BRICS ဘုံငွေကြေးထူထောင်ရန် မရှိကြောင်း Kremlin ပြောဆို

BRICS အဖွဲ့ဝင်နိုင်ငံများသည် ဘုံငွေကြေးတစ်ခု ဖန်တီးရန်အစီအစဉ်မရှိသော်လည်း စီးပွားရေးပူးပေါင်းဆောင်ရွက်မှုများတိုးမြှင့်ရန်အတွက် ပူးတွဲ ရင်းနှီးမြှုပ်နှံမှုပလက်ဖောင်းများကို တက်ကြွစွာဆွေးနွေးနေကြောင်း Kremlin ပြောခွင့်ရပုဂ္ဂိုလ် Dmitry Peskov က ပြောကြားခဲ့သည်။

ဇန်နဝါရီ ၃၁ ရက်နေ့က သတင်းထောက်များနှင့် တွေ့ဆုံရာ၌ Peskov က BRICS နိုင်ငံများကို ဒေါ်လာနှင့်အစားထိုးရန် ဘုံငွေကြေးဖန်တီးပါက အခွန် စည်းကြပ်မှုဖြင့် BRICS နိုင်ငံများကို ခြိမ်းခြောက်ခဲ့သည့် အမေရိကန်သမ္မတ Donald Trump ၏ မှတ်ချက်စကားကို ပြောကြားခဲ့ပါသည်။

BRICS က ဘုံငွေကြေးတစ်ခု ဖန်တီးမည့်အစား တတိယနိုင်ငံများတွင် ရင်းနှီးမြှုပ်နှံမှုများ လွယ်ကူချောမွေ့စေမည့် ပူးပေါင်းရင်းနှီးမြုပ်နှံမှု ပလက်ဖောင်း အသစ်များတည်ထောင်ရန်သာ အာရုံစိုက်နေပြီးအဖွဲ့ဝင်နိုင်ငံအချင်းချင်း အပြန်အလှန်ရင်းနှီးမြှုပ်နှံမှုများပြုလုပ်ရန် ဆောင်ရွက်လျက်ရှိကြောင်း ၎င်းက ပြောကြားခဲ့သည်။

ဇန်နဝါရီ ၃၀ ရက်နေ့တွင် Trump က BRICS နိုင်ငံများအား ဒေါ်လာအစားထိုး ဘုံငွေကြေးတစ်ရပ်ထူထောင်ပါက အခွန် ၁၀၀ % တိုးမြှင့်ကောက်ခံမည်ဟု ခြိမ်းခြောက်ပြောဆိုခဲ့သည်။

အလားအလာရှိသော BRICS ၏ ဘုံငွေကြေးစနစ်နှင့်ပတ်သက်၍ ထင်ကြေးပေးမှုများသည် မကြာသေးမီ နှစ်များအတွင်းက ပျံ့နှံ့ခဲ့သည်။၂၀၂၃ ခုနှစ်တွင် ဘရာဇီး သမ္မတ Luiz Inacio Lula da Silva သည် စီးပွားရေး အစုအဖွဲ့အတွင်း “ကုန်သွယ်မှုငွေကြေး” အယူအဆအတွက် ထောက်ခံကြောင်း ထုတ်ဖော်ပြောဆိုခဲ့ပြီးယူရိုငွေကြေးဖန်တီးမှုနှင့် ယှဉ်တွဲပြောဆိုခဲ့သည်။ သို့သော်လည်း ရုရှား၊ အိန္ဒိယ၊ တရုတ်နှင့် တောင်အာဖရိက အပါအဝင် အခြားသော BRICS နိုင်ငံ့ခေါင်းဆောင်များကမူ ယင်းလုပ်ရပ်ကို ဆွေးနွေးရန် ငြင်းဆိုထားသည်။

BRICS ခေါင်းဆောင်များသည် ဒေါ်လာတန်ဖိုးအား ကျဆင်းစေရေးလုပ်ဆောင်ရန် စိတ်ဝင်စားခြင်း မရှိကြောင်း BRICS ခေါင်းဆောင်များက အကြိမ်ကြိမ် ပြောဆိုခဲ့သည်။

ကိုးကား-RT