ထိုင်ဝမ်၏ Chip ထုတ်လုပ်ရေးကုမ္ပဏီကြီးတစ်ခုဖြစ်သည့် TSMC က အမေရိကန်တွင် ဒေါ်လာ ၁၀၀ ဘီလီယံ ရင်းနှီးမြှုပ်နှံမည်

ထိုင်ဝမ်၏ တစ်ပိုင်းလျှပ်ကူးပစ္စည်းထုတ်လုပ်သည့်ကုမ္ပဏီကြီးတစ်ခုဖြစ်သည့် TSMC သည် အမေရိကန် ပြည်ထောင်စု၌ ဒေါ်လာ ၁၀၀ ဘီလီယံ ထပ်မံရင်းနှီးမြှုပ်နှံသွားမည်ဖြစ်ကြောင်း၊ ၎င်းသည် အမေရိကန် အနေဖြင့် AI လောကကို ကြီးစိုးနိုင်သည့် အခြေအနေရောက်အောင် မြှင့်တင်ပေးနိုင်မည့် နောက်ဆုံးပေါ် နည်းပညာဆိုင်ရာ အဆောက်အအုံများကို တည်ဆောက်သွားမည် ဖြစ်ကြောင်း၊ တစ်ပိုင်းလျှပ်ကူး ပစ္စည်းများသည် ၂၁ ရာစု စီးပွားရေး၏ အဓိကကျောရိုးဖြစ်ကြောင်း သမ္မတ ဒေါ်နယ်ထရမ့်က TSMC ၏ အမှုဆောင်အရာရှိချုပ်ဖြစ်သူ C.C.Wei နှင့် မတ်လ ၃ ရက်နေ့တွင် အိမ်ဖြူတော်၌ တွေ့ဆုံစဉ် ထုတ်ဖော်ပြောကြားခဲ့ပါသည်။

ထို့အပြင် ထရမ့်က တစ်ပိုင်းလျှပ်ကူးပစ္စည်းများသည် AI နည်းပညာမှသည် မော်တော်ယာဉ်များထိ နည်းပညာ တိုးမြှင့်ထုတ်လုပ်ရာတွင် မရှိမဖြစ်လိုအပ်သည့် အရာပင်ဖြစ်ကြောင်း၊ အဆိုပါ Chip နှင့် တစ်ပိုင်းလျှပ်ကူးပစ္စည်းများကို အမေရိကန်နိုင်ငံတွင်းရှိ အမေရိကန်စက်ရုံများတွင် အမေရိကန် နည်းပညာကိုသုံးကာ အမေရိကန်နိုင်ငံသား လုပ်သားများဖြင့် ထုတ်လုပ်နိုင်ရန် လိုအပ်ကြောင်း၊ ကမ္ဘာ့အကြီးဆုံး Chip ထုတ်လုပ်ရေးကုမ္ပဏီကြီးတစ်ခုဖြစ်သည့် TSMC သည် လာမည့် ၄ နှစ်ကျော် အတွင်း ကြီးမားသည့်ရင်းနှီးမြှုပ်နှံမှုကို လုပ်ဆောင်ရန် စီစဉ်လျက်ရှိကြောင်း စသည်ဖြင့် ထုတ်ဖော်ပြောကြားခဲ့ပါသည်။

ပြီးခဲ့သည့် ဧပြီလအတွင်း Arizona ရှိ Chip ထုတ်လုပ်ရေးလုပ်ငန်းအတွက် အမေရိကန်ဒေါ်လာ ၆၅ ဘီလီယံကို ရင်းနှီးမြှုပ်နှံခဲ့ကြောင်း TSMC က ထုတ်ပြန်ကြေညာခဲ့မှုကို NHK သတင်းစာမျက်နှာတွင် ရေးသားဖော်ပြထားပါသည်။

ကိုးကား-NHK

ဘာသာပြန်ဆိုသူ-ဦးထက်ထက်အောင်၊နစက-၄