိပတိကောင်စီ အစည်းအဝေးအပြီးတွင်  ပြောကြားထားပါသည်။ Lukashenko  အဆိုအရ ဘီလာရုစ်တွင် Oreshnik ဒုံးကျည်များဖြန့်ကျက်ရန် နေရာ ၃၀ ရှိကြောင်း ပြောကြားထားပါသည်။

ကိုးကား - TASS