ပနားမားတူးမြောင်းကို ထိန်းချုပ်ရန် စစ်ဘက်ဆိုင်ရာ ရွေးချယ်ခွင့်များ ဒေါ်နယ်ထရမ့် တောင်းဆို
News Image
တရုတ်၏ဩဇာလွှမ်းမိုးမှုများမှ ပနားမားတူးမြောင်းကို လုံခြုံစေမည့် အစီအစဉ်များရေးဆွဲရန် အမေရိကန်စစ်တပ်ကို သမ္မတ ဒေါ်နယ်ထရမ့် က ညွှန်ကြားထားကြောင်း သတင်းရင်းမြစ်များ၏ ပြောကြားချက်ကို ကိုးကားပြီး ရိုက်တာ၊ CNN နှင့် NBC သတင်းဌာနတို့က ရေးသား ဖော်ပြ ထားသည်။
ဒေါ်နယ်ထရမ့်သည် အမေရိကန်သမ္မတအဖြစ် တာဝန်ယူချိန်မှစတင်ပြီး ပနားမားတူးမြောင်းကို ပြန်လည်သိမ်းယူမည်ဆိုသည့် ခြိမ်းခြောက်မှု အများအပြားကို လုပ်ဆောင်ခဲ့ပြီးနောက် လပိုင်းအကြာတွင် ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ အတ္တလန္တိတ်နှင့် ပစိဖိတ်သမုဒ္ဒရာ တို့ကို ဆက်သွယ်ပေးသည့်အရေးကြီးသော ရေကြောင်းဆိုင်ရာ လမ်းကြောင်း တစ်ခုဖြစ်သည့် ပနားမားတူးမြောင်းသည် (၁၉၉၉) ခုနှစ်ကတည်းက ပနားမားနိုင်ငံ၏ ထိန်းချုပ်မှုအောက်တွင်ရှိခဲ့ခြင်းဖြစ်ကြောင်း သိရသည်။
ပနားမားတူးမြောင်းတွင် ကောက်ခံနေသော အခကြေးငွေနှင့် အဆိုပါ ဒေသတွင် တရုတ်၏တည်ရှိမှု မြင့်တက်လာခြင်းအပေါ် စိုးရိမ်မှုများကို ကိုးကားပြီး ပနားမားတူးမြောင်းကို ပြန်လည်သိမ်းယူရန် ဒေါ်နယ်ထရမ့် က အကြိမ်ကြိမ် ခြိမ်းခြောက်ပြောဆိုခဲ့ခြင်းဖြစ်ကြောင်း သိရသည်။ ယခုနှစ် အစောပိုင်းတွင် ဒေါ်နယ်ထရမ့်သည် ပနားမားတူးမြောင်းကို ပြန်လည် ထိန်းချုပ်ရန်အတွက် စစ်အင်အားအသုံးပြုမှုကိုငြင်းဆိုခဲ့ပြီး အမေရိကန်၏ စီးပွားရေးနှင့် အမျိုးသားလုံခြုံရေး အကျိုးစီးပွားများကို ကာကွယ်ရန်အတွက် ရွေးချယ်စရာအားလုံးမှာ စားပွဲဝိုင်း ပေါ်တွင်ရှိကြောင်း ထုတ်ဖော် ပြောဆိုခဲ့သည်။
အမေရိကန်အစိုးရသည် ပနားမားတူးမြောင်းတွင် အမေရိကန်၏ အကန့် အသတ်မရှိ ဝင်ရောက်ခွင့်များရရှိစေရန်အတွက် ရွေးချယ်ခွင့်များ ချက်ချင်း ထောက်ပံ့ပေးရန် အမေရိကန်စစ်ဌာနချုပ်ပင်တဂွန်ကို တရားဝင် တောင်းဆို ခဲ့ခြင်းဖြစ်ကြောင်း သတင်းရင်းမြစ်များ၏ ပြောကြားချက်ကို ကိုးကားပြီး CNN က ရေးသားဖော်ပြခဲ့သည်။
ထုတ်ပြန်ချက်တစ်ခုတွင် “ပနားမားတူးမြောင်းကို တရားမျှတပြီး အတားအဆီးမရှိသော အမေရိကန် စစ်တပ်နှင့်ကုန်သွယ်မှုဆိုင်ရာ ဝင်ရောက်ခွင့်များရရှိစေရန်အတွက် ယုံကြည်စိတ်ချရသော စစ်ဘက်ဆိုင်ရာ ရွေးချယ်မှုများ ပေးဆောင်စေလိုပါသည်” ဟု ရေးသားဖော်ပြထားသည်။
ကိုးကား-NP News
