အမေရိကန်တရားရုံးက ထရမ့်၏ ကုန်သွယ်ခွန်များ တိုးမြှင့် စည်းကြပ်ခြင်းကို တားမြစ်

ဗဟိုအစိုးရတရားရုံးတစ်ခုက ဗုဒ္ဓဟူးနေ့ (မေ ၂၈) တွင် သမ္မတ ဒေါ်နယ်ထရမ့်အား စီးပွားရေးလုပ်ငန်းကြီးများမှ သာမန်အမေရိကန် နိုင်ငံသားများအထိ လူတိုင်းအတွက် သွင်းကုန်စျေးနှုန်းများ မြင့်တက်စေခဲ့သည့် ကုန်သွယ်ခွန်များ တိုးမြှင့်စည်းကြပ်ရန် ၎င်း၏ လုပ်ပိုင်ခွင့်အာဏာကို ကျော်လွန်အသုံးပြုခဲ့သည်ဟု ဆုံးဖြတ်ခဲ့သည်။

သို့သော် အုပ်ချုပ်ရေးအဖွဲ့က ဗုဒ္ဓဟူးနေ့ (မေ ၂၈) ညနေပိုင်းတွင် ချက်ချင်းပင် ဆုံးဖြတ်ချက်ကို အယူခံဝင်ခဲ့ပြီး ထရမ့်၏ သွင်းကုန်ခွန်များ ဆက်လက်တည်ရှိနေမည် (သို့မဟုတ်) ကမ္ဘာ့စီးပွားရေးကို ပြန်လည် ပုံဖော်နိုင်ခြေရှိသည်ဆိုသည့် အားပြိုင်မှုကို ရှည်လျားစေကာ စားသုံးသူများနှင့် ကုမ္ပဏီများအတွက် အခြေအနေကို မရေရာဖြစ်စေခဲ့သည်။

မန်ဟက်တန်ရှိ လူသိနည်းသော တရားရုံးတစ်ခုဖြစ်သည့် US Court of International Trade မှ တရားသူကြီး သုံးဦးပါဝင်သည့် အဖွဲ့က အရေးပေါ်စီးပွားရေးဆိုင်ရာအာဏာများကို ကိုးကား၍ ဧပြီလ ၂ ရက်နေ့တွင် ကြေညာခဲ့သည့် “Liberation Day” ကုန်သွယ်ခွန်များအပါအဝင် ထရမ့်၏ ကမ္ဘာလုံးဆိုင်ရာ ကုန်သွယ်ခွန်များကို ရပ်တန့်လိုက်သည်။ ၎င်းက ထရမ့်အား အမေရိကန်ပြည်ထောင်စုသို့ ဝင်ရောက်လာသည့် ဖန်တန်နီလ် ကို တိုက်ဖျက်ရန်အတွက် ယခုနှစ်အစောပိုင်းတွင် တရုတ်၊ မက္ကဆီကိုနှင့် ကနေဒါတို့အပေါ် စည်းကြပ်ခဲ့သည့် ကုန်သွယ်ခွန်များကို အတည်ပြုခြင်းမှလည်း တားမြစ်လိုက်သည်။

တရားရုံးက အခြားကုန်သွယ်ဖက်အများစုနှင့် သဘောတူညီချက်များ မပြုလုပ်ရသေးမီတွင် ထရမ့်၏ ကမ္ဘာလုံးဆိုင်ရာ ကုန်သွယ်ခွန်များကို ရပ်တန့်သွားစေမည့် အမြဲတမ်းတားမြစ်ချက်တစ်ရပ်ကို ဆုံးဖြတ်ခဲ့သည်။ တရားရုံးက အမြဲတမ်းတားမြစ်ချက်ကို အာဏာတည်စေရန် အုပ်ချုပ်ရေးဆိုင်ရာ အမိန့်များအတွက် ၁၀ ရက် သတ်မှတ်ပေးခဲ့သည်။ 

အမိန့်သည် တရုတ်နိုင်ငံအပေါ် ထရမ့်၏ ၃၀% ကုန်သွယ်ခွန်၊ မက္ကဆီကိုနှင့် ကနေဒါမှ တင်သွင်းသည့် အချို့သော ကုန်ပစ္စည်းများအပေါ် ၂၅% ခွန်နှင့် အမေရိကန်သို့ ဝင်ရောက်လာသည့် ကုန်ပစ္စည်းအများစုအပေါ် ၁၀% အထွေထွေကုန်သွယ်ခွန်များကို ရပ်တန့်လိုက်သည်။သို့သော် ၎င်းက ကားများ၊ ကားအစိတ်အပိုင်းများ၊ သံမဏိ သို့မဟုတ် အလူမီနီယမ်များအပေါ် ၂၅% ကုန်သွယ်ခွန်များကို မသက်ရောက်စေဘဲ ထိုကုန်သွယ်ခွန်များကို Trade Expansion Act ၏ Section 232 အရ သတ်မှတ်ထားခြင်းဖြစ်ပြီး ထရမ့်၏ ကုန်သွယ်ရေးလုပ်ဆောင်ချက်များအတွက် ကိုးကားခဲ့သည့် ဥပဒေနှင့်ကွဲပြားသည်။

ကိုးကား- CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂