ယီမင်နိုင်ငံ၌ အမေရိကန်က လေကြောင်းတိုက်ခိုက်မှုများ ဆောင်ရွက်
News Image
ဆာနာ မတ် ၂၀
ယီမင်နိုင်ငံမြို့တော်ဆာနာ၌ မတ် ၁၉ ရက်တွင် အမေရကိန်တပ်မတော်က လေကြောင်းမှတိုက်ခိုက်ခဲ့ရာ ကိုးဦးသေဆုံးကြောင်း ဟူသီအဖွဲ့၏ ရုပ်မြင်သံကြားဌာန အယ်လ်မာဆီယာက ပြောကြားသည်။
ယင်းလေကြောင်းတိုက်ခိုက်မှုကြောင့် မြို့တော်ဆာနာ ဂီယတ်ဒေသရှိ အဆောက်အအုံများ ပျက်စီးခဲ့ပြီး ဒေသခံများ ဒဏ်ရာရခဲ့သည်။
ယခုတိုက်ခိုက်မှုသည် ဒုတိယအကြိမ်ဖြစ်ပြီး ပထမအကြိမ်တိုက်ခိုက်မှုအတွင်း ကလေးများနှင့် အမျိုးသမီးအပါအဝင် ၅၃ ဦး သေဆုံးခဲ့သည်။ ယခုတိုက်ခိုက်မှုအတွင်း ဟူသီထိန်းချုပ်ဒေသများဖြစ်သည့် ဆဒါ၊ အယ်ဗေဒါ၊ ဟိုဒီလက်နှင့် အယ်လ်ဂျပ်ဒေသများလည်း တိုက်ခိုက်ခံခဲ့ရသည်။ ဟူသီအဖွဲ့ကလည်း အမေရကိန်စစ်သင်္ဘော ဟယ်ရီ ထရူးမင်းကို မတ် ၁၉ ရက်တွင် ထပ်မံတိုက်ခိုက်ခဲ့ကြောင်း ပြောကြားသည်။
မိမိတို့သည် အစ္စရေးနင့်ပတ်သက်သည့် သင်္ဘောများကို တိုက်ခိုက်နေကြောင်းနှင့် ယခုကဲ့သို့ တိုက်ခိုက်ရခြင်းမှာ ဂါဇာဒေသတွင် အစ္စရေး၏ တိုက်ခိုက်မှုများ ရပ်တန့်ရေးနှင့် လူသားချင်းစာနာထောက်ထားမှုဆိုင်ရာ ပစ္စည်းများဝင်ရောက်ခွင့်ပေးရေးတို့အတွက် ဆောင်ရွက်ခြင်းဖြစ်ကြောင်း ဟူသီအဖွဲ့က ပြောကြားသည်။
အမေရိကန်တပ်မတော်က မိမိတို့သည် အပြည်ပြည်ဆိုင်ရာ ရေကြောင်းသွားလာရေးလမ်းကို ကာကွယ်ရန်အတွက် တိုက်ခိုက်ခြင်းဖြစ်ကြောင်း ပြောကြားသည်။
Source: ကြေးမုံသတင်းစာ
