လက်ဘနွန်၌ အစ္စရေး၏ တိုက်ခိုက်မှုကြောင့် လူပေါင်း ၂၀၀၀ ကျော် သေဆုံးပြီး ၁၀၀၀၀ နီးပါး ဒဏ်ရာ ရရှိ
News Image
အစ္စရေးအစိုးရသည် မကြာသေးမီက အီရန်၏ ဒုံးကျည်တိုက်ခိုက်မှုကို လက်တုံ့ပြန် တိုက်ခိုက်သွားမည်ဖြစ်ကြောင်းနှင့် လက်ဘနွန်ရှိ တီဟီရန် ကျောထောက်နောက်ခံပြု ဟစ်ဇ်ဘိုလာအပေါ် ထိုးစစ်ဆင်တိုက်ခိုက်မှု အရှိန်မြှင့် လုပ်ဆောင်သွားမည်ဖြစ်ကြောင်း အရိပ်အမြွက် ပြောကြားလိုက်သည်။
အစ္စရေးတပ်မတော်သည် လက်ဘနွန်တွင် လေကြောင်းတိုက်ခိုက်မှုများ လုပ်ဆောင်လျက်ရှိပြီး နိုင်ငံတောင်ပိုင်းတွင်လည်း မြေပြင်စစ်ဆင်ရေးကို စတင်လိုက်ကြောင်း သိရသည်။ အစ္စရေးတပ်မတော်နှင့် ဟစ်ဇ်ဘိုလာတို့အကြား တိုက်ပွဲဖြစ်ပွားမှုသည် ပြီးခဲ့သည့် အောက်တိုဘာလနောက်ပိုင်း အရှိန်မြှင့်လာခဲ့သည်။
ယင်းနောက်ပိုင်း အစ္စရေး၏တိုက်ခိုက်မှုကြောင့် လူပေါင်း ၂၀၀၀ ကျော်သေဆုံးကြောင်းနှင့် ထိခိုက်ဒဏ်ရာရရှိသူ ၁၀၀၀၀ ရှိကြောင်း လက်ဘနွန်အစိုးရကပြောသည်။ လူပေါင်း တစ်သန်းကျော်မှာလည်း အိုးအိမ်စွန့်ခွာ ထွက်ပြေးကြရကြောင်း သိရသည်။
အစိုးရက တည်ဆောက်ပေးထားသော ခိုလှုံရေးနေရာ ၉၀၀ နီးပါးအနက် အများစုမှာ လူပြည့်နေပြီဖြစ်ကြောင်း ကုလသမဂ္ဂ တာဝန်ရှိသူများက ပြောသည်။
လူများသည် အမိုးအကာမရှိသော လမ်းများပေါ် သို့မဟုတ် ပန်းခြံများတွင် အိပ်ကြရကြောင်းလည်း ၎င်းတို့က ပြောသည်။
အင်န်အိတ်ချ်ကေ
Source- မြန်မာ့အလင်း
