ကားထုတ်လုပ်မှု ကမ္ဘာ့အဆင့် ၃ နေရာသို့ တက်လှမ်း နိုင်‌ရေး Nissan နှင့် Honda တို့ ပူးပေါင်းတော့မည်

Honda နှင့် Nissan ကုမ္ပဏီတို့သည် ကမ္ဘာ့နံပါတ် ၃ အဆင့်ရှိ မော်တော်ကားထုတ်လုပ်သူနေရာသို့ ရောက်ရှိ ရန်နှင့် တရုတ်ကားထုတ်လုပ်သူများ၏ ကြီးမားလာသော ခြိမ်းခြောက်မှုအန္တရာယ်များကို ယှဉ်ပြိုင်နိုင်ရန် ပူးပေါင်း၍ ရင်းနှီးမြှုပ်နှံမှုပြုလုပ်မည့် အစီအစဉ်ကို လာမည့်ခြောက်လအတွင်း ဆွေးနွေးရန် သဘောတူညီချက် ရရှိခဲ့ကြသည်။ 

Nissan ၏ စီးပွားရေးမိတ်ဖက်ဖြစ်သည့် Mitsubishi လည်း အဆိုပါ ပူးပေါင်းရေးဆွေးနွေးပွဲအစီအစဥ်တွင် ပါဝင်မည် ဖြစ်သည်။ ထိုသို့ ကုမ္ပဏီ ၃ ခု ပူးပေါင်းဆောင်ရွက် နိုင်ပါက ကမ္ဘာ့မော်တော်ကားထုတ်လုပ်မှု အများဆုံး ဖြစ်သည့် Toyota (TM) နှင့် ဒုတိယအများဆုံး Volkswagen တို့၏နောက် တတိယနေရာသို့ ရောက်ရှိလာမည်ဖြစ်ပါ သည်။ 

မော်တော်ကားထုတ်လုပ်မှုလုပ်ငန်းများတွင် ယခုကဲ့သို့ ပေါင်းစည်းဆောင်ရွက်ခြင်းမှာ အသစ်အဆန်း မဟုတ်ပေ။ ၂၀ ရာစု၏ ပထမဆယ်စုနှစ်ကတည်းက ကားထုတ်လုပ် သည့် အမှတ်တံဆိပ်အမျိုးမျိုးကို ပေါင်းစပ်ထုတ်လုပ်ခဲ့ ခြင်းကြောင့် General Motors (GM) ပေါ်ပေါက်လာခြင်း ဖြစ်ပါသည်။ 

သို့ရာတွင် ကားထုတ်လုပ်သူများ အတူတကွ ပေါင်းစည်း ဆောင်ရွက်ရာတွင် အခက်အခဲများလည်း ရှိတတ်ပါသည်။ဂျာမန်ကားထုတ်လုပ်သည့် Daimler-Benz သည် Chrysler ကော်ပိုရေးရှင်းကို ၁၉၉၈ ခုနှစ်တွင် ဝယ်ယူ၍ မော်တော်ကားများအား ပူးပေါင်းထုတ်လုပ်ခဲ့ရာ ဆယ်စုနှစ်တစ်စုအကြာတွင် Chrysler ကော်ပိုရေးရှင်း သည် သီးခြားခွဲထွက်လိုက်ပြီးနောက် ဒေဝါလီခံသွားရပြီး နှစ်နှစ်အတွင်း အထောက်အပံ့ရန်ပုံငွေများ လိုအပ်ခဲ့သည်။

ကိုးကား - CNN