ထိုင်း ပြည်သူ့ပါတီက ပါတီဝင်များအား စစ်အာဏာသိမ်းမှုကို မထောက်ခံရန် သတိပေး

ထိုင်း ပြည်သူ့ပါတီက နိုင်ငံရေးအကျပ်အတည်းဖြေရှင်းရန်အတွက် စစ် အာဏာသိမ်းမှုကို ထောက်ခံသည့် လုပ်ရပ်မျိုး မပြုလုပ်ရန် အဖွဲ့ဝင် များအား “ပါတီ၏မူဝါဒနှင့် လမ်းစဉ်ကို မကျော်လွန်ရ” ဟု သတိပေးထားသည်။ ပါတီအတွင်းရေးမှူး Sarayut Jailak က တနင်္လာနေ့ (ဇွန် ၃၀) တွင် အဖွဲ့ဝင်အားလုံးထံ အဆိုပါသတိပေးချက်ကို ညွှန်ကြားချက် ထုတ်ပြန်ကာ အများပြည်သူသိရှိစေခဲ့သည်။

၎င်းက အဖွဲ့ဝင်အားလုံး “ပါတီ၏မူဝါဒနှင့် လမ်းစဉ်ကို ကျော်လွန်ခြင်း မရှိစေရ” ဟု ပြောကြားခဲ့ပြီး တပ်မတော်အား အကြမ်းဖက်မှု နည်းလမ်း အသုံးပြုရန် ထောက်ခံသည့် မည်သည့်သတင်းစကားမျှ မပြောဆိုရန် သို့မဟုတ် အာဏာသိမ်းရန် အားပေးသည့် လှုပ်ရှားမှုများတွင် ပါဝင်ခြင်း မပြုရန် သတိပေးခဲ့သည်။ 

ဝန်ကြီးချုပ် ပေထုန်တန် ရှင်နာဝပ်ထရာက အောက်လွှတ်တော်ကို ဖျက်သိမ်းပြီး မဲဆန္ဒရှင်များက ဆုံးဖြတ်ခွင့်ပေးရန် တောင်းဆိုချက်ကို ပါတီက ထပ်လောင်းပြောကြားခဲ့သည်။

ဝန်ကြီးချုပ်၏ ကမ္ဘောဒီးယား ဆီးနိတ်ဥက္ကဋ္ဌ ဟွန်ဆင်နှင့် ဖုန်းစကား ပြောဆိုမှုဖြစ်စဉ် မီဒီယာများတွင် လျှို့ပေါက်ကြားခဲ့ပြီးနောက် နိုင်ငံရေး အရှုပ်တော်ပုံများ ဖြစ်ပွားကာ ညွန့်ပေါင်းအစိုးရအဖွဲ့ ယိုင်နဲ့ခဲ့သည်။

အတိုက်အခံခေါင်းဆောင် Natthaphong Ruengpanyawut က တနင်္ဂနွေနေ့ (ဇွန် ၂၉) တွင် ပြည်သူ့ပါတီအနေဖြင့် စစ်တပ်က နိုင်ငံရေး အကျပ်အတည်းကို ဝင်ရောက်ဖြေရှင်းရန် အခွင့်အရေးဖန်တီးမည့် မည်သည့် လုပ်ရပ်ကိုမဆို အခိုင်အမာ ကန့်ကွက်ကြောင်း ပြောကြား ခဲ့သည်။ “ဝန်ကြီးချုပ်နှင့် အစိုးရ၏ အဆိုပါကျရှုံးမှုအခွင့်အရေးကို အသုံး ချ၍ အာဏာသိမ်းရန် လမ်းဖွင့်ပေးခြင်း သို့မဟုတ် နိုင်ငံရေး ပြဿနာများ ကို ဒီမိုကရေစီမဟုတ်သော နည်းလမ်းများဖြင့် ဖြေရှင်းရန် မည်သူ တစ်ဦး တစ်ယောက်ကိုမျှ ခွင့်ပြုမထားသင့်ပါ” ဟု ၎င်းက ပြောကြားခဲ့သည်။

အဓိက အတိုက်အခံပါတီသည် စနေနေ့ (ဇွန် ၂၈) က အစိုးရ ဆန့်ကျင်ရေး အစည်းအဝေးတွင် ဆွေးနွေးသူ Sondhi Limthongkul က စစ်တပ်၏ ဝင်ရောက်စွက်ဖက်နိုင်ခြေအကြောင်း လူထုအစည်းအဝေးကြီးကို သတိပေး ပြောကြားပြီးနောက် အာဏာသိမ်းမှုကို ဆန့်ကျင်သည့် ၎င်းတို့၏ သဘောထားကို ရှင်းလင်းစွာ ဖော်ပြခဲ့သည်။ မီဒီယာလုပ်ငန်းရှင် သူဌေးကြီး နှင့် ယခင်အစိုးရဆန့်ကျင်ရေး ခေါင်းဆောင်ဟောင်းဖြစ်သူ ဆွန်ဒီက ၎င်းသည် အာဏာသိမ်းမှုကို ထောက်ခံသည့်အနေဖြင့် ပြောဆိုခြင်း မဟုတ်ကြောင်း ပြောကြားခဲ့သည်။

အောင်ပွဲခံ အထိမ်းအမှတ် ကျောက်တိုင်ရင်ပြင်တွင် ကျင်းပခဲ့သော ဆန္ဒပြပွဲကို “အချုပ်အခြာအာဏာကာကွယ်ရေး ပြည်သူ့စည်းလုံး ညီညွတ်ရေး” အဖွဲ့မှ စီစဉ်ခဲ့သည်။ အရပ်ဘက် ၁၅ ဖွဲ့ပါဝင်သော “ပြည်သူ့ ဒီမိုကရေစီ အတွက် လှုပ်ရှားမှု” အဖွဲ့ချုပ်က တနင်္လာနေ့ (ဇွန် ၃၀) တွင် ဖုန်းစကား ပြောဆိုမှုနှင့်ပတ်သက်သည့် အဖြစ်အပျက်များအတွက် တာဝန်ယူ၍ပေထုန်တန် နုတ်ထွက်ရန် တောင်းဆိုသည့် ထုတ်ပြန်ချက်တစ်ရပ် ထုတ်ပြန်ခဲ့သည်။

အဆိုပါအဖွဲ့သည် အာဏာသိမ်းမှုအတွက် မည်သည့်လုပ်ရပ်ကိုမဆို အပြင်းအထန် ကန့်ကွက်ကြောင်း ပြောကြားခဲ့ပြီး ယင်းကြောင့် နိုင်ငံရေး တည်ငြိမ်မှုကို ထိခိုက်စေကာ ထိုင်းနိုင်ငံ၏ အပြည်ပြည် ဆိုင်ရာ ယုံကြည်မှုကို ပျက်ပြားစေမည်ဟု ဆိုသည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂