မြောက်ကိုရီးယားက တပ်ဖွဲ့ဝင်များကို ရုရှားသို့ ထပ်မံ စေလွှတ်ခဲ့ကြောင်း တောင်ကိုရီးယားထောက်လှမ်းရေး အေဂျင်စီပြော

မြောက်ကိုရီးယားနိုင်ငံသည် ၎င်း၏တပ်ဖွဲ့ဝင်များကို ရုရှားနိုင်ငံတွင် ထပ်မံ ဖြန့်ကျက်ချထားခဲ့ကြောင်း တောင်ကိုရီးယားနိုင်ငံ ထောက်လှမ်းရေး အေဂျင်စီ၏ပြောကြားချက်များကို ကိုးကားပြီး တောင်ကိုရီးယား မီဒီယာ များက ဖေဖော်ဝါရီလ ၂၇ ရက်တွင် ရေးသားဖော်ပြခဲ့သည်။

သို့သော်လည်း ရုရှားနိုင်ငံတွင် ထပ်မံဖြန့်ကျက်ချထားခဲ့သည့် မြောက်ကိုရီးယား တပ်ဖွဲ့ဝင်များ၏ အရေအတွက်အတိအကျကို ရှင်းရှင်း လင်းလင်း မသိရှိရသေးကြောင်း တောင်ကိုရီးယားထောက်လှမ်းရေး အေဂျင်စီက ပြောကြားခဲ့သည်။ မြောက်ကိုရီးယားအစိုးရသည် ၎င်း၏ တပ်ဖွဲ့ဝင်များကို ရုရှားနိုင်ငံ ကာ့စ်ဒေသရှိ စစ်မြေပြင်များသို့ စေလွှတ် ထားကြောင်း အစီရင်ခံစာတွင် ရေးသားဖော်ပြထားသည်။ မြောက်ကိုရီးယား ၏ နောက်ထပ်တပ်ဖွဲ့ဝင်များသည် ရုရှားနိုင်ငံ အနောက်ဘက်ခြမ်းဒေသ ကို နယ်စပ်ဖြတ်ကျော်ဝင်ရောက်မှုများ လုပ်ဆောင်နေသည့် ယူကရိန်း တပ်ဖွဲ့များကို ရုရှားတပ်ဖွဲ့များက တိုက်ခိုက်မှုများလုပ်ဆောင်နေသည့် စစ်မြေပြင်များသို့ စေလွှတ်ခံခဲ့ရခြင်းဖြစ်ကြောင်း အစီရင်ခံစာတွင် ရေးသား ဖော်ပြထားသည်။ အဆိုပါ အစီရင်ခံစာနှင့်ပတ်သက်ပြီး မှတ်ချက်ပေးရန် တောင်းဆိုမှုများကို တောင်ကိုရီးယား ထောက်လှမ်းရေးအေဂျင်စီ၏ ပြောရေးဆိုခွင့်ရှိသူက ပြန်လည်တုံ့ပြန်ဖြေကြားခြင်းမျိုး မရှိသေး ကြောင်းလည်း သိရသည်။

မြောက်ကိုရီးယားအစိုးရသည် ရုရှားနှင့် ယူကရိန်းကြား ဖြစ်ပွားနေသော စစ်ပွဲတွင် ရုရှားဘက်မှ ပါဝင်တိုက်ခိုက်ပေးရန်အတွက် ၎င်း၏တပ်ဖွဲ့ဝင် (၁၁,၀ဝဝ) ကျော်ကို ရုရှားသို့စေလွှတ်ခဲ့ကြောင်း တောင်ကိုရီးယား ထောက်လှမ်းရေးအေဂျင်စီက ယခင်က ထုတ်ပြန်ပြောဆိုခဲ့သည်။ထို့ပြင် ရုရှားတပ်ဖွဲ့များသည် မြောက်ကိုရီးယားမှ ထောက်ပံ့ပေးခဲ့သော စစ် လက်နက်ပစ္စည်းများကို အသုံးပြုခဲ့ကြောင်း ယူကရိန်းနှင့် အနောက် အုပ်စုနိုင်ငံများ၏ ကျွမ်းကျင်သူများက ယခင်ကစွပ်စွဲပြောဆိုခဲ့ဖူးသည်။

သို့သော်လည်း ယူကရိန်းနှင့် အနောက်အုပ်စုနိုင်ငံများ၏ စွပ်စွဲ ပြောဆိုချက်များမှာ အခြေအမြစ်မရှိသော ပြောဆိုချက်များသာ ဖြစ်ကြောင်း ရုရှားနှင့်မြောက်ကိုရီးယားအစိုးရတို့က ပြန်လည်တုံ့ ပြန်ပြောဆိုခဲ့သည်။

ကိုးကား-NP News