ယူကရိန်းတပ်ဖွဲ့ဝင်များသည် Kursk အနီးရှိ ပြည်သူများကို သတ်ဖြတ်ပြီး နေအိမ်များကို မီးရှို့ခဲ့သည်ဟု စုံစမ်းစစ်ဆေးသူများက ဆို

ရုရှားစုံစမ်းစစ်ဆေးရေးကော်မတီက ရုရှား၏ Kursk ဒေသတွင် တည်ရှိသော Sudzha မြို့၌ ယူကရိန်းတပ်ဖွဲ့ဝင်များက ပြည်သူများကို သတ်ဖြတ်ခြင်း၊ လုယက်မီးရှို့ခြင်းများ ကျူးလွန်ခဲ့သည်ဟု သတင်းထုတ်ပြန်ခဲ့သည်။ မတ် ၂၃ (တနင်္ဂနွေနေ့)က ထုတ်ပြန်ခဲ့သော ထုတ်ပြန်ချက်အရ စစ်ဘက်စုံစမ်းစစ်ဆေးရေး တာဝန်ရှိသူများသည် ဒေသခံများနှင့် ပူးပေါင်းကာ ယူကရိန်းဘက်မှကျူးလွန်ခဲ့သော ရာဇဝတ်မှုများအတွက် သက်သေအထောက်အထားများ စုဆောင်းနေသည်ဟု ဆိုသည်။

Sudzha မြို့သည် ယူကရိန်းတပ်ဖွဲ့များ နယ်စပ်ဖြတ်ကျော် ဝင်ရောက်စဉ်က သိမ်းပိုက်ခဲ့သော အကြီးဆုံးမြို့ဖြစ်ပြီး ယခုလအစောပိုင်းတွင် ရုရှား တပ်ဖွဲ့များက ပြန်လည်သိမ်းပိုက်ခဲ့သည်။

ဒေသခံအများအပြား၏ ပြောကြားချက်များအရ Kursk ဒေသတွင် ပြည်သူများကိုသတ်ဖြတ်ရန် အမိန့်ပေးခဲ့သည်ဟူသောအချက်ကို အတည်ပြုနိုင်ကြောင်း စုံစမ်းစစ်ဆေးသူများကဆိုသည်။ ထိုကျူးလွန်မှုများတွင် ဆက်စပ်ပါဝင်ခဲ့သည့် ယူကရိန်းတပ်ဖွဲ့ဝင်များကို ရှာဖွေဖော်ထုတ်နိုင်ရေး လုပ်ဆောင်နေဆဲဖြစ်သည်။

ကိယက်ဗ်သည် ၂၀၂၄ ခုနှစ်၊ ဩဂုတ်လတွင် Kursk ဒေသသို့ စစ်ဆင်နွှဲခဲ့ပြီး Sudzha နှင့် ကျေးရွာများစွာကို သိမ်းပိုက်ခဲ့သည်။ ယူကရိန်း ခေါင်းဆောင် ဗလာဒီမာဇီလန်းစကီးက အဆိုပါစစ်ဆင်မှုသည် အနာဂတ်ငြိမ်းချမ်းရေးဆွေးနွေးပွဲများအတွက် အကျိုးအမြတ်ရရှိရန် ရည်ရွယ်ခဲ့သည်ဟု ပြောကြားခဲ့သည်။ သို့သော် ရုရှားတပ်ဖွဲ့များက တန်ပြန်စစ်ဆင်ရေးကို ချက်ချင်းဆောင်ရွက်ခဲ့ပြီး နယ်မြေများကို တဖြည်းဖြည်း ပြန်လည်သိမ်းပိုက်လျက်ရှိသည်။ ရုရှားကာကွယ်ရေးဝန်ကြီးဌာန၏ အဆိုအရ ယူကရိန်းတပ်ဖွဲ့များ သိမ်းပိုက်ထားသော နယ်မြေ၏ ၈၆% ခန့် ကို ပြန်လည်သိမ်းပိုက်ပြီးဖြစ်သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂