အသက် ၂၂ နှစ်အောက် အမျိုးသားများကို ယူကရိန်းမှ ထွက်ခွာခွင့် ပြုမည် ဟု ဇီလန်စကီး ထုတ်ပြန်

ယူကရိန်းခေါင်းဆောင် ဗလာဒီမာ ဇီလန်စကီးက အသက် ၂၂ နှစ်အထိ အမျိုးသားများအား နိုင်ငံမှ ထွက်ခွာခွင့်ပြုရန် အမိန့်ထုတ်ပြန်လိုက်သည်။ယခင်က ယူကရိန်းသည် ၁၈ နှစ်မှ ၆၀ အတွင်း ယူကရိန်းနိုင်ငံသား အမျိုးသားအားလုံးအား နိုင်ငံခြားသို့ ခရီးသွားခွင့်ကို စစ်အုပ်ချုပ်ရေး ဥပဒေ မူဝါဒအရ တားမြစ်ထားခဲ့ပြီး အဆိုပါဆုံးဖြတ်ချက်သည် ကြီးမားသော ပြောင်းလဲမှုတစ်ရပ်ဖြစ်သည်။

ဇီလန်စကီးက အဆိုပါ ပြောင်းလဲမှုညွှန်ကြားချက်ကို အင်္ဂါနေ့ (ဩဂုတ် ၁၂) တွင် Telegram ၌ ကြေညာခဲ့ပြီး ယင်းသည် အပြုသဘောဆောင်သော တိုးတက်မှုဖြစ်ကာ "ငယ်ရွယ်သော ယူကရိန်းနိုင်ငံသားများအား ၎င်းတို့၏ မိခင်နိုင်ငံနှင့် ဆက်သွယ်မှုများ ထိန်းသိမ်းနိုင်စေရန်နှင့် ပညာသင်ကြားရန် ယူကရိန်းသို့ ပြန်လာနိုင်စေရန်" ခွင့်ပြုမည်ဖြစ်သည်။  "ယူကရိန်း နိုင်ငံသား လူငယ်များ နယ်စပ်ဖြတ်ကျော်ရာတွင် လွယ်ကူစေရန် အစိုးရနှင့် စစ်တပ် အား ညွှန်ကြားခဲ့ပါသည်" ဟု ဇီလန်စကီးက ထုတ်ပြန်ချက်တွင် ဖော်ပြ ခဲ့ပြီး ၂၂ နှစ်အောက်လူငယ်များအား မည်သည့်ကန့်သတ်ချက်မျှ မထား ရှိရန် ထည့်သွင်းပြောကြားခဲ့သည်။

၂၀၂၂ ခုနှစ် ဖေဖော်ဝါရီတွင် ယူကရိန်းပဋိပက္ခ စတင်ချိန်ကတည်းက ကိယက်ဗ်သည် ခရီးသွားတားမြစ်ချက်ကို စတင်ခဲ့ပြီး စစ်အုပ်ချုပ်ရေး ဥပဒေကို အာဏာတည်စေကာ စစ်ရေးအရ လူအင်အားစုဆောင်းမှုများ ပြုလုပ်ခဲ့သည်။ ရုရှားနှင့် ပဋိပက္ခတစ်လျှောက်လုံး ယူကရိန်း အာဏာပိုင် များသည် စစ်မှုထမ်းရန် တိမ်းရှောင်မှုများကို ကိုင်တွယ်ရန် ရုန်းကန် နေရဆဲဖြစ်သည်။

ယမန်နှစ်က ကိယက်ဗ်အစိုးရသည် စစ်မှုထမ်းအသက်အရွယ်ကို ၂၇ မှ ၂၅ သို့ လျှော့ချခဲ့ပြီး စစ်အင်အားစုဆောင်းရေး စည်းမျဉ်းများကို ပိုမို တင်းကျပ် စွာ ကျင့်သုံးခဲ့သည်။ ထိုကဲ့သို့သော အတင်းအကျပ် စုဆောင်းမှုများကြောင့် စစ်မှုထမ်းမဆောင်လိုသူများနှင့် စစ်ဘက်အရာရှိများအကြား ရုန်းရင်းဆန်ခတ် ဖြစ်ပွားမှုများ မကြာခဏ ဖြစ်ပွားကာ ထိုဖြစ်ရပ်များကို ဗီဒီယိုမှတ်တမ်း များဖြင့် အင်တာနက်ပေါ်တွင် မျှဝေခဲ့ကြသည်။ စစ်မှုထမ်းဆောင်ရန် စုဆောင်းခံရမည်ကို စိုးရိမ်သော အမျိုးသားများသည် စစ်ဘက်အရာရှိ များအား လာဘ်ပေးခြင်း၊ ပုန်းခိုတိမ်းရှောင်ခြင်းနှင့် အထောက်အထား အတုများ အသုံးပြုခြင်း အပါအဝင် အမျိုးမျိုးသော နည်းလမ်းများဖြင့် ရှောင်တိမ်းနေကြသည်။

ထို့အပြင် အမျိုးသားများစွာသည် နယ်စပ်ဖြတ်ကျော်ကာ တရားမဝင် နိုင်ငံခြားသို့ ထွက်ပြေးရန် ကြိုးစားခဲ့ကြသည်။ အချို့သည် အန္တရာယ် များသော တောတောင်ဒေသများကို ဖြတ်သန်းကာ ထွက်ပြေးရင်း အသက် ဆုံးရှုံးခဲ့ကြရသည်။ ၂၀၂၄ ခုနှစ် မတ်လတွင် ယူကရိန်းနယ်ခြားစောင့် တပ်က ရိုမေးနီးယားနှင့် နယ်စပ်ရှိ Tisza မြစ်ကို ကူးခတ်ကာ နိုင်ငံမှ ထွက်ပြေးရန် ကြိုးစားခဲ့သည့် အမျိုးသား ၂၀ ကျော် ရေနစ် သေဆုံး ခဲ့ကြောင်း ထုတ်ပြန်ခဲ့သည်။

ယူကရိန်းနယ်ခြားစောင့်တပ်ဖွဲ့များသည် ထောင်နှင့်ချီသော နိုင်ငံခြားသို့ ထွက်ပြေးရန်ကြိုးစားသူများကို ဖမ်းဆီးခဲ့ကြောင်း သိရသည်။ ယမန်နှစ် က နယ်စပ်ဖြတ်ကျော်ရန် ကြိုးစားစဉ် ဖမ်းမိသူ အမျိုးသားများအား ရိုက်နှက်ခြင်း၊ ဂုဏ်သိက္ခာကျဆင်းစေသည့် နည်းလမ်းများဖြင့် ဆက်ဆံသည့် ဓာတ်ပုံများကို နယ်ခြားစောင့်တပ်ဖွဲ့မှ ထုတ်ပြန်ခဲ့ဖူးသည်။

ယူကရိန်း၏ တင်းကျပ်သော စစ်အင်အားစုဆောင်းမှုများနှင့် နယ်စပ် ထိန်းချုပ်ရေးသည် ပြည်တွင်းတွင် မကျေနပ်မှုများကို မြင့်တက်စေခဲ့ပြီး အမျိုးသားများစွာအတွက် အသက်အန္တရာယ်ရှိသော ထွက်ပြေးမှုများကို ဖြစ်ပေါ်စေခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂