ပါလက်စတိုင်းပိုင်နက်နယ်မြေအတွင်း၌ အခြေချနေထိုင်မှုအားလုံးကို ချက်ချင်းရပ်တန့်ရန် အစ္စရေးအစိုးရအား တောင်းဆို

ကုလသမဂ္ဂ အတွင်းရေးမှူးချုပ် အန်တိုနီယိုဂူတာရက်စ်က အစ္စရေးတပ်ဖွဲ့ဝင်များ သိမ်းပိုက်ထားသော ပါလက်စတိုင်းပိုင်နက် နယ်မြေအတွင်း၌ အခြေချနေထိုင်မှုအားလုံးကို ချက်ချင်းရပ်တန့်ရန် အစ္စရေးအစိုးရအားတောင်းဆိုခဲ့ကြောင်း သိရသည်။

အရှေ့ ဂျေရုဆလင်၊ ဂါဇာကမ်းမြောင်နှင့် ယခုနှစ် မေလကုန်အထိ တစ်နှစ်အတွင်း သိမ်းပိုက် ထားသော ဆီးရီးယားဂိုလန်အပါအဝင် အနောက်ဘက်ကမ်းရှိ အစ္စရေးတို့၏ လှုပ်ရှားမှုများအပေါ် ခြုံငုံရေးသားထားသည့် အစီရင်ခံစာတစ်စောင်ကို ဂူတာရက်စ်က ယမန်နေ့တွင် ထုတ်ပြန်ခဲ့သည်။

ပြီးခဲ့သည့်နှစ် အောက်တိုဘာ ၇ ရက်က ဟားမတ်စ်တို့၏ နယ်စပ်ဖြတ်ကျော်တိုက်ခိုက်မှု ဖြစ်ပွားပြီးနောက် အစ္စရေးတို့က အခြေချနေထိုင်ရေး လှုပ်ရှားမှုများ သိသိသာသာ တိုးချဲ့ လုပ်ဆောင်လာကြောင်း ၎င်းကထောက်ပြခဲ့သည်။

အတည်ပြုပြောကြား

ပါလက်စတိုင်းများအပေါ် အစ္စရေးလုံခြုံရေးတပ်ဖွဲ့များနှင့် အခြေချနေထိုင်သူများ၏ အကြမ်းဖက် မှုသည် သိသိသာသာတိုးလာသည့်အပြင် ပါလက်စတိုင်းများအပေါ် အစ္စရေး၏ ခွဲခြားဆက်ဆံမှုနှင့် ဖိနှိပ်ချုပ်ချယ်မှုသည်လည်း ပိုမိုခိုင်မာလာစေကြောင်း ဂူတာရက်စ်က ပြောသည်။

အထူးသဖြင့် ပါလက်စတိုင်းပိုင်အဆောက်အအုံပေါင်း ၁၂၇၇ လုံးကို ဖြိုချခဲ့ပြီးနောက် အိမ်ရာယူနစ် ၁၉၅၀၀ ခန့်ပြန်လည်ဆောက်လုပ်ပေးရန် အစီအစဉ်များကို ဂူတာရက်စ်က အတည်ပြုပြောကြား သည်။

ပါလက်စတိုင်း နယ်မြေများအတွင်း၌ အခြေချနေထိုင်ရေး လှုပ်ရှားမှုအားလုံးကို ချက်ချင်း ရပ်တန့်ရန်နှင့် ပါလက်စတိုင်းပြည်သူများအား အကြမ်းဖက်ဖြိုခွင်းခြင်းနှင့် အတင်းအကျပ် နှင်ထုတ်ခြင်းများကို ရပ်တန့်ရန် ဂူတာရက်စ်က အစ္စရေးအစိုးရအား တောင်းဆိုခဲ့သည်။

အခြေချနေထိုင်သူများနှင့် အစ္စရေးလုံခြုံရေးတပ်ဖွဲ့များ၏ အကြမ်းဖက်မှုများအားလုံးကို သေချာ စွာ စုံစမ်းစစ်ဆေးရန်လည်း အစ္စရေးအစိုးရအဖွဲ့အား ဂူတာရက်စ်က တိုက်တွန်းခဲ့ကြောင်း သိရ သည်။

ကိုးကား- အင်န်အိတ်ချ်ကေ

Source- မြန်မာ့အလင်း