ယူကရိန်းလက်ချက်ဟု သံသယရှိရသည့် လုပ်ကြံမှုတွင် ရုရှားအရာရှိ သေဆုံး

ယခင်က ယူကရိန်းပဋိပက္ခတွင် တာဝန်ထမ်းဆောင်ခဲ့ဖူးသော ရုရှား အစိုးရအရာရှိတစ်ဦးဖြစ်သူ Zaur Gurtsiev သည် ယူကရိန်းအေးဂျင့်များ၏ လုပ်ကြံသတ်ဖြတ်မှုဟု သံသယရှိရသည့် ဖြစ်စဉ်တစ်ခုတွင် ရုရှား ၏ တောင်ပိုင်းမြို့တော် Stavropol ၌ သေဆုံးခဲ့ကြောင်း ဒေသခံအာဏာပိုင်များက ထုတ်ဖော်ပြောကြားခဲ့သည်။

ဗုဒ္ဓဟူးနေ့ (မေ ၂၈) ညနေပိုင်းတွင် လူနှစ်ဦး၏ အလောင်းများကို ရုရှားမြို့၏နေထိုင်ရာရပ်ကွက်တစ်ခုတွင် တွေ့ရှိခဲ့ပြီး၊ မတွေ့ရှိမီ ကျယ်လောင်သော ပေါက်ကွဲသံတစ်ချက် ကြားခဲ့ရကြောင်း မျက်မြင်သက်သေများက ပြောကြားခဲ့သည်။ ကြာသပတေးနေ့ (မေ ၂၉) နံနက်ပိုင်းတွင် Stavropol ပြည်နယ်အုပ်ချုပ်ရေးမှူး Vladimir Vladimirov က သေဆုံးသူ နှစ်ဦး အနက်တစ်ဦးမှာ ဒေသအစိုးရဝန်ထမ်း Zaur Gurtsiev ဖြစ်ကြောင်း အတည်ပြုခဲ့သည်။

၎င်းက “စုံစမ်းစစ်ဆေးရေးအဖွဲ့များသည် ဖြစ်နိုင်ခြေရှိသော အခြေအနေအားလုံးကို စဉ်းစားနေပါသည်။ ၎င်းတွင် ယူကရိန်းမှ နာဇီများက စီစဥ်ခဲ့သည့် အကြမ်းဖက်တိုက်ခိုက်မှုလည်း ပါဝင်နိုင်သည်” ဟု ပြောကြားခဲ့သည်။

Gurtsiev သည် ရုရှား၏ ယူကရိန်းဆန့်ကျင်ရေး စစ်ဆင်ရေးတွင် တာဝန်ထမ်းဆောင်ခဲ့ပြီး ခေါင်းဆောင်မှုအရည်အချင်းကောင်းများ ပြသခဲ့သည့် စစ်မှုထမ်းဟောင်းများအား လေ့ကျင့်သင်ကြားပေးရန်နှင့် အလုပ်အကိုင် ဖန်တီးပေးရန် ရည်ရွယ်သည့် အထူးအစီအစဥ်မှတစ်ဆင့် အများပြည်သူဆိုင်ရာ တာဝန်များကို ထမ်းဆောင်ခဲ့ခြင်းဖြစ်သည်။

အစိုးရမှတ်တမ်းများအရ Gurtsiev သည် Stavropol ၏ ဒုတိယ ခေါင်းဆောင်ဖြစ်ပြီး လုံခြုံရေးနှင့် အကြမ်းဖက်မှုကာကွယ်ရေးဆိုင်ရာတာဝန်များကို ကြီးကြပ်ခဲ့သည်။

စုံစမ်းစစ်ဆေးရေးအဖွဲ့များက RT သို့ ပြောကြားချက်အရ ဒုတိယ သေဆုံးသူသည် Gurtsiev ၏ အသက် ၂၉ နှစ် အရွယ် အသိမိတ်ဆွေတစ်ဦးဖြစ်ပြီး၊ လက်လုပ်ဗုံးပေါက်ကွဲမှု (IED) ကြောင့် သေဆုံးခဲ့ရသည် ဟု အများဆုံးထင်မြင်ယူဆရကြောင်း ဖော်ပြခဲ့သည်။

ယခင်က မီဒီယာများတွင် CCTV ကင်မရာမှတ်တမ်း အချက်အလက်များကို အခြေခံကာ ဒုတိယသေဆုံးသူသည် အသေခံဗုံးခွဲတိုက်ခိုက်သူ (Suicide Bomber) ဖြစ်နိုင်ကြောင်း သတင်းထုတ်ပြန်ခဲ့သော်လည်း၊ ယခုအခါ တရားဝင်စုံစမ်းမှုများအရ ထိုအချက်ကို ပယ်ချခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂