အမေရိကန် လိုချင်သည့် မည်သည့်စစ်ပွဲကိုမဆို တရုတ်က အဆုံးထိ တိုက်ပွဲဝင်ရန် အသင့်ရှိကြောင်း တရုတ်သံရုံးပြောကြား

အကယ်၍ အမေရိကန်သည် တရုတ်အပေါ် မည်သည့် ထိပ်တိုက်ရင်ဆိုင်မှုမျိုးကိုမဆို လုပ်ဆောင်လာပါက မိမိတို့အနေဖြင့် အဆုံးစွန်ထိ တိုက်ပွဲဝင်ရန် အသင့်ရှိကြောင်း အမေရိကန် ဝါရှင်တန်ရှိ တရုတ်သံရုံးက ပြောကြား လိုက်ပါသည်။

အမေရိကန်က fentanyl ပြဿနာကို အမှန်တကယ် ဖြေရှင်းလိုသည့် ဆန္ဒရှိလျှင် တစ်ဖက်နှင့်တစ်ဖက် တန်းတူညီတူ ဆက်ဆံပြီး တရုတ်နှင့် တိုင်ပင်ရန် လိုအပ်ပါကြောင်း၊ အကယ်၍ အမေရိကန်က လိုချင်နေသည့် အကောက်ခွန်စစ်ပွဲ၊ ကုန်သွယ်ရေးစစ်ပွဲ သို့မဟုတ် အခြားမည်သည့် စစ်ပွဲမျိုးကိုမဆို   အဆုံးထိ တိုက်ပွဲဝင်သွားမည်ဖြစ်ကြောင်း တရုတ်သံရုံး ၏ X စာမျက်နှာတွင် ရေးသားထားပါသည်။ 

အစောပိုင်းက အမေရိကန်သမ္မတ ဒေါ်နယ်ထရမ့်က တရုတ်သည် fentanyl ကိစ္စတွင် ထိထိရောက်ရောက်တားမြစ်ပိတ်ပင်ရန် တာဝန် ပျက်ကွက်သဖြင့် တရုတ်သွင်းကုန်များကို ထပ်ဆောင်းအခကြေးငွေ ၁၀ ရာခိုင်နှုန်းမှ ၂၀ ရာခိုင်နှုန်းအထိ တိုးမြှင့်ကောက်ခံရန် အမိန့်လက်မှတ် ရေးထိုးခဲ့ပါသည်။ ထိုသို့ စည်းကြပ်ခွန်များကို တိုးမြှင့်လိုက်ခြင်းအပေါ် တရုတ်အနေဖြင့် ပြင်းထန်သည့် အရေးယူမှုများ ပြုလုပ်လာမည် မဟုတ်သည်ကို မိမိယုံကြည်ကြောင်း ဒေါ်နယ်ထရမ့်က ပြောကြားထားပါသည်။

ကိုးကား- TASS 

Photo: X

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃