ဆီးရီးယားနိုင်ငံ အလက်ပိုမြို့ရှိ တူကီယဲကောင်စစ်ဝန်ရုံးချုပ်ကို ပြန်လည်ဖွင့်လှစ်

News Image

  •  ဆီးရီးယားနိုင်ငံ အလက်ပိုမြို့ရှိ တူကီယဲကောင်စစ်ဝန်ရုံးချုပ်ကို ပြန်လည်ဖွင့်လှစ်

အစ္စတန်ဘူလ် ဇန်နဝါရီ ၂၀

ဆီးရီးယားနိုင်ငံ အလက်ပိုမြို့ အနောက်မြောက်ပိုင်းရှိ တူကီယဲ၏ ကောင်စစ်ဝန်ရုံးချုပ်မှာ ဇန်နဝါရီ ၂၀ ရက်တွင် ၎င်း၏ လုပ်ငန်းများ ပြန်လည်စတင်ပြီ ဖြစ်ကြောင်း တူကီယဲနိုင်ငံပိုင် မီဒီယာက ထုတ်ပြန်ထားသည်။ အဆိုပါ ကောင်စစ်ဝန်ရုံးကို ဆီးရီးယားလက်နက်ကိုင် ပဋိပက္ခကြောင့် ပိတ်ထားခဲ့ရပြီးနောက် ၁၃ နှစ်အကြာတွင် ကောင်စစ်ဝန် ရုံးအဆောက်အအုံတွင် တူကီယဲတာဝန်ရှိသူများက တူကီယဲအလံ လွှင့်တင်ထားသည်ကို နိုင်ငံပိုင် တီအာတီရုပ်သံက ထုတ်လွှင့် ဖော်ပြထားသည်။

ဆီးရီးယားနိုင်ငံရှိ တူကီယဲ သံတမန်ရေးရာအဖွဲ့သည် နှစ်နိုင်ငံအကြား ကူးသန်းရောင်းဝယ်ရေး၊ စစ်ရေး၊ ယဉ်ကျေးမှုနှင့် နိုင်ငံရေးဆိုင်ရာ ဆက်ဆံရေးများ ဖွံ့ဖြိုးတိုးတက်စေရန် ပါဝင်ကူညီမည်ဖြစ်ကြောင်း ဒမတ်စကတ်မြို့ရှိ တူကီယဲသံရုံးမှ ခေတ္တသံအမတ် ဘူဟန်ခိုရိုဂ်လူက ပြောကြားသည်။ လာမည့် အချိန်ကာလအတွင်း တူကီယဲနှင့် ဆီးရီးယား နိုင်ငံတို့အကြား ဆက်ဆံရေးမှာ ပိုမိုတိုးတက် ကောင်းမွန်လာမည်ဖြစ်ကြောင်း သိရသည်။

Source: Myanmar Digital News