ဥရောပက ပျက်စီးရာပျက်စီးကြောင်း လမ်းကြောင်းပေါ်ကို ရောက်နေပြီ ဟု ဂျာမနီ ဝန်ကြီးချုပ်ဟောင်း မာကယ်လ်ပြောဆို

ဥရောပသမဂ္ဂအတွက် ပျက်စီးခြင်းကိုဖြစ်စေနိုင်သည့် ပိုမိုတင်းကြပ်သော နိုင်ငံတကာ ရွှေ့ပြောင်းနေထိုင်မှုနှင့် နယ်စပ်ထိန်းချုပ်ရေး မူဝါဒများ အကြောင်း ဂျာမနီ၏ ဝန်ကြီးချုပ်ဟောင်း အန်ဂျလာ မာကယ်က သတိပေးလိုက်သည်။ ထိုသတိပေးချက်မှာ ခိုလှုံခွင့်တောင်းခံသူများ ဝင်ရောက်မှုကို ကန့်သတ်သည့် ဂျာမနီ၏ လတ်တလော အစီအမံများနောက်ပိုင်း ထွက်ပေါ်လာခြင်းဖြစ်သည်။

မာကယ်က လွန်ခဲ့သော သီတင်းပတ်က Neu-Ulm မြို့၌ ကျင်းပသည့် 'Southwestern Press Forum' အခမ်းအနားတွင် သူမ၏ "Freedom" စာအုပ်ကို မိတ်ဆက်စဉ် ထိုကဲ့သို့ ပြောကြားခဲ့ခြင်းဖြစ်သည်။

“ဂျာမနီ-သြစတြီးယား သို့မဟုတ် ဂျာမနီ-ပိုလန်နယ်စပ်တွင် ပိတ်ပင် တားဆီးရုံမျှဖြင့် တရားမ၀င် ရွှေ့ပြောင်းဝင်ရောက်လာမှုများကို ပြတ်ပြတ် သားသား တိုက်ဖျက်နိုင်မည်ဟု ကျွန်မ မယုံကြည်ပါ၊ ဥရောပ တစ်တိုက် လုံးပါဝင်သည့် ဖြေရှင်းနည်းတွေကို ကျွန်မ အမြဲတမ်း ထောက်ခံခဲ့ပါသည်” ဟု ဂျာမနီ ဝန်ကြီးချုပ် Friedrich Merz ၏ အစိုးရအဖွဲ့မှ ချမှတ်ခဲ့သော နောက်ဆုံးအစီအမံများနှင့် ပတ်သက်၍ မေးမြန်းမှုတွင် Merkel က ဖြေကြားခဲ့သည်။

အဆိုပါ မူဝါဒသစ်တွင် ဂျာမနီ၏ ကုန်းတွင်းနယ်စပ်အားလုံးတွင် ခိုလှုံခွင့် လျှောက်ထားမှုများကို တားမြစ်ထားပြီး မာကယ်၏ ၂၀၁၅ ခုနှစ်က နယ်စပ်ဖွင့်ပေးခဲ့သည့် သဘောထားနှင့် လုံးဝဆန့်ကျင်ဘက်ဖြစ်နေသည်။ ကလေးများ၊ ကိုယ်ဝန်ဆောင်အမျိုးသမီးများနှင့် အခြားအားနည်းချက် ရှိသူများအတွက် ခြွင်းချက်များ သတ်မှတ်ထားသည်။

မာကယ်၏ အဆိုအရ အဆိုပါကန့်သတ်မှုသည် ဥရောပသမဂ္ဂအတွင်း လွတ်လပ်စွာ သွားလာခွင့်နှင့် ရှင်ဂန်ဇုန်၏ ခိုင်မာသော အခြေခံမူကို ခြိမ်းခြောက်နေသည်ဟု ဆိုသည်။ ရှင်ဂန်ဇုန်သည် ဥရောပအဖွဲ့ဝင် နိုင်ငံအများစုတွင် ဗီဇာမလိုအပ်ဘဲ ခရီးသွားလာခွင့်ကို ခွင့်ပြုထားသည်။

မာကယ်က လူဝင်မှုနှင့် ခရီးသွားလာရေး ပြုပြင်ပြောင်းလဲမှုများကို ဥရောပသမဂ္ဂအဆင့်တွင် သဘောတူညီသင့်သည်ဟု ပြောကြားခဲ့သည်။ “အခြားနည်းလမ်းမရှိပါက၊ ဥရောပကို ပျက်စီးသည်အထိ တွေ့မြင်ရနိုင်သည်” ဟု သူမက သတိပေးခဲ့သည်။

၂၀၁၅-၁၆ ခုနှစ် ဒုက္ခသည်အကျပ်အတည်း အထွတ်အထိပ်တွင် ဂျာမနီ သို့ ဒုက္ခသည်တစ်သန်းကျော် ဝင်ရောက်ခွင့်ပြုခဲ့သည့် မာကယ်၏ တံခါးဖွင့် မူဝါဒသည် နိုင်ငံရေးအရ ပြင်းထန်သော ပြန်လည်တုံ့ပြန်မှုကို ရင်ဆိုင်ခဲ့ရပြီး “ဘေးအန္တရာယ်ကိုဖိတ်ခေါ်မှု” ဟု ဝေဖန်ခံခဲ့ရသည်။

ဥရောပသမဂ္ဂ၏ စာရင်းဇယားများအရ၊ ဂျာမနီသည် ၂၀၂၃ ခုနှစ်တွင် ခိုလှုံခွင့်လျှောက်ထားသူ ၂၃၇,၀၀၀ ကျော်ကို လက်ခံခဲ့ပြီး ဥရောပသမဂ္ဂ အဖွဲ့ဝင်နိုင်ငံများ၏ လက်ခံမှုစုစုပေါင်း၏ လေးပုံတစ်ပုံခန့်ရှိသည်။ ဂျာမနီသည် ဥရောပသမဂ္ဂတွင် ခိုလှုံခွင့်တောင်းခံသူများ၏ အဓိက ဦးတည်ရာ နိုင်ငံအဖြစ် ဆက်လက်တည်ရှိနေဆဲဖြစ်သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂